Capítulo Diesdos

No Tene Miedu dje Asirio

Isaías 10:5-34

 1, 2. (a) For di un punto di bista humano, pakico Jónas a parce di tin bon motibu pa vacilá pa aceptá e comision di predicá n’e asirionan? (b) Con e ninivitanan a reaccioná riba e mensahe di Jónas?

MEIMEI di siglo 9 P.E.C., e profeta hebreo Jónas, yu di Amitai, a risca bai Nínive, capital dje Imperio Asirio. E mester a hiba un mensahe importante pa nan. Jehova a bis’é: “Lanta ariba, bai Nínive e gran stad, i proclamá contra dje cu nan maldad a subi mi dilanti.”—Jónas 1:2, 3.

² Na principio, ora Jónas a ricibí su comision, el a hui bai den direccion contrali, pa Társis. For di un punto di bista humano, su reaccion tabata comprendibel. E asirionan tabata hende cruel. Tuma nota kico un monarca asirio tabata haci cu su enemigunan: “Mi a kap man cu pia dje oficialnan kita afó . . . Hopi di nan prezunan mi a kima den candela, i hopi di nan mi a capturá bibu. Mi a amputá man cu dede for di algun, i for di otronan, nan nanishi.” Tog, ora Jónas finalmente a entregá e mensahe di Jehova, e ninivitanan a repentí di nan picánan i Jehova a spar e stad e tempu ei.—Jónas 3:3-10; Mateo 12:41.

Jehova Ta Tuma “e Bara”

 3. Con e reaccion dje israelitanan na e spiertamentunan cu profeta di Jehova a duna ta diferente for di esun dje ninivitanan?

³ Ora Jónas bai predicá n’e israelitanan, nan tambe ta reaccioná faborablemente? (2 Reynan 14:25) No. Nan ta bira lomba pa adoracion puru te n’e punto di “buig dilanti henter e ehército di shelu i sirbi Baal.” Pió ainda, “nan a sigui pone nan yu hombernan i nan yu muhernan pasa dor di candela i practicá wakmentu di destino i busca señal, i nan a sigui bende nan mes pa haci loke ta malu den wowo di Jehova, pa ofend’é.” (2 Reynan 17:16, 17) Contrali na e ninivitanan, Israel no ta duna oido n’e spiertamentunan cu profeta di Jehova ta duna nan. Di manera cu Jehova ta dicidí di tuma medida mas drástico.

 4, 5. (a) Na kico e expresion “e asirio” ta referí, i con Jehova lo us’é como “bara”? (b) Na ki tempu Samaria ta cai?

⁴ Despues cu Jónas a bishitá Nínive, e agresividad dje asirionan ta mengua poco pa un tempu.a Sin embargo, na cuminsamentu di siglo 8 P.E.C., Asiria ta declará su mes atrobe como potencia militar, i Jehova ta utilis’é na un manera asombroso. Profeta Isaías ta transmití un mensahe di advertencia di parti di Jehova pa Israel su reino di nort: “Ahá, e asirio, e bara pa mi rabia, i e palu cu ta den nan man pa mi denunciacion! Contra un nacion apóstata lo mi mand’é, i contra e pueblo di mi furia lo mi dun’é un ordu, pa tuma hopi botin i pa tuma hopi plunder i pa hacié un lugá di trapa ariba manera e klei di caya.”—Isaías 10:5, 6.

⁵ Esta un humiyacion p’e israelitanan! Dios ta utilisá un nacion pagano—“e asirio”—como “bara” pa castigá nan. Na aña 742 P.E.C., e rey asirio Salmanasar V ta sitia Samaria, capital dje nacion apóstata di Israel. For di su posicion stratégico riba un ceritu di 90 meter haltu, Samaria ta resistí e enemigu pa casi tres aña. Pero ningun estrategia humano por frustra e propósito di Dios. Na aña 740 P.E.C., Samaria ta cai, aplastá bou di pia di Asiria.—2 Reynan 18:10.

 6. Con e asirio ta pasa e límite di loke Jehova tin na mente p’e?

⁶ Aunke Jehova ta usa Asiria pa siña su pueblo un les, e asirionan mes no ta reconocé Jehova como nan Dios. P’e motibu ei e ta bisa: “Aunke kisas e [asirio] no ta asina, lo e sintié incliná; aunke kisas su curason no ta asina, lo e trama, pasobra den su curason tin esaki: destruccion, i pa corta no tiki nacion kita afó.” (Isaías 10:7) Jehova su intencion ta p’e asirio sirbi como un instrumento den su man divino. Pero e asirio ta sinti su mes incliná pa haci algu otro. Su curason ta incit’é pa planea algu mas grandioso: conkistá e mundu conocí dje tempu ei!

 7. (a) Splica e expresion: “Mi prinsnan no ta na mésun tempu rey?” (b) Kico esnan cu ta bandoná Jehova awe mester tuma nota di dje?

⁷ Reynan tabata goberná hopi dje stadnan no-israelita cu e asirio a conkistá. Awor e ex-reynan aki tin cu someté nan n’e rey asirio como prins subordiná dje monarca, di manera cu e por broma: “Mi prinsnan no ta na mésun tempu rey?” (Isaías 10:8) E diosnan falsu di stadnan prominente dje nacionnan no por a salba esnan cu ta adorá nan for di destruccion. E diosnan cu e habitantenan di Samaria a adorá, diosnan manera Baal, Molec i e bisénan di oro, lo no protehá e stad ei. Samaria a bandoná Jehova, pues e no tin derecho di spera pa Dios intervení. Laga tur hende awe cu ta bandoná Jehova tuma nota di loke a para di Samaria! E asirio tin motibu pa broma relacioná cu Samaria i e otro stadnan cu el a conkistá: “Calno no ta mescos cu Carkemis? Hamat no ta mescos cu Arpad? Samaria no ta mescos cu Damasco?” (Isaías 10:9) P’e asirio, nan tur ta mescos: botin pa e poderá di dje.

 8, 9. Pakico e asirio ta bai demasiado leu ora e fiha su bista riba Jerusalem?

⁸ Sin embargo, e asirio ta bai demasiado leu cu su bromamentu. E ta bisa: “Ki ora cu mi man alcansá e reinonan dje dios cu no bal nada, cua su imágennan tayá ta mas cu esnan na Jerusalem i na Samaria, lo no ta asina cu mescos cu mi a haci cu Samaria i cu su diosnan cu no bal nada, asina lo mi haci cu Jerusalem i su ídolonan?” (Isaías 10:10, 11) E reinonan cu e asirio a derotá caba tabatin muchu mas ídolo cu Jerusalem, asta mas cu Samaria. Segun su razonamentu: ‘Kico por stroba mi di haci cu Jerusalem loke mi a haci cu Samaria?’

⁹ Esta un bromadó! Jehova lo no lagu’é poderá di Jerusalem. Ta berdad cu Huda no tin un historial intachabel pa loke ta su apoyo di adoracion berdadero. (2 Reynan 16:7-9; 2 Crónicanan 28:24) Jehova a advertí Huda cu pa motibu di su infieldad, lo e sufri hopi durante e invasion asirio. Pero Jerusalem lo sobrebibí. (Isaías 1:7, 8) Ora e invasion asirio tuma lugá, Ezekías ta rey den Jerusalem. Ezekías no ta manera su tata, Acas. De echo, den e promé luna di su reinado, Ezekías ta bolbe habri e portanan di tempel i ta restorá adoracion puru!—2 Crónicanan 29:3-5.

10. Kico Jehova ta primintí relacioná cu e asirio?

¹⁰ Di manera cu e atake cu Asiria kier lansa contra Jerusalem no tin aprobacion divino. Jehova ta primintí cu lo e regla cuenta dje potencia mundial insolente ei: “Tin cu sosodé cu ora Jehova terminá tur su obra den ceru di Síon i den Jerusalem, lo mi regla cuenta pa e fruta di curason insolente dje rey di Asiria i pa e importancia propio di su wowonan soberbe.”—Isaías 10:12.

Awor Contra Huda cu Jerusalem!

11. Pakico e asirio ta pensa cu Jerusalem lo ta un prooi fácil?

¹¹ Ocho aña despues cu e reino di nort a cai na 740 P.E.C., e monarca asirio nobo, Senákerib, ta marcha bai contra Jerusalem. Isaías ta duna un descripcion poético dje plan ambicioso di Senákerib: “Lo mi kita e límitenan dje pueblonan, i sigur lo mi plunder nan cosnan wardá, i lo mi rebahá e habitantenan mescos cu un poderoso. I mescos cu como si fuera den un neshi, mi man lo alcansá e recursonan dje pueblonan; i mescos cu ora un hende ta recogé webu cu a ser lagá, mi mes lo recogé asta henter e tera, i sigur lo no tin niun hende ta bati ala ni habri boca ni chip [manera para].” (Isaías 10:13, 14) Senákerib ta kere cu mescos cu otro stadnan a cai i cu Samaria tampoco no t’ei mas, Jerusalem lo ta un prooi fácil! Kisas e stad por ofrecé poco resistencia, pero sin cu e habitantenan habri boca sikiera, lo dominá nan rápidamente i pluma nan recursonan manera webu for di un neshi bandoná.

12. Manera Jehova ta indicá, con nos tin cu mira e bromamentu asirio?

¹² Pero Senákerib ta lubidá un cos. Samaria apóstata a merecé e castigu cu el a ricibí. Sin embargo, bou di rey Ezekías, Jerusalem a bolbe bira un baluarte di adoracion puru. Ken cu tribi mishi cu Jerusalem lo hañ’é ta enfrentá Jehova mes! Indigná, Isaías ta puntra: “E hacha lo halsa su mes riba esun cu ta kap cuné, of e zag lo engrandecé su mes riba esun cu ta hal’é bai-bin, como si fuera e garoti ta hala esnan cu ta his’é na haltu bai-bin, como si fuera e bara a hisa na haltu esun cu no ta palu?” (Isaías 10:15) E Imperio Asirio ta djis un herment den man di Jehova, mescos cu un kapdó di palu, un zagdó of un wardadó di carné ta usa un hacha, un zag, un garoti of un bara. Awor e bara tin e tribilidad di engrandecé su mes riba esun cu ta us’é!

13. Splica kico ta lo siguiente i kico ta sosodé cu nan: (a) e “gordonan,” (b) ‘e mal yerba i matanan di sumpiña’ i (c) “e gloria di su mondi.”

¹³ Kico lo sosodé cu e asirio? “E Señor berdadero, Jehova di ehércitonan, lo sigui manda riba su gordonan un enfermedad cu ta caba cu nan, i bou di su gloria un kimamentu lo sigui kima manera un candela ta kima. I e Lus di Israel tin cu bira un candela, i su Santu un vlam; i e tin cu lanta vlam grandi i come su mal yerba i su matanan di sumpiña den un solo dia. I lo E trece un fin na e gloria di su mondi i di su hofi, sí, for dje alma te cu e carni, i e tin cu bira manera ora un hende malu ta caba na nada. I e resto dje palunan di su mondi—nan lo bira di tal cantidad cu un simpel mucha lo por haci nota di nan.” (Isaías 10:16-19) Sí, Jehova lo snui e “bara” asirio ei! Un ‘enfermedad cu ta caba cu hende’ lo dal e “gordonan,” esta e soldánan curpa diki dje ehército asirio. Nan lo no mustra dje fuerte ei mas! E Lus di Israel, Jehova Dios, lo kima su tropanan mescos cu mal yerba i mata di sumpiña. I “e gloria di su mondi,” su oficialnan militar, lo topa nan fin. Despues cu Jehova eliminá e asirio, lo keda asina poco oficial cu asta un simpel mucha lo por conta nan riba su dedenan!—Mira tambe Isaías 10:33, 34.

14. Describí con leu e asirio a yega riba e suela di Huda na aña 732 P.E.C.

¹⁴ P’e hudiunan cu ta biba den Jerusalem na aña 732 P.E.C., tog lo mester ta difícil pa kere cu e asirionan lo ser derotá. E tremendo ehército asirio ta avansá implacablemente. Tende e lista di stadnan di Huda cu a cai: “El a bini riba Ayat . . . Migron . . . Micmash . . . Gueba . . . Rama . . . Guibeah di Saul . . . Galim . . . Laisa . . . Anatot . . . Madmená . . . Guebim . . . Nob.” (Isaías 10:28-32a)b Finalmente, e invasornan ta yega Lákis, apénas 50 kilometer for di Jerusalem. Pronto, un ehército asirio grandi ta menasá e stad. “E ta zwai su man den forma menasante na e ceru dje yu muher di Síon, e ceritu di Jerusalem.” (Isaías 10:32b) Kico por para e asirionan?

15, 16. (a) Pakico rey Ezekías mester tin un fe fuerte? (b) Riba kico Ezekías por basa su fe cu Jehova lo yud’é?

¹⁵ Den su palacio den e stad, rey Ezekías ta bira inkieto. E ta sker su pañanan i ta tapa su mes cu paña di sacu. (Isaías 37:1) E ta manda algun homber cerca profeta Isaías pa esaki consultá Jehova na fabor di Huda. Nan ta bolbe lihé cu e contesta di Jehova: “No tene miedu . . . Sigur lo mi defendé e stad aki.” (Isaías 37:6, 35) Pero e asirionan ta sigui menasá, hopi sigur di nan victoria.

¹⁶ Fe: esei ta loke ta sostené rey Ezekías durante e crísis aki. Fe ta “e demostracion evidente di realidadnan aunke nan no ta ser contemplá.” (Hebreonan 11:1) E ta encerá wak mas leu cu loke ta bisto. Pero fe ta basá riba conocimentu. Probablemente Ezekías ta corda e palabranan trankilisante cu Jehova a pronunciá di antemano: “No tene miedu, o mi pueblo cu ta biba den Síon, pa causa dje asirio . . . Pasobra djis akí un ratu hopi corticu—i e denunciacion lo a yega na su fin, i mi rabia, ora nan caba na nada. I Jehova di ehércitonan sigur lo zwai un zwiep contra dje manera na e derota di Madian cerca dje baranca di Oreb; i su garoti lo ta riba laman, i sigur lo e his’é manera el a haci cu Egipto.” (Isaías 10:24-26)c Sí, e pueblo di Dios a yega di pasa den pertá caba. E antepasadonan di Ezekías a parce totalmente impotente dilanti dje ehército egipcio na laman Corá. Siglonan promé, Gídeon tabatin gran desbentaha ora madianita i amalekita a invadí Israel cu un ehército enorme. Sin embargo, Jehova a libra su pueblo na ámbos ocasion.—Éxodo 14:7-9, 13, 28; Huesnan 6:33; 7:21, 22.

17. Con e yugo asirio ta ser “destrosá,” i pakico?

¹⁷ Jehova lo haci atrobe loke el a haci na e ocasionnan anterior ei? Sí. Jehova ta primintí: “Tin cu sosodé riba e dia ei cu su carga lo bai for di riba bo scouder, i su yugo for di riba bo garganta, i sigur lo destrosá e yugo pa causa dje zeta.” (Isaías 10:27) Scouder i garganta dje pueblo cu ta den pacto cu Dios lo ser librá dje yugo asirio. En berdad, e yugo lo ser “destrosá.” I bon destrosá! Den un solo anochi, e angel di Jehova ta mata 185.000 asirio. E menasa ta disparcé, i e asirionan ta retirá for dje suela di Huda pa semper. (2 Reynan 19:35, 36) Pakico? “Pa causa dje zeta.” Esaki posiblemente ta e zeta cu a usa pa ungi Ezekías como rey den e liña di desendencia di David. Pues, Jehova ta cumpli cu su promesa: “Ami sigur lo defendé e stad aki pa salb’é pa causa di mi mes i pa causa di mi sirbidó David.”—2 Reynan 19:34.

18. (a) E profecia di Isaías tin mas cu un cumplimentu? Splica. (b) Cua organisacion awe ta parce Samaria di antigwedad?

¹⁸ Aunke e relato di Isaías cu a ser considerá den e capítulo aki tin di haber cu sucesonan den Huda di mas cu 2.700 aña pasá, nan ta masha relevante pa nos dia. (Romanonan 15:4) Esei kier men cu e personahenan principal den e relato emocionante aki—e habitantenan di Samaria i Jerusalem i tambe e asirionan—tin ekivalente moderno? Sí, efectivamente. Mescos cu Samaria idólatra, cristiandad ta pretendé di ta adorá Jehova, pero e ta apóstata te den su higra. Den An Essay on the Development of Christian Doctrine, cardinal católico romano John Henry Newman ta admití cu e obhetonan cu cristiandad a usa pa siglonan, manera censia, bela, awa bendita, toga di pastor i imágen, “tur ta di orígen pagano.” Cristiandad su adoracion basá riba paganismo ta mes ofensivo pa Jehova cu e idolatria di Samaria.

19. Ki spiertamentu cristiandad a ricibí, i for di ken?

¹⁹ Testigonan di Jehova tin hopi aña ta spierta cristiandad cu Jehova ta disgustá cu nan. Na 1955, por ehempel, a duna na tur parti di tera e discurso público titulá “Cristiandad of Cristianismo—Cua di Nan Ta ‘e Lus di Mundu’?” E discurso a splica detayadamente den ki forma cristiandad a desviá for dje berdadero doctrina i prácticanan cristian. Despues di esei, nan a post copia dje discurso electrisante aki pa clero den hopi pais. Como organisacion, cristiandad no a haci caso dje spiertamentu. E no ta laga Jehova cu niun otro opcion sino di castigu’é cu “bara.”

20. (a) Ken lo hunga e papel dje asirio moderno, i con lo e ser usá como bara? (b) Te na ki grado lo castigá cristiandad?

²⁰ Ken Jehova lo usa pa castigá cristiandad rebelde? Nos ta haña e contesta den Revelacion capítulo 17. Ei e ta introducí nos na un muher di mala bida, “Babilonia e Grandi,” cu ta representá tur religion falsu di mundu, incluso cristiandad. E muher di mala bida ta core riba lomba di un bestia salbahe di color scarlata cu tin shete cabes i dies cachu. (Revelacion 17:3, 5, 7-12) E bestia salbahe ta representá e Organisacion di Nacionnan Uní (ONU).d Mescos cu Asiria di antigwedad a destruí Samaria, e bestia salbahe color scarlata “lo odia e muher di mala bida i lo hacié desolá i sunú, i lo come su carni i lo kim’é completamente cu candela.” (Revelacion 17:16) Pues e asirio moderno (nacionnan miembro di ONU) lo dal cristiandad un golpi devastador cu lo caba cuné completamente.

21, 22. Ken lo hinca den cabes dje bestia salbahe pa atacá e pueblo di Dios?

²¹ Jehova su Testigonan fiel lo perecé huntu cu Babilonia e Grandi? No. Dios no ta disgustá cu nan. Adoracion puru lo sigui existí. Sin embargo, e bestia salbahe cu ta destruí Babilonia e Grandi ta wak cu gana den direccion dje pueblo di Jehova tambe. Haciendo esei, no ta e pensamentu di Dios e bestia ta cumpli cuné, sino di un otro persona. Ken? Satanas e Diabel.

²² Jehova ta desenmascará e plan orguyoso di Satanas: “Tin cu sosodé riba e dia ei cu cosnan lo subi na bo [Satanas su] curason, i sigur lo bo pensa riba un plan dañino; i bo tin cu bisa: ‘Lo mi . . . bini riba esnan cu ta sin disturbio, bibando den siguridad, nan tur bibando sin muraya [di proteccion] . . .’ Lo e ta pa haña un gran botin.” (Ezekiel 38:10-12) Satanas lo pensa: ‘Sí, pakico no instigá e nacionnan pa atacá Testigonan di Jehova? Vulnerabel i indefenso manera nan ta, i sin influencia político, nan lo no ofrecé resistencia. Lo ta masha fácil pa piki nan manera webu for di un neshi sin proteccion!’

23. Pakico e asirio di tempu moderno lo no por haci cu e pueblo di Dios loke e ta haci cu cristiandad?

²³ Pero, nacionnan tene cuidou! Sabi cu si boso mishi cu e pueblo di Jehova, boso lo tin cu enfrentá Dios mes! Jehova ta stima su pueblo, i lo e bringa pa nan mes sigur cu el a bringa pa Jerusalem den tempu di Ezekías. Ora e asirio di tempu moderno intentá pa likidá Jehova su sirbidónan, lo e ta batayando contra Jehova Dios i e Lamchi, Jesucristo. Esei ta un bataya cu e asirio no por gana. “E Lamchi lo vence nan,” segun Bijbel, “dor cu e ta Señor di señornan i Rey di reynan.” (Revelacion 17:14; compará cu Mateo 25:40.) Mescos cu e asirio di antigwedad, e bestia salbahe di color scarlata lo “bai na destruccion.” Hende lo no tin miedu di dje mas.—Revelacion 17:11.

24. (a) Como preparacion pa futuro, kico cristian berdadero ta decididu pa haci? (b) Con Isaías ta wak mas aleu den futuro? (Mira cuadro na página 155.)

²⁴ Si cristiannan berdadero mantené nan relacion firme cu Jehova i pone e boluntad di Dios como e cos mas importante den nan bida, nan lo por enfrentá futuro sin miedu. (Mateo 6:33) Den tal caso, nan no tin nodi “teme nada malu.” (Salmo 23:4) Cu wowo di fe, nan lo mira e brasa poderoso di Dios hisá na haltu, no pa castigá nan, sino pa protehá nan for di nan enemigunan. I nan oreanan lo tende e palabranan trankilisante aki: “No tene miedu.”—Isaías 10:24.

[Nota]

[Kuadro/Plachi na página 155, 156]

ISAÍAS TA WAK MAS ALEU DEN FUTURO

Isaías 10:20-23

Capítulo 10 di Isaías ta enfocá principalmente riba con Jehova lo usa e invasion asirio pa ehecutá huicio contra Israel, i tambe riba su promesa pa defendé Jerusalem. Dor cu versículo 20 pa 23 ta meimei dje profecia aki, por considerá cu nan tin un cumplimentu general durante e mésun periodo. (Compará cu Isaías 1:7-9.) Sin embargo, e palabranan usá ta indicá cu e versículonan aki ta aplicá mas specíficamente na periodonan despues, tempu cu Jerusalem tambe lo tabatin cu respondé p’e picánan di su habitantenan.

Rey Acas ta purba haña siguridad dor di acudí na Asiria pa yudansa. Profeta Isaías ta predicí cu lo yega e dia cu e sobrebibientenan dje cas di Israel lo no bolbe sigui e proceder bobo ei. Isaías 10:20 ta bisa cu nan lo “dependé riba Jehova, e Santu di Israel, cu apego na berdad.” Pero versículo 21 ta mustra cu ta solamente un cantidad chikitu lo haci esei: “Un resto so lo bolbe.” E palabranan aki ta pone nos pensa riba e yu homber di Isaías cu yama Sear-jasub, cu ta un señal den Israel i kende su nomber ta nificá “Un Resto So Lo Bolbe.” (Isaías 7:3) Versículo 22 di capítulo 10 ta anunciá cu a decretá un futuro “exterminacion.” Un exterminacion asina lo ta hustu pasobra esei ta e castigu cu un pueblo rebelde merecé. Como resultado, for di un nacion di masha hopi habitante “manera pipita di santu di laman,” ta un resto so lo regresá. Versículo 23 ta spierta cu e binidero exterminacion aki lo afectá henter e pais. E biaha aki sí Jerusalem lo no scapa.

E versículonan aki ta duna un bon descripcion di loke a sosodé na aña 607 P.E.C. ora Jehova a usa e Imperio Babilónico como su “bara.” E pais completo, incluso Jerusalem, a cai den man dje invasor. A hiba e hudiunan prezu na Babilonia pa 70 aña. Sin embargo, despues di esei, algun—aunke nan tabata “un resto so”—a regresá pa reestablecé adoracion berdadero den Jerusalem.

Manera Romanonan 9:27 i 28 ta mustra, e profecia na Isaías 10:20-23 tabatin un cumplimentu mas den promé siglo. (Compará cu Isaías 1:9; Romanonan 9:29.) Pablo ta splica cu den promé siglo E.C, un “resto” di hudiu a “bolbe” na Jehova den sentido spiritual, ora un cantidad chikitu di hudiu fiel a bira siguidó di Jesucristo i a cuminsá adorá Jehova “cu spiritu i cu berdad.” (Juan 4:24) Mas despues, creyente gentil a uni cu esakinan, formando asina un nacion spiritual, “e Israel di Dios.” (Galationan 6:16) N’e ocasion ei e palabranan di Isaías 10:20 a cumpli: “Nunca mas” un nacion dedicá na Jehova a alehá for di dje i recurí na fuentenan humano pa busca apoyo.

[Plachi na página 147]

Senákerib ta kere cu poderá dje nacionnan ta mes fácil cu ora ta coge webu for di un neshi