No Laga Fayo di Otro Hende Pone Bo Trompeká

1, 2. Kon Beibel a profetisá di e oumento di e pueblo di Yehova?

YEHOVA su fiel sirbidónan riba tera, esta, su Testigunan, ta forma parti di un organisashon ku sin duda ta masha spesial. Ta bèrdat ku e ta konsistí di hende ku ta imperfekto i ku ta faya. Apesar di esei, e spiritu santu di Dios ta yuda su kongregashon mundial pa sigui krese i bai dilanti. Aunke Yehova su pueblo ta imperfekto, el a logra kosnan maravioso ku nan. Ban wak algun ehèmpel.

² Tempu ku e último dianan di e sistema aktual a kuminsá na 1914, tabatin masha poko sirbidó di Dios riba tera. Pero Yehova a bendishoná nan trabou di prediká. Durante e dékadanan ku a sigui, miónes di hende a siña e bèrdatnan di Beibel i a bira Testigu di Yehova. Yehova a profetisá tokante e oumento remarkabel akí, bisando: “Esun di mas chikitu lo bira un tribu, i esun di mas ménos lo bira un nashon poderoso. Na su debido tempu, ami, SEÑOR, lo pura hasi esaki.” (Isa. 60:22) E profesia ei sin duda a kumpli den e último dianan akí. Na mundu tin hopi pais ku tin ménos habitante ku e kantidat total di Testigu di Yehova.

 3. Kon e sirbidónan di Dios a mustra amor?

³ Durante e último dianan akí, Yehova a yuda su pueblo kultivá mas amor, ku ta Su kualidat prinsipal. (1 Huan 4:8) Hesus, kende a imitá Dios su amor, a bisa su siguidónan: “Mi ta duna boso un mandamentu nobo: stima otro . . . Na esaki tur hende lo sa ku boso ta mi disipelnan, esta, si boso ta stima otro.” (Huan 13:34, 35) Nan amor pa otro tabata spesialmente importante den nos époka ora ku nashonnan a bai guera kontra otro. Por ehèmpel, den Segundo Guera Mundial so mas o ménos 55 mion hende a ser matá. Pero Testigunan di Yehova sí no a partisipá den e matansa global ei. (Lesa Mikéas 4:1, 3.) Esaki a yuda nan keda liber di ‘kulpa di sanger di hende.’—Echo. 20:26.

 4. Dikon e oumento di e pueblo di Yehova ta remarkabel?

⁴ E pueblo di Dios ta sigui bai padilanti maske nan ta biba den un mundu kruel. Beibel ta bisa ku mundu ta bou di kontrol di Satanas, “e dios di e mundu akí.” (2 Kor. 4:4) E ta dirigí e sistema polítiko i medionan di komunikashon di e mundu akí. Pero, e no por para e trabou di prediká e bon notisia. Ma komo ku e sa ku a ked’é masha poko tempu, e ta buska tur manera pa stroba nos di sirbi Yehova.—Rev. 12:12.

 5. Dikon tin biaha otro hende por hùrt nos? (Wak e promé plachi.)

⁵ E kongregashon kristian ta enfatisá e importansia di tin amor pa Dios i pa próhimo. Hesus a indiká esei ora un hòmber a puntr’é kua ta e mandamentu di mas grandi di Lei. El a kontest’é: “‘Stima Yehova bo Dios ku henter bo kurason, ku henter bo alma i ku henter bo mente.’ Esaki ta e mandamentu di mas grandi i esun di promé. E di dos, igual kuné, ta esaki: ‘Stima bo próhimo meskos ku bo mes.’” (Mat. 22:35-39) Sinembargo, Beibel ta mustra bon kla ku nos tur ta nase imperfekto pasobra Adam a peka. (Lesa Romanonan 5:12, 19.) Pues, tin biaha un ruman por bisa òf hasi algu ku por hùrt nos. Esaki por pone nos lealtat na Yehova i na su pueblo na prueba. Kiko nos lo hasi den situashonnan asina? Asta fiel sirbidónan di Dios di pasado a bisa òf hasi kos ku a hùrt otro hende, i nos por siña hopi for di loke Beibel ta bisa di esei.

 6. Kon Elí a faya ora di disipliná su yunan?

⁶ Por ehèmpel, Sumo Saserdote Elí tabatin dos yu hòmber ku no tabata respetá e leinan di Yehova. E relato di Beibel ta konta: “E yunan di Eli tabata malechor di bèrdè i nan no tabatin kunes ku SEÑOR.” (1 Sam. 2:12, BPK ) Maske nan tata a hunga un ròl importante den promové adorashon berdadero, nan a kometé pikánan grave. Elí tabata sa di esei, i e mester a disipliná nan, pero el a neglishá esei. Komo resultado, Dios a duna e famia di Elí un mensahe fuerte di kondenashon. (1 Sam. 3:10-14) Ku tempu, su desendientenan no tabatin mag di sirbi mas komo sumo saserdote. Si bo tabata biba den e tempu ei i a mira kon Elí a tolerá e pikánan di su yunan, kon lo bo a reakshoná? Lo bo a laga esei pone bo trompeká i stòp di sirbi Yehova?

 7. Ki piká grave David a kometé, i kiko Dios a hasi al respekto?

⁷ Yehova tabata stima David, i David tabata un hòmber ku a agradá Su kurason. (1 Sam. 13:13, 14; Echo. 13:22) Pero mas despues David a kometé adulterio ku Bètsabé, i el a sali na estado. Esaki a sosodé miéntras ku su esposo, Urías, tabata leu for di kas, sirbiendo den e ehérsito. Ora Urías a bini kas pa un tempu, David a purba di pon’é tene relashon ku Bètsabé pa laga parse ku ta Urías tabata tata di e yu. Urías no kier a hasi loke e rei a sugerié, p’esei David a manda pa laga mat’é den bataya. David a paga karu pa e krímen ei, i e ku su famia a sufri e konsekuensianan. (2 Sam. 12:9-12) Apesar di esei, Dios a mustra miserikòrdia na dje pasobra por lo general el a kana ku Yehova “den integridat di kurason.” (1 Rei. 9:4) Si bo tabata parti di e pueblo di Dios e tempu ayá, kon lo bo a reakshoná? E mal kondukta di David lo a pone bo trompeká?

 8. (a) Den ki manera apòstel Pedro a keda sin kumpli ku su palabra? (b) Maske Pedro a faya, dikon Yehova a sigui us’é?

⁸ Un otro ehèmpel bíbliko ta esun di apòstel Pedro. Hesus a skoh’é komo apòstel; tòg tin biaha Pedro a bisa òf hasi kos ku despues a duel e. Por ehèmpel, e apòstelnan a bandoná Hesus na un momento masha krusial. Mas promé, Pedro a bisa ku maske e otro apòstelnan hasi esei, e sí lo no hasié. (Mar. 14:27-31, 50) Ma ora nan a arestá Hesus, tur e apòstelnan, inkluso Pedro, a bai lag’é. Pa kolmo, vários biaha Pedro a nenga ku e tabata konosé Hesus. (Mar. 14:53, 54, 66-72) Sinembargo, Pedro a sinti remordimentu, i Yehova a sigui us’é. Si den e tempu ei bo tabata un disipel i bo tabata na haltura di loke Pedro a hasi, lo bo a keda leal na Yehova?

 9. Dikon bo ta konfia ku Yehova semper ta hasi loke ta hustu?

⁹ E personanan ku nos a menshoná ta djis algun ehèmpel di hende ku a hùrt otronan. Tin hopi kaso similar, tantu den siglonan pasá komo den nos tempu, kaminda sirbidónan di Yehova a faya barbaramente i a hùrt otro hende. E punto ta: Kon abo lo reakshoná? Lo bo laga nan fayonan pone bo trompeká i bandoná Yehova i su pueblo, inkluso e rumannan di bo kongregashon? Òf lo bo rekonosé ku Yehova por laga tempu pasa pa permití esnan ku a faya arepentí, i ku na su debido tempu, lo e korigí e situashon na un manera hustu? Di otro banda, tin biaha hende ku a peka gravemente ta rechasá Yehova su miserikòrdia i no ke arepentí. Den tal kaso, lo bo konfia ku Yehova lo husga e personanan ei, kisas ekspulsando nan for di e kongregashon?

10. Kiko Hesus a realisá di e fayonan di Hudas i di Pedro?

¹⁰ Beibel ta konta di hopi sirbidó di Dios ku a keda leal na dje apesar ku hende rònt di nan a faya gravemente. Por ehèmpel, despues ku Hesus a pasa henter anochi ta hasi orashon na su Tata, el a skohe e 12 apòstelnan. Hudas Iskariot tabata un di nan. Hesus no a laga e echo ku Hudas a traishon’é ni e echo ku Pedro a neng’é daña su relashon ku su Tata, Yehova. (Luk. 6:12-16; 22:2-6, 31, 32) E tabata sa ku e fayonan ei no tabata Yehova su falta ni di Su pueblo. Hesus a sigui hasi su trabou maravioso apesar ku algun di su siguidónan a desapunt’é. Yehova a rekompensá Hesus ora el a resusit’é i asina habri kaminda pa e bira Rei di e Reino selestial.—Mat. 28:7, 18-20.

11. Kiko Beibel a profetisá tokante e sirbidónan di Yehova den e tempu akí?

¹¹ Hesus tabatin bon motibu pa konfia den Yehova i den Su pueblo. I awe, nos tambe tin bon motibu pa hasi esei. Sí, ora nos analisá e kosnan ku Yehova ta logrando den e último dianan akí mediante su sirbidónan, nos ta keda masha impreshoná. No tin niun otro grupo di hende ku ta prediká e bèrdat na un eskala mundial, pasobra otronan no tin e guia di Yehova manera su kongregashon uní awe. Isaías 65:14 ta deskribí e kondishon spiritual di e pueblo di Dios: “Mira, mi sirbidónan lo dal gritu di goso ku un kurason kontentu.”

12. Kon nos mester mira fayo di otro hende?

¹² E sirbidónan di Yehova ta felis pa motibu di e bon kosnan ku nan por logra pa medio di su guia. Na kontraste, e mundu ku ta bou di influensia di Satanas ta na luto, na moda di papia, pa motibu di e situashon ku ta birando mas i mas malu. Pues, lo no ta niun tiki sabí pa kulpa Yehova òf su kongregashon djis pasobra algun di su sirbidónan a faya. Nos mester keda leal na Yehova i na su organisashon i siña kon pa mira e fayonan di otro hende i kon pa reakshoná ora hende faya.

13, 14. (a) Dikon nos mester tene pasenshi ku otro? (b) Ki promesa nos ke tene na mente?

¹³ Kiko nos por hasi anto ora un sirbidó di Dios bisa òf hasi algu ku ta hùrt nos? Un prinsipio bíbliko ta bisa: “No sea lihé den bo kurason pa rabia, pasobra rabia ta biba den pechu di hende bobo.” (Ekl. 7:9) Nos mester kòrda ku nos ta bibando mas o ménos 6.000 aña for di e tempu ku hende tabata perfekto den e hòfi di Edén. Hende imperfekto tin e tendensia di faya. Pues, lo no ta lógiko pa nos ferwagt demasiado di nos rumannan i laga nan fayonan kita e goso ku nos tin di ta parti di e pueblo di Dios den e último dianan akí. Anto pió ainda pa laga fayo di otro hende pone nos trompeká i bandoná Yehova su organisashon. Si esei sosodé, nos lo pèrdè tantu e oportunidat di hasi Dios su boluntat komo e speransa di biba pa semper den Dios su mundu nobo.

¹⁴ Pa nos por mantené nos goso i speransa firme, nos mester tene bon kla na mente e promesa konsolador akí di Yehova: “Mira, mi ta krea shelunan nobo i un tera nobo; i e kosnan di ántes lo no wòrdu rekordá mas ni bini na memoria.” (Isa. 65:17; 2 Ped. 3:13) No laga fayo di otro hende stroba bo di haña e bendishonnan akí.

15. Kiko Hesus a bisa ku nos mester hasi ora otro hende faya kontra nos?

¹⁵ Sinembargo, komo ku ainda nos no ta den e mundu nobo, nos mester analisá kiko Dios ke pa nos hasi ora un hende bisa òf hasi algu ku a hùrt nos. Por ehèmpel, un prinsipio ku nos mester tene na mente ta loke Hesus a bisa: “Si boso ta pordoná hende nan faltanan, boso Tata selestial tambe lo pordoná boso; ma si boso no ta pordoná hende nan faltanan, boso Tata tampoko lo no pordoná boso faltanan.” Kòrda tambe ku ora Pedro a puntra Hesus si ta “te ku shete biaha” e tin ku pordoná, Hesus a kontest’é: “Mi ta bisa bo: No te ku shete biaha, sino te ku 77 biaha.” Klaramente anto Hesus tabata ke men ku semper nos mester ta dispuesto pa pordoná; esei ta e promé kos ku nos tin ku hasi.—Mat. 6:14, 15; 18:21, 22.

16. Ki bon ehèmpel Yosef a pone?

¹⁶ Yosef, e promé yu ku Yakòb a haña ku Rakel, a pone un bon ehèmpel di kiko pa hasi ora hende faya kontra nos. E dies mitar ruman hòmbernan di Yosef tabata yalurs pasobra nan tata tabata stima Yosef mas ku nan. P’esei nan a bend’é komo katibu. Ma despues di hopi aña, e bon trabou ku Yosef a hasi na Egipto a pone ku el a bira e di dos hòmber di mas importante na Egipto. Tempu ku hamber a kuminsá reina den e region, e rumannan di Yosef a bai Egipto pa kumpra kuminda pero nan no a rekonos’é. Yosef por a usa su outoridat pa tuma vengansa pa e manera malu ku nan a trat’é. En bes di esei, el a tèst su rumannan pa wak si nan aktitut a kambia. Ora el a mira ku su rumannan di bèrdat a kambia, el a identifiká su mes. Despues el a bisa: “‘No tene miedu. Lo mi sòru pa boso i pa boso yunan.’” Anto e relato di Beibel ta agregá: “Jozef a papia ku nan ku hopi kariño; asin’ei el a trankilisá nan.”—Gén. 50:21, BPK.

17. Kiko bo mester hasi ora otro hende faya kontra bo?

¹⁷ Ta bon pa nos kòrda ku ya ku nos tur ta faya, nos tambe por hùrt otro hende. Ora nos realisá ku nos a hasi esei, Beibel ta konsehá nos pa bai serka e persona ku nos a hùrt i purba di drecha asuntu. (Lesa Mateo 5:23, 24.) Nos ta keda kontentu ora otro hende ta pordoná nos, pues nos tambe mester hasi meskos. Kolosensenan 3:13 ta urgi nos: “Sigui soportá otro i pordoná otro libremente, asta si un di boso tin motibu pa keha un otro. Meskos ku Yehova a pordoná boso libremente, boso tambe mester hasi meskos.” Promé Korintionan 13:5 ta bisa ku amor kristian “no ta keda kòrda e malu ku hende a hasié.” Pues si nos ta pordoná otro hende, Yehova lo pordoná nos. Sí, ora un hende faya kontra nos, e kos korekto pa nos komo kristian hasi ta imitá nos Tata miserikòrdioso su manera di trata ku nos ora nos faya.—Lesa Salmo 103:12-14.