Capitulo 16

Con Bo Por Hala Cerca di Dios

 1. Cua similaridadnan ta bisto den hopi religion?

UN TURISTA cu a bishita un pais oriental a keda asombrá pa e ritonan religioso cu el a observá den un tempel budista. Aunke e imágennan no tabata esnan di Maria of Cristo, hopi dje ritonan tabatin semehansa cu esnan di su misa den e pais caminda e ta biba. Por ehempel, el a ripará e uso di rosario i e recitamentu di oracionnan. Otro hende tambe a haci tal comparacionnan. Sea den Oriente of Occidente, e maneranan den cua esnan deboto ta trata na hala mas cerca di Dios of na e obhetonan di nan adoracion ta remarcablemente similar.

 2. Con oracion a ser describí, i pakico hopi hende ta haci oracion?

² Hopi hende ta trata specialmente na hala mas cerca di Dios dor di haci oracion na dje. Oracion a ser describí como “un acto di comunicacion di hende cu loke ta sagrado of santu—Dios, e diosnan, e esfera transendente, of podernan sobrenatural.” (The New Encyclopædia Britannica) Sin embargo, ora di acercá Dios den oracion, algun hende ta pensa solamente den términonan di ki beneficionan nan lo ricibí. Por ehempel, un biaha un homber a puntra un Testigo di Jehova: “Si bo haci oracion pa mi, e problemanan cu mi tin den mi famia, na trabou, i cu mi salú lo ser solucioná?” Aparentemente e homber a pensa asina, pero hopi ta haci oracion i ta haña cu nan problemanan ta sigui. Pues nos lo por puntra, ‘Pakico exactamente nos mester hala cerca Dios?’

PAKICO HALA CERCA DI DIOS

 3. Na ken nos oracionnan mester ser dirigí, i pakico?

³ Oracion no ta un rito sin nificacion, ni tampoco e ta simplemente un medio pa haña algu. Un motibu principal pa acercá Dios ta pa tin un relacion íntimo cuné. P’esei nos oracionnan mester ser dirigí na Jehova Dios. “Jehova ta cerca di tur esnan cu ta inbok’é,” e salmista David a bisa. (Salmo 145:18) Jehova ta invitá nos pa drenta den un relacion pacífico cuné. (Isaías 1:18) Esnan cu respondé na e invitacion aki ta bai di acuerdo cu e salmista kende a bisa: “En cuanto ami, e acercamentu na Dios ta bon pa mi.” Pakico? Pasobra esnan cu hala cerca di Jehova Dios lo disfrutá di berdadero felicidad i pas mental.—Salmo 73:28.

 4, 5. (a) Pakico ta importante pa haci oracion na Dios? (b) Ki clase di relacion nos por edificá cu Dios mediante oracion?

⁴ Pakico haci oracion na Dios pa yudansa si e ‘sa loke nos mester promé cu nos pidi’é’? (Mateo 6:8; Salmo 139:4) Oracion ta mustra cu nos tin fe den Dios i ta mir’é como e Fuente di “tur bon regalo i tur don perfecto.” (Santiago 1:17; Hebreonan 11:6) Jehova ta haña placer den nos oracionnan. (Proverbionan 15:8) E ta keda contentu pa tende nos expresionnan significativo di aprecio i alabansa, mescos cu un tata ta alegrá tendiendo su yu chikitu papia palabranan sincero di gratitud. (Salmo 119:108) Unda tin un bon relacion entre tata i yu, tin un comunicacion caluroso. Un yu cu ta ser stimá kier papia cu su tata. Mescos ta cierto ora ta trata di nos relacion cu Dios. Si nos realmente ta apreciá loke nos ta siñando tocante Jehova i e amor cu el a mustra pa nos, nos lo tin un deseo fuerte pa expresá nos mes na dje den oracion.—1 Juan 4:16-18.

⁵ Ora di acercá e Dios Haltísimo, nos mester ta respetuoso, aunke no tin ningun necesidad pa ta demasiado preocupá tocante e palabranan exacto cu nos ta usa. (Hebreonan 4:16) Nos semper tin acceso na Jehova. I ki un privilegio e ta cu nos por ‘drama nos curason’ na Dios den oracion! (Salmo 62:8) Aprecio pa Jehova ta hiba na un relacion caluroso cuné, manera esun cu e homber fiel Abraham a disfrutá di dje como amigu di Dios. (Santiago 2:23) Pero ora di haci oracion na e Señor Soberano dje universo, nos mester ta cumpli cu su rekisitonan pa acerk’é.

REKISITONAN PA HALA CERCA DI DIOS

 6, 7. Aunke Dios no ta exigí pago pa tende nos oracionnan, kico sí e ta rekerí di nos ora nos ta haci oracion?

⁶ Placa ta necesario pa por acercá Dios? Hopi hende ta paga e cleronan pa haci oracion pa nan. Algun asta ta kere cu nan oracionnan lo ser tendé di acuerdo cu e tamaño di e donacion cu nan duna. Sin embargo, Dios su Palabra no ta bisa cu un ofrenda monetario ta ser rekerí pa nos por acercá Jehova den oracion. Su percuracionnan spiritual i e bendicionnan di un relacion cuné den oracion ta disponibel grátis.—Isaías 55:1, 2.

⁷ Kico, anto, ta ser rekerí? Un actitud apropiado di curason ta un rekisito esencial. (2 Crónicanan 6:29, 30; Proverbionan 15:11) Den nos curason nos mester ehercé fe den Jehova Dios como “Esun cu ta tende oracion” i “e recompensador di esnan cu ta busk’é sinceramente.” (Salmo 65:2; Hebreonan 11:6) Tambe nos mester tin un curason humilde. (2 Reynan 22:19; Salmo 51:17) Den un di su ilustracionnan, Jesucristo a mustra cu ora di acercá Dios un cobrador di belasting humilde cu un actitud di curason humilde a resultá mas hustu cu un fariseo arogante. (Lucas 18:10-14) Segun nos ta acercá Dios den oracion, laga nos corda cu “tur hende cu ta orguyoso di curason ta algu detestabel pa Jehova.”—Proverbionan 16:5.

 8. Si nos ta deseá pa Dios contestá nos oracionnan, di kico nos mester limpia nos mes?

⁸ Si nos kier pa Dios contestá nos oracionnan, nos mester limpia nos mes di conducta pecaminoso. Ora cu e disipel Santiago a animá otronan pa hala mas cerca di Dios, el a agregá: “Limpia boso mannan, boso pecadornan, i purificá boso curasonnan, boso esnan indeciso.” (Santiago 4:8) Asta malechornan por bini den un relacion pacífico cu Jehova si nan repentí i bandoná nan moda di biba anterior. (Proverbionan 28:13) Nos no por tin audiencia cerca Jehova si nos simplemente pretendé cu nos a haci nos mes limpi spiritualmente. Dios su Palabra ta bisa, “E wowonan di Jehova ta riba esnan hustu, i su orea ta dirigí na nan súplica; pero e cara di Jehova ta contra esnan cu ta haci cosnan malu.”—1 Pedro 3:12.

 9. Mediante ken nos mester acercá Jehova, i pakico?

⁹ E Bijbel ta declará: “No tin ningun hende hustu riba e tera cu ta sigui haci bon i no ta peca.” (Eclesiástes 7:20) P’esei lo bo por puntra: ‘Con, anto, nos por acercá Jehova Dios?’ E Bijbel ta contestá: “Si cualkier persona cometé un picá, nos tin un yudante cerca e Tata, Jesucristo, un hustu.” (1 Juan 2:1) Aunke nos ta pecador, nos por acercá Dios cu frankesa di expresion pa medio di Jesucristo, kende a muri como un rescate pa nos. (Mateo 20:28) E ta e único canal mediante di cua nos por acercá Jehova Dios. (Juan 14:6) Nos no mester asumí cu e balor dje sacrificio di rescate di Jesus automáticamente lo cubri tur nos picánan asta si nos deliberadamente ta practicá picá. (Hebreonan 10:26) Sin embargo, si nos ta haciendo un esfuerso vigoroso pa abstené for di loke ta malu i tog ta faya tin biaha, nos por repentí i pidi Dios pordon. Ora nos ta acerk’é cu un curason humilde, lo e tende nos.—Lucas 11:4.

OPORTUNIDADNAN PA PAPIA CU DIOS

10. Ora di haci oracion, con nos por imitá Jesus, i cua ta algun ocasion pa haci oracion den privá?

¹⁰ Jesucristo a considerá su relacion cu Jehova di masha hopi balor. P’esei, Jesus a traha tempu pa papia cu Dios den oracion privá. (Marco 1:35; Lucas 22:40-46) Nos ta haci bon di imitá Jesus su ehempel i haci oracion na Dios riba un base regular. (Romanonan 12:12) Ta apropiado pa cuminsá e dia cu palabranan di oracion, i promé cu bai drumi, nos por corectamente gradicí Jehova pa e actividad di e dia. Durante dia, determiná pa acercá Dios “na tur ocasion.” (Efesionan 6:18) Nos por asta haci oracion silenciosamente den nos curason, sabiendo cu Jehova por tende nos. Papiando den privá cu Dios ta yuda nos fortalecé nos relacion cuné, i haciendo oracion na Jehova tur dia ta yuda nos pa hala mas cerca di dje.

11. (a) Pakico famianan mester haci oracion huntu? (b) Kico ta nificá ora bo bisa “Amen” na final di un oracion?

¹¹ Jehova ta scucha tambe oracionnan ofrecé na fabor di gruponan di hende. (1 Reynan 8:22-53) Nos por hala cerca di Dios como famia, cu e cabes di famia hibando delantera den oracion. Esaki ta fortalecé e banchi di famia, i Jehova ta bira real pa esnan hóben segun cu nan ta tende nan mayornan humildemente ta haci oracion na Dios. Kico si un persona ta representá un grupo den oracion, kisas na un reunion di Testigonan di Jehova? Si nos ta den e auditorio, laga nos scucha atentamente di manera cu na final dje oracion, nos por bisa cu tur nos curason “Amen,” cu ta nificá “Sea asina.”—1 Corintionan 14:16.

ORACIONNAN CU JEHOVA TA TENDE

12. (a) Pakico Dios no ta contestá algun oracion? (b) Pakico nos no mester concentrá solamente riba necesidadnan personal ora di haci oracion?

¹² Algun hende kisas ta haña cu Dios no ta contestá nan oracion aunke nan ta haci oracion na dje mediante Cristo. Sin embargo, apostel Juan a bisa: “No ta importá loke e ta cu nos ta pidi conforme cu [Dios] su boluntad, e ta tende nos.” (1 Juan 5:14) Pues, anto, nos mester pidi conforme cu Dios su boluntad. Siendo cu e ta interesá den nos bienestar spiritual, cualkier cos cu ta afectá nos spiritualidad ta un tópico apropiado di oracion. Nos mester resistí e tentacion di concentrá completamente riba necesidad físico. Por ehempel, miéntras cu ta apropiado pa haci oracion pa haña perspicacia i fortalesa pa trata cu malesa, preocupacion tocante salú no mester tapa interesnan spiritual. (Salmo 41:1-3) Birando conciente cu e tabata demasiado preocupá tocante su salú, un ruman muher cristian a pidi Jehova pa yud’é tin e punto di bista apropiado di su malesa. Como resultado, el a bira ménos preocupá cu su problemanan di salú, i el a sinti cu el a ser duná “poder mas ayá cu loke ta normal.” (2 Corintionan 4:7) Su deseo pa ta di yudansa spiritual pa otronan a intensificá, i el a bira un proclamador di Reino di tempu completo.

13. Manera a ser indicá den Mateo 6:9-13, cua ta algun tópico apropiado cu nos por incluí den nos oracionnan?

¹³ Kico nos por incluí den nos oracionnan di manera cu Jehova lo ta contentu pa scucha nan? Jesucristo a siña su disipelnan con pa haci oracion. Den e oracion modelo registrá na Mateo 6:9-13, el a describí un patronchi di tópiconan tocante cua nos corectamente por haci oracion. Kico mester ta di interes principal den nos oracionnan? Jehova Dios su nomber i Reino mester ta e prioridad principal. Pidiendo pa nos necesidadnan material ta apropiado. Ta importante tambe pa pidi pordon pa nos picánan i pa libra nos for di tentacionnan i e malbado, Satanas e Diabel. Jesus no tabata kier pa nos recitá e oracion aki of pa ripiti’é bes tras bes, recitand’e sin pensa riba su nificacion. (Mateo 6:7) Ki clase di relacion esei lo ta si un yu a usa e mésun palabranan tur biaha cu el a papia cu su tata?

14. Ademas di peticionnan, ki oracionnan nos mester ofrecé?

¹⁴ Ademas di peticionnan i súplicanan sincero, nos mester ofrecé oracionnan di alabansa i di gradicimentu. (Salmo 34:1; 92:1; 1 Tesalonicensenan 5:18) Nos por haci oracion tambe pa otronan. Oracionnan relacioná cu nos rumannan spiritual kendenan ta ser afligí of persiguí ta demostrá nos interes den nan, i Jehova ta hiba gustu pa tende nos expresá tal preocupacion. (Lucas 22:32; Juan 17:20; 1 Tesalonicensenan 5:25) En realidad, apostel Pablo a skirbi: “No keda anshá pa cu nada, sino cu den tur cos mediante oracion i súplica huntu cu gradicimentu, duna di conocé boso peticionnan na Dios; i e pas di Dios cu ta surpasá tur pensamentu lo warda boso curason i boso facultad mental mediante Cristo Jesus.”—Filipensenan 4:6, 7.

PERSEVERA DEN ORACION

15. Kico nos mester corda si ta parce cu nos oracionnan no ta ser contestá?

¹⁵ Aunke bo ta ganando conocimentu tocante Dios, kisas bo ta sinti cu bo oracionnan tin biaha no ta ser contestá. Esaki por ta e caso pasobra no ta e tempu di Dios pa contestá un oracion specífico. (Eclesiástes 3:1-9) Jehova por permití un situacion sigui pa un tempu, pero e ta contestá oracionnan i sa e mihó tempu pa haci’é.—2 Corintionan 12:7-9.

16. Pakico nos mester persistí den oracion, i con haciendo esaki por afectá nos relacion cu Dios?

¹⁶ Nos persistencia den oracion ta revelá nos interes sincero den loke nos ta bisando Dios. (Lucas 18:1-8) Por ehempel, nos por pidi Jehova pa yuda nos vence un cierto debilidad. Dor di perseverá den oracion i actua na armonia cu nos peticionnan, nos ta mustra nos sinceridad. Nos mester ta specífico i onesto den nos peticionnan. Ta specialmente importante pa haci oracion intensamente ora nos ta experenciando un tentacion. (Mateo 6:13) Segun cu nos ta sigui haci oracion miéntras nos ta trata na controlá nos impulsonan pecaminoso, nos lo mira con Jehova ta yuda nos. Esaki lo edificá nos fe i fortalecé nos relacion cuné.—1 Corintionan 10:13; Filipensenan 4:13.

17. Con nos lo beneficiá di un actitud piadoso den sirbi Dios?

¹⁷ Dor di cultivá un actitud piadoso den rindi sirbishi sagrado na Jehova Dios, nos lo bin realisá cu nos no ta sirbi’é den nos mes forsa. Ta Jehova ta esun cu ta duna nos e forsa pa rindi sirbishi na dje. (1 Corintionan 4:7) Reconociendo esaki lo yuda nos pa ta humilde i lo enrikesé nos relacion cuné. (1 Pedro 5:5, 6) Sí, nos tin motibunan sólido pa perseverá den oracion. Nos oracionnan sincero i conocimentu precioso di e manera pa hala cerca di nos amoroso Tata celestial lo haci nos bida berdaderamente felis.

COMUNICACION CU JEHOVA NO DI UN BANDA SO

18. Con nos por scucha Dios?

¹⁸ Si nos kier pa Dios tende nos oracionnan, nos mester scucha na loke e ta bisa. (Zacarías 7:13) E no ta mandando su mensahenan mas mediante profetanan divinamente inspirá i siguramente no ta usa medionan spiritista. (Deuteronomio 18:10-12) Pero nos por scucha Dios dor di studia su Palabra, e Bijbel. (Romanonan 15:4; 2 Timoteo 3:16, 17) Mescos cu nos mester cultivá un smak pa cuminda físico cu ta saludabel pa nos, nos ta ser instá pa “desaroyá un anhelo pa e lechi no adulterá cu ta pertenecé na e palabra.” Cultivá un inclinacion pa alimento spiritual dor di lesa Dios su Palabra tur dia.—1 Pedro 2:2, 3; Echonan 17:11.

19. Di ki beneficio ta pa meditá riba loke bo ta lesa den e Bijbel?

¹⁹ Meditá riba loke bo ta lesa den e Bijbel. (Salmo 1:1-3; 77:11, 12) Esei ta nificá refleccioná riba e material. Kisas bo por compará esaki cu digestion di cuminda. Bo por digerí alimento spiritual dor di relacioná loke bo ta lesando cu cosnan cu bo sa caba. Considerá con e informacion ta afectá bo bida, of meditá riba loke e ta revelá tocante Jehova su cualidadnan i tratonan. Pues mediante studio personal, bo por adkerí e alimento spiritual cu Jehova ta percurá. Esaki lo halá bo mas cerca di Dios i lo yudá bo trata cu e problemanan di tur dia.

20. Con asistencia na reunionnan cristian ta yuda nos hala cerca di Dios?

²⁰ Bo por hala cerca Dios tambe dor di scucha su Palabra cu ta ser considerá na reunionnan cristian, mescos cu e israelitanan a scucha atentamente ora nan a reuní pa tende e lesamentu público dje Ley di Dios. E instructornan di e tempu ei a duna nificacion na nan lesamentu dje Ley, yudando nan oyentenan asina pa comprendé i ser motivá pa aplicá loke nan a tende. Esaki a hiba na gran goso. (Nehemías 8:8, 12) Pues haci’é bo custumber pa asistí na e reunionnan di Testigonan di Jehova. (Hebreonan 10:24, 25) Esaki lo yudá bo comprendé i despues aplicá e conocimentu di Dios den bo bida i lo trece felicidad pa bo. Dor di ser parti dje hermandad cristian mundial lo yudá bo keda pegá na Jehova. I manera nos lo mira, bo por haña berdadero siguridad entre e pueblo di Dios.

TEST BO CONOCIMENTU

Pakico bo mester hala cerca di Jehova?

Cua ta algun rekisito pa hala cerca di Dios?

Kico bo por incluí den bo oracionnan?

Pakico bo mester perseverá den oracion?

Con bo por scucha na Jehova awe?

[Plachi di henter página 157]