Un Buki Practico pa e Bida Djawendia

Bukinan cu ta duna conseho ta masha popular den e mundu djawe. Pero e tendencia ta cu nan ta bira anticuá i pronto ta ser revisá of reemplasá. Kico di Bijbel? El a ser completá casi 2.000 aña pasá. Sin embargo, su mensahe original nunca a ser mehorá of actualisá. Acaso un buki asina lo por contené guia práctico pa nos tempu?

ALGUN hende ta bisa cu no. “Ningun hende lo boga pa usa e edicion di 1924 di un [buki di] instruccion di kímica den un klas di kímica djawendia,” Dr. Eli S. Chesen a skirbi, splicando pakico e ta haña cu Bijbel ta anticuá.¹ E argumento aki por parce lógico. Ya, hende a siña hopi tocante salú mental i comportacion humano desde cu Bijbel a ser skirbí. Wel, ta con un buki antiguo asina por ta relevante pa e bida djawendia?

Principionan cu Ta Independiente di Tempu

Aunke ta cierto cu tempu a cambia, necesidadnan básico di hende a keda mescos. Atrabes di historia hende tabatin un necesidad pa haña amor i cariño. Nan kier tabata felis i hiba un bida cu propósito. Nan tabatin mester di conseho riba con pa enfrentá presionnan económico, con pa haci nan matrimonio un éxito i con pa inculcá bon balornan moral i ético den nan yunan. Bijbel ta contené conseho cu ta toca e necesidadnan básico ei.​—Eclesiástes 3:12, 13; Romanonan 12:10; Colosensenan 3:18-21; 1 Timoteo 6:​6-10.

E conseho di Bijbel ta reflehá un conocimentu skerpi dje naturalesa humano. Considerá algun ehempel di su principionan specífico cu ta independiente di tempu i cu ta práctico pa e bida djawendia.

Guia Práctico pa Matrimonio

Segun UN Chronicle, e famia “ta e unidad mas bieu i mas básico dje organisacion humano; e vínculo mas crucial entre generacionnan.” Sin embargo, e ‘vínculo crucial’ aki ta desintegrando na un forma alarmante. “Den e mundu djawe,” Chronicle ta comentá, “hopi famia ta enfrentando problemanan spantoso cu ta menasá nan abilidad di funcioná i, eigenlijk, di sobrebibí.”² Ki conseho Bijbel ta ofrecé pa yuda e unidad di famia sobrebibí?

Pa cuminsá, Bijbel tin hopi di bisa tocante con esposo i esposa mester trata otro. Por ehempel, pa loke ta esposonan, e ta bisa: “Esposonan mester ta stimando nan esposa mescos cu nan mes curpa. Esun cu ta stima su esposa ta stima su mes, pasobra ningun homber hamas a odia su mes carni; sino e ta aliment’é i ta carici’é.” (Efesionan 5:​28, 29) Esposanan a ser consehá pa “tin respet profundo pa [nan] esposo.”​—Efesionan 5:33.

Considerá e implicacionnan di aplicá e conseho bíblico ei. Un esposo cu ta stima su esposa ‘mescos cu su mes curpa’ no ta trat’é brutu of cu odio. E no ta dal e físicamente, ni no ta maltrat’é verbalmente of emocionalmente. En bes di esei, e esposo ta dun’é e mésun aprecio i consideracion cu e ta mustra na su mes. (1 Pedro 3:7) Asina su esposa ta sintié stimá i sigur den su matrimonio. Dje manera ei e esposo ta duna su yunan un bon ehempel con mester trata hende muher. Na otro banda, un esposa cu tin “respet profundo” pa su esposo no ta kita su dignidad dor di critik’é of rebah’é constantemente. Dor cu e esposa ta respet’é, e esposo ta sinti cu e ta ser confiá, aceptá i apreciá.

Conseho asina ta práctico den e mundu moderno aki? Ta interesante cu esnan cu tin como profesion pa studia famia awe, a yega na conclusionnan similar. Un administradora di un programa di guia profesional pa famia a comentá: “E famianan mas saludabel cu ami conocé ta esnan caminda e mama i tata tin un relacion fuerte i amoroso entre nan mes. . . . Ta parce cu e relacion fuerte primario aki ta hinca den e yunan un sintimentu di siguridad.”³

Atrabes di añanan, e conseho di Bijbel tocante matrimonio a resultá di ta muchu mas confiabel cu e conseho di numeroso conseheronan di famia. Sí, no tabata muchu tempu pasá cu hopi experto tabata boga pa divorcio como un solucion fácil i lihé pa un matrimonio infelis. Awe, hopi di nan ta urgi hende pa haci nan matrimonio dura mas tantu posibel. Pero e cambio aki a bini solamente despues cu divorcio a causa hopi daño na famianan caba.

En cambio, Bijbel ta duna conseho confiabel i balansá riba matrimonio. E ta reconocé cu algun circunstancia extremo por permití pa haña divorcio. (Mateo 19:9) A la bes, e ta condená divorcio pa motibunan di poco importancia. (Malakías 2:​14-16) Tambe e ta condená infieldad matrimonial. (Hebreonan 13:4) E ta bisa cu matrimonio ta enbolbé compromiso: “P’esei un homber lo bandoná su tata i su mama i tin cu pega na su esposa i nan tin cu bira un solo carni.”a​—Génesis 2:24; Mateo 19:​5, 6.

Bijbel su conseho riba matrimonio ta mes relevante awe cu e tabata tempu Bijbel a ser skirbí. Ora esposo i esposa ta trata otro cu amor i respet i ta mira matrimonio como un relacion exclusivo, e matrimonio tin mas chens di sobrebibí​—i huntu cuné e famia.

Guia Práctico pa Mayornan

Vários década pasá hopi mayor​—motivá dor di “ideanan innovativo” tocante entrenamentu di yu​—a kere cu tabata “prohibí pa prohibí.”⁸ Nan a teme cu ponementu di límite pa yunan, lo causa trauma i frustracion. Cu tur bon intencion, conseheronan riba criamentu di yu tabata insistí pa mayornan no duna nan yunan mas cu e coreccion di mas suave. Pero hopi dje expertonan ei ta reconsiderando awor e rol di disiplina, i mayornan preocupá ta buscando algun claridad riba e asuntu.

Sin embargo, tur e tempu Bijbel a ofrecé conseho claro i razonabel riba criamentu di yu. Casi 2.000 aña pasá, el a bisa: “Tatanan, no iritá boso yunan, sino sigui cria nan den e disiplina i reglamentu mental di Jehova.” (Efesionan 6:4) E sustantivo griego traducí como “disiplina” ta nificá “criamentu, entrenamentu, instruccion.”⁹ Bijbel ta bisa cu e disiplina, of instruccion, ei ta duna evidencia di amor di parti dje mayornan. (Proverbionan 13:24) Yunan ta desaroyá bon ora tin guia moral claramente definí i ora nan por haci un bon distincion entre loke ta bon i loke ta malu. Disiplina ta bisa nan cu nan mayornan ta interesá den nan i den ki clase di persona nan ta birando.

Pero un mayor nunca mag abusá di su autoridad​—“e bara di disiplina.”b (Proverbionan 22:15; 29:15) Bijbel ta spierta mayornan: “No corigí boso yunan di mas, si no boso lo kita tur nan ánimo for di nan.” (Colosensenan 3:21, Phillips) Tambe e ta reconocé cu sota generalmente no ta e método mas eficas di siña. Proverbionan 17:10 ta bisa: “Un reprendementu ta obra mas profundo den un persona entendido cu golpia un estúpido shen bes.” Ademas, Bijbel ta recomendá disiplina preventivo. Deuteronomio 11:19 ta urgi mayornan pa probechá di momentonan casual pa inculcá balornan moral den nan yunan​—Mira tambe Deuteronomio 6:​6, 7.

E conseho independiente di tempu cu Bijbel ta duna mayornan ta masha cla. Yunan tin mester di disiplina consistente i amoroso. Experencia práctico ta mustra cu e conseho ei realmente ta duna bon resultado.c

Superá Bareranan cu Ta Causa Desunion

Awe hende ta dividí dor di bareranan racial, nacional i étnico. E bareranan ei cu hende mes a traha, a hiba na e matansa di hende inocente den gueranan rond parti di mundu. Si mester bai tras di historia, e prospecto pa hende homber i muher di diferente rasa i nacion considerá i trata otro como igual ta mustra masha scur en berdad. “E solucion,” segun un estadista africano, “ta den nos curason.”¹¹ Pero no ta fácil pa cambia curason di hende. Pero, considerá con e mensahe di Bijbel ta apelá n’e curason i ta fomentá sintimentunan di igualdad.

E siñansa di Bijbel cu Dios “a traha for di un solo hende tur nacion di hende” ta excluí cualkier idea di superioridad racial. (Echonan 17:26) Esei ta mustra cu en realidad tin solamente un solo rasa​—e rasa humano. Ademas Bijbel ta animá nos pa “bira imitadó di Dios,” di ken e ta bisa: “[E] no ta parcial, sino den tur nacion e hende cu ta tem’é i ta obra husticia ta aceptabel p’e.” (Efesionan 5:1; Echonan 10:​34, 35) Pa esnan cu ta tuma Bijbel na serio i cu berdaderamente ta busca pa biba segun su siñansanan, e conocimentu aki tin un efecto unificador. E ta ehercé un influencia n’e nivel di mas profundo, den e curason di hende, disolviendo e bareranan trahá dor di hende cu ta dividí nan. Considerá un ehempel.

Ora Hitler a haci guera den henter Europa, tabatin un grupo di cristian​—Testigonan di Jehova​—cu a nenga firmemente di participá den e matansa di hende inocente. Nan no kier a “lanta spada” contra nan próhimo. Nan a tuma e posicion aki debí cu nan tabata kier a agradá Dios. (Isaías 2:​3, 4; Mikéas 4:​3, 5) Berdaderamente nan a kere loke Bijbel ta siña​—cu ningun nacion ni rasa ta superior n’e otro. (Galationan 3:28) Debí cu Testigonan di Jehova a tuma un posicion na fabor di pas, nan tabata entre e proménan cu a bai cerá den camponan di concentracion.​—Romanonan 12:18.

Pero no ta tur cu a afirmá di ta sigui Bijbel a tuma un posicion asina. Djis despues di Guera Mundial II, Martin Niemöller, un miembro di clero protestant aleman, a skirbi: “Ken cu kier culpa Dios pa [gueranan] no conocé, of no kier conocé, e Palabra di Dios. . . . Atrabes di épocanan, iglesianan cristian, bes tras bes a ofrecé nan servicionan pa bendicioná gueranan, trupanan i armanan . . . a haci oracion den un manera poco cristian p’e destruccion di nan enemigunan den guera. Tur esaki ta nos falta i e falta di nos antepasadonan, pero definitivamente no por culpa Dios. I nos como cristiannan awe ta para cu bergwensa dilanti un asina yamá secta manera e Studiantenan Sincero di Bijbel [Testigonan di Jehova], cu na cantidad di cientos i miles a bai camponan di concentracion i [asta] a muri debí cu nan a rechasá servicio militar i a nenga di tira riba hende.”¹²

Te n’e dia djawe, Testigonan di Jehova ta bon conocí pa nan hermandad, cu ta uni arabir cu hudiu, croata cu serbio, hutu cu tutsi. Sin embargo, e Testigonan ta admití mesora cu un unidad asina ta posibel, no pa motibu cu nan ta mihó cu otro hende, sino pa motibu cu nan ta ser motivá dor dje poder dje mensahe di Bijbel.​—1 Tesalonicensenan 2:13.

Guia Práctico cu Ta Promové Bon Salú Mental

Hopi bes un hende su salú físico ta ser afectá dor dje estado di su salú mental i emocional. Por ehempel, estudionan científico a establecé cua ta e efectonan perhudicial di rabia. “Mayoria dje evidencia disponibel ta indicá cu hende cu ta rabia lihé tin un rísico mas grandi pa haña malesa cardiovascular (i tambe otro enfermedadnan) pa vários motibu, incluyendo ménos amigu, mas efectonan físico ora nan ta rabiá i mas enbolbimentu den bicionan cu ta pone salú na peliger,” segun Dr. Redford Williams, Director di Investigacion di Conducta n’e Centro Médico dje Universidad Duke i su esposa, Virginia Williams, den nan buki Anger Kills (Rabia Ta Mata).¹³

Miles di aña promé cu estudionan científico asina, Bijbel a conectá nos estado emocional cu nos salú físico den palabranan simpel pero cla: “Un curason calmu ta e bida dje organismo di carni, pero yaluzí ta putrimentu pa wesu.” (Proverbionan 14:30; 17:22) Bijbel a duna e conseho sabí aki: “Laga rabia para i bandoná furia,” i “No sea lihé den bo spiritu pa sintí bo ofendí [of “pa rabia,” version Reina Valera].”​—Salmo 37:8; Eclesiástes 7:9.

Tambe Bijbel ta contené conseho razonabel pa controlá rabia. Por ehempel, Proverbionan 19:11 ta bisa: “Comprendimentu penetrante di un homber siguramente ta tarda su rabia, i ta bunita di su parti p’e pasa por haltu di falta.” E palabra hebreo pa “comprendimentu penetrante” ta derivá for di un verbo cu ta hala atencion na un “conocimentu dje motibu” pa algu.¹⁴ E conseho sabí ta: “Pensa promé cu bo actua.” Dor di trata na comprendé di con otronan ta papia of actua den un cierto manera, por yuda un hende pa ta mas tolerante​—i ménos incliná na rabia.​—Proverbionan 14:29.

Un otro conseho práctico mas ta ser hañá na Colosensenan 3:13, cu ta bisa: “Sigui soportá otro i pordoná otro libremente.” Iritacionnan chikitu ta parti di bida. E expresion “sigui soportá” ta indicá cu mester tolerá e cosnan di otronan cu ta disgustá nos. “Pordoná” ta nificá no warda resentimentu. Tin biaha ta sabí pa kita sintimentunan di rencor en bes di warda nan; keda rabiá lo solamente aumentá bo carga.​—Mira cuadro “Guia Práctico pa Relacionnan Humano.”

Awe, tin hopi fuente di conseho i guia. Pero Bijbel ta berdaderamente único. Su conseho no ta djis teoria, ni tampoco su conseho nunca lo perhudicá nos. En bes di esei, su sabiduria a resultá di ta “masha digno di confiansa.” (Salmo 93:5) Ademas, Bijbel su conseho ta independiente di tempu. Maske el a ser completá casi 2.000 aña pasá, su palabranan ainda ta aplicabel. I nan ta aplicá cu mésun forsa sin importá nos rasa of pais na unda nos ta biba. E palabranan di Bijbel tin poder tambe​—e poder pa cambia hende den mihó personanan. (Hebreonan 4:12) Asina, lesando e buki ei i aplicando su principionan por mehorá e calidad di bo bida.

[Nota]

[Komentario na página 24]

Bijbel ta duna conseho cla i razonabel tocante bida di famia

[Kuadro na página 23]

Caracteristicanan di Famianan Saludabel

Vários aña pasá un educadora i specialista den bida di famia a haci un investigacion extenso den cua mas cu 500 profesional cu ta traha cu famianan a ser pidí pa duna un comentario riba e característicanan cu nan a ripará den famianan “saludabel.” Ta interesante cu entre e característicanan mas mencioná tabatin cosnan cu Bijbel a recomendá for di hopi tempu pasá.

Mantené bon comunicacion tabata e promé riba lista, incluyendo métodonan eficas pa resolvé desacuerdonan. Un práctica comun hañá den famianan saludabel ta cu “ningun hende ta bai drumi rabiá cu otro,” e autora dje investigacion a comentá.⁶ Sin embargo, mas cu 1.900 aña pasá Bijbel a consehá: “Rabia, i tog no peca; no laga solo baha cu boso den un estado provocá.” (Efesionan 4:26) Den tempu bíblico nan a considerá cu e dianan a core di bahada di solo pa bahada di solo. Di manera cu hopi promé cu expertonan moderno a studia famianan, Bijbel a duna e conseho sabí: Resolvé unbes asuntunan cu ta trece division​—promé cu e dia terminá i otro cuminsá.

Famianan saludabel “no ta cuminsá discutí riba tópiconan cu lo por escalá net promé cu nan sali for di cas of promé cu bai drumi,” e autora a ripará. “Bes tras bes mi a tende e frase ‘e tempu apropiado.’”⁷ Inconcientemente, e famianan ei a ripití e proverbio bíblico registrá mas cu 2.700 aña pasá: “Manera apel di oro den obra grabá di plata ta un palabra papiá n’e tempu apropiado p’e.” (Proverbionan 15:23; 25:11) E comparacion aki por ta un referencia na adornonan di oro den forma di apel poné riba teblachinan grabá di plata​—pertenencianan balioso i bunita den tempu bíblico. E ta transmití e bunitesa i balor di palabranan expresá n’e tempu apropiado. Den circunstancianan yen di tension, e palabranan apropiado bisá n’e tempu apropiado ta preciosísimo.​—Proverbionan 10:19.

[Kuadro na página 26]

Guia Practico pa Relacionnan Humano

“Agitá, pero no peca. Bisa loke boso tin di bisa den boso curason, riba boso cama i keda ketu.” (Salmo 4:4) Den mayoria caso ora ta trata di ofensanan menor, por ta sabí pa frena bo palabranan, evitando asina un confrontacion emocional.

“Ta existí esun cu ta papia sin pensa manera e hincánan di un spada, pero e lenga dje sabínan ta un curacion.” (Proverbionan 12:18) Pensa promé cu bo papia. Palabranan sin pensa por hùrt otronan i destruí amistadnan.

“Un contesta, ora e ta suave, ta apartá rabia, pero un palabra cu ta causa dolor ta instigá rabia.” (Proverbionan 15:1) Dominio propio ta necesario pa contestá cu suavedad, pero un proceder asina hopi bes ta suavisá problemanan i ta promové relacionnan pacífico.

“E principio di contencion ta manera un hende cu ta laga awa basha bai; p’esei, promé cu e pleitu estayá, bai for di ei.” (Proverbionan 17:14) Ta sabí pa kita for di un situacion explosivo promé cu bo perde bo calma.

“No sea lihé pa rabia den bo kurason, pasobra rabia ta biba den pechu di hende bobo.” (Eclesiástes 7:9, Editorial Evangélica) Hopi bes emocion ta bin promé cu accion. Esun cu ta lihé pa tuma ofensa ta bobo, pasobra su proceder por hiba na palabra of accionnan imprudente.

[Plachi na página 25]

Testigonan di Jehova tabata entre e proménan den campo di concentracion