Bijbel—Inspira Dor Di Dios?

1, 2. Pakico hopi hende ta respetá Bijbel i kico e escritornan di dje ta pretendé?

THE New Encyclopædia Britannica ta yama e Bijbel “probablemente e coleccion di buki cu mas influencia den historia humano.” Hopi hende tin masha respet pa Bijbel debí na su antiguedad—partinan di dje tabata skirbí 3.500 aña pasá. Sin embargo, su conseho práctico i al dia ta un dje motibunan cu mas cu tres biyon copia a ser distribuí i cu el a ser traducí, henter of parcialmente, den casi dos mil idioma, haciend’e mundialmente e buki di mas bendí di tur tempu.

² Aparte dje factornan aki, cuanan tur ta inspirá respet pa Bijbel, ainda tin un otro rasgo cu a haci’é asina influyente i atractivo atraves di siglonan—su pretencion di ta e revelacion inspirá di Dios Todopoderoso. Moises, kende a compilá e Tora (e promé cincu bukinan di Bijbel) “a skirbi” tur loke Dios a bis’é pa skirbi, cua a incluí e relato di creacion, e registro dje diluvio di dia di Noe i e historia di Abraham i di Moises su mes tratonan cu Dios. (Exodo 24:3, 4) Rey David a bisa: “E spiritu dje SEÑOR a papia mediante di mi, su mensahe ta riba mi lenga.” (2 Samuel 23:2) Otro escritornan di Bijbel tambe mescos a pretendé di a haña guia divino. Tur e skirbimentunan aki huntu ta forma Dios su mes splicacion di historia—su berdadero nificacion, interpretacion i resultado final. E hopi diferente escritornan dje Scritura—reynan, trahadornan pagá, sacerdotenan i otronan—tur tabata actuando como secretario registrando e pensamentunan di Dios, Autor di Bijbel i Garantisador di Bijbel su promesanan.

3. Kico ta mustra cu creencia den Dios i creencia den ciencia no ta incompatibel?

³ Ya cu Bijbel ta pretendé di tin autor divino, kisas e pregunta principal pa hopi hende ta relacioná cu e existencia mes di su Autor. Hopi hende ta rechasá e existencia di Dios abiertamente. Otronan, bou dje impresion di cu tur persona inteligente a rechasá e idea di Dios i creencia den Bijbel, ta puntra: “Di con científiconan no ta kere den Dios?” E impresion aki realmente ta berdad? Un artículo den e revista New Scientist a bisa cu e “punto di bista cu comunmente ta spera di científiconan di ta no-creyente . . . ta un punto di bista cu ta completamente robes.”² E mesun artículo ta informá cu ‘steekproefnan’ hací entre universidadnan, establecimentunan di investigacion i laboratorionan industrial ta indicá cu “asta ocho di cada 10 científico ta sigui un fe religioso of reglanan di conducta cu ta ‘no-científico.’” Pues no por ser bisá exactamente cu fe ta incompatibel cu ciencia of cu científiconan. (Mira cuadro, página 4-5.)

Tin Prueba di Inspiracion?

4. Cua berdadnan científico a ser mencioná miles di añanan pasá den Bijbel?

⁴ Ora un persona yega n’e conclusion cu tin evidencia convincente di existencia di un Creador, ainda e pregunta ta keda si el a inspirá hende pa registrá su pensamentu i propósitonan den Bijbel. Tin hopi motibu pakico nos por ta sigur cu esaki ta e caso, di cua un ta su exactitud científico. (Mira cuadro, página 6.) Por ehempel, mas cu 3.000 aña pasá, Job a bisa cu Dios “a cologá e tera riba nada.” (Job 26:7, JP) Rond di 2.700 aña pasá, e profeta Isaías a declará cu Dios “ta sintá riba e círculo dje tera.” (Isaías 40:22, JP) Awor, con Job of Isaías por a sa e berdadnan científico básico aki cu e tera ta cologá den espacio i cu e ta un globo? Awe esei por ta bon conocí, pero e declaracionnan aki tabata hací na un tempu ora tal ideanan tabata desconocí. Revelacion divino no ta e splicacion mas razonabel?

5, 6. Cua cumplimentunan di profecia ta duna evidencia cu e escritornan di Bijbel tabata inspirá dor di Dios?

⁵ Profecia, realmente historia skirbí promé cu e sosodé, ta kisas e rasgo principal di Bijbel cu ta verificá su pretencion di inspiracion divino. Por ehempel, e profeta Isaías a profetisá no solamente cu Jerusalem lo a ser destruí dor di Babilonia i cu henter e nacion hudiu lo a ser hibá catibu sino tambe cu eventualmente e general perso Ciro lo a conkistá Babilonia i libra e hudiunan for di cautiverio. (Isaías 13:17-19; 44:27–45:1) Bo por pensa di cualkier medio, cu no ta inspiracion divino, mediante cua, 200 aña padilanti, Isaías exitosamente por a profetisá Ciro su nacementu, su nomber i precis kico lo el a haci? (Mira cuadro, página 7.

⁶ Algun dje profecianan di mas remarcabel a ser registrá dor di Daniel, un profeta cu a biba den di seis siglo P.E.C. No solamente el a profetisá e caida di Babilonia na man dje medo i e personan sino tambe el a profetisá di sucesonan leu despues di su tempu, te den futuro distante. Por ehempel, Daniel su profecia a profetisá e subimentu di Grecia como un poder mundial bou di Alehandro e Grandi (336-323 P.E.C), e division di Alehandro su imperio entre su cuater generalnan despues di su morto prematuro i subimentu dje Imperio Romano, cu su poder militar temibel (promé siglo P.E.C.). (Daniel 7:6; 8:21, 22) Tur e sucesonan aki awor ta echonan histórico indiscutibel.

7, 8. (a) Cua acusacion algun hende a haci tocante profecianan di Bijbel? (b) Kico ta proba cu e acusacion di fraude no ta bon-fundá?

⁷ Debí cu profecianan di Bijbel tabata asina exacto, críticonan a marcanan como engaño, esta, historia skirbí despues dje echo i disfrasá como profecia. Pero con un persona racionalmente por afirmá cu sacerdotenan hudiu lo por a tribi na inventá un profecia? I pakico nan lo a inventá profecianan cu ta contené e crítica di mas fuerte imaginabel contra nan mes? (Isaías 56:10, 11; Jeremías 8:10; Sofonías 3:4) Ademas, con henter un nacion cu sa lesa i skirbi, entrená i educá cu Bijbel como su texto sagrado, por a ser engañá asina?—Deuteronomio 6:4-9.

⁸ Con por tabatin cualkier fraude conectá cu desaparicion di civilisacionnan completo, tal como Edom i Babilonia, ora cu e sucesonan aki a tuma lugar hopi siglo despues cu a completá e Scritura Hebreo? (Isaías 13:20-22; Jeremías 49:17, 18) Asta si un persona ta keda para ariba cu e profecianan aki no tabata skirbí den e periodo di tempu dje profetanan mes, ainda nan a ser registrá promé cu siglo tres P.E.C., pasobra p’e tempu ei ya caba nan tabata ser traducí den griego den e Septuagint. Tambe, e Rolnan di Laman Morto (cu ta incluí partinan di tur e bukinan profético di Bijbel) ta ser fechá pa di dos i promé siglo P.E.C. Manera a ser notá, hopi profecia no a ser cumplí sino te despues dje fechanan aki.

Bijbel Ta Yen di Contradiccionnan?

9-12. (a) Pakico algun hende ta bisa cu Bijbel ta contradicí su mes? (b) Di ki manera algun “contradiccion” ta ser resolvé?

⁹ Pero algun hende ta criticá: ‘Bijbel ta yen di contradiccion i discrepancia.’ Hopi bes, esnan cu ta afirmá esaki no a investigá e asuntu personalmente sino simplemente a tende un of dos supuesto ehempel for di otronan. En realidad mayoria supuesto discrepancia ta ser resolvé fácilmente si bo corda cu e escritornan di Bijbel frecuentemente a condensá nan tópico na un par di palabra. Un ehempel di esaki ta ser hañá den e relato di creacion. Comparando Génesis 1:1, 3 cu Génesis 1:14-16, hopi hende a puntra con por ta cu Dios “a traha” e luminarionan riba e di cuater dia di creacion ora lus—evidentemente for dje mesun luminarionan aki—tabata alcansá e tera riba e promé dia di creacion. Den e caso aki e escritor hebreo a eliminá e necesidad di splicacionnan largu dor di un scogementu cuidadoso di palabra. Nota cu versículo 14-16 ta papia di “traha” na contraste cu “crea” den Génesis 1:1 i “lusnan” na contraste cu “lus” na Génesis 1:3. Esaki ta indicá cu ta te n’e di cuater dia di creacion cu e solo i luna, existiendo caba, a bira claramente visibel atraves dje atmósfera diki dje tera.a

¹⁰ Listanan di genealogia tambe a causa cierto confusion. Por ehempel, Esdras ta mencioná 23 nomber riba su lista di genealogia sacerdotal na 1 Crónica 5:29-40 [6:3-14, NW] pero ta mencioná solamente 16 nomber ora e ta duna su mes genealogia p’e mesun periodo na Esdras 7:1-5. Esaki no ta un discrepancia, sino un simpel condensacion. Ademas, dependiendo di un escritor su intencion pa registrá un suceso, el a resaltá, minimisá, incluí of omití detayenan cu un otro escritor di Bijbel a expresá diferentemente ora di registrá e mesun suceso. Eseinan no ta contradiccion sino, mas bien, ta relatonan cu ta diferenciá reflehando e escritor su punto di bista i e auditorio cu e tabatin na mira.b

¹¹ Hopi bes, aparente inconsistencianan por ser resolvé si nos djis wak n’e contexto. Por ehempel, “Unda Cain a haña su esposa?” ta un pregunta hopi tendí, resaltando e creencia cu esaki ta exponé un discrepancia den e relato bíblico. Hende ta suponé cu Adam i Eva tabatin solamente dos yu homber, Cain i Abel. E dificultad ta ser resolvé fácilmente si un hende sigui lesa. Génesis 5:4 ta bisa: “Despues dje nacementu di Set, Adam a biba 800 aña i a engendrá yunan homber i muher.” Pues Cain a casa cu un di su rumannan muher of kisas un subrina, loke lo tabata den pleno armonia cu Dios su intencion original p’e expansion dje rasa humano.—Génesis 1:28.

¹² Claramente tin hopi detaye di historia humano cu no ta registrá como parti dje Registro Divino. Pero tur detaye necesario, tantu pa esnan cu promé ayá a les’é i pa nos awe, a ser incluí sin haci’é fastidioso i imposibel pa lesa.

Pa Escolásticonan So Comprond’é?

13-15. (a) Pakico algun hende ta kere cu Bijbel ta muchu difícil pa nos comprondé? (b) Con bini nos sa cu Dios su intencion tabata pa su Palabra ser comprondí?

¹³ Bo a yega di puntra: “Pakico tin asina tantu interpretacion na conflicto di Bijbel?” Despues di tende autoridadnan religioso contradicí otro, algun hende sincero ta bira confundí i desanimá. E conclusion cu hopi hende ta yega na dje ta cu Bijbel no ta cla i e ta contradictorio. Como resultado, hopi hende ta rechasá Bijbel abiertamente, keriendo cu e ta muchu difícil pa lesa i comprondé. Otronan, ora nan ser confrontá cu e enorme conhunto di interpretacionnan religioso, no ta dispuesto pa haci un investigacion serio dje Scritura. Algun hende ta bisa: “Hombernan siñá a studia pa añanan na seminarionan religioso. Con ami por tin cualkier base pa cuestioná loke nan ta siña?” Pero esaki ta e manera cu Dios ta mira asuntunan?

¹⁴ Ora Dios a duna e Ley n’e nacion di Israel, e no a indicá cu e tabata dunando nan un sistema di adoracion cu nan no por a comprondé, un cu lo mester a ser lagá den mannan di sabionan teológico of “escolásticonan.” Mediante Moises na Deuteronomio 30:11, 14, Dios a declará: “Siguramente, e Instruccion aki cu mi ta imponé riba boso e dia aki no ta demasiado difícil pa boso, tampoco e ta fuera di alcance. No, e cos ta masha cerca di boso, den boso boca i den boso curason, pa ward’é.” Henter e nacion, no solamente e lidernan, a ser bisá: “Tuma na pechu e instruccionnan aki cu mi ta encargá boso e dia aki. Imprimí nan riba boso yunan. Recitá nan ora bo ta keda na cas i ora bo no tei, ora bo cai drumi i ora bo lanta.” (Deuteronomio 6:6, 7) Dios su mandamentunan, tur poné por escrito, tabata suficiente cla pa henter e nacion, tantu pa mayornan como yunan, sigui.c

¹⁵ Bayendo bek te den dia di Isaías, lidernan religioso a haña Dios su condenacion dor di a tuma riba nan mes pa agregá i interpretá Dios su leynan. Profeta Isaías a skirbi: “E pueblo ei a acercá Mi cu su boca i a onrá Mi cu su lipnan, pero a tene su curason leu for di Mi i su adoracion di Mi tabata un mandamentu di hende, siñá for di cabes.” (Isaías 29:13) Nan adoracion a bira un mandamentu di hende, no di Dios. (Deuteronomio 4:2) Tabata e ‘mandamentunan di hende’ aki, nan mes interpretacionnan i splicacionnan, cu tabata contradictorio. Dios su palabra no tabata asina. Mescos ta cierto awe.

Cualkier Base Bíblico p’e Tora Oral?

16, 17. (a) Kico algun hende ta kere encuanto un ley oral? (b) Kico Bijbel ta indicá encuanto un ley oral?

¹⁶ Algun hende ta kere cu Moises a ricibí un “Tora Oral” ademas dje “Tora Skirbí.” Segun e creencia aki, Dios a manda pa no skirbi cierto mandamentunan pero pa mas bien transmití nan mediante palabra di boca di generacion pa generacion, asina ser preservá solamente dor di tradicion oral. (Mira cuadro, página 10.) Sin embargo, e relato di Bijbel ta mustra claramente cu Moises nunca a ser mandá pa transmití un ley oral. Exodo 24:3, 4 ta conta nos: “Moises a bai i a ripití n’e pueblo tur e mandamentunan di SEÑOR i tur e reglanan; i henter e pueblo a contestá cu un solo bos, bisando, ‘Tur e cosnan cu SEÑOR a manda nos lo haci!’” Anto Moises “a skirbi tur e mandamentu di SEÑOR.” Mas aleu, na Exodo 34:27 nos ta ser bisá: “I SEÑOR a bisa Moises: Skirbi e mandamentunan aki, pasobra di acuerdo cu e mandamentunan aki Mi ta cera un pacto cu bo i cu Israel.” Un ley oral no-skirbí no tabatin lugá den e pacto cu Dios a cera cu Israel. (Mira cuadro, página 8.) Ningun caminda den Bijbel tin cualkier mencion dje existencia di un ley oral.d Mas importante, su siñansanan ta contradicí e Scritura, agregando n’e mal impresion cu Bijbel ta contradicí su mes. (Mira cuadro, página 22.) Pero ta hende, i no Dios, cu ta responsabel p’e confusion aki.—Isaías 29:13. (Mira cuadro, página 20-1.)

¹⁷ Na contraste cu e interpretacionnan contradictorio di hende, Bijbel mes ta cla i confiabel. Dios a proveé nos cu suficiente prueba den su Palabra cu e mundu pacífico cu Isaías 2:2-4 ta describí no ta simplemente un soño sino un realidad inminente. Ningun otro persona cu no ta Dios mes, e Dios di profecia, e Dios di Bijbel, lo lagu’é sosodé.

[Nota]

[Kuadro na página 4, 5]

EVOLUCION—UN ECHO?

E RELATO di creacion di Génesis ta declará cu tur cos bibiente tabata creá ‘segun nan sorto,’ of gruponan básico. (Génesis 1:12, 24, 25) Promoviendo nan teoria, hopi evolucionista a haci bofon dje relato di Bijbel. Pero tin cualkier prueba cu un sorto nobo a aparecé debí na crusa bestia cu otro of debí na mutacion?e Desde e registronan di mas promé te cu awor, cachó ainda ta cachó i pushi ta sigui ta pushi. Asta kakalaka, hañá entre e fosilnan di insecto di mas promé, ta casi idéntico na esnan moderno.

En berdad, cua evidencia e comunidad científico a producí den hopi mas cu cien aña di investigacion intensivo desde Darwin su Origin of Species?f Na cua conclusionnan algun experto a yega?

E REGISTRO DI FOSIL: Algun hende ta yama evidencia di fosil ‘e corte di apelacion final’ pasobra esei ta e único historia di bida auténtico disponibel pa ciencia. Kico esei ta mustra?

Profesor di ciencia natural John Moore a informá dje resultadonan di un studio extenso hací p’e Sociedad Geológico di London i e Asociacion Palaeontológico di Inglatera. “Rond di 120 científico, nan tur specialista, a prepará 30 capítulo den un obra monumental di mas cu 800 página pa presentá e registro fosil di mata i bestia . . . E ta mustra cu cada forma of sorto principal di mata of bestia tin un historia separá i distinto for di tur otro forma of sortonan! Grupo di tantu mata como bestia ta aparecé di ripiente den e registro di fosil. . . . No tin ni un rastro di un antepasado comun, muchu ménos un vínculo cu cualkier reptil, e supuesto progenitor.”—Should Evolution Be Taught?, 1970, página 9, 14.

MUTACIONNAN POR A CAUSA EVOLUCION? Debí n’e naturalesa perhudicial di mutacion, The Encyclopedia Americana ta admití: “E echo cu mayoria mutacion ta dañino p’e organismo ta parce difícil pa reconciliá cu e punto di bista cu mutacion ta e fuente di materia prima pa evolucion. En berdad, mutantenan ilustrá den bukinan di instruccion di biologia ta un coleccion di raresa i monstruosidadnan i mutacion ta parce di ser un proceso destructivo mas bien cu constructivo.”—1977, Volúmen 10, página 742.

KI TAL DJE HOMBER-MACACU? Science Digest a declará: “E echo remarcabel ta cu tur evidencia físico cu nos tin pa evolucion humano ainda por ser poné, i ainda sobrando lugá, den un solo caha di morto! . . . Por ehempel, ta parce cu macacunan moderno a presentá for di nada. Nan no tin ayera, ningun registro di fosil. I e berdadero orígen di hende humano—di sernan pará riba nan curpa, sunú, trahando herment i cu celebro grandi—ta, si nos mester ta onrado cu nos mes, un asuntu igualmente misterioso.”—Mei 1982, página 44.

UN TEORIA DEN CRISIS: Nota e siguiente comentario di Michael Denton, un biólogo molecular, manera ta citá for di su buki Evolution: A Theory in Crisis:

“No por tin ningun duda cu Darwin no tabatin nada cu ta parce suficiente evidencia pa establecé su teoria di evolucion. . . . Su teoria general, esta cu tur bida riba tera a originá i evolucioná dor di un acumulacion gradual i sucesivo di mutacionnan casual, ta ainda, manera e tabata den tempu di Darwin, un hipótesis sumamente speculativo completamente sin ningun apoyo directo di echonan i masha leu for dje axioma [principionan supuestamente establecí] cu ta papia pa su mes, cu algun di su apoyadornan mas agresivo lo kier laga nos kere. . . . Un persona kisas a spera cu un teoria di tal importancia cardinal, un teoria cu literalmente a cambia e mundu, lo tabata algu mas cu metafísica, algu mas cu un mito.”—Edicion di 1986, página 69, 77, 358.

[Nota]

[Kuadro na página 6]

“NA PRINCIPIO DIOS A CREA” . . .

. . . “CIELU I TERA.” (Génesis 1:1, JP)—Mayoria científico awe ta di acuerdo cu e universo tabatin un principio. Astrónomo Robert Jastrow a skirbi: “Awor nos ta mira con e evidencia di astronomia ta hiba na un punto di bista bíblico dje orígen di mundu. E detayenan ta diferenciá, pero e elementonan esencial den astronomia i e relato bíblico di Génesis ta mescos: e cadena di suceso hibando na hende a cuminsá di ripiente i exactamente na un momento definí den tempu, den un explosion di lus i energia.”—God and the Astronomers, 1978, página 14.

. . . “CRIATURANAN BIBIENTE.” (Génesis 1:20)—Físico H. S. Lipson, realisando e probabilidadnan contra un orígen spontáneo di bida, a bisa: “E único splicacion aceptabel ta creacion. Mi sa cu esaki ta palabra malu pa físiconan, mescos cu en berdad e ta pa mi, pero nos no mester rechasá un teoria cu nos no ta gusta si e evidencia experimental ta apoy’é.”—Physics Bulletin, Volúmen 31, 1980, página 138.

Asta si no ta contra tur probabilidad, generacion spontáneo no por a sosodé di cualkier manera? Fred Hoyle, físico i astrónomo, ta bisa: “No tin ni un krenchi di evidencia obhetivo pa apoyá e hipótesis cu bida a cuminsá den un sopi orgánico aki rib’e Tera.” Tambe e ta declará: “Segun biokímiconan ta descubrí mas i mas tocante e complehidad asombroso di bida, ta keda bisto cu e probabilidadnan cu el a originá pa casualidad ta asina chikitu cu nan por ser excluí completamente. Bida no por a presentá pa casualidad.” Hoyle ta agregá: “Biólogonan ta entregá nan mes na fantasianan no-substanciá afin di nenga loke ta asina visiblemente evidente, esta cu e 200.000 cadena di amino ácido, i pues bida, no a aparecé pa casualidad.” Realmente, e ta puntra, ‘Simplemente con e unimentu pa casualidad di kímiconan den un lodo orgánico so por producí e 2.000 enzemanan esencial pa bida?’ E ta bisa cu e posibilidadnan ta un den 10^40.000, of “casi mesun chens di tira sin interupcion un secuencia di 50.000 seis cu un dou imparcial!” (The Intelligent Universe, F. Hoyle, 1983, página 11-12, 17, 23) E ta agregá, “Si un persona no tin prehuicio, sea dor di creencianan social of dor di un entrenamentu científico, cu ta convenc’é cu bida a originá [spontáneamente] riba Tera, e calculacion simpel aki ta eliminá e idea completamente for di corte.”—Evolution From Space, Fred Hoyle i Chandra Wickramasinghe, 1981, página 24.

[Kuadro na página 7]

DIOS —‘E REVELADOR DI MISTERIONAN’ MEDIANTE PROFECIA

PAPIANDO cu un rey di antigua, e profeta Daniel a bisa: “E misterio di cua e rey kier a sa—sabionan, exorcistanan, hacidornan di magia i adivinadornan no por conta e rey. Pero tin un Dios den cielu kende ta revelá misterionan.” (Daniel 2:27, 28) Tin evidencia cu Dios realmente ta un Revelador di misterionan mediante profecia? Lo siguiente ta algun ehempel.

E caida di Babilonia: “Pues SEÑOR a bisa Ciro, Su ungí—kende su man drechi El a gara, trapando nacionnan dilanti dje, kitando e faha for di heup di reynan, habriendo portanan dilanti dje i lagando ningun porta keda cerá.”—Isaías 45:1, profetisá rond di 732 P.E.C. Mira tambe Jeremías 50:35-38; 51:30-32, profetisá promé cu 625 P.E.C.

Cumplimentu—539 P.E.C.: Historiadornan Heródoto i Xenofon ta relatá cu Ciro e Perso a desviá e awanan dje riu Eufrátes, cu tabata pasa atraves dje centro di Babilonia, i a manda su ehército crusa e fondo dje riu, cogiendo e wardianan babilónico di sorpresa i tumando e stad den un solo anochi. Asta cu e estrategia aki, Ciro lo no por a drenta e stad usand’e portanan na cantu di riu Eufrátes cu ta hiba den e stad si pa descuido nan no a ser lagá habrí. E ‘portanan no a keda cerá,’ net manera e profecia a profetisá.

E destino di Tiro: “Pues SEÑOR Dios a bisa: Mi ta bai tuma accion contra bo, O Tiro! Lo mi tira hopi nacion contra bo, mescos cu laman ta tira su olanan. . . . I lo mi raspa su suela i lagu’é un baranca sunú. . . . I nan lo tira bo piedranan i palunan i bo suela den awa.”—Ezekiel 26:3, 4, 12, profetisá rond di 613 P.E.C.

Cumplimentu—332 P.E.C.: Alehandro e Grandi a construí un brug di tera, of un ‘dijk’, desde tera firme te n’e parti di isla di Tiro (800 meter for di costa) asina cu su soldadnan por a marcha n’e otro banda i atacá e stad dje isla. The Encyclopedia Americana ta informá: “Cu e ruinanan dje parti di stad riba tera firme, cua el a basha bou, el a construí un ‘dijk’ masha grandi na [aña] 332 pa uni e isla cu tera firme.” Despues di a siti’é pa un tempu relativamente corticu, e stad dje isla a ser destruí i Ezekiel su profecia a ser cumplí den tur su detaye. Asta e ‘piedranan i obranan di palu i stof’ dje Tiro bieu (e parti dje stad riba tera firme) a ser ‘poné meimei di awa mes.’

E destruccion di Jerusalem: “Anto Isaías a bisa Hezekías, ‘Tende e palabra dje SEÑOR di Ehércitonan: Un tempu ta bini ora cu tur cos den bo palacio, cu bo antepasadonan a warda te cu e dia aki, lo ser hibá na Babilonia; nada lo ser lagá atras.’ ”—Isaías 39:5, 6, profetisá rond di 732 P.E.C.; mira tambe Isaías 24:1-3; 47:6.

Jeremías e profeta a proclamá: “Mi ta bai . . . trece nan [e babilóniconan] contra e pais aki i su habitantenan . . . Henter e pais aki lo ser un ruina desolá. I e nacionnan ei lo sirbi e rey di Babilonia setenta aña.”—Jeremías 25:9, 11, profetisá promé cu 625 P.E.C.

Cumplimentu—607 P.E.C. (586 P.E.C. segun mayoria cronologia seglar): Babilonia a destruí Jerusalem despues di a siti’é pa un aña i mei. Nan a rosa e stad i e tempel i e hudiunan mes a ser hibá na Babilonia. (2 Crónica 36:6, 7, 12, 13, 17-21) Henter e nacion a permanecé den cautiverio pa 70 aña, manera Jeremías a profetisá. Nan liberacion milagroso na 537 P.E.C. dor di Ciro e Grandi, kende a conkistá Babilonia, a cumpli cu e profecia di Isaías, cua a mencion’é pa nomber. (Isaías 44:24-28) E profeta Daniel, den cautiverio na Babilonia, a calculá e tempu exacto di liberacion di su pueblo, basando su conclusion riba Jeremías su profecia.—Daniel 9:1, 2.

[Kuadro na página 10]

E TORA TIN “SETENTA CARA”?

NA ISRAEL awe no ta straño pa tende hende cita un expresion hudiu bon-conocí—“Tin setenta cara p’e Tora”—indicando cu nan ta kere cu e Scritura por ser interpretá den hopi manera diferente, i asta contradictorio. Esaki ta ser considerá como berdad tantu dje Ley skirbí como dje asina yamá ley oral. The Encyclopedia of Judaism ta comentá: “E Ley Oral no ta un ley definitivo; e ta incluí hopi opinion variá i asta na conflicto. Encuanto esaki e sabionan a bisa, ‘Nan tur ta palabra dje Dios bibo.’” (Página 532) Sin embargo, ta razonabel pa kere cu Dios lo inspirá opinionnan na conflicto i dividí? Con aceptacion di tal contradiccionnan a sosodé?

Atraves dje periodo ora e Scritura Hebreo mester a ser skirbí (c. 1513–c. 443 P.E.C.), e representantenan nombrá di Dios a clarificá asuntunan di discusion, hopi bes cu Dios mes apoyando nan dor di desplegá poder divino of dor di cumpli cu profecianan cu el a duna nan pa expresá. (Exodo 28:30; Número 16:1–17:15 [16:1-50, NW]; 27:18-21; Deuteronomio 18:20-22) N’e tempu ei si un persona a siña splicacion i interpretacionnan contradictorio, e tabata ser considerá, no como un escolástico, sino como un apóstata. Dios a spierta henter e nacion: “Tene cuidou pa warda solamente loke ami ta imponé riba boso: no agregá na dje ni kita for di dje.”—Deuteronomio 13:1 (12:32, NW).

Sin embargo, cu tempu un cambio fundamental a sosodé den e manera di pensa dje nacion di Israel. E fariseonan, kendenan a bira prominente den hudaismo durante e promé siglo E.C., a defendé e siñansa dje “Tora Oral,” cua nan a desaroyá dos siglo anteriormente. Nan a siña cu ademas di duna e nacion di Israel un Ley skirbí na Ceru di Sinai, tambe Dios a transmití na nan n’e mesun tempu un ley oral. Di acuerdo cu tal creencia, e ley oral inspirá aki a interpretá i clarificá detayenan dje Ley skirbí, detayenan cu Dios deliberadamente a bisa Moises pa no registrá. E ley oral no mester a ser poné por escrito pero mester a ser transmití solamente mediante palabra di boca, for di maestro pa disipel, di generacion pa generacion. Esei pues a duna autoridad special n’e fariseonan, kende a considerá nan mes como wardadornan dje tradicion oral aki.g

Despues dje destruccion dje di dos tempel na 70 E.C., e punto di bista di fariseo a gana i hudaismo a bira un forma di religion dominá pa rabi, algu cu e no tabata promé.h Cu prominencia nobo duná na rabinan mas bien cu na sacerdote of profetanan, e ley oral a bira e punto central nobo di hudaismo. Manera The Encyclopedia of Judaism ta declará: “E Tora Oral a yega di ser considerá como mas importante cu e Tora Skirbí ya como cu e splicacion i comprondementu dje último [e Tora Skirbí] a dependé dje promé [e Tora Oral].”—1989, página 710.

Segun cu rabinan a gana prestigio i segun cu tradicionnan a multiplicá, e prohibicion di pone e ley oral aki por escrito a ser kitá. Na final di siglo dos i principio di siglo tres E.C., Judah Ha-Nasi (135-219 C.E.) sistemáticamente a registrá e tradicionnan oral rabínico aki den un obra yamá e Mishnah. Loke a ser agregá despues a ser yamá Tosefta. E rabinan na nan turno a mira e necesidad pa duna comentario riba e Mishnah, i e interpretacionnan aki di tradicion oral a bira e fundeshi di un coleccion grandi di buki yamá Gemara (compilá desde siglo tres te cincu E.C.). Huntu e obranan aki a bira conocí como e Talmud. Comentario riba tur e opinionnan rabínico aki ta sigui te den nos dia. Ya cu ta imposibel pa armonisá tur e puntonan di bista sumamente diferente aki, ta algu straño cu hopi hende ta preferá di mira “setenta cara p’e Tora”?

[Nota]

[Kuadro na página 8]

UNDA E LEY ORAL TABATA . . .

. . . ora Moises a ripití tur e mandamentunan di Dios na henter e nacion di Israel? E nacion e ora ei a bai di acuerdo pa cumpli cu loke el a ripití i despues Moises “a skirbi tur e mandamentunan di SEÑOR.”—Exodo 24:3, 4, Letra cursivo ta di nos.

. . . ora Hosué a reuní e nacion di Israel despues di a drenta e Tera Primintí i a lesa pa nan un biaha mas tur e palabranan cu nan a bai di acuerdo pa cumpli cuné? “No tabatin un solo palabra cu Moises a manda cu Hosué a keda sin lesa den e presencia di henter e asamblea di Israel.”—Hosué 8:35, Letra cursivo ta di nos.

. . . ora den e dianan di Rey Hosías e ‘buki perdí di Ley di Moises’ a ser hañá mientras e tempel tabata ser renobá? Ora e contenido a ser lesá p’e, Hosías a sker su pañanan den desconsuelo, realisando cu pa generacionnan nan no a cumpli cu e Ley segun loke tabata skirbí. Anto el a haci areglo pa celebrá e festival di Pascu, cua no a ser celebrá semper corectamente durante henter e periodo dje reynan i dje huesnan promé cu nan. Unda e ley oral ‘transmití fielmente’ tabata durante e cientos di añanan ei? Si el a existí, e informacion aki nunca lo a ser lubidá. Solamente un registro skirbí exactamente preservá a haci posibel p’e nacion bolbe na hacimentu di Dios su boluntad corectamente.—2 Rey 22:8–23:25.

. . . ora e profeta Jeremías a declará: “For di esun di mas chikitu te na esun mas grandi, nan tur ta golos pa ganashi; tantu sacerdote como profeta, nan tur ta actua falsamente”? (Jeremías 6:13) Atraves di gran parti dje historia di nacion di Israel, esaki tabata e condicion spiritual dje nacion su lidernan, specialmente e sacerdotenan, kendenan tabata responsabel pa siña e Ley. (Malaquías 2:7, 8) Registronan skirbí ta papia pa nan mes, pero por a dependé riba hende cu tabata asina inconfiabel pa preservá fielmente un tradicion oral?

. . . durante e mas cu mil aña cu a registrá e Scritura Hebreo? Desde Moises te Malaquías, no tin ningun mencion dje existencia di un tal ley oral. Solamente cientos di añanan despues, durante e periodo dje rabinan, ora sectanan religioso na conflicto a lucha pa control i autoridad riba e nacion hudiu, nos ta haña e concepto aki mencioná. E cientos di añanan ei di silencio rib’e tópico i e testimonio dje Scritura inspirá no ta anulá e pretencion cu na un tempu tabatin un tal ley oral inspirá?

[Kuadro/Plachi na página 9]

ROLNAN DI LAMAN MORTO

Nan ta di fecha promé cu Era Comun, nan ta revelá e exactitud dje transmision di texto di Bijbel atraves di siglonan. Tambe nan ta confirmá cu profecianan a ser registrá promé cu nan cumplimentu