Adkerí un Curason Cu Ta Agradá Jehova

“Crea den mi asta un curason puru, o Dios, i pone den mi un spiritu nobo, unu constante.”—SALMO 51:10.

 1, 2. Pakico nos mester ta interesá den nos curason?

E TABATA un homber haltu i cu bon tipo. Ora profeta Samuel a mir’é, el a keda asina impresioná cu el a concluí cu e yu mayor aki di Jese tabata esun cu Dios a scoge como rey despues di Saul. Pero Jehova a declará: “No mira [e yu homber ei] su aparencia ni e haltura di su estatura, pasobra mi a rechas’é. . . . Hende ta mira loke ta visibel na bista; pero en cuanto Jehova, e ta mira loke e curason ta.” Esun cu Jehova a scoge a resultá di ta Jese su yu menor, David: “un homber agradabel na su curason.”—1 Samuel 13:14; 16:7.

² Manera Dios a splica despues, e por lesa curason humano: “Ami, Jehova, ta scudriñá e curason, ta examiná e nirnan, sí, pa duna cada un di acuerdo cu su camindanan, di acuerdo cu e fruta di su tratonan.” (Jeremías 17:10) Sí, ‘Jehova ta e examinadó di curason.’ (Proverbionan 17:3) Pero kico ta e curason den hende cu Jehova ta examiná? I kico nos por haci pa adkerí un curason cu ta agrad’é?

“E Persona Secreto di Curason”

 3, 4. Den ki sentido e palabra “curason” ta ser usá primordialmente den Bijbel? Duna ehempel.

³ E palabra “curason” ta aparecé rond di mil bes den e Scritura Santu. Den mayoria caso e ta ser usá den un sentido figurativo. Por ehempel, Jehova a bisa profeta Moises: “Papia cu e yunan di Israel, pa nan recaudá un contribucion pa mi: For di tur hende kende su curason ta incit’é, boso tin cu recaudá e contribucion di mi.” I esnan cu a duna contribucion “a bini, tur hende kende su curason a impuls’é.” (Éxodo 25:2; 35:21) Esaki ta mustra claramente cu un aspecto dje curason figurativo ta motivacion, esta e forsa interno cu ta impulsá nos na accion. Tambe nos curason figurativo ta reflehá nos emocionnan i sintimentunan, nos deseonan i tierno cariño. Un curason por herebé di rabia of yena cu miedu, kibra di tristesa of excitá di goso. (Salmo 27:3; 39:3; Juan 16:22; Romanonan 9:2) E por ta orguyoso of humilde, amoroso of yen di odio.—Proverbionan 16:5; Mateo 11:29; 1 Pedro 1:22.

⁴ P’esei mes, hopi bes e “curason” ta ser asociá cu motivacion i emocion, miéntras cu e “mente” tin di haber foral cu intelecto. Ta asina mester comprendé e nificacion dje términonan aki ora nan ta aparecé den e mésun contexto den e Scritura. (Mateo 22:37; Filipensenan 4:7) Pero esun no ta excluí e otro. Por ehempel, Moises a urgi e israelitanan: “Bo tin cu recordá den bo curason [of, “bo tin cu laga bo mente corda,” nota na pia di página] cu Jehova ta e Dios berdadero.” (Deuteronomio 4:39) Jesus a bisa e escribanan cu a conspirá contra dje: “Pakico boso ta pensando cosnan malbado den boso curason?” (Mateo 9:4) Por asociá “comprendimentu,” “conocimentu” i “razonamentu” tambe cu e curason. (1 Reynan 3:12; Proverbionan 15:14; Marco 2:6) P’esei, e curason figurativo por enbolbé nos intelecto tambe, esta nos pensamentunan of nos comprendimentu.

 5. Kico e curason figurativo ta representá?

⁵ Segun un obra di referencia, e curason figurativo ta representá “e parti central en general, e parti paden, pues e hende interior manera e ta manifestá su mes den tur su vários actividadnan, den su deseonan, su cariño, emocionnan, pasionnan, propósitonan, su pensamentunan, percepcionnan, imaginacionnan, su sabiduria, conocimentu, abilidad, su creencianan i su razonamentunan, su memoria i su tinu.” E ta representá loke nos realmente ta di paden, “e persona secreto di curason.” (1 Pedro 3:4) Esei ta loke Jehova ta mira i examiná. P’esei, David por a pidi den oracion: “Crea den mi asta un curason puru, o Dios, i pone den mi un spiritu nobo, unu constante.” (Salmo 51:10) Con nos por adkerí un curason puru?

“Dedicá Boso Curason” n’e Palabra di Dios

 6. Ki exhortacion Moises a duna Israel tempu cu nan tabata kampeer riba e yanuranan di Moab?

⁶ Ora Moises a animá i spierta e yunan di Israel reuní riba e yanuranan di Moab promé cu nan a drenta e Tera Primintí, el a bisa: “Tuma na pechu [literalmente: dedicá boso curason na] tur e palabranan cu mi ta papiando como spiertamentu na boso awe, pa boso por manda boso yunan pa soru cumpli cu tur e palabranan dje ley aki.” (Deuteronomio 32:46) E israelitanan mester a “paga bon tinu.” (Beibel Santu) Ta solamente dor di conocé e mandamentunan di Dios cabalmente nan lo por a inculcá esakinan den nan yunan.—Deuteronomio 6:6-8.

 7. Kico ta nificá ‘dedicá nos curason’ n’e Palabra di Dios?

⁷ Un rekisito clave pa adkerí un curason puru ta di gana conocimentu exacto dje boluntad i propósito di Dios. Ta un solo fuente tin dje conocimentu ei: e Palabra inspirá di Dios. (2 Timoteo 3:16, 17) Pero conocimentu fo’i cabes so no ta bai yuda nos adkerí un curason cu ta agradá Jehova. Pa conocimentu por tin efecto riba loke nos realmente ta di paden, nos tin cu ‘dedicá nos curason’ na loke nos ta siña, esta ‘tum’é na pechu.’ (Deuteronomio 32:46, An American Translation) Con nos ta haci esaki? E salmista David ta splica: “Mi a corda dianan di hopi tempu atras; mi a meditá riba tur bo actividad; di buena gana mi a mantené mi mes intensamente interesá den e obra di bo propio mannan.”—Salmo 143:5.

 8. Ki preguntanan nos por meditá ariba ora nos ta studia?

⁸ Nos tambe tin cu meditá cu aprecio riba Jehova su actividad. Ora nos ta lesa Bijbel of publicacionnan basá riba Bijbel, nos tin cu meditá riba preguntanan manera: ‘Kico mi ta siña for di esaki tocante Jehova? Ki atributonan di Jehova mi ta mira desplegá aki? Kico e relato aki ta siña mi tocante loke Jehova ta gusta i loke e no ta gusta? Kico ta e consecuencianan di sigui un rumbo cu Jehova ta stima, compará cu unu cu e ta odia? Ki relacion e informacion aki tin cu loke mi sa caba?’

 9. Con balioso studio personal i meditacion ta?

⁹ Lisaa di 32 aña di edad ta splica con el a bin apreciá e balor di studia i meditá cu un propósito: “Despues cu mi a bautisá na 1994, mi tabata bastante activo den e berdad pa mas o ménos dos aña. Mi tabata asistí na tur e reunionnan cristian, dedicá 30 pa 40 ora pa luna na sirbishi di veld i asociá cu compañeronan cristian. Despues mi a cuminsá drif bai. Mi a bai asina atras te cu asta mi a falta cu e ley di Dios. Pero mi a recobrá mi sano huicio i a dicidí di drecha mi bida. Mi ta masha contentu cu Jehova a mira mi repentimentu i a aceptá mi bek! Hopi bes mi a puntra mi mes: ‘Pakico mi a cai for dje berdad?’ E contesta cu ta bini bek cada bes na mi mente ta cu mi a neglishá di studia i meditá cu un propósito. E berdad di Bijbel simplemente no a alcansá mi curason. Di awor padilanti, studio personal i meditacion lo ta semper un parti importante di mi bida.” Segun cu nos ta crece den nos conocimentu di Jehova, di su Yu i su Palabra, ta masha vital pa nos apartá tempu pa meditá na un manera significativo!

10. Pakico ta urgente pa nos traha tempu pa studio personal i meditacion?

¹⁰ Den e mundu druk aki, ta difícil berdad pa haña tempu pa studia i meditá. Sin embargo, awe cristiannan ta pará na drempel di un Tera Primintí maraviyoso: Dios su mundu nobo di husticia. (2 Pedro 3:13) Sucesonan asombroso, manera e destruccion di “Babilonia e Grandi” i e atake di “Gog dje tera di Magog” contra e pueblo di Jehova, ta djis tras di porta. (Revelacion 17:1, 2, 5, 15-17; Ezekiel 38:1-4, 14-16; 39:2) Loke tin den futuro lo por pone nos amor pa Jehova na prueba. Ta urgente pa nos cumpra e tempu oportuno awor i dedicá nos curason n’e Palabra di Dios!—Efesionan 5:15, 16.

‘Prepará Bo Curason pa Consultá e Palabra di Dios’

11. Den ki sentido nos curason ta comparabel cu tera?

¹¹ E curason figurativo ta comparabel cu tera den cua por planta e simia dje berdad. (Mateo 13:18-23) Generalmente, hende sa prepará of cultivá e tera literal pa garantisá crecementu saludabel di cultivo. Mescos tambe, mester prepará, of condicioná, e curason pa e ta mas receptivo p’e Palabra di Dios. E sacerdote Ésdras “a prepará su curason pa consultá e ley di Jehova i pa cumpli cuné.” (Ésdras 7:10) Con nos por prepará nos curason?

12. Kico lo yuda prepará e curason pa studia?

¹² Oracion sincero ta prepará nos curason di un manera excelente pa consultá e Palabra di Dios. Reunionnan cristian di adoradónan berdadero ta habri i cera cu oracion. Ta masha apropiado pa nos cuminsá tur periodo di studio personal di Bijbel cu un oracion sincero i despues mantené un actitud di debocion durante nos studio!

13. Pa adkerí un curason cu ta agradá Jehova, kico nos tin cu haci?

¹³ Mester prepará e curason figurativo p’e deshací di prehuicio i opinionnan predeterminá. E lidernan religioso dje tempu di Jesus no tabata dispuesto pa haci esaki. (Mateo 13:15) Di otro banda, Maria mama di Jesus, a saca conclusionnan “den su curason” basá riba berdadnan cu el a tende. (Lucas 2:19, 51) El a bira un fiel disipel di Jesus. Lidia di Tiatira a scucha Pablo, “i Jehova a habri su curason hanchu p’e presta atencion.” E tambe a bira un creyente. (Echonan 16:14, 15) Laga nos nunca pega rígidamente na ideanan personal of na conceptonan di doctrina cu nos ta gusta hopi. Mas bien, laga nos ta dispuesto pa “laga Dios ser hañá berdadero, aunke tur hende ser hañá mentiroso.”—Romanonan 3:4.

14. Con nos por prepará nos curason pa scucha durante reunionnan cristian?

¹⁴ Ta specialmente importante pa prepará e curason pa scucha durante reunionnan cristian. Distraicionnan por kita nos atencion for di loke ta ser bisá. E palabranan papiá lo ehercé tiki influencia riba nos si nos ta preocupá cu cosnan cu a sosodé durante dia of preocupá cu loke ta warda nos mañan. Nos mester ta firmemente determiná pa scucha i siña si nos kier saca beneficio for di loke ta ser bisá. Nos por ricibí hopi beneficio si nos ta determiná pa comprendé e textonan splicá i e nificacion cu ta ser duná di nan!—Nehemías 8:5-8, 12.

15. Con humildad ta yuda nos bira mas receptivo pa siñansa?

¹⁵ Mescos cu bon vitamina por drecha tera pa planta, asina tambe ora nos ta cultivá humildad, hamber pa cosnan spiritual, confiansa, temor di Dios i amor pa Dios por enrikesé nos curason figurativo. Humildad ta suavisá e curason i ta yuda nos bira mas receptivo pa siñansa. Jehova a bisa Rey Hosías di Huda: “Dor cu bo curason tabata suave, di manera cu bo a humiyá bo mes pa causa di Jehova ora bo a tende loke mi a papia . . . i bo a cuminsá yora mi dilanti, ami, sí, ami, a tende.” (2 Reynan 22:19) Hosías su curason tabata humilde i receptivo. Humildad a permití Jesus su disipelnan “iletrá i gewoon” capta i aplicá berdadnan spiritual cu hombernan “sabí i intelectual” no a cai ariba. (Echonan 4:13; Lucas 10:21) Pues, laga nos “humiyá nos mes dilanti nos Dios” segun cu nos ta purba adkerí un curason cu ta agradá Jehova.—Ésdras 8:21.

16. Pakico esfuerso ta necesario pa cultivá un hamber pa alimento spiritual?

¹⁶ Jesus a bisa: “Felis ta esnan cu ta conciente di nan necesidad spiritual.” (Mateo 5:3) Aunke nos a haña e capacidad pa desaroyá nos mes spiritualmente, preshonnan dje mundu malbado aki of característicanan manera flohera por pone nos lubidá nos necesidad. (Mateo 4:4) Nos tin cu cultivá un apetit saludabel pa alimento spiritual. Asta ora na promé instante nos no haña lesamentu di Bijbel i studio personal algu agradabel, si nos persistí nos lo haña cu conocimentu lo ‘bira agradabel pa nos mes alma,’ di manera cu nos ta anhelá p’e ora di studia yega.—Proverbionan 2:10, 11.

17. (a) Pakico Jehova ta digno di nos pleno confiansa? (b) Con nos por cultivá confiansa den Dios?

¹⁷ Rey Sálomon a spierta: “Confia den Jehova cu tur bo curason i no lèn riba bo mes comprendimentu.” (Proverbionan 3:5) Un curason cu ta confia den Jehova sa cu kico cu E pidi of manda mediante su Palabra ta semper corecto. (Isaías 48:17) Jehova sigur ta digno di nos pleno confiansa. E por realisá tur loke ta su propósito. (Isaías 40:26, 29) Sí, asta su nomber cu ta nificá literalmente “E Ta Causa pa Bira,” ta edificá confiansa den su abilidad pa cumpli cu loke el a primintí! E ta “hustu den tur su camindanan i leal den tur su obranan.” (Salmo 145:17) Claro cu pa cultivá confiansa den dje, nos tin cu “purba i mira cu Jehova ta bon” dor di aplicá loke nos ta siña for di Bijbel den nos bida personal i dor di meditá riba e beneficio cu esaki ta producí.—Salmo 34:8.

18. Con temor di Dios ta yuda nos ser receptivo pa su guia?

¹⁸ Sálomon a señalá un otro cualidad cu ta haci nos curason receptivo pa guia divino, ora el a declará: “Teme Jehova i apartá bo di loke ta malu.” (Proverbionan 3:7) Jehova a bisa relacioná cu Israel di antigwedad: “Si solamente nan desaroyá e curason aki di nan p’e teme mi i semper warda tur mi mandamentunan, afin cu por bai bon cu nan i nan yunan te na tempu indefiní!” (Deuteronomio 5:29) Sí, esnan cu ta teme Dios ta obedec’é. Jehova tin e abilidad “pa mustra su forsa na fabor di esnan kende nan curason ta completo pa cuné” i imponé castigu riba esnan cu ta desobedec’é. (2 Crónicanan 16:9) Laga e temor respetuoso di desagradá Dios dirigí tur nos accion, pensamentu i emocionnan.

‘Stima Jehova cu Henter Bo Curason’

19. Ki papel amor ta hunga den haci nos curason receptivo p’e guia di Jehova?

¹⁹ Ta amor, mas cu tur otro cualidad, ta ègt haci nos curason receptivo p’e guia di Jehova. Un curason yen di amor pa Dios ta haci un persona ansioso pa sa kico ta agradá Dios i kico ta desagrad’é. (1 Juan 5:3) Jesus a bisa: “Bo tin cu stima Jehova bo Dios cu henter bo curason i cu henter bo alma i cu henter bo mente.” (Mateo 22:37) Laga nos profundisá nos amor pa Dios dor di crea e custumber di meditá riba su bondad, dor di papia regularmente cuné manera cu un amigu íntimo i dor di ta ansioso pa papia tocante dje cu otro hende.

20. Con nos por adkerí un curason cu ta agradá Jehova?

²⁰ En resúmen: Adkerí un curason cu ta agradá Jehova ta encerá permití e Palabra di Dios influenciá loke nos ta di paden, esta e persona secreto di curason. Studio personal significativo dje Scritura i meditacion cu aprecio ta un mester. Nos por haci esakinan mihó si nos tin un curason prepará: un curason cu ta liber di prehuicio, unu cu ta yen di cualidadnan cu ta haci nos receptivo pa siñansa! Sí, cu yudansa di Jehova, nos por adkerí un bon curason. Pero, ki medidanan nos por tuma pa protehá nos curason?

[Nota]

Con Lo Bo Respondé?

• Kico ta e curason figurativo cu Jehova ta examiná?

• Con nos por ‘dedicá nos curason’ n’e Palabra di Dios?

• Con nos mester prepará nos curason pa consultá e Palabra di Dios?

• Despues di a considerá e material aki, kico bo ta sinti bo motivá pa haci?

[Plachi na página 17]

David a meditá cu aprecio riba cosnan spiritual. Abo tambe ta hacié?

[Plachinan na página 18]

Prepará bo curason promé cu bo studia e Palabra di Dios