“Esun Ku Aseptá Reprendementu Ta Prudente”

“DIRIGÍ bo kurason na instrukshon [“disiplina,” NW], i bo oreanan na palabranan di konosementu,” Proverbionan 23:12 ta bisa. Den e teksto aki “disiplina,” òf entrenamentu moral, ta inkluí tantu disiplina propio komo e reprendementu ku nos ta risibí di otro hende. Pa un hende por duna disiplina e mester sa ki korekshon ta nesesario i kon pa dun’é. P’esei, e “palabranan di konosementu” di un fuente konfiabel ta esensial pa duna disiplina.

E buki bíbliko di Proverbionan ta un fuente ekselente di palabranan sabí. E proverbionan registrá den dje ta “pa konosé sabiduria i instrukshon [“disiplina,” NW], . . . pa risibí instrukshon den kondukta prudente, hustisia, huisio i rektitut.” (Proverbionan 1:1-3) Ta sabí pa nos ‘dirigí nos oreanan’ na nan. Proverbionan kapítulo 15 ta duna konseho sano riba kon nos por dominá rabia, usa nos lenga i impartí konosementu. Laga nos konsiderá algun versíkulo for di e kapítulo ei.

Kiko Ta “Kita Rabia”?

Dunando un deskripshon di ki efekto palabra papiá por tin riba rabia, Rei Salomon di Israel di antigwedat a deklará: “Un kontesta suave ta kita rabia, ma un palabra skèrpi ta lanta rabia.” (Proverbionan 15:1) Hende ta usa e palabra “rabia” pa deskribí un emoshon fuerte òf reakshon di disgustu. Kon e proverbio aki por yuda nos trata ku e rabia di un otro persona i tambe kontrolá esun di nos mes?

Palabra skèrpi ku ta kousa doló por hasi un situashon desagradabel bira pió. Di otro banda, un kontesta suave hopi bes ta kalma e situashon. Ma no ta tur biaha ta fásil pa kontestá un persona rabiá na un manera suave. Pero loke por yuda ta si nos ta purba komprondé kiko a pon’é rabia. Beibel ta bisa: “Prudensia di un hende ta hasi ku e no ta rabia lihé, i pa laga un ofensa pasa ta su gloria [“bunita di su parti,” NW].” (Proverbionan 19:11) Ta eksistí e posibilidat ku un persona ta rabiá pa motibu ku e ta insigur di su mes òf pasobra e ke atenshon? Kisas e motibu real no tin nada di haber ku loke nos por a bisa òf hasi. Ora un persona kontestá nos den un forma rabiá den e ministerio kristian, hopi biaha esei no ta pasobra e doño di kas ta mal informá tokante nos kreensianan òf ta siegá dor di un ke otro konsepto eróneo? Nos tin ku tum’é komo algu personal i respondé bèk na mal manera? Asta ora e motibu di un persona su rabia no ta bisto mesora, si nos kontestá ku palabranan ku ta kousa doló nos ta mustra ku nos no tin disiplina propio. Nos mester evitá di reakshoná asina.

E konseho pa duna un kontesta suave ta balioso tambe ora nos tin ku kontrolá nos mes rabia. Nos por apliká e konseho ei dor di siña ekspresá nos emoshonnan na un manera ku no ta ofendé e oyente. Ora nos ta trata ku miembronan di famia, en bes di papia brutu ku nan òf insultá nan, nos por hasi esfuerso pa ekspresá nos sintimentunan na un manera kalmu. Por lo general, agreshon verbal ta provoká represaya. Ora nos papia suavemente ku un persona tokante nos sintimentunan, nos papiá no ta sali den forma di akusashon i esei lo por impuls’é pa pidi despensa.

“Lenga di e Sabínan Ta Usa Konosementu Korektamente”

Disiplina propio ta afektá nos manera di papia i tambe loke nos ta bisa. Salomon a bisa: “Lenga di e sabínan ta usa konosementu korektamente, ma boka di e bobonan ta brota lokura.” (Proverbionan 15:2) Ora nos kultivá un deseo pa yuda otro hende i nos papia ku nan tokante e propósito di Dios i su provishonnan maravioso, nos no ta ‘usando konosementu korektamente’? Un persona bobo no ta hasi esaki pasobra e falta konosementu.

Promé ku Salomon duna mas guia riba uso di e lenga, e ta presentá un kontraste ku ta pone hende pensa seriamente. “E wowonan di SEÑOR ta tur kaminda, vigilando malu i bon.” (Proverbionan 15:3) Nos por alegrá pa motibu di esaki pasobra Beibel ta sigurá nos: “Wowo di SEÑOR ta move bai bin dor di henter tera, pa e por sostené fuertemente esnan ku nan kurason ta kompletamente di dje.” (2 Krónikanan 16:9) Dios sa ora nos ta hasi loke ta bon. E ta tuma nota tambe di esnan ku ta praktiká loke ta malu i ta tene nan responsabel.

Mas aleu Salomon ta enfatisá e balor di un lenga suave, bisando: “Un lenga suave ta un palu di bida, ma perversidat den dje ta kibra e spiritu.” (Proverbionan 15:4) E ekspreshon “palu di bida” ta duna e idea di algu ku ta kura i fortifiká. (Revelashon 22:2) E papiá suave òf kalmu di un persona ta refreská e spiritu òf disposishon di esnan ku ta tend’é. E ta stimulá nan bon kualidatnan. Di otro banda, un lenga engañoso òf pèrvèrso ta kibra e disposishon di e personanan ku ta tende.

Risibí Disiplina i “Plama Konosementu”

“Un bobo ta despresiá disiplina di su tata,” e rei sabí ta kontinuá, “ma esun ku aseptá reprendementu ta prudente.” (Proverbionan 15:5) Kon un hende por “aseptá reprendementu” si e no a risibí esaki promé? E teksto aki ta indiká ku mester duna disiplina den forma di korekshon ora esaki ta nesesario, no ta bèrdat? Den un famia, ta e mayornan, foral e tata, tin e responsabilidat pa duna disiplina i e yunan tin deber di aseptá esei. (Efesionan 6:1-3) Sin embargo, tur sirbidó di Yehova ta risibí disiplina den un òf otro forma. Hebreonan 12:6 ta bisa: “Esnan ku SEÑOR ta stima, e ta disipliná, i e ta suta tur yu ku e ta risibí.” E manera ku nos ta reakshoná na disiplina ta revelá si nos ta sabí òf bobo.

Presentando un otro kontraste mas, Salomon ta bisa: “Lepnan di e sabínan ta plama konosementu, ma kurason di e bobonan no ta hasi asina.” (Proverbionan 15:7) Plamamentu di konosementu ta manera plamamentu di simia. Den tempunan antiguo, un kunukero no tabata sembra tur su simianan na un kaminda so. Mas bien, kada biaha e tabata plama un par di simia te ora e kubri henter e tereno. Ta meskos ku plamamentu di konosementu. Por ehèmpel, ora nos topa un persona den sirbishi, no ta sabí pa splik’é den un tiru tur loke nos sa di Beibel. En bes di esei, e persona sabí ta demostrá disiplina den su abla. E ta “plama” konosementu tiki-tiki segun ku e ta enfatisá gradualmente djis un bèrdat di Beibel i ta edifiká riba dje, teniendo kuenta ku e reakshon di esun ku ta tend’é. Ta esei ta loke Hesukristu, nos Ehèmpel, a hasi ora el a papia ku un muhé samaritano.—Juan 4:7-26.

Impartí konosementu ta enserá bisa algu instruktivo i benefisioso. Preparashon ta nesesario pa ekspresá palabranan ku ta informá i animá. P’esei, “kurason di e hustu ta studia bon kon pa kontestá.” (Proverbionan 15:28) Ta masha importante pa nos palabranan ta manera áwaseru suave ku ta muha tera i ta benefisioso, i no manera un tormenta ku ta bari tur kos den su kaminda!

‘Santu den Kondukta’

Sin duda, e proseder sabí ta pa plama konosementu tokante Yehova i su propósito i ofres’é “e fruta di lepnan” komo “un sakrifisio di alabansa.” (Hebreonan 13:15) Sin embargo, pa un sakrifisio asina ta aseptabel pa Yehova, nos mester ta “santu den tur [nos] kondukta.” (1 Pedro 1:14-16) Usando dos proverbio den forma di kontraste, na un manera konvinsente Salomon ta hala nos atenshon riba e bèrdat vital aki. E ta bisa: “Sakrifisio di e malbadonan ta abominashon pa SEÑOR, ma orashon di e rektonan ta su delisia. Kaminda di e malbado ta abominashon pa SEÑOR, ma e ta stima esun ku ta sigui hustisia.”—Proverbionan 15:8, 9.

Kon personanan ku ta bandoná e kaminda ku ta hiba na bida ta mira reprendementu, i kiko ta warda nan? (Mateo 7:13, 14) “Disiplina severo ta pa esun ku bandoná e kaminda; esun ku ta odia reprendementu lo muri.” (Proverbionan 15:10) En bes di aseptá konseho di korekshon for di personanan responsabel den e kongregashon kristian i repentí di kurason, algun ku ta kana den mal kaminda ta preferá di bandoná e kaminda di hustisia. Esta un bobedat!

Kiko di un hende ku ta duna e impreshon ku e ta aseptá reprendementu miéntras ku en realidat e ta odi’é? E tampoko no ta duna muestra di ta sabí. “Seol i Abadon [“lugá di destrukshon,” NW] ta dilanti di SEÑOR,” e rei di Israel a bisa. “Kuantu mas e kurasonnan di hende!” (Proverbionan 15:11) Na moda di papia, no tin nada ku por ta mas aleu for di e Dios bibu ku Seol, e lugá di e mortonan. Tòg, e ta dilanti dje. E konosé e identidat i personalidat di tur hende ku ta eiden i e por resusitá nan. (Salmo 139:8; Juan 5:28, 29) Ta masha fásil pa Yehova sa kiko hende tin den nan kurason! Segun apòstel Pablo: “Tur kos ta habrí i bisto dilanti di wowo di esun ku nos tin di haber kuné.” (Hebreonan 4:13) Esun ku ta fingi por gaña hende, pero no Dios.

Un persona ku ta rechasá disiplina no solamente ta odia reprendementu sino tambe ta menospresiá esun ku ta dun’é. Salomon di: “Un hasidó di bofon no ta stima esun ku reprend’é.” Anto pa amplia riba e punto aki el a agregá e pensamentu paralelo: “Ni e lo no bai serka e sabínan.” (Proverbionan 15:12) No tin masha speransa ku un persona asina lo bai kana den e bon kaminda!

Punto di Bista Positivo

E siguiente tres proverbionan di Salomon tin di haber ku e palabra “kurason.” E rei sabí ta mustra ki efekto nos emoshonnan tin riba nos kara: “Un kurason alegre ta hasi kara kontentu, ma ora ku e kurason ta tristu, e spiritu ta kibrá.”—Proverbionan 15:13.

Kiko por hasi un kurason tristu? Beibel ta bisa: “Ansha den kurason di hende ta hasié abatí [tristu].” (Proverbionan 12:25) Kon nos por evitá ku e aspektonan negativo di bida ta kibra nos? En bes di pensa konstantemente riba sirkunstansianan riba kua kisas nos no tin hopi kontròl, nos por meditá riba e bendishonnan spiritual riku ku Yehova a drama riba nos awor i riba loke lo e hasi pa nos den futuro. Esaki lo hala nos mas serka di dje. Sí, si nos hala serka “e Dios felis,” esei sin duda lo yena nos kurason tristu ku goso.—1 Timoteo 1:11, NW.

Ademas, e mensahe di Beibel ta un fuente ekselente di konsuelo i deleite. E salmista a bisa ku e hende ku tin ‘delisia den e lei di SEÑOR, i ku ta meditá di dia i anochi riba su lei,’ lo ta felis. (Salmo 1:1, 2) Asta ora nos ta hopi tristu, lesamentu di Beibel i meditashon riba loke e ta bisa lo animá nos. Nos tin tambe e sirbishi ku Dios a duna nos. Beibel ta sigurá nos ku “esnan ku sembra ku awa na wowo lo kosechá ku gritu di alegria.”—Salmo 126:5.

Salomon ta bisa: “Kurason di esun ku tin komprondementu ta buska konosementu, ma boka di e bobo ta alimentá su mes ku lokura.” (Proverbionan 15:14) E proverbio aki ta hala nos atenshon riba un kontraste skèrpi entre e konseho di un persona sabí i esun di un persona bobo. Un persona ku tin komprondementu ta buska konosementu promé ku e duna konseho. E ta skucha bon i ta haña e detayenan ku e mester sa di dje. E ta investigá den e Skritura pa haña sa kua lei i prinsipio ta apliká den e situashon. Su konseho ta firmemente basá riba e Palabra di Dios. Sin embargo, un persona bobo no ta wòri buska pa sa e detayenan di e situashon sino ta papia loke bini na su mente. P’esei, ora nos ta buska konseho, ta sabí pa bai serka personanan maduro ku tin konosementu en bes di serka esnan ku kisas ta inkliná pa bisa nos loke nos ke tende. Nos por ta masha kontentu ku den e kongregashon kristian tin ‘donnan den hende’ ku ta “buska konosementu” promé ku nan duna konseho!—Efesionan 4:8.

E siguiente proverbio ta deklará kon un punto di bista positivo por resultá den gran benefisio. E rei di Israel a bisa: “Tur e dianan di esun ku ta afligí ta malu, ma esun di kurason kontentu semper tin fiesta.” (Proverbionan 15:15) Bida tin su bendishonnan i su kalamidatnan, su goso i su tristesa. Si nos konsentrá solamente riba e parti negativo, tristesa lo dominá nos pensamentunan i tur nos dianan lo ta deprimente. Sin embargo, si nos laga bendishonnan personal i e speransa ku Dios ta duna nos dominá nos pensamentunan, e aspektonan di bida ku ta kousa aflikshon lo bira insignifikante i nos lo eksperimentá un goso di kurason. Un punto di bista positivo ta pone ku “semper [nos] tin fiesta.”

Laga nos hasi tur nos esfuerso anto pa duna hopi balor na disiplina. Laga nos permitié influensiá no solamente nos emoshonnan, nos abla i akshonnan, sino tambe nos punto di bista.

[Plachi na página 13]

“Un kontesta suave ta kita rabia”

[Plachi na página 15]

Mayornan tin e responsabilidat di duna disiplina

[Plachi na página 15]

“Lepnan di e sabínan ta plama konosementu”