Hesus A Sigui Prediká na Galilea

Hesus i su kuater disipelnan tabatin un dia drùk na Kapernaum. Asta atardi lat, e pueblo di Kapernaum a trese nan hendenan malu serka dje pa e kura nan. Kasi Hesus no tabatin tempu pa su mes.

E siguiente dia, mainta trempan, miéntras ku tabata skur ainda, el a lanta i a bai un lugá solitario pa hasi orashon na su Tata. Pero e no a keda so pa largu tempu. Dikon nò? Wèl, ora “Simon [Pedro] i esnan ku tabata huntu kuné” a ripará ku Hesus no tabat’ei, nan a sali purá pa bai busk’é. Kisas ta Pedro a tuma inisiativa pa bai buska Hesus ya ku ta na su kas Hesus tabata.—Marko 1:36; Lukas 4:38.

Ora nan a haña Hesus, Pedro a bis’é: “Tur hende ta buska bo.” (Marko 1:37) Ta di komprondé ku e hendenan na Kapernaum tabata ke pa Hesus keda serka nan. Nan a keda masha gradisidu pa loke el a hasi pa nan, p’esei nan tabata purba di “ten’é serka nan.” (Lukas 4:42) Pero ta pa hasi milager i kura hende Hesus a bini na mundu? Ta na Kapernaum so e mester a prediká i siña hende? Kiko Hesus mes a bisa tokante esei?

Wèl, Hesus a bisa su disipelnan: “Laga nos bai otro kaminda, na e pueblonan den bisindario, pa mi por prediká einan tambe, pasobra ta pa e motibu akí mi a bini.” De echo, el a bisa e hendenan ku tabata ke pa e keda: “Mi tin ku deklará e bon notisia di e Reino di Dios na e otro statnan tambe, pasobra ta pa esaki Dios a manda mi.”—Marko 1:38; Lukas 4:43.

Sí, un di e motibunan prinsipal pakiko Hesus a bini na tera tabata pa prediká e Reino di Dios. E Reino akí lo santifiká e nòmber di su Tata i resolvé tur e problemanan di humanidat pa semper. I pa konvensé e hendenan ku ta Dios a mand’é, e tabata hasi milager i kura hende. Moises, kende a biba hopi siglo promé, tambe mester a hasi milager pa duna prueba ku ta Dios a mand’é.—Éksodo 4:1-9, 30, 31.

Pues, Hesus i su kuater disipelnan a bandoná Kapernaum pa bai prediká na e otro statnan tambe. E disipelnan ku a bai kuné tabata Pedro, Andres (ruman di Pedro), Huan i Santiago (ruman di Huan). Un siman promé, Hesus a invitá nan pa bira su promé kompañeronan di trabou.

Hesus i su kuater disipelnan tabatin masha éksito predikando na Galilea. Tur kaminda hende tabata papia di Hesus. “E notisia tokante dje a plama den henter Siria,” den Dekápolis, ku tabata konsistí di dies stat, i te na otro banda di Riu Yordan. (Mateo 4:24, 25) Multitut di hende for di e áreanan ei i di Hudea a sigui Hesus i su disipelnan. Hopi di nan tabata trese hende malu pa Hesus kura nan. Hesus no a desapuntá nan; el a yuda nan tur: El a kura esnan enfermo i libra esnan ku tabata den gara di demoño.