Capitulo Nuebe

Ken Lo Goberná Mundu?

1-3. Describí e soño i visionnan cu Daniel tabatin den e promé aña dje reinado di Bélsasar.

AWOR Daniel su profecia emocionante ta hiba nos bek na e promé aña dje rey babilónico Bélsasar. Daniel tabatin hopi tempu como exiliado na Babilonia, pero e no a vacilá nunca den su integridad na Jehova. Awor den su setent’i picu aña, e profeta fiel ta contemplá “un soño i visionnan di su cabes riba su cama.” I e visionnan ei sí a spant’é!—Daniel 7:1, 15.

² “Ata!” Daniel ta sclama. “E cuater bientunan di shelu tabata agitá e laman ganchu. I cuater bestia enorme a sali for di laman, cada un distinto for dje otronan.” Esakinan sí ta bestianan extraordinario! Esun promé ta un leon cu ala, i e di dos ta manera un oso. Despues ta bini un leopardo cu cuater ala i cuater cabes! E di cuater bestia, extraordinariamente fuerte, tin djente grandi di heru i dies cachu. Meimei di su dies cachunan ta sali un cachu “chikitu,” cu “wowo manera wowo di hende” i “un boca [cu] ta papia cosnan grandioso.”—Daniel 7:2-8.

³ Despues Daniel su vision ta bira pa shelu. E Anciano di Dianan ta entronisá gloriosamente como Hues den e Tribunal celestial. ‘Tin mil di miles cu ta sigui sirbié, i dies mil bes dies mil cu ta sigui para net su dilanti.’ E ta dicta huicio desfaborabel contra e bestianan, i e ta kita gobernacion for di nan i ta destruí e di cuater bestia. Ta otorgá gobernacion duradero riba “pueblo, grupo nacional i idioma” na “un persona parecido na yu di hende.”—Daniel 7:9-14.

 4. (a) Cerca ken Daniel a busca informacion confiabel? (b) Pakico loke Daniel a mira i a tende e anochi ei ta importante pa nos?

⁴ “Pa loke ta ami,” Daniel ta bisa, “mi spiritu tabata angustiá den mi paden debí na dje, i e visionnan di mi cabes mes a cuminsá spanta mi.” Di manera cu e ta busca “informacion confiabel riba tur esaki” cerca un angel. I e angel en berdad ta dun’é “e interpretacion mes dje asuntunan.” (Daniel 7:15-28) Loke Daniel a mira i a tende e anochi ei ta di gran interes pa nos. Pasobra e ta describí futuro sucesonan mundial cu ta yega te den nos tempu, ora cu duna “un persona parecido na yu di hende” gobernacion riba tur “pueblo, grupo nacional i idioma.” Cu yudansa di Dios su Palabra i su spiritu, nos tambe por comprendé e nificacion dje visionnan profético aki.a

CUATER BESTIA TA SALI FOR DI LAMAN

 5. Kico e laman agitá pa bientu ta simbolisá?

⁵ Segun Daniel, “cuater bestia enorme a sali for di laman.” (Daniel 7:3) Kico e laman agitá pa bientu a simbolisá? Añanan despues, apostel Juan a mira un bestia salbahe di shete cabes sali for di “laman.” E laman ei a representá “pueblo i multitud i nacion i lenga,” esta, e cantidad enorme di hende alehá for di Dios. Pues anto, laman ta un símbolo apropiado dje masanan di humanidad alehá for di Dios.—Revelacion 13:1, 2; 17:15; Isaías 57:20.

 6. Kico e cuater bestianan ta representá?

⁶ E angel di Dios a bisa: “Pa loke ta e bestianan enorme aki, pasobra nan ta cuater, tin cuater rey cu lo lanta for dje tera.” (Daniel 7:17) Ta evidente cu e angel a identificá e cuater bestianan cu Daniel a mira como “cuater rey.” Pues, e bestianan aki ta nificá potencianan mundial. Pero cua?

 7. (a) Kico cierto comentaristanan bíblico ta bisa tocante e vision dje cuater bestianan cu Daniel a haña den soño i rey Nabucodonosor su soño di un imágen inmenso? (b) Kico cada un dje partinan di metal dje imágen ta representá?

⁷ Por lo general, comentaristanan bíblico ta conectá e vision di cuater bestia cu Daniel a haña den soño, cu Nabucodonosor su soño di un imágen inmenso. Por ehempel, The Expositor’s Bible Commentary ta declará: “Capítulo 7 [di Daniel] ta paralelo cu capítulo 2.” The Wycliffe Bible Commentary ta bisa: “En general hende ta di acuerdo cu aki [na Daniel capítulo 7] e seri di cuater dominacion gentil . . . ta mescos cu esun contemplá na [Daniel] capítulo 2.” E cuater potencianan mundial, representá pa e cuater metalnan dje soño di Nabucodonosor, tabata e Imperio Babilónico (cabes di oro), Medo-Persia (pechu i brasanan di plata), Grecia (barica i belnan di koper) i e Imperio Romano (pal’i pianan di heru).b (Daniel 2:32, 33) Laga nos mira con e reinonan aki ta corespondé cu e cuater bestianan enorme cu Daniel a mira.

FEROS MANERA UN LEON, LIHE MANERA AGUILA

 8. (a) Con Daniel a describí e promé bestia? (b) Cua imperio e promé bestia a representá, i di con nos por bisa cu el a actua manera un leon?

⁸ Daniel sí a contemplá bestianan impresionante! El a describí un di nan asina aki: “Esun promé tabata manera un leon, i e tabatin ala di águila. Mi a sigui contemplá te ora a ranca su alanan kita afó, i a his’é for di riba tera, i a pon’é para riba dos pia mescos cu hende, i a dun’é un curason di hende.” (Daniel 7:4) E bestia aki a representá e mésun gobernacion cu e cabes di oro dje imágen inmenso, e Potencia Mundial Babilónico (607-539 P.E.C.). Mescos cu un “leon” devorador, Babilonia a habracá nacionnan ferosmente, incluso e pueblo di Dios. (Jeremías 4:5-7; 50:17) Como si fuera cu ala di águila, e “leon” aki a avansá lihé den gueranan agresivo pa conkistá otro nacion.—Lamentacionnan 4:19; Habacuc 1:6-8.

 9. Ki cambionan e bestia parecido na leon a experenciá, i con esakinan a afect’é?

⁹ Cu tempu, “a ranca” e alanan dje leon único aki kita afó. Poco promé cu fin dje gobernacion di rey Bélsasar, Babilonia a perde su velocidad di conkistá otro nacion i su supremacia parecido na leon cu e tabatin riba nan. E no tabata mas lihé cu un hende riba dos pia. El a ricibí “curason di hende,” i a bira débil. Sin e “curason di leon,” Babilonia no por a comportá su mes mas manera rey “entre e bestianan di un mondi.” (Compará cu 2 Samuel 17:10; Mikéas 5:8.) Un otro bestia enorme a logra domin’é.

HARAGAN MANERA UN OSO

10. Cua liña di gobernante e “oso” a simbolisá?

¹⁰ “Ata!” Daniel a bisa, “un otro bestia, un di dos, e tabata manera un oso. I na un banda e tabata hisá, i tabatin tres repchi den su boca meimei di su djentenan; i esaki ta loke nan a bis’é: ‘Lanta, come hopi carni.’” (Daniel 7:5) E rey cu e “oso” a simbolisá tabata mésun rey cu e pechu i brasanan di plata dje imágen grandi, esta, e liña di gobernantenan di Medo-Persia (539-331 P.E.C.), cu a cuminsá cu Dario e medo i Ciro e Grandi i a terminá cu Dario III.

11. Kico e echo cu e oso tabata hisá na un banda i tabatin tres repchi den su boca a nificá?

¹¹ E oso simbólico tabata ‘hisá na un banda,’ kisas pa ta cla pa atacá i dominá nacionnan i asina mantené poder mundial. Of e posicion aki por tabata pa mustra cu e liña di gobernantenan di Persia lo a adkerí e posicion dominante riba e único rey di Media, Dario. E tres repchinan meimei dje djentenan dje oso por a indicá e tres direccionnan den cua el a pusha bai pa conkistá. E “oso” di Medo-Persia a bai nort pa capturá Babilonia na aña 539 P.E.C. El a bai west, crusa dor di Asia Menor i yega te Tracia. Por último, e “oso” a bai zuid pa conkistá Egipto. Como cu tin biaha e number tres ta simbolisá intensidad, e tres repchinan tambe por ta enfatisá e oso su golosidad simbólico pa conkistá otro nacion.

12. Kico a sosodé dor cu e oso simbólico a obedecé e mandamentu: “Lanta, como hopi carni”?

¹² E “oso” a cuminsá atacá nacionnan ora el a tende e palabranan: “Lanta, come hopi carni.” Dor di devorá Babilonia segun e boluntad divino, Medo-Persia tabata den posicion di rindi un servicio balioso na fabor dje pueblo di Jehova. I el a hacié! (Mira “Un Monarca Tolerante,” na página 149.) Mediante Ciro e Grandi, Dario I (Dario e Grandi) i Artahérhes I, Medo-Persia a libra e prezunan hudiu na Babilonia, i a yuda nan reconstruí e tempel di Jehova i drecha e murayanan di Jerusalem. Cu tempu, Medo-Persia tabata goberná riba 127 distrito hurisdiccional, i Asuero (Hérhes I), esposo di reina Ester, tabata “rey for di India te Etiopia.” (Ester 1:1) Sin embargo, un otro bestia tabata na punto di lanta.

LIHE MANERA UN LEOPARDO CU ALA!

13. (a) Kico e di tres bestia a simbolisá? (b) Kico nos por bisa dje velocidad dje di tres bestia i e teritorio cu el a ocupá?

¹³ E di tres bestia tabata “manera un leopardo, pero riba su lomba e tabatin cuater ala di un criatura cu ta bula. I e bestia tabatin cuater cabes, i en realidad a dun’é gobernacion.” (Daniel 7:6) Mescos cu su ekivalente—e barica i belnan di koper dje imágen dje soño di Nabucodonosor—e leopardo aki cu cuater ala i cuater cabes, a simbolisá e liña di gobernantenan di Macedonia, of Grecia, cuminsando cu Alexander e Grandi. Cu e agilidad i velocidad di un leopardo, Alexander a pasa dor di Asia Menor, bai zuid te den Egipto, i a sigui te n’e frontera west di India. (Compará cu Habacuc 1:8.) Su dominio tabata mas grandi cu di e “oso,” pasobra el a abarcá Macedonia, Grecia i e Imperio di Persia.—Mira “Un Rey Hóben Ta Conkistá Mundu,” na página 153.

14. Den ki manera e “leopardo” a haña cuater cabes?

¹⁴ E “leopardo” a haña cuater cabes despues cu Alexander a muri na aña 323 P.E.C. Cu tempu, cuater di su generalnan a bira su sucesor den diferente seccion di su dominio. Seleuco tabatin Mesopotamia i Siria. Tolomeo a controlá Egipto i Palestina. Lisímaco a goberná riba Asia Menor i Tracia, i Casandro a haña Macedonia i Grecia. (Mira “Ta Parti un Reino Inmenso,” na página 162.) Anto a lanta un menasa nobo.

UN BESTIA SPANTOSO TA RESULTA DI TA DIFERENTE

15. (a) Describí e di cuater bestia. (b) Kico e di cuater bestia a simbolisá, i con el a aplastá i habracá tur loke tabata den su caminda?

¹⁵ Daniel a describí e di cuater bestia como “spantoso i teribel i extraordinariamente fuerte.” El a sigui bisa: “I e tabatin djente grandi di heru. E tabata habracá i aplastá, i loke a keda, e tabata trapa cu su pata. I e tabata diferente for di tur e otro bestianan cu tabata promé cuné, i e tabatin dies cachu.” (Daniel 7:7) E bestia spantoso aki a cuminsá como e potencia político i militar di Roma. Gradualmente el a tuma e cuater divisionnan helenístico dje Imperio Griego over, i pa aña 30 P.E.C., Roma a lanta como e siguiente potencia mundial di profecia bíblico. El a dominá tur cos den su caminda mediante forsa militar, i a lo largu e Imperio Romano a crece i a abarcá un área cu a extendé for dje Islanan Británico, bai abou atrabes di mayor parti di Europa, i tur rond di Mediteráneo, pasa Babilonia bai te na Golfo Pérsico.

16. Ki informacion e angel a duna tocante e di cuater bestia?

¹⁶ Daniel kier a haci sigur dje nificacion dje bestia “extraordinariamente spantoso” aki, i p’esei el a scucha cu atencion ora e angel a splica: “Pa loke ta [su] dies cachunan, for dje reino ei tin dies rey cu lo lanta; i un otro mas lo lanta despues di nan, i e mes lo ta diferente for di e proménan, i lo e humiyá tres rey.” (Daniel 7:19, 20, 24) Kico e “dies cachunan” aki, of “dies rey,” tabata?

17. Kico e “dies cachunan” dje di cuater bestia ta simbolisá?

¹⁷ Segun cu Roma a bira mas ricu i cada bes mas degenerá debí na e bida inmoral di su clase na mando, el a perde forsa como un potencia militar. Cu tempu, a bira masha bisto cu Roma a perde su fortalesa militar, i e poderoso imperio a bin parti den hopi reino. Como cu hopi bes Bijbel ta usa e number dies pa indicá totalidad, e “dies cachunan” dje di cuater bestia ta representá tur e reinonan cu a lanta ora Roma a disolvé.—Compará cu Deuteronomio 4:13; Lucas 15:8; 19:13, 16, 17.

18. Con Roma a sigui ehercé dominio riba Europa pa siglonan despues cu a eliminá su último emperador?

¹⁸ Sin embargo, e Potencia Mundial Romano no a yega na su fin ora a eliminá su último emperador na Roma na aña 476 E.C. Pa hopi siglo, Roma papal a sigui ehercé dominio político, i foral religioso, riba Europa. El a haci esei usando e sistema feudal, caminda mayoria habitante di Europa tabata sometí na un señor, caba na un rey. I tur rey a reconocé e autoridad dje papa. Pues e Santu Imperio Romano, cu Roma papal como su punto central, a dominá e esena mundial durante e periodo largu ei di historia yamá Epoca di Scuridad.

19. Segun un historiadó, con Roma tabata, compará cu e imperionan anterior?

¹⁹ Ken por nenga cu e di cuater bestia tabata “diferente for di tur e otro reinonan”? (Daniel 7:7, 19, 23) Relacioná cu esaki, historiadó H. G. Wells a skirbi: “E potencia romano nobo aki . . . den vários aspecto tabata diferente for dje imperionan grandi cu a prevalecé den e mundu civilisá te cu e tempu ei. . . . [El] a incorporá casi henter e pueblo griego na mundu, i su poblacion tabatin ménos característica dje rasa camítico i semítico compará cu cualkier imperio anterior . . . Te asina leu e tabata un patronchi nobo den historia . . . E Imperio Romano tabata un crecementu, un crecementu nobo cu no tabata planeá; casi sin sa, e pueblo romano a haña su mes enbolbí den un inmenso experimento riba tereno di gobernacion.” Sin embargo, e di cuater bestia lo a crece mas ainda.

UN CACHU CHIKITU TA GANA E POSICION DOMINANTE

20. Kico e angel a bisa dje cachu chikitu cu a sali riba cabes dje di cuater bestia?

²⁰ Daniel a bisa: “Mi a sigui pone atencion n’e cachunan, i, mira! un otro cachu, unu chikitu, a sali meimei di nan, i tabatin tres dje promé cachunan cu nan a ranca kita su dilanti.” (Daniel 7:8) Tocante e cachu nobo aki, e angel a bisa Daniel: “Un otro mas lo lanta despues di nan [e dies reynan], i e mes lo ta diferente for di e proménan, i lo e humiyá tres rey.” (Daniel 7:24) Ken e rey aki ta, na ki tempu el a lanta, i ta cua tres rey el a humiyá?

21. Con Gran Bretania a bira e cachu chikitu simbólico dje di cuater bestia?

²¹ Considerá e siguiente desaroyonan. Na aña 55 P.E.C., general romano Julio César a invadí Britania, pero e no a logra establecé un colonia permanente. Na aña 43 E.C., emperador Claudio a cuminsá cu un conkista mas permanente dje parti zuid di Gran Bretania. Anto, na aña 122 E.C., emperador Adriano a cuminsá construí un muraya for di riu Tyne te na golfo Solway, marcando asina e frontera nort dje Imperio Romano. Na comienso di siglo 5, legionnan romano a bandoná e isla. Segun splicacion di un historiadó: “Den siglo 16, Inglatera tabata un potencia di segundo rango. Su rikesa tabata poco compará cu di Hulanda. Su poblacion tabata hopi ménos cu di Francia. Su forsanan armá (incluso su ehército naval) tabata inferior na di Spaña.” Evidentemente, Gran Bretania e tempu ei tabata un reino insignificante, representando e cachu chikitu simbólico dje di cuater bestia. Pero e situacion ei tabata bai cambia.

22. (a) Cua ta e otro tres cachunan dje di cuater bestia cu e cachu “chikitu” a vence? (b) Como kico Gran Bretania a surgi e ora ei?

²² Na aña 1588, Felipe II di Spaña a lansa e Armada spañó contra Gran Bretania. E flota aki di 130 barcu, cargando mas cu 24.000 homber, a nabegá drenta e Canal Ingles. Pero e resultado final tabata cu el a sufri derota na man dje ehército naval i a bira víctima di bientunan contrali i tormentanan feros for di océano Atlántico. Segun un historiadó, e suceso aki “a marca e traspaso decisivo di superioridad naval for di man di Spaña pa Inglatera.” Den siglo 17, e hulandesnan a desaroyá e flota comercial mas grandi na mundu. Sin embargo, Gran Bretania cu a adkerí mas i mas colonia na otro parti di tera, a prevalecé riba e reino ei. Durante siglo 18, británico i frances a bringa otro na Norteamérica i na India, loke a hiba na e Tratado di Paris na aña 1763. E tratado aki, segun autor William B. Willcox, “a reconocé Gran Bretania su posicion nobo como e potencia europeo predominante den e mundu pafó di Europa.” Gran Bretania su supremacia a ser confirmá cu e victoria aplastante riba Napoleon di Francia na aña 1815 E.C. Pues e ‘tres reynan’ cu Gran Bretania a “humiyá” tabata Spaña, Hulanda i Francia. (Daniel 7:24) Como resultado, Gran Bretania a surgi como e potencia colonial i comercial mas grandi na mundu. Sí, e cachu “chikitu” a crece bira un potencia mundial!

23. Den ki manera e cachu chikitu simbólico a “habracá tur e tera”?

²³ E angel a bisa Daniel cu e di cuater bestia, of di cuater reino, lo “habracá tur e tera.” (Daniel 7:23) Esei a resultá cierto dje provincia romano cu un tempu tabata conocí como Britania. Cu tempu, el a bira e Imperio Británico i a “habracá tur e tera.” Na dado momento, e imperio aki a abarcá un cuart di tereno na mundu i un cuart di mundu su poblacion.

24. Kico un historiadó a bisa dje manera diferente cu e Imperio Británico tabata?

²⁴ Mescos cu e Imperio Romano tabata diferente for di potencianan mundial anterior, asina tambe e rey representá dor dje cachu “chikitu” lo tabata “diferente for di e proménan.” (Daniel 7:24) Relacioná cu e Imperio Británico, historiadó H. G. Wells a remarcá: “Nunca promé no a existí nada semehante. Promé i central den henter e sistema tabata e ‘república cu un monarca na cabes’ dje Reinonan Uní Británico . . . Nunca ningun hende no por a comprendé e Imperio Británico den su totalidad. E tabata un mescla di crecementu i acumulacionnan completamente diferente for di cualkier cos cu hende a yega di yama un imperio.”

25. (a) Den su desaroyo mas recien, kico e cachu chikitu ta consistí di dje? (b) Den ki sentido e cachu “chikitu” tin “wowo manera wowo di hende” i ‘un boca cu ta papia cosnan grandioso’?

²⁵ E cachu “chikitu” a representá mas cu solamente e Imperio Británico. Na aña 1783, Gran Bretania a reconocé e independencia di su 13 colonianan mericano. Cu tempu Estados Unidos di América a bira un aliado di Gran Bretania, i el a surgi for di Guera Mundial II como e nacion dominante di tera. Te ainda e tin lasonan fuerte cu Gran Bretania. E potencia mundial dòbel anglo-americano cu a lanta, ta forma e ‘cachu cu wowo.’ En berdad e potencia mundial aki ta alerto i astuto! E “ta papia cosnan grandioso,” dictando regla pa gran parti di mundu i ta actua como su bocero, of “profeta falsu.”—Daniel 7:8, 11, 20; Revelacion 16:13; 19:20.

E CACHU CHIKITU TA OPONE DIOS I SU SANTUNAN

26. Kico e angel a pronosticá tocante e manera cu e cachu simbólico lo papia i actua pa cu Jehova i su sirbidónan?

²⁶ Daniel a sigui describí su vision, bisando: “Mi a sigui contemplá ora cu e cachu ei mes a haci guera contra e santunan, i e tabata prevalecé contra nan.” (Daniel 7:21) Relacioná cu e “cachu” of rey aki, e angel di Dios a pronosticá: “Lo e papia asta palabra contra e Haltísimo, i lo e hostigá e santunan mes dje Supremo continuamente. I lo e tin intencion di cambia tempu i ley, i lo duna nan den su man pa un tempu, i tempunan i mitar tempu.” (Daniel 7:25) Con i na ki tempu e parti aki dje profecia a cumpli?

27. (a) Ken ta “e santunan” persiguí dor dje cachu “chikitu”? (b) Den ki manera e cachu simbólico tabatin intencion di “cambia tempu i ley”?

²⁷ “E santunan” persiguí dor dje cachu “chikitu”—e Potencia Mundial Anglo-Americano—ta Jesus su siguidónan ungí cu spiritu cu ta riba tera. (Romanonan 1:7; 1 Pedro 2:9) Pa hopi aña promé cu Guera Mundial I, e resto dje ungínan aki a spierta públicamente cu aña 1914 lo ta e conclusion di “e tempu señalá dje nacionnan.” (Lucas 21:24) Ora guera a cuminsá e aña ei, tabata bisto cu e cachu “chikitu” a ignorá e spiertamentu aki, pasobra el a persistí den hostigá e “santunan” ungí. E Potencia Mundial Anglo-Americano a asta oponé nan esfuersonan pa cumpli cu e rekisito (of, “ley”) di Jehova, esta, cu su testigonan tin cu predicá e bon nobo di Reino mundialmente. (Mateo 24:14) Asina e cachu “chikitu” a purba “cambia tempu i ley.”

28. Con largu e “tempu, i tempunan i mitar tempu” ta?

²⁸ E angel di Jehova a referí na un periodo profético di “un tempu, i tempunan i mitar tempu.” Con largu esei ta? Por lo general comentaristanan bíblico ta di acuerdo cu e expresion aki ta indicá tres tempu i mitar—e suma total di un tempu, dos tempu i mitar tempu. Como cu Nabucodonosor su “shete tempu” di locura a suma shete aña, e tres tempu i mitar ta tres aña i mei.c (Daniel 4:16, 25) An American Translation ta bisa: “Lo entregá nan na dje pa un aña, dos aña i mitar aña.” E version di James Moffatt ta bisa: “Pa tres aña i mitar aña.” Revelacion 11:2-7 ta mencioná e mésun periodo, i ei e ta declará cu e testigonan di Dios lo a predicá bistí cu paña di sacu pa 42 luna, of 1.260 dia, i caba ser matá. Na ki tempu e periodo aki a cuminsá i a terminá?

29. Na ki tempu i con e tres aña i mei profético a cuminsá?

²⁹ Pa e cristiannan ungí, Guera Mundial I a nificá un tempu di prueba. Na fin di 1914, nan tabata verwagt di haña persecucion. De echo, e texto di aña mes cu nan a scoge pa 1915 tabata e pregunta cu Jesus a haci su disipelnan: “Boso lo por bebe di mi copa?” E tabata basá riba Mateo 20:22, King James Version. P’esei, cuminsando na december 1914, e grupo chikitu ei di testigo a predicá “bistí cu paña di sacu.”

30. Den ki manera e Potencia Mundial Anglo-Americano a hostigá e cristiannan ungí durante Guera Mundial I?

³⁰ Segun cu e keintura di guera a subi, e cristiannan ungí a topa cu mas oposicion. Algun di nan a ser encarcelá. Algun individuo manera Frank Platt na Inglatera i Robert Clegg na Cánada, a ser torturá dor di autoridadnan sadista. Dia 12 di februari 1918, e Dominio Británico di Cánada a prohibí e recien publicá volúmen shete di Studies in the Scriptures, titulá The Finished Mystery (E Misterio Terminá), i tambe e tratadonan titulá The Bible Students Monthly (Mensuario dje Studiantenan di Bijbel). E siguiente luna, Departamento di Husticia Mericano a declará distribucion di volúmen shete ilegal. E resultado? Wel, nan a listra cas, a confiscá literatura i a arestá adoradónan di Jehova!

31. Na ki tempu i con e “tempu, i tempunan i mitar tempu” a terminá?

³¹ E hostigamentu dje ungínan di Dios a culminá dia 21 di juni 1918, ora cu a base di acusacionnan falsu, a sentenciá e presidente, J. F. Rutherford, i miembronan prominente di Watch Tower Bible and Tract Society, na castigunan largu di prizon. Cu e intencion di “cambia tempu i ley,” e cachu “chikitu” a logra mata e trabou organisá di predicá. (Revelacion 11:7) Asina e periodo profetisá di “un tempu, i tempunan i mitar tempu” a terminá na juni 1918.

32. Di con lo bo bisa cu e cachu “chikitu” no a destruí “e santunan”?

³² Pero e hostigamentu dje cachu “chikitu” no a destruí “e santunan.” Manera e buki di Revelacion a profetisá, despues di un periodo corticu di inactividad, e cristiannan ungí a bolbe na bida i nan a bira activo atrobe. (Revelacion 11:11-13) Dia 26 di mart 1919, nan a laga e presidente di Watch Tower Bible and Tract Society i su socionan sali for di prizon, i despues a exonerá nan di tur e acusacionnan falsu contra nan. Mesora despues di esaki, e resto ungí a cuminsá reorganisá nan mes pa mas actividad. Sin embargo, kico tabata spera e cachu “chikitu”?

E ANCIANO DI DIANAN TA TENE UN SESION DI CORTE

33. (a) Ken ta e Anciano di Dianan? (b) Kico tabata e “bukinan cu a habri” den e Tribunal celestial?

³³ Despues di introducí e cuater bestianan, Daniel ta kita su bista for dje di cuater bestia pa wak un esena den shelu. E ta contemplá e Anciano di Dianan tuma asiento riba su trono resplandeciente como Hues. E Anciano di Dianan no ta ningun otro sino Jehova Dios. (Salmo 90:2) Ora e Tribunal celestial tuma asiento, Daniel ta mira ‘bukinan habri.’ (Daniel 7:9, 10) Ya cu Jehova su existencia ta bai te den e pasado infinito, e conocé henter e historia humano como si fuera e ta pará skirbí den un buki. El a observá tur e cuater bestianan simbólico i por dicta sentencia riba nan segun loke e sa di nan personalmente.

34, 35. Kico lo sosodé cu e cachu “chikitu” i otro potencianan bestial?

³⁴ Daniel ta sigui bisa: “E ora ei mi a sigui contemplá debí n’e zonido dje palabranan grandioso cu e cachu tabata papia; mi a sigui contemplá te ora cu a mata e bestia i a destruí su curpa i a entregu’é na e candela ardiente. Pero pa loke ta e resto dje bestianan, a kita nan gobernacion, i a alargá nan bida pa un tempu i un temporada.” (Daniel 7:11, 12) E angel ta bisa Daniel: “E Tribunal a sinta, i finalmente nan a kita su propio gobernacion, pa elimin’é i destruyé completamente.”—Daniel 7:26.

³⁵ Pa medio di decreto dje Gran Hues, Jehova Dios, e cachu cu a blasfemá Dios i a hostigá su “santunan” lo pasa den e mésun experencia cu e Imperio Romano, cu a persiguí e promé cristiannan. Su gobernacion lo no sigui. Ni tampoco e gobernacion dje “reynan” inferior parecido na cachu, cu a sali for dje Imperio Romano. Sin embargo, kico dje gobernacionnan cu a sali for dje potencianan bestial anterior? Manera a ser pronosticá, a alargá nan bida “pa un tempu i un temporada.” Nan teritorio a keda cu habitante te na nos dia. Por ehempel, Irak ta ocupá e teritorio di antiguo Babilonia. Persia (Iran) i Grecia ta existí te ainda. Tin resto dje potencianan mundial aki cu ta parti di Nacionnan Uní. E reinonan aki tambe lo caba n’e mésun tempu cu destruccion dje último potencia mundial. Na e “guera dje gran dia di Dios e Todopoderoso” lo destruí tur gobiernu humano totalmente. (Revelacion 16:14, 16) Pero, ta ken lo goberná mundu e ora ei?

GOBERNACION DURADERO DJIS AKI!

36, 37. (a) “Un persona parecido na yu di hende” ta referí na ken, i na ki tempu i cu ki propósito el a aparecé den e Tribunal celestial? (b) Kico a keda establecí na aña 1914 E.C.?

³⁶ “Mi a sigui contemplá den e visionnan djanochi, i, ata!” Daniel a sclama. “Cu nubia di shelu a sosodé cu un persona parecido na yu di hende tabata bini; i el a obtené acceso n’e Anciano di Dianan, i nan a hib’é cerca, sí, dilanti Dje.” (Daniel 7:13) Ora Jesucristo tabata riba tera, el a yama su mes “e Yu di hende,” i a indicá asina su relacion cu humanidad. (Mateo 16:13; 25:31) Jesus a bisa e Sanedrin, of corte superior hudiu: “Boso lo mira e Yu di hende sintá na e man drechi di poder i biniendo riba nubia di shelu.” (Mateo 26:64) Pues den e vision di Daniel, esun cu ta bini—invisibel pa bista di hende, i cu ta haña acceso cerca Jehova Dios—tabata Jesucristo resucitá i glorificá. Na ki tempu esaki a sosodé?

³⁷ Dios a cera un pacto pa un Reino cu Jesucristo, mescos cu el a cera unu cu rey David. (2 Samuel 7:11-16; Lucas 22:28-30) Ora “e tempu señalá dje nacionnan” a terminá na aña 1914 E.C., Jesucristo, como heredero real di David, por a ricibí e gobernacion di Reino legítimamente. E registro profético di Daniel ta bisa: “A dun’é gobernacion i dignidad i reino, pa pueblo, grupo nacional i idioma tur sirbi asta e. Su gobernacion ta un gobernacion di duracion indefiní cu lo no pasa bai, i su reino ta unu cu lo no ser reducí na ruina.” (Daniel 7:14) Pues e Reino Mesiánico a keda establecí den shelu na 1914. Sin embargo, tin otronan tambe cu ta ricibí gobernacion.

38, 39. Ken lo ricibí gobernacion eterno riba mundu?

³⁸ “E santunan dje Supremo lo ricibí e reino,” e angel a bisa. (Daniel 7:18, 22, 27) Jesucristo ta e santu principal. (Echonan 3:14; 4:27, 30) E otro “santunan” cu ta participá den e gobernacion ta e 144.000 fiel cristiannan ungí cu spiritu, kendenan ta heredero di Reino huntu cu Cristo. (Romanonan 1:7; 8:17; 2 Tesalonicensenan 1:5; 1 Pedro 2:9) Ta resucitá nan for di morto como spiritu inmortal pa reina huntu cu Cristo den Ceru di Síon celestial. (Revelacion 2:10; 14:1; 20:6) Pues, Cristo Jesus i e cristiannan ungí resucitá lo goberná mundu di humanidad.

³⁹ Relacioná cu e gobernacion di e Yu di hende i e otro “santunan” resucitá, e angel di Dios a bisa: “A duna e pueblo cu ta e santunan dje Supremo e reino i gobernacion i grandesa dje reinonan bou di henter shelu. Nan reino ta un reino di duracion indefiní, i tur gobernacion lo sirbi i obedecé asta nan.” (Daniel 7:27) Humanidad obediente lo experenciá bendicionnan grandi bou dje Reino ei!

40. Con nos por beneficiá dor di presta atencion na e soño i visionnan di Daniel?

⁴⁰ Daniel no tabata sa di tur e cumplimentunan maraviyoso dje visionnan cu Dios a dun’é. E di: “Te na e punto aki ta final dje asuntu. Pa loke ta ami, Daniel, mi mes pensamentunan a sigui spanta mi mashá, di manera cu color di mi cara mes a cambia; pero e asuntu mes mi a warda den mi mes curason.” (Daniel 7:28) Nos, sin embargo, ta biba den e tempu cu nos por comprendé cumplimentu di loke Daniel a mira. Si nos presta atencion n’e profecia aki, nos fe lo bira mas fuerte i nos conviccion di cu e Rey Mesiánico di Jehova lo goberná mundu, lo crece.

[Nota]

KICO BO A SACA AFO?

• Kico cada un dje ‘cuater bestianan enorme cu a sali for di laman’ a simbolisá?

• Kico e cachu “chikitu” ta consistí di dje?

• Den ki manera e cachu chikitu simbólico a hostigá “e santunan” durante Guera Mundial I?

• Kico lo sosodé cu e cachu chikitu simbólico i e otro potencianan bestial?

• Con bo a beneficiá dor di presta atencion na Daniel su soño i visionnan di “cuater bestia enorme”?

[Kuadro/Plachi na página 149-152]

UN MONARCA TOLERANTE

UN ESCRITOR griego di siglo 5 P.E.C. a cord’é como un monarca tolerante i ideal. Bijbel ta yam’é Dios “su ungí” i “un para yagdó” cu ta bini “for di caminda solo ta sali.” (Isaías 45:1; 46:11) E monarca en cuestion ta Ciro e Grandi di Persia.

Ciro su marcha na fama a cuminsá rond di aña 560 pa 559 P.E.C., ora el a sigui su tata Cambises I riba trono di Anshan, un stad of region di antiguo Persia. E tempu ei Anshan tabata sometí n’e rey di Media, Astiages. Ciro a lanta contra e gobernacion di Media, i a gana un victoria fácil, debí cu e ehército di Astiages a desertá bai na lado di Ciro. E ora ei Ciro a gana e lealtad dje medonan. Despues di esei, medo i personanan a bringa uní bou di su liderato. Asina e gobernacion di Medo-Persia a bini na existencia, i cu tempu nan dominacion a extendé for di laman Egeo te na riu Indo.​—Mira e mapa.

Cu e forsanan combiná dje medo i personan, Ciro a actua promé cu tur cos pa establecé control riba un área problemático: e sector na west di Media caminda rey Creso di Lidia tabata expandé su dominio den teritorio di Media. Avansando te n’e frontera oriental dje Imperio Lidio na Asia Menor, Ciro a derotá Creso i a capturá su capital, Sárdis. Despues Ciro a dominá e stadnan jónico i a anexá henter Asia Menor n’e teritorio dje Imperio di Medo-Persia. Asina el a bira e rival principal di Babilonia i di su rey, Nabonido.

Despues Ciro a prepará pa confrontá e poderoso Babilonia. I desde e punto aki padilanti, el a desempeñá un papel den cumplimentu di profecia bíblico. Casi dos siglo promé, mediante profeta Isaías, Jehova a mencioná Ciro como e gobernante cu lo a derotá Babilonia i libra e hudiunan for di sclabitud. Ta debí cu a haci e nombramentu aki di antemano cu e Scritura ta referí na Ciro como Jehova “su ungí.”​—Isaías 44:​26-28.

Ora Ciro a bini contra Babilonia na aña 539 P.E.C., el a enfrentá un tarea formidabel. E stad a parce invencibel, ya cu e tabata rondoná dor di murayanan inmenso i un rooi di awa hundu i hanchu formá dor di riu Eufrátes. Caminda Eufrátes tabata pasa dor di Babilonia, tabatin un muraya haltísimo, cu portanan di koper enorme, a lo largu di oriya dje riu. Ta con Ciro por a conkistá Babilonia?

Mas cu un siglo promé, Jehova a pronosticá “un devastacion riba su awanan” i a bisa cu “nan tin cu seca.” (Jeremías 50:38) Manera a ser profetisá, a sosodé. Un par di kilometer nort di Babilonia, Ciro a desviá e awanan di riu Eufrátes. Anto su ehército a baha den fondo dje riu, a subi e subida cu a hiba n’e muraya i a drenta e stad fácilmente pasobra nan a laga e portanan di koper habrí. Mescos cu “un para yagdó” cu ta baha velosmente riba su víctima, asina e gobernante aki “for di caminda solo ta sali”​—esta, for di oost​—a capturá Babilonia den un solo anochi!

Pa e hudiunan na Babilonia, e victoria di Ciro a nificá cu por fin e liberacion tan sperá for di cautiverio a yega i cu e 70 añanan pa nan patria keda desolá, a terminá. Esta emocioná nan mester tabata ora Ciro a saca un proclamacion cu a autorisá nan pa regresá Jerusalem i reconstruí e tempel! Tambe Ciro a debolbé e precioso artículonan di uso di tempel cu Nabucodonosor a hiba Babilonia, el a duna permiso real pa importá palu for di Líbanon i a autorisá pa usa fondonan dje cas real pa cubri gastunan di construccion.​—Esdras 1:​1-11; 6:​3-5.

Por lo general Ciro a sigui un política humanitario i tolerante ora di trata cu e pueblonan cu el a conkistá. Un motibu pa esaki por tabata su religion. Probablemente Ciro a sigui e siñansanan dje profeta perso Zoroaster i a adorá Ahura Mazda, un dios cu nan a kere tabata creador di tur loke ta bon. Den su buki The Zoroastrian Tradition, Farhang Mehr ta skirbi: “Zoroaster a presentá Dios como perfeccion moral. El a bisa hende cu Ahura Mazda no ta vengativo sino hustu i, p’esei, no mester tem’é sino stim’é.” Podisé creencia den un dios moral i hustu a influenciá Ciro su ética i a stimul’é pa ta generoso i hustu.

Sin embargo, e rey no por a soportá e clima di Babilonia mashá. E zomernan cayente tabata di mas p’e. Pues, maske Babilonia a keda un stad real dje imperio, i tambe e centro cultural i religioso, por lo general el a us’é solamente como su capital di winter. De echo, djis despues di a conkistá Babilonia, Ciro a regresá na su capital di zomer, Ecbátana, situá un 1.900 meter riba nivel di laman, na pia di ceru Elvend. Einan, e winternan friu balansá cu dushi zomer, tabata mas na su agrado. Tambe Ciro a construí un palacio elegante na su capital anterior, Pasargada (cerca di Persépolis), un 650 kilometer zuidoost di Ecbátana. E residencia ei a sirbi como un refugio p’e.

Asina Ciro a laga su marca como un conkistadó balente i un monarca tolerante. Su gobernacion di 30 aña a terminá ora el a muri na aña 530 P.E.C., durante un campaña militar. Su yu Cambises II a siguié riba trono di Persia.

KICO BO A SACA AFO?

• Con Ciro e perso a resultá di ta Jehova “su ungí”?

• Ki servicio balioso Ciro a rindi pa cu Jehova su pueblo?

• Con Ciro a trata e pueblonan cu el a conkistá?

[Mapa]

(Pa e teksto den su formato kompleto, wak e publikashon)

IMPERIO DI MEDO-PERSIA

MACEDONIA

Mémfis

EGIPTO

ETIOPIA

Jerusalem

Babilonia

Ecbátana

Susa

Persépolis

INDIA

[Plachi]

Graf di Ciro, na Pasargada

[Plachi]

Relieve na e palacio di Ciro na Pasargada

[Kuadro/Plachi na página 153-161]

UN REY HOBEN TA CONKISTA MUNDU

UN 2.300 aña pasá, un general militar, cabei blond di bint’i picu aña, tabata pará cantu di laman Mediteráneo. Su wowonan tabata fihá riba un stad insular casi un kilometer leu. Dor cu nan a nenga di lagu’e drenta, e general rabiá tabata decididu na conkistá e stad. Su plan di atake? Construí un caretera elevá te na e isla i mobilisá su trupanan contra e stad. Construccion dje caretera elevá tabata andando caba.

Pero un mensahe for di un gran rey dje Imperio Perso a interumpí e general hóben su pensamentu. E gobernante perso, ansioso pa cera pas, a haci un oferta extraordinario: 10.000 talento di oro (mas cu dos mil miyon dollar na balor actual), man di un dje yu muhernan dje rey i dominio riba henter e parti west dje Imperio Perso. Tur esaki a cambio di famia dje rey, cu e general a capturá.

E comandante cu a confrontá e decision di aceptá of rechasá e oferta tabata Alexander III di Macedonia. E mester a aceptá e oferta? Segun historiadó Ulrich Wilcken: “Tabata un momento decisivo pa e mundu antiguo. Bon mirá, e repercusionnan di su decision ta extendé atrabes di Edad Medio i yega te den nos tempu, den Oost i tambe den West.” Promé cu nos considerá Alexander su contesta, laga nos wak ki sucesonan a hiba n’e momento crucial aki.

FORMACION DI UN CONKISTADO

Alexander a nace na Pella, Macedonia, na aña 356 P.E.C. Su tata tabata rey Filipo II, i su mama, Olimpia. Alexander su mama a siñ’é cu reynan di Macedonia a bini di Hércules, yu dje dios griego Zeus. Segun Olimpia, Aquiles, héroe dje poema Iliad di Homero, tabata antepasado di Alexander. Asina su mayornan a condicion’é pa logra conkista i alcansá gloria real. P’esei, e hóben Alexander tabatin masha poco interes den otro actividad. Ora nan a puntr’é si e kier a core den Weganan Olímpico, Alexander a laga sa cu lo el a hacié si ta contra otro reynan lo el a core. Su ambicion tabata pa efectuá obranan mas grandi cu esnan di su tata i haña gloria cu e logronan.

Na edad di 13 aña, Alexander a haña les privá cerca e filósofo griego Aristóteles, kende a yud’é desaroyá un interes den filosofia, medicina i ciencia. Eruditonan a debatí hopi riba e asuntu di te na ki grado Aristóteles su siñansanan filosófico a forma e manera di pensa di Alexander. Bertrand Russell, un filósofo di siglo 20, a remarcá: “Nos lo por bisa cu casi sigur no tabatin hopi cos cu nan tabata di acuerdo cu otro. Aristóteles su punto di bista político tabata basá riba e sistema griego di stad autónomo, cu tabata disparciendo.” E concepto di gobiernu chikitu di un stad autónomo lo no a atraé un prins ambicioso cu kier a construí un imperio grandi centralisá. Tambe Alexander lo mester tabata sképtico pa cu e regla di Aristóteles pa trata hende no-griego como catibu, ya cu e sí a visualisá un imperio caminda tabatin un bon asociacion entre e conkistadónan i esnan conkistá.

Sin embargo, casi no tin duda cu Aristóteles a cultivá Alexander su interes pa lesa i siña. Alexander a keda un gran lesadó henter su bida, i a stima foral e obranan di Homero. Nan ta bisa cu el a siña tur e 15.693 liñanan dje poema Iliad for di su cabes.

Na aña 340 P.E.C., e educacion na man di Aristóteles a yega na un final abrupto ora cu e prins di 16 aña a bai Pella bek pa goberná Macedonia den ausencia di su tata. I e príncipe heredero no a perde tempu pa destacá den hazañanan militar. P’e deleite di Filipo, el a dominá e tribu rebelde maedi di Tracia hopi lihé, i cu un atake rápido a conkistá nan stad principal i a yama e lugá na su nomber, Alexandroúpolis.

E TA SIGUI CONKISTÁ

E asesinato di Filipo na aña 336 P.E.C. a pone cu Alexander ta heredá e trono di Macedonia na edad di 20 aña. Alexander a drenta Asia na Helesponto (awor Dardanelos) den primavera di aña 334 P.E.C., i el a cuminsá un campaña di conkista cu un ehército chikitu pero eficiente di 30.000 soldá na pia i 5.000 riba cabai. Ingeniero, topógrafo, arkitecto, científico i historiadó a compañá su ehército.

Na riu Gránico den e skina nortwest di Asia Menor (awor Turkia), Alexander a gana su promé bataya contra e personan. E winter ei, el a conkistá e parti west di Asia Menor. E siguiente otoño, e di dos bataya decisivo contra Persia a tuma lugá na e yanura di Isos, na e skina zuidoost di Asia Menor. E gran rey perso Dario III, a bini einan pa topa Alexander cu un ehército di un mei miyon homber. Dario, demasiado confiá, a trece su mama, su esposa i otro miembronan di su famia tambe, pa nan por tabata testigo di loke lo mester a bira un victoria espectacular. Pero e personan no tabata prepará pa e atake repentino i intenso dje macedonionan. E forsanan di Alexander a duna e ehército perso un derota aplastante, i Dario a hui bai laga su famia den man di Alexander.

En bes di persiguí e personan cu a bati retirada, Alexander a marcha bai zuid a lo largu dje costa Mediteráneo, i a conkistá e basenan cu e poderoso flota perso tabata usa. Pero e stad insular di Tiro a resistí invasion. Decididu pa conkist’é, Alexander a siti’é pa shete luna. Durante e sitiamentu, el a haña Dario su oferta di pas, mencioná anteriormente. E concesionnan tabata asina atractivo cu segun informe, Parmenio, Alexander su consehero di confiansa, a bisa: ‘Si ami tabata Alexander, lo mi a aceptá.’ Pero e general hóben a contestá bek: ‘Mi tambe lo a hacié, si mi tabata Parmenio.’ Alexander a nenga di negoshá, i a sigui sitia Tiro i a destruí e orguyoso doña di laman na juli 332 P.E.C.

Alexander a spar Jerusalem cu a capitulá na dje, i a sigui bai zuid, conkistando Gaza. Cansá di gobernacion perso, Egipto a ricibié como un libertadó. Na Mémfis el a ofrecé sacrificio na e toro Apis, i asina a agradá e sacerdotenan egipcio. Tambe el a funda e stad di Alexandria, cu despues a bira un rival di Aténas como centro di educacion i cu te ainda ta carga e nomber ei.

Despues, Alexander a bira bai nortoost, i a pasa dor di Palestina den direccion di riu Tígris. Na aña 331 P.E.C., el a hañ’é den e di tres bataya grandi contra e personan, na Gaugamela, no hopi leu for dje ruinanan di Nínive. Aki e 47.000 hombernan di Alexander a dominá un ehército perso reorganisá di por lo ménos 250.000 homber! Dario a hui i despues su mes hendenan a asesin’é.

Briyando cu victoria, Alexander a bira bai zuid i a conkistá Babilonia, e capital perso di winter. Tambe el a ocupá e capitalnan Susa i Persépolis, i a coge e inmenso tesoro perso i a kima e gran palacio di Hérhes. Por último, e capital na Ecbátana a cai den su man. E ora ei e conkistadó velos aki a dominá e resto dje teritorio perso, bayendo oost te na riu Indo, cu awe ta situá den Pakistan.

Despues di a crusa riu Indo, den e region cu ta na frontera dje provincia perso, Taxila, Alexander a topa un rival imponente, e monarca indio Poro. Contra Poro, Alexander a bringa su di cuater i último bataya grandi, na juni aña 326 P.E.C. E ehército di Poro tabatin, entre otro, 35.000 soldá i 200 olefante, cu a spanta e cabainan macedonio mashá. E bataya tabata feros i sangriente, pero e forsanan di Alexander a prevalecé. Poro a capitulá i a bira un aliado.

Mas cu ocho aña a pasa desde cu e ehército macedonio a crusa drenta Asia, i e soldánan tabata cansá i tabatin heimwee. Nan a keda perturbá dje bataya feros contra Poro, i kier a bai cas bek. Maske na promé instante Alexander no tabatin masha gana, el a cumpli cu nan deseo. Di berdad Grecia a bira un potencia mundial. A establecé colonianan griego den e paisnan conkistá, i asina e idioma i cultura griego a plama den henter su dominio.

E HOMBER TRAS DJE ESCUDO

Loke a tene e ehército macedonio huntu atrabes dje añanan di conkista, tabata e personalidad di Alexander. Despues di bataya, tabata Alexander su custumber di bishitá e heridonan, examiná nan heridanan, elogiá soldánan pa nan actonan di balentia i onra nan cu un donacion di acuerdo cu loke nan a presta. Pa esnan cu a muri den bataya, Alexander tabata tene un entiero espléndido. E mayornan i yunan dje hombernan cu a muri, tabata librá di tur belasting i forma di servicio. Como diberticion despues di bataya, Alexander tabata organisá wega i competencianan. Na un ocasion, el a asta haci areglo pa hombernan recien casá bai cu verlof, i asina pasa winter cu nan esposa, na Macedonia. Cosnan asina a pone cu el a gana e cariño i admiracion di su hombernan.

Relacioná cu Alexander su matrimonio cu princesa Roxana di Bactriana, e biógrafo griego, Plutarco, ta skirbi: “Esei tabata en berdad un caso di amor. Sin embargo, na mésun tempu esei a parce di contribuí n’e meta cu e tabatin. Pasobra e pueblo conkistá a keda contentu di mir’é scoge un esposa for di entre nan, i nan a sinti un cariño masha intenso p’e ora nan a descubrí cu é, un dje hombernan mas sobrio, a reprimí e único pasion cu a domin’é, te ora e por a haña [Roxana] na un manera legal i onorabel.”

Tambe Alexander a respetá matrimonio di otro hende. Maske e esposa di rey Dario tabata su prizonero, el a soru pa nan trat’é onorablemente. Asina tambe, ora el a haña sa cu dos soldá macedonio a abusá di esposa di algun stranhero, el a manda pa ehecutá nan si nan resultá di ta culpabel.

Mescos cu su mama, Olimpia, Alexander tabata masha religioso. E tabata ofrecé sacrificio promé i despues di bataya i tabata consultá su adivinadónan relacioná cu e nificacion di cierto señalnan. Tambe el a consultá e oráculo di Amon, na Libia. I na Babilonia el a efectuá e instruccionnan dje caldeonan relacioná cu sacrificio, foral na e dios babilónico Bel (Marduk).

Aunke Alexander tabata moderá den su comementu, cu tempu el a entregá na demasiado bebementu. E tabata papia masha largu riba cada copa di biña i tabata broma di su logronan. Un dje actonan mas baho di Alexander tabata e asesinato di su amigu Clito, den un atake di rabia ora e tabata burachi. Pero Alexander a condená su mes asina tantu, cu pa tres dia e no a lanta for di cama, ni no a come ni bebe. Finalmente, su amigunan a logra convenc’é pa come.

Segun tempu a pasa, Alexander su anhelo intenso pa gloria a saca otro rasgonan indeseabel na cla. El a cuminsá kere acusacionnan falsu unbes i tabata duna castigu masha severo. Por ehempel, dor cu nan a lagu’e kere cu Filotas tabata implicá den un atentado contra su bida, Alexander a laga ehecutá e i su tata, Parmenio, un tempu su consehero di confiansa.

ALEXANDER SU DEROTA

Djis despues cu el a regresá Babilonia, Alexander a bira víctima di keintura di malaria, for di cua e no a recuperá nunca. Dia 13 di juni 323 P.E.C., na edad di solamente 32 aña i 8 luna, Alexander a capitulá n’e enemigu di mas grandi, morto.

Ta manera cierto sabionan indio a remarcá: “O rey Alexander, cada hende ta poseé djis un pida tera manera esun aki cu nos ta pará ariba; i abo siendo un hende mescos cu otro hende​—excepto p’e echo cu bo ta yen di actividad i implacabel​—ta pasa rond riba henter e tera aki, leu di bo cas, sufriendo i poniendo otro hende sufri. Pero djis aki lo bo muri, i lo bo poseé solamente e pida tera cu mester pa dera bo.”

KICO BO A SACA AFO?

• Kico tabata e antecedente di Alexander e Grandi?

• Ki campaña Alexander a cuminsá djis despues cu el a heredá e trono di Macedonia?

• Describí algun di Alexander su conkistanan.

• Kico nos por bisa di Alexander su personalidad?

[Mapa]

(Pa e teksto den su formato kompleto, wak e publikashon)

CONKISTANAN DI ALEXANDER

MACEDONIA

EGIPTO

Babilonia

Riu Indo

[Plachi]

Alexander

[Plachi]

Aristóteles i su alumno Alexander

[Plachi di henter página]

[Plachi]

Medayon supuestamente cu cara di Alexander e Grandi

[Kuadro/Plachi na página 162, 163]

TA PARTI UN REINO INMENSO

BIJBEL a pronosticá, relacioná cu e reino di Alexander e Grandi, cu lo e kibra i ser partí “pero no na su desendencia.” (Daniel 11:​3, 4) I asina mes a pasa. Denter di 14 aña despues di Alexander su morto repentino na aña 323 P.E.C., nan a asesiná su yu legítimo Alexander IV i su yu ilegítimo Herácles.

Pa aña 301 P.E.C., cuater dje generalnan di Alexander a tuma poder como gobernante den e inmenso imperio cu nan comandante a construí. General Casandro a tuma control di Macedonia i Grecia. General Lisímaco a haña Asia Menor i Tracia. Mesopotamia i Siria a bai pa Seleuco I Nicátor. Anto Tolomeo Lago, of Tolomeo I, a goberná riba Egipto i Palestina. Pues for di Alexander su imperio grandi a sali cuater reino helenístico of griego.

Dje cuater reinonan helenístico, Casandro su gobernacion a resultá di ta esun mas corticu. Un par di aña despues cu Casandro a bini na poder, su desendencia masculino a muri caba na nada, i na aña 285 P.E.C., Lisímaco a tuma posesion dje parti europeo dje Imperio Griego. Cuater aña despues, Lisímaco a muri den bataya contra Seleuco I Nicátor, dunand’e asina control riba e parti principal dje teritorionan asiático. Seleuco a bira e promé dje dinastia di reynan seléucido na Siria. El a funda Antiokia na Siria i a hacié su capital nobo. Nan a asesiná Seleuco na aña 281 P.E.C., pero e dinastia cu el a establecé a sigui na poder te cu aña 64 P.E.C., ora cu general romano Pompeyo a haci Siria un provincia di Roma.

Dje cuater divisionnan dje imperio di Alexander, e reino tolemaico a dura mas largu. Tolomeo I a tuma e título di rey na aña 305 P.E.C., i a bira e promé rey, of fárao, macedonio di Egipto. El a haci Alexandria e capital, i a cuminsá mesora cu un programa di desaroyo urbano. Un di su proyectonan di construccion mas grandi tabata e famoso Biblioteca Alexandrino. Pa supervisá e proyecto magnífico aki, Tolomeo a trece for di Grecia un erudito renombrá di Aténas, Demetrio Falereo. Segun informe, pa promé siglo E.C., e biblioteca tabatin un miyon rol. E dinastia tolemaico a sigui goberná na Egipto te ora el a cai den man di Roma na aña 30 P.E.C. N’e tempu ei Roma a reemplasá Grecia como e potencia mundial dominante.

KICO BO A SACA AFO?

• Con e inmenso imperio di Alexander a ser partí?

• Te na ki tempu e dinastia di reynan seléucido a sigui goberná na Siria?

• Na ki tempu e reino tolemaico di Egipto a yega na su fin?

[Mapa]

(Pa e teksto den su formato kompleto, wak e publikashon)

KIEBRO DJE IMPERIO DI ALEXANDER

Casandro

Lisímaco

Tolomeo I

Seleuco I

[Plachi]

Tolomeo I

Seleuco I

[Diagram/Plachi na página 139]

(Pa e teksto den su formato kompleto, wak e publikashon)

POTENCIANAN MUNDIAL DI DANIEL SU PROFECIA

E imágen inmenso (Daniel 2:31-45)

Cuater bestia for di laman (Daniel 7:3-8, 17, 25)

BABILONIA for di 607 P.E.C.

MEDO-PERSIA for di 539 P.E.C.

GRECIA for di 331 P.E.C.

ROMA for di 30 P.E.C.

POTENCIA MUNDIAL ANGLO- AMERICANO for di 1763 E.C.

MUNDU DIVIDI POLITICAMENTE den tempu di fin

[Plachi di henter página 128]

[Plachi di henter página 147]