Jesus—E Gobernante “Kende Su Origen Ta Desde Tempunan Trempan”

BO EMOCIONNAN ta crece mas i mas segun cu bo ta warda yegada di un pariente cu bo tin hopi tempu sin mira. Por fin bo ta top’é i bo ta salud’é calurosamente. Cu atencion bo ta scucha segun cu e ta contá bo pakico su tata a mand’é hací bo un bishita. Anto e tempu p’e regresá cas ta yega masha lihé. Cu tristesa bo ta yam’é ayó. E bashí cu bo ta sinti despues cu el a bai, ta mengua ora bo haña noticia cu el a yega bon.

Despues ora bo ta pasa dor di documentonan bieu, bo ta contra cu cartanan cu brevemente ta mencioná logronan di bo pariente, hopi promé cu el a iniciá su biahe pa bin bishitá bo. Loke e cartanan ei ta conta ta duná bo un bista interesante di su antecedente i ta aumentá bo aprecio pa tantu su bishita como pa su trabou actual.

“Desde Tempunan Trempan”

Entre e documentonan bieu cu e hudiunan dje promé siglo tabatin na nan disposicion, tabatin loke e profeta di Dios, Mikéas, a skirbi un sheteshen aña promé. E palabranan aki a señalá n’e lugá di nacementu dje Mesías. “Abo, O Betlehem Efrata, esun demasiado chikitu pa ta entre e miles di Huda, for di bo lo sali pa mi esun cu lo ta gobernante den Israel, kende su orígen ta desde tempunan trempan, desde e dianan di tempu indefiní.” (Mikéas 5:2) Na cumplimentu dje palabranan ei, Jesus a nace den e pueblo di Hudea, Betlehem, n’e aña cu awor ta ser yamá 2 P.E.C. Pero ta con bin su orígen tabata “desde tempunan trempan”?

Jesus tabatin un existencia prehumano. Den su carta na e cristiannan na Colósas, apostel Pablo a describí Jesus como “e imágen di e Dios invisibel, e primogénito di tur creacion.”—Colosensenan 1:15.

Jehova, e Fuente di sabiduria, a crea su promé Yu como su ‘logro di mas trempan,’ pa usa e expresion inspirá cu Sálomon a registrá den e buki di Proverbionan. Despues di Jesus su estadia temporal riba tera i cu el a regresá shelu, el a duna testimonio cu en berdad e tabata “e principio dje creacion di Dios.” Como sabiduria personificá, e Jesus prehumano a declará: “Ora [Jehova] a prepará shelu, mi tabata ei.”—Proverbionan 8:22, 23, 27; Revelacion 3:14.

Desde principio e Yu di Dios a ricibí un asignacion único, esun di ser un “obrero maestro” na lado di su Tata. Ki goso esaki a trece pa Jehova! Proverbionan 8:30 ta bisa: “Mi a yega di ta esun pa ken e [Jehova] tabatin cariño special dia tras dia,” i Proverbionan ta sigui bisa, “mi tabata alegre dilanti dje tur ora.”

Despues Jehova a invitá su Yu Primogénito pa participá den e creacion di humanidad. El a declará: “Laga nos traha hende den nos imágen, segun nos semehansa.” (Génesis 1:26) Como resultado, un otro sintimentu di cariño a desaroyá. “E cosnan cu ami tabatin cariño p’e,” e Jesus prehumano a splica, “tabata e yunan di hende.” (Proverbionan 8:31) Na principio di su Evangelio, apostel Juan a duna reconocimentu na Jesus su papel prehumano den e creacion: “Tur cos a yega di existí pa medio di dje, i sin e ni sikiera un cos a yega di existí.”—Juan 1:3.

Jehova Su Bocero

Juan su palabranan ta hala atencion na un otro privilegio cu e Yu di Dios a disfrutá di dje, esta, esun di bocero. Desde principio el a sirbi como e Palabra. P’esei, ora Jehova a papia cu Adam, i despues ora el a dirigí palabra na Adam cu Eva huntu, probablemente el a haci esaki mediante e Palabra. I ken ta den e mihó posicion pa expresá instruccionnan di Jehova pa bienestar di humanidad, cu esun cu tin cariño pa hende?—Juan 1:1, 2.

Ki un pena e mester tabata p’e Palabra mira Eva i despues Adam desobedecé nan Creador! I cuantu e mester a anhelá pa remediá e cosnan malu cu nan desobedencia a trece riba nan desendencia! (Génesis 2:15-17; 3:6, 8; Romanonan 5:12) Dirigiendo su mes na Satanas, cu a animá Eva pa rebelá, Jehova a declará: “Lo mi pone enemistad entre abo i e muher i entre bo simia i su simia.” (Génesis 3:15) Dor cu e tabata testigo di loke a pasa den Eden, e Palabra a realisá cu como e parti principal dje “simia” dje muher, e lo a bira e blanco di odio cruel. E tabata sa cu Satanas tabata un matadó.—Juan 8:44.

Despues ora Satanas a cuestioná e integridad di fiel Job, e Palabra mester a sinti rabia debí n’e acusacionnan calumniador cu e Diabel a lansa contra su Tata. (Job 1:6-10; 2:1-4) Sí, den su rol como arcangel, e Palabra tabata conocí como Miguel. Esaki ta nificá “Ken Ta Manera Jehova?” i ta indicá con e ta defendé Jehova contra tur persona cu ta aspirá pa usurpá Dios su soberania.—Daniel 12:1; Revelacion 12:7-10.

Atrabes dje historia di Israel, e Palabra a observá Satanas su intentonan pa kita hende for di adoracion puru. Despues dje Exodo for di Egipto, Dios a bisa e pueblo di Israel mediante Moises: “Ata mi ta bai manda un angel bo dilanti pa mantené bo riba e caminda i trecé bo n’e lugá cu mi a prepará. Cuida bo mes pa su causa i obedecé su bos. No comportá bo rebelde contra dje, pasobra lo e no pordoná boso transgresion; pasobra mi nomber ta den dje.” (Exodo 23:20, 21) Ken e angel aki tabata? Probablemente Jesus prehumano.

Sumision Fiel

Moises a muri na aña 1473 P.E.C. i su curpa a ser derá “den e vaye den e tera di Moab enfrente di Bet-peor.” (Deuteronomio 34:5, 6) Ta parce cu Satanas kier a usa e cadaver, kisas pa promové idolatria. Aunke Miguel a oponé esaki, el a someté su mes n’e autoridad di su Tata, Jehova. ‘Sin tribi di husga Satanas cu zundramentu,’ Miguel a spierta Satanas: “Jehova reprendé bo.”—Hudas 9.

Siguientemente Israel a cuminsá conkistá e Tera Primintí di Canan. Cerca e stad di Jérico, Hosué a bolbe haña siguransa cu e Palabra tabata supervisá e nacion continuamente. Ei el a topa un homber cu un spada sacá. Hosué a cana bai cerca e homber desconocí i a puntra: “Bo ta na nos banda of na esun di nos adversarionan?” Imaginá bo Hosué su sorpresa ora e homber a revelá su identidad bisando: “No, pero ami—como prins dje ehército di Jehova mi a bini awor.” Nada straño cu Hosué a cai abou cu su cara na tera, dilanti e representante elevá aki di Jehova, sin duda Jesus prehumano cu despues lo a bira “Mesías e Lider.”—Hosué 5:13-15; Daniel 9:25.

Den e dianan di profeta Daniel, un otro confrontacion cu Satanas a tuma lugá. Na e ocasion aki, Miguel a bin apoyá un otro angel ora e demoño, prins di Persia, ‘a para den oposicion’ pa tres siman. E angel a splica: “Mira! Miguel, un dje prinsnan prominente, a bin yudá mi; i ami, di mi parti, a keda einan na banda dje reynan di Persia.”—Daniel 10:13, 21.

Gloria Prehumano i Humano

Na aña 778 P.E.C., e aña cu Uzías, rey di Huda, a muri, Dios su profeta Isaías a haña un vision di Jehova riba su trono elevá. “Ken lo mi manda, i ken lo bai pa nos?” Jehova a puntra. Isaías a ofrecé su mes como boluntario, pero Jehova a spiert’é cu e israelitanan lo no respondé na su declaracionnan. Apostel Juan a compará e hudiunan incrédulo dje promé siglo cu e pueblo den tempu di Isaías, i el a skirbi: “Isaías a bisa e cosnan aki pasobra el a mira su gloria.” Ken su gloria? E gloria di Jehova i di Jesus prehumano na su lado den cortenan celestial.—Isaías 6:1, 8-10; Juan 12:37-41.

Algun siglo despues, Jesus a haña un asignacion cu, te cu e tempu ei, tabata esun di mas grandi. Jehova a transferí e forsa di bida di su Yu stimá for di shelu pa e matris di Maria. Nuebe luna despues Maria a duna lus na un yu homber, Jesus. (Lucas 2:1-7, 21) Segun e palabranan di apostel Pablo: “Ora e límite completo dje tempu a yega, Dios a manda su Yu, cu a yega di ta for di un muher.” (Galationan 4:4) Apostel Juan a reconocé e mésun cos: “E Palabra a bira carni i a biba meimei di nos, i nos a haña bista di su gloria, un gloria manera ta pertenecé na un yu unigénito di un tata; i e tabata yen di bondad inmerecí i berdad.”—Juan 1:14.

Mesías Ta Aparecé

Di mas tardá, pa ora e tabatin 12 aña, e hóben Jesus a bin comprendé cu e tin cu ocupá su mes cu e asuntunan di su Tata celestial. (Lucas 2:48, 49) Un 18 aña despues, Jesus a yega cerca Juan Bautista n’e Riu Jordan, i Juan a bautis’é. Ora Jesus tabata haciendo oracion, shelu a habri, i spiritu santu a baha riba dje. Imaginá bo e avalancha di recuerdonan cu a bini na su mente segun cu el recordá e milenionan incontabel cu el a sirbi na lado di su Tata como obrero maestro, bocero, prins dje ehército di Dios i como e arcangel Miguel. Despues a bini e excitacion di tende e bos di su Tata bisa Juan Bautista: “Esaki ta mi Yu, esun stimá, kende mi a aprobá.”—Mateo 3:16, 17; Lucas 3:21, 22.

Juan Bautista no a duda niun tiki cu Jesus tabatin un existencia prehumano. Ora Jesus a acerk’é, Juan a declará: “Mira, e Lamchi di Dios cu ta kita picá di mundu!” I el a agregá: “Esaki ta esun di ken mi a bisa: Mi tras ta bini un homber cu a pasa mi dilanti, pasobra el a existí promé cu mi.” (Juan 1:15, 29, 30) Apostel Juan tambe tabata sa di Jesus su preexistencia. El a skirbi: “Esun cu ta bini djariba ta mas haltu cu tur e otronan. . . . Esun cu ta bini di shelu ta mas haltu cu tur e otronan. Loke el a mira i a tende, di esaki e ta duna testimonio.”—Juan 3:31, 32.

Rond di aña 61 E.C., apostel Pablo a urgi cristiannan hebreo pa reconocé e pleno importancia di Mesías su yegada riba tera i su trabou como Sumo Sacerdote. Halando atencion na Jesus su papel como Bocero, Pablo a skirbi: “Dios . . . a papia cu nos na fin dje dianan aki pa medio di un Yu . . . pa medio di ken el a traha e sistema di cosnan.” Sea cu esaki ta referí na Jesus su papel como “obrero maestro” of na su participacion den Dios su areglonan progresivo na fabor di hende su reconciliacion, aki Pablo ta agregá su testimonio tocante Jesus su existencia prehumano.—Hebreonan 1:1-6; 2:9.

Lealtad Desde “Tempunan Trempan”

Pablo a duna e cristiannan di promé siglo na Filípos e exhortacion aki: “Mantené den boso e actitud mental aki cu tambe tabata den Cristo Jesus, kende, aunke tabata existí den e forma di Dios, no a duna consideracion na un tumamentu di poder, esta, cu e mester ta igual cu Dios. No, sino a rebahá su mes i a tuma forma di un esclabo i a yega di ta den e semehansa di hende. Mas cu esei, ora el a haña su mes manera hende, el a humiyá su mes i a bira obediente te na morto, sí, morto riba un staca di tormento.” (Filipensenan 2:5-8) Cu amor Jehova a respondé na Jesus su curso leal dor di resucit’é i dun’é un bon biní bek na cas den shelu. Ki un excelente ehempel di integridad atrabes di cantidadnan incontabel di aña Jesus a laga pa nos!—1 Pedro 2:21.

Ki gradicidu nos ta pa e bistanan di Jesus su existencia prehumano cu Bijbel ta duna nos! Sigur-sigur nan ta fortalecé nos determinacion pa imitá su ehempel di sirbishi leal, specialmente awor cu e ta reina como Rey dje Reino Mesiánico. Laga nos aclamá e “Prins di Pas,” nos Gobernador i Gobernante “kende su orígen ta desde tempunan trempan”!—Isaías 9:6; Mikéas 5:2.

[Kuadro na página 24]

Testimonio di un Existencia Prehumano

Jesus su mes palabranan, manera esnan citá aki bou, ta duna prueba abundante di su existencia prehumano:

◻ “Ningun hende a subi na shelu sino esun cu a baha for di shelu, e Yu di hende.”—Juan 3:13.

◻ “Moises no a duna boso pan di shelu, pero mi Tata sí ta duna boso e berdadero pan di shelu. Pasobra e pan di Dios ta esun cu a baha for di shelu i ta duna bida na mundu. . . . Mi a baha for di shelu pa haci, no mi boluntad, sino e boluntad di esun cu a mandá mi.”—Juan 6:32, 33, 38.

◻ “Esaki ta e pan cu ta baha for di shelu, di manera cu cualkier hende por come di dje i no muri. Ami ta e pan bibu cu a baha for di shelu; si un hende come dje pan aki lo e biba pa semper.”—Juan 6:50, 51.

◻ “P’esei, kico si boso mira e Yu di hende subi na unda e tabata promé?”—Juan 6:62.

◻ “Mi testimonio ta berdadero, pasobra mi sa di unda mi a bini i na unda mi ta bai. . . . Boso ta dje regionnan djabou; ami ta dje regionnan djariba. Boso ta dje mundu aki; ami no ta dje mundu aki.” —Juan 8:14, 23.

◻ “Si Dios tabata boso Tata, boso lo a stimá mi, pasobra ta for di Dios mi a bini i ta aki. Tampoco mi no a bini di mi mes iniciativa, sino Esun ei a mandá mi.”—Juan 8:42.

◻ “Cu mayor berdad mi ta bisa boso: Promé cu Abraham a yega di existí, mi tabata.”—Juan 8:58.

◻ “Tata, glorificá mi banda di bo mes cu e gloria cu mi tabatin banda di bo promé cu e mundu a existí. Tata, en cuanto loke bo a duná mi, mi ta deseá pa, unda cu mi ta, nan tambe por ta cu mi, pa nan por mira mi gloria cu bo a duná mi, pasobra bo a stimá mi promé cu e fundamentu dje mundu.”—Juan 17:5, 24.

[Plachi na página 23]

Hosué ta topa e prins di Jehova su ehército