‘Mi Yudansa Ta Bin for di Yehova’

Ora Ku Behes Bira “un Korona di Bunitesa”

“E MIHÓ bida ku bo por tin,” Muriel di 101 aña a bisa. “Un berdadero privilegio!” tabata e palabranan di Theodoros di 70 aña di edat. Maria, na edat di 73 aña, a bisa: “Mi no por a usa mi bida den un mihó manera.” Nan tur a pasa henter nan bida den sirbishi na Yehova Dios.

E personanan di edat aki ta representá hopi adoradó aktivo di Yehova rònt mundu. Apesar di nan edat avansá, preokupashon ku salú i otro sirkunstansia desfaborabel, ketu bai nan ta sirbi Dios di henter nan alma. Den e kongregashon kristian, e fiel personanan di edat aki ta bunita ehèmpelnan di deboshon na Dios. Ounke nan sirkunstansianan kisas ta limitá nan den loke nan por hasi, Yehova ta duna hopi balor na nan sirbishi.a—2 Korintionan 8:12.

E buki di Salmo ta hasi un bon opservashon di e kalidat di bida ku hende di edat ku ta sirbi Dios fielmente por spera di tin. Por kompará nan ku un palu bieu i mahestuoso ku ta keda produktivo. Relashoná ku e personanan aki, e salmista a kanta: “Asta den nan behes nan lo duna fruta; nan lo ta yen di vigor i bèrdè-bèrdè.”—Salmo 92:14.

Algun hende grandi kisas tin miedu di wòrdu halá un banda i ignorá ora nan pèrdè nan vigor pa motibu di behes. David a roga Dios: “No benta mi afó den tempu di behes; no bandoná mi ora mi forsa ta faya.” (Salmo 71:9) Di kiko ta dependé si un persona lo frakasá òf floresé den behes? Wèl, si nos ta desplegá e hustisia ku Dios ta siña nos, nos lo floresé en bes di frakasá. E salmista a kanta: “E hende hustu lo floresé manera palma.”—Salmo 92:12.

Hende ku a sirbi Dios fielmente henter nan bida muy probablemente lo sigui duna bon fruta ora nan bira grandi. Den un sentido, hopi di e kosnan ku nan a hasi den nan bida pa yuda nan mes òf otro hende a duna bon resultado, meskos ku simia ku ta sprùit i krese bira un kosecha abundante. (Galationan 6:7-10; Kolosensenan 1:10) Klaru ku hende ku a desperdisiá nan bida na empeñonan egoista ku ta ignorá e kamindanan di Dios por lo general no tin muchu di ofresé ora nan bira grandi.

E buki bíbliko di Proverbionan tambe ta enfatisá hustisia komo un adorno di behes. Ei nos ta lesa: “Kabei blanku ta un korona di bunitesa ora e ser hañá den e kaminda di hustisia.” (Proverbionan 16:31, NW) Sí, hustisia ta un manifestashon di bunitesa interno. Un hende ku a hiba un bida hustu pa hopi tempu ta gana rèspèt di otro hende. (Levítiko 19:32) Ora kabei blanku ta kompañá pa sabiduria i birtut, esei ta resultá den onor.—Jòb 12:12.

Den bista di Yehova, un hende ku usa su bida na un manera rekto pa hopi aña den su sirbishi ta algu bunita. E Skritura ta bisa: “Te na boso behes ami [Yehova] lo ta meskos, i te na boso añanan di kabei blanku lo mi karga boso! Mi a traha boso i lo mi sostené boso; lo mi karga boso i lo mi libra boso.” (Isaias 46:4) Ta un gran konsuelo pa sa ku nos amoroso Tata selestial ta primintí ku lo e sostené i apoyá su fiel adoradónan den nan behes!—Salmo 48:14.

Ya ku un bida ku a pasa un tempu largu dediká den sirbishi fiel na Yehova ta bunita for di su punto di bista, esei no ta meresé rèspèt di otro hende tambe? Si nos tin e mesun punto di bista ku Dios, nos ta balorá nos rumannan den fe ku ta di edat avansá. (1 Timoteo 5:1, 2) P’esei, laga nos buska maneranan práktiko pa mustra amor kristian dor di perkurá pa nan nesesidatnan.

Riba e Kaminda di Hustisia Mas Lat den Bida

Salomon ta sigurá nos ku “den e kaminda di hustisia tin bida.” (Proverbionan 12:28) Edat avansá no ta stroba un hende di haña e kaminda aki mas lat den bida. Por ehèmpel, na Moldova un hòmber di 99 aña a dediká su hubentut na promové idealnan komunista. E tabata orguyoso ku el a yega di kòmbersá personalmente ku lidernan komunista renombrá manera V. I. Lenin. Sin embargo, ora komunismo a pèrdè su gara i despues a basha den otro, e hòmber di edat aki a pèrdè propósito i direkshon den bida. Pero na momentu ku Testigunan di Yehova a mustr’é ku e Reino di Dios ta e úniko solushon real pa problemanan di humanidat, el a aseptá e bèrdat di Beibel i a bira un studiante ferviente di e Skritura. Lamentablemente, el a muri promé ku e por a batisá komo sirbidó di Yehova.

Un otro ehèmpel ta di un señora di 81 aña na Hungria. Ora el a siña tokante e rekisitonan moral di Dios, el a realisá ku e mester a kasa ku e hòmber ku ken e tabata kompañá pa hopi aña. E señora a tuma un kurashi i a splika su kompañero di bida su punto di bista basá riba Beibel. Pa su gran sorpresa i goso, e hòmber a aseptá pa kasa kuné. Despues ku nan union a ser legalisá, e señora a hasi progreso spiritual masha lihé. Ocho luna despues ku el a kuminsá ku su estudio di Beibel, el a bira un publikadó no-batisá, i djis despues el a batisá. En bèrdat, hustisia ta manera un korona sumamente bunita pa hende grandi!

Sí, kristiannan fiel di edat por ta sigur ku Dios tin interes den nan. Yehova lo no bandoná hende ku ta keda fiel na dje. Mas bien, e ta primintí di guia, yuda i sostené nan asta den nan behes. I nan ta konfirmá e palabranan di e salmista: ‘Mi yudansa ta bin for di Yehova.’—Salmo 121:2.

[Nota]

[Komentario na página 9]

“Kabei blanku ta un korona di bunitesa ora e ser hañá den e kaminda di hustisia.”—PROVERBIONAN 16:31, NW

[Kuadro na página 8]

YEHOVA TA INTERESÁ DEN SU SIRBIDÓNAN DI EDAT

“Lanta para pa esun ku tin kabei blanku, onra e ansiano.”—Levítiko 19:32.

“Te na boso behes ami lo ta meskos, i te na boso añanan di kabei blanku lo mi karga boso!”—Isaias 46:4.