Nan A Haci e Boluntad di Jehova
Felipe Ta Bautisá un Funcionario Etiopio
CORIENDO den su garoshi, un etiopio tabata usando su tempu sabiamente. E tabata lesando na bos haltu—un custumber comun entre biaheronan di promé siglo. E homber en particular aki tabata un funcionario “cu poder bou di Candace, reina dje etiopionan.”a E tabata “riba tur su tesoro”—eigenlijk, e tabata un minister di finansa. E funcionario aki tabata lesando for dje Palabra di Dios afin di adkerí conocimentu.—Echonan 8:27, 28.
Felipe, e evangelisador, tabata ei cerca. Un angel a dirigié n’e sitio aki, i awor e angel a bis’é: “Yega cerca i uní bo cu e garoshi aki.” (Echonan 8:26, 29) Nos por imaginá nos con Felipe ta puntrando su mes, ‘Ken e homber aki ta? Kico e ta lesando? Pakico mi a ser dirigí na dje?’
Segun cu Felipe a core banda dje garoshi, el a tende e etiopio lesa e palabranan aki: “Manera un carné el a ser hibá pa mata, i manera un lamchi cu ta muda dilanti su pelador, asina e no ta habri su boca. Durante su humiyacion e huicio a ser kitá for di dje. Ken lo conta e detayenan di su generacion? Pasobra su bida ta ser kitá for dje tera.”—Echonan 8:32, 33.
Inmediatamente Felipe a reconocé e pasashi. Esei tabata for dje skirbimentu di Isaías. (Isaías 53:7, 8) E etiopio a keda confundí pa loke e tabata lesando. Felipe a cuminsá un combersacion dor di puntr’é: “Berdaderamente bo sa loke bo ta lesando?” E etiopio a contestá: “Realmente, con lo mi por haci esei, aménos cu un hende guiá mi?” Anto el a suplicá Felipe pa subi den su garoshi huntu cuné.—Echonan 8:30, 31.
“Kico Ta Prevení Mi di Ser Bautisá?”
“Mi ta rogá bo,” e etiopio a bisa Felipe, “di ken e profeta ta bisa esaki? Di su mes of di un otro hende?” (Echonan 8:34) E confusion dje etiopio no tabata sorprendente, pasobra e identidad dje “carné,” of “sirbidor,” dje profecia di Isaías pa hopi tempu tabata un misterio. (Isaías 53:11) Con cla esaki mester tabata ora Felipe a declará n’e etiopio “e bon nobo tocante Jesus”! Despues di un ratu e etiopio a bisa: “Mira! Ata aki tin awa; kico ta prevení mi di ser bautisá?” Asina Felipe a bautis’é mesora ei nan mes.—Echonan 8:35-38.
Esaki tabata un acto hací den purá? Absolutamente cu no! E etiopio tabata un prosélito hudiu.b Pues e tabata un adorador di Jehova caba cu un conocimentu dje Scritura, incluyendo e profecianan Mesiánico. Sin embargo, su conocimentu tabata incompleto. Awor cu el a ricibí e informacion vital aki en cuanto e papel di Jesucristo, e etiopio a comprendé loke Dios a rekerí di dje i e tabata cla pa cumpli cuné. Bautismo tabata apropiado.—Mateo 28:18-20; 1 Pedro 3:21.
Despues di esei, “e spiritu di Jehova rápidamente a hiba Felipe for djei.” El a pasa pa un otro asignacion. E etiopio “a sigui su caminda alegrando.”—Echonan 8:39, 40.
Les pa Nos
Como sirbidornan di Jehova di tempu actual, nos tin un obligacion di yuda personanan di curason sincero pa siña e berdad dje Palabra di Dios. Hopi ruman tabatin éxito presentando e bon nobo na otronan segun cu nan ta biahando of den otro circunstancianan informal. Como resultado dje trabou di predicacion di Reino, tur aña cientos di miles ta simbolisá nan dedicacion na Jehova Dios cu bautismo.
Naturalmente, no mester pura esnan mas nobo pa bautisá. Promé nan mester adkerí conocimentu exacto di Jehova Dios i di su Yu, Jesucristo. (Juan 17:3) Despues nan tin cu repentí, bandonando mal conducta i birando bek pa asina conformá nan mes na e normanan di Dios. (Echonan 3:19) Esaki ta tuma tempu, specialmente si mal pensamentu i conducta tabatin rais profundo. Aunke esnan nobo mester calculá e gastu di ser un disipel cristian, un relacion dedicá cu Jehova Dios ta hiba na bendicionnan grandi. (Compará cu Lucas 9:23; 14:25-33.) Esnan cu ta Testigo di Jehova entusiásticamente ta dirigí hende nobo asina n’e organisacion cu Dios ta usando pa realisá su boluntad. (Mateo 24:45-47) Mescos cu e etiopio, esnan nobo aki lo alegrá di siña tocante loke Dios ta rekerí di nan i di cumpli cu e rekisitonan ei.
[Nota]
a “Candace” no ta un nomber sino un título (mescos cu “Fárao” i “César”) cu a aplicá na un sucesion di reinanan etiopio.
b Prosélito tabata hende no-israelita cu a scoge pa tene nan mes na e Ley di Moises.—Levítico 24:22.
[Kuadro na página 8]
Pakico Yamá un Eunuco?
Henter e relato di Echonan capítulo 8 ta referí n’e etiopio como un “eunuco.” Sin embargo, siendo cu e Ley di Moises no a admití homber castrá den e congregacion, e homber aki evidentemente no tabata un eunuco den sentido literal. (Deuteronomio 23:1) E palabra griego pa “eunuco” por referí na un persona den un funcion haltu. Pues, e etiopio tabata un funcionario bou dje reina di Etiopia.