Mensaheronan di Pas Divino Pronunciá Felis

“Esnan rescatá mes dor di Jehova lo bolbe bek i siguramente lo yega na Síon cu un sclamacion gososo; i lo tin alegria te na tempu indefiní riba nan cabes.”—ISAIAS 35:10.

 1. Kico e mundu tin mester di dje desesperadamente?

AWE manera nunca promé, humanidad tin mester di un mensahero di bon noticia. Tin un necesidad urgente pa un hende papia e berdad tocante Dios i su propósitonan, un testigo intrépido cu lo spierta e malbadonan dje binidero destruccion i yuda esnan di curason onrado haña pas divino.

 2, 3. Den e caso di Israel, con Jehova a cumpli cu su promesa registrá na Amos 3:7?

² Den e dianan di Israel, Jehova a primintí di percurá e clase di mensaheronan ei. Na fin di siglo nuebe P.E.C., profeta Amos a bisa: “E Señor Soberano Jehova lo no haci ni un solo cos a ménos cu el a revelá su asuntu confidencial na su sirbidornan e profetanan.” (Amos 3:7) Den e siglonan cu a sigui despues dje pronunciacion aki, Jehova a efectuá hopi obra poderoso. Por ehempel, na 607 P.E.C., el a disipliná su pueblo scogí severamente pasobra nan tabata rebelde i culpabel di sanger. Tambe el a castigá e nacionnan den cercania cu a alegrá pa causa di Israel su sufrimentu. (Jeremías, capítulo 46-49) Anto, na 539 P.E.C., Jehova a ocasioná e caida dje imperio mundial poderoso di Babilonia, i como resultado, na 537 P.E.C., un resto di Israel a bolbe bek na nan pais pa reconstruí e tempel.—2 Crónicanan 36:22, 23.

³ Esakinan tabata sucesonan di gran importancia, i na armonia cu e palabranan di Amos, Jehova a revelá nan di antemano na profetanan cu a sirbi como mensahero, spiertando Israel di loke tabata na caminda. Meimei di siglo ocho P.E.C., el a lanta Isaías. Meimei di siglo shete P.E.C., el a lanta Jeremías. Anto, yegando na fin dje siglo ei, el a lanta Ezekiel. Esakinan i otro profetanan fiel a duna un testimonio cabal tocante e propósitonan di Jehova.

Identificando e Mensaheronan di Dios Awe

 4. Kico ta mustra cu humanidad tin mester di mensaheronan di pas?

⁴ Kico di awe? Hopi hende den mundu ta haña un mal presentimentu ora nan mira e deterioro di sociedad humano. Esnan cu tin amor pa husticia ta haña dolor di curason ora nan mira e hipocresia i pleno maldad di cristiandad. Manera Jehova a profetisá mediante Ezekiel, nan “ta suspirando i kehando riba tur e cosnan detestabel cu ta ser hací meimei di dje.” (Ezekiel 9:4) Sin embargo, hopi hende no sa kico e propósitonan di Jehova ta. Un hende mester bisa nan.

 5. Con Jesus a mustra cu lo tin mensaheronan den nos tempu?

⁵ Cualkier hende awe ta papia cu e spiritu intrépido di Isaías, Jeremías i Ezekiel? Jesus a indicá cu un hende lo hacié. Ora el a profetisá di sucesonan di nos tempu, el a bisa: “E bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.” (Mateo 24:14) Ken awe ta cumpliendo cu e profecia ei, sirbiendo como un mensahero, un predicador di bon nobo? Cosnan cu ta similar entre nos dia i e tempu di antiguo Israel ta yuda nos contestá e pregunta ei.

 6. (a) Describí e experencianan di “e Israel di Dios” durante e promé guera mundial. (b) Con Ezekiel 11:17 a cumpli riba Israel di antigwedad?

⁶ Durante e dianan scur di Guera Mundial I, Jehova su pueblo actual, e resto dje ‘Israel ungí di Dios,’ a bai den un cautiverio similar na esun di Israel na Babilonia. (Galationan 6:16) Nan a sufri di exilio spiritual den Babilonia e Grandi, e conglomeracion mundial di religion falsu, di cua cristiandad ta e parti mas prominente i reprensibel. No obstante, e palabranan di Jehova dirigí na Ezekiel a mustra cu nan no a ser bandoná. El a bisa: “Tambe lo mi hunta boso for dje pueblonan i reuní boso for dje paisnan entre cua boso a ser plamá, i lo mi duna boso e suela di Israel.” (Ezekiel 11:17) Pa por a cumpli cu e promesa ei pa Israel di antigwedad, Jehova a lanta Ciro, e perso, kende a tumba e Poder Mundial di Babilonia i a habri e caminda pa un resto di Israel regresá nan pais. Pero kico djawe?

 7. Ki suceso na 1919 a mustra cu Jesus a actua contra Babilonia e Grandi? Splica.

⁷ Mas promé den e siglo aki, tabatin evidencia poderoso cu un Ciro Mayor a drenta den funcion. Ken e tabata? Ningun otro cu Jesucristo, entronisá desde 1914 den e Reino celestial. E gran Rey aki a mustra bon boluntad pa cu su rumannan ungí riba tera ora, na aña 1919, cristiannan ungí a ser librá for di cautiverio spiritual i a regresá nan “pais,” nan herencia spiritual. (Isaías 66:8; Revelacion 18:4) Asina Ezekiel 11:17 a haña un cumplimentu moderno. Den antigwedad e caida di Babilonia tabata necesario pa habri e caminda p’e israelitanan regresá nan pais. Den actualidad, e restoracion di e Israel di Dios tabata evidencia cu Babilonia e Grandi a experenciá un caida na man dje Ciro Mayor. E caida aki a ser anunciá dor dje segundo angel di Revelacion capítulo 14, ora el a sclama: “Babilonia e Grandi a cai, esun cu a haci tur nacion bebe dje biña dje rabia di su fornicacion!” (Revelacion 14:8) Ki un cambio pa lo peor pa Babilonia e Grandi, specialmente pa cristiandad! I ki un bendicion pa cristiannan berdadero!

 8. Con e buki di Ezekiel ta describí e felicidad dje pueblo di Dios despues di nan liberacion na 1919?

⁸ Na Ezekiel 11:18-20, nos ta lesa e profeta su descripcion dje felicidad dje pueblo di Dios despues di nan restoracion. E promé cumplimentu di su palabranan a nificá e limpiamentu di Israel den e dianan di Esdras i Nehemías. E cumplimentu di tempu actual a nificá algu similar. Laga nos mira con. Jehova ta bisa: “Nan siguramente lo bini [na nan pais] i eliminá tur su cosnan repugnante i tur su cosnan detestabel for di dje.” Net manera a ser profetisá, cuminsando na 1919, Jehova a limpia su pueblo i a stimulá nan di nobo pa sirbié. Nan a cuminsá eliminá for di nan ambiente spiritual tur e práctica i doctrinanan babilónico cu a contaminá nan den Jehova su bista.

 9. Ki bendicionnan significativo Jehova a duna su pueblo, cuminsando na 1919?

⁹ Anto, segun versículo 19, Jehova ta pasa na bisa: “I lo mi duna nan un solo curason, i un spiritu nobo lo mi pone den nan; i siguramente lo mi kita e curason di piedra for di nan carni i duna nan un curason di carni.” Na armonia cu e palabranan aki, na 1919, Jehova a uni su sirbidornan ungí, a duna nan “un solo curason,” na moda di papia, pa nan por sirbié “scouder cu scouder.” (Sofonías 3:9) Ademas, Jehova a duna su pueblo spiritu santu pa stimulá nan den e trabou di duna testimonio i pa producí den nan e fruta excelente describí na Galationan 5:22, 23. I en bes di un curason insensibel manera piedra, Jehova a duna nan un curason suave, fácil pa amoldeá i obediente, un curason cu lo a respondé na su boluntad.

10. Pakico Jehova a bendicioná su pueblo restorá for di 1919 padilanti?

¹⁰ Pakico el a haci esaki? Jehova mes ta splica. Nos ta lesa na Ezekiel 11:20: “Pa nan por cana den mi propio statutonan i warda mi propio decisionnan hudicial i realmente ehecutá nan; i pa nan realmente por bira mi pueblo i ami mes por bira nan Dios.” E Israel di Dios a siña obedecé Jehova su ley en bes di sigui nan mes ideanan. Nan a siña haci e boluntad di Dios sin temor di hende. P’esei, nan a resaltá como diferente for di cristiandad su cristiannan di imitacion. Nan tabata Jehova su pueblo. Como tal, Jehova tabata cla pa usa nan como su mensahero, su “esclabo fiel i discreto.”—Mateo 24:45-47.

E Felicidad di Dios Su Mensaheronan

11. Con e buki di Isaías ta describí e felicidad dje pueblo di Jehova?

¹¹ Bo por visualisá nan felicidad ora nan a realisá ki un posicion privilegiá nan tabatin? Como grupo, nan a resoná e palabranan di Isaías 61:10: “Sin falta lo mi hubilá den Jehova. Mi alma lo ta gososo den mi Dios.” E promesa di Isaías 35:10 a cumpli riba nan: “Esnan rescatá mes dor di Jehova lo bolbe bek i siguramente lo yega na Síon cu un sclamacion gososo; i lo tin alegria te na tempu indefiní riba nan cabes. Húbilo i alegria nan lo alcansá, i tristesa i suspiro mester hui bai.” Asina e felicidad di Jehova su mensaheronan di pas divino tabata aya na 1919 ora nan a proponé nan mes pa predicá e bon nobo na tur humanidad. Desde e tempu ei padilanti te n’e dia djawe, nan no a stop di efectuá e tarea aki, i nan felicidad a aumentá. Den su Sermon Riba Ceru, Jesus a declará: “Felis ta e hacidónan di pas, ya cu nan lo ser yamá ‘yunan di Dios.’ ” (Mateo 5:9, nota) E resto dje ‘yunan ungí di Dios’ a experenciá e veracidad dje pronunciacion ei for di 1919 te n’e dia djawe.

12, 13. (a) Ken a djoin e Israel di Dios den sirbi Jehova, i ki trabou nan a haci? (b) Ki gran goso e sirbidornan ungí di Jehova a experenciá?

¹² Segun cu e añanan a pasa, e cantidad di e Israel di Dios a aumentá te n’e añanan ’30 ora e recogementu di esnan restante dje ungínan tabata cerca di ser completá. E aumento den e cantidad di predicadornan dje bon nobo a stop n’e tempu ei? Di ningun manera. Un multitud grandi di cristiannan cu un speransa terenal a cuminsá aparecé caba, i esakinan tabata djoin nan rumannan ungí den e trabou di predicacion. Apostel Juan a mira e multitud grandi aki den vision, i e manera cu e ta describí nan ta notabel: “Nan ta dilanti e trono di Dios; i nan ta rindiendo sirbishi sagrado na dje di dia i anochi.” (Revelacion 7:15) Sí, e multitud grandi a cuminsá sirbi Dios. Como resultado, ora e cantidad dje ungínan a cuminsá mengua, despues di 1935, e fiel compañeronan aki a continuá e trabou di duna testimonio cu mayor impulso.

¹³ Den e manera aki Isaías 60:3, 4 a cumpli: “Nacionnan siguramente lo acudí na bo lus, i reynan n’e resplandor di bo briyamentu. Hisa bo wowonan tur rond i mira! Nan tur a ser huntá huntu; nan a bini cerca bo. For di leu bo propio yu hombernan ta sigui bini, i bo yu muhernan cu lo ser cuidá na banda.” E felicidad cu e desaroyonan aki a trece pa e Israel di Dios ta ser describí di un manera bunita na Isaías 60:5, unda nos ta lesa: “N’e tempu ei lo bo mira i siguramente bira radiante, i bo curason siguramente lo tembla i expandé, pasobra na bo e rikesa di laman lo dirigí su mes; e recursonan mes dje nacionnan lo bini cerca bo.”

Jehova Su Organisacion Ta Marcha Padilanti

14. (a) Ki vision di cosnan celestial Ezekiel a mira, i ki mandamentu el a ricibí? (b) Kico Jehova su pueblo a dicerní den e tempu actual, i ki obligacion nan a sinti?

¹⁴ Na aña 613 P.E.C., Ezekiel a mira den vision Jehova su organisacion celestial, semehante na un garoshi, marchando padilanti. (Ezekiel 1:4-28) Despues, Jehova a bis’é: “Yu di hende, bai, drenta entre esnan dje cas di Israel, i bo tin cu papia cu nan cu mi palabranan.” (Ezekiel 3:4) Den e aña aki di 1997, nos ta dicerní cu Jehova su organisacion celestial ainda ta marchando padilanti sin cu ningun hende por stop e di realisá e propósitonan di Dios. P’esei, ainda nos ta sinti nos impulsá pa bisa otronan dje propósitonan ei. Den su dia, Ezekiel a papia palabranan cu tabata directamente inspirá dor di Jehova. Awe, nos ta papia palabranan for dje Palabra inspirá di Jehova, e Bijbel. I ki un mensahe e buki ei tin pa humanidad! Miéntras cu hopi hende ta preocupá tocante futuro, Bijbel ta mustra cu cosnan ta muchu mas pió—i na mésun tempu, muchu mas mihó—cu nan ta imaginá.

15. Pakico e situacion di mundu ta pió cu hopi hende awe ta pensa?

¹⁵ Cosnan ta pió pasobra, manera nos a siña den e artículonan anterior, cristiandad i tur otro religion falsu pronto lo ser destruí, mes completamente cu Jerusalem a ser destruí na 607 P.E.C. Ademas, henter e entidad político global, representá den e buki di Revelacion como un bestia salbahe cu shete cabes i dies cachu ta cla pa ser eliminá, mescos cu hopi dje bisiñanan pagano di Jerusalem. (Revelacion 13:1, 2; 19:19-21) Den tempu di Ezekiel, Jehova a describí di un manera bibu e teror cu e binidero destruccion di Jerusalem a inspirá. Pero su palabranan lo tin muchu mas nificacion ora hende ta dicerní e binidero destruccion dje mundu aki. Jehova a bisa Ezekiel: “En cuanto abo, O yu di hende, suspirá cu heupnan cu ta tembla. Asta cu amargura bo mester suspirá dilanti nan wowonan. I tin cu sosodé cu, den caso cu nan bisá bo, ‘Pa causa di kico bo ta suspirando?’ bo tin cu bisa, ‘Debí na un informe.’ Pasobra siguramente lo e bini, i tur curason tin cu dirti i tur man tin cu cai abou i tur spiritu tin cu bira desanimá i tur rudia mes lo gotea cu awa. ‘Mira! Lo e bini siguramente i lo ser percurá p’e sosodé,’ ta e expresion dje Señor Soberano Jehova.” (Ezekiel 21:6, 7; Mateo 24:30) Tin sucesonan inspirador di temor djis nos dilanti. Nos interes profundo den nos próhimo ta impulsá nos pa duna e señal di alarma, pa conta e “informe” di Jehova su binidero rabia.

16. P’e mansunan, pakico e situacion di mundu ta mihó cu hopi hende ta pensa?

¹⁶ N’e mésun tempu, p’e mansunan cosnan ta muchu mas mihó cu mayoria hende ta imaginá. Den ki manera? P’e echo cu Jesucristo a muri pa nos picánan i awor ta reina como Rey dje Reino di Dios. (1 Timoteo 1:15; Revelacion 11:15) E problemanan di humanidad cu ta parce di ta insolucionabel, pronto lo ser superá pa medio dje Reino celestial ei. Morto, malesa, corupcion, hamber i crímen lo bira cosnan di pasado, i e Reino di Dios lo reina sin oposicion riba un tera paradísico. (Revelacion 21:3, 4) Humanidad lo disfrutá di pas divino—un relacion pacífico cu Jehova Dios i cu otro.—Salmo 72:7.

17. Ki aumentonan ta trece goso p’e curason di mensaheronan di pas divino?

¹⁷ Den algun parti di mundu, multitudnan asombrosamente grandi di hende mansu ta respondiendo n’e mensahe aki di pas divino. Pa mencioná djis un par di ehempel, aña pasá Ucrania a informá un aumento di 17 porciento di publicador. Mozambique a informá un aumento di 17 porciento, Lituania un aumento di 29 porciento. Rusia tabatin un aumento di 31 porciento, miéntras cu Albania a experenciá un aumento di 52 porciento di publicador. E aumentonan aki ta representá dies di miles di individuonan di curason onrado cu kier disfrutá di pas divino i cu a tuma nan posicion na fabor di husticia. Tal aumento rápido ta trece goso pa henter e hermandad cristian.

18. Sea hende ta scucha of laga, kico lo ta nos actitud?

¹⁸ Hende ta respondé di buena gana asina caminda abo ta biba? Si ta asina, nos ta alegrá cu bo. Sin embargo, den algun teritorio, masha hopi ora di trabou duru ta necesario promé cu haña sikiera un persona interesá. Esnan cu ta sirbi den teritorionan asina ta floha nan mannan of ta desesperá? No. Testigonan di Jehova ta corda e palabranan di Dios na Ezekiel ora pa promé biaha El a comisioná e profeta yong pa predicá na su compatriotanan hudiu: “En cuanto nan, sea cu nan lo tende of laga di tende—pasobra nan ta un cas rebelde—nan siguramente lo sa tambe cu un profeta mes a resultá di ta meimei di nan.” (Ezekiel 2:5) Mescos cu Ezekiel, nos ta sigui bisa hende tocante pas divino sea cu nan ta respondé of laga. Si nan scucha, nos ta entusiasmá. Si nan rechasá nos, haci mofa di nos, asta persiguí nos, nos ta perseverá. Nos ta stima Jehova, i Bijbel ta bisa: “Amor . . . ta wanta tur cos.” (1 Corintionan 13:4, 7) Pa motibu cu nos ta predicá cu awante, hende sa ken Testigonan di Jehova ta. Nan conocé nos mensahe. Ora e fin yega, nan lo sa cu Testigonan di Jehova a purba yuda nan disfrutá di pas divino.

19. Como sirbidornan dje Dios berdadero, ki gran privilegio nos ta atesorá?

¹⁹ Acaso tin un privilegio mas grandi cu sirbi Jehova? No! Nos mayor felicidad ta bini for di nos relacion cu Dios i e echo cu nos sa cu nos ta haciendo su boluntad. “Felis ta e pueblo cu conocé e gritu gososo. O Jehova, den e lus di bo cara nan ta sigui cana.” (Salmo 89:15) Laga nos semper atesorá e goso di ser Dios su mensaheronan di pas pa humanidad. Laga nos hunga nos papel diligentemente den e trabou aki te ora Jehova bisa ta basta.

Bo Ta Corda?

◻ Ken ta Dios su mensaheronan di pas awe?

◻ Con nos por sa cu Babilonia e Grandi a experenciá un caida na 1919?

◻ Kico ta e interes principal dje “multitud grandi”?

◻ Pakico e futuro ta mas scur cu mayoria hende awe ta pensa?

◻ Pa esnan di curason onrado, pakico e futuro por ta mas mihó cu nan ta imaginá?

[Plachinan na página 21]

Ora nan mira e deterioro dje sociedad humano, hopi hende ta haña un mal presentimentu

[Plachinan na página 23]

E mensaheronan di pas divino ta e pueblo di mas felis riba tera awe