Dedicacion i Libertad di Scoge

“Pa tal libertad Cristo a libra nos.”—GALATIONAN 5:1.

1. Na kico e palabranan hebreo i griego traducí como “dedicacion,” “inauguracion” of “consagracion” ta aplicá principalmente?

ESCRITORNAN di Bijbel a usa vários palabra hebreo i griego pa transmití e idea di ser separá, of apartá, pa sirbi un propósito sagrado. Den Bijbelnan ingles e palabranan aki ta ser traducí cu palabranan manera “dedicacion,” “inauguracion” of “consagracion.” Tin biaha e términonan aki ta ser usá en coneccion cu structuranan​—generalmente e tempel di Dios den Jerusalem di antigwedad i e adoracion cu tabata ser efectuá ei. Rara bes e palabranan aki a ser usá cu referencia na asuntunan seglar.

Dedicacion na “e Dios di Israel”

2. Pakico Jehova por a ser yamá corectamente “e Dios di Israel”?

² Na 1513 P.E.C., Dios a libra e israelitanan for di sclabitud na Egipto. Un poco tempu despues di esei, el a apartá nan como su pueblo special, tumando nan den un relacion di pacto cu e mes. El a bisa nan: “Awor si boso obedecé mi bos estrictamente i berdaderamente warda mi pacto, e ora ei boso siguramente lo bira mi propiedad special entre tur otro pueblo, pasobra henter e tera ta pertenecé na mi.” (Exodo 19:5; Salmo 135:4) Despues di a haci e israelitanan su propiedad special, Jehova corectamente por a ser yamá “e Dios di Israel.”​—Hosué 24:23.

3. Pakico Jehova no a mustra parcialidad ora el a scoge Israel como su pueblo?

³ Jehova no tabata parcial ora el a haci e israelitanan su pueblo dedicá, pasobra amorosamente el a pensa tambe riba hende no-israelita. El a instruí su pueblo: “Den caso cu un residente stranhero ta biba cu bo como stranhero den boso pais, boso no mag maltrat’é. E residente stranhero cu ta biba como stranhero cerca boso mester bira pa boso manera un nativo di boso; i bo tin cu stim’é mescos cu bo mes, pasobra boso a bira residentenan stranhero den e tera di Egipto. Ami ta Jehova boso Dios.” (Levítico 19:​33, 34) Siglonan despues, Dios a graba su punto di bista convincentemente den apostel Pedro, kende a reconocé: “Siguramente mi ta percibí cu Dios no ta parcial, sino den tur nacion e hende cu ta tem’é i ta obra husticia ta aceptabel p’e.”​—Echonan 10:​34, 35.

4. Kico tabata e condicionnan dje relacion entre Dios i Israel, i e israelitanan a cumpli cu esakinan?

⁴ Tuma nota tambe, cu pa Israel por tabata e pueblo dedicá di Dios, nan tabatin cu cumpli cu un condicion. Solamente si nan a obedecé estrictamente e bos di Dios i a warda su pacto nan lo tabata su “propiedad special.” Lamentablemente, e israelitanan no a cumpli cu e rekisitonan aki. Despues cu nan a rechasá e Mesías cu Dios a manda den e promé siglo E.C., nan a perde nan posicion privilegiá. Jehova no tabata “e Dios di Israel” mas. I e israelitanan natural no tabata Dios su pueblo dedicá mas.​—Compará cu Mateo 23:​23.

Dedicacion di “e Israel di Dios”

5, 6. (a) Kico Jesus tabata kier men cu su palabranan profético registrá na Mateo 21:​42, 43? (b) Na ki tempu i con “e Israel di Dios” a yega na existencia?

⁵ Esaki a nificá cu Jehova mester a keda awor sin un pueblo dedicá? No. Citando e salmista, Jesucristo a predicí: “Boso nunca a lesa den e Scritura: ‘E piedra cu e constructornan a rechasá ta esun cu a bira e piedra principal di skina. Esaki a yega di ser for di Jehova, i e ta maraviyoso den nos bista’? P’esei mes mi ta bisa boso: E reino di Dios lo ser kitá for di boso i lo ser duná na un nacion cu ta producí su frutanan.”​—Mateo 21:​42, 43.

⁶ E “nacion cu ta producí su frutanan” a resultá di ta e congregacion cristian. Durante Jesus su estadia temporal riba tera, el a scoge su promé miembronan prospectivo. Pero riba e dia di Pentecoste 33 E.C., tabata Jehova Dios mes cu a funda e congregacion cristian dor di drama su spiritu santu riba su promé miembronan, rond di 120 na cantidad. (Echonan 1:15; 2:​1-4) Manera apostel Pedro a skirbi despues, e congregacion recien formá aki a bira e ora ei “un rasa scogí, un sacerdocio real, un nacion santu, un pueblo pa posesion special.” Scogí pa ki motibu? Pa nan por “declará na tur parti e excelencianan di esun cu a yama [nan] for di scuridad na su lus maraviyoso.” (1 Pedro 2:9) Cristo su siguidónan, ungí cu e spiritu di Dios, awor tabata un nacion dedicá, “e Israel di Dios.”​—Galationan 6:16.

7. Kico miembronan di e Israel di Dios mester a disfrutá di dje, i p’esei kico Bijbel ta bisa nan mester a evitá?

⁷ Aunke miembronan dje nacion santu tabata “un pueblo pa posesion special,” nan lo no a ser sclabisá. Al contrario, nan lo a disfrutá di mas libertad cu e nacion dedicá di Israel natural a poseé. Jesus a primintí e miembronan prospectivo dje nacion nobo aki: “Boso lo conocé e berdad, i e berdad lo haci boso liber.” (Juan 8:32) Apostel Pablo a mustra cu cristiannan a ser librá for dje rekisitonan dje pacto di Ley. Den e contexto aki el a spierta co-creyentenan na Galacia: “Pa tal libertad Cristo a libra nos. P’esei, para firme, i no laga boso ser cerá atrobe den un yugo di sclabitud.”​—Galationan 5:1.

8. Den ki sentido e areglo cristian ta ofrecé hende individual mas libertad di loke a ser experenciá bou dje pacto di Ley?

⁸ Distinto di Israel natural di pasado, te n’e dia djawe, e Israel di Dios a obedecé estrictamente e rekisitonan di su dedicacion. Esaki no mester sorprendé nos pasobra su miembronan ta scoge boluntariamente pa obedecé. Miéntras miembronan di Israel natural a bira dedicá pa causa di nacementu, miembronan di e Israel di Dios a bira esei dor cu nan a scoge asina. Di manera cu e areglo cristian a para na contraste cu e pacto di Ley hudiu, cu a imponé dedicacion riba individuonan sin permití nan e libertad di scoge.

9, 10. (a) Con Jeremías a indicá cu lo a bin un cambio relacioná cu dedicacion? (b) Pakico lo bo bisa cu no ta tur cristian dedicá awe ta miembro di e Israel di Dios?

⁹ Profeta Jeremías a predicí un cambio relacioná cu dedicacion ora el a skirbi: “‘Mira! Ta bini dianan,’ ta e expresion di Jehova, ‘i lo mi cera un pacto nobo cu e cas di Israel i cu e cas di Huda; no unu manera e pacto cu mi a cera cu nan antepasadonan den e dia cu mi a tuma nan na man pa saca nan for di e tera di Egipto, “cua pacto di mi nan mes a kibra, aunke mi mes tabata doño di nan mescos cu esposo,” ta e expresion di Jehova.’ ‘Pasobra esaki ta e pacto cu lo mi cera cu e cas di Israel despues dje dianan ei,’ ta e expresion di Jehova. ‘Lo mi pone mi ley den nan, i lo mi skirbié den nan curason. I lo mi bira nan Dios, i nan mes lo bira mi pueblo.’”​—Jeremías 31:​31-33.

¹⁰ Cu e ley di Dios skirbí “den nan,” na moda di papia, “den nan curason,” miembronan di e Israel di Dios ta ser impulsá pa cumpli cu nan dedicacion. Nan motivacion ta mas fuerte cu esun dje israelitanan natural, cu tabata dedicá di nacementu, no dor cu nan a scoge asina. Awe, mas cu cincu miyon co-adoradó rond mundu tin e mésun motivacion fuerte pa haci e boluntad di Dios cu e Israel di Dios a demostrá. Di igual manera nan a dedicá nan bida na Jehova Dios pa haci su boluntad. Aunke e individuonan aki no tin e speransa di bida celestial manera esnan cu ta forma e Israel di Dios, nan ta alegrá den e prospecto di biba pa semper riba tera bou di gobernacion dje Reino celestial di Dios. Nan ta mustra aprecio pa Israel spiritual dor di apoyá activamente su poco miembronan restante pa cumpli cu nan asignacion di “declará na tur parti e excelencianan di esun cu a yama [nan] for di scuridad na su lus maraviyoso.”

Eherciendo Sabiamente e Libertad cu Dios Ta Duna

11. Cu ki capacidad hende a ser creá, i con e mester us’é?

¹¹ Dios a crea hende pa atesorá libertad. El a otorgá nan e capacidad di boluntad liber. E promé pareha humano a haci uso di nan libertad di scoge. Sin embargo, nan a tuma un decision imprudente i egoista cu a hiba na desaster tantu pa nan mes como pa nan desendientenan. Tog, esaki ta demostrá claramente cu Jehova nunca ta forsa criaturanan inteligente pa tuma un curso contrario cu nan motivacion of deseonan interno. I siendo cu “Dios ta stima un dunadó alegre,” e único dedicacion aceptabel p’e ta esun basá riba amor, esun hací boluntariamente cu alegria, esun fundá riba libertad di scoge. (2 Corintionan 9:7) Cualkier otro clase ta inaceptabel.

12, 13. Den ki manera Timoteo ta sirbi como un patronchi pa entrenamentu apropiado di yu, i su ehempel a hiba hopi hóben na kico?

¹² Reconociendo e rekisito aki plenamente, Testigonan di Jehova ta boga pa hende dedicá nan mes na Dios, pero nan nunca ta forsa ningun hende pa haci un dedicacion asina, ni sikiera nan mes yunan. Na contraste cu hopi iglesia, e Testigonan no ta bautisá nan yunan como baby, como si fuera tabata posibel pa forsa nan dedicá nan mes sin duna nan chens di scoge esei. E patronchi bíblico pa sigui ta esun di e yoncuman Timoteo. Como adulto, apostel Pablo a bis’é: “Sigui den e cosnan cu bo a siña i a keda persuadí pa kere, sabiendo for di ki personanan bo a siña nan i cu for di infancia bo a conocé e scrituranan santu, cu por hací bo sabí pa salbacion mediante e fe en relacion cu Cristo Jesus.”​—2 Timoteo 3:​14, 15.

¹³ Ta notabel cu Timoteo tabata conocé e scrituranan santu pa motibu cu su mama i wela a siñ’é nan for di infancia. Nan a persuadié​—no fors’é​—pa kere siñansanan cristian. (2 Timoteo 1:5) Como resultado, Timoteo a mira e sabiduria di bira un siguidó di Cristo i asina a tuma e decision personal pa dedicá su mes. Den tempu moderno, dies di miles di hóbennan kende nan mayornan ta Testigo di Jehova a sigui e ehempel aki. (Salmo 110:3) Otronan no. Ta un asuntu di decision personal.

Scogiendo pa Ta Esclabo di Ken?

14. Kico Romanonan 6:16 ta bisa nos tocante libertad total?

¹⁴ Ningun hende ta totalmente liber. Tur hende su libertad ta limitá dor di leynan físico, manera e ley di gravedad, cu hende no por ignorá sin haña castigu. Den un sentido spiritual tambe, ningun hende ta totalmente liber. Pablo a razoná: “Boso no sa cu si boso ta sigui presentá boso mes na cualkier hende como esclabo pa obedec’é, boso ta esclabo di dje pasobra boso ta obedec’é, sea di picá cu morto na bista of di obedencia cu husticia na bista?”​—Romanonan 6:16.

15. (a) Con hende ta haña e idea di ta esclabo, pero kico mayoria ta haci finalmente? (b) Ki preguntanan apropiado nos por haci nos mes?

¹⁵ Mayoria hende ta haña e idea di ser esclabo di un persona algu desagradabel. Tog, den e mundu djawe realidad ta cu hopi biaha hende ta laga nan mes ser manipulá i influenciá den asina tantu manera sutil cu finalmente nan inboluntariamente ta haci loke otronan kier pa nan haci. Por ehempel, e industria di publicidad i e mundu di entretenimentu ta trata na hinca hende den un malchi, estableciendo normanan pa nan sigui. Organisacionnan político i religioso ta haña hende pa apoyá nan idea i metanan, no semper pa medio di argumentonan convincente, sino hopi biaha dor di apelá na un sentido di solidaridad of lealtad. Siendo cu Pablo a mencioná cu ‘nos ta esclabo di esnan kende nos ta obedecé,’ cada un di nos ta haci bon di puntra nos mes: ‘Di ken mi ta esclabo? Ken ta ehercé e mayor influencia riba mi decisionnan i mi moda di biba? Ta clero religioso, lidernan político, magnatenan financiero of artistanan famoso? Ken mi ta obedecé​—Dios of hende?’

16. Den ki sentido cristiannan ta esclabo di Dios, i cua ta e punto di bista corecto di tal sclabitud?

¹⁶ Cristiannan no ta mira obedencia na Dios como un violacion irazonabel di libertad personal. Nan ta ehercé nan libertad boluntariamente den imitacion di nan Ehempel, Jesucristo, poniendo deseonan personal i prioridadnan na armonia cu e boluntad di Dios. (Juan 5:30; 6:38) Nan ta desaroyá “e mente di Cristo,” sometiendo nan mes na dje como Cabes dje congregacion. (1 Corintionan 2:​14-16; Colosensenan 1:​15-18) Esaki ta hopi parecido na un muher cu ta casa i boluntariamente ta cooperá cu e homber cu e ta stima. De facto, Bijbel ta papia dje cuerpo di cristiannan ungí como un bírgen puru primintí na Cristo den matrimonio.​—2 Corintionan 11:2; Efesionan 5:​23, 24; Revelacion 19:​7, 8.

17. Kico tur Testigo di Jehova a scoge pa bira?

¹⁷ Cada Testigo di Jehova, sea cu e tin un speransa celestial of unu terenal, a haci un dedicacion personal na Dios pa haci su boluntad i obedec’é como Gobernante. Pa cada Testigo, dedicacion tabata un decision personal pa bira un esclabo di Dios en bes di keda como esclabo di hende. Esaki ta na armonia cu e conseho di apostel Pablo: “Boso a ser cumprá pa un prijs; stop di haci boso mes esclabo di hende.”​—1 Corintionan 7:23.

Siña Beneficiá Nos Mes

18. Ki ora un potencial Testigo ta cualificá pa bautismo?

¹⁸ Promé cu un persona por cualificá pa bira un Testigo di Jehova, e tin cu cumpli cu cualificacionnan bíblico. Ancianonan ta ehercé cautela ora di determiná si un potencial Testigo berdaderamente ta comprendé e implicacionnan di dedicacion cristian. E persona realmente kier ta un Testigo di Jehova? E ta dispuesto pa biba segun loke esaki ta encerá? Si no, e ora ei e no ta cualificá pa bautisá.

19. Pakico no tin motibu pa criticá un persona cu dicidí di bira un sirbidó dedicá di Dios?

¹⁹ Sin embargo, si un individuo ta cumpli cu tur e rekisitonan, pakico critik’é pasobra boluntariamente el a tuma un decision personal di laga Dios i Su Palabra inspirá influenci’é? Ta ménos aceptabel pa laga Dios influenciá bo en bes di hende? Of acaso esaki ta di ménos beneficio? Testigonan di Jehova no ta kere esei. Di henter nan curason nan ta di acuerdo cu e palabranan di Dios cu Isaías a skirbi: “Ami, Jehova, ta bo Dios, Esun cu ta siñá bo beneficiá bo mes, Esun cu ta hací bo stap den e caminda den cua bo mester cana.”​—Isaías 48:17.

20. Den ki sentido e berdad bíblico ta libra hende?

²⁰ Berdad bíblico ta libra hende di kere doctrinanan religioso falsu, manera tormento eterno den un fiernu di candela. (Eclesiástes 9:​5, 10) En bes di esei, e ta yena nan curason cu gratitud pa e berdadero speransa p’e mortonan​—resureccion hací posibel a base di Jesucristo su sacrificio di rescate. (Mateo 20:28; Echonan 24:15; Romanonan 6:23) Berdad bíblico ta libra hende for dje frustracionnan cu ta bini di dependé riba promesanan político cu consistentemente ta keda sin ser realisá. En bes di esei, e ta haci nan curason pasa over di goso sabiendo cu e Reino di Jehova ta goberná caba den shelu i pronto lo goberná riba henter e tera. Berdad bíblico ta libra hende for di prácticanan cu, aunke nan ta atractivo p’e carni pecaminoso, ta desonrá Dios i ta exigí un prijs haltu den forma di relacionnan fracasá, enfermedad i morto prematuro. Cu poco palabra, siendo un esclabo di Dios ta muchu mas beneficioso cu ser esclabo di hende. De facto, dedicacion na Dios ta primintí beneficionan “den e periodo di tempu aki . . . i den e binidero sistema di cosnan bida eterno.”​—Marco 10:​29, 30.

21. Con Testigonan di Jehova ta mira dedicacion na Dios, i kico ta nan deseo?

²¹ Testigonan di Jehova djawe no a bira parti di un nacion dedicá for di nacementu manera e israelitanan di pasado. E Testigonan ta parti di un congregacion di cristiannan dedicá. Cada Testigo bautisá a bira esei dor di ehercé individualmente su libertad di scoge den haci un dedicacion. Sí, pa Testigonan di Jehova, dedicacion ta resultá den un relacion personal caluroso cu Dios marcá pa sirbishi boluntario na dje. Di henter curason nan ta deseá di mantené e relacion gososo aki, pegando pa semper n’e libertad pa cua Jesucristo a libra nan.

Con Lo Bo Contestá?

◻ Pakico Dios no tabata parcial ora el a scoge Israel pa bira su “propiedad special”?

◻ Pakico lo bo bisa cu dedicacion cristian no ta encerá un pérdida di libertad?

◻ Kico ta e beneficionan di dedicacion na Jehova Dios?

◻ Pakico ta mihó pa ta un sirbidó di Jehova cu un esclabo di hende?

[Plachi na página 15]

Den antiguo Israel, dedicacion na Dios tabata un asuntu di nacementu

[Plachi na página 16]

Dedicacion cristian ta un asuntu di scoge