Un Tempu pa Keda Lantá

“Den tur nacion e bon nobo tin cu ser predicá promé. . . . Pero esun cu a wanta te na fin ta esun cu lo ser salbá.”—MARCO 13:10, 13.

 1. Pakico nos mester wanta i cobra ánimo?

WANTA nos tin cu wanta—meimei di un generacion sin fe i trocí! For di 1914 un generacion di hende a bira corupto, mescos cu den Jesus su dia. I awe e corupcion ta riba un escala mundial. Den e “último dianan” aki, e “tempu crítico, duru pa trata cuné” describí dor di apostel Pablo ta afligiendo humanidad. ‘Hombernan malbado i gañadornan ta sigui avansá di malu pa pió.’ Claramente, “e mundu henter ta drumí den e poder dje malbado,” Satanas e Diabel, kende awor ta haciendo su esfuerso final pa ruiná e tera. Pero cobra ánimo! Tin un binidero “tribulacion grandi” cu lo trece alivio permanente pa tur esnan cu ta stima husticia.—2 Timoteo 3:1-5, 13; 1 Juan 5:19; Revelacion 7:14.

 2. Con profecia a ser cumplí na 1914?

² Felismente, Jehova a entronisá awor Señor Jesucristo den cielu, como preparacion p’e eliminacion di humanidad su enemigunan opresivo. (Revelacion 11:15) Mescos cu n’e promé binida di Mesías, asina den e siglo aki tambe un profecia remarcabel cu Daniel a skirbi a ser cumplí. Na Daniel 4:16, 17, 32, e ta conta nos dje suspension di gobernacion legítimo riba tera pa un periodo di “siete tempu.” Den nan cumplimentu principal, e siete tempu aki ta monta na siete aña bíblico di 360 ‘dia’ cada un, of 2.520 aña na tur.a Nan a core for di 607 P.E.C., ora Babilonia a cuminsá trapa bou di su pia e reino di Israel, te 1914 E.C., e aña di Jesus su entronisacion den cielu como humanidad su Rey legítimo. E ora ei “e tempu señalá dje nacionnan” a terminá. (Lucas 21:24) Pero e nacionnan a nenga di someté nan n’e Reino Mesiánico entrante.—Salmo 2:1-6, 10-12; 110:1, 2.

 3, 4. (a) Ki comparacion por ser hací di sucesonan di promé siglo cu esnan di nos tempu? (b) Ki preguntanan al caso por ser hací?

³ Segun cu e di 70 siman di aña (29-36 E.C.) tabata acercando, i atrobe segun cu e aña 1914 tabata yegando cerca, e pueblo temeroso di Dios tabata spera e yegada di Mesías. I en berdad el a yega! Pero, den tur dos caso, su manera di aparicion tabata diferente for dje expectativa. Den tur dos caso tambe, despues di un periodo di tempu comparativamente corticu, un “generacion” malbado finalmente ta sufri di ehecucion pa medio di decreto divino.—Mateo 24:34.

⁴ Den nos artículo anterior, nos a tuma nota con e generacion hudiu malbado cu a exigí e sanger di Jesus a yega na su fin. Kico, anto, dje generacion ruinoso di humanidad cu asta awor ta opon’é of ignor’é? Na ki tempu huicio riba e generacion sin fe aki lo ser ehecutá?

“Sigui Vigilá”!

 5. (a) Pa ki bon motibu nos no tin nodi sa e tempu di Jehova su “dia i ora”? (b) Segun Marco, cu ki conseho sano Jesus a concluí su profecia?

⁵ Despues cu el a profetisá di sucesonan cu lo hiba te na un tempu di “tribulacion grandi,” Jesus a agregá: “En cuanto e dia i ora ei ningun hende no sa, ni e angelnan di cielu ni e Yu, sino e Tata so.” (Mateo 24:3-36; Marco 13:3-32) Nos no tin nodi sa e tempu exacto di cumplimentu di sucesonan. Mas bien, nos enfoke mester ta riba mantené vigilancia, cultivá fe fuerte i keda ocupá den Jehova su sirbishi—no riba calculacion di un fecha. Jesus a concluí su gran profecia bisando: “Sigui mira, keda lantá, pasobra boso no sa ki ora e tempu señalá ta. . . . Sigui vigilá . . . Loke mi ta bisa boso, mi ta bisa tur, Sigui vigilá.” (Marco 13:33-37) Peliger ta sluip den e scuridad dje mundu djawe. Nos mester keda lantá!—Romanonan 13:11-13.

 6. (a) Riba kico nos fe mester ta ancrá? (b) Con nos por “conta nos dianan”? (c) Kico Jesus básicamente kier men cu “generacion”?

⁶ Nos no solamente tin cu presta atencion n’e profecianan inspirá relacioná cu e dianan final aki di un sistema malbado sino tambe nos tin cu ancra nos fe na promé lugá riba e precioso sacrificio di Cristo Jesus i Dios su promesanan maraviyoso basá riba esei. (Hebreonan 6:17-19; 9:14; 1 Pedro 1:18, 19; 2 Pedro 1:16-19) Ansioso pa mira e fin dje sistema malbado aki, e pueblo di Jehova a speculá algun biaha tocante e tempu ora e “tribulacion grandi” lo dal aden, asta relacionando esaki cu calculacionnan di loke e duracion di bida di un generacion ta desde 1914. Sin embargo, nos “ta trece un curason di sabiduria aden,” no dor di speculacion riba cuantu aña of dia ta forma un generacion, sino dor di pensa riba con nos ta “conta nos dianan” pa trece alabansa gososo na Jehova. (Salmo 90:12) En bes di duna un regla pa midi tempu, e término “generacion” manera Jesus a us’é ta referí principalmente na hende contemporáneo di un cierto periodo histórico, cu nan característicanan identificador.b

 7. Kico un profesor di historia ta skirbi tocante “e generacion di 1914,” i con esaki ta relacioná cu Jesus su profecia?

⁷ Na armonia cu lo anterior, profesor di historia Robert Wohl a skirbi den su buki The Generation of 1914: “Un generacion histórico no ta ser definí dor di su fechanan cronológico . . . E no ta un zona definí dor di fechanan.” Pero el a mustra cu Guera Mundial I a crea “un sentido aplastante di kiebro cu e pasado,” i el a agregá: “Esnan cu a sobrebibí e guera nunca por a saca for di nan mente cu un mundu a terminá i un otro a cuminsá na augustus 1914.” Ki cierto esei ta! E declaracion aki ta enfocá riba e punto crucial dje asuntu. “E generacion aki” di humanidad desde 1914 a experenciá cambionan spantoso. El a mira e tera bira papa muhá cu e sanger di miyones di hende. Guera, genocidio, terorismo, crímen i maldad a explotá rond mundu. Hamber, enfermedad i inmoralidad a plaga nos globo. Jesus a profetisá: “Boso tambe, ora boso [su disipelnan] mira e cosnan aki sosodé, sabi cu e reino di Dios ta cerca. Di berdad mi ta bisa boso, E generacion aki lo no pasa forbij di ningun manera te ora tur cos sosodé.”—Lucas 21:31, 32.

 8. Con Jehova su profetanan ta enfatisá e necesidad pa keda lantá?

⁸ Sí, e triunfo completo dje Reino Mesiánico ta cerca! Nos por gana algu, anto, dor di busca fecha of dor di speculá riba e duracion literal di un “generacion”? Definitivamente cu no! Habacuc 2:3 ta declará claramente: “E vision ta ainda pa e tempu señalá, i e ta sigui ansha te n’e fin, i lo e no bisa un mentira. Asta si e tarda mes, keda den expectativa di dje; pasobra lo e ser realisá sin falta. Lo e no ta lat.” Jehova su dia di regla cuenta ta pura yega cada bes mas cerca.—Jeremías 25:31-33; Malakías 4:1.

 9. Ki desaroyonan desde 1914 ta mustra cu e tempu ta corticu?

⁹ Ora Cristo su gobernacion di Reino a cuminsá na 1914, Satanas a ser tirá abou n’e tera. Esaki a nificá “ai dje tera . . . pasobra e Diabel a baha cerca boso, teniendo gran rabia, sabiendo cu e tin un periodo di tempu corticu.” (Revelacion 12:12) E tempu ei en berdad ta corticu, compará cu e miles di aña di Satanas su gobernacion. E Reino ta tras di porta, mescos cu Jehova su dia i ora pa ehecutá huicio riba e generacion malbado aki!—Proverbionan 3:25; 10:24, 25.

E “Generacion” cu Ta Pasa Forbij

10. Con “e generacion aki” ta manera esun di Noe su dia?

¹⁰ Laga nos examiná mas di acerca e declaracion di Jesus na Mateo 24:34, 35: “Di berdad mi ta bisa boso cu e generacion aki lo no pasa forbij di ningun manera te ora tur e cosnan aki sosodé. Cielu i tera lo pasa forbij, pero mi palabranan lo no pasa forbij di ningun manera.” E palabranan di Jesus cu ta sigui ta mustra cu ‘ningun hende sa dje dia i dje ora ei.’ Hopi mas importante, e ta mustra cu nos mester evitá e trampanan cu ta rondoná nos den e generacion aki. Pues Jesus ta agregá: “Pasobra mescos cu e dianan di Noe tabata, asina e presencia dje Yu di hende lo ta. Pasobra manera nan tabata den e dianan ei promé cu e diluvio, comiendo i bebiendo, hombernan casando i muhernan siendo duná den matrimonio, te n’e dia cu Noe a drenta den e arca; i nan no a haci caso te cu e diluvio a bini i a hiba nan tur, asina e presencia dje Yu di hende lo ta.” (Mateo 24:36-39) Aki Jesus a compará e generacion di su dia cu esun di Noe su dia.—Génesis 6:5, 9; nota.

11. Ki comparacion di ‘generacionnan’ Jesus a haci, manera Mateo i Lucas ta informá?

¹¹ Esaki no tabata e promé biaha cu e apostelnan a tende Jesus haci e comparacion aki di ‘generacionnan,’ pasobra algun dia mas promé el a declará en cuanto su mes: “E Yu di hende . . . mester pasa den hopi sufrimentu i ser rechasá dor dje generacion aki. Ademas, mescos cu a sosodé den e dianan di Noe, asina lo ta tambe den e dianan dje Yu di hende.” (Lucas 17:24-26) Pues, Mateo capítulo 24 i Lucas capítulo 17 ta haci e mésun comparacion. Den Noe su dia “tur carni [cu] a ruiná nan caminda riba e tera” i cu a ser destruí n’e Diluvio tabata “e generacion aki.” Den Jesus su dia e hendenan hudiu apóstata cu a rechasá Jesus tabata “e generacion aki.”—Génesis 6:11, 12; 7:1.

12, 13. (a) Kico awe ta “e generacion aki” cu mester pasa forbij? (b) Con Jehova su pueblo ta enfrentando awor cu éxito “e generacion perverso i trocí” aki?

¹² P’esei, den e cumplimentu final di Jesus su profecia awe, “e generacion aki” aparentemente ta referí n’e pueblonan di tera cu ta mira e señal di Cristo su presencia pero cu no ta drecha nan camindanan. Na contraste, como disipel di Jesus nos ta nenga di laga e estilo di bida di “e generacion aki” moldea nos. Aunke nos ta den e mundu, nos no mester ta parti di dje, “pasobra e tempu señalá ta cerca.” (Revelacion 1:3; Juan 17:16) Apostel Pablo ta amonestá nos: “Sigui haci tur cos liber di kehamentu i pleitamentu, pa boso por yega di ta liber di culpa i inocente, yunan di Dios sin mancha entre un generacion perverso i trocí, entre cua boso ta briya como iluminadornan den e mundu.”—Filipensenan 2:14, 15; Colosensenan 3:5-10; 1 Juan 2:15-17.

¹³ Nos ‘briyamentu como iluminadornan’ ta incluí no solamente manifestá un personalidad cristian limpi sino, riba tur cos, cumpli cu Jesus su comision profético: “E bon nobo aki dje reino lo ser predicá den tur e tera habitá como un testimonio pa tur nacion; i e ora ei e fin lo yega.” (Mateo 24:14) Ningun hende por bisa na ki tempu e fin ei lo ta, pero nos sa cu e fin di “e generacion aki” di hende malbado lo bini unabes e testimonio ser duná na Dios su satisfaccion “te n’e parti mas lehano dje tera.”—Echonan 1:8.

“E Dia i Ora Ei”

14. Ki spiertamentu tantu Jesus como Pablo a duna pa cu “tempu i temporadanan,” i con nos mester reaccioná?

¹⁴ Ora e testimonio mundial a ser lográ te n’e grado cu Jehova ta proponé, esei lo ta su “dia i ora” pa deshací dje sistema di mundu aki. Nos no tin nodi sa e fecha adelantá. Pues, siguiendo Jesus su ehempel, apostel Pablo a spierta: “Awor en cuanto tempu i temporadanan, rumannan, boso no tin mester pa nada ser skirbí na boso. Pasobra boso mes sa bon cla cu e dia di Jehova ta bini exactamente manera un ladron den anochi. Ki ora cu nan ta bisando: ‘Pas i siguridad!’ e ora ei destruccion di ripiente lo bini riba nan instantáneamente mescos cu e dolor di angustia riba un muher na estado; i nan lo no scapa di ningun manera.” Ripará Pablo su enfoke: ‘Ora nan ta bisando.’ Sí, ora hende ta papia tocante “pas i siguridad,” ora nan ménos ta spera esei, Dios su huicio lo ser ehecutá di ripiente. Ki apropiado Pablo su conseho ta: “Pues, anto, laga nos no drumi manera e otronan, sino laga nos keda lantá i mantené nos huicio”!—1 Tesalonicensenan 5:1-3, 6; mira tambe versículonan 7-11; Echonan 1:7.

15, 16. (a) Pakico nos no mester pensa cu Armagedon ta mas leu cu nos por a kere? (b) Con Jehova su soberania mester ser engrandecé den futuro cercano?

¹⁵ Nos punto di bista mas exacto riba “e generacion aki” ta nificá cu Armagedon ta mas leu cu nos a kere? Di ningun manera! Aunke nos nunca tabata sa e “dia i ora,” Jehova Dios sí semper tabata sa di dje, i e no ta cambia. (Malakías 3:6) Obviamente, e mundu ta hundiendo mas i mas den direccion di ruina final. E necesidad pa keda lantá ta mas crítico cu nunca promé. Jehova a revelá na nos “e cosnan cu mester tuma lugá dentro di poco,” i nos mester respondé cu pleno conciencia di urgencia.—Revelacion 1:1; 11:18; 16:14, 16.

¹⁶ Segun cu e tempu ta acercando, keda lantá, pasobra Jehova ta cerca di trece calamidad riba henter e sistema di Satanas! (Jeremías 25:29-31) Jehova ta bisa: “Siguramente lo mi engrandecé mi mes i santificá mi mes i haci mi mes conocí dilanti e wowonan di hopi nacion; i nan lo tin cu sa cu ami ta Jehova.” (Ezekiel 38:23) E “dia di Jehova” decisivo ei ta yegando cerca!—Joël 1:15; 2:1, 2; Amos 5:18-20; Sofonías 2:2, 3.

Hustu “Cielu Nobo i un Tera Nobo”

17, 18. (a) Segun Jesus i Pedro, con “e generacion aki” ta pasa forbij? (b) Pakico nos mester keda vigilante en coneccion cu conducta i echonan di debocion piadoso?

¹⁷ Relacioná cu ‘tur e cosnan aki cu mester sosodé’ Jesus a bisa: “Cielu i tera lo pasa forbij, pero mi palabranan lo no pasa forbij di ningun manera.” (Mateo 24:34, 35) Probablemente Jesus tabatin na mente e “cielu i tera”—e gobernantenan i esnan cu ta ser goberná—di “e generacion aki.” Apostel Pedro a usa palabranan similar ora el a referí na “e cielu i tera cu ta djawor,” cu ta “wardá pa candela i ta ser reservá p’e dia di huicio i di destruccion di hende malbado.” Siguientemente e ta describí con “Jehova su dia lo bini manera un ladron, den cua cielu [gubernamental] lo pasa forbij” huntu cu un sociedad humano corupto, of “tera,” i su obranan pecaminoso. Despues apostel Pedro ta exhortá nos na “actonan santu di conducta i echonan di debocion piadoso, [segun cu nos ta] spera i tene masha presente e presencia dje dia di Jehova, mediante cua cielu siendo na candela lo ser disolvé i e elementonan siendo intensamente cayente lo dirti!” Kico ta sigui? Pedro ta dirigí nos atencion na ‘cielu nobo i un tera nobo den cua husticia lo biba.’—2 Pedro 3:7, 10-13.c

¹⁸ E “cielu nobo” ei, e gobernacion di Reino dor di Cristo Jesus i su reynan socio, lo drama bendicion riba e hustu sociedad di “tera nobo” di humanidad. Abo ta un miembro prospectivo dje sociedad ei? Si ta asina, bo tin motibu pa hubilá riba e magnífico futuro cu ta sperá bo!—Isaías 65:17-19; Revelacion 21:1-5.

19. Ki gran privilegio nos por disfrutá di dje awor?

¹⁹ Sí, un “generacion” hustu di humanidad ta ser recogé huntu awor aki mes. Awe e “esclabo fiel i discreto” ungí ta percurando educacion divino na armonia cu e palabranan di Salmo 78:1, 4: “Presta oido, O mi pueblo, na mi ley; incliná bo orea n’e dichonan di mi boca . . . , relatando nan asta n’e generacion binidero, e alabansanan di Jehova i su forsa i su cosnan maraviyoso cu el a haci.” (Mateo 24:45-47) Dia 14 di april dje aña aki, den mas cu 75.500 congregacion den alrededor di 230 pais, mas cu 12.000.000 persona rond e tera a asistí n’e Memorial dje morto di Cristo. Abo tabata entre nan? Pone bo fe den Cristo Jesus i ‘inbocá e nomber di Jehova pa salbacion.’—Romanonan 10:10-13.

20. Ya cu “e tempu cu a resta ta reducí,” con nos mester keda lantá, i cu ki prospecto na bista?

²⁰ “E tempu cu a resta ta reducí,” apostel Pablo a bisa. P’esei, ta tempu pa semper keda lantá i ocupá den Jehova su trabou, segun cu nos ta wanta prueba i odio cu un generacion malbado di humanidad ta pone riba nos. (1 Corintionan 7:29; Mateo 10:22; 24:13, 14) Laga nos sigui vigilá, observando tur e cosnan cu Bijbel a pronosticá lo bini riba “e generacion aki.” (Lucas 21:31-33) Dor di hui di tur e cosnan aki i dor di para cu aprobacion divino dilanti e Yu di hende, nos por alcansá finalmente e premio di bida eterno.

[Notanan]

Preguntanan di Repaso:

◻ Notando e cumplimentu di Daniel 4:32, con nos awor mester “sigui vigilá”?

◻ Con e Evangelionan di Mateo i Lucas ta identificá “e generacion aki”?

◻ Segun cu nos ta spera “e dia i ora ei,” kico nos ta observá, i con nos mester respondé?

◻ Kico e prospecto di un hustu “cielu nobo i un tera nobo” mester animá nos pa haci?

[Plachinan na página 17]

Humanidad den sufrimentu lo haña alivio ora e generacion violento i malbado aki pasa forbij

[Rekonosementu]

Alexandra Boulat/Sipa Press

[Rekonosementu]

Man robes i abou: Luc Delahaye/Sipa Press

[Plachi na página 18]

E glorioso “cielu nobo i un tera nobo” ta djis den futuro cercano pa tur rasa di humanidad