1. Kon ta Dios su nòmber, i kon nos por tin sigur ku Dios ke pa nos sa su nòmber?

Den Beibel, Dios ta revelá na nos ken e ta. Dios ta bisa: “Ami ta Yehova. Esei ta mi nòmber.” (Isaías 42:8) E nòmber “Yehova” ta un tradukshon di un nòmber hebreo. Segun hopi eksperto riba tereno di Beibel, e nòmber ei ta nifiká “E Ta Kousa pa Bira.” Yehova ke pa nos sa su nòmber. (Éksodo 3:15) Kon nos por tin sigur di esei? Wèl, el a laga skirbi su nòmber mas ku 7.000 biaha den Beibel!a E nòmber Yehova ta pertenesé na e úniko “Dios berdadero” den henter universo.—Deuteronomio 4:39, NW.

2. Kon nos mester adorá Yehova?

Komo ku Yehova ta nos Kreador, nos mester dun’é nos deboshon eksklusivo. (Revelashon 4:11) Esaki ta enserá ku nos mester stima i adorá é so, sin usa ídolo òf imágen den nos adorashon.—Lesa Isaías 42:8.

Nos adorashon mester ta limpi i agradabel òf, aseptabel, den bista di Yehova. (Romanonan 12:1) Esaki ta enserá ku nos mester obedesé su leinan. Por ehèmpel, hende ku ta stima Yehova ta balorá i ta obedesé su leinan tokante matrimonio. Ademas, nan ta evitá tur loke por hasi nan mes òf otro hende daño, manera uso di tabako òf droga i mal uso di alkohòl.a