“Hesus . . . A Stima Nan te na Fin”

1, 2. Kon Hesus a pasa su último anochi ku su apòstelnan, i dikon e momentonan final aki tabata presioso p’e?

ORA Hesus a reuní ku su apòstelnan den un sala ariba di un kas na Yerusalèm, e tabata sa ku esaki lo tabata su último anochi huntu ku nan. E momento pa bolbe serka su Tata tabata yegando. Den apénas algun ora, nan lo a arestá Hesus i pone su fe na prueba manera nunka promé. Sin embargo, ni sikiera su morto inminente no a kita su atenshon for di e nesesidatnan di e apòstelnan.

² Hesus a bisa e apòstelnan di antemano ku lo el a bai laga nan, pero ainda e tabatin mas kos di bisa pa fortalesé nan pa loke tabata spera nan. P’esei el a pasa e último momentonan presioso aki siñando nan lèsnan masha importante ku lo a yuda nan keda fiel. Su palabranan ta entre esnan mas kariñoso i mas íntimo ku el a yega di kompartí ku nan. Pero ta kiko a pone ku Hesus tabata mas preokupá pa su apòstelnan ku p’e mes? Ta kiko a hasi e último oranan aki ku nan asina presioso p’e? Den un solo palabra: amor. Su amor pa nan tabata profundo.

 3. Kon nos por sa ku Hesus no a warda te su último anochi pa demostrá amor na su siguidónan?

³ Dékadanan despues, ora ku apòstel Juan a introdusí su relato inspirá di e susesonan di e anochi ei, el a skirbi: “Promé ku e Fiesta di Pasku, Hesus, sabiendo ku su ora a yega ku e mester a laga e mundu aki i bai serka e Tata, a mustra esnan di dje ku tabata den mundu ku el a stima nan te na fin.” (Juan 13:1) Hesus no a warda te e anochi ei pa demostrá su amor na “esnan di dje.” Durante henter su ministerio el a duna prueba di su amor pa su disipelnan den tantísimo manera. Ta bon pa nos analisá algun di e maneranan ei, pasobra ora nos ta imit’é den esaki, nos ta duna prueba ku nos ta su berdadero disipelnan.

4, 5. (a) Dikon Hesus tabatin mester di pasenshi pa trata ku su disipelnan? (b) Kon Hesus a reakshoná ora tres di su apòstelnan no a keda vigilá den hòfi di Getsemané?

⁴ Amor ku pasenshi ta kana huntu. “Amor tin pasenshi,” segun 1 Korintionan 13:4, i pasenshi ta enserá soportá otro hende sin rabia òf keha. Hesus mester a tene pasenshi ku su disipelnan? Klaru ku sí! Manera nos a mira den Kapítulo 3, e apòstelnan tabata slow pa kultivá humildat. Mas ku un biaha nan a diskutí ku otro tokante kua di nan tabata esun di mas importante. Kon Hesus a reakshoná? El a rabia ku nan i kontestá nan tur iritá òf ku renkor? Nò, ku pasenshi el a rasoná ku nan, asta ora “un diskushon” pisá a lanta tokante e asuntu aki durante su último anochi ku nan!—Lukas 22:24-30; Mateo 20:20-28; Marko 9:33-37.

⁵ Mas despues durante e último anochi ei, ora Hesus a bai na e hòfi di Getsemané ku e 11 fiel apòstelnan, su pasenshi a bolbe ser poné na prueba. Lagando ocho di e apòstelnan atras, Hesus a tuma Pedro, Santiago ku Juan i a bai mas paden di e hòfi. Hesus a bisa nan: “Mi alma ta masha tristu mes, te na morto; keda akinan i vigilá huntu ku mi.” El a bai un poko mas leu for di nan i a kuminsá hasi orashon intensamente. Despues di a hasi orashon pa basta ratu, el a bolbe serka e tres apòstelnan. Kiko nan tabata hasiendo? Na momento di su prueba di mas grandi, nan tabata morto na soño! El a zundra nan pasobra nan no a keda vigilá? Nò, ku pasenshi el a animá nan. Su palabranan bondadoso a demostrá ku el a komprondé bou di kuantu tenshon nan tabata i kiko tabata nan debilidat.a El a bisa: “E spiritu ta boluntario, ma e karni ta débil.” Hesus a keda demostrá pasenshi e anochi ei, apesar ku el a bin haña nan drumí, no ún biaha sino dos biaha mas!—Mateo 26:36-46.

 6. Kon nos por imitá Hesus den nos trato ku otro hende?

⁶ Ta un animashon pa konstatá ku Hesus no a konsiderá su apòstelnan un kaso pèrdí. Su pasenshi ku tempu a duna fruta, pasobra e hòmbernan fiel aki a siña e importansia di ta humilde i alerta. (1 Pedro 3:8; 4:7) Kon nos por imitá Hesus den nos trato ku otro hende? Spesialmente ansianonan mester tene pasenshi. Rumannan den fe kisas ta aserká un ansiano ku nan problemanan ora ku e ansiano mes ta kansá òf su kabes ta yen di su mes preokupashonnan. Tin biaha, rumannan ku tin mester di yudansa ta slow pa reakshoná riba konseho. Apesar di esei, ansianonan ku tin pasenshi ta duna instrukshon “ku suavedat” i lo “trata e tou ku ternura.” (2 Timoteo 2:24, 25; Echonan 20:28, 29, NW) Mayornan tambe ta hasi bon di imitá e pasenshi di Hesus, pasobra tin biaha muchanan por ta slow pa reakshoná riba konseho òf korekshon. Amor ku pasenshi lo yuda mayornan pa no stòp di hasi esfuerso pa entrená nan yunan. E rekompensanan di tal pasenshi por ta masha grandi.—Salmo 127:3.

 7. Den ki manera Hesus a satisfasé e nesesidatnan físiko i material di su disipelnan?

⁷ Amor ta ser manifestá pa medio di obranan ku no ta reflehá egoismo. (1 Juan 3:17, 18) Amor “no ta buska su propio interes.” (1 Korintionan 13:5) Amor a motivá Hesus pa satisfasé e nesesidatnan físiko i material di su disipelnan. Hopi biaha el a aktua na nan fabor asta promé ku nan a bisa kiko nan tabatin mester. Por ehèmpel, ora el a mira ku nan tabata kansá, el a sugerí nan pa bai huntu kuné “na un lugá solitario i sosegá un ratu.” (Marko 6:31) Ora el a ripará ku nan tabatin hamber, el a tuma e inisiativa pa alimentá nan, i huntu ku nan míles di otro hende ku a bin pa skuch’é.—Mateo 14:19, 20; 15:35-37.

8, 9. (a) Kiko ta indiká ku Hesus a rekonosé e nesesidatnan spiritual di su disipelnan i satisfasé eseinan? (b) Ora Hesus tabata na staka, kon el a demostrá interes profundo den e bienestar di su mama?

⁸ Hesus a rekonosé e nesesidatnan spiritual di su disipelnan i a satisfasé eseinan tambe. (Mateo 4:4; 5:3, NW) Ora Hesus tabata siña hende, hopi biaha el a duna e disipelnan atenshon spesial. El a duna e Sermon Riba Seru spesialmente na benefisio di su disipelnan. (Mateo 5:1, 2, 13-16) Na okashonnan ku el a siña hende ku ilustrashon òf parábola, “e tabata splika tur kos na su disipelnan ora nan tabata nan so.” (Marko 4:34) Hesus a profetisá ku lo e nombra un “esklabo fiel i prudente” pa hasi sigur ku Su siguidónan lo ta bon alimentá den sentido spiritual durante e último dianan. E esklabo ta konsistí di un grupo chikitu di ruman di Hesus, ungí pa spiritu santu, ku ta biba riba tera. Desde aña 1919, e esklabo aki ta perkurando ‘kuminda spiritual na su debido tempu.’—Mateo 24:45.

⁹ Riba e dia ku Hesus a muri el a demostrá na un manera masha konmovedor kon interesá e tabata den e bienestar spiritual di su sernan kerí. Imaginá bo e siguiente esena. Hesus tabata na staka, sufriendo un doló insoportabel. Pa e por a hala rosea, evidentemente e mester a pusha su kurpa ariba ku su pia. Esaki sin duda a kous’é masha hopi doló ya ku e peso di su kurpa tabata habri e heridanan di klabu den su pianan i su lomba tur kòrtá di sota tabata raspa kontra e staka. Lo mester tabata hopi difísil i doloroso pa el a papia, ya ku pa un hende papia e mester por kontrolá su halamentu di rosea. Sin embargo, djis promé ku Hesus a muri el a papia palabranan ku a demostrá su amor profundo pa su mama, Maria. Mirando Maria i apòstel Juan pará einan, Hesus a bisa su mama ku un stèm sufisiente duru ku otro hende pará ei banda por a tende: “Muhé, ata bo yu!” Anto na Juan el a bisa: “Ata bo mama!” (Juan 19:26, 27) Hesus tabata sa ku e fiel apòstel lo a atendé no solamente e nesesidatnan físiko i material di Maria, sino tambe su bienestar spiritual.b

10. Kon mayornan por imitá Hesus segun ku nan ta perkurá pa e nesesidatnan di nan yunan?

¹⁰ Mayornan amoroso ta ripará ku ta probechoso pa meditá riba e ehèmpel di Hesus. Un tata ku realmente ta stima su famia lo perkurá pa nan materialmente. (1 Timoteo 5:8) Kabesnan di famia balansá i amoroso de bes en kuando ta traha tempu pa relahá i rekreá. Mas importante ainda, mayornan kristian ta perkurá pa e nesesidatnan spiritual di nan yunan. Kon? E mayornan ei ta hasi areglo pa tene un estudio di Beibel di famia riba un base regular, i nan ta hasi esfuerso pa hasi e seshonnan di estudio aki edifikante i agradabel pa nan yunan. (Deuteronomio 6:6, 7) Ku nan palabra i ehèmpel, mayornan ta siña nan yunan ku e ministerio ta un aktividat importante i ku un parti esensial di nan rutina spiritual ta pa prepará pa e reunionnan kristian i asistí na nan.—Hebreonan 10:24, 25.

11. Kiko Hesus a siña su siguidónan tokante pordoná?

¹¹ Pordoná ta un faseta di amor. (Kolosensenan 3:13, 14) Segun 1 Korintionan 13:5, amor “no ta warda renkor.” Na vários okashon, Hesus a siña su siguidónan e importansia di pordoná. El a urgi nan pa pordoná otro hende “no te shete bes, sino te setenta bes shete,” es desir, no tabatin un kantidat limitá di biaha pa pordoná. (Mateo 18:21, 22) El a siña nan ku si bo reprendé un pekadó i e mustra repentimentu, lo bo mester pordon’é. (Lukas 17:3, 4) Sin embargo, Hesus no tabata manera e fariseonan hipókrita ku a siña ku boka so; el a siña hende tambe ku su ehèmpel. (Mateo 23:2-4) Laga nos mira kon Hesus a demostrá ku e tabata dispuesto pa pordoná asta ora un amigu di konfiansa a lag’é na kaya.

12, 13. (a) Den ki manera Pedro a laga Hesus na kaya e anochi di Su aresto? (b) Kon loke Hesus a hasi despues di su resurekshon ta mustra bon kla ku el a hasi mas ku djis prediká ku mester pordoná?

¹² Hesus tabatin un relashon hopi será ku apòstel Pedro, un hòmber kariñoso ku de bes en kuando a aktua sin pensa. Hesus a rekonosé e bon kualidatnan di Pedro i a dun’é vários privilegio spesial. Pedro, huntu ku Santiago i Juan, a presensiá sierto milagernan ku e otro apòstelnan no a mira. (Mateo 17:1, 2; Lukas 8:49-55) Manera nos a menshoná anteriormente, Pedro tabata un di e apòstelnan ku a kompañá Hesus bai mas paden di e hòfi di Getsemané e anochi di Su aresto. Sin embargo, e mesun anochi ei ora Hudas a traishoná Hesus i nan a arest’é, Pedro i e otro apòstelnan a bandoná Hesus i hui bai. Mas despues, Pedro tabatin sufisiente kurashi pa para pafó miéntras ku nan tabata husga Hesus ilegalmente. Pero despues Pedro a bolbe haña miedu i a kometé un eror grave: tres biaha el a gaña i a nenga ku e konosé Hesus! (Mateo 26:69-75) Kon Hesus a reakshoná? Kon abo lo a reakshoná si un amigu íntimo laga bo na kaya dje manera ei?

¹³ Hesus tabata kla pa pordoná Pedro. E tabata sa ku Pedro a keda hopi kibrá pa e peso di su piká. De echo, e apòstel arepentí no por a kontené su mes i “a kuminsá yora.” (Marko 14:72) Riba e dia ku Hesus a resusitá, el a aparesé na Pedro, probablemente pa konsolá i trankilisá e apòstel. (Lukas 24:34; 1 Korintionan 15:5) Ménos ku dos luna despues, Hesus a duna Pedro e onor di hiba delantera den duna testimonio na e multitut di hende den Yerusalèm riba e dia di Pentekòste. (Echonan 2:14-40) Laga nos kòrda tambe ku Hesus no a karga renkor kontra e otro apòstelnan tampoko pasobra nan a bandon’é. Al kontrario, despues di su resurekshon, el a keda yama nan “mi rumannan.” (Mateo 28:10) Ta bisto anto ku Hesus a hasi mas ku djis prediká ku mester pordoná.

14. Dikon nos tin ku siña pordoná otro hende, i kon nos por demostrá ku nos ta kla pa pordoná?

¹⁴ Komo disipel di Kristu, nos tin ku siña pordoná otro hende. Dikon? Pasobra distinto for di Hesus, nos ta imperfekto, meskos ku e hendenan ku ta peka kontra nos. De bes en kuando, nos tur ta trompeká den palabra i den echo. (Romanonan 3:23; Santiago 3:2) Si nos ta pordoná otro hende ora tin base pa mustra miserikòrdia, nos ta habri kaminda pa Dios pordoná nos nos pikánan. (Marko 11:25) Pues anto, kon nos por demostrá ku nos ta dispuesto pa pordoná hende ku ta peka kontra nos? Den hopi kaso, amor ta yuda nos pasa por haltu di piká- i faltanan menor di otro hende. (1 Pedro 4:8) Ora hende ku a hasi malu ku nos ta sinseramente arepentí, manera Pedro tabata, nos siguramente lo ke imitá Hesus su aktitut di ta dispuesto pa pordoná. En bes di tene hende na kurason, ta sabí pa nos legumai renkor. (Efesionan 4:32) Hasiendo esei nos ta kontribuí na pas di e kongregashon i tambe na pas den nos mente i kurason.—1 Pedro 3:11.

15. Dikon Hesus a konfia su disipelnan apesar di nan faltanan?

¹⁵ Amor i konfiansa ta kana man na man. “Tur kos [amor] ta kere.”c (1 Korintionan 13:7) Motivá pa amor, Hesus a demostrá di ta dispuesto pa konfia su disipelnan apesar di nan imperfekshonnan. E tabatin konfiansa den nan i tabatin sigur ku nan sinseramente a stima Yehova i kier a hasi su boluntat. Asta ora nan a kometé eror, Hesus no a kuestioná nan motibunan. Por ehèmpel, ora e apòstelnan Santiago ku Juan evidentemente a laga nan mama bai pidi pa nan sinta banda di Hesus den su Reino, Hesus no a duda den nan lealtat i kita nan di sirbi komo apòstel.—Mateo 20:20-28.

16, 17. Ki responsabilidatnan Hesus a laga den man di su disipelnan?

¹⁶ Hesus a demostrá su konfiansa dor di enkargá su disipelnan ku vários responsabilidat. Na e dos okashonnan ku el a multipliká kuminda milagrosamente i a alimentá e multitutnan, el a enkargá su disipelnan ku e responsabilidat di parti e kuminda. (Mateo 14:19; 15:36) Komo preparashon pa su último Pasku Hudiu, el a asigná Pedro ku Juan pa bai Yerusalèm i perkurá pa e kosnan nesesario. Ta nan mester a sòru di buska e lamchi, biña, pan sin zürdeg, yerba marga i otro artíkulonan nesesario. Esaki no tabata un asignashon insignifikante, pasobra e selebrashon di e Pasku Hudiu na e manera korekto tabata un rekisito di e Lei di Moisés, i Hesus tabatin ku kumpli ku e Lei ei. Ademas, mas lat e anochi ei Hesus a usa e biña i e pan sin zürdeg komo símbolonan importante ora el a instituí e Konmemorashon di su morto.—Mateo 26:17-19; Lukas 22:8, 13.

¹⁷ Hesus a haña ku ta apropiá pa konfia su disipelnan ku responsabilidatnan asta mas pisá. Manera nos a menshoná anteriormente, el a enkargá un grupo chikitu di su siguidónan ungí riba tera ku e responsabilidat importante di prepará i distribuí alimento spiritual. (Lukas 12:42-44) Kòrda tambe ku el a laga den man di su disipelnan e enkargo masha importante pa prediká i hasi disipel. (Mateo 28:18-20) Te awe, apesar ku Hesus ta invisibel i ta goberná for di shelu, e ta konfia e kuido di su kongregashon riba tera den man di hòmbernan ku e ta konsiderá spiritualmente kualifiká i ku e ta duna komo don na e kongregashon.—Efesionan 4:8, 11, 12.

18-20. (a) Kon nos por demostrá konfiansa den rumannan den fe? (b) Kon nos por imitá Hesus su aktitut di ta dispuesto pa enkargá otro hende ku responsabilidat? (c) Kiko nos lo trata den e siguiente kapítulo?

¹⁸ Kon nos por sigui e ehèmpel di Hesus den nos trato ku otro hende? Ora nos ta demostrá konfiansa den nos rumannan den fe, esei ta un muestra di nos amor. Laga nos kòrda ku amor ta buska loke ta bon den otro hende, no loke ta malu. Ora hende desepshoná nos—lokual sigur lo sosodé de bes en kuando—amor lo yuda nos pa no ta lihé pa asumí ku nan tin mal motibu. (Mateo 7:1, 2) Si nos mantené un punto di bista positivo di nos rumannan den fe, nos lo trata nan na maneranan ku ta edifiká nan en bes di kibra nan.—1 Tesalonisensenan 5:11.

¹⁹ Nos por imitá Hesus i ser dispuesto pa enkargá otro hende ku responsabilidat? Ta bon pa rumannan ku tin puesto di responsabilidat den kongregashon siña enkargá otro hende ku tareanan apropiá i signifikativo, ku e konfiansa ku nan lo hasi nan bèst. Den tal kaso ansianonan ku eksperensia por duna e entrenamentu nesesario i balioso na rumannan hóben kualifiká ku ta “aspirá” pa yuda den kongregashon. (1 Timoteo 3:1; 2 Timoteo 2:2) E entrenamentu aki ta sumamente importante. Segun ku Yehova ta sigui aselerá e kresementu di e obra di Reino, lo tin ku entrená hòmbernan kualifiká pa atendé e oumento.—Isaias 60:22.

²⁰ Hesus a laga un ehèmpel maravioso pa nos pa loke ta mustra amor na otro hende. Di tur e maneranan ku nos por siguié, esun di mas importante ta pa medio di imitá su amor. Den e siguiente kapítulo nos lo trata e manera di mas grandi ku el a ekspresá su amor pa nos, esta, e echo ku e tabata dispuesto pa entregá su bida.