Bo A Haci e Berdad di Bo Mes?

“Sea transformá dor di rehací boso mente, pa boso por proba pa boso mes loke ta e bon i aceptabel i perfecto boluntad di Dios.”—ROMANONAN 12:2.

 1, 2. Di con no ta fácil pa ta un cristian berdadero awendia?

NO TA fácil pa ta un cristian berdadero den e último dianan aki, un “tempu crítico, duru pa trata cuné.” (2 Timoteo 3:1) Nos mester vence mundu pa por sigui e ehempel di Cristo. (1 Juan 5:4) Corda loke Jesus a bisa tocante e caminda cristian: “Drenta p’e porta smal; pasobra hanchu i espacioso ta e caminda cu ta hiba na destruccion, i hopi ta esnan cu ta drenta dor di dje; miéntras cu smal ta e porta i pertá e caminda cu ta hiba na bida, i poco ta esnan cu ta hañ’é.” Tambe el a bisa: “Si un persona kier sigui mi, lagu’é nenga su mes i tuma su staca di tormento dia tras dia i sigui mi continuamente.”—Mateo 7:13, 14; Lucas 9:23.

² Una bes cu un cristian a haña e caminda pertá cu ta hiba na bida, su siguiente reto ta di keda riba dje. Di con esei ta un reto? Dor cu nos dedicacion i bautismo ta haci nos un blanco di Satanas su obranan mañoso, su mal inventonan sutil. (Efesionan 6:11; nota na pia di página) E ta observá nos debilidadnan i ta busca moda di usa nan pa purba daña nos spiritualidad. Si el a purba kibra asta Jesus, pakico lo e mester laga nos sí na pas?—Mateo 4:1-11.

Satanas Su Tácticanan Mañoso

 3. Con Satanas a planta duda den Eva su mente?

³ Un táctica cu Satanas ta usa ta di planta duda den nos mente. E ta busca puntonan débil den nos armadura spiritual. For di cuminsamentu, el a usa e táctica ei cu Eva, dor di puntra: “Di berdad ta asina cu Dios a bisa cu boso no mag come di tur palu dje hofi?” (Génesis 3:1) Cu otro palabra Satanas tabata bisando: ‘Di berdad ta posibel cu Dios a imponé un prohibicion asina riba boso? Lo e nenga boso algu asina bon? Ata Dios sa cu riba e mésun dia cu boso come di dje, boso wowo lo tin cu habri, i boso lo tin cu ta manera Dios, conociendo bon i malu!’ Satanas a planta un simia di duda anto warda p’e spruit.—Génesis 3:5.

 4. Ki duda lo por afectá algun cristian awe?

⁴ Con Satanas ta usa e táctica aki awe? Si nos neglishá nos lesamentu di Bijbel, nos studio personal, nos oracionnan, i nos ministerio i reunionnan cristian, nos lo por ta exponiendo nos mes na duda cu otro hende ta lanta. Por ehempel: “Con nos por sa cu ta esaki ta e berdad cu Jesus a siña?” “Di berdad esakinan ta e último dianan? Con cu bai bin, ya nos ta den siglo 21.” “Nos ta na drempel di Armagedon, of e ta hopi leu?” Si duda asina lanta, kico nos por haci pa kita nan?

 5, 6. Kico nos mester haci si duda lanta den nos?

⁵ Santiago a duna un conseho práctico ora el a skirbi: “Si cualkier un di boso tin deficiencia en cuanto sabiduria, lagu’é sigui pidi Dios, pasobra e ta duna generosamente na tur i sin tira na cara, i lo e ser duná na dje. Pero lagu’é sigui pidi cu fe, sin duda nada, pasobra esun cu ta duda ta manera un ola di laman cu ta ser hibá pa bientu i bentá di un lugá pa otro. De echo, no laga e hende ei suponé cu lo e ricibí algu di Jehova; e ta un homber indeciso, inconstante den tur su camindanan.”—Santiago 1:5-8.

⁶ Kico anto nos tin cu haci? Nos mester “sigui pidi Dios” den oracion p’e duna nos fe i comprendimentu, i nos mes mester haci mas studio personal tocante cualkier pregunta of duda cu nos tin. Ademas, nos por busca yudansa di esnan cu ta fuerte den fe, sin duda ni un ora so cu Jehova lo duna nos e apoyo cu nos tin mester. Santiago a bisa tambe: “Someté boso mes na Dios; pero oponé e Diabel, i lo e hui di boso. Hala cerca Dios, i lo e hala cerca boso.” Sí, nos dudanan lo disparcé segun cu nos hala cerca Dios pa medio di studio i oracion.—Santiago 4:7, 8.

 7, 8. Cua ta algun criterio básico pa determiná e forma di adoracion cu Jesus a siña, i ken ta cumpli cu e criterionan aki?

⁷ Tuma e pregunta aki como ehempel: Con nos sa cu nos ta practicando e forma di adoracion cu Jesus a siña? Pa contestá esaki, cua criterionan nos mester tuma na consideracion? Bijbel ta mustra cu cristiannan berdadero mester tin amor berdadero entre nan. (Juan 13:34, 35) Nan mester santificá e nomber di Dios, Jehova. (Isaías 12:4, 5; Mateo 6:9) I nan mester duna hende di conocé e nomber ei.—Éxodo 3:15; Juan 17:26.

⁸ Otro rasgo cu ta identificá adoracion berdadero ta respet pa Bijbel, e Palabra di Dios. Bijbel ta e único buki cu ta revelá Dios su personalidad i su propósitonan. (Juan 17:17; 2 Timoteo 3:16, 17) Ademas, cristiannan berdadero ta proclamá e Reino di Dios como hende su único speransa pa biba pa semper den un paradijs riba tera. (Marco 13:10; Revelacion 21:1-4) Nan ta mantené nan mes separá for di e política corupto i e forma di bida sushi dje mundu aki. (Juan 15:19; Santiago 1:27; 4:4) Ken awendia ta cumpli berdaderamente cu e criterionan aki? Echo ta establecé cu ta un contesta so tin: Testigonan di Jehova.

Kico si Duda Ta Persistí?

 9, 10. Kico nos por haci pa vence duda cu ta persistí?

⁹ Kico si nos haña nos mes atrapá den duda? Kico nos mester haci e ora ei? Sálomon e rey sabí ta duna e contesta: “Mi yu, si bo ricibí mi dichonan i atesorá cu bo mi mes mandamentunan, pa asina bo presta atencion cu bo oido na sabiduria, pa bo incliná bo curason na dicernimentu; si ademas bo sclama pa comprendimentu mes i duna bo bos pa dicernimentu mes, si bo sigui busk’é manera ta plata, i manera pa tesoro scondí bo sigui en busca di dje, den tal caso lo bo comprendé e temor di Jehova, i lo bo haña e conocimentu mes di Dios.”—Proverbionan 2:1-5.

¹⁰ E idea ei no ta tolondrador? Si nos ta dispuesto di paga tinu estrechamente na Dios su sabiduria, nos lo “haña e conocimentu mes di Dios.” Sí, e conocimentu dje Señor Soberano di universo ta na nos alcanse si nos ta dispuesto di ricibí i atesorá su dichonan. Esei ta encerá cu nos mester acudí na Jehova den oracion i pa medio di studio personal. E tesoronan scondí di su Palabra por deshací di cualkier duda i yuda nos mira e lus dje berdad.

11. Con duda a afectá e sirbidó di Eliseo?

¹¹ Un ehempel cu ta mustra cla con oracion por yuda un sirbidó di Dios cu tin miedu i duda, ta na 2 Reynan 6:11-18. E sirbidó di Eliseo tabata falta percepcion spiritual. E no por a percibí cu tabatin un ehército celestial ta apoyá e profeta di Dios rondoná dor dje ehército sirio. Cu miedu e sirbidó a grita: “Ai, mi shon! Kico nos lo haci?” Con Eliseo a respondé? “No tene miedu, pasobra tin mas cu ta cu nos cu esnan cu ta cu nan.” Pero con por a convencé e sirbidó? E no por a mira e ehército celestial.

12. (a) Con e dudanan dje sirbidó a ser kitá? (b) Con nos por resolvé cualkier duda cu nos por tin?

¹² “Eliseo a cuminsá haci oracion i bisa: ‘O Jehova, habri su wowonan, por fabor, pa e por mira.’ Inmediatamente Jehova a habri wowo dje sirbidó, di manera cu el a mira; i, ata! e region montañoso tabata yen di cabai i garoshi di guera di candela tur rond di Eliseo.” Den e caso ei Jehova a pone e sirbidó mira e ehército celestial cu tabata protehá Eliseo. Pero awe nos no mester spera e mésun tipo di yudansa divino. Corda cu e sirbidó dje profeta no tabatin Bijbel completo p’e studia i fortalecé su fe. Nos sí tin Bijbel. Si nos us’é bon, nos fe por bira fuerte mescos cu den su caso. Por ehempel, nos lo por meditá riba e relatonan cu ta describí Jehova den su corte celestial. Nan no ta laga ningun duda di cu Jehova tin un organisacion celestial cu ta apoyá su sirbidónan den e obra educacional mundial awe.—Isaías 6:1-4; Ezekiel 1:4-28; Daniel 7:9, 10; Revelacion 4:1-11; 14:6, 7.

Tene Cuido cu e Tácticanan di Satanas!

13. Cu ki medio Satanas ta purba swak e gara cu nos tin riba e berdad?

¹³ Cua ta algun otro manera cu Satanas ta purba swak nos spiritualidad i e gara cu nos tin riba e berdad? Un di nan ta inmoralidad, den tur su variedad di formanan. Den e mundu djawe loco pa sex, loke hende ta yama un “affair” (un palabra nèchi pa infieldad matrimonial), of un aventura di un anochi so (fornicacion casual) a bira cos di tur dia pa un generacion obsesioná cu placer, cu kier pasa bon a toda costa. Película, television i video ta promové e estilo di bida aki. Pornografia ta tur caminda den medionan di comunicacion, specialmente riba Internet. Tentacion ta spera esnan cu ta mira material pornográfico pa curiosidad.—1 Tesalonicensenan 4:3-5; Santiago 1:13-15.

14. Di con algun cristian a bira víctima dje tácticanan di Satanas?

¹⁴ Algun cristian a permití nan curiosidad vence nan i a susha nan mente i nan curason dor di mira imágennan pornográfico leve of asta pisá. Nan a permití nan mes cai den Satanas su trampa atractivo. Hopi bes esei a hiba na naufragio spiritual. Personanan asina no a keda “baby en cuanto maldad.” Nan no a bira “plenamente desaroyá den e facultad di comprendimentu.” (1 Corintionan 14:20) Tur aña, miles di cristian ta paga e prijs di no cumpli cu e principio i normanan dje Palabra di Dios. Nan a neglishá di bisti nan “armadura completo cu ta bini di Dios” i di keda cuné bistí.—Efesionan 6:10-13; Colosensenan 3:5-10; 1 Timoteo 1:18, 19.

Atesorá Loke Nos Tin

15. Pakico algun cristian lo por tin dificultad pa apreciá nan herencia spiritual?

¹⁵ Jesus a bisa: “Boso lo conocé e berdad, i e berdad lo haci boso liber.” (Juan 8:32) Mayoria Testigo tabatin cu los for di nan estilo di bida i asociacion religioso di ántes. P’esei kisas ta mas fácil pa nan apreciá e libertad cu e berdad ta trece cuné. Di otro banda, algun hóben cu a crece cu mayornan cu ta den e berdad, lo por tin dificultad pa apreciá nan herencia spiritual. Nunca nan no a forma parti di religion falsu, of di e mundu aki cu su énfasis riba buscamentu di placer, su adiccion na droga i su inmoralidad. Como consecuencia, kisas nan no ta mira e contraste skerpi cu tin entre nos paradijs spiritual i Satanas su mundu corupto. Algun di nan lo por asta entregá n’e tentacion di purba mundu su venenu pa mira ta kico nan ta perde!—1 Juan 2:15-17; Revelacion 18:1-5.

16. (a) Ki preguntanan nos por haci nos mes? (b) Kico nos ta ser siñá i animá pa haci?

¹⁶ Di berdad nos mester kima nos dede pa nos conocé dolor i sufrimentu? Nos no por siña dje experencianan negativo di otro hende? Nos mester acudí n’e “lodo” dje mundu aki pa wak si nos a perde algu? (2 Pedro 2:20-22) Pedro a recordá cristiannan di promé siglo cu ántes tabata parti dje mundu di Satanas: “E tempu cu a pasa caba ta suficiente pa boso a cumpli cu e boluntad dje nacionnan ora boso a procedé den echonan di conducta inmoral, mal deseo, demasiado biña, paranda, partidonan di bebementu i idolatria ilegal.” Un cos ta sigur: nos no tin nodi experimentá e “estado baho di libertinahe” di mundu pa nos sa con degradá bida por ta. (1 Pedro 4:3, 4) Al contrario, nos ta siña Jehova su normanan moral haltu na nos Salonnan di Reino, cu ta centronan di educacion bíblico. Ademas, nos ta ser animá pa usa nos facultad di razoná i proba pa nos mes cu nos tin e berdad, i asina haci e berdad di nos mes.—Hosué 1:8; Romanonan 12:1, 2; 2 Timoteo 3:14-17.

Nos Nomber No Ta un Simpel Etiket

17. Con nos por ta Testigonan eficas di Jehova?

¹⁷ Si nos haci e berdad di nos mes, nos lo busca moda di compartié cu otro hende na tur ocasion apropiado. Esaki no kier men cu nos lo purba pusha hende cuné maske nan no ta mustra interes. (Mateo 7:6) Mas bien, nos lo no tin ripara pa identificá nos mes como Testigo di Jehova. Si un hende mustra un chispa di interes dor di haci un pregunta sincero of aceptá un publicacion bíblico, nos lo ta cla i prepará pa compartí nos speransa cuné. Naturalmente, pa por haci esei lo ta bon si semper nos tin un of otro tipo di literatura huntu cu nos, sin importá unda nos ta: na cas, na trabou, na scol, na tienda of na lugánan di recreo.—1 Pedro 3:15.

18. Con laga hende sa bon cla cu nos ta un cristian por ta di gran beneficio den nos bida?

¹⁸ Ora nos identificá nos mes claramente como cristian, nos ta fortalecé nos defensa contra e atakenan astuto di Satanas. Si tin un hacimentu di aña, un fiesta di Pascu of un rifa di trabou, hopi bes coleganan ta bisa: “No wori pa purba cerca dje. E ta un Testigo di Jehova.” P’e mésun motibu hende lo por ta ménos incliná pa conta chiste sushi den nos presencia. Pues, ora nos laga hende sa nos posicion como cristian, esei ta di gran beneficio den nos bida, net manera apostel Pedro a mustra: “En berdad, ken ta e homber cu lo haci boso daño si boso bira celoso pa loke ta bon? Pero asta si boso ta sufri pa causa di husticia, boso ta felis.”—1 Pedro 3:13, 14.

19. Con nos sa cu nos ta leu den e último dianan?

¹⁹ Un otro beneficio di haci e berdad di nos mes ta cu nos lo ta convencí cu realmente nos ta den e último dianan dje sistema di cosnan aki. Nos lo sa cu hopi dje profecianan di Bijbel ta yegando nan culminacion den nos tempu.a Pablo su advertencia di cu “den e último dianan lo presentá tempu crítico, duru pa trata cuné” ta keda confirmá ampliamente dor dje sucesonan horibel dje siglo pasá. (2 Timoteo 3:1-5; Marco 13:3-37) Un artículo di korant recien tocante siglo 20 tabata titulá “Lo E Ser Recordá Como e Era di Salbahismo.” E artículo a bisa: “1999 a resultá di ta e aña mas asesino den e di dos mitar dje siglo mas asesino.”

20. Awor ta tempu pa haci kico?

²⁰ Awor no ta tempu pa vacilá. Jehova su bendicion ta claramente bisto riba e obra di educacion bíblico di mas grandi cu a yega di ser efectuá rond mundu como un testimonio pa tur nacion. (Mateo 24:14) Haci e berdad di bo mes, i compartié cu otro hende. Bo futuro eterno ta dependé di loke bo haci awor. Lo bo no gana Jehova su bendicion dor di baha man. (Lucas 9:62) Mas bien, ta tempu pa “bira firme, inmovibel, semper teniendo hopi di haci den e trabou di Señor, sabiendo cu boso labor no ta en bano en relacion cu Señor.”—1 Corintionan 15:58.

[Nota]

Bo Ta Corda?

• Con nos por core cu duda?

• Kico nos por siña for dje ehempel di Eliseo su sirbidó?

• Contra ki tentacionnan moral nos mester vigilá constantemente?

• Pakico nos mester identificá nos mes claramente como Testigo di Jehova?

[Plachinan na página 10]

Studio di Bijbel regular i oracion por yuda nos core cu duda

[Plachi na página 11]

Un vision a kita e dudanan dje sirbidó di Eliseo

[Plachi na página 12]

Nos ta siña Jehova su normanan moral haltu na Salonnan di Reino manera esun aki na Benin