“E Hòmber Prudente Ta Wak Bon Unda E Ta Bai”

UN PERSONA prudente ta bon den manehá asuntu i resolvé problema, e ta inteligente, di sano huisio i bon opservadó, huisioso i sabí. E no ta un persona engañoso ni manipuladó. Proverbionan 13:16 ta deklará: “Tur hende prudente ta trata ku konosementu.” Sí, prudensia ta un karakterístika deseabel.

Kon nos por desplegá prudensia den nos bida diario? Kon e desishonnan ku nos ta tuma, e manera ku nos ta trata otro hende i e manera ku nos ta reakshoná riba vários situashon ta demostrá ku nos tin e kualidat di prudensia? Ki rekompensanan hende prudente ta haña? Ki kalamidatnan nan ta evitá? Rei Salomon di Israel di antigwedat ta duna kontesta práktiko riba e preguntanan aki, manera nos por lesa na Proverbionan 14:12-25.a

Skohe Bo Rumbo na un Manera Sabí

Definitivamente nos mester tin e kapasidat di distinguí loke ta bon for di loke ta malu pa nos tuma desishonnan sabí i pa nos tin éksito den bida. Sin embargo, Beibel ta spièrta: “Tin un kaminda ku ta parse bon den bista di hende, ma su fin ta e kaminda di morto.” (Proverbionan 14:12) Pues anto, nos tin ku siña distinguí loke ta realmente bon for di loke ta parse bon. E ekspreshon “e kaminda di morto” den e teksto na e idioma original ta bisa “e kamindanan di morto” i ta indiká ku tin hopi di e tipo di kamindanan engañoso ei. Konsiderá algun situashon ku nos mester ta konsiente di dje i ku nos tin ku evitá.

Por lo general e hendenan riku i famoso di mundu ta ser konsiderá komo hende respetabel ku ta meresé atmirashon. Nan éksitonan riba tereno sosial i finansiero por laga parse ku nan manera di aktua ta bon. Pero kiko di e métodonan ku hopi di e personanan ei ta usa pa gana rikesa òf fama? Nan kamindanan ta semper rekto i di bon moral? Tambe tin algun hende ku ta desplegá un selo atmirabel pa nan kreensianan religioso. Pero nan sinseridat realmente ta duna prueba ku nan kreensianan ta korekto?—Romanonan 10:2, 3.

Un kaminda por parse bon tambe debí ku nos ta gaña nos mes. Si nos ta tuma desishon basá riba loke nos personalmente ta haña ta bon, nos ta dependé eigenlijk riba nos kurason ku ta un guia traishonero i engañoso. (Jeremias 17:9) Un konsenshi ku nos no a entrená ni eduká por pone nos pensa ku e kaminda robes ta e kaminda bon. Kiko anto lo yuda nos skohe e kaminda korekto?

Estudio personal diligente di e bèrdatnan mas profundo di e Palabra di Dios ta indispensabel pa nos por haña un “mente entrená pa diserní loke ta bon i loke ta malu.” Ademas, nos tin ku train nos mente òf kapasidat di diserní dor di pone na “práktika” prinsipionan di Beibel. (Hebreonan 5:14) Nos mester tene kuidou pa nos no laga loke ta djis parse bon pone nos desviá for di ‘e kaminda smal ku ta hiba na bida.’—Mateo 7:13, 14.

Ora e “Kurason Por Tin Doló”

Nos por ta felis ora ku nos no tin pas mental? Harimentu i dibertishon ta aliviá doló profundo? Ta prudente pa purba vense depreshon dor di usa alkohòl, droga òf dor di hiba un bida inmoral i parotin? E kontesta ta nò. E rei sabí a bisa: “Den harimentu kurason por tin doló.”—Proverbionan 14:13a.

Harimentu por skonde e doló, pero e no ta kit’é. Beibel ta bisa ku “tin un tempu stipulá pa tur kos.” Sí, tin “un tempu pa yora i un tempu pa hari, un tempu pa tene rou i un tempu pa baila.” (Eklesiastés 3:1, 4) Ora depreshon ta persistí, nos tin ku dal paso pa vens’é, i buska “konseho sabí” si ta nesesario. (Proverbionan 24:6)b Harimentu i dibertishon tin relativamente poko balor. Salomon a spièrta kontra formanan inapropiá di dibertishon i ekseso den entretenimentu. El a bisa: “Goso por kaba na pena.”—Proverbionan 14:13b.

Kon e Persona sin Fe i e Persona Bon Ta Ser Satisfasé?

E rei di Israel a sigui bisa: “Esun di kurason sin fe lo satisfasé su mes ku e resultadonan di su propio kaminda; pero e hòmber bon, ku e resultadonan di su manera di trata.” (Proverbionan 14:14, NW) Kon hende sin fe i hende bon ta ser satisfasé ku e resultadonan di nan manera di trata?

Un persona sin fe no ta preokupá ku e asuntu di rindi kuenta na Dios. P’esei pa un hende sin fe no ta importante pa hasi loke ta bon den bista di Yehova. (1 Pedro 4:3-5) Un persona asina ta satisfecho ku e resultadonan di su estilo di bida materialista. (Salmo 144:11-15a, NW) Di otro banda, e persona bon ta interesá den hasi loke ta korekto den bista di Dios. Den tur loke e hasi, e ta pega na e normanan hustu di Dios. Un persona asina ta satisfecho ku e resultadonan pasobra Yehova ta su Dios i e ta haña un goso inkomparabel di sirbi e Haltísimo.—Salmo 144:15b.

No “Kere Tur Kos”

Salomon a mustra e kontraste entre e manera di aktua di hende simpel, esta hende sin eksperensia, i hende prudente. El a bisa: “E hende simpel ta kere tur kos, ma e hòmber prudente ta wak bon unda e ta bai.” (Proverbionan 14:15) E persona prudente no ta kere tur kos pa loko. En bes di kere tur kos ku e tende òf djis aseptá e opinion di otro hende, e ta wak bon ki paso e ta dal. Despues di haña tur e echonan, e ta aktua ku konosementu.

Tuma por ehèmpel e pregunta: “Ta eksistí un Dios?” E persona sin eksperensia ta inkliná na aseptá loke ta popular òf loke personanan prominente ta kere. Di otro banda, esun prudente ta tuma su tempu pa analisá e echonan. E ta reflekshoná riba tekstonan bíbliko manera Romanonan 1:20 i Hebreonan 3:4. Den asuntunan spiritual, un persona prudente no ta djis aseptá e palabra di lidernan religioso. E ta ‘pone na prueba e spiritunan [òf, “ekspreshonnan inspirá,” NW] pa mira si nan ta bin di Dios.’—1 Juan 4:1

Ta masha sabí anto pa hasi kaso di e konseho pa no “kere tur kos”! Foral e personanan konfiá ku e responsabilidat di konsehá otro hende den e kongregashon kristian tin ku tuma esaki na pechu. E konsehero mester tin un bista kompletu di loke a sosodé. E mester skucha bon i optené e echonan di tur banda pa e no duna mal konseho òf duna konseho basá riba un solo punto di bista di loke a sosodé.—Proverbionan 18:13; 29:20.

E Hende ku Kapasidat di Pensa Ta Ser Odiá

E rei di Israel a hala atenshon na un otro diferensia entre hende sabí i hende bobo. El a bisa: “Un hende sabí ta kouteloso, i ta apartá su mes for di maldat, ma e bobo ta arogante i sin kuidou. Un hende ku ta rabia lihé ta hasi ko’i bobo, i un hende ku mal intenshon ta wòrdu odiá.”—Proverbionan 14:16, 17.

E persona sabí tin miedu di e konsekuensianan di sigui un kaminda robes. P’esei e ta kouteloso i ta apresiá kualke konseho ku ta yud’é evitá maldat. E hende bobo no tin e miedu ei. Teniendo konfiansa den su mes, e ta ignorá ku arogansia e konseho di otro hende. Komo ku un persona asina hopi biaha ta rabia lihé, e ta aktua na un manera bobo.

E ekspreshon tradusí “ku mal intenshon,” na e idioma original tin dos nifikashon. Den un sentido positivo, e por indiká disernimentu, diskreshon òf komprondementu. (Proverbionan 1:4; 2:11; 3:21) Òf den un sentido negativo, e frase por referí na ideanan malbado òf pensamentu malisioso.—Salmo 37:7; Proverbionan 12:2; 24:8.

Si e ekspreshon original ta referí na un “hende ku mal intenshon,” no ta difísil pa mira dikon un persona asina ta wòrdu odiá. Pero si e ta referí na e sentido positivo, dikon hende lo odia un persona ku tin e kapasidat di pensa? Wèl, akaso no ta bèrdat ku hende ku no tin e kualidat di disernimentu sa odia e persona ku sí tiné? Por ehèmpel, mundu ta odia hende ku ta usa nan fakultat mental i ku ta skohe pa ‘no ta parti di mundu.’ (Juan 15:19) Hóbennan kristian ku ta usa nan kapasidat di pensa i ta resistí e preshon insaludabel di nan pareunan pa asina evitá mal komportashon ta ser chèrchá. Echo ta ku e mundu ku ta bou di kontròl di Satanas ta odia adoradónan berdadero.—1 Juan 5:19.

“E Malbadonan Lo Bùig”

Hende prudente ta distinto for di hende sin eksperensia den un otro manera mas. “E simpelnan ta heredá lokura, ma e prudentenan ta koroná ku konosementu.” (Proverbionan 14:18) Hende sin eksperensia ta skohe loke ta lokura komo ku nan no tin disernimentu. Esaki ta bira nan manera di biba. Di otro banda, konosementu ta dòrna hende prudente meskos ku un korona ta onra un rei.

E rei sabí a bisa: “E malbadonan lo bùig pa e bonnan, i e impionan lo bùig na e portanan di hende hustu.” (Proverbionan 14:19) Ku otro palabra, hende bon na final di kuenta lo triunfá riba hende malbado. Konsiderá kon e pueblo di Dios awe ta oumentá na kantidat i ta gosa di un estilo di bida superior. Algun opositor ku mira kon e bendishonnan aki ta ser dramá riba e sirbidónan di Yehova, lo sinti nan mes obligá na “bùig” pa Yehova su muhé selestial simbóliko, representá riba tera pa e restu ungí ku spiritu. Pa mas tardá, na Armagedón e opositornan ei lo haña nan obligá ta rekonosé ku e parti terenal di Dios su organisashon realmente ta representá e parti selestial.—Isaias 60:1, 14; Galationan 6:16; Revelashon 16:14, 16.

Tene “Miserikòrdia di e Pobernan”

Salomon a komentá riba e naturalesa humano, bisando: “E pober ta wòrdu odiá asta dor di su bisiña, ma e riku tin hopi amigu.” (Proverbionan 14:20) Ki sierto esaki ta di hende imperfekto! Debí na nan inklinashon egoista, nan tin e tendensia di faboresé hende riku riba hende pober. Ounke e persona riku tin hopi amigu, nan ta mesun pasahero ku su rikesa. Pues anto, nos no mester evitá di usa plaka òf labiamentu pa haña amigu?

Pero kiko si ora nos analisá nos mes onestamente, nos ripará ku nos ta chifla i labia hende riku i ta menospresiá hende pober? Nos tin ku realisá ku Beibel ta kondená mustramentu di tal faboritismo. E ta bisa: “Esun ku despresiá su próhimo ta hasi piká, ma esun ku tin miserikòrdia di e pobernan ta felis.”—Proverbionan 14:21.

Nos mester mustra konsiderashon na hende den sirkunstansianan difísil. (Santiago 1:27) Kon nos por hasi esaki? Dor di duna nan “e biennan di mundu” pa sostené bida, i esei por ta entre otro, plaka, kuminda, alohamentu, paña i atenshon personal. (1 Juan 3:17) Felis ta esun ku ta mustra fabor na hende asina, ya ku “ta mas bendishoná pa duna ku pa risibí.”—Echonan 20:35.

Kon Ta Bai ku Hende Prudente i ku Hende Bobo?

E prinsipio “loke un hende sembra, esaki tambe e lo kosechá” ta apliká tantu pa e persona prudente komo pa esun bobo. (Galationan 6:7) Esun prudente ta hasi loke ta bon; e bobo ta plania maldat. E rei sabí a puntra: “Esnan ku ta plania maldat no ta kana dual?” E kontesta ta sí. “Ma lo tin miserikòrdia i bèrdat pa esnan ku ta plania bondat.” (Proverbionan 14:22) Hende ku ta hasi bon ta gosa di e bondat di otro hende i tambe di Dios su miserikòrdia.

Salomon a konektá éksito ku trabou duru i frakaso ku djis papia hopi sin traha. El a bisa: “Den tur trabou tin ganashi, ma djis papia ku boka so ta kondusí na pobresa.” (Proverbionan 14:23) E prinsipio aki sigur ta apliká na nos aktividatnan spiritual. Ora nos ta traha duru den e ministerio kristian, nos ta kosechá e rekompensanan di a introdusí na hopi hende e bèrdat ku ta salba bida ku tin den e Palabra di Dios. Si nos kumpli fielmente ku kualke asignashon teokrátiko ku nos risibí, esei ta hiba na goso i satisfakshon.

Proverbionan 14:24 ta bisa: “Korona di e sabínan ta nan rikesa, ma bobedat di e bobonan ta lokura.” Esaki lo por ke men ku e sabiduria ku hende sabí ta hasi esfuerso pa alkansá ta un poseshon mes balioso ku rikesa, i e ta dòrna nan meskos ku un korona. Di otro banda, e bobonan ta gana bobedat so. Segun un buki di referensia, e proverbio aki lo por ke men tambe ku “rikesa ta un adorno pa esnan ku us’é bon . . . [miéntras ku] bobonan tin solamente nan lokura.” En todo kaso, bida di hende sabí ta bai mas mihó ku esun di hende bobo.

E rei di Israel a bisa: “Un testigu berdadero ta salba bidanan, ma esun ku papia mentira ta traishonero.” (Proverbionan 14:25) Ounke esaki sigur ta bèrdat den un konteksto hudisial, konsiderá su aplikashon den nos ministerio. Nos trabou di prediká e Reino i hasi disipel ta enserá duna testimonio di e bèrdat di e Palabra di Dios. E testimonio ei ta libra personanan di bon kurason for di religion falsu i ta salba bida. Dor di paga bon tinu konstantemente na nos mes i na nos siñansa, nos lo salba tantu nos mes komo esnan ku tende nos. (1 Timoteo 4:16) Segun ku nos ta sigui hasi esaki, laga nos ta alerta pa desplegá prudensia den tur aspekto di bida.

[Nota]

[Plachi na página 18]

Estudio diligente di bèrdatnan mas profundo ta indispensabel pa nos por distinguí bon for di malu

[Plachi na página 18]

Un estilo di bida materialista ta duna berdadero satisfakshon?