Busca Jehova cu un Curason Prepará

E SACERDOTE israelita, Esdras, tabata un investigadó, erudito, copista i maestro sobresaliente dje Ley. Pa cristiannan djawe e ta tambe un excelente ehempel di sirbishi di henter alma. Con asina? Dor cu el a mantené su debocion na Dios asta ora e tabata biba den Babilonia, un stad yen cu dios falsu i adoracion di demoño.

No tabata pa casualidad cu Esdras tabata deboto na Dios. El a traha pa logra esei. Sí, e ta bisa nos cu el “a prepará su curason pa consultá e ley di Jehova i pa cumpli cuné.”—Esdras 7:10.

Mescos cu Esdras, Jehova su pueblo djawe kier haci tur loke Jehova ta pidi di nan miéntras nan ta biba den un mundu cu ta contra adoracion berdadero. P’esei, laga nos analisá maneranan den cua nos tambe por prepará nos curason, esta, e persona interno—cu ta encerá nos pensamentu, actitud, deseo i motivacionnan—pa “consultá e ley di Jehova i pa cumpli cuné.”

Con pa Prepará Nos Curason

“Prepará” ta nificá “pone cla di antemano pa un cierto propósito: pone den condicion pa un uso, aplicacion of disposicion en particular.” Naturalmente, ta si bo a gana conocimentu exacto dje Palabra di Dios i a dedicá bo bida na Jehova, e ora ei numa bo curason a duna prueba di ta den un condicion prepará i por compar’é cu “e tera excelente” cu Jesus a papia di dje den su comparacion dje sembradó.—Mateo 13:18-23.

Sin embargo, nos curason tin mester di atencion i refinamentu constant. Di con? Pa dos motibu. Promé, pasobra tendencianan dañino, mescos cu mal yerba den un hardin, por saca rais lihé, foral durante “e último dianan” aki cu e “aire” di Satanas su sistema ta yená mas cu nunca cu simianan perhudicial dje manera di pensa carnal. (2 Timoteo 3:1-5; Efesionan 2:2) E di dos motibu tin di haber cu e tera mes. Si no cuida e tera, e por seca lihé, bira duru i infructífero. Of kisas hopi hende ta cana trapa riba e tera sin tene cuenta i hacié un monton duru. Ta mescos cu e tera figurativo di nos curason. Si nos neglish’é of laga hende cu no ta interesá den nos bienestar spiritual trap’é, e por bira infértil.

Ta ki importante anto, pa nos tur aplicá e amonestacion bíblico: “Mas cu tur cos cu tin cu ser vigilá, protehá bo curason, pasobra for di dje ta e fuentenan di bida.”—Proverbionan 4:23.

Factornan Cu Ta Enrikesé e “Tera” di Nos Curason

Laga nos considerá algun factor of cualidadnan cu lo enrikesé e “tera” di nos curason i asina yuda nos crece bon. Naturalmente tin hopi cos cu lo mehorá nos curason, pero awor nos lo considerá seis: reconocé nos necesidad spiritual, humildad, onestidad, temor di Dios, fe i amor.

Jesus a bisa: “Felis ta esnan cu ta conciente di nan necesidad spiritual.” (Mateo 5:3) Mescos cu hamber físico ta recordá nos di nos necesidad pa come, asina ser conciente di nos necesidad spiritual ta mantené nos hambrá pa cuminda spiritual. Di naturalesa, hende tin un deseo fuerte pa tal cuminda, pasobra e ta duna bida propósito i nificacion. Preshon for di Satanas su sistema di cosnan of puru flohedad ora ta trata di studia, kisas por haci nos ménos conciente dje necesidad aki. Tog, Jesus a bisa: “Hende mester biba, no di pan so, sino di tur expresion cu ta sali for dje boca di Jehova.”—Mateo 4:4.

Den sentido literal, cuminda regular, balansá i saludabel ta promové un curpa salú, i ta pone cu e curpa ta desaroyá tambe apetit p’e siguiente cuminda ora su tempu yega. Esei ta e caso tambe den sentido spiritual. Kisas bo no ta haña cu bo ta un persona cu ta gusta studia, pero si bo hacié un custumber pa lesa e Palabra di Dios tur dia, i bo ta studia publicacionnan basá riba Bijbel riba un base regular, lo bo ripará cu bo apetit ta aumentá. De facto, lo bo anticipá ansiosamente bo periodonan di studia Bijbel. P’esei, no entregá lihé, traha duru pa desaroyá un apetit spiritual saludabel.

Humildad Ta Suavisá Curason

Humildad ta un factor vital pa logra un curason prepará, pasobra e ta haci cu nos por ser siñá i ta yuda nos aceptá conseho i coreccion amoroso mas lihé. Considerá e excelente ehempel di rey Hosías. Durante su reinado nan a haña un documento cu a contené e Ley di Dios cu el a duna mediante Moises. Ora Hosías a tende e palabranan dje Ley i a realisá con leu su antepasadonan a desviá for di adoracion puru, el a sker su pañanan i yora dilanti Jehova. Di con e Palabra di Dios a toca curason dje rey asina profundo? E relato ta bisa cu su curason tabata “moli,” i p’esei el a humiyá su mes ora el a tende e palabranan di Jehova. Jehova a tuma nota di Hosías su curason humilde i receptivo i a bendicion’é p’esei.—2 Reynan 22:11, 18-20.

Humildad a pone cu Jesus su disipelnan “iletrá i gewoon” a capta i aplicá berdadnan spiritual cu a scapa atencion di “hende sabí i intelectual” pero “na moda carnal” so. (Echonan 4:13; Lucas 10:21; 1 Corintionan 1:26) E últimonan aki no tabata prepará pa aceptá Jehova su palabra pasobra orguyo a haci nan curason duru. Ta straño anto cu Jehova ta odia orguyo?—Proverbionan 8:13; Daniel 5:20.

Onestidad i Temor di Dios

Profeta Jeremías a skirbi cu “e curason ta mas traicionero cu cualkier otro cos i ta desesperá. Ken por conoc’é?” (Jeremías 17:9) E curason traicionero aki ta manifestá su mes den vários manera, por ehempel, ora nos ta bin cu excuus ora nos haci malu. E ta presentá tambe ora nos ta hustificá nos defectonan serio di personalidad. Sin embargo, onestidad lo yuda nos vence un curason traicionero dor cu e ta yuda nos enfrentá nos berdad pa nos por mehorá. E salmista a desplegá un onestidad asina ora el a pidi den oracion: “Examiná mi, o Jehova, i pone mi na prueba; refiná mi nirnan i mi curason.” Ta bisto cu e salmista a prepará su curason pa aceptá refinamentu i prueba di Jehova, asta si esaki lo por a nificá reconocé cu e tabatin característicanan impuru pa asina e por a vence nan.—Salmo 17:3; 26:2.

Temor di Dios, cu ta encerá “odia maldad,” ta un yudansa poderoso den e proceso di refinamentu aki. (Proverbionan 8:13) Aunke e ta apreciá Jehova su bondad amoroso, un persona cu realmente ta teme Jehova ta semper conciente cu Jehova tin e poder pa duna castigu, asta morto, na esnan cu desobedec’é. Jehova a mustra cu esnan cu ta tem’é lo obedec’é tambe, ora el a bisa di Israel: “Si solamente nan desaroyá e curason aki di nan p’e teme mi i semper warda tur mi mandamentunan, afin cu por bai bon cu nan i nan yunan te na tempu indefiní!”—Deuteronomio 5:29.

Ta bisto anto, cu e obhetivo di temor di Dios no ta pa mantené nos den estado di sumision terorisá, sino pa motivá nos pa obedecé nos Tata amoroso, kende nos sa tin nos mihó interesnan na pechu. De facto, un temor di Dios asina ta edificante i e ta asta duna goso, manera Jesucristo mes a mustra ampliamente.—Isaías 11:3; Lucas 12:5.

Un Curason Prepará Ta Ricu na Fe

Un curason cu fe fuerte sa cu kico cu Jehova pidi of manda mediante su Palabra, ta semper corecto i pa nos mes probecho. (Isaías 48:17, 18) Un persona cu un curason asina ta haña satisfaccion i contentamentu profundo dor di aplicá e exhortacion na Proverbionan 3:5 i 6, cu ta bisa: “Confia den Jehova cu tur bo curason i no lèn riba bo mes comprendimentu. Den tur bo camindanan tuma nota di dje, i e mes lo haci bo camindanan stret.” Sin embargo, un curason cu falta fe lo no ta incliná pa confia den Jehova, foral si esaki ta encerá sacrificio, manera simplificá bo bida pa asina enfocá riba interesnan di Reino. (Mateo 6:33) P’esei Jehova tin bon motibu pa considerá un curason sin fe como unu “malbado.”—Hebreonan 3:12.

Nos fe den Jehova ta ser reflehá den hopi área, incluso den loke nos ta haci den privá na nos mes cas. Tuma por ehempel, e principio na Galationan 6:7: “No sea gañá: hende no por tene mofa di Dios. Pasobra kico cu un hende sembra, esaki lo e cosechá tambe.” Nos lo reflehá nos fe den e principio aki den cosnan manera e películanan cu nos ta wak, e bukinan cu nos ta lesa, cuantu nos ta studia Bijbel i den nos oracionnan. Sí, un fe fuerte cu ta impulsá nos pa sembra “cu e spiritu na bista” ta un factor clave pa logra un curason cu ta prepará pa aceptá e Palabra di Jehova i obedec’é.—Galationan 6:8.

Amor—E Cualidad di Mas Grandi

Mas cu tur e otro cualidadnan, amor ta loke realmente ta haci e tera di nos curason receptivo pa e Palabra di Jehova. P’esei, ora apostel Pablo a compará e cualidad di amor cu fe i speransa, el a describí amor como “esun mas grandi di esakinan.” (1 Corintionan 13:13) Un curason yen di amor pa Dios ta haña satisfaccion i goso intenso den obedecé Dios; siguramente e rekisitonan di Dios no ta irit’é. Apostel Juan a bisa: “Esaki ta loke e amor di Dios ta nificá, cu nos ta warda su mandamentunan; i tog su mandamentunan no ta un carga pisá.” (1 Juan 5:3) Na armonia cu e pensamentu ei, Jesus a bisa: “Si un hende ta stima mi, lo e observá mi palabra, i mi Tata lo stim’é.” (Juan 14:23) Ripará cu un amor asina ta ser debolbé. Sí, Jehova tin amor profundo pa esnan cu ta hala cerca dje den amor.

Jehova sa cu nos ta imperfecto i cu regularmente nos ta peca contra dje. Tog, e no ta mantené su mes alehá for di nos. Loke Jehova ta busca den su sirbidónan ta “un curason completo,” unu cu ta impulsá nos pa sirbié boluntariamente cu un “alma gososo.” (1 Crónicanan 28:9) Naturalmente, Jehova sa cu ta tuma tempu i esfuerso pa nos cultivá bon cualidadnan den nos curason i asina producí e frutanan di spiritu. (Galationan 5:22, 23) P’esei, e ta tene pacenshi cu nos, “pasobra e mes sa bon con nos ta formá, cordando cu nos ta stof.” (Salmo 103:14) Reflehando e mésun actitud, Jesus nunca no a criticá su disipelnan severamente pa motibu di nan fayonan, sino cu pacenshi el a yuda nan i animá nan. Tal amor, misericordia i pacenshi di Jehova i Jesus no ta motivá bo pa stima nan mas tantu?—Lucas 7:47; 2 Pedro 3:9.

Si tin biaha bo tin un lucha pa ranca hábitonan manera mal yerba cu ta profundamente ankrá of pa kibra na pida-pida característicanan resistente manera klei, no bira deprimí of desanimá. Mas bien, sigui traha pa bo mehorá miéntras bo ta “perseverá den oracion” i tambe den suplicá Jehova frecuentemente pa su spiritu. (Romanonan 12:12) Cu su yudansa boluntario, abo, mescos Esdras, lo logra den haña un curason completamente prepará “pa consultá e ley di Jehova i pa cumpli cuné.”

[Plachi na página 31]

Esdras a mantené su debocion na Dios asta den Babilonia

[Rekonosementu pa Potrèt na página 29]

Garo Nalbandian