Pordoná di Curason

“Di igual manera tambe mi Tata celestial lo trata cu boso si boso no pordoná cada un su ruman di curason.”—MATEO 18:35.

 1, 2. (a) Con un pecadó bon conocí a mustra su aprecio pa Jesus? (b) Ki punto Jesus a trece dilanti como reaccion riba esei?

PROBABLEMENTE e tabata un prostituta, no unu cu lo bo a spera di haña den cas di un persona religioso. Si tabatin hende cu a keda sorprendí di mir’é ei, loke el a haci tabata mas sorprendente ainda. El a acercá e homber cu tabatin e normanan moral di mas haltu i a manifestá aprecio pa su obranan, dor di laba su pianan cu su lágrimanan i seca nan cu su cabei.

² E homber ei, Jesus, no a haña asco dje muher aki, kende tabata “conocí den e stad como un pecadó.” Pero Simon e fariseo, doño dje cas, sí tabata preocupá cu e muher tabata un pecadó. Jesus a reaccioná contand’e di dos homber cu tabata debe un fiadó. Unu tabatin un debe grandi: rond di dos aña di salario di un obrero. E otro tabata debe un décimo di esei, ménos cu tres luna di salario. Ora ningun di nan dos no por a paga, e fiadó “a pordoná nan tur dos libremente.” Ta claro cu esun cu a ser pordoná mas tantu tabatin mas motibu pa respondé den amor. Despues cu Jesus a conectá esei cu e muher su acto di bondad, el a agregá e principio: “Esun cu ta ser pordoná poco, ta stima poco.” Anto el a bisa e muher: “Bo picánan ta pordoná.”—Lucas 7:36-48.

 3. Kico nos tin cu examiná tocante nos mes?

³ Puntra bo mes: ‘Si ta ami tabata e muher ei of si mi tabata den un situacion similar i otronan a mustra misericordia na mi, ami na mi turno lo ta severo cu otro hende i keda sin pordoná nan?’ Kisas bo ta contestá: ‘Claro cu no!’ Tog, bo ta kere cu di berdad bo ta incliná na pordoná? Esei ta parti di bo caracter? Bo tabata hopi bes cla pa haci esei, i otro hende lo describí bo como un persona pordonador? Laga nos mira pakico cada un di nos mester analisá esaki na un manera franco i profundo.

Pordon: Necesario i Extendé na Nos

 4. Ki echo nos tin cu admití tocante nos mes?

⁴ Bo ta imperfecto, i bo sa esei muchu bon. Si puntra bo, lo bo asta admití esei, kisas cordando e palabranan hañá na 1 Juan 1:8: “Si nos haci e declaracion: ‘Nos no tin picá,’ nos ta gaña nos mes i e berdad no ta den nos.” (Romanonan 3:23; 5:12) Algun persona kisas a manifestá nan estado pecaminoso cu picá serio i escandaloso. Pero asta ora bo no ta concientemente culpabel di esei, sigur tin hopi bes i manera den cua bo a hera e normanan di Dios, esta, bo a peca. No ta asina?

 5. Pa kico nos mester ta gradicidu na Dios?

⁵ P’esei, tal bes bo situacion ta cuadra cu e descripcion di apostel Pablo: “Aunke boso tabata morto den boso delitunan i den e estado incircuncidá di boso carni, Dios a haci boso bibu huntu cuné [Jesus]. Bondadosamente el a pordoná nos tur nos delitunan.” (Colosensenan 2:13; Efesionan 2:1-3) Ripará e frase “a pordoná nos tur nos delitunan.” Esei ta cubri bastante. Cada un di nos tin suficiente motibu pa suplicá Dios mescos cu David: “Pa causa di bo nomber, o Jehova, bo tin cu asta pordoná mi eror, pasobra e ta bastante.”—Salmo 25:11.

 6. Di kico nos por ta sigur relacioná cu Jehova i pordon?

⁶ Con abo—of cualkier un di nos—por ricibí pordon? Un clave ta cu Jehova Dios ta incliná na pordoná. Esei ta un característica di su personalidad. (Exodo 34:6, 7; Salmo 86:5) Ta di comprendé anto, cu Dios ta spera di nos pa acudí na dje den oracion i pidié despensa, pidié pordoná nos. (2 Crónicanan 6:21; Salmo 103:3, 10, 14) I el a percurá un base legal pa extendé e pordon ei: Jesus su sacrificio di rescate.—Romanonan 3:24; 1 Pedro 1:18, 19; 1 Juan 4:9, 14.

 7. Den ki manera bo mester kier imitá Jehova?

⁷ Bo mester mira den Dios su disponibilidad pa pordoná, un patronchi dje manera cu abo tin cu trata otro hende. Pablo a enfocá riba esaki, ora el a skirbi: “Bira bondadoso un cu otro, tiernamente compasivo, pordonando otro libremente mescos cu Dios tambe mediante Cristo a pordoná boso libremente.” (Efesionan 4:32) No tin duda cu Pablo su punto ta pa nos siña for dje ehempel di Dios, pasobra e siguiente versículo ta sigui: “P’esei, bira imitadónan di Dios, manera yunan stimá.” (Efesionan 5:1) Bo ta mira e coneccion? Jehova Dios a pordoná bo, pues—Pablo ta razoná convincentemente—bo tin cu imitá Dios i ser “tiernamente compasivo, pordonando otro libremente.” Pero puntra bo mes: ‘Mi ta haciendo esei? Si esei no ta mi caracter, mi ta trahando den e direccion ei, haciendo un esfuerso real pa imitá Dios den pordoná?’

Nos Tin cu Haci Esfuerso pa Pordoná Otro

 8. Kico nos mester reconocé pa loke ta e composicion di nos congregacion?

⁸ Lo tabata ideal pa pensa cu den e congregacion cristian tin masha poco ocasion cu nos tin cu pordoná manera Jehova ta pordoná. Realidad ta otro. Ta berdad cu nos rumannan cristian ta trata na sigui Jesus su ehempel di amor. (Juan 13:35; 15:12, 13; Galationan 6:2) Pa hopi tempu nan a traha, i ta traha ainda, pa stop di pensa, papia i actua manera e mundu malbado aki. Di berdad nan kier manifestá e personalidad nobo. (Colosensenan 3:9, 10) Tog, nos no por ignorá e echo cu e congregacion mundial, i cada congregacion local, ta consistí di hende imperfecto. Como grupo, nan sigur ta mihó di loke nan tabata un tempu, pero tog nan ta imperfecto ainda.

 9, 10. Pakico nos no mester keda sorprendí si surgi problema entre rumannan?

⁹ Den Bijbel, Dios deliberadamente ta bisa nos cu nos por spera imperfeccion den e congregacion, entre nos rumannan. Por ehempel, considerá Pablo su palabranan registrá na Colosensenan 3:13: “Sigui soportá otro i pordoná otro libremente si un hende tin un motibu pa keha contra un otro. Mescos cu Jehova a pordoná boso libremente, asina boso tambe haci mescos.”

¹⁰ Ta significativo cu aki Bijbel ta recordá nos dje coneccion entre Dios su pordon i nos obligacion i necesidad pa pordoná otro hende. Pakico esaki ta difícil? Pasobra Pablo a admití cu un persona por tin “un motibu pa keha contra un otro.” El a realisá cu lo a existí motibunan pa esei. Lo mester tabatin motibu den e promé siglo, asta entre “e santunan” cristian cu tabatin un ‘speransa cu a ser reservá pa nan den shelu.’ (Colosensenan 1:2, 5) Pues nos por imaginá cu lo ta diferente awe, den un tempu cu mayoria cristian berdadero no tin e testimonio dje spiritu cu nan ta “scogínan di Dios, santu i stimá”? (Colosensenan 3:12) P’esei, nos no mester concluí cu tin algu excepcionalmente robes si den nos congregacion tin motibu pa keha, of pa sinti nos ofendí debí na berdadero of supuesto fayonan.

11. Kico disipel Santiago a alertá nos di dje?

¹¹ E palabranan di Jesus su mitar ruman Santiago tambe ta mustra cu nos por verwagt cu algun bes nos lo por topa situacionnan cu ta exigí di nos pa pordoná nos rumannan. “Ken ta sabí i yen di comprendimentu entre boso? Lagu’e mustra mediante su conducta excelente su obranan cu un suavedad cu ta pertenecé na sabiduria. Pero, si boso tin yaluzí amargo i pleitamentu den boso curason, no broma i gaña contra e berdad.” (Santiago 3:13, 14) “Yaluzí amargo i pleitamentu” den curason di cristian berdadero? Sí, Santiago su palabranan ta indicá claramente cu e cosnan ei a surgi den e congregacion di promé siglo i nan lo surgi awe tambe.

12. Ki problema a surgi den e antiguo congregacion filipense?

¹² Tin un ehempel real cu a enbolbé dos cristian ungí cu tabatin e excelente reputacion di a traha duru lado a lado cu Pablo. Tal bes bo ta corda cu bo a lesa tocante Evodia i Síntike, miembronan dje congregacion filipense. Aunke Filipensenan 4:2 i 3 no ta describí e asuntu en detaye, e ta mustra cu tabatin un ke otro problema entre nan. Por ta esei a cuminsá cu un comentario skerpi i desagradabel, un supuesto menosprecio di parti di un famia, of un ke otro evidencia di yaluzí? Sea cual sea e problema, el a bira asina serio cu Pablo a tende di dje leu ayá na Roma. Kisas, e dos ruman muhernan spiritual a stop di papia cu otro, i a evitá otro na reunion of a papia malu di otro cu nan amiganan.

13. Con probablemente a resolvé e problema entre Evodia i Síntike, dunando nos ki les?

¹³ Esei ta zona conocí pa bo, manera loke a sosodé entre algun ruman den bo congregacion of algu cu abo tabata enbolbí aden? Kisas asta ta existí te na un cierto grado un tipo di problema asina awor aki. Kico nos por haci? Den e caso di pasado, Pablo a urgi e dos ruman muhernan dedicá ei “pa ta dje mésun mente den Señor.” Tal bes nan a bai eens pa papia riba e asuntu, pa aclará cosnan, pa expresá cu cada un tabata dispuesto pa pordoná, anto realmente imitá Jehova su actitud di pordoná. No tin motibu pa pensa cu Evodia i Síntike no tabatin éxito den esei, i nos tambe por logra. Awe, nos por aplicá tal actitud di pordoná cu éxito.

Haci Pas—Pordoná

14. Pakico hopi bes ta posibel i mihó pa simplemente laga e desacuerdo personal pasa?

¹⁴ Kico realmente ta necesario pa pordoná un otro cristian ora bo tin un problema cuné? Francamente, no tin un método simpel, pero Bijbel ta duna ehempelnan probechoso i conseho realístico. Un recomendacion clave—aunke no unu fácil pa aceptá i aplicá—ta pa djis lubidá e asuntu, lagu’e pasa. Hopi bes ora tin un problema, manera den e caso di Evodia i Síntike, cada persona ta haña cu e otro ta robes of tin mas falta. Pues, den un situacion asina, bo por wel pensa cu ta e otro cristian ta esun principalmente culpabel, of ta esun cu a haci mas daño. No obstante, bo no por djis laga e asuntu pasa numa dor di pordoná? Realisá cu si ta e otro cristian ta esun principalmente of henteramente culpabel (i esaki lo ta masha improbabel), bo ta den e posicion ideal pa pordoná i laga e asuntu keda te ei.

15, 16. (a) Con Mikéas a describí Jehova? (b) Kico ta nificá cu Dios ta “pasa por haltu di delitu”?

¹⁵ Laga nos no perde Dios for di bista como nos ehempel den pordoná. (Efesionan 4:32–5:1) Pa loke ta Su ehempel den laga eror pasa, profeta Mikéas a skirbi: “Ken ta un Dios manera bo, unu cu ta pordoná eror i ta pasa por haltu di delitu dje resto di su herencia? Sigur lo e no pega na su rabia pa semper, pasobra e tin deleite den bondad amoroso.”—Mikéas 7:18.

¹⁶ Dor di describí Jehova como unu cu “ta pasa por haltu di delitu,” Bijbel no ta bisando cu e ta incapas pa corda malecho, cu e tin manera un pérdida selectivo di memoria. Considerá e casonan di Samson i David. Tur dos a cometé picá serio. Dios por a corda e picánan ei hopi tempu despues; asta nos sa di algun di nan picánan pasobra Jehova a laga skirbi nan den Bijbel. Tog, nos Dios pordonador a mustra misericordia na e dosnan ei, poniendo nan dilanti nos como ehempel di fe pa imitá.—Hebreonan 11:32; 12:1.

17. (a) Ki enfoke por yuda nos pasa riba e erornan, of ofensanan, di otro hende? (b) Si nos traha duru pa haci esei, con nos lo ta imitando Jehova? (Mira nota na pia di página.)

¹⁷ Sí, Jehova por a “pasa por haltu”a di delitu, manera David a pidié haci bes tras bes. (2 Samuel 12:13; 24:10) Nos por imitá Dios den esaki, i ser dispuesto pa pasa por haltu di menosprecio of ofensanan cu nos próhimo ta cometé como ser humano imperfecto? Imaginá bo mes den un avion cu ta hisando velocidad pa lanta vuelo. Bo ta wak pafó di bentana, i bo ta mira cerca dje pista un conocí di bo ta saca lenga manera mucha chikitu ta haci pa tenta otro. Bo sa cu e ta rabiá i cu kisas ta cu bo e tin e. Of kisas e no ta pensando mes riba bo. Di tur manera, segun cu e avion ta dal un bogt pa gana haltura, bo ta pasa riba cabes dje muher, cu awor ta parce di ta djis un punta chikitu. Aki un ora bo ta cientos di kilometer leu, i su acto ofensivo ta leu bo tras. Mescos, si nos purba di ta manera Jehova i sabiamente pasa por haltu dje ofensa, hopi bes esei lo yuda nos pordoná. (Proverbionan 19:11) E menosprecio lo no parce insignificante aki dies aña of aki doshen aña den e Mil Aña? Pakico no djis lagu’e pasa?

18. Si ta parce cu nos no por pasa por haltu di un ofensa, ki conseho nos por aplicá?

¹⁸ Pero, por ta na un ocasion masha excepcional bo a haci oracion tocante e asuntu i a purba pordoná, pero bo ta sinti cu bo no por. Kico awor? Jesus a urgi pa bai cerca e otro persona i trata na resolvé e desacuerdo abo cuné so pa logra pas. “P’esei, si bo ta treciendo bo ofrenda n’e altar i bo corda ei cu bo ruman tin algu contra bo, laga bo ofrenda ei dilanti dje altar, i bai; promé haci pas cu bo ruman, i despues, ora bo a bolbe bek, ofrecé bo ofrenda.”—Mateo 5:23, 24.

19. Ki actitud nos mester tin i ki actitud nos mester evitá ora nos ta busca pas cu nos ruman?

¹⁹ Ripará bon cu Jesus no a bisa pa bai cerca bo ruman pa convenc’é cu abo tabatin rason i cu ta e a faya. Kisas el a faya berdad. Pero, muy probablemente, boso tur dos tabatin un tiki falta. Sea cual sea e caso, e meta no mester ta pa pone e otro partido admití falta i cai na rudia, na moda di papia. Si ta den e direccion ei bo ta hiba e combersacion, casi sigur lo bo fracasá. Tampoco e meta no mester ta pa repasá tur detaye dje supuesto of berdadero ofensa. Ora un combersacion trankil den e spiritu di amor cristian ta revelá un malcomprendimentu lamentabel como base dje problema, boso tur dos por trata na aclará e asuntu. Pero asta si e combersacion no hiba na un acuerdo total, esei ta semper necesario? Lo no ta mihó si por lo ménos boso por bai di acuerdo cu boso tur dos sinceramente kier sirbi nos Dios pordonador? Ora boso enfrentá e realidad ei, kisas ta mas fácil pa cada un di boso bisa di curason: “Ta duel mi cu den nos imperfeccion nos tabatin e diferencia di opinion aki. Por fabor, laga nos pasa riba dje.”

20. Kico nos por siña for dje ehempel dje apostelnan?

²⁰ Corda cu e apostelnan tabatin nan desacuerdonan, manera ora algun di nan a aspirá pa haña mas onor. (Marco 10:35-39; Lucas 9:46; 22:24-26) Esei a causa tension, tal bes herida emocional, of asta ofensa serio. Pero nan a logra pasa por haltu dje desacuerdonan ei i a sigui traha huntu. Un di nan a skirbi despues: “Esun cu kier stima bida i mira bon dianan, lagu’e frena su lenga di loke ta malu i su lip di papia engaño, mas bien, lagu’e apartá for di loke ta malu i haci loke ta bon; lagu’e busca pas i sigui tras di dje.”—1 Pedro 3:10, 11.

21. Ki conseho profundo Jesus a duna tocante pordon?

²¹ Nos a ripará anteriormente un fase di un ciclo: Dios a pordoná hopi picá cu nos a cometé den pasado, di manera cu nos mester imit’é i pordoná nos rumannan. (Salmo 103:12; Isaías 43:25) Pero tin un otro fase den e ciclo aki. Despues cu Jesus a duna e oracion modelo, el a bisa: “Si boso pordoná hende nan ofensanan, boso Tata celestial tambe lo pordoná boso.” Mas cu un aña despues, el a bolbe declará e esencia, siñando su disipelnan pa pidi den oracion: “Pordoná nos nos picánan, pasobra nos mes tambe ta pordoná tur hende cu debe nos.” (Mateo 6:12, 14; Lucas 11:4) Anto, un par di dia promé cu su morto, Jesus a agregá: “Ora boso ta para haci oracion, pordoná cualkier cos cu boso tin contra otro; pa boso Tata cu ta den shelu tambe por pordoná boso boso ofensanan.”—Marco 11:25.

22, 23. Ki efecto nos disponibilidad pa pordoná por tin riba nos futuro?

²² Sí, nos prospectonan pa sigui ricibí e pordon di Dios ta dependé na un grado mayor riba nos disponibilidad pa pordoná nos rumannan. Ora surgi un problema personal entre dos cristian, puntra bo mes: ‘Gana Dios su pordon no ta hopi mas importante cu proba cu un ruman tabata robes riba un of otro menosprecio, un ofensa insignificante of un manifestacion di imperfeccion humano?’ Bo sa e contesta.

²³ Pero, kico mester haci ora e asuntu ta mas serio cu un ofensa personal of problema menor? I ki ora Jesus su conseho registrá na Mateo 18:15-18 ta aplicá? Laga nos considerá e asuntunan aki siguientemente.

[Nota]

Bo Ta Corda?

◻ Con Jehova ta duna nos un modelo pa sigui den loke ta pordoná?

◻ Kico nos tin cu corda tocante esnan den congregacion?

◻ Den mayoria caso, kico nos mester por haci ora tin menosprecio i ofensa?

◻ Si ta necesario, kico nos por haci pa cera pas cu nos ruman?

[Plachi na página 15]

Ora bo tin un desacuerdo cu un cristian, purba lagu’e pasa; cu tempu e asuntu lo bira gradualmente insignificante