Capítulo Bintidos

Isaías Ta Predicí Jehova Su ‘Echo Straño’

Isaías 28:1–29:24

 1, 2. Di con Israel i Huda ta sinti nan mes safe?

PA UN periodo breve, Israel i Huda ta sinti nan mes safe. Nan lidernan a cera aliansanan político cu nacionnan mas grandi i mas poderoso, den un intento pa haña siguridad den un mundu peligroso. Samaria, capital di Israel, a acudí na su bisiña Siria, miéntras cu Jerusalem, capital di Huda, a pone su confiansa den Asiria cruel.

² Ta posibel cu algun hudiu dje reino di nort no solamente ta pone nan confiansa den e aliadonan político nobo, sino tambe ta verwagt cu Jehova ta protehá nan apesar cu nan ta sigui usa bisé di oro den adoracion. Huda tambe ta convencí cu e por conta cu Jehova su proteccion. Al fin i al cabo, Jehova su tempel no ta situá den nan capital, Jerusalem? Pero tin sucesonan inesperá ta warda ámbos nacion. Jehova ta inspirá Isaías pa predicí desaroyonan cu lo parce ègt straño pa su pueblo rebelde. I su palabranan ta contené lesnan vital pa tur hende djawe.

“E Burachénan di Efraim”

 3, 4. Kico Israel su reino di nort ta orguyoso di dje?

³ Isaías ta cuminsá su profecia cu e palabranan sorprendente aki: “Ai dje corona distinguí dje burachénan di Efraim, i e flor marchitá di su adorno di bunitesa cu ta riba cabes dje vaye fértil di esnan vencí pa biña! Mira! Jehova tin un persona fuerte i vigoroso. Manera un tempestad di bos [strena] i hagel, . . . lo e tira abou na tera cu forsa. Cu pia lo trapa e coronanan distinguí dje burachénan di Efraim.”—Isaías 28:1-3.

⁴ Efraim, e tribu mas prominente dje dies tribunan di nort, ta representá henter e reino di Israel. Su capital Samaria, ta situá na un lugá bunita i imponente na “cabes dje vaye fértil.” E lidernan di Efraim ta orguyoso di nan “corona distinguí,” esta nan independencia for dje reino davídico na Jerusalem. Pero nan ta ‘buraché,’ fuma den sentido spiritual debí na nan aliansa cu Siria contra Huda. Tur loke nan ta stima ta a punto di ser trapá bou di pia di invasor.—Compará cu Isaías 29:9.

 5. Ki situacion precario Israel ta aden, pero ki speransa Isaías ta ofrecé?

⁵ Efraim no ta realisá e situacion precario cu e ta aden. Isaías ta sigui bisa: “E flor marchitá di su adorno di bunitesa cu ta riba e cabes dje vaye fértil mester bira manera e figu trempan promé cu zomer, cu, ora esun cu ta mira mir’é, miéntras cu e ta den su plant’i man ainda, e ta gulié.” (Isaías 28:4) Efraim lo cai den man di Asiria, manera un co’i boca dushi cu bo ta come den un solo hap. No tin speransa anto? Wel, manera hopi bes ta e caso, Isaías su profecianan di huicio ta revelá un rayo di speransa. Aunke e nacion cai, personanan fiel lo sobrebibí cu yudansa di Jehova. “Jehova di ehércitonan lo bira manera un corona di adorno i manera un krans di bunitesa pa esnan cu a resta di su pueblo, i manera un spiritu di husticia pa esun cu ta sinta den huicio, i manera poder pa esnan cu ta apartá e bataya for dje porta.”—Isaías 28:5, 6.

“Nan A Desviá”

 6. Ki tempu Israel ta yega su fin, pero di con Huda no mag alegrá?

⁶ E dia di regla cuenta a yega pa Samaria na aña 740 P.E.C. ora cu e asirionan ta destrosá e pais i e reino di nort ta stop di existí como un nacion independiente. Ke tal di Huda? Su pais lo ser invadí pa Asiria, i despues Babilonia lo destruí su capital. Pero durante e bida di Isaías, e tempel i sacerdocio di Huda lo sigui funcioná i su profetanan lo sigui profetisá. Huda mag alegrá cu fin di su bisiña di nort ta yegando? Claro cu no, pasobra Jehova lo regla cuenta tambe cu Huda i cu su lidernan pa nan desobedencia i falta di fe.

 7. Den ki manera e lidernan di Huda ta burachi, i cu ki resultado?

⁷ Dirigiendo su mensahe na Huda, Isaías ta sigui bisa: “I esakinan tambe—pa causa di biña nan a desviá i pa causa di bebida cu ta haci burachi nan a cana dual. Sacerdote i profeta—nan a desviá pa causa di bebida cu ta haci burachi, nan a bira confundí como resultado di biña, nan a cana dual como resultado dje bebida cu ta haci burachi; nan bista a desviá, nan a tambaleá pa loke ta decision. Pasobra tur e mesanan mes a yena cu saca vies—no tin un lugá sin dje.” (Isaías 28:7, 8) Esta vies no! Buracheria literal den e cas di Dios ta basta malu caba. Pero e sacerdote i profetanan aki ta burachi den sentido spiritual: demasiado confiansa den aliansanan humano a nubla nan mente. Nan a gaña nan mes cu nan proceder ta e único cos práctico pa haci, keriendo kisas cu awor nan tin un plan di emergencia si acaso Jehova su proteccion resultá inadecuá. Den nan condicion spiritualmente fuma, e lidernan religioso aki ta saca expresionnan impuru i repugnante cu ta revelá con serio nan falta di berdadero fe den e promesanan di Dios ta.

 8. Con e hendenan ta reaccioná riba e mensahe di Isaías?

⁸ Con e lidernan di Huda ta reaccioná riba e spiertamentu di Jehova? Nan ta haci bofon di Isaías, i ta acus’é di ta papia cu nan como si fuera ta mucha chikitu nan ta: “Ken hende lo instruí den conocimentu, i ken hende lo haci comprendé loke a ser tendé? Esnan cu a ser kitá for di lechi, esnan kitá for di pechu? Pasobra ta ‘mandamentu riba mandamentu, mandamentu riba mandamentu, liña di midi riba liña di midi, liña di midi riba liña di midi, un poco aki, un poco aya.’” (Isaías 28:9, 10) Esta ripititivo i straño e palabranan di Isaías ta zona den nan orea! E ta blo ripití su mes, bisando: ‘Esaki ta loke Jehova a manda! Esaki ta loke Jehova a manda! Esaki ta Jehova su norma! Esaki ta Jehova su norma!’a Pero pronto Jehova lo “papia” cu e habitantenan di Huda cu echo. Lo e manda contra nan e ehércitonan di Babilonia, stranheronan cu realmente ta papia un idioma distinto. E ehércitonan ei sigur lo cumpli cu Jehova su “mandamentu riba mandamentu,” i Huda lo cai.—Lesa Isaías 28:11-13.

Burachénan Spiritual Djawe

 9, 10. Ki tempu i con e palabranan di Isaías tabatin nificacion pa generacionnan despues?

⁹ Ta riba antiguo Israel i Huda so e profecianan di Isaías a cumpli? Di ningun manera! Tantu Jesus como Pablo a cita su palabranan i a aplicá nan na e nacion den nan tempu. (Isaías 29:10, 13; Mateo 15:8, 9; Romanonan 11:8) Awe tambe a surgi un situacion similar na esun den tempu di Isaías.

¹⁰ E biaha aki, ta lidernan religioso di cristiandad ta esnan cu ta pone nan fe den política. Nan ta cana tambaleá, mescos cu e burachénan di Israel i Huda, i ta interferí den asuntunan político, i ta alegrá cu e asina yamá grandinan dje mundu aki ta pidi nan conseho. En bes di papia puru berdad bíblico, nan ta papia impuresa. Nan vision spiritual ta trubel, i nan no ta guia confiabel pa humanidad.—Mateo 15:14.

11. Con e lidernan di cristiandad ta reaccioná riba e bon nobo dje Reino di Dios?

¹¹ Con e lidernan di cristiandad ta reaccioná ora Testigonan di Jehova hala nan atencion na e único speransa berdadero: e Reino di Dios? Nan no ta comprendé. Pa nan, ta manera cos cu e Testigonan ta blo ripití e mésun cos, manera mucha chikitu. E lidernan religioso ta menospreciá e mensaheronan aki i ta haci bofon di nan. Mescos cu e hudiunan den tempu di Jesus, nan no kier e Reino di Dios ni nan no kier pa nan tounan tende di dje. (Mateo 23:13) P’esei ta notificá nan cu no ta semper Jehova lo papia mediante mensaheronan inofensivo. E dia lo yega ora cu esnan cu no ta someté nan mes na e Reino di Dios lo ser “kibrá i cogé den las i atrapá,” sí, destruí completamente.

“Un Pacto cu Morto”

12. Kico ta Huda su supuesto “pacto cu Morto”?

¹² Isaías ta sigui cu su declaracion formal: “Boso a bisa: ‘Nos a cera un pacto cu Morto; i nos a efectuá un vision cu Sheol; e inundacion repentino, den caso cu e pasa, lo no bini pa nos, pasobra nos a haci un mentira nos refugio i nos a sconde nos mes den falsedad.’” (Isaías 28:14, 15) E lidernan di Huda ta gaba cu nan aliansanan político ta protehá nan di derota. Nan ta sinti cu nan a “cera un pacto cu Morto” p’e laga nan na pas. Pero nan refugio bano lo no protehá nan. Nan aliansanan ta un mentira, un falsedad. Awe ta mescos, cristiandad su relacion estrecho cu e lidernan di mundu lo no proteh’é ora Jehova su dia di regla cuenta cuné yega. De echo, ta net esei lo resultá den nan ruina.—Revelacion 17:16, 17.

13. Ken ta e “piedra probá,” i con cristiandad a rechas’é?

¹³ Ta na unda anto e lidernan religioso aki mester acudí pa yudansa? Isaías ta registrá awor e promesa di Jehova: “Ata mi ta pone como fundeshi den Síon un piedra, un piedra probá, e skina precioso di un fundeshi sigur. Ningun hende cu ehercé fe lo drenta pánico. I lo mi haci rectitud e liña di midi i husticia e waterpas; i hagel mester bari e refugio di mentira, i awa lo inundá asta e lugá di sconde.” (Isaías 28:16, 17) No hopi tempu despues cu Isaías ta papia e palabranan aki, fiel rey Ezekías ta ser entronisá na Síon, i su reino ta salba dor di intervencion di Jehova, no dor di aliadonan bisiña. Sin embargo, e palabranan inspirá aki no ta cumpli riba Ezekías. Citando e palabranan di Isaías, apostel Pedro a mustra cu ta Jesucristo, un desendiente leu di Ezekías, ta e “piedra probá” i cu niun hende cu ehercé fe den Dje no tin nodi teme nada. (1 Pedro 2:6) Esta tristu cu e lidernan di cristiandad, miéntras nan ta yama nan mes cristian, a haci net loke Jesus a nenga di haci! Nan a busca prominencia i poder den e mundu aki, en bes di warda riba Jehova p’e trece su Reino bou di Jesucristo e Rey.—Mateo 4:8-10.

14. Na ki tempu Huda su “pacto cu Morto” lo ser disolvé?

¹⁴ Jehova lo exponé Huda su refugio político pa e mentira cu e ta, na momento cu “e inundacion repentino” dje ehércitonan di Babilonia pasa dor dje pais. “Sigur lo disolvé boso pacto cu Morto,” Jehova ta bisa. “E inundacion repentino, ora e pasa—boso tambe tin cu bira p’e un lugá di trapa ariba. Mes tantu biaha cu e pasa, . . . e tin cu bira nada otro cu un motibu pa tembla pa asina laga otronan comprendé loke a tende.” (Isaías 28:18, 19) Sí, tin un les poderoso cu nos por siña for di loke ta sosodé cu esnan cu ta pretendé di ta sirbi Jehova, pero cu ta pone nan confiansa den aliansanan cu e nacionnan.

15. Con Isaías ta ilustrá cu Huda su proteccion ta deficiente?

¹⁵ Considerá e posicion den cua e lidernan aki di Huda ta haña nan mes awor. “E cama a resultá muchu corticu pa un hende rek riba dje, i e laken di weef mes ta muchu smal ora un hende lora su mes aden.” (Isaías 28:20) Ta como si fuera nan mester a cai drumi pa descansá, pero en bano. Sea nan pianan ta keda afó den e friu of nan ta hala nan pia ariba i e laken ta muchu smal pa nan lora nan curpa aden i keda cayente. Esei tabata un situacion incómodo den tempu di Isaías. I esei ta e situacion awe pa ken cu ta pone nan confiansa den e refugio di cristiandad cu ta un mentira. Ki repugnante cu algun lider di cristiandad a haña nan mes implicá den atrocidadnan horibel manera purificacion étnico i genocidio, dor di nan metementu den política!

Jehova Su ‘Echo Straño’

16. Kico ta Jehova su ‘echo straño,’ i di con e obra aki ta extraordinario?

¹⁶ E resultado final di cosnan lo ta completamente contrario na loke e lidernan religioso di Huda ta spera. Jehova lo haci algu straño cu e burachénan spiritual di Huda. “Jehova lo lanta mescos cu na ceru Perazim, lo e ta agitá mescos cu den e yanura abou cerca di Gabon, pa e por haci su echo—su echo ta straño—i pa e por haci su obra—su obra ta extraordinario.” (Isaías 28:21) Den e dianan di rey David, Jehova a duna su pueblo victorianan notabel riba e filisteonan na ceru di Perazim i den e yanura abou di Gabon. (1 Crónicanan 14:10-16) Den e dianan di Hosué, Jehova a asta laga solo para ketu riba Gabon pa asina Israel su victoria riba e amoreonan por tabata completo. (Hosué 10:8-14) Esei tabata sumamente extraordinario! Awor Jehova lo bolbe lucha, pero e biaha aki contra esnan cu ta profesá di ta su pueblo. Lo por tin algu mas straño of extraordinario cu esei? No, foral si tene na cuenta cu Jerusalem ta e centro di Jehova su adoracion i e stad di Jehova su rey ungí. Te cu e tempu ei, e cas real di David na Jerusalem nunca a ser tumbá. Pero tog, Jehova sigur lo efectuá su ‘echo straño.’—Compará cu Habacuc 1:5-7.

17. Ki efecto hacimentu di mofa lo tin riba e cumplimentu di Isaías su profecia?

¹⁷ P’esei Isaías ta spierta: “No mustra cu boso ta mofadó, pa boso banchi no bira fuerte, pasobra tin un exterminacion, asta algu dicidí caba, cu mi a tende for di Señor Soberano, Jehova di ehércitonan, pa tur e tera.” (Isaías 28:22) Aunke e lidernan di Israel ta haci mofa, e mensahe di Isaías ta berdad. El a tend’é di Jehova, esun cu ken e lidernan religioso tin un relacion di pacto. Mescos awe, e lidernan religioso di cristiandad ta haci mofa ora nan tende di Jehova su ‘echo straño.’ Nan ta asta zundra i sapatiá. Pero e mensahe cu Testigonan di Jehova ta proclamá ta berdad. E ta ser hañá den Bijbel, un buki cu e lidernan ei ta bisa cu nan ta representá.

18. Con Isaías ta ilustrá e manera balansá cu Jehova ta duna disiplina?

¹⁸ Pa loke ta e personanan sincero cu no ta sigui e lidernan aki, Jehova lo reahustá nan i restorá nan na su fabor. (Lesa Isaías 28:23-29.) Mescos cu un cunukero ta usa métodonan mas suave pa bati un grano mas delicado, manera por ehempel comino, asina Jehova ta ahustá su disiplina segun e persona i e circunstancia. Nunca e ta arbitrario ni opresivo, sino mas bien ta actua pa logra e posibel recuperacion di esnan cu faya. Sí, tin speransa pa tur cu ta reaccioná riba Jehova su yamada. Mescos awe, aunke e destino di cristiandad den su totalidad ta seyá, ken cu individualmente ta someté su mes na e Reino di Jehova por evitá di ricibí e binidero huicio adverso.

Ai di Jerusalem!

19. Den ki manera Jerusalem ta bira un “fogon di altar,” i na ki tempu i con esaki ta tuma lugá?

¹⁹ Pero di kico Jehova ta papia awor? “Ai di Ariel, di Ariel, e stad caminda David a kampeer! Boso agregá aña riba aña; laga e fiestanan completá nan gira. I mi tin cu haci cos pertá pa Ariel, i mester bini luto i lamentacion, i e tin cu bira pa mi manera e fogon di altar di Dios.” (Isaías 29:1, 2) Posiblemente “Ariel” ta nificá “E Fogon di Altar di Dios,” i aki e ta referí evidentemente na Jerusalem. Ei ta caminda e tempel cu su altar di sacrificio ta situá. E hudiunan ta sigui e custumber di tene fiesta i ofrecé sacrificio einan, pero Jehova no tin niun tiki placer den nan adoracion. (Oséas 6:6) Mas bien, e ta decretá cu e stad mester bira un “fogon di altar” den un otro sentido. Mescos cu un altar, sanger lo core for di dje i lo e ta someté na candela. Jehova ta asta describí con esaki lo sosodé: “Mi tin cu kampeer na tur banda contra bo, i mi tin cu sitia bo cu un curá di staca i lanta obranan di sitiamentu contra bo. I bo tin cu ser rebahá di manera cu ta for di tera lo bo papia, i manera ta for di stòf bo dicho lo zona abou.” (Isaías 29:3, 4) Esaki a cumpli pa Huda cu Jerusalem na aña 607 P.E.C., ora cu e ehército babilonio ta sitia i destruí e stad i kima e tempel. Nan ta rebahá Jerusalem te abou n’e suela riba cua a trah’é.

20. Kico lo ta e destino final dje enemigunan di Dios?

²⁰ Promé cu e momento teribel ei yega, tempu-tempu Huda tin un rey cu ta obedecé e Ley di Jehova. Kico e ora ei? Jehova ta bringa pa su pueblo. Aunke kisas e enemigu ta cubri henter e tera, nan lo bira manera “puiru fini” i “bagas.” Na Jehova su debido tempu e ta plama nan “cu bos [strena] i cu temblor i cu un gran zonido, cu bientu di tempestad i tormenta, i vlam di un candela devorador.”—Isaías 29:5, 6.

21. Splica e ilustracion na Isaías 29:7 i 8.

²¹ Ehércitonan hostil kisas ta ansioso pa sakea Jerusalem i yena nan barica cu botin di guera. Pero un decepcion grandi ta warda nan! Mescos cu ora un hende hambrá ta soña cu e ta saboriá un bon cuminda anto caba e ta spierta mas hambrá cu nunca, asina e enemigunan di Huda lo no disfrutá dje bankete cu nan ta anticipá cu tantu anhelo. (Lesa Isaías 29:7, 8.) Wak kico ta pasa cu e ehército asirio bou di mando di Senákerib, ora cu e ta menasá Jerusalem den tempu di fiel rey Ezekías. (Isaías, capítulo 36 i 37) Den un solo anochi, sin cu un hende hisa man, e temibel makinaria di guera asirio ta hañ’é obligá ta bati retirada despues cu 185.000 di su guereronan balente ta muri! Un biaha mas soñonan di conkista lo ser frustrá ora cu e makinaria di guera di Gog di Magog prepará pa atacá e pueblo di Jehova den futuro cercano.—Ezekiel 38:10-12; 39:6, 7.

22. Con Huda su buracheria spiritual ta afect’é?

²² Na momento cu Isaías ta expresá e porcion aki di su profecia, e lidernan di Huda no tin fe manera di Ezekías. E aliansanan cu nan a cera cu e nacionnan malbado, a haci nan burachi i a laga nan spiritualmente zonzá. “Boso tarda, i keda asombrá; ciega boso mes, i ser ciegá. Nan a bira burachi, pero no cu biña; nan ta tambaleá, pero no di bebida cu ta haci burachi.” (Isaías 29:9) E lidernan aki, burachi den sentido spiritual, no por dicerní e importancia dje vision duná na Jehova su profeta berdadero. Isaías ta declará: “Riba boso Jehova a drama un spiritu di soño profundo; i e ta cera boso wowo, profetanan, i el a tapa asta boso cabes, hombernan di vision. I pa boso e vision di tur cos ta bira manera e palabranan di un buki seyá, cu nan a duna un hende cu sa skirbi, i bis’é: ‘Por fabor, lesa esaki na bos haltu’ i e tin cu bisa: ‘Ami no por, pasobra e ta seyá’; i mester duna e buki na un hende cu no sa skirbi, bisando: ‘Por fabor, lesa esaki na bos haltu,’ i e tin cu bisa: ‘Ami no sa nada di skirbimentu.’”—Isaías 29:10-12.

23. Di con Jehova lo regla cuenta cu Huda, i con lo e haci esei?

²³ E lidernan religioso di Huda ta profesá di ta discreto den sentido spiritual, pero nan a bandoná Jehova. Nan ta siña hende nan propio ideanan trocí di loke ta bon i malu, hustificando nan actividadnan infiel i inmoral i tambe e echo cu nan ta dirigí hende riba e caminda cu ta hiba na Dios su desaprobacion. Mediante “algu maraviyoso”—su ‘echo straño’—Jehova lo regla cuenta cu nan pa nan hipocresia. E ta bisa: “Pa motibu cu e pueblo aki a bini cerca cu nan boca, i nan a glorificá mi simplemente cu nan lip, i nan a alehá nan curason mes leu for di mi, i nan temor pa cu mi ta bira mandamentu di hende cu ta ser siñá, p’esei at’ami akí, Esun cu lo actua maraviyosamente atrobe cu su pueblo, den un manera maraviyoso i cu algu maraviyoso; i e sabiduria di nan sabionan tin cu perecé, i asta e comprendimentu di nan hombernan discreto lo sconde su mes.” (Isaías 29:13, 14) Huda su supuesto sabiduria i comprendimentu lo disparcé ora Jehova maniobrá cosnan di tal manera cu henter su sistema religioso apóstata ta ser eradicá dor dje Potencia Mundial Babilónico. Mescos a sosodé den promé siglo despues cu e lidernan hudiu, cu a kere cu nan ta masha sabí, a desviá e nacion. Algu similar lo sosodé den nos dia tambe cu cristiandad.—Mateo 15:8, 9; Romanonan 11:8.

24. Con e habitantenan di Huda ta revelá cu nan no tin temor di Dios?

²⁴ Sin embargo pa awor, e lidernan bromadó di Huda ta kere cu nan ta asina sabí cu nan lo no haña castigu pa e manera cu nan a corumpí adoracion berdadero. Pero esei ta berdad? Isaías ta kita nan mascarada, i ta saca na cla cu nan no tin berdadero temor di Dios i pues tampoco berdadero sabiduria: “Ai di esnan cu ta baha na gran profundidad pa sconde conseho for di Jehova mes, i kende nan obranan a tuma lugá den un lugá scur, miéntras nan ta bisa: ‘Ken ta mira nos, i ken sa di nos?’ Esta robes boso ta! Acaso mester considerá e trahadó di pochi igual cu e klei? Pues e cos trahá mester bisa di esun cu a trah’é: ‘E no a traha mi’? I realmente e cos formá mes ta bisa di su formadó: ‘E no a mustra comprendimentu’?” (Isaías 29:15, 16; compará cu Salmo 111:10.) No ta importá con bon scondí nan ta pensa cu nan ta, nan ta para “sunú i abiertamente exponé” den bista di Dios.—Hebreonan 4:13.

“E Surdunan Sigur Lo Tende”

25. Den ki sentido “e surdunan” lo tende?

²⁵ Sin embargo, tin salbacion pa personanan cu ehercé fe. (Lesa Isaías 29:17-24; compará cu Lucas 7:22.) “E surdunan” lo “tende e palabranan dje buki,” esta, e mensahe for dje Palabra di Dios. Sí, esaki no ta un curacion di hende físicamente surdu. E ta un curacion spiritual. Un biaha mas Isaías ta señalá na e futuro establecimentu dje Reino Mesiánico i na restoracion di adoracion berdadero riba tera mediante e gobiernu dje Mesías. Esaki a tuma lugá den nos tempu, i miyones di hende sincero ta lagando Jehova corigí nan i ta siña alab’é. Ki un cumplimentu emocionante! Finalmente, e dia lo yega ora cu tur hende, tur cos cu ta hala rosea, lo alabá Jehova i santificá su nomber santu.—Salmo 150:6.

26. Ki recordatorionan spiritual “e surdunan” ta tende awe?

²⁶ Kico “e surdunan” ei cu ta tende e Palabra di Dios awe ta siña? Cu tur cristian, foral esnan cu e congregacion ta considerá como ehempel, tin cu tene hopi cuidou pa no ‘desviá pa causa di bebida cu ta haci burachi.’ (Isaías 28:7) Ademas, nunca nos no mag cansa di tende e recordatorionan di Dios. Esakinan ta yuda nos mira tur cos for di un punto di bista spiritual. Aunke cristiannan ta someté nan mes manera mester ta na autoridadnan gubernamental i ta spera cierto servicionan di nan, salbacion ta bini di Jehova Dios, no dje mundu seglar. Tambe nos no mag lubidá nunca cu mescos cu den caso di Jerusalem apóstata, Dios su huicio riba e generacion aki ta inevitabel. Cu Jehova su yudansa nos por sigui proclamá su spiertamentu apesar di oposicion, manera Isaías a haci.—Isaías 28:14, 22; Mateo 24:34; Romanonan 13:1-4.

27. Ki les cristiannan por siña for dje profecia di Isaías?

²⁷ Ancianonan i mayornan por siña for dje manera cu Jehova ta duna disiplina, i no limitá nan mes na solamente castigá esnan cu a faya, sino tambe trata semper di yuda nan gana e fabor di Dios bek. (Isaías 28:26-29; compará cu Jeremías 30:11.) I nos tur, incluso hóbennan, ta ser recordá cu ta esencial pa sirbi Jehova di curason, no djis aparentá di ta cristian afin di agradá hende. (Isaías 29:13) Nos tin cu mustra cu distinto dje habitantenan sin fe di Huda, nos sí tin un temor sano di Jehova i un respet profundo p’e. (Isaías 29:16) Ademas, nos tin cu mustra cu nos ta dispuesto pa siña for di Jehova i lagu’é corigí nos.—Isaías 29:24.

28. Con Jehova su sirbidónan ta considerá su actonan di salbacion?

²⁸ Ki importante ta anto pa nos tin fe i confiansa den Jehova i den su manera di haci cosnan! (Compará cu Salmo 146:3.) Pa mayoria hende, e mensahe di spiertamentu cu nos ta predicá ta zona infantil. E futuro destruccion di cristiandad, un organisacion cu ta bisa di ta sirbi Dios, ta un concepto straño, unu extraordinario. Pero Jehova lo efectuá su ‘echo straño.’ Di esei nos no tin duda. P’esei, atrabes dje último dianan dje sistema di cosnan aki, Dios su sirbidónan ta pone pleno confiansa den su Reino i den su Rey nombrá, Jesucristo. Nan sa cu Jehova su actonan di salbacion—efectuá huntu cu su ‘obra extraordinario’—lo trece bendicionnan eterno pa henter humanidad obediente.

[Nota]

[Plachi na página 289]

Cristiandad a confia den aliansa cu gobernante humano en bes di den Dios

[Plachi na página 290]

Jehova ta efectuá su ‘echo straño’ ora cu e permití Babilonia destruí Jerusalem

[Plachi na página 298]

Esnan cu tabata surdu den sentido spiritual, por “tende” e Palabra di Dios