Biba pa Causa di Fe den e Promesanan di Dios
“Ami ta Esun Divino i no tin ningun otro Dios, ni ningun manera ami; Esun cu ta declará desde e principio e final, i for di hopi tempu atras e cosnan cu no a ser hací.”—ISAIAS 46:9, 10.
1, 2. Cua ta algun dje vários puntonan di bista tocante Dios su metementu den asuntunan di tera?
DIOS ta mete den asuntunan di tera? Opinionnan ta varia. Un dje puntonan di bista ta cu e no ta mete mes. Despues cu el a crea hende, e no ta dispuesto ni capas pa actua na nos fabor. Segun e punto di bista aki, Dios ta manera un tata cu ta pone su yu riba un baiskel nobo, ta ten’é regt, i caba ta dal e un push p’e cuminsá core. Despues di esei, e tata ta bira bai. E mucha ta riba su mes; e por cai, of e por laga di cai. Sea cual sea, e asuntu no ta den man dje tata mas.
2 Un otro punto di bista ta cu Dios ta dirigiendo activamente tur aspecto di nos bida i cu e ta mete directamente den tur suceso di henter su creacion. Pero si esei ta e caso, algun hende lo concluí cu Dios ta causa no solamente e bon cosnan cu ta sosodé, sino tambe e crímen i tragedianan cu ta afligí humanidad. Conocé e berdad tocante Dios su actividad, lo yuda nos sa kico pa spera di dje. Tambe esei lo fortificá nos fe den e cumplimentu sigur di su promesanan.—Hebreonan 11:1.
3. (a) Con nos sa cu Jehova ta un Dios di propósito? (b) Pakico Bijbel ta papia di Jehova como unu cu ta ‘forma,’ of moldea, su propósito?
3 Un punto importante relacioná cu e pregunta si Dios ta mete den asuntunan humano ta e echo cu Jehova ta un Dios di propósito. Esei ta loke su nomber mes ta encerá. “Jehova” ta nificá “E Ta Causa pa Yega di Ser.” Cu accion progresivo, Jehova ta causa su mes pa bira e Cumplidor di tur su promesanan. Consecuentemente, Bijbel ta papia di Jehova como unu cu ta ‘forma,’ of moldea, su propósito relacioná cu futuro suceso of accionnan. (2 Reynan 19:25; Isaías 46:11) E términonan aki ta bini dje palabra hebreo ya·tsár, cu ta relacioná cu e palabra cu ta nificá “trahadó di klei.” (Jeremías 18:4) Mescos cu un trahadó ábil di klei por forma un vas bunita for di un klompi di klei, Jehova por forma, of maniobrá, cosnan pa realisá su boluntad.—Efesionan 1:11.
4. Con Dios a prepará e tera pa hende biba riba dje?
4 Por ehempel, Dios su propósito tabata p’e tera bira un lugá di bunitesa exkisito, habitá pa hende obediente i perfecto. (Isaías 45:18) Hopi tempu promé cu el a crea e promé homber i muher, Jehova a haci preparacion amoroso pa nan. E promé capítulonan dje buki di Génesis ta describí con Jehova a establecé dia i anochi, tera i laman. Despues el a crea vegetacion i bestia. A tuma hopi miles di aña pa prepará e tera pa hende biba riba dje. Jehova a completá e proyecto exitosamente. E promé homber i muher a cuminsá nan bida den Eden, un paradijs deleitabel cu tabata completamente ekipá pa nan por a disfrutá di bida. (Génesis 1:31) Dje manera ei Jehova tabata directamente enbolbí den asuntunan di tera, moldeando su obra progresivamente den direccion di su propósito elevá. Dios a stop di mete ora e famia humano a bira grandi?
Jehova Ta Limitá Su Trato cu Hende
5, 6. Pakico Dios ta limitá su trato cu hende?
5 Aunke Jehova tin e poder pa haci esei, e no ta dirigí ni controlá tur detaye di actividad humano. Tin motibu pa esaki. Un di nan ta cu hende a ser creá den e imágen di Dios, cu un boluntad liber. Jehova no ta obligá nos cumpli cu su ordu; ni nos no ta marioneta. (Deuteronomio 30:19, 20; Hosué 24:15) Aunke Dios ta tene nos responsabel pa nos accionnan, amorosamente el a duna nos bastante libertad pa dicidí kico nos ta haci cu nos bida.—Romanonan 14:12; Hebreonan 4:13.
6 Un otro motibu pakico Dios no ta dirigí tur suceso ta relacioná cu e cuestion cu Satanas a lanta den Eden. Satanas a desafiá e soberania di Dios. El a ofrecé Eva loke a parce di ta un oportunidad pa haña independencia—un oferta cu Eva i mas despues su casá, Adam, a aceptá. (Génesis 3:1-6) Como reaccion, Dios a permití hende goberná nan mes pa un periodo di tempu pa duna prueba si Satanas su desafio tabata hustificá. P’e motibu aki, no por culpa Dios p’e mal cosnan cu hende ta haci awe. Moises a skirbi di hende rebelde: “Nan a obra ruinosamente riba nan propio cuenta; nan no ta [Dios] su yunan; e defecto ta di nan mes.”—Deuteronomio 32:5.
7. Kico ta Jehova su propósito p’e tera i pa humanidad?
7 Sin embargo, aunke Jehova a permití hende e libertad pa scoge i experimentá cu gobernacion independiente di dje, e no a bira lomba pa asuntunan di tera. Esei lo a laga nos cu tiki speransa cu lo e cumpli cu su promesanan. Aunke Adam i Eva a rebelá contra e soberania di Dios, Jehova no a cambia su propósito amoroso p’e tera i pa humanidad. Sin falta lo e transformá e tera den un paradijs habitá pa hende perfecto, obediente i felis. (Lucas 23:42, 43) E registro di Bijbel for di Génesis te Revelacion ta describí con Jehova a traha progresivamente pa logra e meta ei.
Dios Ta Actua pa Cumpli cu Su Boluntad
8. Kico mester a haci pa logra hiba e israelitanan den e Tera Primintí?
8 Den su trato cu e nacion di Israel, Dios a demostrá cu lo e cumpli cu su propósito. Por ehempel, Jehova a sigurá Moises cu lo E libra e israelitanan for di Egipto i hiba nan den e Tera Primintí, un tera cu a abundá cu lechi i miel. (Exodo 3:8) Esaki tabata un proclamacion di sumo importancia i trankilisante. Pa logr’é mester a libra e israelitanan—kendenan huntu cu nan compañeronan tabata rond di tres miyon hende—for di un nacion poderoso cu tabata masha contra nan baimentu. (Exodo 3:19) E tera na cua nan lo a ser hibá tabata habitá pa nacionnan poderoso cu lo tabata masha contra nan yegada. (Deuteronomio 7:1) Meimei tabatin un desierto caminda e israelitanan lo tabatin mester di awa cu cuminda. Esaki tabata un situacion cu a permití Jehova manifestá su poder supremo i divinidad.—Levítico 25:38.
9, 10. (a) Con bin Hosué por a duna testimonio cu e promesanan di Dios ta confiabel? (b) Ta ki importante pa nos tin confiansa den Dios su abilidad pa recompensá su fiel sirbidónan?
9 Dios a saca e israelitanan for di Egipto atrabes di un seri di acto poderoso. Di promé, el a manda dies plaga devastador riba e nacion di Egipto. Despues, el a parti Laman Corá, permitiendo e israelitanan scapa miéntras cu e ehército egipcio cu tabata persiguí nan a perecé. (Salmo 78:12, 13, 43-51) Despues di esei, el a percurá p’e israelitanan durante nan 40 añanan den e desierto, dor di alimentá nan cu mana, duna nan awa i asta soru pa nan mantelnan no gasta i pa nan pianan no hincha. (Deuteronomio 8:3, 4) Despues cu e israelitanan a drenta e Tera Primintí, Jehova a duna nan victoria riba nan enemigunan. Hosué, kende a ehercé fe fuerte den Jehova su promesanan, tabata testigo ocular di tur e cosnan aki. P’esei, cu confiansa, e por a bisa e ancianonan di su dia: “Boso sa bon cu tur boso curason i cu tur boso alma cu ni un solo palabra di tur e bon palabranan cu Jehova boso Dios a papia cu boso a faya. Nan tur a ser realisá pa boso.”—Hosué 23:14.
10 Mescos cu Hosué di antigwedad, cristiannan djawe tin pleno confiansa cu Dios ta dispuesto i capas pa actua na fabor di esnan cu ta sirbié. E conviccion aki ta un parti esencial di nos fe. Apostel Pablo a skirbi: “Sin fe ta imposibel pa agrad’é bon, pasobra esun cu ta acudí na Dios mester kere cu e . . . ta bira e recompensador di esnan cu ta busk’é cu empeño.”—Hebreonan 11:6.
Dios Ta Premirá Futuro
11. Ki factornan ta permití Dios cumpli cu su promesanan?
11 Te asina leu, nos a mira cu aunke Dios ta duna hende boluntad liber i ta laga nan dirigí nan mes independiente di dje, e tin tantu e poder como e boluntad pa actua pa realisá su propósito. Tog, tin un factor mas cu ta contribuí n’e cumplimentu sigur di Dios su promesanan. Jehova por premirá futuro. (Isaías 42:9) Mediante su profeta, Dios a bisa: “Corda e promé cosnan di hopi tempu atras, cu ami ta Esun Divino i no tin ningun otro Dios, ni ningun manera ami; Esun cu ta declará desde e principio e final, i for di hopi tempu atras e cosnan cu no a ser hací; Esun bisando: ‘Mi mes conseho lo ser realisá, i tur loke ta mi deleite lo mi haci.’” (Isaías 46:9, 10) Un cunukero experenciá sa ki ora i na unda pa planta simia, pero tog kisas e no ta completamente sigur con cosnan lo desaroyá. Sin embargo, “e Rey di eternidad” sí tin conocimentu exacto pa premirá precisamente ki ora i na unda e mester actua pa cumpli cu su propósito.—1 Timoteo 1:17.
12. Den ki manera Jehova a ehercé su abilidad pa premirá futuro den e dianan di Noe?
12 Pensa con Dios a premirá cosnan den e dianan di Noe. Debí n’e maldad extenso cu a yena tera, Dios a determiná pa pone fin na humanidad desobediente. El a fiha un tempu pa haci esaki, 120 aña den futuro. (Génesis 6:3) Ora Jehova a fiha e periodo specífico ei, e no a tene cuenta cu solamente destruccion dje malbadonan, loke e por a haci ki ora cu ta. Jehova su orario a tene cuenta tambe con pa conserbá e hustunan. (Compará cu Génesis 5:29.) Den su sabiduria, Dios tabata sa di antemano ki ora pa asigná e trabou cu lo a hiba n’e fin ei. El a duna Noe suficiente informacion specífico. Noe mester a construí un arca “p’e salbacion di su famia di cas,” i un diluvio mundial lo mester a destruí e malbadonan.—Hebreonan 11:7; Génesis 6:13, 14, 18, 19.
Un Proyecto di Construccion Gigantesco
13, 14. Pakico construccion dje arca tabata un asignacion difícil?
13 Considerá e asignacion aki for dje punto di bista di Noe. Debí cu Noe tabata un homber di Dios, e tabata sa cu Jehova lo por a destruí e malbadonan. Pero promé cu esei lo a sosodé, tabatin trabou pa haci, un trabou cu a rekerí fe. Construccion dje arca lo tabata un proyecto gigantesco. Dios a duna detaye specífico di su tamaño. E arca lo tabata mas largu cu algun cancha deportivo djawe i mes haltu cu un edificio di cincu piso. (Génesis 6:15) E constructornan lo tabata poco i sin experencia. Nan lo no tabatin e herment ni ekiponan sofisticá cu ta disponibel awe. Ademas, ya cu Noe no tabatin e abilidad cu Jehova tin pa premirá futuro, e no tabatin manera pa haña sa ki situacionnan lo a desaroyá den transcurso dje añanan cu lo a sea yuda of stroba e proyecto di construccion. Probablemente Noe a meditá riba hopi pregunta. Con lo a reuní e materialnan di construccion? Con lo e por e trece e bestianan huntu? Ki cuminda lo tabata necesario i cuantu? Ki tempu exactamente e Diluvio pronosticá lo a tuma lugá?
14 Tambe tabatin e condicionnan social. Maldad a abundá. E néfilim poderoso—yunan mesclá di angelnan malbado cu hende muher—a yena e tera cu violencia. (Génesis 6:1-4, 13) Ademas, construccion dje arca lo no tabata un proyecto cu por a tuma lugá den secreto. Hende lo a puntra nan mes kico Noe tabata haciendo, i lo el a bisa nan. (2 Pedro 2:5) Nan lo a aprobá loke Noe tabata haci? Casi sigur cu no! Algun aña mas promé, fiel Enoc a proclamá e destruccion dje malbadonan. Su mensahe tabata asina impopular cu Dios “a tum’é,” of kita su bida, evidentemente pa no permití Su enemigunan mat’é. (Génesis 5:24; Hebreonan 11:5; Hudas 14, 15) Noe no solamente mester a proclamá un mensahe mes impopular, sino e mester a construí un arca tambe. Segun cu tabata construí e arca ei, lo el a sirbi como un recordatorio poderoso di Noe su fieldad meimei di su contemporáneonan malbado!
15. Pakico Noe tabatin confiansa cu lo e por a cumpli cu su asignacion?
15 Noe tabata sa cu e proyecto tabatin e apoyo i bendicion di Dios Todopoderoso. No ta Jehova mes a dun’é e trabou? Jehova a garantisá Noe cu e huntu cu su famia lo a drenta un arca completá i cu nan lo a ser conserbá bibu atrabes di un Diluvio mundial. Pa enfatisá con sigur esei tabata, Dios asta a cera un pacto solem. (Génesis 6:18, 19) Probablemente, Noe a mira cu di berdad Jehova a anticipá i evaluá tur loke tabata enbolbí, promé cu el a dun’é e asignacion. Ademas, Noe tabata sa cu Jehova tabatin e poder pa intervení pa yud’é ora tabata necesario. Pues Noe su fe a mov’é na accion. Mescos cu su desendiente Abraham, Noe tabata “plenamente convencí cu loke [Dios] a primintí e por a haci tambe.”—Romanonan 4:21.
16. Segun cu construccion dje arca a progresá, con Noe su fe a bira mas fuerte?
16 Segun cu añanan a pasa i e arca a haña forma, Noe su fe a bira mas fuerte. El a resolvé problemanan di construccion i otro detayenan dje trabou. El a vence pruebanan. Ningun oposicion por a para e trabou. Noe su famia a experenciá Jehova su respaldo i proteccion. Segun cu Noe a sigui padilanti, ‘e calidad probá di su fe a obra awante.’ (Santiago 1:2-4) Finalmente, e arca a keda cla, e Diluvio a bini, i Noe cu su famia a sobrebibí. Noe a mira e promesanan di Dios cumpli, mescos cu Hosué a mira esei mas despues. Noe su fe a ser recompensá.
Jehova Ta Respaldá e Trabou
17. Den ki maneranan nos tempu ta paralelo cu e dianan di Noe?
17 Jesus a pronosticá cu nos tempu lo ta paralelo cu e dianan di Noe. Atrobe Dios a determiná pa destruí e malbadonan i a fiha un tempu pa esaki tuma lugá. (Mateo 24:36-39) Tambe el a haci preparacionnan pa conserbá e hustunan. Noe mester a construí un arca. Sirbidónan di Dios djawe mester proclamá Jehova su propósitonan, siña su Palabra na otronan i haci disipel.—Mateo 28:19.
18, 19. Con nos sa cu e predicacion dje bon nobo tin e respaldo di Jehova?
18 Si Jehova no tabata cu Noe pa apoy’é i sosten’é, e arca lo no a ser construí. (Compará cu Salmo 127:1.) Mescos tambe, sin respaldo di Jehova, cristianismo berdadero lo no tin chens di sobrebibí, i sigur lo no prosperá. Gamaliel, un fariseo respetá i maestro di Ley dje promé siglo, a reconocé esaki. Ora e Sanedrin hudiu kier a caba cu e apostelnan, el a spierta e corte ei: “No mete cu e hendenan aki, ma laga nan; (pasobra, si e proyecto of e trabou aki ta di hende, lo e caba na nada; pero si e ta di Dios, boso lo no por caba cu nan.)”—Echonan 5:38, 39.
19 E éxito dje actividad di predicá, tantu den e promé siglo como awe, a duna prueba cu esaki no ta un trabou di hende, sino di Dios. E siguiente artículo lo trata algun dje circunstancianan i desaroyonan excitante cu a yuda haci e trabou aki asina exitoso riba un escala asina grandi.
Nunca Entregá!
20. Ken ta apoyá nos miéntras nos ta predicá e bon nobo?
20 Aunke nos ta biba den un “tempu crítico, duru pa trata cuné,” nos por ta sigur cu Jehova tin control completo. E ta apoyá i ta sostené su pueblo miéntras nan ta traha pa completá e predicacion dje bon nobo promé cu Dios su tempu señalá pa caba cu e mal sistema di cosnan aki yega. (2 Timoteo 3:1; Mateo 24:14) Jehova ta invitá nos pa ta su “colaboradónan.” (1 Corintionan 3:9) Tambe Bijbel ta sigurá nos cu Cristo Jesus ta cu nos den e trabou aki i cu nos por conta cu apoyo i guia dje angelnan.—Mateo 28:20; Revelacion 14:6.
21. Ki conviccion nos no mester bandoná nunca?
21 Dor cu Noe i su famia a ehercé fe den e promesanan di Jehova, nan a pasa sano i salbo dor dje awanan di Diluvio. Esnan cu ta ehercé un fe similar awe lo pasa sano i salbo dor dje binidero “tribulacion grandi.” (Revelacion 7:14) Nos ta biba den un tempu cu ta berdaderamente excitante. Tin sucesonan di sumo importancia den futuro! Pronto, Dios lo actua pa introducí un glorioso shelu nobo i un tera nobo den cua husticia lo biba. (2 Pedro 3:13) Nunca, nunca bandoná bo conviccion di cu kico cu Dios bisa, e ta capas di haci tambe.—Romanonan 4:21.
Puntonan pa Corda
◻ Pakico Jehova no ta controlá tur detaye di actividad humano?
◻ Con Jehova su abilidad pa cumpli cu su propósito tabata bisto den su trato cu Israel?
◻ Con Jehova su abilidad pa premirá futuro a keda demostrá den dia di Noe?
◻ Ki confiansa nos por tin den e promesanan di Dios?