E Buki Aki Ta Armonisa cu Ciencia?

No semper religion a mira ciencia como su amigu. Den siglonan pasá algun teólogo a bai contra descubrimentunan científico ora nan a haña cu esakinan a pone nan interpretacion di Bijbel na peliger. Pero di berdad ciencia ta enemigu di Bijbel?

SI E escritornan di Bijbel a respaldá e puntonan di bista científico mas ampliamente aceptá di nan tempu, e resultado lo tabata un buki cu erornan científico masha bisto. Sin embargo, e escritornan no a promové e conceptonan eróneo i poco científico ei. Al contrario, nan a skirbi un cantidad di declaracion cu no solamente ta científicamente exacto, sino tambe a contradicí directamente e opinionnan prevalente di nan tempu.

Ki Forma e Tera Tin?

E pregunta ei a intrigá hende pa miles di aña. E punto di bista general den antigwedad tabata cu e tera tabata plat. E babilonionan, por ehempel, a kere cu e universo tabata un caha of un cuarto cu tin e tera como su flur. Sacerdotenan hindú di India a imaginá nan cu e tera tabata plat i cu solamente un banda di dje tabata habitá. Un tribu primitivo na Asia a visualisá e tera como un teblachi inmenso.

Ya caba den siglo seis P.E.C., filósofo griego Pitágoras a lansa e teoria cu siendo cu e luna i e solo ta bol, e tera tambe mester ta un bol. Mas despues Aristóteles (siglo cuater P.E.C.) a bai di acuerdo, splicando cu eclipsenan lunar ta duna prueba cu e tera ta bol. E sombra dje tera riba e luna ta un curva.

Sin embargo, e concepto di un tera plat (di cua solamente su parti ariba ta habitá) no a disparcé completamente. Algun hende no por a aceptá e implicacion lógico di un tera rondó​—e concepto di antípoda.a Lactancio, apologista cristian di siglo cuater E.C., a ridiculisá e idea so. El a razoná: “Tin hende asina kens pa kere cu ta existí hende kende nan pasonan ta mas haltu cu nan cabes? . . . cu mata i palu ta crece bai abou? cu awaceru i sneu i hagel ta cai bai haltu?”²

E concepto di antípoda a presentá un dilema pa algun teólogo. Segun cierto teoria, si tabatin hende bibando na bandanan opuesto na otro dje tera, lo no tabata posibel pa nan tin coneccion cu hende conocí sea pa motibu cu e laman tabata muchu hanchu pa crusa of pa motibu cu tabatin un zona tropical intransitabel rond dje evenar. Pues ta di unda hende bibando na bandanan opuesto cu otro por a bini? Turdí, algun teólogo a preferá di kere cu no por tin hende ta biba na banda opuesto dje tera, of asta, manera Lactancio a argumentá, cu e tera lo no por tabata un globo mes!

No obstante, e concepto di un tera bol a prevalecé, i cu tempu a ser aceptá ampliamente. Sin embargo, ta te ora e era di espacio na siglo 20 a cuminsá, tabata posibel pa hende biaha bai suficiente leu den espacio pa verificá dor di observacion directo cu e tera ta un globo.b

Awor, kico tabata e posicion di Bijbel den e cuestion aki? Den siglo ocho P.E.C., ora e punto di bista prevalente tabata cu e tera tabata plat, siglonan promé cu e filósofonan griego a lansa e teoria cu e tera probablemente tabata bol, i miles di aña promé cu hende a mira for di espacio cu e tera ta un globo, e profeta hebreo Isaías a declará cu simplesa remarcabel: “Tin Unu cu ta biba riba e círculo dje tera.” (Isaías 40:22) E palabra hebreo chugh, traducí aki como “círculo,” por ser traducí tambe como “globo.”³ Otro traduccionnan di Bijbel ta bisa, “e globo dje tera” (Douay Version) i “e tera rondó.”​—Moffatt.c

E escritor bíblico, Isaías, a evitá e mitonan comun tocante e tera. En bes di esei, el a skirbi un declaracion cu descubrimentunan científico nobo no a menasá.

Kico Ta Wanta e Tera?

Den antigwedad, otro preguntanan tocante e cósmos a turdi hende: Riba kico e tera ta descansá? Kico ta wanta e solo, luna i streanan? Nan no tabatin conocimentu dje ley di gravitacion universal, formulá dor di Isaac Newton i publicá na 1687. E idea cu cuerponan celestial en realidad ta cologá den espacio bashí na nada tabata desconocí pa nan. Pues, nan splicacionnan hopi bes a bai den e direccion di obhetonan of substancianan palpabel cu a wanta e tera i otro cuerponan celestial den laira.

Por ehempel, un teoria antiguo, cu kisas a originá cu hende cu a biba riba un isla, tabata cu e tera tabata rondoná pa awa i cu e tabata drif riba e awanan aki. E hindúnan a imaginá nan cu e tera tabatin vários fundeshi, un riba otro. E tabata descansá riba cuater olefante, e olefantenan tabata pará riba un morcoi enorme, e morcoi tabata pará riba un colebra inmenso, i e colebra lorá tabata drif riba awanan di universo. Empedocles, un filósofo griego di siglo cincu P.E.C., a kere cu e tera a descansá riba un remolino di bientu i cu e remolino aki a pone e cuerponan celestial move.

Entre e opinionnan cu tabatin mas influencia tabata esnan di Aristóteles. Maske el a lansa e teoria cu e tera ta un globo, el a nenga cu hamas e por a cologá den espacio bashí. Den su obra skirbí On the Heavens (Tocante Shelu), ora di refutá e idea cu e tera ta descansá riba awa, el a bisa: “No ta e naturalesa di awa, mescos cu e no ta dje tera, pa keda den aire: e mester tin algu pa descansá ariba.”⁴ Pues, anto, riba kico e tera “ta descansá?” Aristóteles a siña cu e solo, luna i streanan tabata pegá na e superficie di globonan sólido i transparente. Tabatin globo hincá den globo, cu e tera​—inmóbil​—como e centro. Segun cu e globonan a lora un den e otro, e obhetonan riba nan​—solo, luna i planetanan​—a move atrabes dje firmamento.

E splicacion di Aristóteles a parce lógico. Si e cuerponan celestial no tabata bon pegá na algu, di ki otro manera nan por a keda den laira? E opinionnan di Aristóteles, un homber sumamente admirá, a ser aceptá como echo pa un 2.000 aña. Segun The New Encyclopædia Britannica, den siglonan 16 i 17 su siñansanan a “alcansá e státus di dogma religioso” den bista dje iglesia.⁵

Cu e invento di telescop, astrónomonan a cuminsá cuestioná e teoria di Aristóteles. Tog, nan no por a cai riba e contesta, te ora cu Sir Isaac Newton a splica cu e planetanan ta cologá den espacio bashí, wantá den nan órbita dor di un forsa invisibel​—gravedad. Esei a parce increibel, i pa algun di Newton su coleganan tabata difícil pa kere cu espacio por ta bashí, casi sin ningun substancia.d⁶

Kico Bijbel tin di bisa tocante e cuestion aki? Casi 3.500 aña pasá, Bijbel a declará cu claridad extraordinario cu e tera ta cologá “riba nada.” (Job 26:7) Den hebreo original, e palabra pa “nada” (beli-mahʹ) usá aki ta nificá literalmente “sin nada.”⁷ Contemporary English Version ta usa e expresion, “riba espacio bashí.”

Un planeta cologá “riba espacio bashí” tabata leu for di loke mayoria hende a imaginá nan e tera den e tempu ei. Sin embargo, canando muchu mas adelantá cu su época, e escritor bíblico a registrá un declaracion cu ta científicamente exacto.

Bijbel i Ciencia Médico​—Nan Ta Armonisá cu Otro?

Ciencia médico moderno a siña nos hopi cos tocante e plamamentu i prevencion di malesa. Avancenan médico den siglo 19 a introducí antisépsis den e oficina di dokter, esta limpiesa pa reducí infeccion. E resultado tabata dramático. Tabatin un reduccion significativo den infeccion i morto prematuro.

Sin embargo, dokternan di antigwedad no a comprendé completamente con malesa ta plama, ni nan no a realisá con importante limpiesa ta den prevení enfermedad. Nada straño cu hopi di nan prácticanan médico lo parce primitivo pa normanan moderno.

Un dje manuscritonan médico mas bieu disponibel ta e Papiro di Ebers, un compilacion di conocimentu médico egipcio, cu ta data for di rond di 1550 P.E.C. E rol aki ta contené un 700 remedi pa vários afliccion “for di mordé di crocodil te na dolor di uña di dede di pia.”⁸ The International Standard Bible Encyclopaedia ta bisa: “E conocimentu médico dje dokternan aki tabata puramente basá riba observacion, pa gran parti mágico i nada científico.”⁹ Mayoria dje remedinan tabata solamente ineficas, pero algun di nan tabata masha peligroso mes. Pa trata un herida, un dje receptnan a recomendá pa aplicá un mescla trahá di excremento humano combiná cu otro substancianan.¹⁰

E manuscrito aki di remedinan médico egipcio a ser skirbí rond dje mésun tempu cu e promé bukinan di Bijbel, incluyendo e Ley di Moises. Moises, kende a nace na 1593 P.E.C., a lanta na Egipto. (Exodo 2:​1-10) Como miembro di fárao su famia di cas, el a ser “instruí den tur e sabiduria dje egipcionan.” (Echonan 7:22) E tabata conocí cu “e dokternan” di Egipto. (Génesis 50:​1-3) Nan prácticanan médico ineficas of peligroso a influenciá su skirbimentunan?

No. Al contrario, e Ley di Moises tabatin regulacionnan di higiena cu a cana hopi mas adelantá cu nan tempu. Por ehempel, un ley pa campamentunan militar a rekerí pa dera excremento leu for dje campo. (Deuteronomio 23:13) Esaki tabata un medida preventivo hopi delantá. El a yuda tene e awa liber di contaminacion i a percurá proteccion contra disenteria transmití via muskita i otro enfermedadnan cu ta causa diarea, cu te ainda ta exigí miyones di bida tur aña den paisnan caminda e condicionnan higiénico ta deplorabel.

E Ley di Moises a contené otro regulacionnan di higiena cu a protehá Israel contra e plamamentu di malesanan contagioso. Un persona cu tabatin of di ken a ser sospechá cu e tabatin un malesa contagioso a ser poné den carentena. (Levítico 13:​1-5) Pañanan of pochinan cu a bin den contacto cu un animal cu a muri di su mes (kisas di malesa) mester a ser labá promé cu bolbe usa nan of mester a ser destruí. (Levítico 11:27, 28, 32, 33) Cualkier persona cu a mishi cu un cadaver a ser considerá impuru i mester a pasa dor di un procedura di purificacion caminda entre otro e mester a laba su pañanan i baña. Durante e periodo di shete dia di impuresa, e mester a evitá contacto físico cu otro hende.​—Númeronan 19:​1-13.

E reglanan di higiena aki ta revelá un sabiduria cu e dokternan dje nacionnan rond di nan n’e tempu ei no a poseé. Miles di aña promé cu ciencia médico a siña tocante e maneranan con malesa ta plama, Bijbel a prescribí medidanan preventivo razonabel como proteccion contra malesa. No ta un sorpresa anto cu Moises por a bisa cu en general e israelitanan di su tempu a biba pa 70 of 80 aña.e​—Salmo 90:10.

A lo mehor bo ta reconocé cu e declaracionnan bíblico mencioná aki ta científicamente exacto. Pero tin otro declaracionnan den Bijbel cu no por ser probá científicamente. Acaso esei ta pone Bijbel necesariamente contra ciencia?

Aceptando Loke No Por Ser Probá

Un declaracion cu no por ser probá no ta necesariamente falsu. Prueba científico ta limitá n’e abilidad di hende pa descubrí suficiente evidencia i pa interpretá e datonan corectamente. Pero algun berdad no por ser probá, pa motibu cu ningun evidencia a ser conserbá, e evidencia ta vago of no a ser descubrí, of abilidadnan i experticio científico no ta suficiente pa yega na un conclusion indiscutibel. Esaki lo por ta e caso cu cierto declaracionnan den Bijbel pa cua no tin evidencia físico independiente?

Por ehempel, Bijbel ta haci referencia na un region invisibel, habitá dor di personanan spiritual. Esei no por ser probá​—ni refutá​—científicamente. Mescos ta conta pa sucesonan milagroso mencioná den Bijbel. No tin suficiente evidencia geológico disponibel pa convencé algun hende dje Diluvio den tempu di Noe. (Génesis, capítulo 7) Nos tin cu concluí cu e no a sosodé? Sucesonan histórico por ser nublá dor di tempu i cambio. Pues no ta posibel cu miles di aña di actividad geológico a eliminá hopi dje evidencia dje Diluvio?

Ta cierto cu Bijbel ta contené declaracionnan cu no por ser probá ni refutá dor di evidencia físico disponibel. Pero esei mester sorprendé nos? Bijbel no ta un buki di instruccion científico. Sin embargo, e ta un buki cu ta papia berdad. Ya caba nos a considerá e evidencia fuerte cu su escritornan tabata hombernan di integridad i onestidad. I ora nan ta mencioná asuntunan relacioná cu ciencia, nan palabranan ta exacto i completamente liber di teorianan “científico” di antigwedad cu a resultá di ta simpel mitonan. P’esei, ciencia no ta enemigu di Bijbel. Tin tur motibu pa evaluá sin prehuicio loke Bijbel ta bisa.

[Nota]

[Komentario na página 21]

Un declaracion cu no por ser probá no ta necesariamente falsu

[Plachi na página 18]

Miles di aña promé cu hende a mira for di espacio cu e tera ta un globo, Bijbel a referí na “e círculo dje tera”

[Plachinan na página 20]

Sir Isaac Newton a splica cu e planetanan ta ser tené den nan órbita dor di gravedad