Capitulo 4
Jesucristo—E Clave pa e Conocimentu di Dios
1, 2. Con e religionnan di mundu a konkel cu e yabi pa yega n’e conocimentu di Dios?
BO TA pará n’e porta di bo cas, bringando cu bo yabinan. Ta scur i friu, i bo ta purá pa drenta paden—pero e yabi no kier habri e porta. E ta parce esun bon, tog e lok no kier move. Ki frustrante! Bo ta bolbe wak bo yabinan. Bo ta usando esun corecto? Un hende lo a daña e yabi?
2 Esei ta un ilustracion apropiado di loke e confusion religioso di e mundu aki a haci cu e conocimentu di Dios. En realidad, hopi a konkel cu e yabi cu ta habri nos comprendimentu di dje—Jesucristo. Algun religion a kita e yabi, ignorando Jesus totalmente. Otronan a troce Jesus su rol adorand’e como e Dios Todopoderoso. Di tur manera, e conocimentu di Dios ta cerá pa nos sin un comprendimentu exacto di e figura principal aki, Jesucristo.
3. Pakico Jesus por ser yamá e clave pa e conocimentu di Dios?
3 Kisas bo ta corda cu Jesus a bisa: “Esaki ta nificá bida eterno, nan ganando conocimentu di bo, e único Dios berdadero, i di esun cu bo a manda, Jesucristo.” (Juan 17:3) Bisando esaki, Jesus no tabata bromando. E Scritura repetidamente ta enfatisá e necesidad di conocimentu exacto di Cristo. (Efesionan 4:13; Colosensenan 2:2; 2 Pedro 1:8; 2:20) “Di [Jesucristo] tur e profetanan ta duna testimonio,” apostel Pedro a remarcá. (Echonan 10:43) I apostel Pablo a skirbi: “Cuidadosamente scondí den [Jesus] tin tur tesoro di sabiduria i di conocimentu.” (Colosensenan 2:3) Pablo asta a bisa cu tur Jehova su promesanan ta bira realidad pa motibu di Jesus. (2 Corintionan 1:20) Pues Jesucristo ta e clave mes pa e conocimentu di Dios. Nos conocimentu di Jesus mester ta liber di cualkier deformacion pa loke ta su naturalesa i su rol den Dios su areglo. Pero pakico Jesus su siguidornan ta consider’é di ta esun principal den Dios su propósitonan?
E MESIAS PRIMINTI
4, 5. Cua speransanan ta enfocá riba e Mesías i con Jesus su disipelnan a mir’é?
4 For dje tempu di e homber fiel Abel, Dios su sirbidornan ansiosamente a mira padilanti na e Simia profetisá dor di Jehova Dios mes. (Génesis 3:15; 4:1-8; Hebreonan 11:4) A ser revelá cu e Simia lo sirbi Dios su propósito como e Mesías, nificando “Esun Ungí.” Lo e “caba cu picá,” i e gloria di su Reino a ser profetisá den e salmonan. (Daniel 9:24-26; Salmo 72:1-20) Ken lo resultá di ta e Mesías?
5 Imaginá e emocion cu e hóben hudiu yamá Andres a sinti ora el a scucha e palabranan di Jesus di Nazaret. Andres a core bai purá cerca su ruman homber Simon Pedro i a bis’é: “Nos a haña e Mesías.” (Juan 1:41) Jesus su disipelnan tabata convencí cu e tabata e Mesías primintí. (Mateo 16:16) I cristiannan berdadero tabata dispuesto pa muri pa nan creencia cu Jesus tabata en berdad e Mesías of Cristo profetisá. Ki prueba nan tabatin? Laga nos considerá tres liña di evidencia.
EVIDENCIA CU JESUS TABATA E MESIAS
6. (a) Cua liña di desendencia mester a producí e Simia primintí i con nos sa cu Jesus a bini mediante e liña di famia ei? (b) Pakico lo tabata imposibel pa cualkier persona bibando despues di 70 E.C. proba e afirmacion di ta e Mesías?
6 Jesus su liña di desendencia ta establecé e promé base pa identifik’é como e Mesías primintí. Jehova a bisa Su sirbidor Abraham cu e Simia primintí lo bini di su famia. Abraham su yu Isaac, Isaac su yu Jacob, i Jacob su yu Huda cada un a ricibí un promesa similar. (Génesis 22:18; 26:2-5; 28:12-15; 49:10) E liña di desendencia dje Mesías a bira mas cla siglonan despues, ora a ser bisá na Rey David cu e liña di su famia lo producí Esun aki. (Salmo 132:11; Isaías 11:1, 10) E relatonan di Evangelio di Mateo i Lucas ta confirmá cu Jesus a bini for di e liña di famia ei. (Mateo 1:1-16; Lucas 3:23-38) Aunke Jesus tabatin hopi enemigu amargá, ningun di nan a desafiá su liña di desendencia bon-conocí. (Mateo 21:9, 15) Claramente, anto, su liña di desendencia ta indiscutibel. Sin embargo, e hudiunan su registronan di famia a ser destruí ora e romanonan a plunder Jerusalem na 70 E.C. Despues di 70 E.C., ningun hende nunca por a proba e afirmacion di ta e Mesías primintí.
7. (a) Cua ta un segundo liña di evidencia cu Jesus tabata e Mesías? (b) Con Mikéas 5:2 a ser cumplí en coneccion cu Jesus?
7 Profecia cumplí ta un di dos liña di evidencia. Cantidadnan di profecia den e Scritura Hebreo ta describí vários aspecto di e Mesías su curso di bida. Den siglo ocho P.E.C., e profeta Mikéas a profetisá cu e gran gobernante aki lo nace den e stad insignificante di Betlehem. Dos stad den Israel tabata yama Betlehem, pero e profecia aki a specificá cua di nan: Betlehem Efrata, caminda Rey David a nace. (Mikéas 5:2) Jesus su mayornan, José i Maria, a biba den Nazaret, rond di 150 km pa nort di Betlehem. Sin embargo, miéntras Maria tabata na estado, e gobernador Romano César Augusto a ordená tur e pueblo pa registrá den nan stad natal.a Di manera cu José mester a hiba su esposa na estado pa Betlehem, caminda Jesus a nace.—Lucas 2:1-7.
8. (a) Na ki tempu i cu cua suceso e 69 “siman” a cuminsá? (b) Con largu e 69 “siman” tabata i kico a pasa ora nan a caba?
8 Den siglo seis P.E.C., e profeta Daniel a profetisá cu “Mesías e Lider” lo aparecé 69 “siman” despues cu e mandato cu a sali pa restorá i reedificá Jerusalem. (Daniel 9:24, 25) Cada un di e ‘simannan’ aki tabata siete aña largu.b Di acuerdo cu e Bijbel i historia seglar, e mandato pa reedificá Jerusalem a ser duná na 455 P.E.C. (Nehemías 2:1-8) Pues, e Mesías mester a aparecé 483 (69 biaha 7) aña despues di 455 P.E.C. Esei ta trece nos na 29 E.C., precis e aña cu Jehova a ungi Jesus cu spiritu santu. Asina Jesus a bira “e Cristo” (nificando “Esun Ungí”), of Mesías.—Lucas 3:15, 16, 21, 22.
9. (a) Con Salmo 2:2 a ser cumplí? (b) Cua ta algun otro profecia cu a ser cumplí den Jesus? (Mira e cuadro.)
9 Naturalmente, no ta tur hende a aceptá Jesus como e Mesías primintí, i e Scritura a profetisá esaki. Manera a ser registrá den Salmo 2:2, Rey David tabata inspirá divinamente pa profetisá: “E reynan di tera ta tuma nan posicion i oficialnan haltu mes a reuní en masa como unu contra Jehova i contra su ungí.” E profecia aki a indicá cu lidernan for di mas cu un pais lo uni afin di atacá Esun Ungí di Jehova, of Mesías. I asina a sosodé. E lidernan religioso hudiu, Rey Herodes, i e gobernador romano Poncio Pilato tur a hunga un parti den mata Jesus. Herodes i Pilato, kendenan tabata promé enemigu di otro, a bira bon amigu for di e momento ei padilanti. (Mateo 27:1, 2; Lucas 23:10-12; Echonan 4:25-28) Pa mas prueba cu Jesus tabata e Mesías, por fabor, mira e cuadro athunto titulá “Algun Profecia Mesiánico Sobresaliente.”
10. Den ki maneranan Jehova a duna testimonio cu Jesus tabata su Ungí primintí?
10 E testimonio di Jehova Dios ta un di tres liña di evidencia cu ta sostené Jesus su posicion como e Mesías. Jehova a manda angelnan pa laga hende sa cu Jesus tabata e Mesías primintí. (Lucas 2:10-14) En realidad, durante Jesus su bida terenal, Jehova mes a papia for di cielu, expresando su aprobacion di Jesus. (Mateo 3:16, 17; 17:1-5) Jehova Dios a duna Jesus e poder pa haci milagernan. Cada un di e milagernan aki tabata mas prueba divino cu Jesus tabata e Mesías, pasobra Dios nunca lo a duna un impostor poder pa haci milagernan. Tambe Jehova a usa su spiritu santu pa inspirá e relatonan di Evangelio, di manera cu e evidencia di Jesus su posicion como e Mesías a bira parti di e Bijbel, e buki mas ampliamente traducí i distribuí den historia.—Juan 4:25, 26.
11. Cuantu evidencia tin cu Jesus tabata e Mesías?
11 Tur huntu, e categorianan di evidencia aki ta incluí cientos di pruebanan cu ta identificá Jesus como e Mesías primintí. Claramente, anto, cristiannan berdadero corectamente a mir’é como ‘esun di cua tur profeta a duna testimonio’ i e clave pa e conocimentu di Dios. (Echonan 10:43) Pero tin mas pa siña tocante Jesucristo cu e echo cu e tabata e Mesías. Na unda el a originá? Ki sorto di persona e tabata?
JESUS SU EXISTENCIA PREHUMANO
12, 13. (a) Con nos por sa cu Jesus a existí den cielu promé cu el a bini na tera? (b) Ken ta “e Palabra,” i kico el a haci promé cu el a bira hende?
12 Jesus su curso di bida por ser partí den tres etapa. E promé a cuminsá hopi promé cu el a nace riba tera. Mikéas 5:2 a bisa cu e Mesías su orígen tabata “di hopi tempu pasá, for di dianan di tempu indefiní.” I Jesus a bisa claramente cu el a bin for di “e region djariba,” esta, for di cielu. (Juan 8:23; 16:28) Cuantu tempu el a existí den cielu promé cu el a bini na tera?
13 Jesus a ser yamá Dios su “Yu unigénito” pasobra Jehova a cre’é directamente. (Juan 3:16) Como “e primogénito di tur creacion,” Jesus despues a ser usá dor di Dios pa crea tur otro cos. (Colosensenan 1:15; Revelacion 3:14) Juan 1:1 ta bisa cu “e Palabra” (Jesus den su existencia prehumano) tabata cu Dios “na principio.” Pues e Palabra tabata cu Jehova ora “e cielu i e tera” a ser creá. Dios tabata dirigiendo su mes na e Palabra ora cu El a bisa: “Laga nos traha hende den nos imágen.” (Génesis 1:1, 26) Di igual manera, e Palabra mester tabata Dios su “obrero maestro” stimá, describí na Proverbionan 8:22-31 como sabiduria personificá, trahando na lado di Jehova den trahamentu di tur cos. Despues cu Jehova a trec’é na existencia, e Palabra a pasa añanan incalculabel cu Dios den cielu promé cu el a bira hende riba tera.
14. Pakico Jesus ta ser yamá “e imágen di e Dios invisibel”?
14 P’esei, no mester sorprendé nos cu Colosensenan 1:15 ta yama Jesus “e imágen di e Dios invisibel”! Durante añanan incalculabel di asociacion estrecho, e Yu obediente a bin bira mescos cu su Tata, Jehova. Esaki ta un otro motibu pakico Jesus ta e clave pa e conocimentu di Dios dunador-di-bida. Tur cos cu Jesus a haci miéntras e tabata riba tera ta exactamente loke Jehova lo a haci. P’esei, conociendo Jesus tambe ta nificá aumentá nos conocimentu di Jehova. (Juan 8:28; 14:8-10) Claramente, anto, ta vital pa siña mas tocante Jesucristo.
JESUS SU CURSO DI BIDA RIBA TERA
15. Con Jesus por a nace como un baby perfecto?
15 E segundo etapa di Jesus su curso di bida tabata aki riba tera. Boluntariamente el a someté su mes ora Dios a transferí su bida for di cielu pa e matris di un bírgen fiel hudiu yamá Maria. Jehova su poderoso spiritu santu, of forsa activo, a ‘cubri’ Maria, causando p’e sali na estado i eventualmente duna lus na un baby perfecto. (Lucas 1:34, 35) Jesus no a heredá imperfeccion, siendo cu su bida a bin di un Fuente perfecto. El a ser criá den un cas humilde como e yu adoptá di e carpinté José i tabata e promé yu di vários yu den e famia.—Isaías 7:14; Mateo 1:22, 23; Marco 6:3.
16, 17. (a) Na unda Jesus a haña poder pa haci milagernan i cua tabata algun di nan? (b) Cua ta algun cualidad cu Jesus a desplegá?
16 Jesus su debocion profundo na Jehova Dios tabata ya caba bisto ora cu e tabatin 12 aña di edad. (Lucas 2:41-49) Despues di crece i cuminsá cu su ministerio na edad di 30 aña, Jesus a demostrá tambe su amor profundo pa su próhimo. Ora e spiritu santu di Dios a dun’é poder pa efectuá milagernan, den un forma compasivo el a cura esnan enfermo, coho, mancaron, ciegu, surdu i leproso. (Mateo 8:2-4; 15:30) Jesus a alimentá miles di hende cu hamber. (Mateo 15:35-38) El a calma un tempestad cu a menasá e siguridad di su amigunan. (Marco 4: 37-39) En realidad, asta el a resucitá e mortonan. (Juan 11:43, 44) E milagernan aki ta echonan histórico bon- establecí. Asta Jesus su enemigunan a reconocé cu el a ‘ehecutá hopi señal.’—Juan 11:47, 48.
17 Jesus a biaha dor di henter su tera natal, siñando hende tocante e Reino di Dios. (Mateo 4:17) Tambe al a pone un berdadero ehempel di pacenshi i razonabilidad. Asta ora su disipelnan a faya cuné, simpáticamente el a remarcá: “E spiritu, naturalmente, ta dispuesto, pero e carni ta débil.” (Marco 14:37, 38) Sin embargo, Jesus tabata yen di curashi i franco cu esnan cu a despreciá e berdad i a oprimí esnan desampará. (Mateo 23:27-33) Ariba tur cos, el a imitá perfectamente e ehempel di amor di su Tata. Jesus asta tabata dispuesto pa muri di manera cu humanidad imperfecto lo por tin un speransa pa futuro. Nada straño, anto, cu nos por bien referí na Jesus como e clave pa e conocimentu di Dios! Sí, e ta e yabi bibu! Pero pakico nos ta bisa un yabi bibu? Esaki ta trece nos na e di tres etapa di su curso di bida.
JESUS AWE
18. Con nos tin cu visualisá Jesucristo awe?
18 Aunke Bijbel ta relatá tocante Jesus su morto, awor e ta bibu! En realidad, cientos di persona bibando den e promé siglo E.C. tabata testigo ocular dje echo cu el a ser resucitá. (1 Corintionan 15:3-8) Manera a ser profetisá, despues di esei el a sinta na man drechi di su Tata i a spera pa ricibí e poder di rey den cielu. (Salmo 110:1; Hebreonan 10:12, 13) P’esei con nos mester visualisá Jesus awe? Nos mester pensa cu e ta un baby impotente den un pesebre? Of como un homber agonisando miéntras nan ta causando su morto? No. E ta un Rey poderoso i reinando! I masha pronto awor, lo e manifestá su gobernacion riba nos tera turbulento.
19. Cua accion Jesus lo tuma den e futuro cercano?
19 Na Revelacion 19:11-15, e Rey Jesucristo ta ser describí gráficamente como biniendo cu gran poder pa destruí e malbado. Ki ansioso e Gobernante celestial amoroso aki mester ta pa caba cu e sufrimentu cu ta afligí miyones di hende awe! I e ta mes ansioso pa yuda esnan cu ta luchando pa imitá e ehempel perfecto cu el a pone tempu e tabata riba tera. (1 Pedro 2:21) E kier preservá nan dor di e “guera di e gran dia di e Dios Todopoderoso,” hopi biaha yamá Armagedon, cu ta acercando rápidamente, di manera cu nan por biba pa semper como súbditonan di Dios su Reino celestial.—Revelacion 7:9, 14; 16:14, 16.
20. Kico Jesus lo haci pa humanidad durante su Reinado di Mil Aña?
20 Durante Jesus su Reinado di Mil Aña di pas profetisá, lo e haci milagernan na fabor di henter humanidad. (Isaías 9:6, 7; 11:1-10; Revelacion 20:6) Jesus lo cura tur enfermedad i lo trece un fin na morto. Lo e resucitá miles di miyones di hende di manera cu nan tambe por tin e oportunidad di biba riba tera pa semper. (Juan 5:28, 29) Nos ta sigur cu lo ta emocionante pa bo pa siña mas tocante su Reino Mesiánico den un capítulo mas despues. Sea sigur di esaki: Nos no por sikiera imaginá con maraviyoso nos bida lo ta bou di gobernacion dje Reino. Ki importante ta pa cera mas conocí cu Jesucristo! Sí, ta esencial pa nos nunca lubidá Jesus, e yabi bibu pa yega n’e conocimentu di Dios cu ta hiba na bida eterno.
[Nota]
a E registracion aki a capacitá e Imperio Romano mihó pa cobra belasting. P’esei, Augusto inconcientemente a yuda cumpli cu un profecia tocante un gobernante cu lo ‘causa un exigidor pasa dor di e reino.’ E mésun profecia a profetisá cu “e Lider di e pacto,” of Mesías, lo ser “kibrá” den e dianan di e gobernante aki su sucesor. Jesus a ser matá durante e reinado di Augusto su sucesor, Tiberio.—Daniel 11:20-22.
b E hudiunan di antigua tabata custumbrá di pensa den términonan di simannan di aña. Por ehempel, mescos cu cada siete dia tabata un dia di Sabat, cada siete aña tabata un aña Sabático.—Exodo 20:8-11; 23:10, 11.
TEST BO CONOCIMENTU
Con Jesus su li ña di desendencia ta apoyá su afirmacion di ta e Mesías?
Cua ta algun profecia Mesiánico cumplí den Jesus?
Con Dios a mustra directamente cu Jesus tabata Esun Ungí di dje?
Pakico Jesus ta e yabi bibu pa yega n’e conocimentu di Dios?
[Tabèl na página 37]
ALGUN PROFECIA MESIANICO SOBRESALIENTE
PROFECIA SUCESO CUMPLIMENTU
E PROME AÑANAN DI SU BIDA
Isaías 7:14 Nací di un bírgen Mateo 1:18-23
Jeremías 31:15 Babynan matá despuesdi su nacementu Mateo 2:16-18
SU MINISTERIO
Isaías 61:1, 2 Su comision di Dios Lucas 4:18-21
Isaías 9:1, 2 Ministerio a pone hende Mateo 4:13-16
mira un lus grandi
Salmo 69:9 Celoso pa Jehova su cas Juan 2:13-17
Isaías 53:1 Hende no a kere den dje Juan 12:37, 38
Zacarías 9:9; Drentamentu den Jerusalem Mateo 21:1-9
Salmo 118:26 riba yu di buricu; aclamá como
rey i como esun biniendo
den nomber di Jehova
SU TRAICION I MORTO
Salmo 41:9; 109:8 Un apostel infiel; Echonan 1:15-20
ta traicioná Jesus i ta ser
reemplasá despues
Zacarías 11:12 Traicioná pa 30 pida Mateo 26:14, 15
di plata
Salmo 27:12 Testigonan falsu usá Mateo 26:59-61
contra dje
Salmo 22:18 Ta tira suerte pa su pañanan Juan 19:23, 24
Isaías 53:12 Contá huntu cu pecadornan Mateo 27:38
Salmo 22:7, 8 Zundrá miéntras e tabata muriendo Marco 15:29-32
Salmo 69:21 Duná binager Marco 15:23, 36
Isaías 53:5; Hincá Juan 19:34, 37
Zacarías 12:10
Isaías 53:9 Derá huntu cu e ricunan Mateo 27:57-60
Salmo 16:8-11, nota Lantá promé cu corupcion Echonan 2:25-32;
Echo 13:34-37
[Plachi na página 35]
Dios a duna Jesus e poder pa cura esnan enfermo