Un Buki di Profecia

Hende ta interesá den futuro. Nan ta busca pronósticonan confiabel tocante hopi tópico, for di pronósticonan di tempu te na indicadornan económico. Sin embargo, ora nan actua riba e pronósticonan ei, hopi bes nan ta ser desapuntá. Bijbel ta contené hopi pronóstico, of profecia. Con exacto e profecianan ei ta? Nan ta historia skirbí di antemano? Of nan ta historia cu ta pretendé di ta profecia?

SEGUN informe e estadista romano Cato (234-​149 P.E.C.), a bisa: “Ta strañá mi cu un adivinadó no ta hari ora e mira un otro adivinadó.”¹ En berdad, te n’e tempu aki hopi hende ta duda den miradó di destino, astrólogo i otro adivinadónan. Hopi bes nan pronósticonan ta formulá den términonan vago i por ser interpretá na hopi manera.

Pero, kico dje profecianan di Bijbel? Tin motibu pa duda? Of tin base pa tin confiansa?

No Djis Suposicionnan Bon Fundá

Hende inteligente por purba usa tendencianan bisto pa haci speculacionnan exacto tocante futuro, pero nan nunca tin rason tur biaha. E buki Future Shock (Shok den Futuro) ta comentá: “Tur sociedad ta enfrentá no solamente un seri di probabel futuro sucesonan, sino tambe un diversidad di posibel futuro sucesonan, i un conflicto cu loke lo ta preferibel futuro sucesonan.” E ta agregá: “Naturalmente, ningun hende por ‘conocé’ e futuro den un sentido absoluto. Nos por solamente sistematisá i profundisá loke nos ta suponé tocante futuro i purba calculá e probabilidadnan.”²

Pero e escritornan di Bijbel no a djis “calculá e probabilidadnan” di ‘loke nan a suponé’ tocante futuro. Ni tampoco por descartá nan pronósticonan como declaracionnan vago cu por ser interpretá den vários manera. Al contrario, hopi di nan profecianan a ser expresá cu claridad extraordinario i tabata excepcionalmente specífico, hopi bes pronosticando net lo contrario di loke lo por a spera. Tuma como ehempel loke Bijbel a bisa di antemano tocante e antiguo stad di Babilonia.

Lo Ser ‘Barí cu e Basora di Exterminacion’

Antiguo Babilonia a bira “e perla dje nacionnan.” (Isaías 13:19, Versión Popular) E stad extenso aki tabata localisá stratégicamente riba e ruta comercial for di Golfo Pérsico pa Laman Mediteráneo, sirbiendo como un depósito pa e comercio via tera i tambe via laman entre Oriente i Occidente.

Pa siglo shete P.E.C., a parce cu Babilonia tabata e capital invencibel dje Imperio Babilonio. E stad a extendé na tur dos banda di Riu Eufrátes, i e awanan dje riu a ser usá pa forma un ‘gracht’ hanchu i profundo i un red di canal. Ademas, e stad tabata protehá pa un sistema masivo di muraya dòbel, reforsá cu un cantidad di toren di defensa. Nada straño cu su habitantenan a sinti nan a salbo.

No obstante, den siglo ocho P.E.C., promé cu Babilonia a alcansá e cumbre di su gloria, profeta Isaías a predicí cu Babilonia lo ser ‘barí cu e basora di exterminacion.’ (Isaías 13:19; 14:22, 23) Isaías a describí tambe exactamente con Babilonia lo cai. E invasornan lo “seca” su riunan​—e fuente di su defensa di canal di awa​—haciendo e stad vulnerabel. Isaías a asta duna e nomber dje conkistadó​—“Ciro,” un gran rey di Persia, dilanti ken “e portanan dje stadnan [lo] habri sin cu ningun hende por cera nan.”​—Isaías 44:27–45:2, Versión Popular.

E tabatin hopi curashi pa duna pronósticonan asina. Pero nan a cumpli? Laga historia contestá.

“Sin Combate”

Dos siglo despues cu Isaías a registrá su profecia, riba e anochi di 5 di october, 539 P.E.C., e ehércitonan di Medo-Persia bou di mando di Ciro e Grandi tabata campa cerca di Babilonia. Pero e babilonionan tabata sigur di nan mes. Segun e historiadó griego Herodoto (siglo cincu P.E.C.), nan tabatin suficiente provision almacená pa wanta pa añanan.³ Tambe nan tabatin Riu Eufrátes i Babilonia su murayanan potente pa protehá nan. No obstante, exactamente riba e anochi ei, segun e Crónica di Nabonido, “e ehército di Ciro a drenta Babilonia sin combate.”⁴ Con esei tabata posibel?

Herodoto ta splica cu den e stad, e pueblo “tabata baila i dibertí na un fiesta.”⁵ Sin embargo, pafó, Ciro a desviá e awa di Eufrátes. Segun cu e nivel di awa tabata baha, su ehército a pasa dor dje fondo di riu, cu e awa yegando te na nan bel di pia. Nan a marcha, pasando e murayanan haltísimo forbij i a drenta dor di loke Herodoto a yama “e portanan cu a habri riba e riu,” portanan cu pa negligencia a ser lagá habrí.⁶ (Compará cu Daniel 5:​1-4; Jeremías 50:24; 51:​31, 32.) Otro historiadónan, incluyendo Jenofonte (c. 431-​c. 352 P.E.C.), i tambe tablanan cuneiforme (cu ‘spijkerschrift’) hañá dor di arkeólogonan, ta confirmá e caida repentino di Babilonia na man di Ciro.⁷

Asina e profecia di Isaías tocante Babilonia a cumpli. Of no? Ta posibel cu esaki no tabata un pronóstico, sino en realidad algu skirbí despues cu el a sosodé? En realidad por haci e mésun pregunta tocante otro profecianan di Bijbel.

Historia cu Ta Pretendé di Ta Profecia?

Si ta cierto cu profetanan di Bijbel​—incluyendo Isaías​—a solamente skirbi historia di nobo pa hacié parce profecia, anto e hombernan aki no tabata mas cu impostornan sabí. Pero kico lo ta nan motibu pa usa un triki asina? Berdadero profetanan a laga sa mesora cu no ta posibel pa soborná nan. (1 Samuel 12:3; Daniel 5:17) I ya nos a considerá caba e evidencia convincente cu e escritornan di Bijbel (di cua hopi tabata profeta) tabata hombernan digno di confiansa cu tabata dispuesto pa revelá asta nan mes erornan bergonsoso. Ta parce improbabel cu hombernan dje clase aki lo tabata incliná pa cometé fraudenan masha elaborá, disfrasando historia como profecia.

Tin algu mas pa tuma na consideracion. Hopi profecia di Bijbel a contené denunciacionnan fuerte contra e nacion dje profeta mes, cu a incluí e sacerdote i gobernantenan. Isaías, por ehempel, a censurá e condicion moral deplorabel dje israelitanan​—tantu dje lidernan como dje pueblo​—den su tempu. (Isaías 1:​2-10) Otro profetanan a exponé enérgicamente e picánan dje sacerdotenan. (Sofonías 3:4; Malakías 2:​1-9) Ta difícil pa haña un motibu pakico nan lo inventá profecianan cu a contené e denunciacionnan di mas skerpi cu por ser imaginá contra nan mes nacion i pakico e sacerdotenan lo a cooperá cu un trampa asina.

Ademas, con e profetanan​—si nan tabata nada mas cu impostor​—por a logra hinca un falsificacion asina den otro? Den Israel hendenan a ser animá pa siña lesa. For di chikitu, muchanan a siña lesa i skirbi. (Deuteronomio 6:​6-9) Israelitanan a ser animá pa lesa e Scritura den privá. (Salmo 1:2) Riba e sabat semanal, e Scritura a ser lesá na público den e snoanan. (Echonan 15:21) No ta parce probabel cu henter un nacion cu tabata sa lesa, bon versá den e Scritura, por a ser engañá dor di un farsa asina.

Huntu cu esei, tin mas den e profecia di Isaías tocante e caida di Babilonia. E ta contené un detaye cu simplemente no por a ser skirbí despues di su cumplimentu.

“Nunca Lo E Ser Habitá”

Kico lo para di Babilonia despues di su caida? Isaías a profetisá: “Nunca lo e ser habitá, ni lo e no permanecé di generacion tras generacion. I einan e arabir lo no arma su tent, ni ningun wardadó lo laga su tou descansá einan.” (Isaías 13:20) Ta poco pa bisa cu mester a parce straño pa predicí cu un stad asina bon situá lo bira permanentemente inhabitá. Ta posibel cu e palabranan di Isaías a ser skirbí despues cu el a mira un Babilonia desolá?

Despues dje conkista dor di Ciro, un Babilonia habitá​—aunke unu inferior​—a sigui existí pa siglonan. Corda cu e Rolnan di Laman Morto tabata incluí un copia dje buki completo di Isaías cu ta data di siglo dos P.E.C. Rond dje tempu cu tabata copiando e rol ei, e partonan a tuma control di Babilonia. Den e promé siglo E.C., tabatin un poblacion di hudiunan na Babilonia, i e escritor bíblico Pedro a haci un bishita einan. (1 Pedro 5:13) P’e tempu ei, e Rol di Laman Morto di Isaías ya a existí pa casi dos siglo. Di manera cu den e promé siglo E.C., ainda Babilonia no tabata completamente desolá, sin embargo e buki di Isaías a ser completá hopi promé cu esei.a

Manera a ser predicí, cu tempu Babilonia a bira simplemente un “monton di piedra.” (Jeremías 51:37) Segun e erudito hebreo Jerónimo (siglo cuater E.C.), den su tempu caba Babilonia tabata un tereno di yag caminda “animalnan di tur sorto” tabata cana rond.⁹ Babilonia ta desolá te n’e dia djawe.

Isaías nunca a biba pa mira Babilonia bira inhabitá. Pero e ruinanan dje stad ei cu un tempu tabata poderoso, rond di 80 kilometer sur di Bagdad, den Irak actual, ta duna testimonio silencioso dje cumplimentu di su palabranan: “Nunca lo e ser habitá.” Cualkier restoracion di Babilonia como un atraccion turístico lo por atraé bishitantenan, pero Babilonia su “desendencia i posteridad” a disparcé pa semper.​—Isaías 13:20; 14:​22, 23.

Pues, profeta Isaías no a expresá pronósticonan vago cu por a ser aplicá na cualkier futuro suceso. Ni tampoco e no a skirbi historia di nobo pa hacié parce profecia. Pensa un ratu: Pakico un impostor lo a risca “profetisá” algu riba cua lo e no tabatin absolutamente ningun control, esta, cu e poderoso Babilonia lo no ser habitá nunca mas?

E profecia aki tocante e caida di Babilonia ta solamente un ehempel di Bijbel.b Hopi hende ta mira den e cumplimentu di su profecianan un indicacion cu Bijbel mester ta di un fuente superior cu hende. Kisas lo bo bai di acuerdo cu, por lo ménos, e buki aki di profecia ta digno di ser examiná. Un cos ta sigur: Tin un diferencia inmenso entre e pronósticonan vago of sensacionalista di adivinadónan actual i e profecianan claro, serio i specífico di Bijbel.

[Nota]

[Komentario na página 28]

Escritornan di Bijbel tabata profetanan fiel of impostornan sabí?

[Plachi na página 29]

Ruinanan di antiguo Babilonia