No Entregá!

 1. Dikon nos ta kontentu i orguyoso pa ta Testigunan di Yehova?

NOS ta masha kontentu i orguyoso di ta Testigunan di Yehova. Nos ta karga Dios su nòmber i ta demostrá ku di bèrdat nos ta su testigunan ora nos ta prediká na otro hende i siña nan tokante dje. Nos ta masha kontentu mes ora nos yuda un hende ku ta “dispuesto pa aseptá e bèrdat ku ta hiba na bida eterno” bira kreyente. (Echo. 13:48) Nos ta sinti meskos ku Hesus. “El a yena ku goso i spiritu santu” ora ku su disipelnan a bis’é tokante e bon eksperensianan ku nan tabatin ora nan tabata prediká.—Luk. 10:1, 17, 21.

 2. Kon nos por mustra ku nos ta tuma nos sirbishi na serio?

² Nos ta tuma nos sirbishi masha na serio. Apòstel Pablo a bisa Timoteo: “Presta atenshon konstantemente na bo mes i na e siñansa ku bo ta duna.” Anto el a agregá: “Hasiendo esei lo bo salba bo mes i tambe esnan ku ta skucha bo.” (1 Tim. 4:16) Pues, bida ta den wega. Konstantemente nos ta presta atenshon na nos mes pasobra nos ta siudadanonan di Dios su Reino. Semper nos ta komportá nos mes na un manera ku ta trese onor na Yehova i ku ta di akuerdo ku e bon notisia ku nos ta prediká. (Flp. 1:27) Nos ta demostrá ku nos ta ‘presta atenshon na nos siñansa’ ora nos ta prepará bon pa sirbishi i ta pidi Yehova pa bendishoná nos esfuersonan promé ku nos prediká na otro hende.

 3. Tur hende lo ta interesá den e notisia di e Reino? Duna un ehèmpel.

³ Tin biaha, asta ora nos hasi tur nos esfuerso pa prediká na otro hende, tin hopi hende den nos teritorio ku no ta interesá den e bon notisia di e Reino. Por ehèmpel, Ruman Georg Lindal a prediká su so na diferente parti di Islandia for di 1929 te 1947. El a laga míles di buki; pero ni sikiera un hende a aseptá e bèrdat. El a skirbi: “Tabata parse ku algun di e hendenan tabata kontra di e bèrdat, pero mayoria di nan djis no tabata interesá.” Asta despues ku algun misionero ku a gradua for di Galaad a bini pa yuda ku e trabou, a dura nuebe aña promé ku algun di e habitantenan ei a dediká nan mes na Yehova i batisá.b

 4. Kon nos por sinti nos ora ku hende no ke studia Beibel ku nos?

⁴ Ora un hende no ke studia Beibel ku nos, nos por sinti nos tristu. Kisas nos ta sinti meskos ku Pablo, kende tabatin “un tristesa profundo i un doló kontinuo” pasobra mayoria di e hudiunan a rechasá Hesus komo e Mesías primintí. (Rom. 9:1-3) Ban bisa bo tin un studiante. Bo ta hasi tur bo esfuerso pa ta un bon maestro, i bo ta hasi hopi orashon pa bo studiante. Pero nada; e no ta progresando i bo mester stòp ku e estudio. Òf kiko si nunka bo a yuda un hende progresá i yega na boutismo? Bo mester sinti bo malu anto pensa ku Yehova no ta kontentu ku bo sirbishi? Den e artíkulo akí nos lo kontestá dos pregunta: (1) Kiko ta hasi nos sirbishi eksitoso? (2) Kiko nos por ferwagt di nos trabou di prediká?

 5. Dikon nos sirbishi pa Yehova no semper ta resultá manera nos ke?

⁵ Beibel ta bisa di e persona ku ta hasi Dios su boluntat: “Tur loke ku e hasi ta prosperá.” (Sal. 1:3) Pero, esei no ke men ku tur loke nos ta hasi pa Yehova lo resultá manera nos ke. Debí na imperfekshon, tur hende su bida ta “yen di problema.” (Yòb 14:1) Ademas, tin biaha opositornan ta logra stòp nos di prediká na e manera ku nos tabatin kustumber di hasi. (1 Kor. 16:9; 1 Tes. 2:18) Pero, kiko pa Yehova ta hasi nos sirbishi eksitoso? Ban wak algun prinsipio di Beibel ku lo yuda nos kontestá e pregunta ei.

 6. Kiko pa Yehova ta hasi nos sirbishi eksitoso?

⁶ Yehova ta wak bo esfuersonan, i e ta mira ku bo no ta entregá. Pa Yehova, nos sirbishi ta eksitoso ora nos ta traha duru i nos ta hasié ku amor sin importá si hende ta skucha nos òf nò. Pablo a skirbi: ‘Dios no ta inhustu pa lubidá bo trabou i e amor ku abo a demostrá pa su nòmber, mirando ku bo a sirbi i ta sigui sirbi e santunan.’ (Heb. 6:10) Pues, Yehova nunka ta lubidá kuantu esfuerso bo a hinka den e trabou i ku kuantu amor bo a hasié, asta si bo no tin un studiante di Beibel ku a batisá. P’esei, loke Pablo a bisa e korintionan ta konta pa abo tambe: ‘Bo sa ku bo trabou duru en konekshon ku Señor no ta enbano,’ asta si e trabou duru ei no a resultá den loke abo a ferwagt.—1 Kor. 15:58.

 7. Kiko nos ta siña for di loke Apòstel Pablo a bisa tokante su sirbishi?

⁷ Apòstel Pablo tabata un misionero ekselente. El a forma kongregashonnan nobo den hopi stat. Pero ora algun hende a kritik’é i a bis’é ku e no tabata un bon maestro, e no a bai defendé su mes i bai konta nan kuantu hende el a yuda bira kristian. Nò, mas bien el a skirbi: “Mi a traha mas tantu.” (2 Kor. 11:23) Pues, meskos ku Pablo, nos tin ku keda kòrda ku pa Yehova ta masha importante e esfuerso ku nos ta hasi den nos trabou i pa nos no entregá.

 8. Kiko nos tin ku kòrda tokante nos sirbishi?

⁸ Yehova ta keda kontentu ku nos sirbishi. Un biaha Hesus a manda 70 di su disipelnan pa bai prediká e mensahe di e Reino. Ora ku nan a kaba di prediká, nan “a bini bèk kontentu.” Dikon nan tabata asina kontentu? Nan a bisa: “Asta e demoñonan ta obedesé nos ora nos usa bo nòmber.” Pero, Hesus a korigí nan manera di pensa ora el a bisa nan: “No alegrá pasobra e spiritunan ta obedesé boso, ma alegrá pasobra boso nòmber a ser skirbí den shelu.” (Luk. 10:17-20) Hesus tabata sa ku no ta tur biaha kosnan ekstraordinario asina lo pasa den nan sirbishi. De echo, nos no sa kuantu di e hendenan ei ku nan a papia kuné ku tempu a bira kristian. Pues, e disipelnan mester a komprondé ku nan goso den sirbishi no tabata mará na djis loke nan a logra. E goso di mas grandi ku nan por a sinti ta di sa ku Yehova tabata kontentu ku tur e esfuerso ku nan a hasi.

 9. Segun Galationan 6:7-9, kiko lo ta e resultado si nos no stòp di prediká?

⁹ Si nos no stòp di prediká, nos lo haña bida eterno. Ora ku nos ta hasi nos esfuerso pa prediká i siña hende e bon notisia, nos ta “sembra ku bista riba spiritu santu.” Dikon nos por bisa esei? Pasó ora nos ta prediká, nos ta demostrá ku nos ke pa Dios su spiritu santu guia nos. Tanten ku nos “no stòp” ni “kansa” di prediká, Yehova ta primintí nos ku lo e duna nos bida eterno, asta si nunka nos a yuda un hende yega na boutismo.—Lesa Galationan 6:7-9.

10. Kiko ta e motibu ku algun hende ta skucha nos i otronan nò?

¹⁰ Loke tin den kurason di un hende ta determiná si lo e aseptá e bèrdat òf nò. Hesus a splika esei bon kla den e ilustrashon di e sembradó ku a bai sembra simia riba diferente tipo di tera. Ta solamente e simia ku a kai den e bon tera a duna fruta. (Luk. 8:5-8) Hesus a bisa ku e diferente tipo di teranan ei a representá kurason di hende ku lo reakshoná na diferente manera na “e palabra di Dios.” (Luk. 8:11-15) Meskos ku e sembradó, nos no tin kontrol si nos trabou lo duna fruta òf nò, ya ku esei ta dependé di loke tin den kurason di e hende ku nos ta papia kuné. Pues, nos responsabilidat ta di sembra e simia di e mensahe di e Reino. Anto manera Apòstel Pablo a bisa: “Kada un lo risibí su rekompensa di akuerdo ku su trabou” i no di akuerdo ku e resultado di su trabou.—1 Kor. 3:8.

11. Dikon nos por bisa ku Noe tabatin éksito komo un “predikadó di hustisia”? (Wak e plachi riba portada.)

¹¹ Durante historia hopi sirbidó di Yehova a prediká na hende ku no tabata kier a skucha. Por ehèmpel, pa mas o ménos 40 pa 50 aña Noe tabata un “predikadó di hustisia.” (2 Ped. 2:5) Sin duda Noe lo a karga speransa ku hopi hende lo kier a skucha su mensahe. Pero, na ningun momento Yehova no a lag’é komprondé esei. Eigenlijk ora Noe a haña instrukshon pa traha e arka, Dios a bis’é: “Lo bo bai den e arka—abo ku bo yu hòmbernan i bo esposa, i esposanan di bo yu hòmbernan huntu ku bo.” (Gén. 6:18) Anto mirando tamaño i kapasidat di e arka, Noe por a ripará ku e kantidat di hende ku lo skuch’é lo no ta asina tantu. (Gén. 6:15) Anto dicho echo, ni un hende di e mundu malbado ei no a hasi kaso di e mensahe. (Gén. 7:7) Akaso Yehova a pensa ku Noe a frakasá komo un predikadó? Apsolutamente ku nò! Noe tabatin éksito den su sirbishi pasobra el a hasi loke Yehova a mand’é hasi. Anto pa Yehova, e tabata un predikadó eksitoso.—Gén. 6:22.

12. Kiko a yuda Profeta Yeremías haña goso den su sirbishi apesar ku hende no tabata kier a skuch’é i a opon’é?

¹² Profeta Yeremías tambe a prediká pa mas ku 40 aña aunke e hendenan no tabata kier a skuch’é i tabata opon’é. Debí ku nan tabata insult’é i chèrch’é asina tantu, el a bira asina desanimá i a pensa pa legumai su asignashon. (Yer. 20:8, 9) Pero e no a entregá. Kiko a yud’é lucha kontra e pensamentunan negativo ei i haña goso den su sirbishi? El a konsentrá riba dos kos importante. Pa di promé, e mensahe di Dios ku e mester a hiba pa hende lo a duna nan “un futuro i un speransa.” (Yer. 29:11) Di dos, Yeremías tabata papia na nòmber di Yehova. (Yer. 15:16) Nos tambe ta hiba un mensahe di speransa na hende i nos ta karga Yehova su nòmber komo su Testigunan. Ora nos pone atenshon na e dos kosnan importante ei, nos ta haña goso den nos sirbishi sin importá si hende ta skucha òf nò.

13. Kiko nos por siña for di Hesus su ilustrashon na Marko 4:26-29?

¹³ Ta tuma tempu pa un hende kultivá fe. Hesus a siña esei na su disipelnan den su ilustrashon di e sembradó ku ta drumi. (Lesa Marko 4:26-29.) Despues ku e sembradó a sembra e simianan, nan a krese pokopoko i e sembradó no por a hasi nada pa laga nan krese mas lihé. Kisas bo tambe tin ku warda basta tempu promé ku bo mira bo studiante apliká loke e ta siña. Meskos ku un kunukero no por forsa su planchinan krese na e velosidat ku e ke, nos tampoko no por forsa nos studiantenan hasi progreso na e spit ku nos ke. P’esei, no desanimá ni entregá si nan progreso ta dura mas tantu ku loke bo a ferwagt. Meskos ku un kunukero, ku pasenshi nos tin ku warda te ora ku nos studiante disidí pa sirbi Yehova.—Sant. 5:7, 8.

14. Konta un eksperensia ku ta mustra ku ta tuma tempu promé ku hende kuminsá skucha nos.

¹⁴ Den algun teritorio kisas lo dura añanan promé ku un hende batisá. Wak loke a pasa dos ruman di otro, Gladys i Ruby Allen. Na 1959 nan a haña e asignashon pa traha komo pionero regular na un provinsia na Canada ku yama Quebek.c E hendenan no tabata skucha pasobra nan tabatin miedu di loke nan bisiña i pastor katóliko lo a pensa si nan mira nan ta papia ku e rumannan. Gladys a konta: “Nos tabata bai di kas pa kas 8 ora pa dia pa 2 aña largu sin ku ningun hende a tende nos. E  hendenan tabata djis bin wak ken tabata na porta i despues sera nan kortina. Pero, nos no a entregá.” Ku tempu e hendenan a bira mas amigabel i a kuminsá skucha. Anto aworakí tin 3 kongregashon den e stat ei.—Isa. 60:22.

15. Kiko 1 Korintionan 3:6 i 7 ta siña nos tokante e trabou di hasi disipel?

¹⁵ Vários ruman ta nesesario pa yuda un hende bira disipel. Henter e kongregashon por yuda un hende yega na boutismo. (Lesa 1 Korintionan 3:6, 7.) Por ehèmpel: Un ruman ta haña un persona interesá den sirbishi i ta laga un tratado òf un revista kuné. Pero, despues e ruman ta mira ku su skèdjel no ta permitié bai bèk serka e persona interesá. Pues, e ta pidi un otro publikadó si e por hasi e rebishita p’e. E publikadó ta kuminsá un estudio di Beibel ku e persona. Anto e ta bai ku diferente ruman na e estudio. Kada un di nan ta animá e studiante na diferente manera. Kada ruman ku e studiante konosé ta yud’é siña mas tokante Yehova. Di e manera ei, manera Hesus a bisa, delaster un di e hendenan ku a yuda e persona ei yega na boutismo lo alegrá.—Huan 4:35-38.

16. Asta si bo no tin bon salú i no tin hopi energia, kon bo por sigui tin goso den bo sirbishi?

¹⁶ Awor kiko si bo salú i e kantidat di energia ku bo tin no ta permití bo prediká i siña hende tokante e bon notisia manera ántes? Apesar di esei, bo por ta kontentu ku loke sí bo por logra. Wak loke a pasa Rei David ora e i su hòmbernan mester a bai reskatá nan famia i pertenensianan for di e amalekitanan. Dos shen di e hòmbernan ei tabata asina kansá ku nan no por a bai bringa i a keda atras pa kuida e ekipahe. Despues ku nan a gana e bataya, David a bisa pa nan parti e botin igual. (1 Sam. 30:21-25) Algu paresido ta pasa den nos trabou mundial di hasi disipel. Pues tanten bo hasi bo bèst den e trabou di prediká, lo bo por kompartí e mesun goso di mira un hende konosé Yehova i batisá.

17. Pa kiko nos por gradisí Yehova?

¹⁷ Nos ta masha kontentu pa e manera ku Yehova ta mira nos sirbishi. E sa ku nos no por kontrolá resultado di nos esfuerso. Pero, e ta mira kon duru nos ta traha i kuantu nos stim’é, i e ta rekompensá nos. Tambe e ta siña nos kon pa keda kontentu ku loke nos por hasi den sirbishi. (Huan 14:12) Nos por tin sigur ku Dios ta kontentu ku nos, basta nos no entregá!