“E Chikitu” A Bira “Mil”

“E chikitu mes lo bira mil, i esun menor un nacion poderoso.”—ISAIAS 60:22.

1, 2. (a) Di con scuridad ta cubri e tera awe? (b) Den ki manera Jehova su lus a briya progresivamente riba su pueblo?

“SCURIDAD mes lo cubri e tera, i tiniebla denso lo cubri gruponan nacional; pero Jehova lo briya riba bo, i su propio gloria lo ser mirá riba bo.” (Isaías 60:2) E palabranan aki ta un bon descripcion dje situacion riba tera desde 1919. Cristiandad a rechasá e señal dje presencia real di Jesucristo, “e lus di mundu.” (Juan 8:12; Mateo 24:3) Pa motibu dje “gran rabia” di Satanas, hefe di “e gobernantenan dje mundu dje scuridad aki,” siglo 20 tabata e tempu mas cruel i destructivo den historia di hende. (Revelacion 12:12; Efesionan 6:12) Mayoria hende ta biba den scuridad spiritual.

² Tog, tin un lus ta briya awe. Jehova ta “briya” riba su sirbidónan, e resto ungí, cu ta e representantenan terenal di su “muher” spiritual. (Isaías 60:1) Specialmente desde nan liberacion for di cautiverio babilónico na 1919, e resto ungí aki a reflehá e gloria di Dios i a ‘laga nan lus briya dilanti hende.’ (Mateo 5:16) Di 1919 te 1931, lus di Reino a briya mas i mas cla segun cu nan a deshací dje sobrá cadenanan di pensamentu babilónico. Nan a aumentá i a bira dies di miles miéntras Jehova a cumpli cu su promesa: “Sin falta lo mi trece huntu e restante di Israel. Den unidad lo mi pone nan, manera trupa den curá, manera un tou meimei di su cunucu di yerba; nan lo borotá di hende.” (Mikéas 2:12) Na 1931, e gloria di Jehova riba su pueblo a bira asta mas evidente ora nan a aceptá e nomber Testigonan di Jehova.—Isaías 43:10, 12.

 3. Con a bira bisto cu Jehova su lus lo a briya riba otro hende fuera di esnan ungí?

³ Jehova lo briya solamente riba e resto dje “trupa chikitu”? (Lucas 12:32) No. E edicion di E Toren di Vigilancia di 1 di september 1931, a señalá na un otro grupo. Den un bunita splicacion di Ezekiel 9:1-11, el a mustra cu e homber cu e pochi di ink di skirbi mencioná den e versículonan ei ta representá e resto ungí. Ken ta esnan cu e “homber” ei ta marca riba frenta? “Otro carnénan,” esnan cu tin e speransa di biba pa semper riba un tera paradísico. (Juan 10:16; Salmo 37:29) Na 1935, a dicerní cu e grupo aki di “otro carnénan” ta e “multitud grandi . . . for di tur nacion” cu apostel Juan a mira den vision. (Revelacion 7:9-14) For di 1935 te awor, a enfocá hopi atencion riba e recogementu dje multitud grandi.

 4. Ken ta e “reynan” i e “nacionnan” na cua Isaías 60:3 ta referí?

⁴ Isaías su profecia ta referí n’e trabou di recogementu aki ora e ta bisa: “Nacionnan siguramente lo acudí na bo lus, i reynan n’e resplandor di bo briyamentu.” (Isaías 60:3) Ken ta e “reynan” mencioná aki? E resto dje 144.000 cu, huntu cu Jesucristo, ta co-heredero dje Reino celestial i cu a hiba delantera den e trabou di duna testimonio. (Romanonan 8:17; Revelacion 12:17; 14:1) Awe, e “nacionnan,” esta, esnan cu tin un speransa terenal cu ta acudí na Jehova pa instruccion i cu ta invitá otro hende pa haci mescos, ta surpasá na gran cantidad e poco mil dje resto ungí cu a sobra.—Isaías 2:3.

Jehova Su Sirbidónan Celoso

 5. (a) Ki echonan ta mustra cu e celo di Jehova su pueblo no a mengua? (b) Cua paisnan tabatin aumentonan sobresaliente na 1999? (Mira e cuadro na página 17 pa 20.)

⁵ Esta un celo Jehova su Testigonan di tempu moderno a demostrá durante henter siglo 20! I apesar di preshon aumentante, nan celo no a mengua segun cu aña 2000 tabata acercá. Ainda nan ta tuma masha na serio Jesus su mandamentu: “Haci disipel di hende di tur nacion.” (Mateo 28:19, 20) E cantidad di publicadó activo dje bon nobo den e último aña di sirbishi di siglo 20 a alcansá un máximo nobo di 5.912.492. Nan a dedicá e cantidad remarcabel di 1.144.566.849 ora papiando cu otro hende tocante Dios i su propósitonan. Nan a haci 420.047.796 rebishita cerca hende interesá i a conducí 4.433.884 studio di Bijbel grátis. Ki un registro maraviyoso di sirbishi celoso!

 6. Ki areglo nobo a haci pa pioneronan, i kico tabata e reaccion?

⁶ Januari pasá, e Cuerpo Gobernante a anunciá un ahuste den e rekisito di ora pa pionero. Hopi ruman a probechá di esaki pa drenta e fila di pionero regular of auxiliar. Por ehempel, durante e promé cuater lunanan di 1999, sucursal di Hulanda a ricibí cuater bes mas tantu solicitud pa pionero regular cu durante e mésun periodo un aña anterior. Ghana ta informá: “For di dia e meta nobo di ora pa pionero a drenta na vigor, e fila di nos pioneronan regular a sigui aumentá.” Den e aña di sirbishi di 1999, e cantidad di pionero rond mundu a alcansá 738.343, un demostracion maraviyoso di ‘celo pa obranan excelente.’—Tito 2:14.

 7. Con Jehova a bendicioná e actividad celoso di su sirbidónan?

⁷ Jehova a bendicioná e actividad celoso aki? Sí. E ta bisa mediante profeta Isaías: “Hisa bo wowonan tur rond i mira! Nan tur a ser trecé huntu; nan a bini cerca bo. For di leu bo propio yu hombernan ta sigui bini, i bo yu muhernan cu lo ser cuidá na banda.” (Isaías 60:4) E “yu hombernan” i “yu muhernan” ungí cu a ser recogé, ainda ta sirbi Dios lealmente. I awor, Jesus su otro carnénan ta ser recogé banda di Jehova su “yu hombernan” i “yu muhernan” ungí den 234 pais i isla.

“Tur Bon Obra”

 8. Den ki “bon obra” Testigonan di Jehova ta activo?

⁸ Cristiannan tin e responsabilidad di predicá e bon nobo di Reino i yuda hende interesá bira disipel. Pero nan ta “ekipá pa tur bon obra.” (2 Timoteo 3:17) Pues, nan ta percurá amorosamente pa nan famia, mustra hospitalidad i bishitá esnan enfermo. (1 Timoteo 5:8; Hebreonan 13:16) I boluntarionan ta enbolbí den proyectonan manera construccion di Salon di Reino—un trabou cu tambe ta duna testimonio. Na Togo, despues dje construccion di un salon, e personanan responsabel pa un misa carismático local kier a sa pakico Testigonan di Jehova por a construí nan mes edificionan miéntras cu e iglesia tabatin cu contratá hende pa haci esaki! Togo ta informá cu e construccion di Salon di Reino di bon calidad tin un efecto asina positivo riba e becindario cu algun hende ta purba huur of traha cas den barionan caminda e rumannan ta bai construí salon.

 9. Con Testigonan di Jehova a respondé ora di desaster?

⁹ Tin bes, ta un otro clase di bon obra ta necesario. Durante e último aña di sirbishi, desaster a asotá hopi pais, i frecuentemente e proménan na e esena pa duna auxilio tabata Testigonan di Jehova. Por ehempel, horcan Mitch a destruí gran parti di Hondúras. Rápidamente, e sucursal a forma comiténan di emergencia pa coordiná e esfuersonan pa duna yudansa. Testigonan na Hondúras i hopi otro pais a haci donacion di paña, cuminda, remedi i otro artículonan básico. Comiténan Regional di Construccion a usa nan abilidadnan pa reconstruí casnan. Den corto tempu a yuda nos rumannan cu tabata víctima dje desaster regresá na nan actividadnan regular. Na Ecuador, Testigonan di Jehova a sali na yudansa di nan rumannan ora inundacionnan serio a destruí algun cas. Despues di observá e sistema eficiente cu nan a trata cu e situacion, un oficial di gobiernu a bisa: “Si mi tabatin e grupo aki, lo mi a haci milager! Hende manera boso mester ta na tur parti di mundu.” E bon obranan ei ta trece alabansa na Jehova Dios i ta evidencia di nos “debocion piadoso [cu] ta beneficioso pa tur cos.”—1 Timoteo 4:8.

Nan “Ta Bini Bulando Net Manera un Nubia”

10. Apesar cu e cantidad di ungí ta baha, pakico Jehova su nomber ta ser declará mas cu nunca promé?

¹⁰ Jehova ta puntra awor: “Ken ta esakinan cu ta bini bulando net manera un nubia, i manera palomba n’e buracunan di nan kouchi? Pasobra riba mi e islanan mes lo sigui spera, tambe e barcunan di Társis manera na principio, pa trece bo yunan for di leu . . . Stranheronan realmente lo edificá bo murayanan, i nan mes reynan lo sirbi bo.” (Isaías 60:8-10) Esnan promé pa respondé riba Jehova su ‘briyamentu’ tabata su “yu hombernan,” cristiannan ungí. Despues a bini e “stranheronan,” e multitud grandi, cu ta sirbi nan rumannan ungí lealmente, i ta sigui nan direccion den predicá e bon nobo. Pues, aunke e cantidad di ungí ta bahando, Jehova su nomber ta ser declará rond mundu manera nunca promé.

11. (a) Kico ta continuando ainda i cu ki resultado na 1999? (b) Cua paisnan tabatin cifranan sobresaliente di bautismo pa 1999? (Mira e cuadro na página 17 pa 20.)

¹¹ Como resultado, miyones di hende ta basha bini “manera palomba n’e buracunan di nan kouchi,” hañando refugio den e congregacion cristian. Cientos di miles di hende ta bini acerca tur aña, i e caminda ta habrí pa asta mas ainda. Isaías ta bisa: “Bo portanan realmente lo keda habrí constantemente; lo no cera nan ni di dia ni di anochi, pa trece na bo e recursonan dje nacionnan.” (Isaías 60:11) Aña pasá, 323.439 persona a bautisá como símbolo di nan dedicacion na Jehova, i ainda e no a cera porta. “E cosnan deseabel di tur e nacionnan,” esta, miembronan dje multitud grandi, ainda ta pasa dor di nan na cantidad. (Ageo 2:7) No ta rechasá ningun hende cu kier bandoná scuridad. (Juan 12:46) Ohalá niun di esakinan nunca perde nan aprecio p’e lus!

Sin Miedu Apesar di Oposicion

12. Con esnan cu ta stima scuridad a purba paga e lus?

¹² Esnan cu ta stima scuridad ta odia e lus di Jehova. (Juan 3:19) Algun asta ta purba paga e lus ei. Esei ta algu di spera. Asta Jesus, “e berdadero lus cu ta duna lus na tur sorto di hende,” a ser cherchá, oponé i finalmente matá pa su paisanonan. (Juan 1:9) Atrabes di siglo 20, Testigonan di Jehova tambe a ser cherchá, encarcelá, prohibí, asta matá, segun cu nan a reflehá Jehova su lus fielmente. Den añanan recien, opositornan a recurí na plama mentira den medionan di comunicacion tocante esnan cu ta reflehá e lus di Dios. Algun persona kier pone hende kere cu Testigonan di Jehova ta peligroso i mester restringí of prohibí nan. E opositornan ei a logra?

13. Dor di presentá echonan relacioná cu nos trabou na medionan di comunicacion discretamente, kico tabata e resultado?

¹³ No. Caminda ta apropiado, Testigonan di Jehova a acudí na medionan di comunicacion pa splica e echonan. Como resultado, a publicá Jehova su nomber ampliamente den korant i revista i na radio i television. Esaki tabatin bon resultado den e trabou di predicá. Na Dinamarca, por ehempel, un programa na television nacional a trata cu e tema “Pakico e fe di danesnan ta menguando.” Huntu cu representantenan di otro religion, a entrevistá Testigonan di Jehova. Despues, un señora cu a mira e programa a comentá: “Tabata masha bisto ken tabatin e spiritu di Dios.” A cuminsá un studio cuné.

14. Pa nan disgustu, kico opositornan lo haña nan ta reconocé djis akí?

¹⁴ Testigonan di Jehova sa cu hopi hende den e mundu aki lo oponé nan. (Juan 17:14) Pero, e profecia di Isaías ta fortalecé nan: “Di buig mester bini na bo e yu hombernan di esnan cu a afligí bo; i tur esnan cu a trata bo cu falta di respet tin cu buig na bo plant’i pia mes, i nan lo tin cu yama bo e stad di Jehova, Síon dje Santu di Israel.” (Isaías 60:14) Pa nan disgustu, djis akí opositornan lo tin cu reconocé cu en realidad, nan tabata lucha contra Dios mes. Ken por gana un bataya asina?

15. Con Testigonan di Jehova ta “bebe e lechi dje nacionnan,” i con esaki a keda reflehá den nan trabou di siña i evangelisá?

¹⁵ Jehova ta primintí mas aleu: “Lo mi asta pone bo como un cos di orguyo te na tempu indefiní . . . Realmente lo bo bebe e lechi dje nacionnan, i na pechu di reynan lo bo bebe; i sigur lo bo sa cu ami, Jehova, ta bo Salbador.” (Isaías 60:15, 16) Sí, Jehova ta e Salbador di su pueblo. Si nan dependé riba dje, nan lo dura “te na tempu indefiní.” I nan lo “bebe e lechi dje nacionnan,” usando cierto recursonan disponibel p’e adelanto di adoracion berdadero. Por ehempel, uso sabí di computer i di tecnologia di comunicacion ta facilitá e publicacion simultáneo di E Toren di Vigilancia den 121 idioma i Spierta! den 62. A diseñá un cierto programa di computer pa yuda traducí e Traduccion di Mundu Nobo den idiomanan nobo, i e traduccionnan ei ta trece hopi goso. Ora a presentá e version croata dje Scritura Griego Cristian na 1999, miles di hende a drama lágrimanan di goso. Un ruman homber di edad a bisa: “Hopi tempu mi a warda riba e Bijbel aki. Awor mi por muri na pas!” E circulacion dje Traduccion di Mundu Nobo, sea completo of en parti, a pasa 100 miyon den 34 idioma.

Normanan Moral Haltu

16, 17. (a) Aunke ta difícil, pakico ta vital pa mantené Jehova su normanan haltu? (b) Ki experencia ta ilustrá cu hóbennan por evitá di laga mundu contaminá nan?

¹⁶ Jesus a bisa: “Esun cu ta practicá cosnan baho ta odia e lus.” (Juan 3:20) Di otro banda, esnan cu ta permanecé den e lus ta stima Jehova su normanan haltu. Jehova ta bisa pa medio di Isaías: “En cuanto bo pueblo, nan tur lo ta hustu.” (Isaías 60:21a) Por ta un reto pa mantené normanan hustu den un mundu caminda ta reina inmoralidad sexual, gañamentu, golosidad i orguyo. Por ehempel, den algun pais, economia ta florecé i ta fácil pa desviá i bai concentrá solamente riba acumulá rikesa. Sin embargo, Pablo a spierta: “Esnan cu ta determiná di bira ricu ta cai den tentacion i un trampa i hopi deseo insensato i perhudicial, cu ta tira hende den destruccion i ruina.” (1 Timoteo 6:9) Ta masha tristu ora un hende haña su mes asina profundamente enbolbí den empresanan comercial cu e ta sacrificá e cosnan berdaderamente importante, manera asociacion cristian, sirbishi sagrado, principio moral i responsabilidad di famia!

¹⁷ Por ta specialmente difícil pa hóbennan mantené normanan hustu, ora asina tantu di nan pareunan ta enbolbí den uso di droga i inmoralidad. Na Surnam, un mucha homber cu bon tipo a acercá un hobencita di 14 aña i a invit’é pa tene relacion sexual. El a nenga, splicando cu Bijbel ta prohibí cosnan asina pafó di matrimonio. Otro mucha muhernan na scol a haci mofa di dje i a purba pone preshon riba dje p’e cambia di idea, bisando cu tur hende kier a drumi cu e cierto mucha homber ei. Pero, e hobencita a para firme. Un par di siman despues, a diagnosticá e mucha homber cu e vírus di HIV i el a bira hopi malu. E hobencita tabata contentu cu el a obedecé Jehova su mandamentu pa ‘abstené di fornicacion.’ (Echonan 15:28, 29) Testigonan di Jehova ta mashá orguyoso dje hóbennan entre nan cu ta para firme pa loke ta corecto. Nan fe, i fe di nan mayornan, ‘ta embeyesé’—ta trece onor na—Jehova Dios su nomber.—Isaías 60:21b.

Jehova A Duna e Aumento

18. (a) Ki cos grandi Jehova a haci pa su pueblo? (b) Ki evidencia tin cu e crecementu ei lo sigui, i ki prospectonan glorioso ta warda esnan cu ta keda den e lus?

¹⁸ Sí, Jehova ta drama lus riba su pueblo, i ta bendicioná nan, guia nan i fortalecé nan. Durante siglo 20, nan a mira e cumplimentu dje palabranan di Isaías: “E chikitu mes lo bira mil, i esun menor un nacion poderoso. Ami mes, Jehova, lo aceler’é na su debido tempu.” (Isaías 60:22) For dje man yen aya na 1919, “e chikitu” a bira mas cu “mil.” I ainda e no a stop di crece! Aña pasá, 14.088.751 persona a asistí n’e celebracion dje Memorial di Jesus su morto. Hopi di esakinan no tabata Testigo activo. Nos ta contentu cu nan a asistí n’e celebracion importante ei, i nos ta invitá nan pa sigui move den direccion dje lus. Ainda Jehova ta briya cla-cla riba su pueblo. E porta pa su organisacion ta habrí ainda. Laga nos tur anto, sea determiná pa keda cu Jehova su lus. Esta un bendicion esei ta trece awor pa nos! I ki un goso esei lo trece den futuro ora tur creacion lo alabá Jehova i alegrá den e splendor di su gloria!—Revelacion 5:13, 14.

Bo Por Splica?

• Ken a reflehá e gloria di Jehova den e último dianan aki?

• Kico ta indicá cu e celo di Jehova su pueblo no a mengua?

• Cua ta algun bon obra cu Testigonan di Jehova ta ocupá cuné?

• Apesar di oposicion feros, ki confiansa nos tin?

[Tabèl na página 17-20]

RAPORT DI AÑA DI SIRBISHI PA 1999 DI TESTIGONAN DI JEHOVA MUNDIALMENTE

(Wak e edishon imprimí di e revista akí)

[Plachi na página 15]

Ainda hende ta basha bini n’e organisacion di Jehova

[Plachi na página 16]

Nos ta contentu cu Jehova a laga porta hanchu habrí pa esnan cu ta stima lus