Ai pa un Generashon Ku No Kier A Arepentí

Hesus tabatin masha rèspèt pa Huan Boutista. Pero kiko mayoria di e hendenan di e tempu ei tabata pensa di Huan? Wèl, Hesus a hasi un komparashon ku ta yuda nos kontestá e pregunta ei. El a mustra ku ta manera ora mucha chikitu ta sinta den plasa. Algun ta yama otro mucha i bisa nan: “Nos a toka flùit pa boso, ma boso no a baila; nos a kanta kantika di morto, ma boso no a bati boso pechu di tristesa.”—Mateo 11:16, 17.

Kiko Hesus tabata ke men? El a splika: “Huan a bini i no a kome ni bebe, ma hende a laga sa: ‘E tin demoño;’ e Yu di hende a bini i e sí a kome i bebe, i tòg hende a laga sa: ‘Wak! Un hòmber haragan i bisiá na biña, amigu di kobradó di belasting i pekadó.’” (Mateo 11:18, 19) Sí, Huan a hiba un bida simpel komo nazareo i tabata asta apstené su mes di biña. Ma e hendenan tabata bisa ku e tin demoño. (Numbernan 6:2, 3; Lukas 1:15) Hesus, kontrali na Huan, a biba manera tur otro hende i a kome i bebe na un manera balansá, tòg nan a bisa ku e ta haragan. Ta parse ku tabata imposibel pa agradá e hendenan.

Hesus a kompará e generashon ei ku mucha chikitu riba plasa ku ta nenga di baila ora otro mucha ta toka flùit òf ku ta nenga di reflehá tristesa ora otronan ta kanta kantika di morto. Anto el a bisa: “Ma sabiduria ta demostrá pa medio di su obranan ku e ta hustu.” (Mateo 11:16, 19) E obranan ku Huan i Hesus a efektuá—esta, loke nan a bisa òf hasi—a duna prueba ku e akusashonnan ku e hendenan tabatin kontra nan tabata falsu.

Despues ku Hesus a mustra ku e generashon ei ta un generashon rebelde ku no kier a arepentí, el a reprochá, òf kondená, Korazin, Bètsaida i Kapernaum, statnan kaminda el a hasi obranan poderoso. Hesus a bisa ku si el a hasi e obranan ei na Tiro i Sidon, dos stat ku tabata keda na Fenisia, e statnan akí sí lo a arepentí. El a menshoná Kapernaum tambe, e stat kaminda e tabata biba pa algun tempu kaba i tabatin hopi aktividat spiritual, pasobra asta einan mayoria di hende no a aseptá su mensahe. P’esei, dirigiendo su mes na e stat ei, el a bisa: “Riba Dia di Huisio lo ta mas soportabel pa e tera di Sódoma ku pa bo.”—Mateo 11:24.

Anto Hesus a alabá su Tata selestial, kende ta skonde hoyanan spiritual presioso pa “hende sabí i intelektual” pero ta revelá nan na hende humilde manera mucha chikitu. (Mateo 11:25) I na e okashon ei, Hesus a ekstendé un invitashon atraktivo na hende humilde, bisando: “Bini serka mi, boso tur ku ta traha duru i ku ta kargá, i lo mi refreská boso. Tuma mi yugo riba boso skouder i siña di mi, pasobra mi tin un genio suave i un kurason humilde, i boso alma lo keda refreská. Pasobra mi yugo ta suave, i mi karga no ta pisá.”—Mateo 11:28-30.

Den ki manera Hesus a duna e hendenan refreskamentu? E lidernan religioso a karga e pueblo ku tradishonnan ku a hasi nan katibu; un ehèmpel di esaki tabata e reglanan estrikto ku nan a pone pa sabat. Ma Hesus a refreská e hendenan pasobra el a siña nan e bèrdat di Dios ku a libra nan for di tur e tradishonnan ei. El a siña esnan ku tabata sinti nan oprimí bou di outoridatnan polítiko kon nan por a haña alivio. I el a konsolá esnan ku tabata afligí pa motibu di nan pikánan. Sí, Hesus a siña nan kon nan por a haña pordon pa nan pikánan i kon nan por a rekonsiliá ku Dios.

Tur esnan ku a aseptá Hesus su yugo bondadoso por a dediká nan mes na Dios i sirbi nos Tata selestial kende ta yen di kompashon i miserikòrdia. I Dios su mandamentunan no ta pisá, pues sirbi Dios no ta un karga.—1 Huan 5:3.