E Reino Ta Kumpli ku e Boluntat di Dios Riba Tera

1, 2. (a) Dikon tin biaha por ta difísil pa mira e Paradeis komo un realidat? (b) Kiko por yuda nos fortalesé nos fe den e promesanan di Dios?

UN RUMAN fiel ta yega reunion kansá. E tabatin un dia yen di strès: e trato malu di su shèf eksigente, e retonan pa perkurá pa su famia i preokupashon pa e malesa di su kasá. Ora e muzik di e kantika di introdukshon kuminsá, e ta sinti un alivio i ta hala un rosea profundo, ya ku e ta kontentu di ta na Salòn di Reino huntu ku su rumannan. E kantika ta tokante e speransa di bida den Paradeis, i e letra ta pidié visualisá e speransa akí, sí, pa imaginá su mes den e ambiente ei. Semper el a gusta e kantika akí, i segun ku e ta kant’é huntu ku su famia, e speransa pa futuro ta konsolá su kurason.

² Abo a yega di sinti bo asina? Pa mayoria di nos e kontesta ta sí. Ma nos ta biba den “tempunan krítiko, difísil pa trata kuné,” i mundu no tin nada di paradeis kuné. P’esei kisas ta difísil pa nos mira e binidero Paradeis komo un realidat. (2 Tim. 3:1) Kiko por yuda nos mira nos speransa komo un realidat? Kon nos por sa ku di bèrdat e Reino di Dios pronto lo goberná henter humanidat? Wèl, ban konsiderá algun di e profesianan di Yehova ku su pueblo a mira kumpli den antigwedat. Kaba nos lo wak kon e profesianan ei i otronan similar ta kumpliendo awe tambe. Finalmente, ku un fe mas fuerte, nos lo enfoká riba loke e profesianan ei ta nifiká pa nos futuro.

 3. Ki promesa a konsolá e hudiunan ku tabata den eksilio na Babilonia?

³ Purba di imaginá kon bida tabata pa e hudiunan ku a ser deportá pa Babilonia un 600 aña promé ku Kristu. Hopi di nan, meskos ku nan mayornan, a lanta ei den eksilio i bida tabata pisá. E hendenan di Babilonia tabata hasi bofon di nan pasobra nan tabatin fe den Yehova. (Sal. 137:1-3) Pero atraves di dékadanan, hudiunan leal a keda tene na esun speransa briante akí: Yehova a primintí di hiba su pueblo bèk na nan tera. Yehova a bisa ku einan lo bai tin kondishonnan maravioso. Asta el a kompará e tera restorá di Huda ku e Hòfi di Edén, sí, un paradeis! (Lesa Isaías 51:3.) Ta bisto ku e promesanan ei tabata pa trankilisá e pueblo di Dios, pa kita e dudanan ku lo por tabata molestiá nan kurason. Kon asina? Wèl, laga nos analisá algun profesia spesífiko.

 4. Kiko Yehova a profetisá ku a trankilisá e hudiunan tokante siguridat den nan pais natal?

⁴ Siguridat. E hudiunan deportá lo no a bolbe na un paradeis literal, sino na un tera leu ku tabata desolá pa 70 aña, un tera ku masha poko di nan a yega di mira. Den tempu di Beibel tabatin hopi leon, lobo, leopardo i otro bestia salbahe. Kisas un tata di famia a puntra su mes: ‘Kiko mi tin ku hasi pa mi kasá ku mi yunan por ta safe? Kiko di mi karnénan ku mi bakanan? Kon mi ta hasi protehá nan?’ Ta di komprondé ku e hendenan lo tabatin e preokupashonnan ei. Pero pensa riba e promesa di Dios skirbí na Isaías 11:6-9 i imaginá bo ki un gran konsuelo esei lo mester tabata pa e pueblo. (Les’é.) Ku palabranan poétiko masha bunita, Yehova a sigurá e hudiunan ku nan krio di bestia lo tabata safe. Leon lo a kome yerba den e sentido ku lo e no a habraká e bakanan di e hudiunan. Hende fiel lo no tabatin nada di teme di e bestianan salbahe ei. Yehova a primintí ku su pueblo lo tabata safe den e tera restorá di Huda, sí, asta den desierto i den mondi.—Eze. 34:25.

 5. Kua ta e profesianan ku a duna e hudiunan ku tabata regresá nan pais e siguransa ku Yehova lo a perkurá na abundansia pa nan nesesidatnan?

⁵ Abundansia. Lo por a surgi otro preokupashon tambe. Un hudiu lo por a puntra su mes: ‘Den e tera restorá lo tin kuminda pa mi duna mi famia? Unda nos ta bai biba? Lo tin trabou, i lo e ta mihó ku e trabou laf i pisá ku nos tin bou di dominio di e hendenan ku a konkistá nos?’ Via profesianan inspirá, Yehova a kontestá e preguntanan ei tambe bondadosamente. El a primintí ku su pueblo obedesidu lo a haña áwaseru na tempu; komo resultado, e tera lo a produsí pan “riku i abundante.” (Isa. 30:23) Pa loke ta lugá di biba i trabou ku nan por a disfrutá di dje, Yehova a primintí en konekshon ku su pueblo: “Nan lo traha kas i biba den nan; tambe nan lo planta kunukunan di wendrùif i kome nan fruta. Nan lo no traha kas pa otro hende biba aden, ni planta pa otro hende kome.” (Isa. 65:21, 22) Sí, den hopi aspekto nan bida lo a bai ta maravioso kompará ku e periodo ku nan a biba den eksilio na Babilonia pagano. Pero kiko di nan problemanan di mas serio, esnan ku a pone ku nan a ser deportá for di nan tera?

 6. E pueblo di Dios a sufri hopi tempu di ki tipo di problema di salú, i kiko Yehova a sigurá e hudiunan ku tabata regresá nan tera?

⁶ Salú spiritual. Hopi promé ku e pueblo di Dios a ser deportá, nan a bira malu den sentido spiritual. Via profeta Isaías, Yehova a bisa tokante su pueblo: “Henter e kabes ta malu, i henter e kurason ta desmayá.” (Isa. 1:5) Den sentido spiritual, nan tabata siegu i surdu, ya ku nan a sera nan orea pa nan no tende e konseho di Yehova, i nan a sera nan wowo pa nan no haña e iluminashon ku e tabata ofresé nan. (Isa. 6:10; Yer. 5:21; Eze. 12:2) Si e hudiunan ku a regresá nan tera tabatin e mesun problemanan ei, ta ki siguridat nan lo por tabatin? Nan lo no a bolbe pèrdè e aprobashon di Yehova? Yehova a primintí nan algu ku lo mester a trankilisá nan. El a bisa: “Den e dia ei e surdu lo tende palabranan di un buki, i for di nan tiniebla i skuridat wowonan di e siegu lo mira.” (Isa. 29:18) Sí, Yehova lo a trese kurashon spiritual pa su pueblo ku a ser disipliná i ku a arepentí. Tanten ku nan a keda obedesidu i a reakshoná faborablemente, Yehova lo a duna nan instrukshon i iluminashon esensial pa bida.

 7. Kon e promesanan ku Dios a hasi e hudiunan den eksilio a kumpli, i dikon esaki mester hasi nos fe mas fuerte?

⁷ Yehova a kumpli ku su promesanan? Historia ta kontestá esei. E hudiunan ku a regresá nan tera a ser bendishoná ku siguridat, abundansia i bon salú spiritual. Por ehèmpel, Yehova a protehá nan di e pueblonan bisiña ku tabata mas fuerte i mas tantu ku nan. Bestia salbahe no a kaba ku e krionan di bestia di e hudiunan. Ta bèrdat ku e hudiunan ei a mira solamente un kumplimentu limitá di e profesianan di paradeis ku hòmbernan manera Isaías, Yeremías i Ezekiel a skirbi, pero asina mes, e kumplimentu ku e pueblo di Dios a mira tabata emoshonante i presis loke nan tabatin mester e tempu ei. Segun ku nos ta reflekshoná riba loke Yehova a hasi pa su pueblo den e tempu ei, nos fe lo bira mas fuerte. Si e kumplimentu inisial i na eskala limitá mes tabata asina emoshonante, kon e kumplimentu mas grandi lo ta? Ban wak kiko Yehova a hasi pa nos awe.

 8. E sirbidónan di Yehova djawe ta disfrutá di ki tipo di “tera”?

⁸ Awe Yehova su sirbidónan no ta forma un nashon literal, ni nan no ta biba den un solo pais. Mas bien, kristiannan ungí ta forma un nashon spiritual, “e Israel di Dios.” (Gal. 6:16) Nan kompañeronan, e ‘otro karnénan,’ ta djòin nan den Yehova su organisashon ku ta manera un “tera” òf pais spiritual den kua nan ta adorá Yehova Dios na un manera uní. E adorashon ei ta enserá un manera di biba. (Huan 10:16; Isa. 66:8) Anto ta ki tipo di “tera” Yehova a duna nos? Esei ta un paradeis spiritual. Den dje e promesanan di Dios tokante kondishonnan manera tabatin den Hòfi di Edén a haña un kumplimentu spiritual maravioso. Konsiderá algun ehèmpel.

9, 10. (a) Kon e profesia di Isaías 11:6-9 ta kumpliendo awe? (b) Kiko ta duna prueba ku pas ta reina den e pueblo di Dios?

⁹ Siguridat. E profesia na Isaías 11:6-9 ta deskribí un kuadro bunita: hende ku nan bestianan doméstiko lo ta na pas ku bestia salbahe. E kuadro ei tin un kumplimentu spiritual awe? Sí! Versíkulo 9 ta bisa nos dikon e kriaturanan ei lo no kousa daño ni destrukshon: “Pasobra tera lo ta yen di e konosementu di SEÑOR, manera awa ta tapa laman.” ‘Konosementu di Yehova’ por kambia e komportashon di bestia? Nò, ta hende ta ser transformá ora nan siña konosé e Dios Haltísimo i kuminsá imitá su manera pasífiko di aktua. Ta p’esei nos por mira un kumplimentu alentador di e profesia ei den nos paradeis spiritual djawe. E siguidónan di Kristu ta siñando bou di gobernashon di e Reino pa deshasí di nan kualidatnan feros i kruel manera di bestia i pa biba na pas i armonia ku nan rumannan spiritual.

¹⁰ Por ehèmpel, den e buki akí nos a trata e asuntu di nos posishon neutral komo kristian. Nos a konsiderá e base bíbliko pakiko nos tin e postura ei i tambe e persekushon ku e pueblo di Dios a konfrontá pa motibu di esei. Esaki no ta remarkabel? Den e mundu violento akí tin un “nashon” basta grandi di hende ku ta nenga rotundamente, asta bou di menasa di morto, di partisipá den kualke tipo di violensia. Esei ta un prueba notabel ku e siudadanonan di e Rei Mesiániko en bèrdat ta gosa di pas manera Isaías a deskribí. Hesus a deklará ku su siguidónan lo ta konosí pa e amor ku nan tin pa otro. (Huan 13:34, 35) Denter di e kongregashon, Kristu ku pasenshi ta usa su “esklabo fiel i prudente” pa siña tur kristian berdadero pa nan ta hende pasífiko, amoroso i suave.—Mat. 24:45-47.

11, 12. Ki tipo di hamber e mundu djawe ta sufri di dje, pero kon Yehova a perkurá provishon na abundansia pa su pueblo?

¹¹ Abundansia. Mundu ta sufri di hamber spiritual. Beibel a spièrta: “‘Mira, dianan ta bini,’ SEÑOR Dios ta deklará, ‘ku lo mi manda hamber riba e tera; no hamber pa pan ni set pa awa, ma mas bien pa tende e palabranan di SEÑOR.’” (Ámos 8:11) Akaso e siudadanonan di e Reino di Dios tambe ta pasa hamber? Nò. Yehova a profetisá e siguiente kontraste entre su pueblo i su enemigunan: “Mi sirbidónan lo kome, ma boso lo pasa hamber. Mira, mi sirbidónan lo bebe, ma boso lo tin set. Mira, mi sirbidónan lo regosihá, ma boso lo wòrdu brongosá.” (Isa. 65:13) Abo a mira e palabranan ei kumpli?

¹² Nos tin un fluho di provishon spiritual ku ta kore manera un riu ku ta birando mas i mas hanchu i hundu. E provishonnan ei ta konsistí di nos publikashonnan basá riba Beibel, tambe di grabashonnan di oudio i vidio, nos reunionnan i kongresonan i e material publiká riba nos website. Huntu nan ta forma un fluho kontinuo di kuminda spiritual ku ta algu remarkabel den e mundu akí ku ta muriendo di hamber spiritual pa falta di berdadero guia. (Eze. 47:1-12; Yoël 3:18) Bo no ta haña ku ta emoshonante pa mira kon Yehova su promesa ku lo e perkurá provishon na abundansia ta kumpli den bo bida diario? Bo ta sòru di alimentá bo mes ku regularidat na e mesa di Yehova?

13. Kon abo a mira kumplimentu di e promesa di Yehova ku wowo siegu i orea surdu lo habri?

¹³ Salú spiritual. Awe, den sentido spiritual, tin un epidemia mundial di hende siegu i surdu. (2 Kor. 4:4) Pero rònt mundu, Kristu ta kurando enfermedatnan i debilidatnan. Abo a mira wowo siegu i orea surdu habri? Bo a yega di mira hende haña un konosementu eksakto di e bèrdat ku tin den e Palabra di Dios i kita for di e mentiranan religioso ku un tempu tabata hasi nan siegu i surdu pa e bèrdat? Si ta asina, ta e siguiente promesa bo a mira kumpli: “Den e dia ei e surdu lo tende palabranan di un buki, i for di nan tiniebla i skuridat wowonan di e siegu lo mira.” (Isa. 29:18) Tur aña, sientos di míles di hende di tur parti di mundu ta haña e kurashon spiritual ei. Kada hende ku bandoná Babilonia e Grandi i djòin nos pa adorá Yehova den e paradeis spiritual ta un prueba palpabel ku e promesanan di Yehova ta un realidat!

14. Kiko por hasi bo fe mas fuerte?

¹⁴ Kada un di e kapítulonan di e buki akí a presentá evidensia konvinsente ku Kristu a trese su siguidónan huntu den un berdadero paradeis spiritual den e tempu di fin akí. Laga nos sigui meditá riba e tantísimo bendishonnan ku nos ta risibí den e paradeis ei awe. Segun ku nos ta hasi esei, nos fe den Yehova su promesanan pa futuro lo bira mas fuerte.

15. Dikon nos por tin sigur ku e tera lo bira un paradeis?

¹⁵ For di kuminsamentu e propósito di Yehova tabata pa hasi henter e tera un paradeis. El a pone Adam ku Eva den un hòfi manera un paradeis i a duna nan e mandato pa yena e tera ku nan yunan i kuida tur e kriaturanan di e tera. (Gén. 1:28) Na lugá di hasi esei, Adam ku Eva a bai tras di e rebelion di Satanas i a hinka tur nan yunan den imperfekshon, piká i morto. Ma Dios su propósito sí no a kambia nunka. Unabes Yehova bisa algu, su palabranan semper ta kumpli plenamente. (Lesa Isaías 55:10, 11.) Pues, nos por tin sigur ku un dia e desendientenan di Adam ku Eva lo yena e tera akí i tene dominio riba dje. Sí, ku amor nan lo kuida e kreashon di Yehova den un paradeis mundial. Na e tempu ei, e profesianan ku Yehova originalmente a duna e hudiunan deportá tokante bida den kondishonnan manera di un paradeis lo kumpli den tur sentido. Konsiderá e siguiente ehèmpelnan.

16. Kon Beibel ta deskribí e siguridat ku nos lo gosa di dje den Paradeis?

¹⁶ Siguridat. Por fin e kuadro alentador ku Isaías 11:6-9 ta pinta lo kumpli kompletamente, asta den sentido literal. Hende hòmber, muhé i mucha lo ta safe i sigur na unda ku nan bai riba tera. Niun kriatura, sea hende òf bestia, lo no ta un peliger. Imaginá bo un tempu ora ku lo bo por konsiderá henter nos planeta manera bo kas, kaminda bo por landa den riu, lago i laman; krusa seru i kana den sabana sin ku nada malu pasa bo. Anto lo bo no tin nodi di preokupá ora bira anochi. E palabranan di Ezekiel 34:25 lo bira realidat, di manera ku e pueblo di Dios lo por asta “biba trankil den desierto i drumi den e mondinan.”

17. Dikon nos por tin sigur ku Yehova lo perkurá na abundansia pa nos nesesidatnan ora e Reino ta goberná henter e tera?

¹⁷ Abundansia. Imaginá bo un tempu ora ku lo no tin kosnan manera pobresa, ònderstant, desnutrishon ni hamber. E abundansia di kosnan spiritual ku e pueblo di Dios ta disfrutá di dje awe ta un garantia ku e Rei Mesiániko lo alimentá su siudadanonan den tur sentido. Tempu Hesus tabata riba tera, el a demostrá na un eskala chikitu ku e por kumpli ku e promesanan ei, ya ku el a alimentá míles di hende ku tabatin hamber ku djis algun pan i piská. (Mat. 14:17, 18; 15:34-36; Mar. 8:19, 20) Ora e Reino di Dios ta goberná henter e tera, nos lo mira e kumplimentu literal di profesianan manera esun akí: “E lo duna bo áwaseru pa e simia ku lo bo sembra den tera, i pan for di e produkshon di tera, i esaki lo ta riku i abundante. Den e dia ei bo bestianan lo kome den un lugá di yerba bèrdè ku tin hopi espasio.”—Isa. 30:23.

18, 19. (a) Kiko e profesia ku tin na Isaías 65:20-22 ta nifiká pa bo? (b) Den ki sentido nos dianan lo ta “manera e dianan di un palu”?

¹⁸ Awe tin hopi hende ku no por imaginá nan ku un dia nan lo ta doño di un kas kómodo òf ku nan lo haña un trabou agradabel pa hasi ku ta duna nan satisfakshon. Den e mundu korupto akí, hopi hende ta haña ku nan tin ku traha duru i hopi ora pero sin ku nan ta haña berdadero benefisio pa nan mes òf pa nan famia, miéntras ku hende riku i golos pa plaka ta risibí tur e rekompensanan. Imaginá bo kon bida lo ta ora ku e profesia akí kumpli rònt mundu: “Nan lo traha kas i biba den nan; tambe nan lo planta kunukunan di wendrùif i kome nan fruta. Nan lo no traha kas pa otro hende biba aden, ni planta pa otro hende kome; pasobra manera e dianan di un palu, asina e dianan di mi pueblo lo ta; i mi skohínan lo disfrutá di e obra di nan mannan.”—Isa. 65:20-22.

¹⁹ Kiko Beibel ke men ku nos dianan lo ta “manera e dianan di un palu”? Ora bo para banda di e tronkon di un palu grandi, bo no ta keda impreshoná ora bo pensa kuantu tempu e palu ei tin pará einan, kisas hopi promé ku bo bisawelanan mes a nase? Kisas bo ta pensa ku si bo keda imperfekto manera bo ta awor, un palu asina lo biba mas largu ku bo i keda eksistí trankilamente pa hopi tempu, miéntras ku ya bo mes a pasa pa historia. Esta bondadoso di Yehova pa sigurá nos ku den e Paradeis binidero nos dianan lo ta largu i yen di pas! (Sal. 37:11, 29) Lo yega e dia ku asta palu ku ta biba largu lo ta manera yerba pasahero den nos bista, ya ku nan lo t’ei pa djis un tempu miéntras ku nos mes ta sigui biba pa semper!

20. Kon siudadanonan leal di e Reino lo haña salú perfekto?

²⁰ Salú perfekto. Awe, malesa ku morto ta tira un sombra skur riba tur aspekto di e mundu akí. Den un sentido, nos tur ta malu, infektá ku un malesa terminal ku yama piká. E úniko kura pa esei ta e sakrifisio di reskate di Kristu. (Rom. 3:23; 6:23) Durante e Reinado di Mil Aña, Hesus ku su ko-gobernantenan lo yuda hende benefisiá plenamente di e sakrifisio ei, i gradualmente nan lo eliminá tur rastro di piká for di hende fiel. E profesia di Isaías lo kumpli den tur sentido: “Ningun habitante lo no bisa: ‘Mi ta malu’; e pueblo ku ta biba ayanan lo wòrdu pordoná pa nan inikidat.” (Isa. 33:24) Imaginá bo un tempu ora ku niun hende lo no ta siegu, surdu ni mankaron. (Lesa Isaías 35:5, 6.) Lo no tin ni ún malesa ku Hesus no por kura, sea ta malesa físiko, mental òf emoshonal. Siudadanonan leal di e Reino lo gosa di salú perfekto!

21. Kiko lo pasa ku morto, i dikon bo ta haña e promesa ei un gran konsuelo?

²¹ Pero kiko di e posibel konsekuensia di malesa, e resultado inevitabel di piká, esta, morto? Esei ta nos “último enemigu,” e enemigu ku tardi òf trempan tur hende imperfekto ta pèrdè nan bataya kontra dje. (1 Kor. 15:26) Akaso morto ta un atversario ku por intimidá Yehova? Nò. Tuma nota di loke Isaías a profetisá: “E lo traga morto pa semper, i Señor DIOS lo seka awa di wowo for di tur kara.” (Isa. 25:8) Abo por imaginá bo e tempu ei? Lo no tin entiero mas, ni santana, ni lágrima di tristesa! Al kontrario. Lo tin lágrima di goso segun ku Yehova ta kumpli ku su promesa emoshonante di resusitá e mortonan! (Lesa Isaías 26:19.) Por fin e herida grandi ku morto a kousa lo kura.

22. Kiko lo sosodé despues ku e Reino Mesiániko a kumpli ku tur loke ta e boluntat di Dios riba tera?

²² Na final di e Mil Aña, e Reino lo a kumpli ku tur loke ta e boluntat di Dios riba tera, i e ora ei Kristu lo entregá e gobernashon na su Tata. (1 Kor. 15:25-28) Por fin humanidat lo ta perfekto i kla pa enfrentá un último prueba ora ku laga Satanas sali for di su abismo di inaktividat. Despues di esaki, Kristu finalmente lo destruí e kolebra malbado ei huntu ku tur su kompinchinan. (Gén. 3:15; Rev. 20:3, 7-10) Pero tur hende leal ku ta stima Yehova lo tin un futuro briante nan dilanti. Kisas no tin mihó palabra pa deskribí esei ku esnan inspirá ku nos ta haña na Romanonan 8:21. Ei nos ta haña e promesa ku hende fiel lo tin “e glorioso libertat di e yunan di Dios.”

23, 24. (a) Dikon e promesanan di Dios lo kumpli sigur? (b) Kiko abo ta determiná pa hasi?

²³ E promesanan ei no ta basá riba simpel speransa, deseo òf ilushon. E promesanan di Yehova ta kumpli sigur! Dikon? Wèl, kòrda e palabranan di Hesus ku nos a trata den e promé kapítulo di e buki akí. El a siña su siguidónan pidi Yehova: “Laga bo Reino bini. Laga bo boluntat sosodé, meskos ku den shelu, tambe riba tera.” (Mat. 6:9, 10) E Reino di Dios no ta produkto di un hende su imaginashon. E ta un realidat! E ta gobernando den shelu na e momentonan akí. E tin 100 aña kaba ta kumpli ku e promesanan di Yehova na maneranan masha bisto den e kongregashon kristian. Pues, nos por tin sigur ku tur e promesanan di Yehova lo kumpli ora ku e Reino di Dios bini pa ehersé su pleno poder riba tera!

²⁴ Nos sa ku e Reino di Dios lo bini. Nos sa ku delaster un palabra ku Yehova a primintí lo keda realisá. Kon nos por sa esei? Pasobra E REINO DI DIOS TA GOBERNÁ! E pregunta ku nos kada un tin ku hasi nos mes ta: ‘E Reino ta goberná ami?’ Laga nos hasi tur loke ta na nos alkanse pa biba aworakí komo siudadanonan leal di e Reino, ya asina nos por benefisiá di su gobernashon hustu i perfekto pa semper!