Referensia pa Material i Tarea pa Reunion Nos Bida i Sirbishi Kristian

Referensia pa Material i Tarea pa Reunion Nos Bida i Sirbishi Kristian

3-9 DI ÒKTOBER

Buska Hoyanan Spiritual

it-1-S 526

Konosementu

E Fuente di Konosementu. Yehova ta e fuente prinsipal di konosementu. Bida ta bini di dje, i sin bida nos no por haña ningun tipo di konosementu. (Sl 36:9; Ech 17:25, 28) Ademas, Dios a krea tur kos, pues e konosementu ku hende tin ta basá riba estudio ku nan a hasi di e obranan di Dios. (Rev 4:11; Sl 19:1, 2) Tambe Dios a inspirá su Palabra skirbí, for di kua hende por siña kiko ta su boluntat i propósito. (2Ti 3:16, 17) Pues, tur berdadero konosementu ta bini di Yehova, i hende ku ta buska e konosementu ei mester tin temor di Dios i mester tene kuidou pa no desagrad’é. E temor ei ta prinsipio di konosementu. (Pro 1:7) Temor di Dios por yuda un persona haña konosementu eksakto, miéntras ku esnan ku no ta tene kuenta ku Dios por yega fásilmente na un konklushon kiboká di loke nan ta mira.

17-23 DI ÒKTOBER

TESORONAN DI E PALABRA DI DIOS | PROVERBIONAN 12-16

“Sabiduria Ta Mihó ku Oro”

w07-S 15/7 8

“Sabiduria Ta pa Protehá Nos”

PROVERBIONAN 16:16 ta bisa: “Kuantu mas mihó ta pa haña sabiduria ku pa haña oro! I pa haña komprondementu ta di preferá riba plata.” Dikon sabiduria ta asina balioso? Beibel ta kontestá: “Pasobra sabiduria ta protekshon meskos ku plaka ta protekshon. Ma e bentaha di konosementu ta ku sabiduria ta preservá bida di esnan ku ta pose’é.” (Eklesiástes 7:12) Pero, kon sabiduria ta preservá bida di hende ku ta pose’é?

Nos por hiba un bida ku ta agradá Yehova ora nos haña sabiduria divino, esta, konosementu eksakto di Beibel, e Palabra di Dios, i despues aplik’é. (Proverbionan 2:10-12) Rei Sálomon di Israel di antigwedat a bisa: “Kaminda grandi di e rektonan ta: pa apartá bo mes for di maldat; esun ku paga tinu kon e ta kana ta preservá su alma.” (Proverbionan 16:17) Sí, sabiduria ta libra hende di mal kaminda i ta preservá nan bida. E konsehonan breve pero sabí ku nos ta haña na Proverbionan 16:16-33 ta mustra bon kla ki influensia positivo sabiduria divino por tin riba nos personalidat, nos palabranan i nos echonan.

‘Sea di un Spiritu Humilde’

Den Beibel, Proverbionan 8:13 ta papia di sabiduria personifiká. E ta bisa: “Orguyo [i] arogansia . . . mi ta odia.” Orguyo i sabiduria ta kompletamente kontrario di otro. Nos tin ku komportá nos mes ku sabiduria i tene kuidou pa no laga orguyo, òf arogansia, dominá nos. Nos mester ta spesialmente alerta enkuanto esaki si ta bayendo bon ku nos den sierto área di nos bida òf si nos tin responsabilidat den kongregashon.

Proverbionan 16:18 ta spièrta nos: “Orguyo ta bini promé ku destrukshon, i un spiritu arogante promé ku kaida.” Pensa riba e kaida di mas grandi ku tabatin den historia, e kaida di un yu perfekto di Dios ku a kombertí su mes den Satanas. (Génesis 3:1-5; Revelashon 12:9) Akaso e no a manifestá un spiritu di orguyo promé ku su kaida? Beibel ta hasi referensia na esaki ora e ta menshoná pa no rekomendá un ruman pa e puesto di superintendente di kongregashon si e ta un ruman resien kombertí “pa e no hincha di orguyo i risibí e mesun huisio ku Diabel a risibí.” (1 Timoteo 3:1, 2, 6) P’esei, ta importante pa nos no alimentá sintimentunan di orguyo den otro hende ni permití e sintimentunan akí lanta den nos kurason.

w07-S 15/7 8-9

“Sabiduria Ta pa Protehá Nos”

‘Sea di un Spiritu Humilde’

Proverbionan 16:18 ta spièrta nos: “Orguyo ta bini promé ku destrukshon, i un spiritu arogante promé ku kaida.” Pensa riba e kaida di mas grandi ku tabatin den historia, e kaida di un yu perfekto di Dios ku a kombertí su mes den Satanas. (Génesis 3:1-5; Revelashon 12:9) Akaso e no a manifestá un spiritu di orguyo promé ku su kaida? Beibel ta hasi referensia na esaki ora e ta menshoná pa no rekomendá un ruman pa puesto di superintendente di kongregashon si e ta un ruman resien kombertí “pa e no hincha di orguyo i risibí e mesun huisio ku Diabel a risibí.” (1 Timoteo 3:1, 2, 6) P’esei, ta importante pa nos no alimentá sintimentunan di orguyo den otro hende ni permití e sintimentunan akí lanta den nos kurason.

Na Proverbionan 16:19 nos ta lesa: “Ta mihó pa ta di un spiritu humilde huntu ku e humildenan, ku parti botin ku e orguyosonan.” E ehèmpel di Nabukodonosor, rei di Babilonia, ta mustra ku e palabranan ei ta masha sabí. E hòmber akí, yen di orguyo, a traha un imágen masha grandi den e sabana di Dura. E imágen, ku kisas tabata un representashon di dje, tabata riba un pedestal masha haltu ku a hasié mas òf ménos 27 meter haltu. (Daniel 3:1) Nabukodonosor tabata ke pa e imágen akí ta un símbolo di e poder di su imperio. Kisas kosnan grandi manera imágen-, monumento-, toren- òf edifisionan ku ta yega te shelu por impreshoná hende, pero nan no ta impreshoná Dios. E salmista a kanta: “Pasobra aunke SEÑOR ta halsá, tòg e ta atendé e hende humilde; ma e hende orguyoso e ta konosé djaleu.” (Salmo 138:6) De echo, “loke hende ta konsiderá di masha balor ta un kos repugnante den bista di Dios.” (Lukas 16:15) Ta mihó “mantené un aktitut humilde” ku ‘bira sabí den bo mes bista.’—Romanonan 12:16.

Papia ku Komprondementu i Konvikshon

Ora nos haña sabiduria, ki efekto esaki tin riba nos manera di papia? E rei sabí ta splika nos ku e siguiente palabranan: “Esun ku paga tinu na e palabra lo haña bondat, i bendishoná ta esun ku ta konfia den SEÑOR. Esun di kurason sabí lo wòrdu yamá prudente, i palabranan agradabel ta promové konosementu. Komprondementu ta un fuente di bida pa esun ku tiné, ma e disiplina di hende bobo ta bobedat. Kurason di un hende sabí ta guia su boka, i su lepnan ta papia ku konosementu.”—Proverbionan 16:20-23.

Sabiduria ta permití nos papia ku komprondementu i konvikshon. Dikon? Pasobra hende sabí ta purba di ‘haña loke ta bon’ den un asuntu i ta ‘konfia den Yehova.’ Si nos ta hasi nos bèst pa buska loke ta bon den otro hende, nos lo ta kla pa papia bon di nan. Nos manera di papia, en bes di ta fuerte òf pika, lo ta dushi i konvinsente. Ora nos analisá e sirkunstansianan di otro hende, nos lo komprondé nan difikultatnan i kon nan ta trata ku nan.

Ta importante tambe pa papia ku sabiduria ora nos ta prediká e bon notisia di Reino i ta hasi disipel. Ora nos ta siña hende e Palabra di Dios, nos meta no ta pa simplemente transmití informashon, sino pa yega na nan kurason. Pa logra esei nos tin ku usa palabranan konvinsente. Apòstel Pablo a animá Timoteo pa sigui den e kosnan ku el a “keda konvensí di dje.”—2 Timoteo 3:14, 15.

w07-S 15/7 9-10

“Sabiduria Ta pa Protehá Nos”

Papia ku Komprondementu i Konvikshon

Ta importante tambe pa papia ku sabiduria ora nos ta prediká e bon notisia di Reino i ta hasi disipel. Ora nos ta siña hende e Palabra di Dios, nos meta no ta pa simplemente transmití informashon, sino pa yega na nan kurason. Pa logra esei, nos tin ku usa palabranan konvinsente. Apòstel Pablo a animá Timoteo pa sigui den e kosnan ku el a “keda konvensí di dje.”—2 Timoteo 3:14, 15.

Segun An Expository Dictionary of New Testament Words di W. E. Vine, e palabra griego ku ta ser tradusí komo “konvensí” ta nifiká “hasi un kambio den e manera di pensa pa medio di rasoná òf konsiderá loke ta moral.” Pa nos por trese argumentonan ku ta konvensé un persona i pon’é kambia su manera di pensa, nos tin ku komprondé bon loke e ta pensa, loke ta interes’é, su sirkunstansianan i su pasado. Kon nos por logra tur esaki? Disipel Santiago a bisa ku nos mester “ta kla pa skucha, slo pa papia.” (Santiago 1:19) Ora nos laga e persona ekspresá su mes i paga bon tinu na loke e ta bisa, nos por saka afó ki tipo di hende e ta i kiko e ta pensa.

Apòstel Pablo tabatin e abilidat ekstraordinario di konvensé hende. (Echonan 18:4) Asta un hòmber ku a opon’é, Demetrio, a rekonosé: “E tal Pablo akí a konvensé masha hopi hende mes i a pone nan kambia di opinion, no na Efeso so, sino den kasi henter Asia.” (Echonan 19:26) Pablo a tuma mérito pa e echo ku e tabata prediká na manera efikas? Nò, di ningun manera. Pa Pablo, su predikashon tabata un “demostrashon di e spiritu i di e poder di Dios.” (1 Korintionan 2:4, 5) E spiritu santu di Yehova ta yuda nos tambe. Nos ta konfia den Yehova, i p’esei, nos ta sigur ku lo e bendishoná nos esfuersonan pa papia den sirbishi ku komprondementu i di un manera konvinsente.

No ta nada straño anto ku Beibel ta bisa ku hende “di kurason sabí” ta “inteligente” òf “prudente.” (Proverbionan 16:21) Sí, e kualidat akí, esta komprondementu, “ta un fuente di bida” pa hende ku tiné. Awor bon, kiko nos por bisa di hende bobo? Nan ta “despresiá sabiduria i instrukshon, [òf, “disiplina,” NW].” (Proverbionan 1:7) I ki resultado nan tin ora nan rechasá e disiplina di Yehova? Segun e palabranan di Sálomon: “Disiplina di hende bobo ta bobedat.” (Proverbionan 16:22) Hende bobo ta haña mas disiplina i hopi bes kastigu severo. Ademas, nan bobedat por hiba nan na hopi difikultat, bèrgwensa, malesa i asta morto prematuro.

Pa enfatisá mas aleu e efekto ku sabiduria tin riba nos manera di papia, e rei di Israel a bisa: “Palabranan agradabel ta manera un panal di miel, dushi pa alma i kuramentu pa wesu.” (Proverbionan 16:24) Meskos ku miel ta dushi i ta kalma un hende su hamber lihé, palabranan agradabel ta animá i refreská. Ademas, meskos ku miel por yuda hende kura di sierto enfermedat i ta bon pa nos salú, palabranan agradabel ta bon pa nos salú spiritual.—Proverbionan 24:13, 14.

Tene Kuidou ku “un Kaminda Ku Ta Parse Bon”

Sálomon a bisa: “Tin un kaminda ku ta parse bon den bista di hende, ma su fin ta e kaminda di morto.” (Proverbionan 16:25) E palabranan akí ta yuda nos evitá e peliger di rasonamentu falsu i di pensa kontrali na e leinan di Dios. Desde nos punto di bista imperfekto, sierto komportashon por parse aseptabel, pero en realidat e ta bai kontra di e prinsipionan hustu ku nos ta haña den e Palabra di Dios. Ademas, Satanas por usa esei pa pone nos kana riba un kaminda ku den nos bista ta parse bon pero ku ta hiba na morto.

Buska Hoyanan Spiritual

g-S 11/13 16

Abo “Semper Tin Fiesta”?

“Tur e dianan di esun ku ta afligí ta malu, ma esun di kurason kontentu semper tin fiesta.”—Proverbionan 15:15.

KIKO e palabranan akí ta nifiká? Nan ta referí na nos estado mental i emoshonal. Hende ku ta “afligí” ta konsentrá riba e banda negativo di un asuntu, i p’esei su dianan “ta malu,” òf deprimí. Di otro banda, hende di “kurason kontentu” ta purba di ta positivo. E aktitut ei ta yud’é pa ta kontentu; komo si fuera e “tin fiesta” semper.

Nos tur tin problema i p’esei nos no por ta kompletamente felis. Sinembargo, nos por tin un spiritu alegre apesar di situashonnan difísil. Tuma nota di loke Beibel ta bisa.

• No laga e problemanan di mañan preokupá bo awe. Hesukristu a bisa: “No sea nunka anshá pa e dia di mañan, pasobra e dia di mañan lo tin su mes inkietutnan. Kada dia tin su mes problemanan.”—Mateo 6:34.

• Purba di traha un lista di e kosnan bon ku a pasa ku bo. Anto, si un dia bo ta tristu, saka e lista i meditá riba dje. Ademas, no konsentrá riba bo fayonan. Por ehèmpel, ora un hende ta stür outo, e no ta keda wak patras den spil; e ta djis tira un bista de bes en kuando. Asina tambe, siña for di bo fayonan i sigui padilanti. Pues, no lubidá ku Dios ta pordoná di bèrdat.—Salmo 130:4.

• Si bo ta sinti ku bo problemanan ta hoga bo, papia ku un hende ku por animá bo. Manera Proverbionan 12:25 ta bisa, nos preokupashonnan por hasi nos kurason tristu, pero “un bon palabra ta hasié kontentu.” E “bon palabra” ei por bini di un famia, un amigu òf un hende ku no ta pesimista i ku “ta stima tur ora bai.”—Proverbionan 17:17.

E konsehonan sabí ku nos ta haña den Beibel a yuda hopi hende pa ta mas felis asta den tempu difísil. Sea determiná pa laga e konsehonan ei yuda abo tambe.

31 DI ÒKTOBER–6 DI NOVÈMBER

TESORONAN DI E PALABRA DI DIOS | PROVERBIONAN 22-26

“Instruí un Mucha den e Kaminda ku E Mester Kana”

w08-S 1/4 16

Lanta Yunan den un Mundu Permisivo

Dirigí e Flecha

Ripará ku Salmo 127:4 i 5 ta kompará un mayor ku “un guerero.” Esei ta nifiká ku ta un tata so por hunga e papel di edukadó di manera efikas? Nò, klaru ku nò. E prinsipio ku tin tras di e ehèmpel akí ta apliká tantu na tata komo na mama i na kualke un di nan ku tin ku kria nan yu nan so. (Proverbionan 1:8) E ekspreshon “un guerero” ta duna di komprondé ku pa usa un bog pa tira flecha e persona mester tin hopi forsa. Den tempu bíbliko, tin biaha nan tabata fura e bognan ku koper, i pa sòldánan por a span e bog nan tabatin ku want’é ku nan pia. (Yeremías 50:14, 29) Sin duda, nan tabatin ku hasi hopi esfuerso i nan mester tabatin hopi forsa pa por rèk e bog di span pa por tira e flechanan i dal e blanko.

Di igual manera, eduká yunan ta eksigí hopi esfuerso. Nan no por kria nan mes, meskos ku un flecha no ta sali bai dal den e blanku riba su mes. Lamentablemente, awendia hopi mayor no ta mashá dispuesto pa hasi e esfuerso nesesario. Nan ta sigui e kaminda fásil i ta laga sea televishon, skol òf amigunan eduká nan yunan enkuanto loke ta bon i loke ta malu, moral, asuntu seksual, etc. Nan ta duna nan yunan tur loke nan ke. I ora nan pensa so ku nenga nan yu algu lo trese doló di kabes pa nan, nan ta bisa nan yu ‘sí’ i ta lag’é hasi manera e ke. Pa hustifiká nan mes, nan ta bisa ku nan ta hasi esei pasobra nan no ke hùrt nan yunan. Sinembargo, ta e echo ku nan ta permisivo ta loke di bèrdat lo perhudiká nan yunan di manera permanente.

No ta fásil pa lanta yu, i pa hasié ku empeño segun e guia di e Palabra di Dios, mester hasi hopi esfuerso. Pero e rekompensa ta masha grandi. E revista Parents ta bisa: “Estudionan . . . a demostrá ku mucha ku tin mayornan amoroso ku ta kumpli debidamente ku nan outoridat komo mayor, esta, ku ta apoyá nan yunan pero ta pone límitenan kla pa nan, e yunan akí ta sobresalí na skol, tin mihó abilidat riba tereno sosial, ta mas satisfecho ku nan mes i por lo general, ta mas felis ku e muchanan ku tin mayor muchu suave òf hopi strèn.”

Tin un rekompensa asta mas grandi. Laga nos analisá e promé parti di loke Proverbionan 22:6 ta menshoná. E ta bisa: “Instruí [òf, eduká,] e mucha den e kaminda ku e mester kana.” I na final e teksto ta bisa: “Ora ku e bira bieu e lo no apartá su mes for di dje.” E proverbio inspirá akí ta duna garantia ku mayornan lo tin éksito? No nesesariamente. No lubidá ku muchanan tin boluntat liber i ora nan krese nan por skohe pa nan mes i tuma nan mes desishonnan. Pero e versíkulo ta duna mayornan un garantia amoroso. Ki garantia?

Si nos eduká nos yunan di akuerdo ku e normanan di Beibel, nos lo krea e mihó sirkunstansianan pa haña e mihó resultado, esta, mira nos yunan bira adultonan felis, satisfecho i responsabel. (Proverbionan 23:24) P’esei, laga nos hasi nos máksimo esfuerso pa prepará, protehá i dirigí ‘e flechanan’ balioso akí. Hamas nos lo lamentá esaki.

it-2-S 1183 §1

Bara, Garoti

Outoridat di mayornan. Beibel sa usa e palabra “bara” tambe pa simbolisá e outoridat ku mayornan tin riba nan yunan. E buki di Proverbionan ta referí hopi biaha na e outoridat akí i ta usa e término bara pa simbolisá tur tipo di disiplina, inkluso e bara pa disipliná den sentido literal. Mayornan ta responsabel dilanti di Dios pa usa e bara akí pa tene nan yunan bou di kontrol. Si nan no kumpli ku e responsabilidat akí, nan lo hiba nan yunan na ruina i morto, i nan lo trese bèrgwensa pa nan mes i e desaprobashon di Dios. (Pro 10:1; 15:20; 17:25; 19:13) Beibel ta bisa: “Lokura ta mará [na] kurason di un mucha; [e] bara di korekshon lo alehá esaki for di dje.” E ta agregá: “No keda sin duna un mucha disiplina; maske bo sut’é ku bara, e lo no muri. Sut’é ku bara, i libra su alma for di Sheol.” (Pro 22:15; 23:13, 14) De echo, “esun ku laga di usa bara ta odia su yu, ma esun ku ta stim’é ta disiplin’é for di trempan.”—Pro 13:24; 19:18; 29:15; 1Sa 2:27-36.

Buska Hoyanan Spiritual

w09-S 15/10 12 §1

Pregunta di Lektor

E eskritor di Proverbionan ta sita e siguiente palabranan ora di duna konseho na un hóben: “Prepará bo trabou pafó, pone tur kos kla pa bo mes den kunuku; i despues traha bo kas.” Kiko e versíkulo akí di Beibel ke bisa? Ku un hòmber mester prepará su mes bon promé ku e kasa i kuminsá un famia, rekonosiendo e responsabilidatnan ku e kompromiso ei ta trese kuné.