Capítulo Binticuater

Ningun Yudansa dje Mundu Aki

Isaías 31:1-9

 1, 2. (a) Di con e habitantenan di Jerusalem ta morto spantá? (b) En bista dje situacion difícil di Jerusalem, ki preguntanan ta oportuno?

JERUSALEM su habitantenan ta morto spantá, i cu rason! Asiria, e imperio mas poderoso di momento, a atacá “tur e stadnan fortificá di Huda i a poderá di nan.” Awor, e makinaria militar di Asiria ta menasá e capital di Huda. (2 Reynan 18:13, 17) Kico rey Ezekías i e resto dje habitantenan di Jerusalem lo haci?

² Ya cu e otro stadnan di su pais a cai caba, Ezekías sa cu Jerusalem no ta suficiente fuerte pa lucha contra e poderoso forsa militar di Asiria. Ademas, e asirionan tin un reputacion sin igual di crueldad i violencia. E ehército dje nacion ei ta asina inspirador di temor cu tin biaha e contrapartida ta hui bai sin sikiera para bringa! En bista di Jerusalem su circunstancia precario, unda su habitantenan por acudí pa yudansa? Tin un manera pa scapa for dje ehército asirio? I con bini Dios su pueblo ta den un situacion asina? Pa contestá e preguntanan aki, nos tin cu wak bek den pasado i mira con Jehova a trata den añanan anterior cu e nacion cu cua e tabatin un pacto.

Apostasia den Israel

 3, 4. (a) Na ki tempu i con e nacion di Israel a keda partí den dos reino? (b) Ki mal comienso Jeróboam a duna Israel su reino di dies tribu di nort?

³ For di tempu cu Israel a bandoná Egipto te na morto di Sálomon yu di David—un periodo di un poco mas cu 500 aña—e 12 tribunan di Israel tabata un solo nacion. Despues di morto di Sálomon, e dies tribunan di nort, encabesá pa Jeróboam, a lanta contra e cas di David i for dje tempu ei padilanti e nacion a keda partí den dos reino. Esaki a sosodé na aña 997 P.E.C.

⁴ Jeróboam tabata e promé rey di Israel su reino di nort, i el a hiba su súbditonan den e caminda di apostasia dor di remplasá e sacerdocio arónico i e adoracion legítimo di Jehova cu un sacerdocio ilegítimo i un sistema di adorá bisé. (1 Reynan 12:25-33) Esaki tabata repugnante den bista di Jehova. (Jeremías 32:30, 35) P’e motibu aki i otronan mas, Jehova a permití Asiria dominá Israel. (2 Reynan 15:29) Rey Hosea a purba kibra e yugo asirio dor di conspirá cu Egipto, pero e complot a fracasá.—2 Reynan 17:4.

Israel Ta Acudí na un Refugio Falsu

 5. Na ken Israel ta acudí pa yudansa?

⁵ Jehova kier pa e israelitanan recobrá nan sano huicio.a P’esei e ta manda profeta Isaías cu e siguiente spiertamentu: “Ai di esnan cu ta baha bai Egipto pa auxilio, esnan cu ta dependé riba simpel cabai, i cu ta pone nan confiansa den garoshi di guera, pasobra nan ta hopi, i den cabai pasobra nan ta masha poderoso, pero cu no a mira na e Santu di Israel i cu no a busca Jehova mes.” (Isaías 31:1) Esta tristu! Israel ta pone mas confiansa den cabai i garoshi di guera cu den e Dios bibu, Jehova. Segun Israel su manera carnal di pensa, e cabainan di Egipto ta hopi i poderoso. Pues Egipto lo ta sin duda un aliado balioso contra e ehército asirio! Sin embargo, pronto e israelitanan lo descubrí cu nan aliansa carnal cu Egipto ta inútil.

 6. Di con e echo cu Israel ta acudí na Egipto ta revelá un gran falta di fe den Jehova?

⁶ Mediante e pacto di Ley e habitantenan di tantu Israel como Huda ta den un relacion dedicá na Jehova. (Éxodo 24:3-8; 1 Crónicanan 16:15-17) Dor di acudí na Egipto pa yudansa, Israel ta revelá un falta di fe den Jehova i un menosprecio pa e leynan cu ta parti dje pacto santu ei. Di con? Pasobra e stipulacionnan dje pacto a incluí Jehova su promesa di protehá su pueblo si nan rindi debocion exclusivo na dje. (Levítico 26:3-8) Jehova a cumpli cu e promesa ei, i bes tras bes a duna prueba di ta un “lugá fortificá den e tempu di angustia.” (Salmo 37:39; 2 Crónicanan 14:2, 9-12; 17:3-5, 10) Ademas, via Moises, e mediador dje pacto di Ley, Jehova a bisa futuro reynan di Israel pa no acumulá hopi cabai. (Deuteronomio 17:16) E reynan su obedencia na e regla aki lo a mustra cu nan tabata acudí pa proteccion na “e Santu di Israel.” Lamentablemente, e gobernantenan di Israel no tabatin e clase di fe ei.

 7. Kico cristiannan djawe por siña for di Israel su falta di fe?

⁷ Den esaki tin un les pa cristiannan awe. Israel a bai busca apoyo visibel cerca Egipto en bes di e apoyo hopi mas poderoso cu Jehova ta percurá. Mescos awe, cristiannan por sinti nan tentá pa pone nan confiansa den fuentenan carnal di siguridad—cuentanan bancario, posicion social, coneccionnan den mundu—en bes di den Jehova. Ta cierto cu cabesnan di famia cristian ta tuma na serio nan responsabilidad di percurá materialmente pa nan famia. (1 Timoteo 5:8) Pero nan no ta pone nan fe den cosnan material. I nan ta vigilá contra “tur sorto di cudishi.” (Lucas 12:13-21) E único “haltura sigur den tempu di angustia” ta Jehova Dios.—Salmo 9:9; 54:7.

 8, 9. (a) Aunke kisas e plannan di Israel ta parce un bon estrategia, kico lo ta e consecuencianan, i di con? (b) Kico ta e diferencia entre promesa humano i promesa di Jehova?

⁸ De echo, Isaías ta haci bofon dje lidernan israelita cu a trama e acuerdo cu Egipto, bisando: “E tambe ta sabí i lo trece loke ta calamitoso, i e no a revocá su propio palabranan; i sigur lo e lanta contra e cas di malechornan i contra e auxilio di esnan cu ta practicá loke ta perhudicial.” (Isaías 31:2) E lidernan di Israel kisas ta kere cu nan ta sabí. Pero e sabiduria dje Creador di universo no ta supremo? E complot pa busca yudansa di Egipto ta parce un bon estrategia. No obstante, den bista di Jehova tal aliansa político ta adulterio spiritual. (Ezekiel 23:1-10) Como consecuencia, Isaías ta bisa cu Jehova lo “trece loke ta calamitoso.”

⁹ Ta un echo conocí cu promesanan humano no ta confiabel, i proteccion humano ta insigur. Di otro banda, Jehova no tin nodi “revocá su propio palabranan.” Sin falta lo e haci loke e ta primintí. Su palabra no ta bolbe na dje sin resultado.—Isaías 55:10, 11; 14:24.

10. Kico lo sosodé cu tantu Egipto como Israel?

¹⁰ E egipcionan lo por ta un proteccion confiabel pa Israel? No. Isaías ta bisa Israel: “Sin embargo, e egipcionan ta hende terenal, i no Dios; i nan cabainan ta carni, i no spiritu. I Jehova mes lo saca su man, i esun cu ta ofreciendo yudansa lo tin cu trompecá, i esun cu ta ser yudá lo tin cu cai, i na mésun tempu nan tur lo yega na un fin.” (Isaías 31:3) Ora Jehova saca su man pa ehecutá su huicio mediante Asiria, tantu esun cu ta duna yudansa (Egipto) como esun cu ta ricibié (Israel) lo trompecá, cai i yega na nan fin.

E Caida di Samaria

11. Ki registro di picá Israel a acumulá, i kico ta e resultado final?

¹¹ Jehova den su misericordia ta manda profetanan bes tras bes pa animá Israel pa repentí i regresá na adoracion puru. (2 Reynan 17:13) Apesar di esaki, Israel no solamente ta peca cu adoracion di bisé, sino ta participá tambe den wakmentu di destino, adoracion inmoral di Baal i uso di palunan sagrado i lugánan haltu. E israelitanan ta asta pone “nan yu hombernan i nan yu muhernan pasa dor di candela,” sacrificando e fruta di nan propio carni na diosnan demoño. (2 Reynan 17:14-17; Salmo 106:36-39; Ámos 2:8) Pa pone un fin na e maldad di Israel, Jehova ta decretá: “Samaria i su rey sigur lo ser silenciá, manera un taki rancá cu ta drif riba superficie di awa.” (Oséas 10:1, 7) Na aña 742 P.E.C., forsanan asirio ta atacá Samaria, capital di Israel. Despues di sitia Samaria pa tres aña, e ta cai na aña 740 P.E.C., i e reino di dies tribu ta stop di existí.

12. Ki trabou Jehova a encargá awe, i kico ta pasa cu esnan cu ignorá e spiertamentu?

¹² Den nos tempu Jehova a duna encargo pa realisá un predicacion mundial pa spierta “humanidad cu nan tur na tur parti mester repentí.” (Echonan 17:30; Mateo 24:14) Esnan cu ta rechasá Dios su medio di salbacion lo bira manera “un taki rancá,” destruí mescos cu e nacion apóstata di Israel. Di otro banda, esnan cu ta pone nan speransa den Jehova “lo poseé tera, i nan lo biba pa semper riba dje.” (Salmo 37:29) Ta ki sabí anto pa nos evitá e erornan dje antiguo reino di Israel! Laga nos pone henter nos confiansa den Jehova pa haña salbacion.

Jehova Su Poder di Salba

13, 14. Ki palabranan consolador Jehova tin pa Síon?

¹³ Jerusalem, capital di Huda, ta situá un par di kilometer for Israel su frontera zuid. E habitantenan di Jerusalem ta bon na haltura di loke a pasa cu Samaria. Awor e mésun enemigu spantoso cu a caba cu nan bisiña panort ta menasá nan. Nan lo siña for di loke a pasa cu Samaria?

¹⁴ E siguiente palabranan di Isaías ta un consuelo pa e habitantenan di Jerusalem. E ta garantisá nan cu ainda Jehova ta stima su pueblo di pacto, bisando: “Esaki ta loke Jehova a bisa mi: ‘Mescos cu e leon, sí, e leon hóben cu klina, ta gruña riba su prooi, ora yama contra dje un cantidad completo di wardadó, i apesar di nan bos lo e no spanta i apesar di nan bochincha lo e no sak abou; den e mésun manera Jehova di ehércitonan lo baha bini pa haci guera pa ceru di Síon i pa su ceritu.’” (Isaías 31:4) Mescos cu un leon hóben pará riba su prooi, Jehova lo protehá su stad santu Síon celosamente. Ningun bromamentu, ningun palabra menasante ni ningun otro bochincha dje tropanan asirio lo kita Jehova for di su propósito.

15. Di con nos por bisa cu Jehova ta trata e habitantenan di Jerusalem cu ternura i compasion?

¹⁵ Ripará awor cu ki ternura i compasion Jehova lo bai trata e habitantenan di Jerusalem: “Manera para cu ta bula, Jehova di ehércitonan di e mésun manera lo defendé Jerusalem. Ora e defend’é, sigur lo e libr’é tambe. Ora e pordon’é, lo e tin cu lagu’é scapa tambe.” (Isaías 31:5) Den e mundu di para, semper e mama ta alerto pa defendé su yunan. Cu ala di span e ta keda bula riba su neshi, i cu wowonan atento e ta busca pa wak si tin cualkier señal di peliger. Ora un bestia yagdó yega cerca, e ta baha un bes pa defendé su yunan. Den un manera similar, Jehova lo cuida e habitantenan di Jerusalem cu ternura i lo protehá nan di invasion asirio.

“Boso Bolbe”

16. (a) Ki yamada amoroso Jehova ta haci riba su pueblo? (b) Na ki tempu e rebelion dje pueblo di Huda ta bira hopi bisto? Splica.

¹⁶ Awor Jehova ta corda su pueblo cu nan a peca i ta animá nan pa bandoná nan mal caminda: “Boso bolbe na Esun contra ken e yunan di Israel a bai profundo den nan rebelion.” (Isaías 31:6) No ta Israel su reino di dies tribu so a rebelá. E pueblo di Huda, cu tambe ta “yunan di Israel,” a bai “profundo den nan rebelion.” Esaki lo ta hopi bisto ora cu djis despues cu Isaías terminá su mensahe profético, e yu homber di Ezekías, Manases, bira rey. Segun e registro bíblico, “Manases a sigui seducí Huda i e habitantenan di Jerusalem pa haci pió cu e nacionnan cu Jehova a eliminá.” (2 Crónicanan 33:9) Imaginá bo! Jehova ta destruí nacionnan pagano debí na nan sushedad repugnante, sin embargo e habitantenan di Huda, cu tin un pacto cu Jehova, ta asta pió cu e hendenan dje nacionnan ei.

17. Den ki sentido por compará e condicionnan djawe cu esnan den Huda bou di Manases?

¹⁷ Awor aki na principio di siglo 21, condicionnan di mundu den hopi aspecto ta similar na esnan den Huda den tempu di Manases. Odio religioso, racial i étnico tin mundu dia pa dia mas dividí. Miyones di persona a bira víctima di actonan spantoso di asesinato, tortura, violacion i e asina yamá purificacion étnico. No tin duda cu tantu hende como e nacionnan—foral e nacionnan di cristiandad—a bai “profundo den nan rebelion.” Sin embargo, nos por tin sigur cu Jehova lo no permití maldad sigui pa tempu indefiní. Di con? Debí na loke a tuma lugá den tempu di Isaías.

Jerusalem Librá

18. Ki spiertamentu Rabsaké ta duna Ezekías?

¹⁸ Reynan asirio a duna nan diosnan e mérito pa nan victorianan riba campo di bataya. E buki Ancient Near Eastern Texts ta contené skirbimentunan di Asurbanipal, un monarca asirio cu a pretendé cu el a ser guiá ‘dor di Asur, Bel, Nebo, e gran diosnan, su señornan, cu (semper) ta marcha na su lado, ora cu el a derotá e soldánan (experenciá) di bataya den un gran bataya den campo habrí.’ Den tempu di Isaías, Rabsaké, cu ta representá rey Senákerib di Asiria, tambe ta demostrá di ta kere cu e diosnan ta enbolbí den guera humano ora e ta dirigí su mes na rey Ezekías. E ta spierta e rey hudiu pa no dependé riba Jehova i ta indicá cu e diosnan dje otro nacionnan no por a protehá nan pueblo contra e poderoso makinaria di guera asirio.—2 Reynan 18:33-35.

19. Con Ezekías ta reaccioná riba e desafionan arogante di Rabsaké?

¹⁹ Con rey Ezekías ta reaccioná? E relato bíblico ta bisa: “Asina cu e rey Ezekías a tende, mesora el a sker su pañanan i a cubri su mes cu paña di sacu i a drenta den e cas di Jehova.” (2 Reynan 19:1) Ezekías ta reconocé cu ta Un so tin cu por yud’é den e situacion spantoso aki. E ta humiyá su mes i ta acudí na Jehova pa guia.

20. Con Jehova lo actua na fabor dje habitantenan di Huda, i kico nan mester siña for di esaki?

²⁰ Jehova ta duna e guia cu Ezekías ta busca. Via profeta Isaías e ta bisa: “Riba e dia ei nan lo rechasá cada un su diosnan di plata inútil i su diosnan di oro cu no bal nada, cu boso man a traha pa boso mes como picá.” (Isaías 31:7) Ora Jehova bai bringa na fabor di su pueblo, lo e desenmascará e diosnan di Senákerib pa loke nan ta: inútil. Esaki ta un les cu e habitantenan di Huda mester tuma na pechu. Apesar dje fieldad di rey Ezekías, e tera di Huda a yena cu ídolo, mescos cu di Israel. (Isaías 2:5-8) Pa e habitantenan di Huda reestablecé nan relacion cu Jehova, nan lo tin cu repentí di nan picánan i rechasá ‘cada un su diosnan inútil.’—Wak Éxodo 34:14.

21. Ki descripcion profético Isaías ta duna dje manera cu Jehova ta ehecutá e asirio?

²¹ Awor Isaías ta describí proféticamente con Jehova lo ehecutá Huda su enemigu imponente: “E asirio tin cu cai pa spada, no di un homber; i un spada, no di hende terenal, lo devor’é. I e tin cu hui debí na e spada, i su propio hóbennan lo ser usá asta pa trabou forsá.” (Isaías 31:8) Ora cu yega e momento di confrontacion, e habitantenan di Jerusalem lo no tin cu ni saca nan spada. E spada di Jehova—no spada di hende—lo devorá e mihónan dje tropanan asirio. Pa loke ta rey asirio Senákerib, “e tin cu hui debí na e spada.” E ta bai cas bek despues cu Jehova su angel mata 185.000 di su guereronan. Mas despues, su propio yu hombernan ta asesin’é miéntras e ta buig dilanti su dios Nisroc.—2 Reynan 19:35-37.

22. Kico cristiannan djawe por siña for di loke a sosodé cu Ezekías i e ehército asirio?

²² Niun hende, ni Ezekías, no por a premirá e manera cu Jehova lo a libra Jerusalem for dje ehército asirio. No obstante, e manera cu Ezekías a trata cu e crísis ta un bon ehempel pa esnan cu ta confrontá prueba awe. (2 Corintionan 4:16-18) En bista dje reputacion spantoso dje ehército asirio cu a menasá Jerusalem, ta di comprendé cu Ezekías tabatin miedu. (2 Reynan 19:3) Pero tog, e tabatin fe den Jehova i a busca Su guia, no di hende. Ki un bendicion pa Jerusalem cu el a haci esei! Cristiannan temeroso di Dios awe tambe kisas ta sinti emocionnan intenso ora nan ta bou di tension. Den hopi situacion, ta di comprendé cu nan tin miedu. Sin embargo, si nos ‘tira tur nos ansiedad riba Jehova,’ lo e cuida nos. (1 Pedro 5:7) Lo e yuda nos vence nos miedu i lo fortalecé nos pa enfrentá e situacion cu ta causa tension.

23. Den ki manera ta Senákerib, i no Ezekías, ta esun cu ta keda tur spantá?

²³ Al final, ta Senákerib, no Ezekías, ta esun cu a keda tur spantá. Na ken e por acudí? Isaías ta predicí: “‘Su propio baranca steil lo pasa bai di puru spantu, i debí na e señal su prinsnan mester ta spantá,’ ta e expresion di Jehova, kende su lus ta den Síon i kende su fornu ta den Jerusalem.” (Isaías 31:9) E diosnan di Senákerib—su “baranca steil,” e refugio den cua el a confia—ta lagu’é na caya. Na moda di papia nan a “pasa bai di puru spantu.” Ademas, ni sikiera e prinsnan di Senákerib no ta di masha yudansa. Nan tambe ta morto spantá.

24. Ki mensahe bon cla nos por siña for di loke a pasa cu e asirio?

²⁴ E seccion aki dje profecia di Isaías ta duna un mensahe bon cla na ken cu ta pensa di oponé Dios. No tin arma, ni poder ni estrategia cu por frustra e propósitonan di Jehova. (Isaías 41:11, 12) Na e mésun tempu, esnan cu ta pretendé di ta sirbi Dios pero cu tog ta apartá di dje pa bai busca siguridad den cos material, lo sufri decepcion. Ken cu “no a mira na e Santu di Israel” lo wak Jehova “trece loke ta calamitoso.” (Isaías 31:1, 2) Definitivamente, e único refugio real i duradero ta Jehova Dios.—Salmo 37:5.

[Nota]

[Plachi na página 319]

Esnan cu pone nan confiansa den cos material lo keda decepcioná

[Plachi na página 322]

Mescos cu un leon cu ta protehá su prooi, Jehova lo protehá su stad santu

[Plachinan na página 324]

Odio religioso, racial i étnico tin mundu dividí

[Plachi na página 326]

Ezekías a bai e cas di Jehova pa busca yudansa