E Victoria Final di Miguel, e Gran Prinz

“Durante e tempo ei Miguel lo lanta, e gran prinz cu ta defende yiu di bo pueblo.”—DANIEL 12:1.

“KEN ta Jehova, di manera cu mi mester obedece su boz i manda Israel bai?” (Éxodo 5:2) Esei tabata e palabra desafiador di faraó dirigí na Moisés. Faraó a nenga di reconoce e divinidad supremo di Jehova Dios, i a keda determiná di tene Israel den sclabitud. Otro gobernante també a demonstra desprecio similar pa Jehova, i rey dje profecía di Daniel no ta diferente. (Isaías 36:13-20) Realmente, e rey di nort a bai mas leu. E angel a bisa: “Lo e halza su mes i engrandece su mes mas halto cu tur dios; i lo e papia cosnan maraviyoso contra e Dios di diosnan. . . . I lo e no duna ningun consideracion ne Dios di su tatanan; i lo no duna ningun consideracion ne deseo di hende muher ni na tur otro dios, sino lo engrandece su mes riba tur hende.”—Daniel 11:36, 37.

² Cumpliendo cu e palabra profético ei, e rey di nort a rechaza e “Dios di su tatanan” (of, “dios di su antepasadonan,” The New English Bible) aunque nan ta dios pagano di Roma of e divinidad trinitario di cristiandad. Hitler a usa cristiandad pa su mes propósito pero evidentemente a planeá pa reemplazé cu un religion nobo alemán. E sucesor dje rey di nort a promove ateísmo abierto. Asina e rey di nort a haci su mes dios, ‘engrandeciendo su mes riba tur hende.’

³ E profecía ta sigi: “Lo e duna gloria ne dios di fortaleza, den su posicion; i lo e duna gloria na un dios cu su tatanan no a conoce pa medio di oro i pa medio di plata i pa medio di piedra precioso i pa medio di cosnan deseabel.” (Daniel 11:38) Realmente, e rey di nort a pone su confianza den militarismo científico moderno, “e dios di fortaleza.” Durante tur e tempo di fin, el a busca salbacion mediante tal “dios,” sacrificando mashá riqueza riba su altar.

⁴ “Lo e actua efectivamente contra fortaleza di mas fortificá, hunto cu un dios stranhero. Ken cu a duné reconocimento lo e haci abunda cu gloria, i lo e realmente hácinan goberna entre hopi hende; i lo e partí e tera pa un prijs.” (Daniel 11:39) Confiando den su “dios stranhero” militarista, e rey di nort a actua mashá “efectivo,” resultando di ser un poder militar formidable durante e “último dianan.” (2 Timoteo 3:1) Hende cu a apoya su ideología tabata recompensá cu apoyo político, financiero, i aveces militar.

“Den e tempo di fin”

⁵ Daniel 11:40a ta bisa: “Den e tempo di fin e rey di zuid lo enbolbe su mes cuné den un pushamento.” Esei i versículo sigiente a ser considerá como teniendo un cumplimento den nos futuro. Sin embargo, si “e tempo di fin” ta nifica e mesun tempo di Daniel 12:4, 9, nos mester busca cumplimento dje palabra durante tur e último dianan. E rey di zuid a ‘pusha’ e rey di nort durante e tempo aki? Sí, di tur manera. Despues dje promé gera mundial, e pacto di paz castigador siguramente tabata un ‘pushamento,’ un provocacion na vinganza. Despues di su victoria den e segundo gera mundial, e rey di zuid a apunta arma nuclear spantoso riba su rival i a organiza contra dje un alianza militar fuerte, OTAN. Cu pasamento dje añanan, su “pushamento” a inclui espionahe di alta tecnología i també ofensivo diplomático i militar.

⁶ Con e rey di nort a reacciona? “E rey di nort lo lanza su mes contra dje manera tempestad cu garoshi i cu ginete i cu hopi barcu; i lo e siguramente drenta den país i inunda i pasa dilanti.” (Daniel 11:40b) E historia dje último dianan a destaca expansionismo dje rey di nort. Durante e segundo gera mundial, e “rey” nazista a pasa manera diluvio riba frontera i a drenta den país alrededor. Na cabamento dje gera, e “rey” sucesor a traha un imperio fuerte pafó di su mes frontera. Durante e Gera Friu, e rey di nort a bringa contra su rival, dunando apoyo na nacion bringando contra otro, a instiga rebelion den Africa, Asia, i Latino-américa. El a persigi cristian berdadero, limitando (pero di ningun manera parando) nan actividad. I su ofensivo militar i político a pone varios país bao di su control. Esei ta exactamente loke e angel a profetiza: “E també lo realmente drenta den e tera dje Decoracion [estado spiritual dje pueblo di Dios], i lo tin hopi país hací trompicá.”—Daniel 11:41a.

⁷ No obstante, aunque—desde e punto di bista di su rival—e rey di nort a presenta como un peliger tur camina, e no a alcanza dominacion di mundo. “Esakinan ta esnan cu lo scapa for di su man, Edom i Moab i e parti principal dje yiunan di Ammón.” (Daniel 11:41b) Den tempo di antigua, Edom, Moab, i Ammón tabata situá mas o menos entre Egipto i Siria. Nos por identificánan pa representa nacion i organizacion djawe cu e rey di nort a pone riba lista pero no por a domina.

‘Egipto lo no scapa’

⁸ E angel a sigi bisa: “Lo e sigi saca su man contra e paísnan; i en cuanto e tera di Egipto, lo e no resulta di ser uno cu ta scapa. I lo e realmente goberna riba tesoro scondí di oro i plata i riba tur cos deseabel di Egipto. I libio i etiopio lo bai den paso di dje.” (Daniel 11:42, 43) Asta e rey di zuid, “Egipto,” no a scapa for di efecto di política expansionista dje rey di nort. E rey di zuid a sufri, por ehempel, di un derota notable den Vietnam. I kico di “libio i etiopio”? Den un sentido geográfico, tal beciña di Egipto di antigua por wel simboliza nacion cu ta beciña di “Egipto” moderno i cu aveces tabata sigidor di ‘paso di dje,’ e rey di nort.

⁹ E rey di nort a goberna ‘tesoro scondí di Egipto’? Wel, e siguramente no a vence e rey di zuid, i te na 1993 e situacion mundial ta haci improbable cu lo e haci esei. Pero, e tin un influencia fuerte riba e manera cu e rey di zuid ta usa su recurso financiero. Debí na miedu di su rival, e rey di zuid a dedica suma di placa enorme tur aña na mantenecion di un ehército, flotilla naval, i forza aéreo formidable. Te ne grado ei, nos por bisa cu e rey di nort a ‘goberna’ of a controla gastamento di riqueza dje rey di zuid.

Campaña final dje rey di nort

¹⁰ E rivalidad entre e dos rey ta sigi indefinitivamente? No. E angel a bisa Daniel: “Lo tin informe cu lo molestiá [e rey di nort], biniendo for di salimento di solo i for di nort, i lo e siguramente sali cu un gran rabia pa extermina i dedica hopi hende na destruccion. I lo e span su tent palacial entre lamá grandi i e montaña santo dje Decoracion; i lo e tin cu yega asta na su fin, i lo no tin yudante pé.”—Daniel 11:44, 45.

¹¹ Tal suceso ta den e futuro ainda, di manera cu nos no por bisa en detaye con e profecía lo ser cumplí. Recientemente, e situacion político en cuanto e dos rey a cambia. E rivalidad severo entre Estados Unidos i país di Oosteuropa a fria. Además, e Union Soviética tabata liquidá na 1991, i no ta existi mas.—Mira número di E Toren di Vigilancia di 1 di Mart di 1993, bladji 4, 5.

¹² Pues, ken ta rey di nort awor? E mester ta identificá cu un país cu tabata un parti dje Union Soviética bieu? Of, e ta cambia su identidad completamente, mescos cu el a haci varios bez na antes? Nos no por bisa. Ken lo ser rey di nort ora Daniel 11:44, 45 ta ser cumplí? Rivalidad entre e dos rey lo lanta di nobo? I, kico di bodega enorme di arma nuclear cu ta existi ainda den varios país? Tempo so por duna contesta pa tal pregunta.

¹³ Nos sí sa un cos. Pronto, e rey di nort lo lanza un campaña ofensivo cu lo ser provocá pa “informe cu lo molestié, desde salimento di solo i desde e nort.” E campaña lo sosode net promé cu su “fin.” Nos por siña mas tocante tal “informe” si nos ta considera otro profecía bíblico.

¹⁴ Sin embargo, ripara promé cu e no ta bisa cu tal accion di rey di nort ta contra e rey di zuid. E no ta yega su fin den man di su rival grandi. Di igual manera, e rey di nort no ta destrui e rey di zuid. E rey di zuid (representá den otro profecía como e cachu final pa presenta riba un bestia salbahe) ta ser destruí “sin man [humano]” mediante e Reino di Dios. (Daniel 7:26; 8:25) Realmente, e Reino di Dios ta destrui tur rey terrenal finalmente den e bataya di Armagedón, i ta parce cu esei ta loke ta pasa e rey di nort. (Daniel 2:44; 12:1; Revelacion 16:14, 16) Daniel 11:44, 45 ta detayá suceso resultando den e bataya final. No ta straño cu “lo no tin yudante” ora e rey di nort ta topa cu su fin!

¹⁵ Pues, cua ta otro profecía cu ta ilumina “informe” cu ta provoca e rey di nort di sali pa “dedica hopi hende na destruccion”? I ken ta e “hopi hende” cu e kier destrui?

Un informe desde salimento di solo

¹⁶ Promé cu e bataya final di Armagedón, un enemigo grandi di adoracion berdadero tin cu ser destrui, esta, Babilonia e Grandi semehante di un muher di mala bida, esta, e imperio mundial di religion falso. (Revelacion 18:3-8) E bashamento di conchi di seis dje rabia di Dios riba e rio simbólico di Eufrates ta simboliza su destruccion. E rio ta seca “pa prepara e camina pa rey for di salimento di solo.” (Revelacion 16:12) Eseinan ta cua rey? Ningun otro sino Jehova Dios i Jesucristo!a

¹⁷ Detaye gráfico ta ser duná dje destruccion di Babilonia e Grandi den e buki di Revelacion: “E diez cachu cu bo a mira [‘rey’ gobernando ne tempo di fin], i e bestia salbahe [e bestia salbahe di color scarlata, cu ta representa e organizacion di Naciones Unidas], eseinan lo odia e muher di mala bida i lo hacié desolá i desnudo, i lo come su carni i kimé completamente cu candela.” (Revelacion 17:16) En berdad, e nacionan ‘ta destrui hopi carni’! (Daniel 7:5) Pero, pakico e gobernantenan, incluyendo e rey di nort, ta destrui Babilonia e Grandi? Pasobra ‘Dios ta hinca den nan curazón di cumpli cu su pensamento.’ (Revelacion 17:17) E informe “desde salimento di solo” por wel referi na tal acto di Jehova, ora, ne manera cu e ta scoge, e ta hinca den e curazón di lider humano pa extermina e gran ramera religioso.—Daniel 11:44.

Un informe desde nort

¹⁸ Pero, tin un otro punto di atake pe rabia dje rey di nort. E angel a bisa cu lo e “span su tent palacial entre lamá grandi i e montaña santo di Decoracion.” (Daniel 11:45) Den e tempo di Daniel, e lamá grandi tabata Lamá Mediterráneo, i e montaña santo tabata Sion, cu na antes tabata e sitio dje tempel di Dios. P’sei, den e cumplimento dje profecía, e rey furioso di nort ta conduci un campaña militar contra e pueblo di Dios! Den un sentido spiritual awe, “entre lamá grandi i e montaña santo” ta situa e rey di nort den e estado spiritual di sirbidor ungí di Dios, cu a sali foi “lamá” di humanidad alehá foi Dios i cu tin e speranza di reina riba e Ceru di Sion celestial cu Jesucristo.—Isaías 57:20; Hebreo 12:22; Revelacion 14:1.

¹⁹ Ezekiel, un profeta contemporario cu Daniel, també a profetiza di un atake riba e pueblo di Dios “den e parti final dje dianan.” El a bisa cu Gog di Magog, cu ta representa Satanás e Diabel, lo iniciá e atake. (Ezekiel 38:16) Simbólicamente, for di cua direccion Gog ta bini? Mediante Ezekiel, Jehova a bisa: “Lo bo siguramente bini di bo lugar, for di parti mas remoto di nort.” (Ezekiel 38:15) P’sei, e informe “desde nort” por wel ta e propaganda di Satanás pa provoca e rey di nort i tur otro rey pa ataca e pueblo di Jehova Dios.b—Compara cu Revelacion 16:13, 14; 17:14.

²⁰ Gog ta organiza tal atake total pa motibo dje prosperidad dje “Israel di Dios,” cu, hunto cu e multitud grandi di otro carné, no ta parti di su mundo mas. (Galatio 6:16; Juan 10:16; 17:15, 16; 1 Juan 5:19) Gog ta wak cu desprecio e “pueblo cu a ser recogí for dje nacionan, pueblo cu ta acumula riqueza i propiedad [spiritual].” (Ezekiel 38:12; Revelacion 5:9; 7:9) Na cumplimento dje palabra, e pueblo di Jehova ta prospera awe mas cu nunca na antes. Den hopi país den Europa, Africa, i Asia unda nan tabata prohibí na antes, awor nan ta adora libremente. Entre 1987 i 1992, hopi mas cu un miyón “cosnan deseabel” a sali for dje nacionan pa drenta den e cas di Jehova dje adoracion berdadero. Spiritualmente, nan ta ricu i pacífico.—Ageo 2:7; Isaías 2:2-4; 2 Corintio 8:9.

²¹ Considerando e estado spiritual cristian como “cunucu abierto di campo” fácil pa domina, Gog ta haci un esfuerzo supremo pa elimina tal obstáculo pa su dominacion total di humanidad. (Ezekiel 38:11) Pero, e ta faya. Ora rey di mundo ta ataca e pueblo di Jehova Dios, nan ‘lo yega asta na nan fin.’ Di ki manera?

Un tercer rey

²² Ezekiel a bisa cu e atake di Gog ta e siñal pa Jehova Dios lanta pa defende su pueblo i destrui ehército di Gog “riba montaña di Israel.” (Ezekiel 38:18; 39:4) Esei ta hácinos corda loke e angel a bisa Daniel: “Durante e tempo ei Miguel lo lanta, e gran prinz cu ta defende yiu di bo pueblo. I siguramente lo sosode un tempo di angustia tal como no a wordu hací sosode desde cu a yega di existi un nacion te ne tempo ei. I durante e tempo ei bo pueblo lo scapa, tur locual ta ser hayá skirbí den e buki.”—Daniel 12:1.

²³ Na 1914, Jesús—e guerrero celestial Miguel—a bira Rey dje Reino celestial di Dios. (Revelacion 11:15; 12:7-9) Desde e tempo ei, el a para ‘pa defende yiu dje pueblo di Daniel.’ Pero, pronto lo e “lanta” den e nomber di Jehova como un Rey-Guerrero invencible, treciendo “vinganza riba esnan cu no ta conoce Dios i esnan cu no ta obedece e bon nobo tocante nos Señor Jesús.” (2 Tesalonicense 1:8) Tur nacion di mundo, incluyendo rey dje profecía di Daniel, lo “bati nan mes den lamentacion.” (Mateo 24:30) Cu mal pensamento den nan curazón ainda contra e ‘pueblo di Daniel,’ nan lo perece pa semper den man di ‘Miguel, e gran prinz.’—Revelacion 19:11-21.

²⁴ Nos no ta anhela di mira e triunfo grandi di Miguel i di su Dios, Jehova? Pasobra tal victoria lo nifica “escape,” sobrebibencia, pa cristian berdadero. (Compara cu Malaquías 4:1-3.) P’sei, mirando den futuro cu anticipacion anhelante, nos ta corda e palabra di apóstol Pablo: “Predica e palabra, ocupábo den dje urgentemente den tempo favorable, i den tempo dificultoso.” (2 Timoteo 4:2) Láganos mantene un gara firme riba e Palabra di bida i diligentemente busca e carnénan di Jehova mientras cu e tempo favorable ta sigi. Nos ta cerca e fin dje carreda pa bida. E recompensa ta na bista. Láganos tur keda determiná di perseverá te ne fin i asina ser hunto cu esnan cu lo ser salbá.—Mateo 24:13; Hebreo 12:1.

[Footnotes]

Bo Ta Comprende?

◻ Di ki manera e rey di zuid a pusha e  rey di nort durante tur e tempo di fin?

◻ Kico nos tin cu siña ainda tocante e resultado dje rivalidad entre e dos rey?

◻ Cua dos suceso promé cu Armagedón siguramente lo enbolbe e rey di nort?

◻ Con ‘Miguel, e gran prinz,’ lo proteha e pueblo di Dios?

◻ Con nos mester reacciona na nos estudio dje profecía di Daniel?

[Study Questions]

 1. Hopi gobernante di mundo ta manifesta cua actitud en cuanto e soberanía di Jehova Dios, i di ki manera e rey di nort no ta diferente?

2, 3. Di ki manera e rey di nort a rechaza e “Dios di su tatanan” na fabor di adoracion di un otro “dios”?

 4. E rey di nort a tene cua éxito?

5, 6. Di ki manera e rey di zuid a “pusha,” i con e rey di nort a reacciona?

 7. Cua límite tabatin pe expansionismo dje rey di nort?

8, 9. Di ki manera e nacionan a sinti e influencia dje rey di nort, i asta su rival principal també?

10. Ki detaye e angel a duna dje fin dje rivalidad entre e dos rey?

11, 12. Cua suceso político reciente ta toca e rivalidad entre e rey di nort i e rey di zuid, i kico nos tin cu siña ainda?

13, 14. Kico nos sa dje futuro dje dos rey?

15. Cua pregunta importante ta keda pa nos consideracion?

16. (a) Cua suceso sobresaliente mester yega promé cu Armagedón? (b) Ken ta “rey for di salimento di solo”?

17. (a) Kico e Bijbel ta bísanos tocante e destruccion di Babilonia e Grandi? (b) E informe “desde salimento di solo” por resulta di ser kico?

18. E rey di nort tin cua otro punto di atake, i unda esei ta situá e rey di nort ora e ta yega su fin?

19. Segun cu e profecía di Ezekiel ta indica, con nos por identifica e informe cu ta provoca e atake di Gog? (Mira nota.)

20, 21. (a) Pakico Gog lo provoca e nacionan, incluyendo e rey di nort, pa ataca e pueblo di Dios? (b) Su atake lo tene éxito?

22, 23. Ora Gog ta ataca, ken ta para pa defende e pueblo di Dios, i cu cua resultado?

24. E estudio aki dje profecía di Daniel mester tene cua efecto riba nos?

[Pictures on page 19]

E rey di nort a adora un dios distinto di dios di rey promé cuné

[Credit Line]

Ariba links i meimei: UPI/Bettmann; abao links: Reuters/Bettmann; abao rechts: Jasmin/Gamma Liaison