Mantené Bo Wowo Simpel

¹ Den Hesus su Sermon Riba Seru, el a hala atenshon na e tremendo influensia ku nos wowo figurativo òf spiritual por tin riba henter nos bida. El a bisa: “Si bo wowo ta bon [“simpel,” NW], henter bo kurpa lo ta yen di lus. Ma si bo wowo ta malu, henter bo kurpa lo ta yen di skuridat.” (Mat. 6:22, 23) Un wowo simpel ta un wowo ku ta enfoká riba un solo propósito, esta, hasimentu di e boluntat di Dios, sin ku e ta ser distraí dor di ansiedat innesesario pa kosnan material. (Mat. 6:19-21, 24-33) Kiko por yuda nos mantené un wowo simpel?

² Kultivá e Abilidat di Ta Kontentu ku Loke Bo Tin: Segun Beibel, un persona tin e obligashon di perkurá adekuadamente pa e nesesidatnan di su famia. (1 Tim. 5:8) Pero esei no ta rekerí ku konstantemente nos mester ta en buska di lo mihó i lo último. (Pro. 27:20; 30:8, 9) Mas bien, e Skritura ta urgi nos pa ta kontentu ku “kuminda i paña pa bisti,” esta, ku e nesesidatnan di bida. (1 Tim. 6:8; Heb. 13:5, 6) Si nos sigui e konseho aki, esei lo yuda nos mantené nos wowo riba e kosnan korekto.

³ No ta sabí pa nos hinka nos kurpa den debenan innesesario ni yena nos bida ku poseshonnan òf aktividatnan ku lo bira un peso pa nos i rekerí hopi tempu i atenshon di nos. (1 Tim. 6:9, 10) Kon nos por evitá esaki? Ora bo ta bai tuma un desishon, hasi orashon sinsero tokante e asuntu i evaluá onestamente si loke bo ta bai hasi lo no interferí ku bo aktividatnan spiritual. Sea determiná pa mantené kosnan spiritual na promé lugá den bo bida.—Fil. 1:10, NW; 4:6, 7.

⁴ Simplifiká Bo Estilo di Bida: Un otro yudansa pa resistí e atrakshon di materialismo ta dor di buska maneranan pa simplifiká bo estilo di bida. Un ruman hòmber ku a ripará ku su famia por a biba bon sin demasiado kos material a bisa: “Awor mi por hasi hopi mas tantu den e kongregashon pa sirbi mi rumannan. Mi ta konvensí ku Yehova ta bendishoná tur su sirbidónan ora nan duna adorashon berdadero prioridat riba nan interesnan personal.” Abo lo por haña mas bendishon dor di simplifiká bo estilo di bida?

⁵ Konstantemente nos tin ku hasi esfuerso pa por resistí e influensia di Satanas, su mundu materialista i nos propio karni imperfekto. P’esei, en bes di laga nos wowo dual, laga nos manten’é fihá riba hasimentu di e boluntat di Dios i riba nos presioso speransa di bida eterno.—Pro. 4:25; 2 Kor. 4:18.

[Study Questions]

1. Ki ora bo tin un wowo simpel, i dikon esaki ta importante?

2. Ki punto di bista relashoná ku kosnan material, e Palabra di Dios ta animá pa nos tin?

3. Kiko por yuda nos evitá di pone karga riba nos mes?

4. Dikon nos mester buska maneranan pa simplifiká nos estilo di bida?

5. Dikon nos tin ku hasi esfuerso konstantemente pa mantené nos wowo simpel?