Capítulo 43

E stad resplandiente

Vision 16—Revelacion 21:9–22:5

Tema: Detaye di Jerusalem Nobo

Tempo di cumplimento: Despues dje tribulacion grandi i tiramento di Satanás den abismo

1, 2. (a) Unda un angel a hiba Juan pe mira Jerusalem Nobo, i nos ta ripara cua contraste aki? (b) Pakico esaki ta e gran culminacion di Revelacion?

UN ANGEL a hiba Juan na desierto pa mustré Babilonia e Grandi. Awor uno dje mesun grupo di angel a hiba Juan riba un montaña halto. Ki un contraste el a mira! Esei no ta un stad impuro i inmoral manera e muher babilónico, sino ta Jerusalem Nobo—un stad puro, spiritual, i santo—i e ta baha foi cielo mes.—Revelacion 17:1, 5.

² Ni sikiera Jerusalem terrenal tabatin gloria manera esei. Juan ta bísanos: “I a bini uno dje siete angel cu tabatin e siete conchi cu tabata yen dje siete último plaga, i el a papia cu mi i a bisa: ‘Bini aki, i lo mi mustrábo e bruid, esposa dje Lamchi.’ Pues, el a hibámi den poder di spiritu te na un montaña grandi i halto, i el a mustrámi e stad santo Jerusalem bahando foi cielo foi Dios i cu tabatin e gloria di Dios.” (Revelacion 21:9-11a) Desde e lugar bentahoso dje montaña halto, Juan a wak e stad bonita den tur su detaye precioso. Hende di fe a biba den speranza di su binimento desde cu humanidad a cai den picá i morto. Por fin el a yega! (Romano 8:19; 1 Corintio 15:22, 23; Hebreo 11:39, 40) Esei ta un stad spiritual magnífico, componí di 144.000 wardador di integridad leal, resplandiente den su santidad i reflehando e gloria mes di Jehova. Esei ta e culminacion magnífico di Revelacion!

 3. Ki detaye Juan a duna dje boniteza di Jerusalem Nobo?

³ E boniteza di Jerusalem Nobo ta asombroso: “Su resplandor ta manera e piedra di mas precioso, manera jaspe cu ta briya cu claridad di cristal. E tabatin un muraya grandi i halto i tabatin diesdos porta, i ne portanan diesdos angel, i tabatin nomber skirbí cu ta nomber dje diesdos tribu dje yiunan di Israel. Pariba tabatin tres porta, i panort tres porta, i pazuid tres porta, i pabao tres porta. E muraya dje stad també tabatin diesdos piedra di fundeshi, i riba nan e diesdos nomber dje diesdos apóstol dje Lamchi.” (Revelacion 21:11b-14) Ta ki apropiado cu e promé impresion cu Juan a skirbi ta di un aparencia briyante radiante! Radiante como un bruid nobo, Jerusalem Nobo ta un esposa apropiado pa Cristo. E realmente ta briya, na moda apropiado pa un creacion dje “Tata di luz celestial.”—Santiago 1:17.

 4. Kico ta indica cu Jerusalem Nobo no ta e nacion carnal di Israel?

⁴ Tin skirbí riba e 12 porta e nomber dje 12 tribu di Israel. P’sei, e stad simbólico ta componí dje 144.000 cu tabata seyá di “tur tribu dje yiunan di Israel.” (Revelacion 7:4-8) Na armonía cu esei, piedra di fundeshi tin skirbí riba nan e nomber dje diesdos apóstol dje Lamchi. Sí, Jerusalem Nobo no ta e nacion carnal di Israel fundá riba e diesdos yiu di Jacob. Esei ta Israel spiritual, fundá riba e “apóstol i profetanan.”—Efesio 2:20.

 5. Kico ta ser indicá pe “muraya grandi i halto” di Jerusalem Nobo i pe echo cu angel ta para na cada entrada?

⁵ E stad simbólico tin un muraya grandi. Den tempo di antigua, muraya di stad tabata trahá pa siguridad pa enemigo no drenta. E “muraya grandi i halto” di Jerusalem Nobo ta mustra cu e ta spiritualmente sigur. Ningun enemigo di husticia, ningun hende impuro of cu ta falta onradez nunca por logra drenta. (Revelacion 21:27) Pero, pa esnan permití di drenta, drentamento den e stad bonita ta manera drentando den Paradijs. (Revelacion 2:7) Despues di expulsion di Adam, querubín tabata poní dilanti dje Paradijs original pa hende impuro no drenta. (Génesis 3:24) Di igual manera, angel ta poní na cada entrada dje stad santo Jerusalem pa garantiza e siguridad spiritual dje stad. Realmente, durante tur e último dianan, angel a proteha e congregacion di cristian ungí, cu ta bira Jerusalem Nobo, contra contaminacion babilónico.—Mateo 13:41.

Midimento dje stad

 6. (a) Con Juan a detaya midimento dje stad, i kico su midimento ta indica? (b) Kico por splica pakico e midí usá tabata “segun e midí di hende, i alabez e midí di angel”? (Mira e nota.)

⁶ Juan a sigi cu su relato: “Awor esun cu tabata papia cu mi a tene como un midí un caña di oro, pe midi e stad i su portanan i su muraya. I e stad ta para perfectamente cuadrá, i su largura tabata mes grandi cu su hanchura. I el a midi e stad cu e caña, diesdos mil estadio; su largura i hanchura i haltura ta igual. També, el a midi su muraya, cient’i cuarenticuater codo, segun e midimento di hende, i alabez esun di angel.” (Revelacion 21:15-17) Ora e santuario dje tempel tabata midí, esei a garantiza e cumplimento dje propósito di Jehova en cuanto dje. (Revelacion 11:1) Awor, e midimento cu e angel a haci di Jerusalem Nobo ta mustra cu e propósito di Jehova no ta cambia en cuanto e stad glorioso.a

 7. Kico ta notable tocante e midí dje stad?

⁷ Ki un stad extraordinario esei tá! Un cubo perfecto cu un omtrek di 12.000 estadio (rond di 2.220 km), rondoná pa un muraya 144 codo halto (64 m). Ningun stad literal nunca por tin midí asina. Esei por cubri un terreno rond di 14 bez mas grandi cu Israel djawe, i lo subi te na casi 560 km den espacio exterior! Revelacion tabata duná usando siñal. Pues, kico tal midí ta bísanos tocante Jerusalem Nobo celestial?

 8. Kico ta ser indicá pa (a) muraya dje stad 144 codo halto? (b) e midí dje stad di 12.000 estadio? (c) e echo cu e stad tin e forma di un cubo perfecto?

⁸ E muraya di 144 codo halto ta hácinos corda cu e stad ta componí di 144.000 yiu di Dios adoptá mediante su spiritu. E cifra 12 cu ta ser usá den e midí di 12.000 estadio dje stad—i su largura, hanchura, i haltura ta igual—ta ser usá simbólicamente en relacion cu organizacion den profecía bíblico. Pues, Jerusalem Nobo ta un estructura of organizacion excelentemente diseñá pa cumpli cu e propósito eterno di Dios. Jerusalem Nobo, hunto cu Rey Jesucristo, ta e organizacion dje Reino di Jehova. Anto tin e forma dje stad: un cubo perfecto. Den e tempel di Salomón, e Lugar Santísimo, conteniendo representacion simbólico dje presencia di Jehova, tabata un cubo perfecto. (1 Rey 6:19, 20) Ta ki apropiado, anto, pa Jerusalem Nobo, iluminá cu e gloria di Jehova mes, ser mirá como un cubo perfecto na escala grandi! Tur midí di dje ta perfectamente balanzá. Esei ta un stad sin desigualdad ni defecto.—Revelacion 21:22.

Material precioso di construccion

 9. Ki detaye Juan a duna di material di construccion dje stad?

⁹ Juan a sigi duna detaye: “Awor estructura di su muraya tabata jaspe, i e stad mes tabata oro puro manera glas transparente. E fundeshi di muraya dje stad tabata dorná cu tur sorto di piedra precioso: e promé fundeshi tabata jaspe, e segundo tabata safiro, di tres tabata calcedonia, di cuater esmeralda, di cinco sardónico, di seis sardio, di siete crisólito, di ocho berilo, di nuebe topacio, di diez crisoprasa, di diesun hacinto, di diesdos amatista. També, e diesdos porta tabata diesdos perla; cada porta tabata trahá di un solo perla. I e camina hanchu dje stad tabata oro puro, manera glas transparente.”—Revelacion 21:18-21.

10. Kico ta ser indicá pe echo cu e stad ta trahá di jaspe, oro, i di “tur sorto di piedra precioso”?

¹⁰ Construccion dje stad tabata berdaderamente briyante. En bez di gewoon material di construccion terrenal manera clei of piedra, nos ta leza di jaspe, oro refiná, i di “tur sorto di piedra precioso.” Ki adecuadamente eseinan ta representa material di construccion celestial! Nada por ta mas magnífico. E arca di pacto di antigua tabata furá cu oro puro, i den e Bijbel hopi bez oro ta representa loke ta bon i balioso. (Exodo 25:11; Proverbio 25:11; Isaías 60:6, 17) Pero Jerusalem Nobo henter, i asta su camina hanchu, ta trahá di “oro puro manera glas transparente,” representando un boniteza i balor natural cu ta inimaginabel.

11. Kico ta garantiza cu esnan cu ta compone Jerusalem Nobo lo briya cu excelencia di mas sublime di pureza spiritual?

¹¹ Ningun smelter humano por produci oro tanto puro. Pero Jehova Dios ta e Refinador Maestro. E ta sinta “como refinador i limpiador di plata,” i e ta refina fiel miembro individual di Israel spiritual “manera oro i manera plata,” eliminando tur impureza foi nan. Solamente hende cu a ser berdaderamente refiná i hací limpi por finalmente compone Jerusalem Nobo, i asina Jehova ta traha e stad cu material di construccion bibo cu ta briya cu excelencia di mas halto di pureza spiritual.—Malaquías 3:3, 4.

12. Kico kier men e echo cu (a) fundeshi dje stad ta dorná cu 12 piedra precioso? (b) e echo cu porta dje stad ta perla?

¹² Asta fundeshi dje stad ta bonita, dorná cu 12 piedra precioso. Esei ta hácinos corda e sumosacerdote hudío di antigua, cu riba dia ceremonial a bisti un efod dorná cu 12 diferente piedra precioso casi mescos cu esnan mencioná aki. (Exodo 28:15-21) Siguramente esei no ta pa casualidad! Mas bien, e ta duna énfasis ne funcion sacerdotal di Jerusalem Nobo, di locual Jesús, e gran Sumosacerdote, ta e “lampi.” (Revelacion 20:6; 21:23; Hebreo 8:1) Además, ta mediante Jerusalem Nobo cu beneficio dje sirbishi di sumosacerdote di Jesús ta dirigí na humanidad. (Revelacion 22:1, 2) E 12 porta dje stad, cada un di locual ta un perla di gran boniteza, ta hácinos corda e comparacion di Jesús cu a compara e Reino cu un perla di gran balor. Tur hende cu ta drenta den tal porta a demonstra caba nan berdadero aprecio pa balornan spiritual.—Mateo 13:45, 46; compara cu Job 28:12, 17, 18.

Un stad di luz

13. Kico Juan a sigi bisa tocante Jerusalem Nobo, i pakico e stad no tin mester di un tempel literal?

¹³ Den e tempo di Salomón, un tempel trahá riba e punta di mas halto dje stad, riba e Ceru di Moría na nort, a domina Jerusalem. Pero, kico di Jerusalem Nobo? Juan a bisa: “I mi no a mira un tempel den dje, pasobra Jehova Dios Todopoderoso i també e Lamchi ta su tempel. I e stad no tin mester di solo ni di luna pa luzé, pasobra e gloria di Dios ta iluminé, i su lampi ta e Lamchi.” (Revelacion 21:22, 23) En berdad, no tin mester di traha un tempel literal ei. E tempel hudío di antigua tabata un modelo so, i e realidad dje modelo, e gran tempel spiritual, a existi desde cu Jehova a ungi Jesús como Sumosacerdote na aña 29 EC. (Mateo 3:16, 17; Hebreo 9:11, 12, 23, 24) Tempel també ta indica un grupo di sacerdote ofreciendo sacrificio na Jehova na fabor di pueblo. Pero tur hende cu ta parti di Jerusalem Nobo ta sacerdote. (Revelacion 20:6) I e gran sacrificio, e bida humano perfecto di Jesús, a ser ofrecí una bez pa semper. (Hebreo 9:27, 28) Además, tur persona cu ta biba den e stad por acudi na Jehova personalmente.

14. (a) Pakico Jerusalem Nobo no tin mester di solo i luna pa iluminé? (b) Kico e profecía di Isaías a profetiza tocante e organizacion universal di Jehova, i di ki manera Jerusalem Nobo ta enbolbí den esei?

¹⁴ Ora e gloria di Jehova a pasa dilanti Moisés riba e Ceru di Sinaí, el a haci e cara di Moisés lombra asina fuerte cu e tabatin cu tapé for di bista di otro israelita. (Exodo 34:4-7, 29, 30, 33) Bo por imaginábo, anto, ki briyante ta e stad cu tin e gloria di Jehova pa luzé permanentemente? No por tin anochi den stad asina. E no tin mester di solo i luna literal. E ta saca luz eternamente. (Compara cu 1 Timoteo 6:16.) Jerusalem Nobo ta ser luzá cu tal sorto di luz briyante. En berdad, e bruid i su Bruidegom Rey ta bira e capital dje organizacion universal di Jehova—su “esposa,” “Jerusalem djariba”— di locual Isaías a profetiza: “Pa bo e solo lo no resulta di ser claridad di dia, i pa splendor e luna mes lo no saca luz mas pa bo. I Jehova mester bira pa bo un luz di duracion indefinitivo, i bo Dios, bo boniteza. Bo solo lo no drenta mas, ni bo luna lo no yega di mengua; pasobra Jehova mes lo bira pa bo un luz di duracion indefinitivo, i e dianan di bo duele lo keda completo.”—Isaías 60:1, 19, 20; Galatio 4:26.

Un luz pe nacionan

15. Cua palabra di Revelacion tocante Jerusalem Nobo ta similar cu e profecía di Isaías?

¹⁵ E mesun profecía a profetiza també: “I nacionan siguramente lo acudi na bo luz, rey ne splendor di bo iluminacion.” (Isaías 60:3) Revelacion ta mustra cu e palabra ei ta inclui Jerusalem Nobo: “I e nacionan lo camna pa medio di su luz, i rey di tera lo trece nan gloria den dje. I su portanan di ningun manera lo ser cerá di dia, pasobra anochi no ta existi ei. I nan lo trece e gloria i onor dje nacionan den dje.”—Revelacion 21:24-26.

16. Ken ta e “nacionan” cu lo camna den e luz di Jerusalem Nobo?

¹⁶ Ken ta e “nacionan” camnando pa medio di e luz di Jerusalem Nobo? Nan ta hende, cu promé tabata parti di nacionan dje mundo malbado aki, cu ta responde ne luz luzando for dje glorioso stad celestial. Den nan primeramente ta e multitud grandi, cu a sali caba for di “tur nacion i tribu i pueblo i lenga” i cu ta adora Dios dia i anochi den compañía dje grupo cu Juan a simboliza. (Revelacion 7:9, 15) Despues cu Jerusalem Nobo ta baha foi cielo i Jesús ta usa yabi di morto i di Hades pa resusita hende morto, miyones di otro hende lo uni cu nan, originalmente dje “nacionan,” cu ta yega di stima Jehova i su Yiu, e Lamchi semehante di Esposo di Jerusalem Nobo.—Revelacion 1:18.

17. Ken ta “rey di tera” cu ta “trece nan gloria” den Jerusalem Nobo?

¹⁷ Ken, anto, ta “rey di tera” cu ta “trece nan gloria den dje”? Nan no ta rey literal dje tera como un grupo, pasobra nan tabata destruí bringando contra e Reino di Dios den Armagedón. (Revelacion 16:14, 16; 19:17, 18) Tal rey por ta hende di categoría dje nacionan cu ta bira parti dje multitud grandi, of nan ta rey resusitá cu ta someténan ne Reino di Dios den e mundo nobo? (Mateo 12:42) Apenas, pasobra den e mayor parti di caso, e gloria di tal rey tabata mundano i a desparce for di hopi dia caba. Pues, “rey di tera,” anto, cu ta trece nan gloria den Jerusalem Nobo mester ta e 144.000, cu tabata “cumprá . . . for di tur tribu i lenga i pueblo i nacion” pa reina como rey cu e Lamchi, Jesucristo. (Revelacion 5:9, 10; 22:5) Nan ta trece e gloria cu Dios a dúnanan den e stad pa hacié mas briyante.

18. (a) Ken lo ser excluí for di Jerusalem Nobo? (b) Ken so lo ser permití di drenta den e stad?

¹⁸ Juan a sigi: “Pero cualkier cos cu no ta sagrado i ken cu ta cumpli cu cos repugnante i mentira di ningun manera lo drenta den dje; solamente esnan skirbí den e rol di bida dje Lamchi lo drenta.” (Revelacion 21:27) Nada contaminá pe sistema di cosnan di Satanás por ta un parti di Jerusalem Nobo. Aunque su portanan ta permanentemente habrí, ningun hende cu ta “cumpli cu cos repugnante i mentira” ta permití di drenta. Lo no tin hende apóstata den e stad ni ningun hende di Babilonia e Grandi. I si cualkier di nan ta purba di profana e stad corrumpiendo miembro futuro di dje mientras cu nan ta riba tera ainda, nan esfuerzo lo ser reducí na nada. (Mateo 13:41-43) Solamente “esnan skirbí den e rol di bida dje Lamchi,” e 144.000, finalmente lo drenta den Jerusalem Nobo.b—Revelacion 13:8; Daniel 12:3.

E rio di awa di bida

19. (a) Ki detaye Juan a duna di Jerusalem Nobo bashando bendicion riba humanidad? (b) Na ki tempo e “rio di awa di bida” ta corre, i con nos sa?

¹⁹ Jerusalem Nobo briyante lo basha bendicion grandi riba humanidad riba tera. Esei ta loke Juan a tende sigientemente: “I el a mustrámi un rio di awa di bida, limpi manera cristal, corriendo for dje trono di Dios i dje Lamchi den centro di su camina hanchu.” (Revelacion 22:1, 2a) Na ki tempo e “rio” ta corre? Siendo cu e ta corre “for dje trono di Dios i dje Lamchi,” esei por ta solamente despues cu e dia di Señor a cuminza na 1914. Esei tabata e tempo pe sosodimento cu tocamento di trompet di siete a anuncia i e gran anuncio: “Awor a sosode e salbacion i e poder i e reino di nos Dios i e autoridad di su Cristo.” (Revelacion 11:15; 12:10) Durante e tempo di fin, e spiritu i e bruid a sigi invitá personanan cu tin e disposicion correcto pa tuma e awa di bida gratis. Awa for di e rio aki lo sigi ta disponibel pa e personanan ei te na fin di e sistema di cosnan aki, i despues di esei, te den e mundo nobo, ora Jerusalem Nobo ‘ta baha foi cielo foi Dios.’—Revelacion 21:2.

20. Kico ta indica cu algun awa di bida ta disponibel caba?

²⁰ Esei no ta e promé bez cu awa cu ta duna bida a ser ofrecí na humanidad. Ora e tabata riba tera, Jesús a menciona awa cu ta duna bida eterna. (Juan 4:10-14; 7:37, 38) Además, Juan ta cerca di tende e invitacion amoroso: “E spiritu i e bruid ta sigi bisa: ‘Bin!’ I laga ken cu ta tende bisa: ‘Bin!’ I laga ken cu tin sed bini; laga ken cu kier tuma e awa di bida gratis.” (Revelacion 22:17) Tal invitacion ta ser duná asta awor, indicando cu hende por haya algun awa di bida caba. Pero, den e mundo nobo, tal awa lo corre for di trono di Dios i door di Jerusalem Nobo manera un rio mes.

21. E “rio di awa di bida” ta representa kico, i con e vision di Ezekiel dje rio ta yúdanos sa?

²¹ Kico ta e “rio di awa di bida”? Awa mes ta un elemento vital pa bida. Hende por biba sin cuminda pa varios siman, pero sin awa nan lo muri den rond di un siman. Awa també ta laba limpi i ta vital pa salud. Pues, awa di bida mester representa algo necesario pa bida i salud di humanidad. Profeta Ezekiel també tabata duná un vision dje “rio di awa di bida,” i den su vision, e rio a sali for dje tempel i a basha den Lamá Morto. Anto, ki milagro! Lamá Morto sin nada bibo den dje i contaminá cu químico tabata conbertí na awa dushi yen di piscá! (Ezekiel 47:1-12) Sí, e rio dje vision a restorá na bida algo cu tabata morto na antes, confirmando cu e rio di awa di bida ta simboliza e percuracion di Dios mediante Jesucristo pe restoracion di bida humano perfecto ne raza humano “morto.” E rio ta “transparente manera cristal,” mustrando e pureza i santidad dje percuracion di Dios. E no ta manera “awa” di cristiandad manchá cu sanger i fatal.—Revelacion 8:10, 11.

22. (a) Unda ta e fuente dje rio, i pakico esei ta apropiado? (b) Kico ta encerrá den e awa di bida, i e rio simbólico ta inclui kico?

²² E origen dje rio ta “e trono di Dios i dje Lamchi.” Esei ta apropiado, siendo cu e base dje percuracion di Jehova pa duna bida ta e sacrificio di rescate, i el a percura esei pasobra Jehova “a stima mundo asina tanto cu el a duna su Yiu unigénito, pa ken cu ta eherce fe den dje no sea destruí sino tene bida eterna.” (Juan 3:16) E awa di bida ta encerra també e Palabra di Dios, cu e Bijbel ta menciona como awa. (Efesio 5:26) Sin embargo, e rio di awa di bida ta inclui no solamente e berdad sino també tur otro percuracion di Jehova, fundá riba e sacrificio di Jesús, pa recobra hende obediente for di picá i morto i dúnanan bida eterna.—Juan 1:29; 1 Juan 2:1, 2.

23. (a) Pakico ta apropiado pe rio di awa di bida pasa den e centro dje camina hanchu di Jerusalem Nobo? (b) Cua promesa divino duná na Abraham lo ser cumplí ora e awa di bida ta basha na abundancia?

²³ Durante e Reino di mil aña, beneficio dje rescate ta ser aplica cabalmente mediante e sacerdocio di Jesús i di su 144.000 subsacerdote. Ta apropiado, anto, pe rio di awa di bida corre den centro dje camina hanchu di Jerusalem Nobo. Esei ta componí di Israel spiritual, locual, hunto cu Jesús, ta compone e berdadero simía di Abraham. (Galatio 3:16, 29) P’sei, ora e awa di bida ta corre na abundancia den centro dje camina hanchu dje stad simbólico, “tur nacion di tera” lo tin plena oportunidad di bendiciona nan mes mediante e simía di Abraham. E promesa di Jehova duná na Abraham lo ser cumplí completamente.—Génesis 22:17, 18.

Palu di bida

24. Kico Juan a mira awor na dos banda dje rio di awa di bida, i kico nan ta simboliza?

²⁴ Den e vision di Ezekiel, e rio asta a bira un diluvio, i e profeta a mira tur sorto di mata di fruta creciendo ne dos banda di dje. (Ezekiel 47:12) Pero, kico Juan a mira? Lo sigiente: “I ne banda aki dje rio i ne banda ayá tabatin palu di bida produciendo diesdos cosecha di fruta, cu a duna fruta tur luna. I foyo dje palu tabata pa curacion dje nacionan.” (Revelacion 22:2b) Tal “palu di bida” també tin cu representa un parti dje percuracion di Jehova pa duna bida eterna na humanidad obediente.

25. Ki percuracion abundante Jehova ta haci pa hende cu ta responde bon den e Paradijs mundial?

²⁵ Ki percuracion abundante Jehova ta haci pa hende cu ta responde bon! Nan no solamente por bebe dje awa refrescante sino també nan por piki for di palu un variedad continuo di fruta cu ta sostenénan. O, si nos mayornan original solamente a keda satisfecho cu tal percuracion “deseabel” similar den e Paradijs di Eden! (Génesis 2:9) Pero awor un Paradijs mundial ta yega, i Jehova Dios asta ta haci percuracion mediante foyo di palu simbólico pa “curacion dje nacionan.”c Hopi mas superior cu cualkier medicina, di yerba of di otro cos, cu nan ta bende awe, e aplicacion calmante di tal foyo simbólico lo hiza hende creyente te na perfeccion spiritual i fisical.

26. Palu di bida por ta inclui cua otro cos, i pakico?

²⁶ Tal palu, bon muhá pe rio, por ta inclui e 144.000 miembro di esposa dje Lamchi. Ora nan tabata riba tera, eseinan també a bebe dje percuracion di Dios pa bida mediante Jesucristo. Ta interesante pa nota cu e rumanan di Jesús aki, engendrá pa spiritu, ta ser yamá proféticamente “palu grandi di husticia.” (Isaías 61:1-3; Revelacion 21:6) Nan a produci caba hopi fruta spiritual pe alabanza di Jehova. (Mateo 21:43) I durante e Reino di mil aña, nan lo tene parti den compartimento di percuracion dje rescate cu lo sirbi pe “curacion dje nacionan” for di picá i morto.—Compara cu 1 Juan 1:7.

No ta existi anochi mas

27. Cua otro bendicion Juan a menciona pa hende cu tin e privilegio di drenta den Jerusalem Nobo, i pakico e ta bisa cu “lo no existi maldicion mas”?

²⁷ Siguramente no tin un privilegio mas maraviyoso cu drentamento den Jerusalem Nobo! Imaginábo—persona cu na antes tabata hende humilde i imperfecto lo sigi Jesús te na cielo pa bira parti di tal arreglo glorioso! (Juan 14:2) Juan a duna algun idea di bendicion cu nan lo goza, bisando: “I lo no existi maldicion mas. Pero e trono di Dios i dje Lamchi lo ta den e stad, i esclabo di dje lo rindié sirbishi sagrado; i nan lo mira su cara, i nan lo tin su nomber riba nan frenta.” (Revelacion 22:3, 4) Ora e sacerdocio di Israel a bira corrupto, el a recibi e maldicion di Jehova. (Malaquías 2:2) Jesús a declara cu e “cas” di Jerusalem sin fe tabata bandoná. (Mateo 23:37-39) Pero, den Jerusalem Nobo, “lo no existi maldicion mas.” (Compara cu Zacarías 14:11.) Tur habitante di dje tabatin cu pasa e prueba di candela aki riba tera, i saliendo victorioso, nan lo ‘bisti incorrupcion i inmortalidad.’ Den nan caso, Jehova sa, mescos cu e tabata sa den e caso di Jesús, cu nan nunca lo bira apóstata. (1 Corintio 15:53, 57) Además, “e trono di Dios i dje Lamchi” lo tei, haciendo e posicion dje stad sigur pa tur eternidad.

28. Pakico miembro di Jerusalem Nobo tin e nomber di Dios skirbí riba nan frenta, i tin cua prospecto excitante dilanti nan?

²⁸ Manera Juan mes, tur miembro di futuro dje stad celestial ta “esclabo” di Dios. Como tal, nan tin e nomber di Dios skirbí bisto riba nan frenta, identificando Dios como nan Doño. (Revelacion 1:1; 3:12) Pa nan, e rindimento di sirbishi sagrado na Dios como parti di Jerusalem Nobo, ta un privilegio di balor incalculable. Mientras cu Jesús tabata riba tera, el a duna un promesa excitante na tal gobernante di futuro, bisando: “Feliz ta esnan di curazón puro, pasobra nan lo mira Dios.” (Mateo 5:8) Ki feliz tal esclabo lo keda ora nan realmente ta mira i ta adora Jehova Dios en persona!

29. Pakico Juan a bisa cu den Jerusalem Nobo celestial “lo no existi anochi mas”?

²⁹ Juan a sigi: “Además, lo no existi anochi mas, ni no tin necesidad di luz di lampi ni nan no tin claridad di solo, pasobra Jehova Dios ta tira luz riba nan.” (Revelacion 22:5a) Jerusalem di antigua, mescos cu cualkier otro stad riba tera, a depende di solo pa claridad di dia i di claridad di luna i luz di lampi den anochi. Pero den Jerusalem Nobo celestial, tal iluminacion no ta necesario. Jehova mes lo ilumina e stad. “Anochi” por ta usá també den un sentido simbólico, cu referencia na tempo dificultoso of separacion for di Jehova. (Miqueas 3:6; Juan 9:4; Romano 13:11, 12) Nunca por tin tal clase di anochi den e glorioso presencia radiante di Dios Todopoderoso.

30. Con Juan a conclui e vision magnífico, i Revelacion ta dúnanos e siguranza di kico?

³⁰ Juan a termina e vision magnífico bisando lo sigiente tocante tal esclabo di Dios: “I nan lo reina como rey pa semper hamás.” (Revelacion 22:5b) Ta cierto cu na fin dje mil aña, e beneficio dje rescate lo a ser aplicá plenamente, i Jesús lo presenta na su Tata un raza humano perfecto. (1 Corintio 15:25-28) Nos no sa kico Jehova tin pensá pa Jesús i e 144.000 despues di esei. Pero Revelacion ta dúnanos e siguranza cu nan privilegio di rindi sirbishi sagrado na Jehova lo sigi pa tur eternidad.

E feliz culminacion di Revelacion

31. (a) E vision di Jerusalem Nobo ta siñalá na cua culminacion? (b) Kico Jerusalem Nobo ta logra pa otro hende fiel di humanidad?

³¹ Cumplimento dje vision di Jerusalem Nobo, e bruid dje Lamchi, ta e culminacion feliz na locual Revelacion ta siñala, i esei ta apropiado. Tur cristian compañé di Juan dje promé siglo na ken e buki tabata dirigí originalmente a spera di drenta den e stad como cogobernante celestial inmortal cu Jesucristo. E resto di cristian ungí cu ta na bida riba tera ainda awe ta tene e mesun speranza. Asina Revelacion ta sigi te na su gran culminacion, mientras cu e bruid completo ta ser uní cu e Lamchi. Despues, mediante Jerusalem Nobo, e beneficio dje sacrificio di rescate di Jesús lo ser aplicá na humanidad, di manera cu finalmente tur hende fiel lo drenta den bida eterna. Asina, e bruid, Jerusalem Nobo, como e yudante leal di su Bruidegom Rey, lo participa den e edificacion pa tur eternidad di un husto tera nobo—tur pe gloria di nos Señor Soberano Jehova.—Mateo 20:28; Juan 10:10, 16; Romano 16:27.

32, 33. Kico nos a siña for di Revelacion, i nos mester expresa cua reaccion sincero?

³² Ki gozo nos ta sinti, anto, ya cu nos ta yega cerca e fin di nos consideracion dje buki di Revelacion! Nos a mira esfuerzo final di Satanás i di su simía totalmente frustrá i e husto huicio di Jehova ehecutá completamente. Babilonia e Grandi mester caba di existi pa semper, i mescos tin cu pasa cu tur otro elemento dje mundo di Satanás incorrigiblemente corrupto. Satanás mes i su demoñonan lo ser tirá den abismo i destruí despues. Jerusalem Nobo lo reina cu Cristo desde cielo segun cu e resureccion i huicio ta sigi, i humanidad perfecto finalmente lo yega di disfruta di bida eterna den Paradijs riba tera. Ki bibo Revelacion ta pinta tur esei! Cuanto e ta fortalece nos determinacion di ‘declara e bon nobo eterno como noticia alegre pa tur nacion i tribu i lenga i pueblo’ riba tera awe! (Revelacion 14:6, 7) Bo ta dedicábo totalmente ne gran trabao?

³³ Cu un curazón pasando over cu gratitud, láganos presta atencion ne palabra final di Revelacion.

[Footnotes]