Pastoreando cu Nos Magnífico Creador

“Jehova ta mi Pastor. Lo mi no falta nada. E ta refresca mi alma. E ta guiámi den laster di husticia pa causa di su nomber.”​—⁠SALMO 23:​1, 3.

 1. Cua refrescamento amoroso Jehova ta per­cura?

SALMO 23 ta un “melodía di David,” cu a refresca hopi alma fatigá. El a animánan pa tene e confianza expresá den versículo 6: “Siguramente husticia i bondad amoroso mes lo sigi tras di mi tur e dianan di mi bida; i lo mi biba den e cas di Jehova te na largura di dianan.” Bo deseo ta di biba pa semper den e cas di adoracion di Jehova, hunto cu su pueblo cu awor ta ser cosechá for di tur nacion? “E wardador i superintendente di boso alma,” nos Magnífico Creador, Jehova Dios, lo yudábo alcanza bo meta.​—⁠1 Pedro 2:⁠25.

 2, 3. (a) Con Jehova ta pastorea su pueblo amorosamente? (b) Di ki manera e “tao” di Jehova a aumenta dramáticamente?

² E Creador dje “cielo nobo i tera nobo” també ta Organizador i Superintendente Supremo dje congregacion cristian, e “cas di Dios.” (2 Pedro 3:13; 1 Timoteo 3:15) E ta mashá interesá den e pastoreamento di su pueblo, manera Isaías 40:​10, 11 ta bisa claramente: “Mira! Señor Soberano Jehova mes lo bini asta como un persona fuerte, i su braza lo ta gobernando pe. Mira! Su recompensa ta cuné, i e salario cu e ta paga ta dilanti dje. Lo e pastoreá su mes tao manera wardador di carné. Cu su braza lo e hunta hunto e lamchinan; i lo e híbanan den su pecho. Lo e guia cu cuidao esnan cu ta duna lechi.”

³ Den un sentido amplio, e “tao” ta inclui esnan cu a camna den e berdad cristian pa hopi aña i “lamchi” cu a ser recogí den tempo mashá reciente​—⁠tal como e gran cantidad cu ta ser bautizá awor den Africa i Oosteuropa. E braza fuerte i protector di Jehova ta recogénan na su pecho. Aunque nan tabata manera carné gedwal, awor nan a drenta den un relacion íntimo cu nan Dios i Wardador ­stimá.

E Wardador asociado di Jehova

 4, 5. (a) Ken ta e “wardador excelente,” i di ki manera profecía a siñala na ne? (b) Jesús ta supervisa cua trabao di separacion, i cu cua resultado sobresaliente?

⁴ Sirbiendo ne man drechi di su Tata den cielo, e “wardador excelente,” Jesucristo, també ta presta atencion compasivo ne “carnénan.” El a entrega su bida pa beneficiá, promé, e “trupa chikito” dje ungínan, anto den e dia djawe, e multitud grandi di su “otro carnénan.” (Lucas 12:32; Juan 10:​14, 16) E Gran Wardador, Jehova Dios, ta dirigi palabra na tur carné, bisando: “Atámi aki, mi mes, i siguramente lo mi huzga . . . entre carné i carné. I lo mi lanta riba nan un wardador, i e mester críanan, asta mi sirbidor David. E mes lo críanan, i e mes lo bira nan wardador. I ami, Jehova, lo bira nan Dios, i mi sirbidor David uno principal den nan. Ami, Jehova, a papia.”​—⁠Ezekiel 34:​20-24.

⁵ E nomber “mi sirbidor David” ta siñala proféticamente na Cristo Jesús, e “simía” cu ta hereda e trono di David. (Salmo 89:​35, 36) Den e dia aki di huicio dje nacionan, e Wardador i Rey asociado di Jehova, Cristo Jesús, e Yiu di David, ta sigi separa “carné” di ­humanidad for di hende cu ta pretende di ser “carné” pero cu en realidad ta “cabrito.” (Mateo 25:​31-33) E “solo wardador” ta ser lantá també pa cria e carnénan. Ki un cumplimento glorioso dje profecía nos ta mira awe! Mientras cu homber político ta papia tocante unimento di humanidad mediante un ordu nobo mundial, e solo Wardador en berdad ta uni e carnénan di tur nacion mediante un campaña di dunamento di testimonio na hopi idioma cu e organizacion terrenal di Dios so por efectuá.

 6, 7. Di ki manera e “sclabo fiel i prudente” ta percura pa “alimento ne tempo apropiado” ta disponibel pe carnénan?

⁶ Mientras cu e mensahe di Reino ta sigi yega te na territorio nobo, e “sclabo fiel i prudente” di cristian ungí cu e solo Wardador a comisioná, ta haci tur loke ta posibel pa manda “alimento ne tempo apropiado” na tal lugar. (Mateo 24:45) Hopi dje 33 drukkerij dje Sociedad Watch Tower den tur e mundo ta aumenta produccion pa satisface e necesidad pa mas i mihor revista i buki di estudio bí­blico.

⁷ E Cuerpo Gobernante di Testigo di Jehova ta haci nan posibel pa mehora e calidad di traduccion na mas cu 200 idioma i cuminza traduccion na mas idioma cu ta necesario pa alcanza tur e campo mundial. Esei ta yuda cumpli cu e comision cu Jesús a duna su disípelnan den Echo 1:8: “Boso lo recibi poder ora e spiritu santo ta yega riba boso, i boso lo ta testigo di mi . . . te ne parti mas lehano dje tera.” Además, e Traducción del Nuevo Mundo de las Santas Escrituras, ya traducí completamente of en parti na 14 idioma, ta ser traducí awor na 16 otro idioma di Europa, Africa, i di Oriente.

Disfrutando dje “paz di Dios”

 8. Di ki manera e carnénan ta ser bendicioná ricamente debí ne pacto di paz cu Jehova a cera cu nan?

⁸ Mediante su solo Wardador, Cristo Jesús, Jehova Dios ta cera un “pacto di paz” cu su carnénan bon alimentá. (Isaías 54:10) Eherciendo fe den e sanger dramá di Jesús, e carnénan por camna den e luz. (1 Juan 1:⁠7) Nan ta disfruta dje ‘paz di Dios cu ta supera tur pensamento i cu ta warda nan curazón i facultad mental mediante Cristo Jesús.’ (Filipense 4:⁠7) Manera Ezekiel 34:​25-28 ta sigi bisa, Jehova ta hunta su carnénan hunto den un paradijs spiritual, un estado deleitable di siguridad, prosperidad refrescante, i productividad. E Wardador amoroso ta bisa di su carnénan: “Nan lo tin cu sa cu mi ta Jehova ora mi ta kibra bara di nan yugo i ta líbranan for di man di esnan cu a úsanan como esclabo. I nan lo no bira mas algo pa plunder pe nacionan; . . . i nan realmente lo biba den siguridad, sin ningun hende pa hácinan tembla.”

 9. Cua oportunidad a presenta pe pueblo di Dios como resultado di ‘kibramento di bara’?

⁹ Ya caba, den aña reciente, Testigo di Jehova den hopi país a experimenta kibramento di “bara di nan yugo.” Nan ta liber pa predica como nunca na antes. I laga nos tur, den tur país, usa sabiamente e siguridad cu Jehova Dios ta percura mientras cu nos ta forza padilanti pa caba e trabao. Ki siguranza Jehova Dios ta dúnanos mientras cu nos ta yega cerca e tempo dje tribulacion di mas grandi cu humanidad hamás lo mira!​—⁠Daniel 12:1; Mateo 24:​21, 22.

10. Ken Jehova a percura pa yuda Cristo Jesús, e Wardador Excelente, i kico apóstol Pablo a bisa na algun di eseinan?

¹⁰ Haciendo preparacion pe dia di su vinganza contra hende malbado, Jehova Dios a percura subwardador pa yuda e Wardador Excelente, Cristo Jesús, cuida e tao. Nan ta ser pintá den Revelacion 1:16 como un número completo di “siete strea” den e man drechi di Jesús. Den e promé siglo, apóstol Pablo a papia cu un grupo representativo di tal subwardador, bisando: “Presta atencion na boso mes i na tur e tao, den locual e spiritu santo a nombra boso superintendente, pa pastorea e congregacion di Dios, cu el a cumpra cu e sanger di su mes Yiu.” (Echo 20:28) Awe, tin diez di miles di subwardador cu ta sirbi den 69.558 congregacion den tur e mundo.

Adelante, subwardador!

11. Con algun wardador tabatin éxito hibando e delantera den territorio cu ta ser cubrí frecuentemente?

¹¹ Den hopi lugar tal wardador tin cu hiba e delantera den territorio cu a ser cubrí bez tras bez durante e último dianan aki. Kico nan por haci pa anima e tao pa sigi predica cu entusiasmo? Tal wardador ta digno di encomendacion pa loke nan a haci, i un manera cu nan a logra haci esei tabata di anima e tao pa bira pionero auxiliar of regular. Hopi wardador mes ta participa den tal sirbishi, i asta publicador cu no por haci esei a demonstra e spiritu di pionero i ta sirbi cu un gozo cu ta yuda vence apatía den e territorio. (Salmo 100:​2; 104:​33, 34; Filipense 4:​4, 5) Asina, mientras cu mundo ta den e gara di maldad i ta cerca anarquía, hopi hende semehante di carné ta acepta e speranza dje Reino.​—⁠Mateo 12:​18, 21; Romano 15:⁠12.

12. Cua problema serio ta existi den territorio cu tin aumento rápido, i kico a ser hací aveces den tal circunstancia?

¹² Un otro problema ta cu hopi bez no tin suficiente wardador capaz pa cuida e tao. Unda cu tin aumento rápido, manera na Oosteuropa, tin hopi congregacion nobo sin ningun anciano nombra. Carné boluntario ta acepta e responsabilidad, pero nan ta falta experencia, i yudanza ta necesario pa entrená e cantidad di carnénan cu ta yena e congregacion. Den país tal como Brasil, México, i Zaire, unda e aumento ta rápido, nan tin cu usa testigo basta hoven pa organiza e sirbishi i entrená otro hende nobo. Pionero ta duna bon yudanza, i esei ta un oportunidad pa hermana entrená hermana nobo. Cu su spiritu, Jehova Dios ta bendiciona e resultado. E aumento ta sigi bini.​—⁠Isaías 54:​2, 3.

13. Siendo cu e cosecha ta asina grandi, kico Testigo di Jehova mester pidi? (b) Con oracion dje pueblo di Dios tabata contestá promé cu e segundo gera mundial i durante dje?

¹³ Den país unda cu e trabao di predicá ta bon fundá, den país unda restriccion a wordu kitá recientemente, i den territorio basta nobo, e palabra di Jesús den Mateo 9:​37, 38 ta aplica ainda: “Sí, e cosecha ta grandi, pero trahador ta poco. P’sei, pidi e Doño dje cosecha manda trahador ne cosecha.” També, nos tin cu pidi Jehova Dios lanta mas wardador. El a demonstra caba cu e por haci esei. Promé cu Gera Mundial II i durante dje, dictador cruel manera asirio a purba di extermina Testigo di Jehova. Pero contestando nan oracion, Jehova a refina nan organizacion, a hacié berdaderamente teocrático, i a percura “wardador” necesario.a Esei tabata di acuerdo cu e profecía: “En cuanto asirio, ora nan ta drenta den nos país i ora nan ta pisa riba nos toren di habitacion, nos també tin cu lanta contra nan siete wardador, sí, ocho cabezante di humanidad”​—⁠asta mas cu suficiente anciano dedicá pa hiba e delantera.​—⁠Miqueas 5:⁠5.

14. Cua necesidad sobresaliente ta existi den e organizacion, i cua animacion ta ser duná na hermano?

¹⁴ Tin un gran necesidad pa tur homber bautizá forza pa alcanza mas privilegio. (1 Timoteo 3:⁠1) E situacion ta urgente. E fin dje sistema aki ta yegando lihé. Manera Habacuc 2:3 ta bisa: “E vision ta pe tempo siñalá ainda, i ta sigi anshá te ne fin, i no ta gaña. . . . Sin falta, lo e ser realizá. Lo e no yega laat.” Ruman hombernan, boso por forza pa cumpli cu requisito pa recibi mas privilegio den e trabao di pastoreá​—⁠promé cu e fin ta yega?​—⁠Tito 1:​6-9.

Pastoreamento teocrático

15. Di ki manera e pueblo di Jehova ta un teocrácia?

¹⁵ Pa participa plenamente den e expansion dje organizacion di Jehova Dios, su pueblo tin cu tene un punto di bista teocrático di asuntonan. Con nan por haci esei? Wel, kico kier men e palabra “teocrático”? Segun e diccionario Vox, “teocrácia” kier men un “gobernacion cu Dios ta dirigi directamente.” Ta den e sentido ei cu e “nacion santo” dje pueblo di Jehova Dios ta un teocrácia. (1 Pedro 2:9; Isaías 33:22) Como miembro of asociado den e nacion teocrático, cristian berdadero tin cu biba i sirbi den obedencia ne Palabra di Dios i na principio di dje.

16. Básicamente, con nos por demonstra cu nos ta teocrático?

¹⁶ Apóstol Pablo a splica claramente den ki sentido hende cristian mester ta teocrático. Promé, el a bisa cu nan “mester bisti e personalidad nobo cu a wordu creá conforme cu e boluntad di Dios den berdadero husticia i lealtad.” E personalidad di hende cristian mester ta moldeá conforme cu principio husto di Dios skirbí den su Palabra. Nan mester ta leal na Jehova Dios i na su ley. Despues di a ilustra con pa haci esei, Pablo a urgi: “Bira imitador di Dios, manera yiunan stimá.” (Efesio 4:24–5:⁠1) Manera yiu obediente, nos tin cu imita Dios. Esei ta berdadero teocrácia den accion, demonstrando cu Dios en berdad ta gobernános!​—⁠Mira també Colosense 3:​10, ­12-14.

17, 18. (a) Cristian teocrático ta imita cua calidad sobresaliente di Dios? (b) Ora Jehova a papia cu Moisés, con el a duna énfasis na Su calidad primario, pero el a duna cua advertencia també?

¹⁷ Cua ta e calidad principal di Dios cu nos mester imita? Apóstol Juan a contestá den 1 Juan 4:8 ora el a bisa: “Dios ta amor.” Ocho versículo despues, den versículo 16, el a repiti e sigiente principio vital: “Dios ta amor, i ken cu ta permanece den amor ta permanece den union cu Dios i Dios ta permanece den union cuné.” E Gran Wardador, Jehova Dios, ta e personificacion di amor. Wardador teocrático ta imita Jehova Dios demonstrando amor profundo pa su carnénan.​—⁠Compara cu 1 Juan 3:​16, 18; 4:​7-11.

¹⁸ E Gran Teócrata a revela su mes na Moisés como “Jehova, Jehova, un Dios misericordioso i gentil, tardá pa rabia i abundante den bondad amoroso i berdad, conserbando bondad amoroso pa miles, pordonando error i delito i picá, pero di ningun manera lo e duna vrijstelling for di castigo, mandando castigo pa error di tata riba yiu i riba nieto, riba e tercera generacion i riba e cuarto generacion.” (Éxodo 34:​6, 7) Asina Jehova a enfatizá varios aspecto di su sobresaliente calidad teocrático, amor, mientras cu el a adverti firmemente cu lo e castiga hende pa error ora nan ta merece esei.

19. Distinto cu fariseo, con wardador cristian mester actua na moda teocrático?

¹⁹ Kico kier men ser teocrático pa esnan cu tin puesto di responsabilidad den e organizacion? Jesús a bisa di scriba i fariseo di su dia: “Nan ta mara carga pisá i ta pónenan riba scouder di hende, pero nan mes no kier móvenan ni cu nan dede.” (Mateo 23:⁠4) Ki opresivo i falta di amor! Berdadero teocrácia, of gobernacion di Dios, ta exigi pastoreamento dje tao, aplicando principio bíblico amoroso, sin cansa e carnénan cu regla humano sin fin. (Compara cu Mateo 15:​1-9) Ne mesun tempo, wardador teocrático mester imita Dios suplementando na nan amor un firmeza pa mantene e pureza dje congregacion.​—⁠Compara cu Romano 2:11; 1 Pedro 1:⁠17.

20. Wardador teocrático ta reconoce cua arreglo dje organizacion?

²⁰ Wardador berdadero ta reconoce cu durante e último dianan aki, Jesús a nombra su esclabo fiel i prudente riba tur su pertenencia i cu e spiritu santo ta dirigi tal esclabo pa nombra anciano pa pastoreá e carnénan. ­(Mateo 24:​3, 47; Echo 20:28) P’sei, pa ser teocrático, nan tin cu tene respet profundo pe esclabo, pa arreglo dje organizacion cu e esclabo a establece, i pe arreglo di anciano den e congregacion.​—⁠Hebreo 13:​7, 17.

21. Jesús a pone cua ehempel excelente pa subwardador?

²¹ Jesús mes a pone un ehempel excelente, acudiendo constantemente na Jehova Dios i na su Palabra pa guiamento. El a bisa: “Mi no por haci ni un solo cos di mi mes iniciativa; mi ta huzga segun cu mi ta tende; i e huicio cu mi ta haci ta husto, pasobra mi no ta busca mi mes boluntad, sino e boluntad di esun cu a mandámi.” (Juan 5:30) Subwardador di Señor Jesucristo mester cultiva un actitud humilde similar. Si un anciano semper ta busca e guiamento dje Palabra di Dios, mescos cu Jesús a haci, anto e ta berdaderamente teocrático.​—⁠Mateo 4:​1-11; Juan 6:⁠38.

22. (a) Di ki manera nos tur mester forza pa ser teocrático? (b) Cua invitacion bondadoso Jesús a duna e carnénan?

²² Hermano bautizá, forza pa cumpli cu requisito pa privilegio den e congregacion! Boso tur, carné stimá, forza pa ser teocrático, imitando Dios i Cristo demonstrando amor! Laga tanto wardador como e tao alegrá pasobra nan a acepta e invitacion di Jesús: “Bini cerca mi, boso tur cu ta afaná i cargá, i lo mi refresca boso. Tuma mi yugo riba boso i siña di mi, pasobra mi ta di genio suave i humilde di curazón, i boso lo haya refrescamento pa boso alma. Pasobra mi yugo ta suave i mi carga ta lihé.”​—⁠Mateo 11:​28-30.

[Footnotes]

Bo por splica?

◻ Kico ta e “tao” di Jehova, i ken e ta inclui?

◻ Con Jesús a hunga e papel dje “wardador excelente” den e promé siglo, i den e dia djawe?

◻ Subwardador ta hunga cua papel clave cuidando e tao?

◻ Splica e nificacion fundamental dje palabra “teocrácia”?

◻ Con hende cristian​—⁠specialmente subwardador​—⁠mester comportánan pa ser teocrático?

[Picture on page 22]

Manera un wardador deboto, Jehova Dios ta cuida su tao

[Picture on page 23]

Imitando Jehova Dios demonstrando su calidad di amor ta teocrácia den accion