Pa Nan Ta un Goso pa Hasi e Boluntat di Dios

HESUS a pone un ehèmpel pa tur kristian sigui ora ku el a bisa su Tata den orashon: “[Laga] no mi boluntat, ma di bo sosodé.” (Lukas 22:42) Awe, miónes di sirbidó di Dios ta ripití e mesun ekspreshon humilde ei di sumishon na Yehova. Entre nan tin e 52 studiantenan di e di 120 klas di e Skol Bíbliko di Galaad di Watchtower. Dia 11 di mart 2006, e graduadonan di e klas aki tabata kontentu ku e prospekto di por bai hasi e boluntat di Dios den vários pais, apesar ku nan lo konfrontá sirkunstansianan difísil.

Kiko a motivá e graduadonan aki pa laga e boluntat di Yehova dirigí nan bida? Chris ku Leslie, un pareha asigná pa sirbi komo misionero na Bolivia, a splika nan motivashon asin’aki: “Ya ku nos a nenga nos mes, nos ke pone nos mes disponibel pa hasi loke sea ku nan asigná nos den koperashon ku Yehova su organisashon.” (Marko 8:34) Jason ku Chere, asigná pa bai Albania a agregá: “Tur asignashon ku nos a haña for di Yehova su organisashon tabatin su retonan kuné. Sin embargo, nos a deskubrí ku Yehova ta meresé nos pleno konfiansa.”

Animashon pa Someté na e Boluntat di Yehova

George Smith, un miembro di e famia di Bètel ku ta sirbi na e Departamento di Arte, a habri e programa ku orashon. Stephen Lett, miembro di e Kuerpo Gobernante di Testigunan di Yehova i presidente di e programa di graduashon, a yama tur presente bonbiní. Huéspetnan for di 23 pais a bin na e Sentro Edukativo di Watchtower na Patterson, New York, pa nan por ta presente na e okashon felis aki. Ruman Lett a bisa e klas di graduado ku nan ta bai efektuá “algu masha poderoso.” El a hala atenshon na “fòrtinan,” òf kosnan fuertemente ankrá, ku e misioneronan lo por basha abou mediante e poder di e Skritura, manera por ehèmpel, doktrinanan falsu. (2 Korintionan 10:4, 5) El a konkluí: “Ki un goso boso lo sinti ku Yehova ta usa boso pa basha abou e kosnan fuertemente ankrá ku tin den e hendenan di kurason onrado den boso asignashon!”

Harold Jackson, miembro di e ofisina prinsipal, a papia riba e tema “Algun Kos pa Keda Kòrda.” El a bisa ku e misioneronan nobo no mester lubidá nunka di “buska promé e reino di Dios i Su hustisia.” (Mateo 6:33) Nan tin ku keda kòrda ku “amor ta edifiká” i ta un faktor importante i infalibel pa nan por tin éksito. (1 Korintionan 8:1) E oradó di: “Laga amor ta e influensia prinsipal ku ta guia boso manera di trata ku otro hende.”

Despues di e diskurso ei, Geoffrey Jackson, un miembro di Kuerpo Gobernante ku a sirbi komo misionero for di 1979 te ku 2003, a puntra e graduadonan: “Ta Abo Ta Responsabel?” El a enfatisá kon nesesario ta pa nos tin un punto di bista balansá di nos mes i di e ministerio. Kristiannan tin e responsabilidat di traha duru den e trabou di planta i muha e simianan di e bèrdat. Sin embargo, ta Yehova su responsabilidat pa duna kresementu spiritual, ya ku ta ‘Dios ta duna kresementu.’ (1 Korintionan 3:6-9) Ruman Jackson a agregá: “Yehova ta tene boso responsabel pa keda spiritualmente fuerte. Pero kiko ta boso responsabilidat di mas grandi? Stima Yehova i stima e hendenan ku boso ta bai sirbi.”

Instruktor di Galaad, Lawrence Bowen, a trata e tema “Sa Kon Bo Mester Komportá Bo Mes.” El a rekordá e studiantenan ku Yehova milagrosamente a guia i protehá e israelitanan durante nan trayekto den desierto. (Eksodo 13:21, 22) E ta guia i protehá nos awe, en parte mediante e kongregashon kristian ungí, ku ta “e pilar i sosten di e bèrdat.” (1 Timoteo 3:14, 15) E misioneronan nobo mester promové e bèrdat, pasobra ta e bèrdat ta duna guia i protekshon na personanan humilde.

Wallace Liverance, un otro instruktor di Galaad, a urgi e graduadonan pa no lubidá e palabra di Dios ku ta “tras” di nan. E palabra di Dios ta nos tras den e sentido ku ta siglonan pasá a kompletá e Beibel. Meskos ku un wardadó di karné ku ta duna instrukshon kanando tras di un tou di karné, asina Yehova ta tras di su pueblo, dunando nan guia mediante “e esklabo fiel i prudente.” (Isaias 30:21; Mateo 24:45-47) Skol di Galaad a yuda e graduadonan haña mas apresio pa e esklabo fiel. E “esklabo” a asta perkurá pa nos tin e Tradukshon di Mundu Nobo di e Santu Skritura. E oradó a animá e graduadonan: “Tuma e tesoro aki di informashon, i us’é pa siña otro hende.”—Mateo 13:52.

Hasi e Boluntat di Yehova den Sirbishi di Vèlt

Den e parti di e programa “Ansioso pa Prediká e Bon Nobo,” instruktor di Galaad Mark Noumair, a trese dilanti algun di e eksperensianan ku e graduadonan tabatin den nan ministerio públiko durante e periodo ku nan a asistí na e Skol di Galaad. (Romanonan 1:15) E entrevistanan ku vários graduado a saka na kla ku en bèrdat nan tabata masha ansioso mes pa prediká na tur okashon.

E graduadonan a haña mas animashon ainda for di un entrevista ku Kenneth Flodin a tene ku tres superintendente biahero ku awor ta sirbi na Merka. Richard Keller i Alejandro Lacayo, kendenan den pasado a sirbi na Sur- i Sentroamérika, a splika kon nan a logra superá vários prueba. Tambe nan a konta tokante algun di e bendishonnan ku nan a haña tempu ku nan tabata sirbi komo misionero. Moacir Felisbino a konta di e entrenamentu ku el a haña trahando estrechamente huntu ku misioneronan na Brazil, kaminda el a lanta komo mucha.

David Schafer a entrevistá tres misionero veterano, Robert Jones, Woodworth Mills i Christopher Slay. E tres rumannan aki a konta kon nan a siña aktua ku konfiansa den Yehova ora ku nan tabata konfrontá difikultat. Nan a sigurá e klas ku e entrenamentu ku nan a haña for di Yehova su organisashon a prepará nan bon pa nan asignashon komo misionero. Ruman Mills a resumié asin’aki: “Loke a yuda ami mas tantu no tabata e parti akadémiko di Galaad, sino loke e skol a siña mi tokante humildat i amor.”

Guy Pierce, miembro di Kuerpo Gobernante, a presentá e diskurso prinsipal titulá “Nunka Yehova Lo Frakasá.” Adam a frakasá, pero akaso esei a nifiká un frakaso di parti di Dios? Ta Dios a krea Adam ku un defekto, manera tin hende ta bisa? Apsolutamente ku nò, pasobra e ‘Dios berdadero a traha hende rekto.’ (Eklesiastés 7:29) Hesus su kaminda di integridat bou di e prueba di mas grandi riba tera a komprobá ku “Adam no tabatin ningun èksküs, ningun motibu pa faya,” e oradó a deklará. E prueba di obedensia ku Adam a pasa den e hòfi di Edén tabata hopi mas fásil kompará ku e prueba ku Hesus a konfrontá ku éksito. Tòg, Adam a frakasá. Sin embargo, nunka Yehova lo frakasá. Su propósito lo ser realisá. (Isaias 55:11) Ruman Pierce a bisa e misioneronan nobo: “Boso tin e privilegio di onra Yehova ku boso spiritu di sakrifisio propio. Yehova sea ku boso na unda ku boso ta sirbié komo misionero.”

Despues ku Ruman Lett, presidente di e programa, a menshoná e saludonan di vários sukursal di Testigunan di Yehova, el a entregá e graduadonan nan diploma i asignashon. Vernon Wisegarver, kende tin hopi aña ta sirbi komo miembro di e famia di Bètel, a representá e ouditorio den e orashon di konklushon.

E 6.872 personanan presente a haña ku e programa di graduashon a renobá nan entusiasmo pa hasi e boluntat di Dios. (Salmo 40:8) E graduadonan Andrew i Anna a bisa: “Nos a dediká nos bida na Yehova. Nos a primintí Yehova di hasi kiko ku e pidi nos. Awèl, a sosodé ku Yehova a pidi nos pa bai Camerun, Afrika.” Nan i e otro miembronan di e klas ta ansioso pa kuminsá ku un karera ku lo duna nan un sintimentu di logro i satisfakshon. Sí, pa nan ta un goso pa hasi e boluntat di Dios.

[Kuadro na página 17]

ESTADÍSTIKANAN DI E KLAS

Kantidat di pais representá: 6

Kantidat di pais na kua a asigná nan: 20

Kantidat di studiante: 52

Promedio di edat: 35,7

Promedio di aña den e bèrdat: 18,3

Promedio di aña den sirbishi di tempu kompletu: 14,5

[Plachi na página 18]

E di 120 Klas di Graduado di e Skol Bíbliko di Galaad di Watchtower

Den e lista aki bou, e reinan ta numerá di dilanti bai patras, i e nòmbernan ta bai di robes pa drechi den kada rei.

(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.