Jerusalem—“E Stad dje Gran Rey”

“No hura . . . pa Jerusalem, pasobra e ta e stad dje gran Rey.”—MATEO 5:34, 35.

 1, 2. Kico por confundí algun persona tocante Jerusalem?

JERUSALEM—su nomber so caba ta lanta sintimentunan fuerte den hende di diferente religion. De echo, ningun di nos por ignorá e stad antiguo aki, ya cu e ta hopi den noticia. Pero, lamentablemente, hopi informe ta revelá cu Jerusalem no ta semper un lugá di pas.

² Esaki por laga algun lector di Bijbel keda confundí. Den pasado e nomber abreviá di Jerusalem tabata Salem, cu ta nificá “pas.” (Génesis 14:18; Salmo 76:2; Hebreonan 7:1, 2) P’esei, kisas bo ta puntra bo mes: ‘Pakico tabatin den décadanan recien un stad cu e nomber aki cu asina un falta di pas?’

 3. Unda nos por haña informacion confiabel tocante Jerusalem?

³ Pa contestá e pregunta ei, nos tin cu bai bek leu atras den historia i siña tocante e Jerusalem di antaño. Pero algun hende lo por pensa: ‘Nos no tin tempu pa studia historia antiguo.’ No obstante, conocimentu exacto di Jerusalem su historia antiguo tin balor pa nos tur. Bijbel ta indicá pakico den e palabranan aki: “Tur loke a ser skirbí den tempu pasá a ser skirbí pa nos instruccion, pa mediante nos awante i mediante e consuelo for dje Scritura nos por tin speransa.” (Romanonan 15:4) Conocimentu di Bijbel tocante Jerusalem por duna nos consuelo—sí, i speransa di pas, no solamente den e stad ei sino rond mundu.

E Sitio di “e Trono di Jehova”

 4, 5. Den ki manera David tabata enbolbí den yuda Jerusalem hunga un papel vital den e realisacion dje propósito di Dios?

⁴ Den siglo 11 P.E.C., Jerusalem a bira mundialmente famoso como e capital di un nacion di pas i siguridad. Jehova Dios a laga ungi e yoncuman David como rey riba e nacion antiguo ei—Israel. Cu e asiento di gobernacion den Jerusalem, David i su desendientenan real a bin ocupá “e trono dje gobernacion real di Jehova,” of “e trono di Jehova.”—1 Crónicanan 28:5; 29:23.

⁵ David, e homber temeroso di Dios, un israelita dje tribu di Huda, a capturá Jerusalem for dje hebuseonan idólatra. E tempu ei e stad tabata ocupá solamente un ceritu yamá Síon, pero e nomber ei a bira sinónimo di Jerusalem mes. Cu tempu, David a laga muda e arca dje pacto cu Dios a cera cu Israel pa Jerusalem, caminda a ward’é den un tent. Hopi aña promé cu esei Dios a papia cu su profeta Moises for di un nubia riba e Arca sagrado ei. (Exodo 25:1, 21, 22; Levítico 16:2; 1 Crónicanan 15:1-3) E Arca a simbolisá e presencia di Dios, pasobra Jehova tabata e berdadero Rey di Israel. P’esei, den dos sentido por a bisa cu Jehova Dios a goberná for dje stad di Jerusalem.

 6. Ki promesa Jehova a haci relacioná cu David i Jerusalem?

⁶ Jehova a primintí David cu e reino di su cas real, representá pa Síon, of Jerusalem, lo no a terminá. Esaki a nificá cu un desendiente di David lo a heredá e derecho di goberná pa semper como e Ungí di Dios, e Mesías, of Cristo.a (Salmo 132:11-14; Lucas 1:31-33) Bijbel ta revelá tambe cu e heredero permanente aki di “e trono di Jehova” lo a goberná riba tur nacion, no solamente riba Jerusalem.—Salmo 2:6-8; Daniel 7:13, 14.

 7. Den ki manera Rey David a promové adoracion puru?

⁷ Intentonan pa destroná e ungí di Dios, Rey David, a fracasá. Na lugá di esei, el a dominá nacionnan enemigu, i a extendé e fronteranan dje Tera Primintí te na e extremidad cu Dios a designá. David a usa e situacion aki pa promové adoracion puru. I hopi di David su salmonan ta alabá Jehova como e berdadero Rey den Síon.—2 Samuel 8:1-15; Salmo 9:1, 11; 24:1, 3, 7-10; 65:1, 2; 68:1, 24, 29; 110:1, 2; 122:1-4.

 8, 9. Con adoracion puru den Jerusalem a florecé bou dje reinado di Rey Sálomon?

⁸ Durante e reinado di David su yu Sálomon, e adoracion di Jehova a alcansá halturanan nobo. Sálomon a extendé Jerusalem den direccion nort pa incluí ceru Moria (e área dje actual Koepel di Baranca). Riba e elevacion mas haltu aki, el a haña e privilegio pa construí un tempel magnífico p’e alabansa di Jehova. E arca di pacto a ser poní den e Santísimo dje tempel ei.—1 Reynan 6:1-38.

⁹ E nacion di Israel a disfrutá di pas miéntras cu nan a duna apoyo di henter curason n’e adoracion di Jehova, cu su centro den Jerusalem. E Scritura ta describí e situacion aki di un manera masha bunita, declarando: “Huda i Israel tabata hopi, manera e pipitanan di santu cu tin cant’i laman di hopi cu nan tabata, comiendo i bebiendo i alegrando. . . . I pas mes a bira di [Sálomon] den tur su region, tur rond. I Huda i Israel a sigui biba den siguridad, cada un bou di su mes mata di wijndruif i bou di su mes palu di figu.”—1 Reynan 4:20, 24, 25.

10, 11. Con arkeologia ta confirmá loke Bijbel ta bisa tocante Jerusalem tempu cu Sálomon tabata reina?

¹⁰ Descubrimentunan arkeológico ta duna apoyo n’e relato aki di Sálomon su reinado próspero. Den su buki The Archaeology of the Land of Israel (Arkeologia dje Tera di Israel), profesor Yohanan Aharoni ta declará: “E rikesa cu a basha drenta e palacio real for di tur direccion, i e comercio floreciente . . . a ocasioná un revolucion rápido i riparabel den tur aspecto di cultura material. . . . E cambio den cultura material ta bisto no solamente den artículonan di luho, sino tambe foral den cerámica. . . . E calidad dje obranan di klei i nan proceso di preparacion cu temperatura haltu a mehorá tremendamente.”

¹¹ Di manera similar, Jerry M. Landay a skirbi: “Bou di Sálomon, e cultura material dje israelitanan a progresá mas den tres década cu durante e doshen añanan anterior. Nos ta haña den e capa arkeológico dje tempu di Sálomon resto di construccionnan impresionante, stadnan grandi cu murayanan masivo, áreanan residencial cu a lanta manera paddestoel, cu barionan di bibienda pa hende ricu bon construí, un tremendo adelanto den e abilidad técnico di trahadó di klei i su proceso di produccion. Tambe nos ta haña resto di artefactonan procedente di lugánan leu, loke ta un indicacion di comercio vigoroso i hopi intercambio cu otro nacionnan.”—The House of David.

Di Pas pa Desolacion

12, 13. Con bini no a sigui promové adoracion berdadero den Jerusalem?

¹² E pas i prosperidad di Jerusalem, e stad caminda e santuario di Jehova tabata situá, tabata un tópico apropiado di oracion. David a skirbi: “Pidi, O pueblo, p’e pas di Jerusalem. Esnan cu ta stimá bo, O stad, lo ta liber di preocupacion. Cu pas continuá den bo muraya part’i dilanti, libertad di preocupacion den bo torennan di habitacion. Pa motibu di mi rumannan i mi compañeronan lo mi papia awor: ‘Laga pa tin pas den bo.’” (Salmo 122:6-8) Aunke Sálomon tabatin e privilegio di construí e tempel magnífico den e stad pacífico ei, cu tempu el a casa cu hopi muher pagano. Den su behes, nan a seducié pa promové adoracion di dios falsu dje tempu ei. E apostasia aki tabatin un influencia coruptivo riba henter e nacion, hortando asina e nacion i su habitantenan di berdadero pas.—1 Reynan 11:1-8; 14:21-24.

¹³ Na cuminsamentu dje reinado di Sálomon su yu Rehoboam, dies tribu a rebelá i a forma e reino di nort di Israel. Pa motibu di nan adoracion di dios falsu, Dios a permití Asiria derotá e nacion ei. (1 Reynan 12:16-30) Ainda e reino di sur di dos tribu di Huda tabatin su centro den Jerusalem. Pero cu tempu nan tambe a alehá for di adoracion puru, di manera cu Dios a permití e babilonionan destruí e stad desobediente na 607 P.E.C. Pa 70 aña, exiliadonan hudiu a pena como presu den Babilonia. Anto, p’e misericordia di Dios, nan a ser permití pa regresá Jerusalem i restorá adoracion puru.—2 Crónicanan 36:15-21.

14, 15. Con Jerusalem a recuperá un papel clave despues di exilio den Babilonia, pero cu ki cambio?

¹⁴ Despues di 70 aña di desolacion, yerba di mondi a crece i tapa e ruina dje edificionan. E muraya di Jerusalem tabata tur kibrá, cu buracunan grandi caminda un tempu tabatin e porta i torennan di sosten. Pero, e hudiunan cu a regresá a cobra ánimo. Nan a construí un altar n’e sitio dje tempel anterior i a cuminsá ofrecé sacrificio tur dia na Jehova.

¹⁵ Esaki tabata un comienso prometedor, pero e Jerusalem restorá ei nunca mas lo a bira e capital di un reino cu un desendiente di Rey David riba e trono. Na lugá di esei, un gobernadó cu e conkistadónan di Babilonia a nombra a goberná e hudiunan i nan tabatin cu paga belasting na nan doñonan perso. (Nehemías 9:34-37) Aunke Jerusalem tabata den un condicion “trapá,” ainda e tabata e solo stad riba henter e tera specialmente faborecí pa Jehova Dios. (Lucas 21:24) Como e centro di adoracion puru, el a representá tambe Dios su derecho pa ehercé su soberania riba tera mediante un desendiente di Rey David.

Bisiñanan Idólatra A Oponé Nan

16. Pakico e hudiunan cu a regresá for di Babilonia a para e restoracion di Jerusalem?

¹⁶ Pronto e hudiunan cu a regresá Jerusalem for di exilio a pone e fundeshi di un tempel nobo. Pero e nacionnan bisiña cu a practicá religion falsu, a manda un carta di calumnia pa Rey Artahérhes di Persia, bisando cu e hudiunan lo a rebelá. Na su turno, Artahérhes a prohibí mas construccion den Jerusalem. Bo por imaginá cu si bo tabata biba den e stad e tempu ei, lo bo a puntra bo mes kico futuro lo a encerá p’e. Manera a resultá, e hudiunan a para e construccion dje tempel i a bira completamente ocupá cu nan mes empeñonan materialista.—Esdras 4:11-24; Ageo 1:2-6.

17, 18. Ki medio Jehova a usa pa soru pa Jerusalem ser reconstruí?

¹⁷ Rond di 17 aña despues di nan regreso, Dios a lanta e profetanan Ageo i Zacarías pa corigí e manera di pensa di su pueblo. Cu un curason repentí, e hudiunan a reanudá e reconstruccion dje tempel. Miéntras tantu, Dario a bira rey di Persia. El a verificá e ordu di Rey Ciro pa reconstruí e tempel di Jerusalem. Dario a manda un carta p’e bisiñanan dje hudiunan, den cua el a spierta nan pa ‘keda leu for di Jerusalem’ i pa duna sosten financiero for di belasting dje rey pa asina por a completá e trabou di construccion.—Esdras 6:1-13.

¹⁸ E hudiunan a completá e tempel den e di 22 aña di nan regreso. Bo por comprendé cu e logro aki lo tabata algu pa celebrá cu masha alegria. Tog, ainda Jerusalem i su murayanan tabata pa un gran parti den ruina. E stad a ricibí e atencion necesario “den e dianan di Nehemías e gobernadó i Esdras e sacerdote, e copista.” (Nehemías 12:26, 27) Evidentemente, pa fin di siglo cincu P.E.C., Jerusalem a ser reconstruí completamente como un stad principal dje mundu antiguo.

E Mesías Ta Presentá!

19. Con e Mesías a reconocé e posicion único di Jerusalem?

¹⁹ Pero, laga nos salta algun siglo pa yega na un suceso di importancia universal: E nacementu di Jesucristo. E angel di Jehova Dios a bisa Jesus su mama bírgen: “Jehova Dios lo dun’é e trono di David su tata, . . . i lo no tin fin na su reino.” (Lucas 1:32, 33) Añanan despues, Jesus a duna su famoso Sermon Riba Ceru. Den dje, el a ofrecé animacion i conseho riba hopi tema. Por ehempel, el a urgi su oyentenan pa cumpli cu nan voto na Dios, pero pa tene cuidou pa no haci huramentu pa loco. Jesus a bisa: “Boso a tende cu a ser bisá na esnan di antigwedad: ‘Bo no mag hura sin cumpli cuné, sino bo tin cu cumpli cu bo voto na Jehova.’ Sin embargo, ami ta bisa boso: No hura mes, ni pa shelu, pasobra e ta e trono di Dios; ni pa tera pasobra e ta e banki pa su pia; ni pa Jerusalem, pasobra e ta e stad dje gran Rey.” (Mateo 5:33-35) Ta notabel cu Jesus a reconocé Jerusalem su posicion único—unu cu el a disfrutá di dje pa siglonan. Sí, e tabata “e stad dje gran Rey,” Jehova Dios.

20, 21. Ki cambio dramático a tuma lugá den e actitud di hopi hende cu tabata biba den Jerusalem?

²⁰ Cerca e fin di su bida terenal, Jesus a presentá su mes n’e habitantenan di Jerusalem como nan Rey debidamente ungí. Como reaccion riba e ocasion emocionante ei, hopi a sclama gososamente: “Bendicioná ta esun cu ta bini den nomber di Jehova! Bendicioná ta e binidero reino di nos tata David!”—Marco 11:1-10; Juan 12:12-15.

²¹ Sin embargo, den ménos cu un siman, e multitudnan a permití lidernan religioso di Jerusalem haci nan bai contra Jesus. El a spierta cu e stad di Jerusalem i henter e nacion lo a perde nan posicion faborecí dilanti Dios. (Mateo 21:23, 33-45; 22:1-7) Por ehempel, Jesus a declará: “Jerusalem, Jerusalem, matadó dje profetanan i piedradó di esnan mandá na dje—cuantu biaha mi kier a hala bo yunan huntu, manera un galiña ta hala su puitunan huntu bou di su alanan! Pero boso no tabata kier. Mira! Boso cas ta ser bandoná pa boso.” (Mateo 23:37, 38) Riba e dia dje Pascu hudiu na 33 E.C., Jesus su opositornan a ehecut’é inhustamente pafó di Jerusalem. No obstante, Jehova a resucitá su Ungí i a glorifik’é cu bida spiritual inmortal den Síon celestial, un logro cu nos tur por beneficiá for di dje.—Echonan 2:32-36.

22. Despues dje morto di Jesus, ki aplicacion hopi referencia na Jerusalem tabatin?

²² For dje tempu ei padilanti, nos por comprendé cu mayoria profecia tocante Síon, of Jerusalem, cu no a cumpli ainda, ta aplicá na areglonan celestial of na Jesus su siguidónan ungí. (Salmo 2:6-8; 110:1-4; Isaías 2:2-4; 65:17, 18; Zacarías 12:3; 14:12, 16, 17) Un cantidad di referencia na “Jerusalem” of “Síon” skirbí despues di morto di Jesus claramente tin un sentido figurativo i no ta aplicá n’e stad of sitio literal. (Galationan 4:26; Hebreonan 12:22; 1 Pedro 2:6; Revelacion 3:12; 14:1; 21:2, 10) Prueba final cu Jerusalem no tabata “e stad dje gran Rey” mas a bini na 70 E.C. ora ehércitonan romano a desol’é, manera Daniel i Jesucristo a profetisá. (Daniel 9:26; Lucas 19:41-44) Ni escritornan di Bijbel ni Jesus mes no a profetisá cu mas despues Jerusalem terenal lo a ser restorá n’e fabor special di Jehova Dios cu un tempu el a disfrutá di dje.—Galationan 4:25; Hebreonan 13:14.

Muestranan Adelantá di Pas Duradero

23. Pakico nos mester ta interesá ainda den Jerusalem?

²³ Despues di a repasá Jerusalem terenal su historia antiguo, bo no por nenga cu e stad a cumpli cu e nificacion di su nomber—“Posesion [of, Fundeshi] di Pas Dòbel”—durante Rey Sálomon su reinado pacífico. Sin embargo, esei tabata djis un muestra adelantá dje pas i prosperidad cu stimadónan di Dios, kendenan lo biba riba un tera transformá den un paradijs, pronto lo disfrutá di dje.—Lucas 23:43.

24. Kico nos por siña for dje condicionnan cu a prevalecé tempu cu Sálomon tabata reina?

²⁴ Salmo 72 ta reflehá e condicionnan cu a prevalecé durante Rey Sálomon su reinado. Pero e cantica bunita ei ta un profecia di bendicionnan pa humanidad bou dje gobernacion celestial dje Mesías, Jesucristo. E salmista a canta di dje: “Den su dianan e hustu lo spruit, i e abundancia di pas te cu luna no t’ei mas. . . . Lo e libra esun pober cu ta sclama pa yudansa, tambe esun afligí i ken cu no tin yudante. Lo e sinti duele di esun di condicion humilde i esun pober, i e alma di esnan pober lo e salba. For di opresion i for di violencia lo e rescatá nan alma, i nan sanger lo ta precioso den su bista. Lo yega di tin abundancia di grano riba tera; riba top dje cerunan lo tin sobreabundancia.”—Salmo 72:7, 8, 12-14, 16.

25. Pakico nos mester kier siña mas tocante Jerusalem?

²⁵ Cuantu consuelo i speransa e palabranan ei ta duna stimadónan di Dios den Jerusalem of cualkier otro caminda riba tera! Bo por ta entre esnan cu lo disfrutá di pas mundial bou dje Reino Mesiánico di Dios. Conocimentu di Jerusalem su pasado por yuda nos comprendé e propósito di Dios pa humanidad. E siguiente artículonan lo enfocá riba sucesonan cu a tuma lugá den e di shete i ocho década despues cu e hudiunan a regresá for di exilio babilónico. Esaki ta duna consuelo na tur esnan cu ta deseá di rindi adoracion aceptabel na Jehova Dios, e Gran Rey.

[Nota]

Bo Ta Corda?

◻ Con Jerusalem a bira e lugá dje “trono di Jehova”?

◻ Ki papel significativo Sálomon tabatin den promové adoracion puru?

◻ Con nos sa cu Jerusalem a stop di ta e centro di Jehova su adoracion?

◻ Pakico nos ta interesá pa siña mas tocante Jerusalem?

[Plachi na página 10]

E Stad di David tabata riba un lomba di ceru parti sur, pero Sálomon a expandé e stad parti nort i a construí e tempel

[Rekonosementu]

Pictorial Archive (Near Eastern History) Est.

[Rekonosementu pa Potrèt na página 8]

Pictorial Archive (Near Eastern History) Est.