Referensia pa Material i Tarea pa Reunion Nos Bida i Sirbishi Kristian

6-12 DI MART

TESORONAN DI E PALABRA DI DIOS | YEREMÍAS 1-4

jr-S 88 §14-15

“Mi Ta Satisfasé Esnan Kansá”

LO BO REFRESKÁ ESNAN KANSÁ?

¹⁴ Ta bon pa nos presta atenshon na kon Yeremías a haña animashon i kon e, na su turno, a animá “esnan kansá.” ( Yer. 31:25) E profeta a haña animashon spesialmente serka Yehova. Imaginá bo kon lo bo sinti bo si Yehova bisa bo: “ ‘Awe mi a hasi bo manera un stat fortifiká . . . nan lo bringa kontra bo, ma nan lo no vense bo, pasobra ami ta ku bo pa libra bo,’ SEÑOR ta deklará.” ( Yer. 1:​18, 19) Ta ku bon motibu anto Yeremías a yama Yehova “mi fortalesa i mi fòrti, mi refugio den e dia di angustia.”​—⁠Yer. 16:⁠19.

¹⁵ Tuma nota ku Yehova a bisa Yeremías: “Ami ta ku bo.” E palabranan akí no ta duna bo un idea di loke bo por hasi ora un persona ku bo konosé tin mester di animashon? Ta bon pa sa ku un ruman òf un famia tin mester di animashon, pero e pregunta awor ta kon pa dun’é e animashon ku e tin mester. Hopi biaha, e mihó kos ku nos por hasi ta imitá loke Dios a hasi pa Yeremías, esta, simplemente ta huntu ku e persona afligí. Anto, na e momento apropiá, ekspresá palabranan di ánimo, pero sin bash’é ku palabra. Ku djis un par di palabra bon pensá bo por anim’é. No tin nodi di buska palabra bunita. Usa palabra simpel ku ta mustra bo interes, preokupashon i amor p’e. Palabranan asina sigur por tin bon efekto.​—⁠Lesa Proverbionan 25:⁠11.

13-19 DI MART

TESORONAN DI E PALABRA DI DIOS | YEREMÍAS 5-7

w88-S 1/4 11-12 §7-8

Yeremías, un Profeta Impopular di e Huisionan di Dios

⁷ Yehova a atvertí Yeremías: “I nan lo bringa kontra bo, ma nan lo no vense bo.” ( Yeremías 1:19) Pero, dikon e hudiunan i nan gobernantenan tabata ke bringa kontra e profeta akí? Pasobra su mensahe a saka na kla ku tur loke nan tabata buska tabata pa komplasé nan mes i ku nan adorashon tabata djis un formalidat. Yeremías a bisa bon kla: “Ata, e palabra di SEÑOR a bira un reproche pa nan; nan no tin delisia den dje. Pasobra for di esnan di mas chikitu te na esnan di mas grandi, tur ta golos pa ganashi; i for di profeta te saserdote [presisamente esnan ku mester a hasi sigur ku a kumpli ku normanan moral i spiritual], tur ta gañadó.”​—⁠Yeremías 6:​10, 13.

⁸ Ta bèrdat ku nan a guia e pueblo pa hasi sakrifisio. Pero, nan tabata ofresé sakrifisio na Yehova djis komo un rito; nan no tabata hasié di kurason. E ritualnan akí tabata mas importante pa nan ku hasi loke ta korekto. Ademas, e lidernan religioso hudiu tabata yaya e pueblo pa nan kere ku nan tabata protehá, bisando, “Pas, pas,” ora no tabatin pas. ( Yeremías 6:14; 8:11) Sí, nan a gaña e pueblo pa lag’é kere ku e tabata na pas ku Dios. Nan a pensa ku nan no tabatin nodi di preokupá, pasobra nan tabata e pueblo protehá di Yehova, nan tabatin e stat santu i e tèmpel. Pero, ta asina Yehova tabata mira e asuntu?

w88-S 1/4 12 §9-10

Yeremías, un Profeta Impopular di e Huisionan di Dios

⁹ Yehova a manda Yeremías pa para na entrada di e tèmpel, dilanti di tur hende, pa duna e adoradónan ku tabata drenta Su mensahe. E mester a bisa nan: “No konfia den palabranan engañoso ku ta bisa: ‘Esaki ta e tèmpel di SEÑOR, e tèmpel di SEÑOR, e tèmpel di SEÑOR’ . . . [e] no ta di probecho.” E hudiunan no tabata kana pa fe sino pa bista, miéntras ku nan tabata broma ku nan tèmpel. Nan a lubidá Yehova su palabranan di spièrtamentu: “Shelu ta mi trono, i tera ta e banki pa mi pia. Unda e kas ta anto ku abo por traha pa mi?” Sin importá kon glorioso e tèmpel tabata, Yehova, e Señor Soberano di henter universo no tabata limitá na nan tèmpel!​—⁠Yeremías 7:​1-8; Isaías 66:⁠1.

¹⁰ Yeremías a sigui ku su spièrtamentu fuerte públikamente: “Boso kier hòrta, mata, kometé adulterio, hasi huramentu falsu i ofresé sakrifisionan na Baal, i sigui tras di otro diosnan ku boso no tabata konosé, . . . i bisa: ‘Nos a wòrdu librá!’​—⁠pa asina boso por hasi tur e abominashonnan aki?” E hudiunan, komo Dios su ‘pueblo skohí,’ a pensa ku Yehova lo a tolerá kualke tipo di kondukta, basta ku nan a sigui hiba nan sakrifisionan na e tèmpel. Sinembargo, si nan a kere ku Yehova ta manera un tata sentimental ku ta mima su úniko yu malkriá, nan tabata gran kiboká.​—⁠Yeremías 7:​9, 10; Éksodo 19:​5, 6.

jr-S 21 §12

Sirbiendo den “e Último Dianan”

¹² Na kuminsamentu di e gobernashon di Yoakim, Yehova a bisa Yeremías pa bai na e tèmpel i deklará Su huisio kontra e hudiunan pa motibu di nan maldat. Nan tabata konsiderá e tèmpel di Yehova un talisman ku lo a protehá nan. Pero, si nan no a stòp di “hòrta, mata, kometé adulterio, hasi huramentu falsu i ofresé sakrifisionan na Baal, i sigui tras di otro diosnan,” Yehova lo a bandoná su tèmpel. I lo el a bandoná e hipókritanan ku tabata adorá den e tèmpel tambe, meskos ku el a hasi ku e tabernakel na Silo den e tempu di Sumo Saserdote Elí. E tera di Huda lo a “bira un ruina.” ( Yer. 7:​1-15, 34; 26:​1-6) Imaginá bo kuantu kurashi Yeremías mester tabatin pa deklará e mensahe ei! Probablemente el a hasi esei dilanti di hopi hende; algun di nan tabata hende importante i prominente. Den nos tempu, hopi di nos tambe a sinti ku nos tabatin mester kurashi pa partisipá den e trabou di prediká riba kaya òf pa papia ku hende riku òf importante. Pero, nos por ta sigur di esaki: Dios lo yuda nos meskos ku el a yuda Yeremías.​—⁠Heb. 10:39; 13:⁠6.

Buska Hoyanan Spiritual

w88-S 1/4 13 §15

Yeremías, un Profeta Impopular di e Huisionan di Dios

Huda Ta Paga e Preis

¹⁵ Rònt di aña 632 promé ku Kristu, Asiria a kai dilanti di e medonan i e kaldeonan, i Egipto a bira un potensia mas chikitu na zùit di Huda. E menasa real pa Huda lo a bini di e ruta di invashon di parti nort. Pues, Yeremías mester a duna e hudiunan un mal notisia! El a bisa: “Ata, un pueblo ta bini for di e tera di nort . . . nan ta kruel i sin miserikòrdia . . . bistí manera un hòmber prepará pa bataya kontra bo, o yu muhé di Sion.” E potensia mundial ku na e tempu ei tabata lantando kabes tabata Babilonia. Dios lo a us’é komo su hèrmènt pa kastigá e nashon infiel di Huda.​—⁠Yeremías 6:​22, 23; 25:​8, 9.

20-26 DI MART

TESORONAN DI E PALABRA DI DIOS | YEREMÍAS 8-11

it-2-S 633

Kònkòmber

Den kunuku hende tabatin e kustumber di pone pilá, staka i otro inventonan pa spanta animalnan. Profeta Yeremías a kompará e imágennan ku e nashon idólatra a traha ku e ophetonan sin bida akí ora el a menshoná e “spantapara den kunuku di kònkòmber.”​—⁠Yer 10:⁠5.

27 DI MART–2 DI APREL

TESORONAN DI E PALABRA DI DIOS | YEREMÍAS 12-16

jr-S 51 §17

Tene Kuidou pa Bo Kurason No Traishoná Bo

¹⁷ Pa Yeremías por a kumpli ku su asignashon, e mester a obedesé Dios su guia. Si abo tabata Yeremías, lo bo a sigui e instrukshonnan di Yehova? Na un dado momento, Yehova a bisa Yeremías pa kumpra un faha di lino i bistié. Despues, Dios a mand’é bai Riu Eufrates. Si bo wak riba un mapa, lo bo mira ku esei tabata un biahe di mas òf ménos 500 km. Unabes ku e tabata aya, Yeremías mester a skonde e faha den splet di un baranka i bolbe biaha henter e kaminda bèk pa Herúsalèm. Despues, Dios a mand’é bai bèk pa buska e faha. (Lesa Yeremías 13:​1-9.) Na tur, Yeremías a biaha mas òf ménos 1.900 km. Algun hende ku ta kritiká Beibel no por kere ku Yeremías a kana durante lunanan pa bai un lugá asina leu. (Èsd. 7:⁠9) Pero, ta esei Dios a mand’é hasi i esei ta loke Yeremías a hasi.

jr-S 52 §18

Tene Kuidou pa Bo Kurason No Traishoná Bo

¹⁸ Imaginá e profeta kanando den e serunan di Hudea i despues, dependiendo di su ruta, den un desierto pa yega Riu Eufrates. Tur esei, djis pa skonde un faha di lino! Su ousensia durante un periodo asina largu sigur lo mester a lanta e kuriosidat di su bisiñanan. Ora el a regresá, e no tabatin e faha di lino huntu kuné. Despues, Dios a bis’é pa bolbe hasi e biahe largu ei pa buska e faha di lino ku awor tabata tur dañá i “no tabata sirbi pa nada mas.” Lo por tabata fásil pa Yeremías pensa: ‘Esaki sí ta di mas. E kos akí no tin sentido.’ Sinembargo, komo ku Yeremías a laga Dios moldi’é, e no a reakshoná asina. En bes di keha, el a obedesé e guia di Yehova!

jr-S 52 §19-20

Tene Kuidou pa Bo Kurason No Traishoná Bo

¹⁹ Ta te despues di e di dos biahe Yehova a splika Yeremías e asuntu. Loke Yeremías a hasi a pone base pa e siguiente mensahe di peso: “E pueblo malbado akí, ku ta nenga di skucha mi palabranan, ku ta kana segun e kapricho di nan mes kurason i ta sigui tras di otro diosnan pa sirbi nan i pa bùig dilanti di nan, ta meskos ku e faha akí ku no ta sirbi pa nada mas.” ( Yer. 13:10) Ki un manera impreshonante di siña e pueblo! Yehova a usa e ehèmpel di Yeremías ku a obedesé di kurason algu ku a parse di poko importansia pa yega na kurason di su pueblo.​—⁠Yer. 13:⁠11.

²⁰ Awendia, Dios no ta manda nos kana sientos di kilometer pa e siña hende un lès. Pero, kisas, nos manera di bisti i nos aparensia, e tipo di enseñansa ku nos ke sigui, loke nos ta skohe komo karera òf asta e manera ku nos ta mira uso di alkohòl por lanta kuriosidat di nos bisiñanan i asta pone ku nan por kritiká nos. Abo ta dispuesto pa kumpli ku e instrukshonnan di Dios meskos ku Yeremías? Si bo laga Yehova moldia bo i bo tuma bon desishonnan, bo por duna un bon testimonio. En todo kaso, semper ta mihó pa obedesé e instrukshonnan di Yehova ku bo ta haña den su Palabra i pa medio di e esklabo fiel. En bes di laga bo kurason traishonero guia bo, imitá Yeremías. Sea determiná pa laga Dios moldia bo; lag’é forma bo pa bira un pòchi onorabel ku e por usa pa semper.

it-1-S 386 §2

Hep

Yehova a bisa ku Israel i Huda tabata manera un faha na su hep, asina pegá na dje, pa nan por a bira un alabansa i gloria p’e. ( Yer 13:11) Un profesia tokante e gobernashon di Hesukristu ta menshoná ku hustisia lo ta e faha rònt di su hep i ku fieldat lo ta e faha rònt di su sintura. Esaki kisas ta referí na e echo ku Hesukristu ta ehersé su outoridat komo Rei ku hustisia i fieldat, i e no ta kambia. Meskos ku un hende ta faha su mes p’e ta mas stabil, asina e kualidat di hustisia ta motivá Hesus pa tuma akshon komo Yehova su Hues nombrá.​—⁠Isa 11:​1, 5.

Buska Hoyanan Spiritual

jr-S 118 §11

Bo Ta Puntra Tur Dia: “Unda Yehova Ta?”

¹¹ E echo ku e malbadonan tabata prosperá tabata molestiá Yeremías. (Lesa Yeremías 12:​1, 3.) P’esei, sin kuestioná e hustisia di Yehova, e profeta a pidi un splikashon pa su “kaso.” E manera franko ku el a papia ku Dios a demostrá ku e tabatin un bon relashon kuné, meskos ku un mucha tin ku su tata stimá. Yeremías simplemente no por a komprondé dikon hopi hudiu tabata prosperá maske nan tabata malbado. Yeremías a haña un kontesta satisfaktorio? Sí, Yehova a dun’é e garantia ku lo el a ranka e malbadonan ku rais ku tur. ( Yer. 12:14) Segun ku Yeremías tabata mira kon Yehova tabata kontestá su orashonnan, su konfiansa den e hustisia di Dios tabata bira mas fuerte. Komo resultado, Yeremías tabata hasi mas orashon na Yehova pa ekspresá su preokupashonnan na su Tata.