Amor

HENDE TIN MESTER DI AMOR. Sin amor, ningun matrimonio, famia òf amistat no por dura. Pues, no tin duda ku amor ta sumamente importante pa nos salú mental i pa nos ta felis. Pero kiko e palabra “amor” ta nifiká?

E amor ku nos ta papiando di dje no ta amor romántiko, ku naturalmente tambe ta importante. Mas bien, nos ta papiando di un tipo di amor ku ta superior i ku ta pone nos mustra un interes sinsero den bienestar di otro hende i asta ta pone e hende ei promé ku nos mes. E amor akí ta basá riba prinsipionan di Dios, pero esei no ke men ku e amor akí no tin kariño òf sintimentu.

Beibel ta duna un bunita deskripshon di amor: “Amor tin pasenshi i ta bondadoso. Amor no ta yalurs, e no ta broma, e no ta halsa su mes, e no ta komport’é indesentemente, e no ta buska su mes interes, e no ta rabia lihé. E no ta keda kòrda e malu ku hende a hasié. E no ta alegrá ku inhustisia, ma ta alegrá ku loke ta bèrdat. E ta wanta tur kos, . . . spera tur kos, soportá tur kos. Amor no ta kaba nunka.”—1 Korintionan 13:4-8.

E tipo di amor akí “no ta kaba nunka” den e sentido ku nunka lo e stòp di eksistí. Sí, ku tempu asta e por bira mas fuerte. I komo ku amor tin pasenshi, ta bondadoso i ta pordoná, e ta “e laso perfekto di union.” (Kolosensenan 3:14) P’esei, tur hende ku ta ser uní pa e tipo di amor ei ta sinti nan safe i felis apesar ku nan ta imperfekto. Por ehèmpel, ban analisá e union matrimonial.

Hesukristu a siña hende vários prinsipio importante pa matrimonio. Por ehèmpel, Hesus a bisa: “‘Un hòmber lo bandoná su tata i su mama i lo pega na su esposa, i nan dos lo ta ún karni’ . . . Pues, no laga ningun hende separá loke Dios a uni bou di un yugo.” (Mateo 19:5, 6) Aki, por lo ménos dos prinsipio ta ser destaká.

“NAN DOS LO TA ÚN KARNI.” Matrimonio ta e relashon di mas íntimo ku ta eksistí, i amor por protehá un pareha pa nan no bira infiel na otro, esta, ku sea e esposo òf esposa ta bira “ún karni” ku un otro hende. (1 Korintionan 6:16; Hebreonan 13:4) Si esei sosodé, e víktima ta pèrdè konfiansa den su pareha i e matrimonio por asta kibra. Anto si nan tin yu, e daño por ta asta mas grandi. Nan yunan por sinti nan insigur, ku ningun hende no ta stima nan i asta nan por haña rabia.

“NO LAGA NINGUN HENDE SEPARÁ LOKE DIOS A UNI.” E union matrimonial ta sagrado. Parehanan ku tin e punto di bista ei di matrimonio ta hasi esfuerso pa fortalesé nan matrimonio. Ora nan tin problema ku otro, nan no ta buska manera pa kibra e matrimonio. Nan amor ta fuerte. E tipo di amor ei ta “soportá tur kos” i ta yuda e pareha resolvé nan problemanan pa nan por tin pas i armonia den famia.

Ora mayornan ta demostrá ku nan ta stima otro dor di hasi sakrifisio propio, nan yunan por benefisiá masha hopi mes di esei. Un mucha muhé di 20 aña ku yama Jessica a bisa: “Mi mama ku mi tata ta ègt stima i respetá otro. Ora mi mira e rèspèt ku mi mama ta mustra pa mi tata, mi ke ta manera mi mama.”

Amor ta e kualidat di mas importante di Dios. P’esei Beibel ta bisa: “Dios ta amor.” (1 Huan 4:8) I no ta nada straño ku Beibel ta yama Yehova “e Dios felis.” (1 Timoteo 1:11) Nos tambe lo ta felis si nos imitá e kualidatnan di nos Kreador, prinsipalmente su amor. Efesionan 5:1 i 2 ta bisa: “Imitá Dios, komo yunan stimá, i sigui kana den amor.”