Capítulo Binticincu

E Rey i Su Prinsnan

Isaías 32:1-20

 1, 2. Kico nos por bisa dje texto dje Rol di Laman Morto di Isaías?

NA FIN di añanan ’40 di siglo 20, nan a descubrí un coleccion remarcabel di rol den cuebanan cerca di laman Morto na Palestina. Nan a bira conocí como Rolnan di Laman Morto i expertonan ta kere cu nan a ser skirbí entre aña 200 P.E.C. i 70 E.C. Esun mas conocí entre nan ta un rol di Isaías skirbí na hebreo riba cueru duradero. E rol aki ta casi completo, i tin masha tiki diferencia entre su texto i e texto di manuscritonan masorético cu ta data un 1.000 aña despues. Pues, e rol ta demostrá cu a transmití e texto bíblico cu exactitud.

² Un detaye interesante tocante e Rol di Laman Morto di Isaías ta cu e pasashi conocí awe como Isaías capítulo 32 ta marcá cu un “X” cu un escriba a pone den márgen. Nos no sa di con e escriba a pone e marca ei, pero nos sa sí cu e pasashi aki di Bijbel Santu tin algu special cuné.

Gobernando pa Husticia i Rectitud

 3. Tocante cua administracion e bukinan di Isaías i Revelacion ta profetisá di dje?

³ Isaías capítulo 32 ta cuminsá cu un profecia emocionante cu ta cumpliendo den nos tempu den un forma remarcabel: “Mira! Un rey lo reina pa husticia; i en cuanto prins, nan lo goberná como prins pa rectitud.” (Isaías 32:1) Sí, “Mira!” E gritu aki ta laga nos corda un gritu similar hañá den e último buki profético di Bijbel: “Esun sintá riba e trono a bisa: ‘Mira! Mi ta haci tur cos nobo.’” (Revelacion 21:5) Tantu e buki bíblico di Isaías como di Revelacion, skirbí cu un diferencia di 900 aña, ta presentá un descripcion alentador di un administracion nobo—“un shelu nobo,” cu ta consistí dje Rey, Cristo Jesus, entronisá den shelu na 1914, i 144.000 co-gobernante “cumprá for di entre humanidad”—huntu cu “un tera nobo,” un sociedad humano mundial i uní.a (Revelacion 14:1-4; 21:1-4; Isaías 65:17-25) Cristo su sacrificio di rescate a haci henter e areglo aki posibel.

 4. Cua núcleo dje tera nobo ta presente awor?

⁴ Apostel Juan, despues di mira den vision e seyamentu final dje 144.000 co-gobernantenan aki, ta informá: “Mi a wak, i, mira! un multitud grandi, cu ningun hende por a conta, for di tur nacion i tribu i pueblo i lenga, pará dilanti dje trono i dilanti e Lamchi.” At’akí e núcleo dje tera nobo: un multitud grandi cu awor ta consistí di miyones di hende, cu a ser reuní na banda dje poconan cu a resta dje 144.000, di cua mayoria ta di edad avansá. E multitud grandi aki lo sobrebibí e tribulacion grandi cu ta acercando rápidamente i den e tera paradísico esnan resucitá lo djoin nan, tantu hende fiel como e miles di miyones di otronan cu lo ricibí e oportunidad di ehercé fe. Tur cu ehercé fe lo ser bendicioná cu bida eterno.—Revelacion 7:4, 9-17.

 5-7. Ki papel e ‘prinsnan’ profetisá tin den e tou di Dios?

⁵ Sin embargo, tanten cu e mundu aki yen di odio ta existí, miembronan dje multitud grandi tin mester di proteccion. Pa gran parti e ‘prinsnan’ cu ta “goberná . . . pa rectitud,” lo percurá pa esei. Ki un areglo magnífico! E profecia di Isaías ta usa palabranan caluroso pa describí e ‘prinsnan’ aki: “Cada un mester resultá di ta manera un lugá di sconde for di bientu i un lugá di sconde for dje tempestad di awaceru, manera riu di awa den un tera secu, manera e sombra di un baranca steil den un tera agotá.”—Isaías 32:2.

⁶ Juist awor den e tempu aki di angustia mundial, tin mester di “prins,” sí, ancianonan cu ta “presta atencion na . . . henter e tou,” cu ta cuida e carnénan di Jehova i administrá husticia na armonia cu e principionan hustu di Jehova. (Echonan 20:28) E ‘prinsnan’ ei tin cu cumpli cu e cualificacionnan describí na 1 Timoteo 3:2-7 i Tito 1:6-9.

⁷ Den su gran profecia cu a describí e angustioso “conclusion dje sistema di cosnan,” Jesus a bisa: “Mira pa boso no spanta.” (Mateo 24:3-8) Di con e condicionnan mundial peligroso djawe no ta spanta siguidónan di Jesus? Un motibu ta cu e ‘prinsnan’—sea cu nan ta ungí of “otro carné”—ta protehá e tou lealmente. (Juan 10:16) Sin miedu nan ta cuida nan rumannan, asta ora nan ta confrontá atrocidadnan manera guera étnico i genocidio. Den un mundu agotá den sentido spiritual, nan ta soru pa almanan abatí keda refrescá cu e berdadnan edificante dje Palabra di Dios, Bijbel.

 8. Con Jehova ta entrená i usa “prins” cu ta dje otro carnénan?

⁸ Durante e último 50 añanan, por a distinguí e ‘prinsnan’ claramente. “Prins” cu ta dje otro carnénan ta ser entrená como parti dje “cabesante” cu ta desaroyando, di manera cu despues dje tribulacion grandi, esnan cualificá entre nan lo ta cla pa ser nombrá pa sirbi den funcionnan administrativo den e “tera nobo.” (Ezekiel 44:2, 3; 2 Pedro 3:13) Segun cu nan ta hiba delantera den sirbishi di Reino, nan ta percurá guia i refrescamentu spiritual, i ta duna prueba di ta “manera e sombra di un baranca steil,” dunando alivio na e tou relacioná cu e adoracion cu e tou ta rindi.b

 9. Ki condicionnan ta mustra cu awendia tin mester di “prins”?

⁹ Den e último dianan peligroso aki dje mundu malbado di Satanas, cristiannan dedicá tin hopi mester di tal proteccion. (2 Timoteo 3:1-5, 13) Bientunan fuerte di doctrina falsu i propaganda engañoso ta suplando. Tin tormenta den forma di guera civil i guera entre nacionnan, i tambe atake dirigí contra fiel adoradónan di Jehova Dios. Den un mundu asotá pa secura spiritual, cristiannan tin hopi mester dje riunan di awa di e berdad puru i no-adulterá pa nan por calma nan sed spiritual. Felismente, Jehova a primintí cu su Rey reinante—mediante su rumannan ungí i e ‘prinsnan’ dje otro carnénan cu ta apoyá nan—lo percurá animacion i guia pa esnan abatí i desanimá den e tempu difícil aki. Dje manera aki Jehova lo soru pa loke ta hustu i recto prevalecé.

Presta Atencion cu Wowo, Orea i Curason

10. Ki percuracionnan Jehova a haci pa asina su pueblo por “mira” i “tende” cosnan spiritual?

¹⁰ Con e multitud grandi a reaccioná riba Jehova su areglo teocrático? E profecia ta sigui: “Wowo di esnan cu ta mira lo no keda pegá na otro, i asta orea di esnan cu ta tende lo presta atencion.” (Isaías 32:3) Den transcurso di añanan, Jehova a soru instruí su sirbidónan precioso i yuda nan alcansá madures. E Scol di Ministerio Teocrático i otro reunionnan cu ta tuma lugá den e congregacionnan di Testigonan di Jehova mundialmente—e congresonan di distrito, nacional i internacional, i tambe e entrenamentu specialisá dje ‘prinsnan’ pa nan trata e tou cu amor—tur a contribuí na edificá un hermandad mundial i uní di miyones di persona. Na unda cu e wardadónan aki ta riba tera, nan orea ta hanchu habrí pa e ahustenan cu tin den e comprendimentu progresivo dje palabra di e berdad. Cu nan concenshi bíblicamente entrená, nan ta semper cla pa tende i obedecé.—Salmo 25:10.

11. Di con e pueblo di Dios ta papia awor cu confiansa, i no ta gaga pa motibu di ta insigur?

¹¹ Anto e profecia ta spierta: “E curason mes di esnan muchu purá lo considerá conocimentu, i asta lenga di esnan cu ta gagu lo ta lihé pa papia cos cla.” (Isaías 32:4) No laga niun hende ta muchu purá pa saca conclusionnan tocante loke ta bon i loke ta malu. Bijbel ta bisa: “Bo a contemplá un homber cu ta purá cu su palabranan? Tin mas speransa pa un estúpido cu p’e.” (Proverbionan 29:20; Eclesiástes 5:2) Promé cu 1919, asta e pueblo di Jehova tabata contaminá cu ideanan babilónico. Pero cuminsando n’e aña ei, Jehova a duna nan un comprendimentu mas cla di su propósitonan. Nan a ripará cu e berdadnan cu Jehova a revelá, no tabata purá-purá, sino bon pensá, i awor nan ta papia di nan creencianan cu conviccion, i no ta gaga pa motibu di ta insigur.

“E Hende Bobo”

12. Ken ta esnan “bobo” awe, i den ki sentido nan falta generosidad?

¹² Siguientemente Isaías su profecia ta presentá un contraste: “Lo no yama e hende bobo generoso mas; i en cuanto e homber sin principio, lo no bisa di dje cu e ta noble; pasobra e hende bobo mes lo papia puru cos sin sentido.” (Isaías 32:5, 6a) Ken ta “e hende bobo”? Como si fuera pa énfasis, rey David ta duna e contesta dos biaha: “Hende bobo a bisa den nan curason: ‘No tin Jehova.’ Nan a actua ruinosamente, nan a actua repugnantemente den nan tratamentu. No tin hende cu ta haci bon.” (Salmo 14:1; 53:1) Claro cu ta esnan cu ta afirmá di ta ateo ta bisa cu no tin Jehova. I de echo, tambe hende “intelectual” i otronan cu ta actua como si fuera no tin Dios, keriendo cu nan no tin cu duna cuenta na niun persona. E berdad no ta den hende asina. No tin generosidad den nan curason. Nan no tin e evangelio di amor. Na contraste cu cristian berdadero, nan ta slow pa yuda hende pober den pertá of ta keda sin haci esei mes.

13, 14. (a) Den ki manera apóstatanan di actualidad ta obra loke ta perhudicial? (b) Di kico e apóstatanan ta purba priva hende hambrá i hende cu tin sed, pero kico lo ta e resultado final?

¹³ Hopi dje hende bobonan ei ta bin odia esnan cu ta defendé e berdad di Dios. “Su propio curason lo ocupá su mes cu loke ta perhudicial, pa ocupá su mes cu apostasia i pa papia contra Jehova loke ta contrali.” (Isaías 32:6b) E palabranan ei sí ta cuadra bon cu e apóstatanan di actualidad! Den vários pais na Europa i Asia, apóstatanan a uni forsa cu otro oponentenan dje berdad, papiando mentira bisto cu autoridadnan pa asina logra prohibí of restringí Testigonan di Jehova. Nan ta desplegá e spiritu dje “esclabo malbado,” di ken Jesus a profetisá: “Si e esclabo malbado yega di bisa den su curason: ‘Mi doño ta tarda,’ i e cuminsá suta su co-esclabonan i come i bebe cu burachénan biciá, e doño dje esclabo ei lo bini riba un dia cu e no ta spera i na un ora cu e no sa, i lo castigu’é cu e mayor severidad i lo asigná su parti cu e hipócritanan. Ei ta unda lo e tin su yoramentu i su mordementu riba djente.”—Mateo 24:48-51.

¹⁴ Miéntras tantu, e apóstatanan ta pone “e alma di esun hambrá keda bashí, i e ta laga asta esun cu tin sed keda sin cos di bebe.” (Isaías 32:6c) Enemigunan dje berdad ta purba priva hende cu ta hambrá p’e berdad di ricibí alimento spiritual, i nan ta purba stroba hende cu tin sed di bebe dje awa refrescante dje mensahe di Reino. Pero e resultado final lo ta loke Jehova ta declará na su pueblo via un di su otro profetanan: “Nan lo bringa contra bo sigur, pero nan lo no prevalecé contra bo, pasobra ‘mi ta cu bo,’ ta e expresion di Jehova, ‘pa libra bo.’”—Jeremías 1:19; Isaías 54:17.

15. Ken awe en particular ta “sin principio,” ki “dichonan falsu” nan a promové i cu ki resultado?

¹⁵ For di meimei di siglo 20, inmoralidad a plama abiertamente i di un manera descontrolá den paisnan di cristiandad. Di con? E profecia a predicí un motibu: “Pa loke ta e homber sin principio, su instrumentonan ta malu; e mes a duna conseho pa actonan di conducta indecente, pa destrosá esnan afligí cu dichonan falsu, asta ora un hende pober papia loke ta recto.” (Isaías 32:7) Cumpliendo cu e palabranan aki, hopi miembro di clero en particular a adoptá un actitud permisivo relacioná cu sex promé cu matrimonio, biba compañá sin ta casá, homosexualidad, sí, “fornicacion i impuresa di tur sorto.” (Efesionan 5:3) Dje manera ei nan ta “destrosá” nan tou cu nan dichonan falsu.

16. Kico ta haci cristiannan berdadero felis?

¹⁶ Na contraste, ki refrescante ta cumplimentu dje siguiente palabranan dje profeta! “Pa loke ta e generoso, ta pa cosnan generoso el a duna conseho; i na fabor di cosnan generoso e mes lo lanta.” (Isaías 32:8) Jesus mes a encurashá generosidad ora el a bisa: “Practicá dunamentu, i hende lo duna na boso. Nan lo basha den boso scochi un midí excelente, primí, sagudí i bashando over. Pasobra cu e midí cu boso ta midiendo, nan lo midi boso en buelta.” (Lucas 6:38) Apostel Pablo tambe a señalá na e bendicionnan cu ta bini riba esnan generoso ora el a bisa: “Tene presente e palabra di Señor Jesus, ora e mes a bisa: ‘Tin mas felicidad den duna cu tin den ricibí.’” (Echonan 20:35) Loke ta haci cristiannan berdadero felis, no ta e rikesa material of prominencia social cu nan por gana, sino di ta generoso, mescos cu nan Dios, Jehova, ta generoso. (Mateo 5:44, 45) Nan ta haña nan mayor felicidad den haci e boluntad di Dios, den duna generosamente di nan mes pa splica hende “e glorioso bon nobo dje Dios felis.”—1 Timoteo 1:11.

17. Ken awe ta manera e “yu muhernan descuidá” na cua Isaías ta referí?

¹⁷ Isaías su profecia ta sigui: “Muhernan cu ta trankil, lanta, scucha mi bos! Yu muhernan descuidá, duna oido na mi dicho! Denter di un aña i algun dia boso, esnan descuidá, lo ta agitá, pasobra pikimentu di wijndruif lo a caba pero sin cu fruta a drenta. Tembla, muhernan cu ta trankil! Sea agitá, muhernan descuidá!” (Isaías 32:9-11a) E actitud dje muhernan aki por pone nos pensa riba esnan awe cu ta pretendé di ta sirbi Dios pero cu no ta celoso den su sirbishi. Nos ta haña personanan asina den e religionnan di “Babilonia e Grandi, mama dje muhernan di mala bida.” (Revelacion 17:5) Por ehempel, miembronan di religionnan di cristiandad ta cuadra bon cu e descripcion cu Isaías ta duna dje “muhernan” aki. Nan ta “trankil,” desinteresá den e huicio i agitacion cu pronto lo bini riba nan.

18. Ken ta ser ordená pa ‘faha paña di sacu rond di su cintura,’ i di con?

¹⁸ Anto ta sali un yamada na religion falsu: “Kita boso paña i keda sunú, i faha paña di sacu rond di boso cintura. Bati riba boso pechu den lamentacion riba e cunucunan deseabel, riba e mata di wijndruif cu ta carga fruta. Riba e suela di mi pueblo ta sumpiña, mata di spiña so ta sali, pasobra nan ta riba tur e casnan di gran alegria, sí, e pueblo sumamente contentu.” (Isaías 32:11b-13) No ta parce cu e expresion “kita boso paña i keda sunú” kier men keda blo sunú. E custumber antiguo tabata pa riba un paña interior bisti un paña exterior. Hopi bes e paña exterior a sirbi como un medio di identificacion. (2 Reynan 10:22, 23; Revelacion 7:13, 14) Pues e profecia ta manda miembronan di religion falsu kita nan paña exterior—nan supuesto identidad como sirbidó di Dios—i bisti na lugá di esei paña di sacu, símbolo di luto pa nan huicio inminente. (Revelacion 17:16) Ni entre e organisacionnan religioso di cristiandad cu ta pretendé di ta Dios su “pueblo sumamente contentu,” ni entre e resto dje miembronan dje imperio mundial di religion falsu, bo no ta haña fruta cu ta reflehá debocion na Dios. Nan centro di operacion ta producí “sumpiña, mata di spiña so” di negligencia i abandono.

19. Segun Isaías, den ki condicion “Jerusalem” apóstata ta?

¹⁹ E cuadro tristu aki ta extendé na tur parti di “Jerusalem” apóstata: “E toren di habitacion a ser bandoná, asta e bochincha dje stad a caba; Ofel i e toren di vigilancia mes a bira cunucunan bashí, pa tempu indefiní e gran alegria di zebra, e sabana pa tounan.” (Isaías 32:14) Sí, e ta incluí asta Ofel. Ofel ta un parti elevá di Jerusalem cu ta ser usá como un lugá fortificá. Pa bisa cu Ofel ta bira un cunucu bashí ta indicá desolacion completo dje stad. E palabranan di Isaías ta mustra cu “Jerusalem” apóstata—cristiandad—no ta preocupá cu haci e boluntad di Dios. E ta steril den sentido spiritual, alehá for dje berdad i husticia, hopi parecido na un bestia.

Un Contraste Glorioso!

20. E echo cu Dios a drama su spiritu riba su pueblo tabatin ki efecto?

²⁰ Siguientemente Isaías ta presentá un speransa alentador pa esnan cu ta haci e boluntad di Jehova. Cualkier desolacion dje propio pueblo di Dios lo dura solamente “te ora cu e spiritu ser dramá riba nos for di haltu, i e desierto lo tin cu bira un hofi, i ta considerá e hofi mes como un berdadero mondi.” (Isaías 32:15) Felismente, desde aña 1919, Jehova a drama su spiritu na abundancia riba su pueblo, restorando, na moda di papia, un hofi cu ta producí fruta di Testigonan ungí, siguí despues pa un mondi creciente di otro carné. Prosperidad i crecementu ta puntonan clave di su organisacion cu ta riba tera awe. Den e paradijs spiritual restorá, “e gloria di Jehova, e splendor di nos Dios,” ta ser reflehá dor di su pueblo segun cu nan ta proclamá mundialmente su Reino binidero.—Isaías 35:1, 2.

21. Unda nos ta haña husticia, trankilidad i siguridad awe?

²¹ Scucha awor Jehova su promesa glorioso: “Rectitud sigur lo biba den e desierto, i husticia mes lo biba den e hofi. I e trabou di berdadero husticia mester bira pas; i e sirbishi di berdadero husticia, trankilidad i siguridad te na tempu indefiní.” (Isaías 32:16, 17) Esta bon esaki ta describí e condicion spiritual di Jehova su pueblo awe! Na contraste cu mayoria di humanidad cu ta ser dividí dor di odio, violencia i pobresa spiritual extremo, cristiannan berdadero ta uní mundialmente, maske nan ta “for di tur nacion i tribu i pueblo i lenga.” Nan ta biba, traha i sirbi na armonia cu e husticia di Dios, haciendo esei cu e confiansa cu finalmente nan lo disfrutá di berdadero pas i siguridad pa tempu indefiní.—Revelacion 7:9, 17.

22. Kico ta e diferencia entre e condicion dje pueblo di Dios i esun di hende den religion falsu?

²² Den e paradijs spiritual, Isaías 32:18 ta cumpliendo caba. E ta bisa: “Mi pueblo tin cu biba den un lugá di habitacion pacífico i den residencianan di pleno confiansa i den lugánan di descanso sin disturbio.” Pero pa e cristiannan falsu, “sigur hagel lo cai ora e mondi bini abou i e stad ser rebahá na un condicion abatí.” (Isaías 32:19) Sí, mescos cu un tempestad di hagel, e huicio di Jehova ta cla pa asotá e stad imaginario di religion falsu, rebahando su “mondi” di apoyadó, destruyendo nan pa semper!

23. Ki trabou mundial ta cerca di ser completá, i con mester considerá esnan cu ta participá den dje?

²³ E pasashi aki dje profecia ta concluí: “Felis ta boso cu ta sembra simia cantu di tur awa, i ta manda e pia dje toro i dje buricu.” (Isaías 32:20) Toro i buricu tabata bestia di carga cu e antiguo pueblo di Dios a usa pa ploeg cunucu i sembra simia. Awe, e pueblo di Jehova ta usa ekipo di imprenta, hermentnan electrónico, edificio i transporte moderno i, mas cu tur cos, un organisacion teocrático uní pa imprimí i distribuí miles di miyones di publicacionnan bíblico. Trahadónan boluntario ta usa e instrumentonan aki pa sembra simia di e berdad di Reino rond mundu, literalmente “cantu di tur awa.” Ya caba a cosechá miyones di homber i muher temeroso di Dios, i tin multitudnan mas cu ta djoin nan. (Revelacion 14:15, 16) Realmente mester considerá nan tur “felis”!

[Nota]

[Plachi na página 331]

Den e Rolnan di Laman Morto, Isaías capítulo 32 ta marcá cu un “X”

[Plachi na página 333]

Cada “prins” ta manera un lugá di sconde for di bientu i awaceru, manera awa den desierto i sombra contra solo

[Plachi na página 338]

Un cristian ta haña gran felicidad den compartí e bon nobo cu otro hende