Usa “Sano Huicio” Segun cu e Fin Ta Yega Cerca

“E fin di tur cos a yega cerca. P’esei, sea di sano huicio.”—1 PEDRO 4:7.

 1. Kico ser di “sano huicio” ta encerá?

EPALABRANAN di apostel Pedro citá ariba mester tin un efecto profundo riba e manera cu cristiannan ta hiba nan bida. Sin embargo, Pedro no a bisa su lectornan pa alehá for dje responsabilidadnan di tur dia i di preocupacionnan di bida; ni e no a fomentá un actitud histérico pa cu e binidero destruccion. Mas bien, el a urgi: “Sea di sano huicio.” Ser di “sano huicio” ta encerá mustra bon dicernimentu, ser sensibel, discreto i racional den nos abla i accionnan. E ta nificá laga e Palabra di Dios dirigí nos pensamentu i accionnan. (Romanonan 12:2) Siendo cu nos ta biba “den un generacion trocí i perverso,” nos mester tin sano huicio pa evitá di haña nos den problema i dificultad.—Filipensenan 2:15.

 2. Con e pacenshi di Jehova ta beneficiá cristiannan awe?

² Tambe “sano huicio” ta yuda nos tin un punto di bista realístico i sobrio di nos mes. (Tito 2:12; Romanonan 12:3) Esaki ta esencial en bista dje palabranan registrá na 2 Pedro 3:9: “Jehova no ta lento en cuanto su promesa, manera algun hende ta considerá lentitud, sino e tin pacenshi cu boso pasobra e no ta deseá pa ningun ser destruí sino ta deseá pa tur alcansá repentimentu.” Tuma nota cu Jehova tin pacenshi, no solamente cu e incrédulonan, sino tambe “cu boso”—miembronan dje congregacion cristian. Pakico? Pasobra “e no ta deseá pa ningun ser destruí.” Tal bes ainda algun cristian tin cu haci cambio i ahustenan pa por cualificá p’e don di bida eterno. P’esei laga nos mira áreanan unda algun ahuste por ta necesario.

“Sano Huicio” den Nos Relacionnan Personal

 3. Ki preguntanan mayornan por haci nan mes relacioná cu nan yunan?

³ E hogar mester ta un refugio di pas. Pero pa algun hende e ta “un cas yen di . . . pleitu.” (Proverbionan 17:1) Kico di bo famia? Bo hogar ta liber di “rabia i griteria i abla ofensivo”? (Efesionan 4:31) Kico di bo yunan? Nan ta sinti nan stimá i apreciá? (Compará cu Lucas 3:22.) Bo ta tumando e tempu pa instruí i entrená nan? Bo ta “disipliná den husticia” en bes di cu rabia i furia? (2 Timoteo 3:16) Siendo cu yunan ta “un herencia for di Jehova,” e ta intensamente interesá den e manera cu nan ta ser tratá.—Salmo 127:3.

 4. (a) Kico por ta e resultado ora un esposo ta trata su casá malu? (b) Con esposanan por promové pas cu Dios i felicidad den henter e famia?

⁴ Kico di nos casá? “Esposonan mester stima nan esposa mescos cu nan mes curpa. Esun cu ta stima su esposa ta stima su mes, pasobra ningun homber hamas a odia su mes carni; sino e ta aliment’é i ta carici’é, mescos cu Cristo tambe ta haci cu e congregacion.” (Efesionan 5:28, 29) Un homber abusadó, dominante of irazonabel no solamente ta pone e trankilidad di su cas na peliger, sino tambe ta daña su relacion cu Dios. (1 Pedro 3:7) Kico di esposanan? Nan tambe mester ta “sumiso na nan esposo mescos cu na Señor.” (Efesionan 5:22) Ora un esposa kier agradá Dios, esei por yud’é pasa por haltu dje limitacionnan di su casá i ser sumiso na dje sin keha. Tin biaha, un esposa por sinti cu e mester expresá su opinion. Proverbionan 31:26 ta bisa dje esposa capas: “El a habri su boca cu sabiduria, i e ley di bondad amoroso ta riba su lenga.” Dor di trata su casá den un manera bondadoso i respetuoso, e ta mantené pas cu Dios, i e ta promové e felicidad di henter e famia.—Proverbionan 14:1.

 5. Pakico hóbennan mester sigui e conseho di Bijbel relacioná cu e manera cu nan ta trata nan mayornan?

⁵ Hóbennan, con boso ta trata boso mayornan? Boso ta usa e abla sarcástico i irespetuoso cu e mundu ta tolerá hopi biaha? Of boso ta obedecé e mandamentu bíblico: “Yunan, sea obediente na boso mayornan den union cu Señor, pasobra esaki ta hustu: ‘Onra bo tata i bo mama’; cu ta e promé mandamentu cu un promesa: ‘Pa bo pasa bon i pa bo dura un tempu largu riba tera’”?—Efesionan 6:1-3.

 6. Con nos por busca pas cerca compañeronan creyente?

⁶ Tambe nos ta demostrá “sano huicio” ora nos ta “busca pas i sigui tras di dje” cerca compañeronan creyente. (1 Pedro 3:11) Desacuerdo i malcomprendimentu sa presentá de bes en cuando. (Santiago 3:2) Si nos permití rencor cria pus, e pas di henter e congregacion por ta na peliger. (Galationan 5:15) P’esei resolvé disputanan unbes; busca solucionnan pacífico.—Mateo 5:23-25; Efesionan 4:26; Colosensenan 3:13, 14.

“Sano Huicio” i Responsabilidadnan di Famia

 7. (a) Con Pablo a animá pa mustra “sano huicio” den cosnan di tur dia? (b) Ki actitud esposo i esposanan cristian mester tin pa cu responsabilidadnan di cas?

⁷ Apostel Pablo a consehá cristiannan pa “biba cu sano huicio.” (Tito 2:12) Ta interesante cu, den e contexto, Pablo ta spierta hende muher “pa stima nan esposo, pa stima nan yunan, pa ser di sano huicio, decente, trahadónan na cas.” (Tito 2:4, 5) Pablo a skirbi esei den e añanan 61 pa 64 E.C., un par di aña promé cu e fin dje sistema di cosnan hudiu. Sin embargo, cosnan di tur dia, manera trabou di cas, tog tabata importante. P’esei tantu esposo como esposa mester mantené un punto di bista sano i positivo di nan responsabilidadnan di cas pa “e palabra di Dios no ser zundrá.” Un cabes di famia a pidi un bishitante dispensa p’e aparencia bergonsoso di su cas. El a splik’é cu e cas tabata den mal condicion “debí cu e tabata trahando pionero.” Ta encomendabel ora nos ta haci sacrificio na fabor dje Reino, pero nos mester tene cuidou pa no peligrá e bienestar di nos famia.

 8. Con cabesnan di famia por percurá p’e necesidadnan di nan famia den un manera balansá?

⁸ Bijbel ta urgi tatanan pa duna nan famia prioridad, bisando cu un hende cu no ta percurá pa su famia “a nenga e fe i ta pió cu un persona sin fe.” (1 Timoteo 5:8) Normanan di bida ta varia rond parti di mundu, i ta bon pa ta moderá den loke nos ta spera di alcansá materialmente. “No duná mi ni pobresa ni rikesa,” e escritor di Proverbionan 30:8 a pidi den oracion. Sin embargo, mayornan no mester ignorá e necesidadnan material di nan yunan. Lo ta sabí, por ehempel, pa deliberadamente laga bo famia sin e necesidadnan básico di bida pa por busca pa alcansá privilegionan teocrático? Esaki lo no amargá bo yunan? Di otro banda, Proverbionan 24:27 ta bisa: “Prepará bo trabou pafó, i hacié cla pa bo mes den cunucu. Despues tambe bo tin cu edificá bo famia di cas.” Sí, aunke preocupacion pa cosnan material tin su lugá, ta vital pa “edificá bo famia di cas” den sentido spiritual i emocional.

 9. Pakico ta sabí pa cabesnan di famia considerá e posibilidad cu nan por muri of bira malu?

⁹ Bo a haci percuracionnan pa soru pa bo famia den caso cu bo muri inesperadamente? Proverbionan 13:22 ta bisa: “Esun cu ta bon lo laga un herencia p’e yunan di yunan.” Ademas di duna un herencia di conocimentu di Jehova i un relacion cuné, mayornan lo ta interesá pa percurá materialmente pa nan yunan. Den hopi pais, cabesnan di famia responsabel lo trata di tin algu di spar, un testament i un seguro di bida. Al fin i al cabo, e pueblo di Dios no ta inmuno pa “tempu i suceso imprevisto.” (Eclesiástes 9:11) Placa ta “pa un proteccion,” i hopi biaha bon planeamentu por prevení cu hende ta cai den miseria. (Eclesiástes 7:12) Den paisnan caminda gobiernu no ta paga pa cuido médico, algun lo por opta pa apartá fondonan pa necesidadnan médico of haci areglo pa nan por tin un of otro seguro.a

10. Con mayornan cristian por “spar” pa nan yunan?

¹⁰ E Scritura ta bisa tambe: “Yunan no mester spar pa nan mayornan, sino mayornan pa nan yunan.” (2 Corintionan 12:14) Den e mundu ta comun pa mayornan spar placa p’e futuro educacion i matrimonio di nan yunan pa asina duna nan un bon comienso den bida. Bo a pensa riba sparmentu p’e futuro spiritual di bo yu? Suponé, por ehempel, cu un yu adulto ta trahando den e ministerio di tempu completo. Aunke sirbidónan di tempu completo no mester exigí ni spera yudansa financiero di otronan, mayornan amoroso lo por opta pa ‘compartí cuné segun su necesidadnan’ afin di yud’é permanecé den sirbishi di tempu completo.—Romanonan 12:13; 1 Samuel 2:18, 19; Filipensenan 4:14-18.

11. Un punto di bista realístico di placa ta indicá un falta di fe? Splica.

¹¹ Un punto di bista realístico di placa no ta indicá cu bo no ta kere cu e sistema malbado di Satanas ta acercando su fin. Esei ta simplemente un asuntu di mustra “sabiduria práctico” i sano huicio. (Proverbionan 2:7; 3:21) Jesus a bisa un biaha cu “e yunan dje sistema di cosnan aki ta mas sabí na moda práctico . . . cu e yunan di lus” den nan uso di placa. (Lucas 16:8) Nada straño, anto, cu algun a mira e necesidad pa ahustá e manera cu nan ta usa nan biennan, di manera cu nan por percurá mihó p’e necesidadnan di nan famia.

“Sano Huicio” den Nos Punto di Bista di Educacion

12. Con Jesus a siña su disipelnan adaptá na circunstancianan nobo?

¹² “E esena dje mundu aki ta cambiando,” i cambionan económico extenso i desaroyonan tecnológico ta tumando lugá rápidamente. (1 Corintionan 7:31) Sin embargo, Jesus a siña su disipelnan pa ser adaptabel. El a bisa nan ora el a manda nan bai riba nan promé campaña di predicacion: “No busca oro ni plata ni koper pa boso potmoni, ni sacu di cuminda p’e biahe, ni dos bistí interior, ni sandalia, ni garoti; pasobra e trahadó ta merecé su cuminda.” (Mateo 10:9, 10) Sin embargo, na un ocasion mas despues, Jesus a bisa: “Laga esun cu tin potmoni hib’é, mescos tambe un sacu di cuminda.” (Lucas 22:36) Kico a cambia? E circunstancianan. E ambiente religioso a bira mas hostil, i awor nan tabatin cu percurá pa nan mes.

13. Kico ta e propósito principal di educacion, i con mayornan por ta un apoyo pa nan yunan den esaki?

¹³ Di igual manera awe, kisas mayornan tin cu tene cuenta cu e realidadnan económico djawe. Por ehempel, bo ta percurando pa bo yunan ricibí educacion adecuá? E propósito principal di educacion mester ta pa ekipá un hóben p’e ta un minister eficas di Jehova. I e educacion mas importante ta un educacion spiritual. (Isaías 54:13) Tambe mayornan ta interesá den e abilidad di nan yunan pa sostené nan mes financieramente. Pues duna bo yunan guia, yuda nan scoge vaknan di scol apropiado, i considerá huntu cu nan si ta sabí pa sigui un educacion adicional of no. Decisionnan asina ta un responsabilidad di famia, i otronan no mag criticá e curso cu a ser tumá. (Proverbionan 22:6) Kico di esnan cu a scoge pa educá nan yunan na cas?b Aunke hopi ruman a haci un trabou encomendabel, algun a haña cu e tarea ta mas difícil cu nan a imaginá, i nan yunan a perde un educacion adecuá. P’esei si bo ta pensando pa duna bo yunan enseñansa na cas, haci sigur di calculá e gastu, evaluando realísticamente si bo tin tantu e abilidadnan como e disiplina propio necesario pa complet’é.—Lucas 14:28.

‘No Busca Cosnan Grandi’

14, 15. (a) Con Baruc a perde su balansa spiritual? (b) Pakico tabata bobo di su parti pa “busca cosnan grandi”?

¹⁴ Siendo cu e fin dje sistema aki no a yega ainda, algun cristian por ta incliná pa busca loke e mundu tin di ofrecé—un carera prestigioso, un trabou lucrativo i rikesa. Tuma por ehempel Baruc, secretario di Jeremías. El a lamentá: “Ai di mi, awor, pasobra Jehova a agregá pena na mi dolor! Mi a keda completamente cansá pa causa di mi suspiro, i mi no a haña lugá di descanso.” (Jeremías 45:3) Baruc tabata cansá. E tarea di sirbi como secretario di Jeremías tabata difícil i a causa hopi tension. (Jeremías 36:14-26) I no tabatin un alivio na bista. Lo a dura 18 aña promé cu Jerusalem a ser destruí.

¹⁵ Jehova a bisa Baruc: “Mira! Loke mi a construí mi ta basha abou, i loke mi a planta mi ta ranca, asta henter e pais mes. Pero en cuanto abo, bo ta sigui busca cosnan grandi pa bo mes. No sigui busca.” Baruc a perde su balansa. El a cuminsá ‘busca cosnan grandi pa su mes,’ tal bes rikesa, prominencia of siguridad material. Siendo cu Jehova tabata ‘rancando, asta henter e pais mes,’ ki sentido tabatin pa busca cosnan asina? P’esei Jehova a duna Baruc e recordatorio aki pa trec’é bek na su sentidonan: “Pasobra, ata, mi ta bai trece un calamidad riba tur carni . . . , i lo mi duná bo bo alma como botin na tur e lugánan cu bo bai.” Posesionnan material lo no a sobrebibí e destruccion di Jerusalem! Jehova a garantisá solamente e salbacion di su “alma como botin.”—Jeremías 45:4, 5.

16. Ki les e pueblo di Jehova djawe por siña for dje experencia di Baruc?

¹⁶ Baruc a haci caso dje coreccion di Jehova, i, na cumplimentu cu e promesa di Jehova, Baruc a scapa su bida. (Jeremías 43:6, 7) Ki un les poderoso p’e pueblo di Jehova awe! Awor aki no ta tempu pa ‘busca cosnan grandi pa nos mes.’ Pakico no? Pasobra “mundu ta pasa bai i tambe su deseo.”—1 Juan 2:17.

E Mihó Uso dje Tempu cu A Resta

17, 18. (a) Con Jónas a reaccioná ora e ninivitanan a repentí? (b) Ki les Jehova a siña Jónas?

¹⁷ Con, anto, nos por haci mihó uso dje tempu cu a resta? Siña for dje experencia di profeta Jónas. El “a bai Nínive . . . , i a sigui proclamá i bisa: ‘Solamente cuarenta dia mas, i Nínive lo ser tumbá.’” Pa sorpresa di Jónas, e ninivitanan a reaccioná riba e mensahe aki i a repentí! Jehova a keda sin destruí e stad. Con Jónas a reaccioná? “O, Jehova, kita, por fabor, mi alma for di mi, pasobra mihó mi muri cu mi keda na bida.”—Jónas 3:3, 4; 4:3.

¹⁸ Anto Jehova a siña Jónas un les importante. El a “asigná un mata di calbas di botter, p’e crece subi riba Jónas, p’e por bira un sombra riba su cabes . . . I Jónas a cuminsá alegrá mashá cu e mata di calbas di botter.” Sin embargo, Jónas su alegria tabata di corto duracion, ya cu e mata a seca poco tempu despues. Jónas “a cende di rabia” pa motibu di su incomodidad. Jehova a enfatisá Su punto, bisando: “Abo, di bo parti, a sinti duele p’e mata di calbas di botter . . . Mi no mester sinti duele p’e gran stad di Nínive, habitá pa mas cu shentibinti mil hende cu no sa en absoluto e diferencia entre nan man drechi i nan man robes, ademas di hopi animal doméstico?”—Jónas 4:6, 7, 9-11.

19. Ki pensamentu egoista nos lo kier evitá?

¹⁹ Ki egoista Jónas su razonamentu tabata! E por a sinti duele pa un mata, pero e no a sinti niun tiki compasion pa e hendenan di Nínive—hende cu, papiando den sentido spiritual, ‘no tabata sa e diferencia entre nan man drechi i nan man robes.’ Mescos nos tambe por anhelá p’e destruccion dje mundu malbado aki i cu bon motibu! (2 Tesalonicensenan 1:8) Sin embargo, miéntras cu nos ta spera, nos tin un responsabilidad di yuda hende di curason onrado, cu den sentido spiritual, no ‘por distinguí nan man drechi for di nan man robes.’ (Mateo 9:36; Romanonan 10:13-15) Lo bo usa e tempu corticu cu a resta pa yuda mas tantu hende posibel gana e precioso conocimentu di Jehova? Ki trabou hamas lo por igualá e goso di yuda un hende gana bida?

Sigui Biba cu “Sano Huicio”

20, 21. (a) Cua ta algun manera den cua nos por demostrá “sano huicio” durante e dianan binidero? (b) Ki bendicionnan lo bini di biba cu “sano huicio”?

²⁰ Segun cu e sistema di Satanas ta sigui su rumbo pa destruccion, nos lo contra sigur cu desafionan nobo. Segundo Timoteo 3:13 ta predicí: “Hende malbado i impostornan lo bai di malu pa pió.” Pero no “cansa i desmayá den boso alma.” (Hebreonan 12:3) Dependé riba Jehova pa fortalesa. (Filipensenan 4:13) Siña ser flexibel, adaptá n’e circunstancianan cu ta birando mas i mas pió, en bes di sigui pensa riba pasado. (Eclesiástes 7:10) Usa sabiduria práctico, keda al dia cu e guia cu “e esclabo fiel i discreto” ta duna.—Mateo 24:45-47.

²¹ Cuantu tempu a resta, nos no sa. Tog, nos por bisa cu confiansa cu “e fin di tur cos a yega cerca.” Tanten cu e fin no yega, laga nos biba cu “sano huicio” den nos trato cu otro, den e manera cu nos ta percurá pa nos famia, i den nos responsabilidadnan seglar. Haciendo esei, nos tur por tin confiansa cu nos lo ser hañá finalmente “sin mancha i sin defecto i den pas”!—2 Pedro 3:14.

[Nota]

Puntonan pa Repaso

◻ Con nos por mustra “sano huicio” den nos relacionnan personal?

◻ Con nos por mustra balansa den percurá pa nos responsabilidadnan di famia?

◻ Pakico mayornan mester mustra interes den e educacion seglar di nan yunan?

◻ Ki les nos ta siña for di Baruc i Jónas?

[Plachi na página 18]

Ora esposo i esposa ta trata otro malu, nan ta daña nan relacion cu Jehova

[Plachi na página 20]

Mayornan mester mustra interes den e educacion di nan yunan