Dikon Dios No Ta Kontestá Tur Orashon?

Yehova Dios, nos Tata selestial, ta kla pa skucha nos orashonnan. Pero Dios no ta skucha tur orashon. Dikon nò? Kiko nos tin ku tene kuenta kuné ora nos ta hasi orashon? Wak loke Beibel ta bisa.

Un grupo di hende na misa ta lesa orashon for di un buki di orashon.

“Ora bo ta hasi orashon, no keda ripití e—mesun palabranan.”—Mateo 6:7.

Yehova no ke pa nos siña un orashon for di kabes i keda ripitié. E ke pa nos papia kuné di kurason. Kon lo bo sinti si un amigu ta ripití e mesun palabranan tur ora bai? Lo bo sinti bo bon? Probablemente ku nò. Bon amigu ta papia ku otro na un manera sinsero i franko. Ora nos ta resa na nos Tata den shelu ku nos propio palabranan, nos ta mustr’é ku e ta nos amigu.

Un hòmber ta wak den direkshon di shelu segun ku e ta raspa un karchi di loteria.

“Ora boso pidi, boso no ta haña, pasobra boso ta pidi ku mal intenshon.”—Santiago 4:3.

Nos no por spera ku Dios ta bai skucha nos orashon si nos ta pidi pa algu ku e no ta di akuerdo kuné. Ban wak un ehèmpel. Bo ta kere ku Dios lo kontestá orashon di un hende ku ta pidi Dios den orashon pa e gana number, por ehèmpel? Dios a bisa klaramente pa nos no ta golos i pa no kere den “suerte.” (Isaías 65:11, BPK; Lukas 12:15) Klaramente, nos no por spera ku Dios ta bai kontestá e orashonnan ei. Pues, pa Dios skucha nos orashonnan, nan mester ta di akuerdo ku loke Beibel ta siña.

Un hòmber religioso ta hasi orashon pa un grupo di sòldá.

“Si kualke hende sera orea pa lei, asta su orashonnan ta detestabel.”—Proverbionan 28:9, BPK.

Den tempu di Beibel, Dios no tabata kontestá orashon di hende ku tabata desobedesé su lei. (Isaías 1:15, 16) Dios no a kambia. (Malakías 3:6) Si nos ke pa Dios kontestá nos orashonnan, nos mester obedesé su leinan. Kiko si den pasado bo a hasi algu malu? Dios lo skucha bo orashonnan? Klaru ku sí! Dios ta kla pa pordoná nos si nos arepentí i hasi nos bèst pa agrad’é.—Echonan 3:19.