Capítulo Bintishete

Jehova Ta Laga e Nacionnan Sinti Su Indignacion

Isaías 34:1-17

 1, 2. (a) Di kico nos por ta sigur relacioná cu e vengansa di Jehova? (b) Kico Dios ta logra cu ehecutá vengansa?

JEHOVA DIOS tin pacenshi no solamente cu su sirbidónan fiel, sino tambe—ora cu su propósito ta hustificá esei—cu su enemigunan. (1 Pedro 3:19, 20; 2 Pedro 3:15) Por ta su adversarionan no ta apreciá su pacenshi i kisas ta mira esei como un indicacion cu Jehova no por of no kier actua. No obstante, manera Isaías capítulo 34 ta mustra, na final Jehova semper ta exigí cuenta di su enemigunan. (Sofonías 3:8) Pa un tempu, Dios a permití Edom i otro nacionnan oponé su pueblo sin cu el a stroba nan. Pero Jehova tabatin su debido tempu pa duna nan e castigu merecí. (Deuteronomio 32:35) Di igual manera, na su tempu señalá, Jehova lo expresá su vengansa riba tur elemento dje mundu malbado actual cu ta desafiá su soberania.

² E propósito principal pakico Dios ta ehecutá vengansa ta pa demostrá su soberania i glorificá su nomber. (Salmo 83:13-18) Tambe esei ta sirbi pa vindicá su sirbidónan como su berdadero representante i pa libra nan di circunstancianan indeseá. Ademas, Jehova su vengansa semper ta na pleno armonia cu su husticia.—Salmo 58:10, 11.

Nacionnan, Presta Atencion

 3. Ki invitacion Jehova ta extendé na e nacionnan via Isaías?

³ Pero promé cu Jehova enfocá atencion riba e castigu merecí cu Edom lo ricibí, e ta extendé via Isaías un invitacion solem pa tur nacion: “Nacionnan, hala cerca pa tende; i gruponan nacional, presta atencion. Laga e tera i loke ta yen’é scucha, e tereno productivo i tur su producto.” (Isaías 34:1) E profeta a papia repetidamente contra nacionnan malbado. Awor e ta a punto di resumí e denunciacionnan divino cu tin contra nan. E spiertamentunan aki tin un nificacion pa nos tempu?

 4. (a) Segun Isaías 34:1, ki yamada ta ser hací riba tur nacion? (b) E echo cu Jehova ta bai castigá e nacionnan ta demostrá cu e ta un Dios cruel? (Mira e cuadro na página 363.)

⁴ Sí. E Soberano di universo tin un controversia cu tur ramo dje sistema di cosnan malbado aki. Ta p’esei ta haci un yamada riba “gruponan nacional” i “tera” pa tende e mensahe basá riba Bijbel cu Jehova a laga proclamá mundialmente. Usando palabranan cu ta corda nos di Salmo 24:1, Isaías ta bisa cu henter e tera lo ser cubrí cu e mensahe aki, un profecia cu a bira realidad den nos tempu cu e predicacion dje Testigonan di Jehova “te na e parti mas lehano dje tera.” (Echonan 1:8) Sin embargo, e nacionnan no a scucha. Nan no a tuma na serio e spiertamentu tocante nan binidero destruccion. Claro cu esaki lo no stroba Jehova di cumpli cu su palabra.

 5, 6. (a) E nacionnan tin cu rindi cuenta na Dios pa kico? (b) Den ki sentido “e cerunan tin cu dirti pa causa di nan sanger”?

⁵ Awor e profecia ta describí e futuro scur cu ta warda nacionnan malbado, e ta na contraste skerpi cu e speransa briyante cu ta ser describí despues pa e pueblo di Dios. (Isaías 35:1-10) E profeta ta declará: “Jehova tin indignacion contra tur nacion, i furia contra tur nan ehército. E tin cu dedicá nan na destruccion; e tin cu entregá nan na matansa. I nan mortonan lo ser tirá afó; i en cuanto nan cadavernan, nan holó stinki lo subi; i e cerunan tin cu dirti pa causa di nan sanger.”—Isaías 34:2, 3.

⁶ E palabranan aki ta dirigí atencion na e nacionnan su culpa den dramamentu di sanger. Awe e nacionnan di cristiandad ta esnan mas culpabel pa dramamentu di sanger. Durante dos guera mundial i hopi conflicto menor, nan a haci tera papa muhá cu sanger humano. Ken tin derecho di pidi e castigu merecí pa tur e culpa di dramamentu di sanger ei? Niun otro cu e Creador, e gran Dunador di Bida. (Salmo 36:9) E ley di Jehova a fiha e norma: “Bo tin cu duna alma pa alma.” (Éxodo 21:23-25; Génesis 9:4-6) Di acuerdo cu e ley ei, lo e laga e sanger dje nacionnan ei core te ora nan muri. Aire lo yena cu e holó stinki di nan cadavernan cu no a ser derá, realmente un morto bergonsoso! (Jeremías 25:33) E sanger exigí bek como compensacion lo ta suficiente pa, na moda di papia, dirti e cerunan. (Sofonías 1:17) Cu e destruccion completo di nan forsanan militar, e nacionnan di mundu lo mira e caida di nan gobiernunan, cu den profecia bíblico ta ser representá tin biaha como ceru.—Daniel 2:35, 44, 45; Revelacion 17:9.

 7. Kico ta e “shelu,” i kico ta e “ehército di shelu”?

⁷ Usando atrobe un cuadro mental bibu, Isaías ta sigui bisa: “Tur esnan dje ehército di shelu tin cu putri. I shelu mester ta lorá, mescos cu un rol di buki; i nan ehército lo seca i caba, mescos cu blachi ta seca i cai for di mata di wijndruif i mescos cu un figu secu ta cai for di mata di figu.” (Isaías 34:4) E expresion “tur esnan dje ehército di shelu” no ta nificá e strea i planetanan literal. Versículo 5 cu 6 ta papia di un spada di ehecucion cu ta bira papa muhá cu sanger den e “shelu” ei. Pues, esaki mester ta un símbolo di algu dje ambiente humano. (1 Corintionan 15:50) E gobiernunan di humanidad, debí na nan posicion elevá como autoridadnan superior, ta ser compará cu shelu cu ta goberná riba sociedad humano terenal. (Romanonan 13:1-4) Pues e “ehército di shelu” ta representá e ehércitonan combiná dje gobiernunan aki di humanidad.

 8. Con e shelu simbólico lo resultá di ta “mescos cu un rol di buki,” i kico lo pasa cu nan ‘ehércitonan’?

⁸ E “ehército” aki lo “putri,” desintegrá manera materia cu ta caba na nada. (Salmo 102:26; Isaías 51:6) Cu nos simpel bista, e shelu literal ta parce un rol di buki antiguo. Por lo general tabata skirbi parti paden dje rol, anto despues cu caba di les’é, a lor’é i ward’é. Di igual manera, “shelu mester ta lorá, mescos cu un rol di buki,” den e sentido cu gobiernunan humano tin cu yega na nan fin. Ora yega na e último página di nan historia, nan lo ser eliminá na Armagedon. Nan ‘ehércitonan’ cu ta mustra impresionante lo cai mescos cu blachi secu ta cai for di mata di wijndruif of “un figu secu” ta cai for di un mata di figu. Nan tempu a pasa.—Compará cu Revelacion 6:12-14.

Un Dia di Castigu Merecí

 9. (a) Cua ta e orígen di Edom, i ki relacion a desaroyá entre Israel i Edom? (b) Kico Jehova ta decretá relacioná cu Edom?

⁹ Awor e profecia ta ser dirigí specíficamente na un nacion cu ta existí den tempu di Isaías: Edom. E edomitanan ta desendiente di Esau (Edom), kende a bende su derecho di primogénito cu su ruman ohochi, Jacob, pa pan cu bonchi stobá. (Génesis 25:24-34) Dor cu Jacob a remplasá Esau den e derecho di primogénito, Esau a haña un odio contra su ruman. Despues e nacion di Edom i e nacion di Israel a bira enemigu, maske nan a bini for di dos ruman ohochi. Jehova su furia a bini contra Edom pa su hostilidad contra e pueblo di Dios, i p’esei Jehova ta bisa awor: “Den shelu sigur mi spada lo ta papa muhá. Mira! Lo e baha riba Edom, i riba e pueblo cu mi a dedicá na destruccion den husticia. Jehova tin un spada; e tin cu yena cu sanger; mester hacié vet cu sebu, cu sanger di chubat’i carné yong i chubat’i cabritu, cu sebu di nir di chubat’i carné. Pasobra Jehova tin un sacrificio den Bosrá, i un matansa grandi den e tera di Edom.”—Isaías 34:5, 6.

10. (a) Ken Jehova ta rebahá ora e zwai su spada “den shelu”? (b) Ki actitud Edom ta desplegá ora Babilonia atacá Huda?

¹⁰ Edom ta situá den un region di ceru haltu. (Jeremías 49:16; Abdías 8, 9, 19, 21) Pero ni sikiera e fortificacionnan natural aki lo yuda proteh’é ora Jehova zwai su spada di huicio “den shelu,” rebahando e gobernantenan di Edom for di nan puesto elevá. Edom ta fuertemente militarisá, i su forsanan armá ta crusa cerunan haltu pa protehá e pais. Pero e poderoso Edom no ta duna Huda yudansa ora esaki ta ser atacá dor dje ehércitonan di Babilonia. Mas bien, Edom ta sumamente contentu pa mira e caida dje reino di Huda i ta instigá su conkistadónan. (Salmo 137:7) Edom ta asta persiguí e hudiunan cu tabata core pa nan bida i ta entregá nan n’e babilonionan. (Abdías 11-14) E edomitanan tin planeá pa poderá dje pais bandoná di Israel, i nan ta papia di un forma bromadó contra Jehova.—Ezekiel 35:10-15.

11. Con Jehova lo paga e edomitanan pa nan conducta traicionero?

¹¹ Jehova ta bai pasa por haltu dje manera niun tiki fraternal cu e edomitanan ta trata su pueblo? No. Mas bien, e ta profetisá tocante Edom: “E toronan salbahe tin cu baha huntu cu nan, i toronan yong huntu cu e poderosonan; i tin cu muha nan tera papa muhá cu sanger, i lo haci asta nan stòf vet cu sebu.” (Isaías 34:7) Jehova ta papia dje personanan destacá i esnan ménos destacá dje nacion usando e simbolismo di toro salbahe cu toro yong, i tambe di chubat’i carné yong i chubat’i cabritu. E tera dje nacion aki culpabel di dramamentu di sanger lo ta papa muhá cu sanger di su propio hendenan debí na Jehova su “spada” di ehecucion.

12. (a) Ken Jehova ta usa pa trece castigu riba Edom? (b) Kico profeta Abdías ta predicí relacioná cu Edom?

¹² Dios tin e propósito di castigá Edom pa loke el a haci maliciosamente contra Su organisacion terenal, yamá Síon. E profecia ta bisa: “Jehova tin un dia di vengansa, un aña di paga bek e caso hudicial en cuanto Síon.” (Isaías 34:8) No hopi tempu despues dje destruccion di Jerusalem na aña 607 P.E.C., Jehova ta cuminsá expresá su vengansa hustu riba e edomitanan mediante Nabucodonosor, rey di Babilonia. (Jeremías 25:15-17, 21) Ora e ehércitonan di Babilonia subi contra Edom, nada no por salba e edomitanan! Ta “un aña di paga bek,” esta di castigu merecí pa e pais ei yen di ceru. Jehova ta predicí mediante profeta Abdías: “Debí n’e violencia contra bo ruman Jacob, bergwensa lo cubri bo, i bo tin cu ser cortá te na tempu indefiní. . . . Manera bo a haci, lo haci cu bo. E sorto di trato cu bo a duna lo bolbe riba bo propio cabes.”—Abdías 10, 15; Ezekiel 25:12-14.

E Futuro Scur di Cristiandad

13. Ken awe ta manera Edom, i di con?

¹³ Den nos tempu tin un organisacion cu un registro mescos cu di Edom. Cua organisacion? Wel, ken den tempu moderno a hiba delantera den insultá i persiguí e sirbidónan di Jehova? No tabata cristiandad, mediante su clase di clero? Sí! Cristiandad a elevá su mes na haltura di ceru pa loke ta asuntunan dje mundu aki. E ta exigí un posicion haltu den e sistema di cosnan di humanidad, i su religionnan ta forma e parti dominante di Babilonia e Grandi. Pero Jehova a decretá “un aña di paga bek” contra e Edom di tempu moderno aki pa su atrocidadnan cu el a cometé contra Su pueblo, Su Testigonan.

14, 15. (a) Kico lo sosodé cu tantu e tera di Edom como cu cristiandad? (b) Kico e referencia na breu cu ta kima i huma cu ta subi pa tempu indefiní ta nificá, i kico nan no ta nificá?

¹⁴ P’esei, segun cu nos ta considerá e resto dje pasashi aki dje profecia di Isaías, nos ta pensa no solamente riba antiguo Edom sino tambe riba cristiandad: “Tin cu cambia su riunan den breu, i su stòf den swafel; i su tera mester bira manera breu cu ta kima. Ni anochi ni di dia e no ta paga; te na tempu indefiní su huma lo sigui subi.” (Isaías 34:9, 10a) E tera di Edom ta bira asina secu cu ta como si fuera e stòf tabata swafel i e riunan tabata yen di breu en bes di cu awa. Anto ta pega e substancianan sumamente flamabel aki na candela!—Compará cu Revelacion 17:16.

¹⁵ Tin hende cu a considerá e mencion aki di candela, breu i swafel como prueba cu ta existí un fiernu di candela. Pero Edom no ta ser bentá den un of otro fiernu mitológico cu ta kima pa semper. Mas bien, e ta ser destruí, i ta disparcé for di esena mundial como si fuera candela i swafel a caba cuné totalmente. Manera e profecia ta sigui mustra, e resultado final no ta tormento eterno, sino “bashí . . . desierto . . . nada.” (Isaías 34:11, 12) E huma cu ‘ta subi te na tempu indefiní’ ta ilustrá esaki den un manera bibu. Ora un cas kima completamente, huma ta sigui sali for dje shinishi pa algun tempu despues cu e vlamnan a paga, dunando mirones prueba cu ei tabatin un candela grandi. Ya cu cristiannan djawe ta saca les for dje destruccion di Edom, den un sentido e huma di Edom su destruccion ainda ta subiendo.

16, 17. Kico lo para di Edom, i pa cuantu tempu lo e keda den e condicion ei?

¹⁶ E profecia di Isaías ta sigui, i ta predicí cu e poblacion humano di Edom lo ser remplasá dor di bestia salbahe, implicando un binidero desolacion: “Di generacion pa generacion lo e keda kimá i secu; pa semper hamas ningun hende lo crusa dor di dje. I e pelican i e porco di spiña tin cu tuma posesion di dje, i palabrua orea largu i raf mes lo biba den dje; i e tin cu span riba dje e liña di midi di bashí i piedra di desierto. Su noblenan—lo no tin ningun ei cu nan lo yama pa bira rey, i asta tur su prinsnan lo bira nada. Sumpiña tin cu nace riba su toren di habitacion, bringamosa i mal yerba di sumpiña den su lugánan fortificá; i e tin cu bira lugá di biba di chacal, e patio pa abestrus. I esnan cu ta frecuentá regionnan sin awa tin cu contra cu animal cu ta yora, i asta e demoño den forma di cabritu lo yama su compañero. Sí, ei e souchi djanochi sigur lo sosegá i haña un lugá di descanso pa su mes. Ei e colebra di flecha a traha su neshi i ta pone webu.”—Isaías 34:10b-15.a

¹⁷ Sí, Edom lo bira un tera bashí. Lo e bira un pais desolá cu solamente bestia salbahe, para i colebra den dje. Manera versículo 10 ta bisa, e condicion kimá i secu aki lo sigui “pa semper hamas.” Lo e no ser restorá.—Abdías 18.

Jehova Su Palabra Lo Cumpli Sigur

18, 19. Kico ta “e buki di Jehova,” i kico tin reservá pa cristiandad den e “buki” aki?

¹⁸ Esta un futuro scur esaki ta pinta pa e ekivalente moderno di Edom, esta cristiandad! El a duna prueba di ta un enemigu amargo di Jehova Dios, i a persiguí su Testigonan ferosmente. I no tin duda cu Jehova lo cumpli cu su palabra. Ki ora cu un hende compará e profecia cu su cumplimentu, lo e ripará cu nan ta cuadra cu otro, mes sigur cu e criaturanan cu ta habitá Edom desolá tin ‘cada un su mes compañero.’ Isaías ta dirigí su mes na futuro studiantenan di profecia bíblico, bisando: “Busca pa boso mes den e buki di Jehova i lesa na bos haltu: ni un di nan ta falta; nan realmente no ta falta di tin cada un su compañero, pasobra ta e boca di Jehova a duna e mandamentu, i ta su spiritu a reuní nan huntu. I ta E ta esun cu a tira suerte pa nan, i su propio man a parti e lugá pa nan pa medio di un liña di midi. Te na tempu indefiní nan lo tuma posesion di dje; di generacion tras generacion nan lo biba den dje.”—Isaías 34:16, 17.

¹⁹ Den “e buki di Jehova” a predicí e destruccion inminente di cristiandad. E “buki di Jehova” aki ta detayá con Jehova lo regla cuenta cu esnan cu ta su enemigu implacabel i cu sin arepentí ta oprimí su pueblo. Loke a ser skirbí tocante antiguo Edom a cumpli, i esaki ta reforsá nos confiansa cu e profecia lo cumpli tambe riba e paralelo moderno di Edom, esta cristiandad. “E liña di midi,” Jehova su criterio pa actua, ta garantisá cu e organisacion aki spiritualmente muribundo lo bira un desierto desolá.

20. Kico cristiandad lo experenciá mescos cu antiguo Edom?

²⁰ Cristiandad ta haci tur loke e por pa calma su amigunan político, pero en bano! Segun Revelacion capítulo 17 i 18, Dios Todopoderoso, Jehova, lo pone den nan curason pa atacá henter Babilonia e Grandi, incluso cristiandad. Asina henter e tera lo libra di cristianismo falsu. E condicion di cristiandad lo bira manera e condicion scur describí na Isaías capítulo 34. Lo e ni sikiera t’ei durante e decisivo “guera dje gran dia di Dios e Todopoderoso”! (Revelacion 16:14) Mescos cu antiguo Edom, cristiandad lo disparcé completamente for di superficie di tera “pa semper hamas.”

[Nota]

[Kuadro na página 363]

Un Dios Yen di Rabia?

Expresionnan manera esnan hañá na Isaías 34:2-7 a pone hopi hende pensa cu Jehova, manera e Scritura Hebreo ta describié, ta un Dios cruel i vengativo. Esei ta berdad?

No. Aunke ta cierto cu tin bes Dios ta expresá su rabia, e rabia ei semper ta hustificá. E ta semper basá riba principio, no riba emocion descontrolá. Ademas, semper e ta laga su derecho di ricibí debocion exclusivo como Creador i su apego constante n’e berdad, dicta su rabia. Rabia divino ta ser controlá tantu dor di Dios su amor pa husticia como pa su amor pa esnan cu ta practicá husticia. Jehova ta mira tur factor enbolbí den un asuntu i tin un conocimentu completo i sin límite dje situacion. (Hebreonan 4:13) E ta lesa curason; e ta tuma nota dje grado di ignorancia, negligencia of picá deliberá; i e ta actua cu imparcialidad.—Deuteronomio 10:17, 18; 1 Samuel 16:7; Echonan 10:34, 35.

Sin embargo, Jehova Dios ta “tarda pa rabia i ta abundante den bondad amoroso.” (Éxodo 34:6) Esnan cu ta tem’é i ta haci esfuerso pa obra husticia ta ricibí misericordia, pasobra e Todopoderoso ta tene cuenta cu hende su imperfeccion heredá i p’esei ta demostrá misericordia na dje. Awe Dios ta haci esei a base dje sacrificio di Jesus. (Salmo 103:13, 14) Na e momento oportuno, Jehova ta kita su rabia for di riba esnan cu ta reconocé nan picá, ta repentí i ta sirbié fielmente. (Isaías 12:1) Básicamente, Jehova no ta un Dios yen di rabia sino un Dios felis, no inacercabel sino acercabel, pacífico i trankil pa cu esnan cu ta acerk’é dje forma adecuá. (1 Timoteo 1:11) Esaki ta un contraste skerpi cu e crueldad i falta di misericordia atribuí na diosnan falsu dje paganonan i cu a ser reflehá den e imágennan dje diosnan ei.

[Mapa na página 362]

(Pa e teksto den su formato kompleto, wak e publikashon)

Laman Grandi

Damasco

Sidon

Tiro

ISRAEL

Dan

Laman di Galilea

Riu Jordan

Megido

Ramot-galad

Samaria

FILISTEA

HUDA

Jerusalem

Libna

Lákis

Beer-seba

Kades-barnea

Laman Salu

AMON

Raba

MOAB

Kir-hareset

EDOM

Bosrá

Teman

[Plachi na página 359]

Cristiandad a haci tera papa muhá cu sanger

[Plachi na página 360]

“Shelu mester ta lorá, mescos cu un rol di buki”