“Jehova Mes Ta Duna Sabiduria”

KI METANAN ta tuma tur bo tempu i energia? Haña un bon nomber ta algu cu ta preocupá bo? Bo ta dedicá bo mes na acumulá rikesa? Ke tal di sigui un carera riba un cierto tereno of bira experto den un of mas campo di educacion? Cultivá bon relacion cu otro hende ta importante pa bo? Mantené un bon salú ta bo interes principal?

Tur e cosnan anterior aki por parce di tin cierto balor. Pero, kico ta di importancia primario? Bijbel ta contestá: “Sabiduria ta e cos principal. Gana sabiduria.” (Proverbionan 4:7) Wel, con nos por gana sabiduria anto, i kico ta su beneficionan? Capítulo dos dje buki bíblico di Proverbionan ta duna e contestanan.

‘Presta Atencion na Sabiduria’

Cu e palabranan amoroso di un tata, Sálomon, e rey sabí di antiguo Israel ta bisa: “Mi yu, si bo ricibí mi dichonan i atesorá cu bo mi mes mandamentunan, pa asina bo presta atencion cu bo oido na sabiduria, pa bo incliná bo curason na dicernimentu; si, ademas, bo sclama pa comprendimentu mes i bo duna bo bos pa dicernimentu mes, si bo sigui busk’é manera ta plata, i manera pa tesoro scondí bo sigui en busca di dje, den tal caso lo bo comprendé e temor di Jehova, i lo bo haña e conocimentu mes di Dios.”—Proverbionan 2:1-5.

Bo a capta ta ken tin e responsabilidad di gana sabiduria? E expresion “si bo” ta aparecé tres bes den e versículonan aki. Claramente, ta cada un di nos mes mester busca sabiduria i su yudantenan—dicernimentu i comprendimentu. Pero promé nos tin cu “ricibí” i “atesorá” den nos memoria e palabranan sabí registrá den Bijbel. Pa logra esei, nos tin cu studia Bijbel.

Sabiduria ta e abilidad di por usa e conocimentu cu Dios ta duna nos, na moda apropiado. I Bijbel ta haci sabiduria disponibel den un manera masha maraviyoso! Sí, e ta contené palabranan sabí manera esnan registrá den e bukinan di Proverbionan i Eclesiástes, i nos mester presta atencion na e palabranan aki. Ademas, nos ta haña hopi ehempel den e páginanan di Bijbel, cu ta mustra e beneficionan di aplicá principio divino i e peligernan di ignorá nan. (Romanonan 15:4; 1 Corintionan 10:11) Por ehempel, considerá e relato di Gehazi, e yudante golos di profeta Eliseo. (2 Reynan 5:20-27) E no ta siña nos cu ta sabí pa evitá golosidad? Anto kico di e resultado trágico dje bishitanan aparentemente inofensivo di Jacob su yu muher Dina cerca “e yu muhernan dje pais” di Canan? (Génesis 34:1-31) No ta bisto cu ta imprudente pa nos tin mal asociacion?—Proverbionan 13:20; 1 Corintionan 15:33.

Presta atencion na sabiduria ta encerá adkerí dicernimentu i comprendimentu. Segun Webster’s Revised Unabridged Dictionary, dicernimentu ta “e poder of capacidad cu e mente tin pa distinguí un cos for di otro.” Dicernimentu divino ta e abilidad pa distinguí bon for di malu, anto scoge e curso corecto. Con nos por keda riba “e caminda cu ta hiba na bida,” a ménos cu nos ‘incliná nos curason’ na dicernimentu, esta, cu nos ta ansioso pa hañ’é? (Mateo 7:14; compará cu Deuteronomio 30:19, 20.) Studia i aplicá e Palabra di Dios ta duna dicernimentu.

Con nos lo por “sclama pa comprendimentu,” esta, e abilidad pa mira kico e diferente aspectonan di un tema tin di haci cu otro, i cu e totalidad? Claro, edad i experencia ta dos factor cu por yuda nos desaroyá mas comprendimentu, pero no necesariamente. (Job 12:12; 32:6-12) E salmista a bisa: “Mi ta comportá mi cu mas comprendimentu cu hombernan di edad, dor cu mi a observá bo [Jehova su] propio ordunan.” Ademas el a canta: “Sí, e manifestacion di bo palabranan ta duna lus, i ta haci esnan inexperenciá comprendé.” (Salmo 119:100, 130) Jehova ta e “Anciano di Dianan,” i su comprendimentu ta infinitamente superior cu esun di henter humanidad. (Daniel 7:13) Dios por duna un hende inexperenciá comprendimentu, i capacit’é pa surpasá asta esnan di mas edad cuné den comprendimentu. P’esei, nos mester ta diligente den studia i aplicá Bijbel, e Palabra di Dios.

Tras dje expresion “si bo” cu ta aparecé vários bes den e pasashi di apertura di Proverbionan capítulo dos, ta sigui expresionnan manera “ricibí,” “atesorá,” “sclama,” “sigui busca,” “sigui en busca di.” Pakico e escritor ta usa e expresionnan aki cu ta subi den intensidad? Un obra di referencia ta bisa: “[Aki] e sabio ta enfatisá e necesidad di busca sabiduria cu empeño.” Sí, nos mester ta determiná di busca sabiduria i e cualidadnan relacioná cuné, dicernimentu i comprendimentu.

Abo Lo Haci e Esfuerso?

Un factor importante den busca sabiduria ta di studia Bijbel cu diligencia. Pero e studio aki mester enbolbé hopi mas cu djis lesa pa gana informacion. Meditacion serio riba loke nos ta lesa ta un parti esencial di studia Bijbel. Pa nos adkerí sabiduria i dicernimentu, nos mester refleccioná riba con nos por usa loke nos ta siña pa resolvé problema i tuma decision. Pa nos adkerí comprendimentu nos mester pensa con e informacion nobo ta cuadra cu loke nos sa caba. Ken lo nenga cu un studio di Bijbel meditativo asina ta tuma tempu, energia i esfuerso? E inversion di tempu i energia ta similar na loke hende ta gasta na ‘busca plata i tesoronan scondí.’ Abo lo hinca e esfuerso necesario aden? Lo bo ‘cumpra e tempu oportuno’ pa hacié?—Efesionan 5:15, 16.

Pensa ki tesoronan ricu ta spera nos si nos coba hundu den Bijbel cu un curason sincero. Asta “e conocimentu mes di Dios” nos lo haña, conocimentu sano i firme di nos Creador, conocimentu cu ta hiba na bida! (Juan 17:3) “E temor di Jehova” tambe ta un tesoro cu nos por adkerí. E respet reverencial aki p’e ta masha balioso! Un temor saludabel di desagrad’é mester goberná tur aspecto di nos bida, i agregá un sentido spiritual na tur loke nos haci.—Eclesiástes 12:13.

Mester tin un deseo ferviente den nos pa busca i coba pa tesoronan spiritual. Pa haci nos búskeda mas fácil, Jehova a percurá algun instrumento excelente pa nos coba cuné, e revistanan di berdad asina oportuno, esta E Toren di Vigilancia i Spierta!, i tambe otro publicacionnan basá riba Bijbel. (Mateo 24:45-47) Jehova a percurá pa reunionnan cristian tambe, pa nos ser educá den su Palabra i su camindanan. Nos mester asistí na nan regularmente, paga bon tinu na loke ta ser bisá, haci un berdadero esfuerso pa concentrá riba e puntonan principal i atesorá nan, i pensa profundamente riba nos relacion cu Jehova.—Hebreonan 10:24, 25.

Lo Bo No Faya

Hopi bes, un búskeda pa piedra precioso, oro of plata derá no ta duna ningun resultado. Cu buscamentu di tesoro spiritual, esaki no mester ta e caso. Di con no? Sálomon ta sigurá nos cu “Jehova mes ta duna sabiduria,” i “for di su boca tin conocimentu i dicernimentu.”—Proverbionan 2:6.

Rey Sálomon tabata famoso pa su sabiduria. (1 Reynan 4:30-32) Bijbel ta revelá cu e tabatin conocimentu riba un variedad di tema, entre otro mata, bestia, naturalesa humano i e Palabra di Dios. E dicernimentu cu el a desplegá como un rey hóben, ora el a resolvé un pleitu entre dos muher, caminda tur dos a bisa di ta mama dje mésun yu, a contribuí na dun’é fama internacional. (1 Reynan 3:16-28) Di ki fuente su enorme conocimentu tabata? Sálomon a resa pidi Jehova “sabiduria i conocimentu” i e abilidad “pa dicerní entre bon i malu.” Jehova a conced’é esakinan.—2 Crónicanan 1:10-12; 1 Reynan 3:9.

Nos tambe mester pidi Jehova su yudansa, segun cu nos ta studia su Palabra cu diligencia. E salmista a pidi: “Instruí mi, o Jehova, tocante bo caminda. Lo mi cana den bo berdad. Unificá mi curason pa teme bo nomber.” (Salmo 86:11) Jehova a aprobá e oracion ei, pasobra el a laga registr’é den Bijbel. Nos por tin confiansa cu lo e no keda sin contestá nos oracionnan sincero i constante pa pidié yuda nos haña tesoronan spiritual den Bijbel.—Lucas 18:1-8.

Sálomon ta mustra: “Pa esnan recto lo e atesorá sabiduria práctico; pa esnan cu ta cana den integridad e ta un escudo, dor di observá e camindanan di huicio, i lo e vigilá e caminda mes di esnan cu ta leal na dje. Den e caso ei lo bo comprendé husticia i huicio i rectitud, henter e curso di loke ta bon.” (Proverbionan 2:7-9) Esta un confiansa esaki ta duna! No ta sabiduria berdadero so Jehova ta duna esnan cu ta busk’é cu sinceridad. E ta resultá di ta un escudo protector tambe pa esnan recto, dor cu nan ta manifestá sabiduria berdadero i ta pega na su normanan hustu lealmente. Laga nos resultá di ta entre esnan cu Jehova ta yuda comprendé “henter e curso di loke ta bon.”

Ora “Conocimentu Mes Bira Agradabel”

Studio personal di Bijbel, un rekisito esencial pa busca sabiduria, no necesariamente ta algu cu ta atraé hopi hende. Por ehempel, Lawrence di 58 aña ta bisa: “Semper mi a traha cu mi mannan. Studiamentu ta difícil pa mi.” I Michael di 24 aña, cu no tabata gusta siña na scol, ta bisa: “Mi mester a forsa mi mes pa sinta studia.” Tog, un deseo pa studia ta algu cu nos por cultivá.

Considerá loke Michael a haci. E ta conta: “Mi a disipliná mi mes pa studia mei ora tur dia. Den poco tempu mi por a mira ki efecto esei tabatin riba mi actitud, mi comentarionan na reunion cristian i mi combersacionnan cu otro hende. Awor ta cu smak mi ta warda mi ora di studia yega, i mi no gusta pa nada interferí cuné.” Sí, studio personal ta algu cu nos ta siña gusta dor di custumber, ora nos mira e progreso cu nos ta haci. Lawrence tambe a traha riba su studio di Bijbel, i cu tempu el a bin sirbi como anciano den un congregacion di Testigonan di Jehova.

Pa studio personal bira un experencia agradabel, nos mester keda haci esfuerso. Pero e beneficionan ta grandi. “Ora sabiduria drenta bo curason i conocimentu mes bira agradabel pa bo mes alma,” segun Sálomon, “abilidad di pensa mes lo vigilá bo, dicernimentu mes lo protehá bo.”—Proverbionan 2:10, 11.

“Pa Libra Bo for dje Mal Caminda”

Den ki sentido sabiduria, conocimentu, abilidad di pensa i dicernimentu lo resultá di ta un proteccion? Segun Sálomon: “[Nan lo] libra bo for dje mal caminda, dje homber cu ta papia cos malu, di esnan cu ta bahando for dje camindanan di rectitud pa cana den e camindanan di scuridad, di esnan cu ta gosa den haci malu, cu ta gososo den e cosnan perverso di maldad; esnan kende nan camindanan ta trocí i cu ta tramposo den nan rumbo general.”—Proverbionan 2:12-15.

Sí, esnan cu ta balorá sabiduria berdadero ta evitá di asociá cu ken cu ta “papia cos malu,” esta, cos cu ta bai contra loke ta berdadero i corecto. Abilidad di pensa i dicernimentu ta duna proteccion contra esnan cu ta rechasá e berdad pa bai cana riba e camindanan di scuridad, i contra esnan cu ta tramposo i cu tin placer den actonan malbado.—Proverbionan 3:32.

Nos por ta masha gradicidu cu sabiduria berdadero i e otro cualidadnan asociá cuné ta protehá nos dje mal caminda di homber i muhernan inmoral tambe! Sálomon ta agregá cu e cualidadnan aki lo “libra bo dje muher desconocí, dje muher stranhero cu a haci su propio dichonan suave, cu ta bandoná su amigu íntimo di hubentud i cu a lubidá asta e pacto di su Dios. Pasobra su cas ta sink te na morto, i su camindanan ta baha te abou cerca esnan impotente den morto. Ningun di esnan cu tin relacion cuné lo bolbe, ni nan lo no recobrá e camindanan di e bibunan.”—Proverbionan 2:16-19.

“E muher desconocí,” e prostituta, ta ser describí como un hende cu ta bandoná “su amigu íntimo di hubentud,” posiblemente su esposo di tempu cu e tabata hóben.a (Compará cu Malakías 2:14.) El a lubidá e prohibicion contra adulterio cu tabata parti dje pacto di Ley. (Exodo 20:14) Su camindanan ta hiba na morto. Esnan cu ta den su compania por keda sin nunca “recobrá e camindanan di e bibunan,” dor cu tardi of trempan nan por yega na e punto caminda niun hende no por bira bek mas, esta morto. Un homber di dicernimentu i abilidad di pensa ta conciente dje atraccion di inmoralidad, i den sabiduria e ta evitá di cai den su gara.

‘E Rectonan Lo Biba Riba Tera’

Pa resumí e meta di su conseho riba sabiduria, Sálomon ta declará: “E meta ta pa bo cana den e caminda di bon hende i pa bo warda e camindanan di e hustunan.” (Proverbionan 2:20) Esta un propósito maraviyoso sabiduria tin! E ta yuda nos hiba un bida felis, cu ta duna nos satisfaccion i cu tin Dios su aprobacion.

Ademas, considerá e bendicionnan magnífico cu tin pa esnan cu “cana den e caminda di bon hende.” Sálomon ta sigui bisa: “E rectonan ta esnan cu lo biba riba tera, i esnan sin culpa ta esnan cu lo keda riba dje. En cuanto e malbadonan, nan lo ser cortá for dje tera mes; i en cuanto esnan traicionero, nan lo ser rancá for di dje.” (Proverbionan 2:21, 22) Ohalá abo ta un di esnan sin culpa cu lo biba pa semper den Dios su hustu mundu nobo.—2 Pedro 3:13.

[Nota]

[Plachi na página 26]

Sálomon a pidi pa sabiduria. Nos mester haci mescos