Prosperidad Por Pone Bo Fe na Prueba

PROSPERIDAD por pone fe di un persona recto na prueba. Forsando pa bira materialmente próspero por hiba na pérdida di fe. (1 Timoteo 6:9, 10) Pero prosperidad por pone fe na prueba den otro manera tambe. Ora un persona hustu ta observá cu hopi hende inhustu ta prosperando materialmente miéntras cu e ta sufriendo, e por ser tentá pa sigui tras di un curso malbado. Realmente, esaki a hiba asta algun sirbidor di Jehova na duda e balor di sigui tras di un bida recto!

Esaki a sosodé cu e levita músico, Asaf, durante reinado di David, rey di Israel. Asaf a componé salmonan cu a ser usá den adoracion público. Huntu cu Heman i Jedutun, tambe el a profetisá, dunando Jehova Dios alabansa i gradicimentu cu acompañamentu musical. (1 Crónica 25:1; 2 Crónica 29:30) Aunke Asaf tabata privilegiá, Salmo 73 ta mustra cu e prosperidad material di hende malbado a resultá di ta un prueba grandi pa su fe.

Actitud Peligroso di Asaf

“Dios en berdad ta bon pa Israel, pa cu esnan limpi di curason. Encuanto ami, mi pianan casi a desviá, mi pasonan casi a ser hací di slip.” (Salmo 73:1, 2) Pa medio dje palabranan aki, Asaf a reconocé cu Jehova tabata bon pa e nacion di Israel. Esei tabata specíficamente e caso pa cu esnan “limpi di curason,” pasobra tabata nan deseo pa duna Dios debocion exclusivo i contribuí n’e santificacion di su nomber santu. Si nos tin tal actitud, nos lo bendicioná Jehova dor di papia bon di dje ora nos ta ser poné na prueba penosamente dor di prosperidad dje malbadonan of dor di cualkier otro situacion.—Salmo 145:1, 2.

Aunke Asaf tabata conciente di Jehova su bondad, su pianan casi a desviá for di un caminda hustu. Tabata como si nan a slip riba suela di ijs durante un maraton agotante. Pa ki motibu su fe a bira asina débil? El a splica: “Pasobra mi a bira envidioso di esnan cu ta gaba, ora mi a mira e pas mes di hende malbado. Pasobra nan no tin doló di morto; i nan barica grandi ta gordo. Nan no ta ni sikiera den e afan penoso di hende mortal, i nan no ta ser plagá mescos cu otro hende.”—Salmo 73:3-5.

E prosperidad material di hende inhustu a pone Asaf envidiá nan. Nan a parce di disfrutá di un bida pacífico, aunke nan a acumulá rikesa den un manera fraudulento. (Compará cu Salmo 37:1.) Apesar di nan obranan malbado, di aparencia exterior nan tabata sigur. Realmente, nan bida a parce di caba sin e dolónan teribel di morto! Tin biaha nan a muri pacíficamente i sigur di nan mes, inconciente di un necesidad spiritual. (Mateo 5:3) N’e otro banda, algun sirbidor di Dios ta sufri di malesa i morto doloroso, pero e ta sostené nan i nan tin e speransa maraviyoso di resureccion.—Salmo 43:1-3; Juan 5:28, 29.

Hopi hende malbado no tin problema cu salú cu ta prevení nan di disfrutá di nan suministro abundante di cuminda. “Nan barica grandi ta gordo,” di rijs afó. Ademas, nan no ta “den e afan penoso di hende mortal,” pasobra distinto dje masa grandi di humanidad, nan no mester lucha pa obtené necesidadnan di bida. Asaf a concluí cu e malbadonan “no ta ser plagá mescos cu otro hende.” Specialmente nan ta scapa fo’i prueba cu hende piadoso ta experenciá debí cu e últimonan aki ta pega n’e normanan hustu di Jehova den e mundu malbado di Satanas.—1 Juan 5:19.

Pa motibu cu e malbadonan ta prosperá, Asaf a pasa na bisa di nan: “P’esei orguyo a sirbi como un cadena di garganta pa nan; violencia ta tapa nan manera un paña. Nan wowo a bula afó di gordura; nan a superá e imaginacionnan dje curason. Nan ta haci mofa i ta papia di loke ta malu; encuanto hacimentu di fraude nan ta papia den un estilo elevá. Nan a pone nan boca den cielu mes, i nan lenga mes ta anda riba tera.”—Salmo 73:6-9.

Hende malbado ta carga orguyo manera “cadena di garganta” i asina hopi ta nan obranan violento cu nan ta ‘tapá cu nan manera cu un paña.’ Determiná pa sigui nan mes caminda, nan ta intimidá otronan. Wowo di hende malbado no ta hundu causá pa falta di alimentacion sino ‘ta bula afó di gordura,’ saliendo afó debí na vet como resultado di golosidad. (Proverbio 23:20) Nan plannan ta asina exitoso cu asta nan ta ‘surpasá e imaginacionnan di nan curason.’ Nan ta papia di nan fraude den un “estilo elevá” i orguyoso. Realmente, ‘nan ta pone nan boca den cielu, i nan lenga ta anda riba tera’! Faltando respet pa cualkier persona den cielu of riba tera, nan ta blasfemá Dios i ta calumniá hende.

Aparentemente, no ta Asaf so a ser afectá negativamente pa loke el a mira. El a bisa: “P’esei e [Dios] ta trece su pueblo bek aki, i e awanan di loke ta yen ta ser secá pa nan. I nan a bisa: ‘Con Dios a yega di sa? I ta existí conocimentu den esun Haltísimo?’” (Salmo 73:10, 11) E texto hebreo por nificá cu debí cu hende malbado ta parce di prosperá, algun entre Dios su pueblo ta adoptá un punto di bista robes i ta cai den e mésun estado di esnan sin ley, bisando: ‘Dios no sa kico ta pasando i lo no actua contra maldad.’ N’e otro banda, mirando mal hende cu ta practicá maldad aparentemente scapando castigu, ta mescos cu ora un hende mester bebe un líkido venenoso, cua ta impulsá hende recto pa puntra: ‘Con Dios por tolerá e cosnan aki? E no ta mira loke ta pasando?’

Comparando su circunstancianan cu esnan dje malbadonan, Asaf a bisa: “Mira! Esakinan ta e malbadonan, kendenan ta trankil pa tempu indefiní. Nan a aumentá nan medio di mantencion. Siguramente ta en bano cu mi a limpia mi curason i cu mi a laba mi mannan den inocencia mes. I mi a yega di ta plagá henter dia, i mi coreccion ta tur mainta.” (Salmo 73:12-14) Asaf a sinti cu tabata inútil pa hiba un bida recto. Hende malbado a prosperá, probablemente ‘aumentando nan medio di mantencion’ dor di medionan fraudulento. Nan a parce di scapa castigu p’e peor malecho, pero Asaf a ser plagá “henter dia”—for di ora el a lanta te ora el a bai drumi anochi. El a sinti cu Jehova tabata corigiend’e tur mainta. Ya cu esaki no a parce hustu, esei a pone Asaf su fe na prueba.

Un Reahuste den Pensamentu

Realisando finalmente cu su pensamentu tabata robes, Asaf a declará: “Si mi a bisa: ‘Lo mi conta un cuenta manera esei,’ mira! contra e generacion di bo yunan lo mi mester a actua cu traicion. I mi a sigui considerá pa sa esaki; tabata un cos trabahoso den mi bista, te ora mi a pasa na drenta den e santuario magnífico di Dios. Mi kier a dicerní nan futuro. Siguramente riba suela cu ta slip ta caminda bo ta pone nan. Bo a laga nan cai den ruina. O con nan a bira un obheto di asombro manera den un momentu! Con nan a alcansá nan fin, con nan a keda terminá mediante teror diripiente! Manera un soño despues di lanta, O Jehova, asina ora bo mes ta lanta lo bo despreciá nan imágen mes.”—Salmo 73:15-20.

Tabata bon cu Asaf no a expresá un keho, pasobra bisando públicamente cu ta inútil pa sirbi Jehova lo por a desanimá miembronan di su famia di adoradornan of lo por a debilitá nan fe. Ta cuantu mihor pa keda ketu i haci loke Asaf a haci! Pa mira pakico esnan malbado ta parce di scapa castigu pa malecho miéntras esnan recto ta sufri, el a bai n’e santuario di Dios. Tal ambiente a permití Asaf meditá trankilamente entre Jehova su adoradornan i su pensamentu a ser reahustá. P’esei awe, si nos ta keda asombrá pa loke nos ta mira, laga nos di igual manera busca contesta pa nos preguntanan dor di asociá cu Dios su pueblo en bes di isolá nos mes.—Proverbio 18:1.

Asaf a yega na realisá cu Dios a pone e malbadonan “riba suela cu ta slip.” Debí cu nan bida ta drei rond di cosnan material, nan ta den peliger di experenciá un colapso diripiente. Pa mas tardá, morto lo apoderá di nan den biehes, i nan rikesa obtené inhustamente lo no sigurá un bida mas largu pa nan. (Salmo 49:6-12) Nan prosperidad lo ta manera un soño cu ta pasa masha lihé. Husticia lo por alcansá nan asta promé cu nan bira bieu segun cu nan ta cosechá loke nan ta sembra. (Galatio 6:7) Ya cu nan deliberadamente a ignorá e único Persona capas pa yuda nan, nan ta ser lagá desampará, sin speransa. Ora Jehova ta actua contra nan, lo e mira nan “imágen”—nan splendor i posicion—cu desprecio.

Vigilá Bo Reaccion

Dor cu Asaf no a reaccioná bon na loke el a mira, el a admití: “Pasobra mi curason a amargá, i den mi niernan mi a sinti dolónan skerpi, i mi tabata irazonabel i mi no por tabata sa; mi a bira manera simpel bestia desde bo punto di bista. Pero mi ta constantemente cu bo; bo a gara mi man drechi. Cu bo conseho lo bo guiá mi, i despues lo bo hibá mi asta na gloria.”—Salmo 73:21-24.

Pensamentu rib’e prosperidad material dje malbadonan i rib’e sufrimentu di esnan recto por amargá curason di un persona of disgust’é. Den su profundidad—den su niernan—e agitacion di Asaf riba su situacion a caus’é gran doló. For di punto di bista di Jehova, el a bira manera un animal irazonabel reaccionando a base di solamente sensacion físico. Tog, Asaf ‘tabata constantemente cu Dios, kende a gara su man drechi.’ Si nos hera den nos pensamentu ma ta busca e conseho di Jehova manera Asaf a haci, Dios lo tuma nos na man, pa sostené nos i guia nos. (Compará cu Jeremías 10:23.) Solamente dor di aplicá su conseho nos por ser guiá pa un futuro felis. Nos por sufri humiyacion pa un tempu, pero Jehova lo trece un cambio, ‘hibando nos na gloria,’ of onor.

Comprendiendo e necesidad pa confia den Jehova, Asaf a agregá: “Ken mi tin den cielu? I ademas di abo mi no tin otro deleite riba tera. Mi organismo i mi curason a faya. Dios ta e baranca di mi curason i mi parti pa tempu indefiní. Pasobra, mira! esnan mes cu ta mantené nan alehá di bo lo perecé. Siguramente lo bo silenciá tur cu ta bandoná bo inmoralmente. Pero en cuanto ami, halando cerca Dios ta bon pa mi. Den e Señor Soberano Jehova mi a pone mi refugio, pa declará tur bo obranan.”—Salmo 73:25-28.

Mescos cu Asaf, nos tin solamente Jehova riba ken pa confia pa berdadero siguridad i consuelo. (2 Cortintio 1:3, 4) Pues, en bes di cudishá cualkier hende su rikesa terenal, laga nos sirbi Dios i acumulá tesoro den cielu. (Mateo 6:19, 20) Tenimentu di un posicion aprobá cu Jehova mester ta nos mayor deleite. Asta si nos organismo of curason mester faya, lo e fortalecé nos i duna stabilidad na nos curason pa nos no perde speransa i ánimo den situacion penoso. Intimidad cu Jehova ta un posesion preciocísimo. Bandonand’e lo resultá den calamidad pa nos huntu cu tur cu ta bandon’é. P’esei, mescos cu Asaf, laga nos hala cerca Dios i tira tur nos ansiedadnan riba dje. (1 Pedro 5:6, 7) Esaki ta promové nos bienestar spiritual i ta impulsá nos pa conta otronan tocante Jehova su obranan maraviyoso.

Keda Leal na Jehova

Asaf tabata molestiá pa motibu cu el a mira malechor prosperá den Israel, su pais natal. Entre Jehova su sirbidornan leal, tabatin “hende malbado” culpabel di gabamentu, arogancia, violencia, bofonamentu i fraude, i kendenan a nenga cu Dios tabata sa loke nan tabata haciendo. (Salmo 73:1-11) Ki un spiertamentu! Pa agradá Jehova Dios, nos mester evitá di manifestá característicanan manera orguyo, violencia, bofonamentu i desonrades. Mescos cu Asaf, laga tur sirbidor di Jehova ‘drenta den e santuario magnífico di Dios’ dor di reuní huntu regularmente cu Su adoradornan leal. En berdad, laga tur cu ta stima Jehova ‘hala cerca Dios,’ confiando riba dje pa sostené nan meimei di sufrimentu, sin importá loke otronan por bisa of haci.—Salmo 73:12-28; 3 Juan 1-10.

Berdad, e prosperidad material di malechornan por pone nos fe na prueba, mescos cu el a haci cu esun di Asaf. Tog, nos por wanta e prueba aki si nos ta enfocá nos bida riba Jehova su sirbishi. Nos lo ser recompensá si nos ta haci esaki pasobra ‘Dios no ta inhustu pa lubidá nos trabou i e amor cu nos ta mustra pa su nomber.’ (Hebreo 6:10) Nos pruebanan lo ta “momentáneo i leve” na comparacion cu nos recompensa. (2 Corintio 4:17) Asta algun 70 of 80 aña di sufrimentu ta manera djis un rosea cu ta pasa nos lipnan den un suspiro ora compar’é cu e bida eterno felis cu Jehova ta primintí su sirbidornan leal.—Salmo 90:9, 10.

Laga nos nunca permití e prosperidad material di malechornan na contraste cu nos sufrimentu pa causa di husticia prevení nos di manifestá e fe cu ta un fruta di Dios su spiritu santu. (Galatio 5:22, 23; 1 Pedro 3:13, 14) Satanas lo ta contentu si nos imitá e malbadonan, kendenan hopi biaha ta prosperá debí cu nan ta sin escrúpulo. Mas bien, laga nos onra e nomber di Jehova dor di resistí tentacion pa bandoná su normanan hustu. (Sofonías 2:3) Laga nos no angustiá rib’e éxito di malechornan, pasobra, di mas tantu, nan por logra solamente prosperidad material. I di ki balor esei ta? E no ta ni di compará cu e prosperidad spiritual cu esnan cu ta ehercé fe den e Señor Soberano Jehova ta disfrutá di dje.