Siñá Pa Jehova Te N’e Tempu Aki
“Jehova mes a duná mi e lenga di esnan siñá.”—ISAIAS 50:4.
1, 2. (a) Pa ki propósito Jehova a prepará su alumno faborito, i kico tabata e resultado? (b) Con Jesus a duna reconocimentu n’e Fuente di su siñansanan?
JEHOVA DIOS tabata un Maestro for di tempu cu el a bira un Tata. Algun tempu despues cu cierto di su yunan a rebelá, el a prepará su alumno faborito, su Primogénito, pa un ministerio riba tera. (Proverbionan 8:30) Isaías capítulo 50 proféticamente ta presentá e alumno aki bisando: “Señor Soberano Jehova mes a duná mi e lenga di esnan siñá, pa mi por sa con pa contestá esun cansá cu un palabra.” (Isaías 50:4) Como resultado di aplicá e siñansa di su Tata tempu cu e tabata riba tera, Jesus tabata un fuente di refrescamentu pa tur esnan cu tabata ‘cansá i cargá.’—Mateo 11:28-30.
2 Jesus a efectuá hopi obra poderoso durante e promé siglo. El a habri wowo dje ciegunan i asta a lanta e mortonan, tog e tabata principalmente conocí pa su contemporáneonan como un maestro. Su siguidornan i tambe su opositornan a yam’é un maestro. (Mateo 8:19; 9:11; 12:38; 19:16; Juan 3:2) Jesus nunca a busca mérito pa loke el a siña sino a reconocé humildemente: “Loke mi ta siña no ta di mi, sino ta pertenecé na esun cu a mandá mi.” “Net manera e Tata a siñá mi, mi ta papia e cosnan aki.”—Juan 7:16; 8:28; 12:49.
Relacion Ideal Entre Maestro i Alumno
3. Con e profecia di Isaías ta indicá Jehova su interes den esnan kende e ta siña?
3 Un maestro excelente ta mustra interes personal, conciencial i amoroso den su alumnonan. Isaías capítulo 50 ta revelá cu Jehova Dios tin e clase di interes ei den esnan cu e ta siña. “E ta spierta di mainta pa mainta,” e profecia ta señalá, “e ta spierta mi orea pa tende manera esnan siñá.” (Isaías 50:4) E idioma aki ta duna idea di un instructor cu ta spierta su alumnonan mainta trempan pa por siña nan. Comentando riba e aplicacion dje profecia, un escolástico di Bijbel a bisa: “E idea ta, cu e Redentor lo ta . . . unu cu tabata, na moda di papia, den e scol di Dios; i cu ta cualificá pa impartí instruccion na otronan. . . . E Mesías lo ta eminentemente cualificá, dor di siñansa Divino, pa ser e instructor di humanidad.”
4. Con Jesus a reaccioná n’e siñansa di su Tata?
4 Den un situacion ideal, alumnonan ta cla pa respondé n’e siñansa di nan instructor. Con Jesus a reaccioná n’e siñansa di su Tata? Su reaccion tabata na armonia cu loke nos ta lesa na Isaías 50:5: “Señor Soberano Jehova mes a habri mi orea, i ami, di mi parti, no tabata rebelde. Mi no a bira den e direccion contrali.” Sí, Jesus tabata ansioso pa siña. E tabata un scuchador atento. Mas cu esei, e tabata dispuesto pa haci cualkier cos cu su Tata a pidié. E no tabata rebelde; mas bien, el a bisa: “Laga, no mi boluntad, sino di bo tuma lugá.”—Lucas 22:42.
5. (a) Kico ta indicá cu Jesus tabata sa delantá dje pruebanan cu lo el a sufri riba tera? (b) Con e profecia na Isaías 50:6 a ser cumplí?
5 E profecia ta indicá cu e Yu a ser informá dje posibel consecuencianan di su hacimentu dje boluntad di Dios. Esaki ta ser mustrá dor di loke esun siñá ta bisa: “Mi a entregá mi lomba n’e golpeadornan, i mi banda di cara na esnan cu ta ranca mi cabei kita afó. Mi no a sconde mi cara for di cosnan humiyante i di scupi.” (Isaías 50:6) Manera e profecia ta indicá, Jesus a ser tratá cruelmente riba tera. “Nan a scupi den su cara,” apostel Mateo a skirbi. “Otronan a dal’e boftá den cara.” (Mateo 26:67) Esaki a sosodé na man dje lidernan religioso riba e anochi di Pascu di 33 E.C. E siguiente dia Jesus a entregá su lomba n’e golpeadornan, ora e soldatnan romano a batié sin misericordia promé cu nan a cologu’é riba un staca p’e muri.—Juan 19:1-3, 16-23.
6. Kico ta mustra cu Jesus nunca a perde confiansa den su Maestro, i con su confiansa a ser recompensá?
6 E Yu, bon educá di antemano, nunca a perde confiansa den su Maestro. Esaki ta ser demostrá dor di loke e ta bisa siguientemente segun e profecia: “Señor Soberano Jehova mes lo yudá mi. P’esei lo mi no tin cu sintí mi humiyá.” (Isaías 50:7) Jesus su confiansa den e yudansa di su Maestro a ser recompensá ricamente. Su Tata a hals’é, bendicionand’e cu un posicion superior riba esun di tur otro sirbidor di Dios. (Filipensenan 2:5-11) Gran bendicionnan ta spera nos tambe si nos ta pega obedientemente na Jehova su siñansa i no ta “bira den e direccion contrali.” Laga nos mira con e siñansa ei a ser hací disponibel te den nos tempu.
Un Programa Extenso di Siñansa
7. Con Jehova a hiba a cabo su siñansa riba tera?
7 Manera a ser mencioná anteriormente, Jehova a usa su Representante terenal, Jesucristo, pa cumpli cu siñansa divino durante e promé siglo. (Juan 16:27, 28) Jesus constantemente a señalá n’e Palabra di Dios como e autoridad pa su siñansa, poniendo e ehempel pa esnan cu el a siña. (Mateo 4:4, 7, 10; 21:13; 26:24, 31) Despues di esei, Jehova su siñansa a ser hibá a cabo riba tera pa medio dje ministerio di tal personanan siñá. Corda cu Jesus a manda nan: “P’esei, bai i haci disipel di hende di tur nacion, . . . siñando nan pa warda tur loke mi a manda boso.” (Mateo 28:19, 20) Ora nan a haci disipel di hende, esakinan a bira parti dje “cas di Dios, . . . e congregacion dje Dios bibu.” (1 Timoteo 3:15) Tambe nan a ser formá den congregacionnan individual den cua nan a ser siñá pa Jehova. (Echonan 14:23; 15:41; 16:5; 1 Corintionan 11:16) Siñansa divino den e manera ei a sigui te den nos tempu?
8. Con Jesus a indicá cu e trabou di predicacion lo ser organisá i dirigí riba tera promé cu e fin yega?
8 Siguramente cu sí! Tres dia promé cu su morto, Jesus a profetisá cu promé cu e fin dje sistema di cosnan aki, lo tin un gran trabou di predicacion. “E bon nobo aki dje reino lo ser predicá den tur e tera habitá como testimonio pa tur nacion,” el a bisa, “anto e fin lo yega.” Jesus a pasa na describí e instrumento mediante cua e predicacion mundial i programa di siñansa aki lo ser organisá i dirigí. El a papia di “e esclabo fiel i discreto” cu lo sirbi como un canal, of agencia, pa percurá alimento spiritual na Su sirbidornan. (Mateo 24:14, 45-47) Jehova Dios a usa e “esclabo” aki pa supervisá interesnan di Reino na tur parti dje tera.
9. Ken ta componé e esclabo fiel i discreto?
9 Awe, e esclabo fiel i discreto ta consistí dje resto di herederonan di Reino. Esakinan ta cristiannan ungí, e resto riba tera dje 144.000, cu ta “pertenecé na Cristo” i cu ta parti dje “simia di Abraham.” (Galationan 3:16, 29; Revelacion 14:1-3) Con bo por identificá e esclabo fiel i discreto? Particularmente dor dje trabou cu nan ta haci i dor di nan pegamentu estrecho n’e Palabra di Dios, e Bijbel.
10. Ki publicacionnan ta ser usá dor dje clase di esclabo pa promové Jehova su siñansanan?
10 Jehova ta usa e “esclabo” aki como su agencia pa siña su pueblo awe. Esnan dje clase di esclabo a adoptá e nomber Testigonan di Jehova na 1931. For dje tempu ei miyones di hende a asociá cu nan i a aceptá e nomber ei i a uni den e proclamacion dje Reino di Dios. E revista aki, E Toren di Vigilancia Anunciando e Reino di Jehova, ta e instrumento principal cu e “esclabo” ta utilisá den e trabou di siñamentu. Sin embargo, otro publicacionnan tambe ta ser usá, incluyendo buki, foyeto chikitu i grandi, tratado i e revista Spierta!
11. Cua scolnan e “esclabo” a patrociná, i ki propósito cada un dje scolnan aki ta sirbi?
11 Ademas, e “esclabo” ta patrociná vários scol. Esakinan ta incluí e Scol Bíblico di Watchtower di Galad, cua ta un curso di cincu luna cu ta prepará ministernan hóben pa sirbishi di misionero den estranheria, i e curso di dos luna dje Scol pa Entrenamentu Ministerial, cu ta entrená ancianonan i sirbidornan ministerial soltero pa asignacionnan teocrático special. Tambe tin e Scol di Ministerio di Reino, den cua ancianonan cristian i sirbidornan ministerial periódicamente ta ser instruí den nan responsabilidadnan di congregacion, i e Scol di Sirbishi di Pionero, cu ta ekipá evangelisadornan di tempu completo pa bira mas eficas den nan actividad di predicá.
12. Cua ta un rasgo semanal dje programa di siñansa?
12 Un otro rasgo dje programa di siñansa ta e cincu reunionnan semanal cu ta ser tené den mas cu 75.500 congregacion di Jehova su pueblo rond mundu. Bo ta beneficiá tantu cu ta posibel for dje reunionnan aki? Dor di presta atencion n’e instruccion cu ta ser duná, bo ta mustra cu bo realmente ta kere cu, den un sentido figurativo, bo ta den e scol di Dios? Bo progreso spiritual ta hacié bisto pa otronan cu bo tin “e lenga di esnan siñá”?—Isaías 50:4; 1 Timoteo 4:15, 16.
Siñá n’e Reunionnan di Congregacion
13. (a) Cua ta un manera importante cu Jehova ta siña su pueblo awe? (b) Con nos por mustra nos aprecio p’e E Toren di Vigilancia?
13 Jehova ta siña su pueblo particularmente pa medio di un studio semanal di Bijbel, usando E Toren di Vigilancia como un yudansa di siñansa. Bo ta mira e reunion aki como un lugá unda bo por ser siñá pa Jehova? Aunke Isaías 50:4 ta aplicá na promé lugá na Jesus, e por aplicá tambe na tur esnan cu ta probechá dje provisionnan di Dios pa ricibí “e lenga di esnan siñá.” Un manera cu bo por mustra cu bo ta duna balor na E Toren di Vigilancia ta dor di lesa cada edicion mas pronto posibel despues cu bo ricibié. Anto, ora E Toren di Vigilancia ta ser studiá den e congregacion, bo por mustra bo aprecio na Jehova dor di ser presente i tambe dor di ser prepará pa haci un declaracion público di bo speransa.—Hebreonan 10:23.
14. (a) Pakico dunamentu di comentario na reunionnan ta un privilegio asina importante? (b) Ki clase di comentario duná dor di hobencitonan ta mas animador?
14 Bo ta apreciá cu dor di bo comentarionan n’e reunionnan, bo por participá den Jehova su gran programa di siñansa? No cabe duda, comentando na reunionnan ta un manera importante cu nos por incitá un e otro “na amor i na obranan excelente.” (Hebreonan 10:24, 25) Muchanan tambe por participá den e programa di instruccion aki? Sí, nan por. Comentarionan sincero dor di esnan hóben hopi biaha ta un animacion pa esnan mas grandi. Na algun ocasion, esnan mas nobo na nos reunionnan a ser motivá dor dje comentarionan di muchanan pa interesá mas seriamente den e berdad di Bijbel. Algun hobencito ta hacié un custumber pa lesa nan comentarionan directamente for dje paragraf of ripití loke un adulto ta fluister den nan orea. Sin embargo, ta mas animador ora nan comentarionan ta bon prepará. Comentando asina berdaderamente ta trece onor na nos Gran Instructor i su programa elevá di siñansa.—Isaías 30:20, 21.
15. Kico mayornan por haci pa yuda nan yunan comentá mas eficasmente?
15 Ta un goso pa mira muchanan cu kier participá den alabá nos Dios. Jesus a apreciá expresionnan di alabansa for di hóbennan. (Mateo 21:15, 16) Un anciano cristian ta comentá: “Ora mi tabata mucha, mi kier a comentá n’e Studio di Toren di Vigilancia. Despues di yudá mi prepará un comentario, mi tata tabata rekerí pa mi practicá e comentario por lo ménos siete bes.” Posiblemente durante boso studio di Bijbel como famia, boso lo por yuda boso yunan prepará comentarionan den nan mes palabra riba paragrafnan selectá den E Toren di Vigilancia. Yuda nan apreciá e gran privilegio cu nan tin di participá den Jehova su programa di siñansa.
16. Kico tabata e beneficio dje Scol di Ministerio Teocrático, i ken por inscribí nan mes den e scol aki?
16 Mester duna consideracion serio tambe n’e siñansa na otro reunionnan cristian, tantu esnan cu tin e privilegio di duna e informacion como esnan cu ta scucha n’e instruccion cu ta ser presentá. Pa mas cu 50 aña awor, Jehova a usa e Scol di Ministerio Teocrático semanal pa entrená miyones di hende homber i muher pa presentá e mensahe di Reino mas eficasmente. Esnan cu ta asociá activamente cu e congregacion por inscribí nan mes, incluyendo personanan cu recientemente a cuminsá asistí n’e reunionnan, tanten cu nan ta hibando un bida cu ta na armonia cu principionan cristian.
17. (a) Pa ki propósito en particular e Reunion Público a ser establecí? (b) Kico ta cosnan cu oradornan público mester tene na mente?
17 Un otro rasgo dje programa di siñansa cu ta existí pa hopi tempu ta e Reunion Público. Manera su nomber ta indicá, e reunion aki a ser establecé particularmente pa familiarisá hende cu no ta Testigo cu siñansanan básico di Bijbel. Pues, esun cu ta duna e discurso mester presentá e informacion di un manera cu e ta comprendibel pa esnan cu ta scucha e mensahe pa promé biaha. Esaki ta nificá splica términonan manera “otro carnénan,” “rumannan,” i “resto,” términonan cu esnan cu no ta Testigo kisas no ta comprendé. Siendo cu hende cu ta asistí n’e Reunion Público por tin creencia of un estilo di bida cu ta hopi diferente for dje Scritura—aunke aceptabel den e comunidad djawe—semper e orador mester usa tacto i nunca ridiculisá tal creencia of estilo di bida.—Compará cu 1 Corintionan 9:19-23.
18. Ki otro reunionnan semanal di congregacion tin, i ki propósito nan ta sirbi?
18 E Studio di Buki di Congregacion ta un reunion den cua publicacionnan prepará bou dje direccion dje esclabo fiel i discreto ta ser studiá tur siman huntu cu e Bijbel. E buki Revelacion—su gran culminacion ta cerca! ta esun cu actualmente ta ser studiá den hopi pais. E Reunion di Sirbishi ta diseñá pa ekipá Jehova su pueblo pa tene un participacion completo den e predicacion dje bon nobo di Reino i pa haci disipel.—Mateo 28:19, 20; Marco 13:10.
Siñá na Reunionnan Mas Grandi
19. Pa cua reunionnan mas grandi e “esclabo” ta haci areglo cada aña?
19 Pa mas cu cien aña, e ‘esclabo fiel’ a haci areglo pa congresonan i asambleanan p’e siñansa i animacion special di cristiannan berdadero. Tres dje reunionnan mas grandi ei ta ser tené awor cada aña. Tin e asamblea di un dia cu ta ser bishitá dor di un grupo di congregacionnan cu ta forma un circuito. Durante e aña, cada circuito tin tambe un reunion di dos dia yamá un asamblea di circuito. Ademas, tin un reunion cu ta ser yamá un congreso di districto, na cua un cantidad di circuito ta asistí. Cada tantu aña por tin congresonan internacional. E reunionnan grandi aki cu Testigonan bishitante for di hopi pais ta berdaderamente fortalecedor di fe pa Jehova su pueblo!—Compará cu Deuteronomio 16:16.
20. Kico a ser enfatisá consistentemente na reunionnan mas grandi di Testigonan di Jehova?
20 Na 1922, ora aproximadamente 10.000 persona a reuní na Cedar Point, Ohio, Merca, e delegadonan a ser inspirá dor dje orador su animacion: “Esaki ta e dia di mayor importancia. Mira, e Rey ta reina! Boso ta su agentenan di publicidad. P’esei, anunciá, anunciá anunciá, e Rey i su reino.” Tal congresonan grandi consistentemente a pone énfasis riba e trabou di predicacion. Por ehempel, n’e congreso internacional n’e stad di New York na 1953, anuncio a ser hací tocante e institucion di un programa di entrenamentu di cas-pa-cas den tur congregacion. Su implementacion tabatin un efecto masha positivo riba e predicacion di Reino den hopi pais.
Siñá pa Dios pa Siña Otronan
21. Ki privilegio nos kier aceptá, sin hera su propósito?
21 Siguramente, Jehova tin un maraviyoso programa di siñansa riba tera awe! Tur persona cu ta saca probecho di dje por ser siñá pa Dios, sí, por ta entre esnan cu a ser duná “e lenga di esnan siñá.” Ki un privilegio pa ta, na moda di papia, den e scol di Dios! Sin embargo, ora di aceptá e privilegio aki, nos no mester hera su propósito. Jehova a siña Jesus di manera cu e por a siña otronan, i Jesus a siña su disipelnan di manera cu nan por a haci e mésun trabou cu e tabata haciendo pero riba un escala asta mas grandi. Di igual manera, nos ta ser entrená den Jehova su magnífico programa di siñansa cu e propósito pa siña otronan.—Juan 6:45; 14:12; 2 Corintionan 5:20, 21; 6:1; 2 Timoteo 2:2.
22. (a) Ki problema Moises i Jeremías tabatin, pero con esaki a ser resolvé? (b) Ki siguransa nos por tin cu Dios lo percurá p’e predicacion di Reino ser realisá?
22 Bo ta bisa, mescos cu Moises, “Mi no ta un persona cu ta papia cu fluides,” of manera Jeremías a bisa, “Realmente mi no sa con pa papia”? Jehova lo yudá bo mescos cu el a yuda nan. “Lo mi resultá di ta cu bo boca,” el a bisa Moises. I na Jeremías el a bisa: “No tene miedu . . . mi ta cu bo.” (Exodo 4:10-12; Jeremías 1:6-8) Ora lidernan religioso kier a silenciá Jesus su disipelnan, el a bisa: “Si esakinan keda ketu, e piedranan lo sclama.” (Lucas 19:40) Pero e piedranan no tabatin cu sclama e tempu ei, ni nan no tin nodi sclama awor pasobra Jehova ta usando e lenga di esnan cu e ta siña pa hiba su mensahe di Reino.
Con Bo Ta Contestá?
◻ Ki relacion ideal entre Maestro i alumno ta ser resaltá den Isaías capítulo 50?
◻ Con Jehova a hiba a cabo un programa extensivo di siñansa?
◻ Cua ta algun rasgo di Jehova su programa di siñansa?
◻ Pakico ta un privilegio maraviyoso pa participá den Jehova su programa di siñansa?
[Plachi na página 16]
Comentarionan sincero dor di muchanan hopi biaha ta un animacion pa esnan mas grandi