Capítulo Bintinuebe

Fe di un Rey Ta Ser Recompensá

Isaías 36:1–39:8

 1, 2. Con Ezekías a demostrá di ta un mihó rey cu Acas?

EZEKÍAS tabatin 25 aña ora el a bira rey di Huda. Ki clase di gobernante lo e ta? Lo e sigui den e pasonan di su tata, rey Acas, i persuadí su súbditonan pa bai tras di dios falsu? Of lo e dirigí e pueblo na e adoracion di Jehova, manera su antepasado rey David a haci?—2 Reynan 16:2.

² Djis despues cu Ezekías a subi trono, a bira bisto cu e tabatin intencion di “haci loke tabata recto den bista di Jehova.” (2 Reynan 18:2, 3) Den su promé aña, el a manda drecha e tempel di Jehova i reanudá servicionan di tempel. (2 Crónicanan 29:3, 7, 11) Despues el a organisá un gran celebracion di Pascu hudiu na cua henter e nacion tabata invitá, incluso Israel su dies tribunan di nort. Ki un fiesta inolvidabel esei tabata! For di tempu di rey Sálomon no a tene un celebracion asina.—2 Crónicanan 30:1, 25, 26.

 3. (a) Ki accion e habitantenan di Israel i Huda, cu a asistí n’e Pascu hudiu organisá dor di Ezekías, a tuma? (b) Kico cristiannan djawe ta siña for dje accion decisivo cu esnan cu a asistí n’e Pascu hudiu a tuma?

³ Na conclusion dje celebracion di Pascu hudiu, esnan cu a asistí a ser impulsá pa kap e palunan sagrado, kibra e pilarnan sagrado i basha e lugánan haltu i e altarnan di nan diosnan falsu abou, i despues di haci esei nan a regresá nan stad, decididu pa sirbi e Dios berdadero. (2 Crónicanan 31:1) Ki un contraste esei tabata cu nan actitud religioso anterior! Cristiannan berdadero djawe por siña for di esaki e importancia di ‘no bandoná nan reunimentu huntu.’ Sea ta na congregacionnan local of na asamblea i congresonan mas grandi, e reunionnan ei ta desempeñá un papel vital, pasobra ta einan nos ta ricibí animacion i ta ser stimulá tantu dor dje hermandad como dor di Dios su spiritu santu pa “incitá otro na amor i na obranan excelente.”—Hebreonan 10:23-25.

Fe Poné na Prueba

 4, 5. (a) Con Ezekías a demostrá su independencia di Asiria? (b) Ki accion militar Senákerib a tuma contra Huda, i ki pasonan Ezekías ta dal pa evitá un atake inmediato di Jerusalem? (c) Con Ezekías ta prepará pa defendé Jerusalem contra e asirionan?

⁴ Pruebanan duru tabata spera Jerusalem. Ezekías a kibra un aliansa cu su tata infiel, Acas, a cera cu e asirionan. Ezekías a asta dominá e filisteonan, kendenan ta aliado di Asiria. (2 Reynan 18:7, 8) Esaki a pone rey di Asiria rabia. P’esei nos ta lesa: “A sosodé awor den e di diescuater aña di rey Ezekías, cu Senákerib, rey di Asiria, a subi contra tur e stadnan fortificá di Huda i a poderá di nan.” (Isaías 36:1) Kisas cu e speransa di protehá Jerusalem di un atake inmediato dje ehército asirio implacabel, Ezekías ta bai di acuerdo pa paga Senákerib un enorme tributo di 300 talento di plata i 30 talento di oro.a—2 Reynan 18:14.

⁵ Como cu no tin suficiente oro cu plata den e tesoreria real pa paga e tributo, Ezekías ta saca tur metal precioso cu ta posibel for dje tempel. Tambe e ta corta e dos bladnan di porta di tempel, cu tabata furá cu oro, i ta manda nan pa Senákerib. Esaki ta satisfacé e asirio, pero djis pa un ratu. (2 Reynan 18:15, 16) Evidentemente, Ezekías ta realisá cu e asirionan lo no laga Jerusalem na pas pa hopi tempu. P’esei, mester cuminsá prepará. E pueblo ta verstop fuentenan di awa cu lo por suministrá awa n’e invasornan asirio. Tambe Ezekías ta reforsá e fortificacionnan di Jerusalem i ta construí un arsenal di arma, incluso “proyectilnan na abundancia i escudo.”—2 Crónicanan 32:4, 5.

 6. Den ken Ezekías ta pone su confiansa?

⁶ Sin embargo, Ezekías no ta pone su confiansa den estrategianan sabí di guera ni den fortificacion, sino den Jehova di ehércitonan. E ta instruí su hefenan militar: “Tene curashi i sea fuerte. No tene miedu ni sea spantá pa causa dje rey di Asiria i pa causa di tur e multitud cu tin huntu cuné; pasobra tin mas cu ta cu nos cu tin cu nan. Cuné tin un brasa di carni, pero cu nos tin Jehova nos Dios pa yuda nos i bringa nos bataya.” Como reaccion riba esei, e pueblo a cuminsá “fortalecé nan mes cu e palabra di Ezekías, rey di Huda.” (2 Crónicanan 32:7, 8) Segun cu nos ta analisá capítulo 36 pa 39 dje profecia di Isaías, visualisá e sucesonan emocionante cu ta sigui.

E Argumentonan di Rabsaké

 7. Ken Rabsaké ta, i di con a mand’é Jerusalem?

⁷ Senákerib ta manda Rabsaké (un título militar, no un nomber personal) huntu cu dos otro dignatario Jerusalem pa exigí e stad pa entregá. (2 Reynan 18:17) Tres representante di Ezekías ta bai topa nan pafó di muraya dje stad: Eliakim e superintendente di Ezekías su cas, Sebna e secretario, i Joah yu homber di Asaf e registradó.—Isaías 36:2, 3.

 8. Con Rabsaké ta purba kibra Jerusalem su resistencia?

⁸ Rabsaké su meta ta simpel: convencé Jerusalem pa entregá sin resistí. Papiando hebreo, e ta grita na promé instante: “Kico ta e confiansa aki den cua bo a confia? . . . Ta den ken bo a pone confiansa, cu bo a rebelá contra mi?” (Isaías 36:4, 5) Anto Rabsaké ta haci bofon dje hudiunan morto spantá, cordando nan cu nan ta completamente isolá. Cerca ken nan por acudí pa yudansa? Na Egipto, e “caña aplastá” ei? (Isaías 36:6) N’e momentonan aki, Egipto di berdad parce un caña aplastá; de echo, Etiopia a conkistá e ex-potencia mundial ei temporalmente, i Egipto su fárao actual, rey Tirhaka, no ta un egipcio sino un etiopio. I e ta a punto di ser derotá dor di Asiria. (2 Reynan 19:8, 9) Ya cu Egipto no por salba ni su mes, lo e ta di poco yudansa pa Huda.

 9. Kico evidentemente ta pone Rabsaké concluí cu Jehova a bandoná Su pueblo, pero kico ta e realidad?

⁹ Awor Rabsaké ta argumentá cu Jehova lo no bringa pa Su pueblo debí cu E ta malcontentu cu nan. Rabsaké ta bisa: “Den caso cu bo mester bisa mi: ‘Ta den Jehova nos Dios nos a confia,’ no ta su lugánan haltu i su altarnan Ezekías a kita?” (Isaías 36:7) Claro cu dor di basha e lugánan haltu i e altarnan abou, e hudiunan no a rechasá Jehova, sino en realidad a bolbe na Jehova.

10. Di con no ta importá si e defensornan di Huda ta hopi of tiki?

¹⁰ Siguientemente, Rabsaké ta recordá e hudiunan cu militarmente e asirionan ta superá nan den tur aspecto. Cu arogancia, e ta reta nan: “Laga mi duna bo dos mil cabai pa wak si lo bo por, di bo parti, pone coredó riba nan.” (Isaías 36:8) Pero en realidad, ta importá si Huda su cabayeria entrená ta hopi of tiki? No, pasobra Huda su salbacion no ta dependé di poder militar superior. Proverbionan 21:31 ta splica e asuntu asin’akí: “Cabai ta algu prepará pa dia di bataya, pero salbacion ta pertenecé na Jehova.” Anto Rabsaké ta pretendé cu Jehova su bendicion ta riba e asirionan, no riba e hudiunan. Si no ta asina—segun e ta argumentá—nunca e asirionan lo por a penetrá te asina leu den e teritorio di Huda.—Isaías 36:9, 10.

11, 12. (a) Di con Rabsaké ta insistí pa papia den “idioma dje hudiunan,” i con e ta purba pone un tentacion dilanti e hudiunan cu ta scuchando? (b) Ki efecto e palabranan di Rabsaké por tin riba e hudiunan?

¹¹ E representantenan di Ezekías ta preocupá pa e efecto cu Rabsaké su argumentonan lo tin riba e hendenan cu ta riba muraya dje stad i cu por tend’é. E funcionarionan hudiu aki ta pidi: “Papia, por fabor, cu bo sirbidónan den e idioma sirio, pasobra nos ta scuchando; i no papia cu nos den e idioma dje hudiunan den oido dje pueblo cu ta riba e muraya.” (Isaías 36:11) Pero Rabsaké no tin intencion di papia den idioma sirio. E kier sembra duda i miedu den e hudiunan ya asina nan lo entregá i Jerusalem por ser conkistá sin bringa! (Isaías 36:12) P’esei e asirio ta bolbe papia den “idioma dje hudiunan.” E ta spierta e habitantenan di Jerusalem: “No laga Ezekías gaña boso, pasobra e no por libra boso.” Despues di esaki, e ta purba pone un tentacion dilanti esnan cu ta scuchando dor di describí ki clase di bida e hudiunan lo por tin bou di mando di Asiria: “Boso capitulá na mi i sali bini cerca mi i cada un come for di su mes mata di wijndruif i cada un for di su mes palu di figu i cada un bebe e awa di su mes renbak, te ora cu mi bini i realmente hiba boso na un tera manera boso mes tera, un tera di grano i biña nobo, un tera di pan i cunucunan di wijndruif.”—Isaías 36:13-17.

¹² E aña aki e hudiunan lo no tin cosecha ya cu e invasion asirio a stroba nan di planta. E prospecto di come wijndruif suculento i bebe awa frescu mester ta hopi atractivo pa e hendenan riba muraya cu ta scuchando. Pero ainda Rabsaké no a caba cu su intento di debilitá e hudiunan.

13, 14. Di con loke a pasa cu Samaria ta irelevante pa e situacion di Huda, apesar dje argumentonan di Rabsaké?

¹³ For di su arsenal di argumento, Rabsaké ta saca un otro arma verbal. E ta spierta e hudiunan pa no kere Ezekías si e mester bisa: “Jehova mes lo libra nos.” Rabsaké ta corda e hudiunan cu e diosnan di Samaria no por a stroba Asiria di conkistá e dies tribunan. I kico dje diosnan dje otro nacionnan cu Asiria a conkistá? E ta puntra: “Unda e diosnan di Hamat i Arpad ta? Unda e diosnan di Sefarvaim ta? I nan a libra Samaria for di mi man?”—Isaías 36:18-20.

¹⁴ Naturalmente Rabsaké, un adoradó di dios falsu, no ta comprendé cu tin un diferencia grandi entre Samaria apóstata i Jerusalem bou di mando di Ezekías. E diosnan falsu di Samaria no tabatin poder pa salba e reino di dies tribu. (2 Reynan 17:7, 17, 18) Di otro banda, Jerusalem bou di mando di Ezekías a bira lomba pa diosnan falsu i a bolbe cuminsá sirbi Jehova. Sin embargo, e tres representantenan hudiu no ta purba splica Rabsaké esaki. “Nan a keda ketu i no a contest’é niun palabra, pasobra tabata rey su mandamentu, cu a bisa: ‘Boso no mag contest’é.’” (Isaías 36:21) Eliakim, Sebna i Joah ta bai bek cerca Ezekías i ta dun’é un informe oficial dje palabranan di Rabsaké.—Isaías 36:22.

Ezekías Ta Tuma un Decision

15. (a) Ki decision Ezekías ta confrontá awor? (b) Con Jehova ta trankilisá su pueblo?

¹⁵ Awor rey Ezekías tin cu tuma un decision. Jerusalem lo entregá na e asirionan? uni forsa cu Egipto? of para firme i lucha? Ezekías ta bou di preshon grandi. E ta bai n’e tempel di Jehova, miéntras e ta manda Eliakim i Sebna, huntu cu ancianonan dje sacerdotenan, pa bai puntra Jehova via profeta Isaías. (Isaías 37:1, 2) Bistí na paña di sacu, esnan cu rey a manda ta acercá Isaías, bisando: “E dia aki ta un dia di angustia i di reprendementu i di insolencia cu desprecio . . . Kisas Jehova bo Dios lo tende e palabranan di Rabsaké, cu rey di Asiria su señor a manda pa desafiá e Dios bibu cu desprecio, i realmente lo e pidié cuenta dje palabranan cu Jehova bo Dios a tende.” (Isaías 37:3-5) Sí, e asirionan ta desafiá e Dios bibu! Jehova lo presta atencion na nan desafio insultante? Via Isaías, Jehova ta trankilisá e hudiunan: “No tene miedu pa causa dje palabranan cu bo a tende cu cua e sirbidónan di rey di Asiria a papia ofensivamente di mi. Ata mi ta pone un spiritu den dje, i e tin cu tende un informe i bolbe na su mes tera; i sigur lo mi lagu’é cai pa spada den su propio tera.”—Isaías 37:6, 7.

16. Ki cartanan Senákerib ta manda?

¹⁶ Miéntras tantu, Senákerib ta manda yama Rabsaké pa bini na su lado segun cu e rey ta bringa contra Libna. Mas despues Senákerib lo atendé cu Jerusalem. (Isaías 37:8) Pero tog e retirada di Rabsaké no ta mengua e preshon cu tin riba Ezekías. Senákerib ta manda carta menasante cu ta describí kico e habitantenan di Jerusalem por spera si nan nenga di entregá: “Bo mes a tende loke e reynan di Asiria a haci cu tur e paisnan dor di destruí nan, i abo mes lo ser librá? E diosnan dje nacionnan cu mi antepasadonan a ruiná, a libra nan? . . . Unda rey di Hamat i rey di Arpad i rey dje stad di Sefarvaim—di Hena i di Iva—ta?” (Isaías 37:9-13) Básicamente, e asirio ta bisando cu no tin sentido pa resistí, mas problema so esei lo trece!

17, 18. (a) Kico ta motivá Ezekías pa pidi Jehova su proteccion? (b) Con Jehova ta contestá e asirio via Isaías?

¹⁷ Profundamente preocupá pa e consecuencianan dje decision cu e tin cu tuma, Ezekías ta habri e cartanan di Senákerib dilanti Jehova den e tempel. (Isaías 37:14) Den un oracion sincero e ta roga Jehova pa tuma nota dje menasanan asirio, i ta concluí su oracion cu e palabranan: “I awor, o Jehova nos Dios, salba nos for di su man, pa tur e reinonan di tera por sa cu abo, o Jehova, bo so ta Dios.” (Isaías 37:15-20) For dje palabranan aki ta bisto cu loke Ezekías ta mas preocupá cuné no ta su propio liberacion, sino e reproche cu lo bini riba e nomber di Jehova si Asiria derotá Jerusalem.

¹⁸ Jehova su contesta riba e oracion di Ezekías ta bini via Isaías. Jerusalem no tin cu entregá na Asiria; e tin cu para firme. Papiando como si fuera cu Senákerib, Isaías cu curashi ta declará Jehova su mensahe n’e asirio: “E yu muher bírgen di Síon a despreciá bo, el a haci bofon di bo. Bo tras e yu muher di Jerusalem a sagudí su cabes [di bofon].” (Isaías 37:21, 22) Eigenlijk, Jehova ta agregá e ora ei: ‘Ta ken bo ta cu bo ta desafiá e Santu di Israel cu bofon? Mi conocé bo echonan. Bo tin plannan masha ambicioso mes; bo ta broma na grandi. Bo a confia den bo poder militar i bo a conkistá hopi pais. Pero bo no ta invencibel. Ami lo frustra bo plannan. Ami lo conkistá bo. Anto lo mi haci cu bo manera bo a haci cu otronan. Lo mi pone un hak den bo nanishi i hiba bo bek Asiria!’—Isaías 37:23-29.

“Esaki Lo Ta e Señal pa Bo”

19. Ki señal Jehova ta duna Ezekías, i kico esei ta nificá?

¹⁹ Ki garantia Ezekías tin cu e profecia di Isaías lo cumpli? Jehova ta contestá: “Esaki lo ta e señal pa bo: E aña aki lo tin un comementu di loke a crece dje granonan cu a cai, i den e di dos aña grano cu ta spruit di su mes; pero den e di tres aña boso sembra simia, i cosechá, i planta cunucunan di wijndruif i come nan fruta.” (Isaías 37:30) Jehova lo percurá cuminda pa e hudiunan atrapá. Aunke nan no por planta simia debí na e ocupacion asirio, nan lo por come di e sobrá cu nan piki dje cosecha di aña pasá. E siguiente aña, un aña sabático, nan no mag cultivá nan cunucunan, apesar di nan situacion desesperá. (Éxodo 23:11) Jehova ta primintí cu si e pueblo obedecé su bos, lo spruit suficiente grano den cunucu pa sostené nan. Anto e siguiente aña, hende lo sembra manera custumber i disfrutá dje fruta di nan trabou.

20. Den ki sentido esnan cu scapa dje atake asirio ta “saca rais bai abou i producí fruta bai ariba”?

²⁰ Awor Jehova ta compará su pueblo cu un mata cu hende no por ranca fácil: “Esnan cu scapa dje cas di Huda . . . sigur lo saca rais bai abou i producí fruta bai ariba.” (Isaías 37:31, 32) Sí, esnan cu confia den Jehova no tin nada di teme. Nan i nan desendencia lo keda firmemente establecí den e tera.

21, 22. (a) Kico Isaías ta profetisá relacioná cu Senákerib? (b) Con i na ki tempu e palabranan di Jehova tocante Senákerib ta cumpli?

²¹ Kico dje menasanan asirio contra Jerusalem? Jehova ta contestá: “Lo e no drenta den e stad aki, ni lo e no tira un flecha einan, ni confront’é cu un escudo, ni lanta un curá di sitia contra dje. Via e caminda pa cua el a bini lo e regresá, i lo e no drenta den e stad aki.” (Isaías 37:33, 34) Al final ta resultá cu lo no tin ningun bataya entre Asiria i Jerusalem. Sorprendentemente, ta e asirionan, no e hudiunan, ta esnan cu lo ser derotá sin bringa.

²² Fiel na su palabra, Jehova ta manda un angel cu ta mata e parti mas mihó dje tropanan di Senákerib: 185.000 homber. Aparentemente esaki ta tuma lugá na Libna, i Senákerib mes ta lanta mainta i haña e lidernan, hefenan i hombernan poderoso di su ehército morto. Cu su cara tur na bergwensa, e ta regresá Nínive, pero apesar di su derota aplastante, e ta insistí obstinadamente den su debocion n’e dios falsu Nisroc. Algun aña despues, miéntras Senákerib ta adorá den e tempel di Nisroc, dos di su yu hombernan ta asesin’é. Un biaha mas ta bira bisto cu Nisroc, un dios sin bida, no tin poder pa salba.—Isaías 37:35-38.

Ezekías Su Fe Ta Ser Fortalecé Mas Ainda

23. Ki crísis Ezekías ta confrontá ora cu Senákerib ta subi pa promé bes contra Huda, i ki consecuencianan e crísis aki lo por tin?

²³ Rond dje tempu cu Senákerib ta subi pa promé bes contra Huda, Ezekías ta bira gravemente malu. Isaías ta bis’é cu e ta bai muri. (Isaías 38:1) E rey di 39 aña ta keda tur kibrá. E ta preocupá no solamente pa su propio bienestar, sino tambe pa e futuro dje pueblo. Jerusalem i Huda ta core peliger di ser invadí dor di Asiria. Si Ezekías muri, ta ken lo encabesá e lucha? N’e tempu ei, Ezekías no tabatin un yu homber pa asumí e gobernacion. Den oracion ferviente Ezekías ta roga Jehova pa tene misericordia cuné.—Isaías 38:2, 3.

24, 25. (a) Con Jehova den su misericordia ta contestá e oracion di Ezekías? (b) Ki milager Jehova ta efectuá, manera ta ser describí na Isaías 38:7 i 8?

²⁴ Isaías no a ni sali mes for dje patio dje palacio ainda cu Jehova ta mand’é bai bek na cama dje rey abatí cu un otro mensahe: “Mi a tende bo oracion. Mi a mira bo lágrimanan. Mira, mi ta bai agregá na bo dianan diescincu aña; i for dje plant’i man dje rey di Asiria lo mi libra abo i e stad aki, i lo mi defendé e stad aki.” (Isaías 38:4-6; 2 Reynan 20:4, 5) Jehova lo confirmá su promesa cu un señal inusual: “Mira, mi ta laga e sombra cu pa medio di solo a baha riba e treenan dje trapinan di Acas, bai bek dies tree.”—Isaías 38:7, 8a.

²⁵ Segun e historiadó hudiu, Josefo, tabatin un trapi den e palacio real, probablemente cu un pilar banda di dje. Ora e rayonan di solo dal riba e pilar, nan ta tira un sombra riba e trapi. Un persona por a calculá ora di dia dor di observá e progreso dje sombra riba e treenan. Awor Jehova lo efectuá un milager. Despues cu e sombra baha e treenan manera custumber, lo e bai bek dies tree. Ken a yega di tende un cos asina? Bijbel ta declará: “I solo gradualmente a bai bek dies tree riba e trapinan cu el a baha.” (Isaías 38:8b) Poco tempu despues di esei, Ezekías ta recuperá di su malesa. E noticia di esaki ta plama yega te Babilonia. Ora rey di Babilonia tend’é, e ta manda mensahero Jerusalem pa averiguá ta kico a pasa realmente.

26. Kico ta un resultado dje echo cu Jehova a alargá e bida di Ezekías?

²⁶ Rond di tres aña despues di Ezekías su recuperacion milagroso, su promé yu homber, Manases, ta nace. Ora Manases bira grandi, e no ta demostrá aprecio pa Dios su compasion. Si no ta pa esei, lo e no a ni nace mes! En bes di esei, Manases durante mayor parti di su bida, ta haci na gran escala loke ta malu den bista di Jehova.—2 Crónicanan 32:24; 33:1-6.

Un Imprudencia

27. Den ki maneranan Ezekías ta mustra aprecio pa Jehova?

²⁷ Mescos cu su antepasado David, Ezekías ta un homber di fe. E ta atesorá e Palabra di Dios. Segun Proverbionan 25:1, ta Ezekías a haci areglo pa compilá e material cu awor nos ta haña na Proverbionan capítulo 25 pa 29. Tin hende ta kere cu el a componé Salmo 119 tambe. E cantica di gratitud conmovedor cu Ezekías ta componé despues cu e recuperá di su malesa, ta mustra cu e ta un homber di sintimentu profundo. E ta concluí cu e cos mas importante den bida ta di por alabá Jehova na Su tempel “tur e dianan di nos bida.” (Isaías 38:9-20) Laga nos tur pensa mescos di adoracion puru!

28. Ki imprudencia Ezekías ta cometé poco tempu despues cu el a cura milagrosamente?

²⁸ Aunke Ezekías ta fiel, e ta imperfecto. E ta cometé un imprudencia grave despues di algun tempu cu Jehova a cur’é. Isaías ta splica: “Na e tempu ei Merodac-baladan yu di Baladan rey di Babilonia a manda carta i un regalo pa Ezekías, despues cu el a tende cu e tabata malu pero tabata fuerte atrobe. Di manera cu Ezekías a cuminsá alegrá riba nan i a bai na mustra nan su cas di tesoro, e plata i e oro i e zeta di bálsamo i e bon zeta i henter su arsenal i tur loke tabatin di haña den su tesoro. A resultá cu no tabatin nada cu Ezekías no a mustra nan den su mes cas i den henter su dominio.”—Isaías 39:1, 2.b

29. (a) Kico kisas a motivá Ezekías pa mustra su rikesa na e delegacion di Babilonia? (b) Kico lo ta e consecuencianan di Ezekías su imprudencia?

²⁹ Asta despues cu Asiria a ricibí e derota aplastante na man dje angel di Jehova, el a sigui ta un menasa pa hopi nacion, incluso Babilonia. Kisas Ezekías kier a impresioná rey di Babilonia como un posibel futuro aliado. Sin embargo, Jehova no kier pa habitante di Huda asociá cu nan enemigunan; e kier pa nan confia den dje! Via profeta Isaías, Jehova ta revelá e futuro na Ezekías: “Dianan ta bini, i tur loke tin den bo mes cas i cu bo antepasadonan a warda te cu e dia aki realmente lo ser hibá Babilonia. Nada lo no keda . . . I algun di bo mes yu hombernan cu lo sali for di bo, di ken lo bo bira tata, nan mes lo ser tumá i realmente bira funcionarionan di corte den palacio di rey di Babilonia.” (Isaías 39:3-7) Sí, e mésun nacion cu Ezekías a purba impresioná, cu tempu lo plunder e tesoronan di Jerusalem i haci e habitantenan catibu. E único cos cu Ezekías a logra dor di mustra e babilonionan su tesoro, ta di haci nan mas haragan.

30. Con Ezekías a desplegá un bon actitud?

³⁰ Refiriendo aparentemente na e incidente caminda Ezekías a mustra e babilonionan su tesoro, 2 Crónicanan 32:26 ta bisa: “Ezekías a humiyá su mes debí na e arogancia di su curason, e i e habitantenan di Jerusalem, i Jehova su indignacion no a bini riba nan den e dianan di Ezekías.”

31. Con cos a bai pa Ezekías, i kico esaki ta siña nos?

³¹ Apesar di su imperfeccion, Ezekías tabata un homber di fe. E tabata sa cu su Dios, Jehova, ta un persona real cu sintimentu. Ora Ezekías tabata bou di preshon, el a haci oracion ferviente na Jehova, i Jehova a contest’é. Jehova Dios a dun’é pas pa e resto di su dianan, i Ezekías a keda gradicidu pa esei. (Isaías 39:8) Jehova mester ta mes real pa nos awe. Ora problemanan surgi, laga nos imitá Ezekías i acudí na Jehova pa haña sabiduria i pa e mustra nos e salida, “pasobra e ta duna generosamente na tur i sin tira na cara.” (Santiago 1:5) Si nos sigui perseverá i ehercé fe den Jehova, nos por tin sigur cu lo e bira “e recompensador di esnan cu ta busk’é cu empeño,” tantu awor como den futuro.—Hebreonan 11:6.

[Nota]

[Plachi na página 383]

Rey Ezekías ta confia den Jehova ora e ta hañ’é confrontá cu e poder di Asiria

[Plachi di henter página na página 384]

[Plachi na página 389]

E rey ta manda representante cerca Isaías pa tende e conseho di Jehova

[Plachi na página 390]

Ezekías ta pidi den oracion pa e derota di Asiria engrandecé e nomber di Jehova

[Plachi na página 393]

E angel di Jehova ta mata 185.000 asirio