Capítulo Tres

“Laga Nos Rectificá Asuntunan”

Isaías 1:10-31

 1, 2. Cu ken Jehova ta compará e gobernantenan i e pueblonan di Jerusalem i Huda, i pakico e comparacion aki ta apropiado?

POR ta e habitantenan di Jerusalem ta sinti nan incliná na hustificá nan mes despues di tende e denuncia cu ta pará skirbí na Isaías 1:1-9. Casi sigur nan lo kier mustra cu orguyo riba tur e sacrificionan cu nan ta ofrecé Jehova. No obstante, Jehova su contesta na versículo 10 te 15 ta mustra cu e ta condená tal actitud. E contesta ta cuminsá asin’akí: “Tende e palabra di Jehova, dictadornan di Sódoma. Duna oido na e ley di nos Dios, pueblo di Gomora.”—Isaías 1:10.

² Sódoma cu Gomora a sufri destruccion no solamente pa motibu di nan custumbernan sexual perverso, sino tambe pa motibu di nan actitud sin heful i soberbe. (Génesis 18:20, 21; 19:4, 5, 23-25; Ezekiel 16:49, 50) Esnan cu ta tende Isaías compará nan cu hende dje stadnan maldicioná ei lo mester a keda den shok.a Pero Jehova ta mira su pueblo manera nan ta, i Isaías no ta suavisá e mensahe divino pa “agradá nan oido.”—2 Timoteo 4:3.

 3. Kico Jehova kier men ora e bisa cu e “ta hartá” dje sacrificionan di su pueblo, i pakico e ta sinti asina?

³ Wak kico Jehova ta pensa dje adoracion cu su pueblo ta ofrecé pa formalidad. “‘Ki probecho mi tin dje multitud di boso sacrificionan?’ Jehova ta bisa. ‘Mi ta hartá di ofrenda kimá completo di chubat’i carné i di sebu di animal bon alimentá; i mi no tin deleite den e sanger di toro yong i lamchi machu i chubat’i cabritu.’” (Isaías 1:11) E pueblo a lubidá cu Jehova no ta dependé di nan sacrificionan. (Salmo 50:8-13) E no tin mester di nada cu ser humano por ofrec’é. Pues si e pueblo ta kere cu dor di presentá ofrenda na un manera indiferente nan ta haci Jehova un fabor, nan ta completamente kibocá. Jehova ta usa un simbolismo poderoso. E expresion “mi ta hartá” por ser traducí tambe como “mi ta mal yená” of “mi ta completamente saciá.” Abo a yega di sinti bo asina yen cu mira mas cuminda so caba ta repugná bo? Asina Jehova a sinti pa e ofrendanan ei: un repugnancia total!

 4. Con Isaías 1:12 ta denunciá e caracter bashí dje bishitanan cu e pueblo ta haci n’e tempel di Jerusalem?

⁴ Jehova ta continuá: “Ora boso ta sigui drenta pa mira mi cara, ta ken a rekerí esaki di boso man, pa boso trapa mi patio?” (Isaías 1:12) Acaso no ta Jehova su ley mes ta rekerí p’e pueblo ‘drenta pa mira su cara,’ es decir, pa nan asistí na su tempel den Jerusalem? (Éxodo 34:23, 24) Sí, pero nan ta bini ei djis pa formalidad, djis pa cumpli cu e aspectonan ceremonial di adoracion puru, pero sin cu nan mes tin un motivacion puru. Pa Jehova, nan frecuente bishitanan na su patio ta sirbi djis pa “trapa” riba dje, pa gasta e suela.

 5. Cua ta algun dje actonan di adoracion cu e hudiunan ta efectuá, i pakico esakinan a bira “un carga” pa Jehova?

⁵ Nada straño cu awor Jehova ta usa palabranan mas fuerte! “Stop di trece mas ofrenda di grano cu no bal nada. Censia, ta un cos detestabel pa mi. Luna nobo i sabat, e convocacion di un reunion—mi no por soportá e uso di poder mágico huntu cu e asamblea solem. Mi alma a odia boso lunanan nobo i boso periodonan di fiesta. Pa mi nan a bira un carga; mi a cansa di carga nan.” (Isaías 1:13, 14) Ofrenda di grano, censia, sabat i asamblea solem tur ta forma parti dje Ley cu Dios a duna Israel. Pa loke ta “lunanan nobo,” e Ley ta manda solamente pa celebrá esakinan, aunke poco-poco pero sigur algun tradicion sano a desaroyá rond dje celebracion ei. (Númeronan 10:10; 28:11) Hende ta considerá luna nobo manera un sabat mensual, un dia cu nan no ta traha i ta asta bini huntu pa ricibí siñansa for dje profeta i sacerdotenan. (2 Reynan 4:23; Ezekiel 46:3; Ámos 8:5) E celebracionnan ei riba nan mes no ta malu. E problema ta sinta den e echo cu nan ta celebrá e fiestanan djis pa hende mira. Ademas, e hudiunan ta recurí na “poder mágico,” esta, prácticanan spiritista, n’e mésun tempu cu nan ta warda e Ley di Dios.b Asina, nan actonan di adoracion na Jehova ta “un carga” p’e.

 6. Den ki sentido Jehova “a cansa”?

⁶ Pero con Jehova por sinti ‘cansá’? Al fin i al cabo, e tin un “abundancia di energia dinámico . . . E no ta cansa ni fatigá.” (Isaías 40:26, 28) Jehova ta usa un simbolismo bibu pa nos por comprendé su sintimentunan. Abo a yega di carga algu pisá pa basta ratu te cu bo a keda morto cansá i cu gana di lagu’e cai? Asina Jehova ta sinti pa cu e actonan di adoracion hipócrita cu su pueblo ta rindi na dje.

 7. Pakico Jehova a stop di scucha e oracionnan di su pueblo?

⁷ Awor Jehova ta referí n’e acto di adoracion di mas íntimo i personal. “Ora boso habri boso plant’i man, mi ta sconde mi wowonan for di boso. Maske boso ta haci hopi oracion, mi no ta scucha; cu dramamentu di sanger boso mannan mes a yena.” (Isaías 1:15) Ora hende ta span nan brasa cu plant’i man habrí parti ariba, esei ta un gesto di súplica. Ya pa Jehova, e postura aki no ta nificá nada mas pasobra e pueblo aki tin man yen di sanger. Violencia ta reina tur caminda. Opresion di esnan cu ta débil ta cos di tur dia. E echo cu personanan abusador i egoista asina ta haci oracion na Jehova i ta pidi pa su bendicion ta algu escandaloso. Nada straño cu Jehova ta bisa: “Mi no ta scucha”!

 8. Ki eror cristiandad ta cometé awe, i con algun cristian ta cai den un trampa similar?

⁸ Den nos tempu, cristiandad tampoco no a gana e aprobacion di Dios cu su ripiticion incesante di oracionnan inútil i su otro ‘obranan’ religioso. (Mateo 7:21-23) Ta di vital importancia pa nos no cai den e mésun trampa. A yega di sosodé cu un cristian ta cai den un custumber di practicá picá serio, anto razoná cu si e djis sconde loke e ta haci i aumentá su actividad den e congregacion cristian, di un manera of otro su echonan lo compensá su picá. E obranan ei pa cara di hende no ta agradá Jehova. Ta un solo cura tin pa enfermedad spiritual, manera e siguiente versículonan di Isaías ta mustra.

E Cura pa Enfermedad Spiritual

 9, 10. Con importante limpiesa ta den nos adoracion na Jehova?

⁹ Awor Jehova, e Dios di compasion, ta adoptá un tono mas caluroso i atractivo. “Laba boso mes; haci boso mes limpi; kita e maldad di boso tratonan for di dilanti mi wowo; stop di haci malu. Siña haci bon; busca husticia; corigí e opresor; dicta sentencia p’e huérfano di tata; defendé e causa dje biuda.” (Isaías 1:16, 17) Aki nos ta haña un seri di nuebe ordu of mandato. E promé cuaternan ta negativo den e sentido cu nan ta encerá kitamentu di picá; e último cincunan ta accionnan positivo cu ta hiba n’e bendicion di Jehova.

¹⁰ Semper labamentu i limpiesa a ocupá un lugá importante den adoracion puru. (Éxodo 19:10, 11; 30:20; 2 Corintionan 7:1) Pero Jehova kier p’e limpiesa bai mas profundo, p’e yega te n’e curason di esnan cu ta ador’é. E limpiesa mas importante cu Jehova ta referí na dje ta esun moral i spiritual. E promé dos mandamentunan den versículo 16 no ta djis un ripiticion. Segun un experto den gramática hebreo, e promé “laba boso mes” ta denotá un acto inicial di limpiesa, miéntras cu e di dos, “haci boso mes limpi,” ta referí n’e esfuersonan continuo pa mantené e limpiesa ei.

11. Kico nos mester haci pa combatí picá, i kico nos no mester haci nunca?

¹¹ Nos no por sconde nada pa Jehova. (Job 34:22; Proverbionan 15:3; Hebreonan 4:13) P’esei, su mandamentu pa “kita e maldad di boso tratonan for di dilanti mi wowo,” por nificá un cos so: stop di haci malu. Esei ta nificá no purba sconde picá serio, pasobra esei lo ta un picá riba su mes. Proverbionan 28:13 ta spierta: “Esun cu ta tapa su transgresionnan lo no tin éxito, pero esun cu ta confesá nan i ta bandoná nan lo ser mustrá misericordia.”

12. (a) Pakico ta importante pa “siña haci bon”? (b) Con specialmente ancianonan por aplicá e instruccionnan pa “busca husticia” i “corigí e opresor”?

¹² Tin hopi cos cu nos por siña for dje accionnan positivo cu Jehova ta manda den versículo 17 di Isaías capítulo 1. Ripará cu e no ta djis bisa “haci bon” sino “siña haci bon.” Pa comprendé kico ta bon den bista di Dios i pa deseá di haci esei, nos mester tin un studio personal dje Palabra di Dios. Ademas, Jehova no ta limitá su mes na bisa “haci husticia” sino “busca husticia.” Asta ancianonan cu experencia tin cu investigá e Palabra di Dios cabalmente pa por haña e proceder corecto den algun asuntu complicá. Tambe nan tin e responsabilidad di “corigí e opresor,” manera Jehova ta manda siguientemente. E instruccionnan aki ta importante pa wardadónan cristian awe, pasobra nan kier protehá e tou contra “lobonan opresivo.”—Echonan 20:28-30.

13. Con nos lo por aplicá awe e mandatonan relacioná cu e huérfano di tata i e biuda?

¹³ E dos mandamentunan final tin di haber cu algun di esnan mas vulnerabel dje pueblo di Dios: huérfano i biuda. Mundu ta cla pa probechá dje individuonan aki; esaki no mester ta e caso entre e pueblo di Dios. Ancianonan amoroso ta “dicta sentencia” p’e huérfanonan di tata den e congregacion dor di yuda nan ricibí un trato hustu i proteccion den un mundu cu kier probechá di nan i corumpí nan. Ancianonan ta “defendé e causa” di biuda, of manera e palabra hebreo por nificá tambe, “nan ta lucha” na nan fabor. Realmente, tur cristian kier ta un fuente di refugio, consuelo i husticia pa esnan den necesidad meimei di nos pasobra nan ta precioso den bista di Jehova.—Mikéas 6:8; Santiago 1:27.

14. Ki mensahe positivo Isaías 1:16 i 17 ta transmití?

¹⁴ Ki un mensahe firme i positivo Jehova ta transmití pa medio dje nuebe mandatonan aki! Tin bes cu esnan cu a cai den picá ta yega n’e conclusion cu ta imposibel pa nan haci loke ta corecto. E ideanan ei ta desanimante. Ademas, nan ta robes. Jehova sa—i kier pa nos sa—cu pa medio di Su yudansa, cualkier pecadó por bandoná su curso pecaminoso, bira bek i haci loke ta bon.

Un Ruego Compasivo i Hustu

15. Con hende sa malinterpretá e frase “laga nos rectificá asuntunan entre nos,” i kico e ta nificá realmente?

¹⁵ E tono di Jehova ta bira asta mas cariñoso i compasivo. “‘Boso bini awor, i laga nos rectificá asuntunan entre nos,’ Jehova ta bisa. ‘Aunke boso picánan resultá di ta manera scarlata, lo haci nan blancu manera sneu; aunke nan ta corá manera tela di carmesí, nan lo bira asta manera lana.’” (Isaías 1:18) Hopi bes hende ta malinterpretá e invitacion cu e bunita versículo aki ta cuminsá cuné. Por ehempel, Beibel na papiamentu koriente ta bisa: “Laga nos ban pleita e kaso”—como si fuera ámbos partido tin cu haci concesion pa yega na un acuerdo. Di ningun manera! Jehova no a haci nada malu, muchu ménos den su trato cu e pueblo rebelde i hipócrita aki. (Deuteronomio 32:4, 5) E versículo no ta papia di un negociacion entre partidonan igual, sino di un foro pa establecé husticia. Ta como si fuera Jehova ta reta Israel aki pa bai corte.

16, 17. Con bini nos sa cu Jehova ta dispuesto pa pordoná asta picá serio?

¹⁶ Esei por parce un idea intimidante, pero Jehova ta e Hues di mas misericordioso i compasivo. Su capacidad di pordoná ta sin igual. (Salmo 86:5) Ta e so por tuma Israel su picánan cu ta corá “manera scarlata” i laba nan, haci nan “blancu manera sneu.” Ningun esfuerso humano, ningun fórmula, sea di obra, sacrificio of oracion por kita e mancha di picá. Ta solamente Jehova su pordon por laba picá. Dios ta concedé e pordon ei bou dje condicionnan cu e ta establecé, cu ta encerá berdadero repentimentu, di curason.

¹⁷ E berdad aki ta asina importante cu Jehova ta ripitié usando un variante poético: picá, corá manera “tela di carmesí” lo bira asta manera lana blancu sin tiña. Jehova kier pa nos sa cu e realmente ta e Pordonador di picá, asta di picá masha serio, basta e mira cu nos ta berdaderamente arepentí. Esnan cu ta haña cu ta difícil pa kere cu nan picánan por ser pordoná ta haci bon di considerá ehempelnan manera esun di Manases, kende a peca di un manera horibel pa añanan largu. Sin embargo, el a repentí i a ser pordoná. (2 Crónicanan 33:9-16) Jehova kier pa nos tur, incluso esnan cu a cometé picá serio, sa cu no ta muchu lat pa “rectificá asuntunan” cuné.

18. Ki opcion Jehova ta pone dilanti su pueblo rebelde?

¹⁸ Jehova ta corda su pueblo cu nan tin cu scoge entre dos opcion. “Si boso demostrá di ta dispuesto i di berdad scucha, boso lo come e bon dje tera. Pero si boso nenga i realmente ta rebelde, spada lo come boso; pasobra Jehova su boca a papi’é.” (Isaías 1:19, 20) Aki Jehova ta enfatisá actitud, i e ta usa un otro simbolismo pa resaltá su punto. Huda tin dos opcion: sea nan ta come of lo come nan. Si nan tin un actitud dispuesto pa scucha i obedecé Jehova, nan lo come e producto dje tera. Di otro banda, si nan persistí den nan actitud rebelde, e spada di nan enemigunan lo come nan! Ta parce casi inimaginabel cu un pueblo lo preferá e spada di nan enemigunan riba e misericordia i generosidad di un Dios pordonador. No obstante, esei ta e caso cu Jerusalem, manera e siguiente versículonan di Isaías ta mustra.

Un Cantica di Lamento pa un Stad Stimá

19, 20. (a) Con Jehova ta expresá e sintimentu di traicion cu e tin? (b) Den ki manera ‘husticia a biba den Jerusalem’?

¹⁹ Na Isaías 1:21-23, nos ta mira te na ki grado e maldad di Jerusalem a yega den e época ei. Awor Isaías ta cuminsá un poema inspirá den forma di un cantica di lamento: “O, mira con e stad fiel a bira un prostituta! E tabata yen di rectitud; un tempu husticia tabata biba den dje, pero awor ta asesinonan.”—Isaías 1:21.

²⁰ Mira con e stad di Jerusalem a cai! Loke un tempu tabata un esposa fiel, awor a bira un prostituta. Kico por transmití di un manera mas vigoroso e sintimentu di traicion i decepcion cu Jehova tin? “Husticia tabata biba den” e stad aki. Na ki tempu? Wel, asta promé cu Israel a existí, den tempu di Abraham, e stad aki tabata yama Salem. Un homber cu tabata tantu rey como sacerdote a goberná riba dje. Su nomber, Melkísedec, ta nificá “Rey di Husticia,” i evidentemente esei a cuadra bon cuné. (Hebreonan 7:2; Génesis 14:18-20) Rond di 1.000 aña despues di Melkísedec, Jerusalem a alcansá su era mas glorioso, bou dje reinado di David i Sálomon. “Husticia tabata biba den dje,” foral ora su reynan a pone e ehempel p’e pueblo dor di cana den e camindanan di Jehova. Sin embargo, den e época di Isaías, ya e tempunan ei tabata leu den pasado.

21, 22. Kico scuma sushi i cerbes largá ta nificá, i pakico e lidernan di Huda ta merecé un descripcion asina?

²¹ Ta parce cu e culpa ta cai principalmente riba e lidernan dje pueblo. Isaías ta sigui cu su lamento: “Bo plata mes a bira scuma sushi. Bo cerbes di trigu ta largá cu awa. Bo prinsnan ta cabesura i socio di ladron. Cada un di nan stima soborno i ta core tras di regalo. Nan no ta dicta sentencia pa e huérfano di tata; i ni e caso hudicial di un biuda no ta haña entrada cerca nan.” (Isaías 1:22, 23) Dos ilustracion, un tras di otro, ta establecé e tono pa loke mester sigui. Un smid ta para na su fornu kita e scuma sushi for dje plata dirtí i ta tir’é afó. E prinsnan i huesnan di Israel ta manera e scuma sushi, no manera e plata. Mester deshací di nan. Nan no bal muchu mas cu cerbes largá cu awa i cu a perde tur su sabor. Un bebida asina ta sirbi solamente pa basha afó!

²² Versículo 23 ta mustra pakico e lidernan merecé un descripcion asina. E Ley di Moises a elevá e pueblo di Dios i a separá nan for dje otro nacionnan. El a haci esei, por ehempel, dor di ordená pa protehá huérfano i biuda. (Éxodo 22:22-24) Pero den tempu di Isaías, e huérfano di tata tin tiki speransa di haña un huicio faborabel. Pa loke ta e biuda, e no por haña niun hende ni pa tende su caso, muchu ménos defend’é. No, e huesnan i lidernan aki ta demasiado ocupá cu atendé nan mes interesnan, buscando soborno, coriendo tras di regalo i birando socio di ladron. Evidentemente, nan ta protehá e criminalnan miéntras nan ta laga nan víctimanan sufri. Pió ainda, nan ta “cabesura,” esta, nan a bira duru den nan curso di malecho. Esta un situacion lamentabel!

Jehova Lo Refiná Su Pueblo

23. Ki sintimentu Jehova ta expresá pa cu su adversarionan?

²³ Jehova lo no tolerá e abusu di poder aki pa semper. Isaías ta continuá: “P’esei e expresion dje Señor berdadero, Jehova di ehércitonan, e Poderoso di Israel, ta: ‘Ahá! Lo mi libra mi mes di mi adversarionan, i lo mi venga mi mes di mi enemigunan.’” (Isaías 1:24) Aki Isaías ta duna Jehova tres denominacion cu ta enfatisá su soberania hustu i su inmenso poder. E sclamacion “Ahá!” probablemente ta nificá cu awor Jehova ta agregá na su compasion e determinacion pa descargá su rabia. I sigur tin bon motibu pa esei.

24. Ki proceso di refinamentu Jehova ta bai someté su pueblo na dje?

²⁴ E propio pueblo di Jehova a haci nan mes su enemigu. E vengansa divino ta bon merecí. Jehova lo ‘libra su mes,’ of deshací, di nan. Esaki ta nificá un destruccion completo i permanente dje pueblo cu ta carga su nomber? No, pasobra Jehova ta sigui bisa: “I lo mi bira mi man bek riba bo, i lo mi dirti bo scuma sushi manera cu ácido, i lo mi kita tur bo desperdicionan.” (Isaías 1:25) Awor Jehova ta usa e proceso di refinamentu como ilustracion. E refinadó di antigwedad tabatin custumber di agregá ácido pa yuda separá e scuma sushi for dje metal precioso. Mescos tambe, Jehova, kende no ta considerá su pueblo completamente malbado, lo ‘castigá nan te n’e debido grado.’ Solamente lo e kita for di nan e “desperdicionan,” esta, esnan cabesura, indeseabel, cu ta nenga di siña i obedecé.c (Jeremías 46:28) Cu e palabranan aki, Isaías tin e privilegio di pone historia di antemano por escrito.

25. (a) Con Jehova a refiná su pueblo na aña 607 P.E.C.? (b) Na ki tempu Jehova a refiná su pueblo den tempu moderno?

²⁵ En berdad Jehova a refiná su pueblo, kitando e scuma sushi di lidernan corupto i otro rebeldenan. Na aña 607 P.E.C., hopi tempu despues cu Isaías a biba, Jerusalem a ser destruí i su habitantenan a ser hibá den exilio na Babilonia pa 70 aña. Den algun aspecto, esaki tabata paralelo cu un accion cu Dios a tuma hopi tempu despues. E profecia na Malakías 3:1-5, skirbí hopi tempu despues dje exilio na Babilonia, a indicá cu Dios lo a haci un refinamentu atrobe. Esei a señalá n’e tempu ora Jehova Dios lo a bini na su tempel spiritual acompañá pa su “mensahero dje pacto,” Jesucristo. Aparentemente esaki a tuma lugá na fin di Promé Guera Mundial. Jehova a inspeccioná tur esnan cu a pretendé di ta cristian i a sefta esnan berdadero for di esnan falsu. Cu ki resultado?

26-28. (a) Ki cumplimentu inicial Isaías 1:26 tabatin? (b) Con e profecia aki a cumpli den nos tempu? (c) Con ancianonan di actualidad por saca beneficio for dje profecia aki?

²⁶ Jehova ta contestá: “Lo mi trece bek pa bo huesnan manera na principio, i conseheronan pa bo manera na comienso. Despues di esaki lo yama bo Stad di Husticia, Stad Fiel. Lo redimí Síon cu rectitud, i esnan di dje cu ta bolbe bek, cu husticia.” (Isaías 1:26, 27) Jerusalem di antigwedad a experimentá un cumplimentu inicial dje profecia aki. Despues cu e exiliadonan a regresá nan stad stimá na aña 537 P.E.C., atrobe tabatin hues i conseheronan fiel manera esnan di pasado. E profetanan Ageo i Zacarías, e sacerdote Hosué, e escriba Ésdras i e gobernadó Zorobabel, tur a guia i dirigí e resto fiel cu a regresá pa cana den e camindanan di Dios. Sin embargo, un cumplimentu asta mas importante a tuma lugá den siglo 20.

²⁷ Na 1919, Jehova su pueblo dje tempu actual a sali for di un periodo di prueba. Nan a ser librá for di sclabitud spiritual na Babilonia e Grandi, e imperio mundial di religion falsu. E distincion entre e fiel resto ungí aki i clero apóstata di cristiandad a bira mas cla. Dios a bendicioná su pueblo un biaha mas, ‘treciendo bek hues i consehero pa nan,’ esta, hombernan fiel cu ta consehá e pueblo di Dios segun su Palabra i no segun tradicion di hende. Entre e “trupa chikitu” menguante i nan compañeronan, e miyones di “otro carné” cu ta aumentando, tin awe miles di homber asina.—Lucas 12:32; Juan 10:16; Isaías 32:1, 2; 60:17; 61:3, 4.

²⁸ Ancianonan ta tene na mente cu de bes en cuando nan ta actua como ‘hues’ den e congregacion pa por tene esaki moralmente i spiritualmente limpi i pa corigí malechornan. Nan ta profundamente interesá pa haci cosnan na Dios su manera, imitando su misericordia i su sentido balansá di husticia. Pero den mayoria caso, nan ta sirbi como “consehero,” algu hopi distinto di prins of tirano. I nan ta haci tur nan esfuerso pa nunca duna ni e impresion cu nan ta ‘dominá riba esnan cu ta herencia di Dios.’—1 Pedro 5:3.

29, 30. (a) Kico Jehova ta pronunciá contra esnan cu ta nenga di beneficiá dje proceso di refinamentu? (b) Den ki sentido e pueblo ta haña “bergwensa” di nan palu i hofinan?

²⁹ Kico dje “scuma sushi” mencioná den e profecia di Isaías? Kico ta sosodé cu esnan cu nenga di beneficiá di Dios su proceso di refinamentu? Isaías ta continuá: “I e colapso dje rebeldenan i dje pecadónan lo ta n’e mésun tempu, i esnan cu ta bandoná Jehova lo yega na nan fin. Pasobra nan lo tin bergwensa dje palunan poderoso cu boso a deseá, i boso lo keda tur na bergwensa pa causa dje hofinan cu boso a scoge.” (Isaías 1:28, 29) Esnan cu rebelá i peca contra Jehova, ignorando e mensahenan di advertencia di su profetanan te ora cu ta muchu lat, en berdad ta sufri un “colapso” i “yega na nan fin” na aña 607 P.E.C. Pero kico e referencianan na palu i hofi ta nificá?

³⁰ Idolatria ta un problema persistente den Huda. Hopi bes hofi, palu i mondi ta esenario di nan prácticanan degradá. Por ehempel, adoradónan di Baal i su amante, Astoret, ta kere cu den e temporada di secura, e dos diosnan falsu ei ta morto i derá. Pa stimulá nan pa lanta i tene relacion p’e tera recobrá su fertilidad, e adoradónan di dios falsu ta bini huntu pa practicá actonan sexual perverso bou di palunan “sagrado” den mondi of den hofi. Ora awa yobe i e tera bira fértil, e mérito ta bai p’e diosnan falsu; i nan adoradónan ta sinti cu nan supersticionnan a keda confirmá. Pero ora Jehova trece un fin aplastante n’e adoradónan rebelde, ningun dios-ídolo ta protehá nan. E rebeldenan lo tin “bergwensa” dje palunan i hofinan impotente aki.

31. Kico e habitantenan idólatra ta enfrentá cu ta pió cu bergwensa?

³¹ Pero, e habitantenan idólatra di Hudea ta enfrentá algu pió cu bergwensa. Jehova ta cambia awor di ilustracion i ta compará e adoradó di dios falsu mes cu un palu. “Boso lo bira manera un palu grandi cu su blachinan ta seca, i manera un hofi cu no tin awa.” (Isaías 1:30) Den e clima secu i cayente di Medio Oriente, e ilustracion aki ta masha adecuá. Niun palu of hofi por dura hopi tempu sin haña awa regularmente. I ora mata asina seca, nan ta bira masha vulnerabel pa candela. P’esei, e ilustracion cu ta sigui den versículo 31 ta cuadra bon den e relato.

32. (a) Ken ta “e homber vigoroso” cu versículo 31 ta referí na dje? (b) Den ki sentido lo e bira “desperdicio di lino,” ki “chispa” lo pegu’é na candela, i cu ki resultado?

³² “E homber vigoroso sigur lo bira desperdicio di lino, i e producto di su actividad un chispa; i nan tur dos sigur lo kima pareu, sin ningun hende pa paga e candela.” (Isaías 1:31) Ken ta e “homber vigoroso” aki? E expresion hebreo ta transmití e sentido di forsa i rikesa. Probablemente e ta referí n’e siguidó di dios falsu cu ta próspero i sigur di su mes. Tantu den e tempu di Isaías como esun di nos, no ta poco hende tin cu ta rechasá Jehova i su adoracion puru. Aparentemente, asta ta bai bon cu algun. Tog, Jehova ta spierta cu hende asina lo ta manera “desperdicio di lino,” cabuya inferior asina swak i secu cu, na moda di papia, holó di candela so caba ta pone nan habri fo’i otro. (Huesnan 16:8, 9) E producto dje idólatra su actividad—sea ta su diosnan-ídolo, su rikesa, of loke sea e ta adorá na lugá di Jehova—lo ta manera e “chispa” pa pega e candela. Un candela cu niun hende por paga, i cu lo devorá, of caba cu tantu e chispa como e desperdicio di lino. No tin niun poder den universo cu por anulá e huicionan perfecto di Jehova.

33. (a) Pakico nos por bisa cu e spiertamentunan di Dios dje binidero huicio ta revelá a la bes su misericordia? (b) Ki oportunidad Jehova ta extendiendo awor na humanidad, i ki efecto esaki tin riba cada un di nos?

³³ E mensahe final aki ta compatibel cu e mensahe di misericordia i pordon den versículo 18? Claro cu sí! Jehova a laga su sirbidónan skirbi i transmití e spiertamentunan ei pasobra e ta misericordioso. Al fin i al cabo, “e no ta deseá pa ningun hende ser destruí, sino ta deseá pa tur alcansá repentimentu.” (2 Pedro 3:9) Awe, tur cristian berdadero tin e privilegio di proclamá Dios su mensahenan di advertencia na humanidad pa asina esnan arepentí por beneficiá di su pordon generoso i biba pa semper. Esta bondadoso Jehova ta pa duna humanidad un chens di “rectificá asuntunan” cuné promé cu ta muchu lat!

[Nota]