Mishna i Dios Su Ley na Moises

“NOS ta cuminsá cu e impresion di cu nos ta djoin un combersacion tocante tópiconan cu nos nunca por comprendé i cu tin basta tempu caba andando . . . Nos . . . ta sinti como si fuera nos ta den un sala di tránsito na un aeropuerto leu. E palabranan cu nos ta capta for dje combersacionnan nos ta comprendé, pero nan nificacion i e preocupacion dje hendenan, i mas cu tur cos, e urgencia den nan bos, ta confundí nos.” Asina e erudito hudiu Jacob Neusner ta describí e sintimentu cu lectornan lo por haña ora nan lesa Mishna pa promé bes. Neusner ta agregá: “Mishna no ta cuminsá ningun caminda. E ta caba abruptamente.”

Den A History of Judaism, Daniel Jeremy Silver ta yama Mishna “e texto esencial di hudaismo rabínico.” De facto, e ta comentá mas aleu: “Mishna a reemplasá Bijbel como e curículo principal di educacion [hudiu] continuo.” Pakico un buki cu un estilo asina misterioso a bira asina importante?

Parti dje contesta ta sinta den e declaracion aki den Mishna: “Moises a ricibí Tora na Sínai i a entregu’é na Hosué, Hosué a entregu’é na ancianonan, i ancianonan na profetanan. I profetanan a entregu’é na e hombernan dje asamblea grandi.” (Avot 1:1) Mishna ta pretendé di trata cu informacion cu a ser entregá na Moises na Ceru di Sínai—un parti no-skirbí dje Ley di Dios duná na Israel. Hombernan dje asamblea grandi (yamá despues e Sanedrin) a ser considerá como parti di un sucesion largu di eruditonan sabí, of sabionan, cu a pasa cierto siñansanan oralmente di generacion pa generacion te ora esakinan finalmente a ser registrá den Mishna. Pero esei ta cuadra cu e echonan? Ken realmente a skirbi Mishna, i pakico? Su contenido a originá cu Moises na Sínai? E tin nificacion pa nos awe?

Hudaismo Sin un Tempel

Ora e Scritura a ser skirbí bou di inspiracion, creencia den un ley oral divino banda dje Ley skirbí di Moises tabata algu desconocí.a (Exodo 34:27) Hopi siglo despues e fariseonan tabata e grupo den hudaismo cu a desaroyá i promové e concepto aki. Durante e promé siglo E.C., e saduceonan i otro hudiunan a bai contra e siñansa no-bíblico aki. Sin embargo, tanten cu e tempel den Jerusalem tabata e centro di adoracion hudiu, e cuestion tocante un ley oral tabata secundario. E bida di tur hudiu a haña structura i un midí di stabilidad dor di adoracion n’e tempel.

Sin embargo, na 70 E.C., e nacion hudiu a enfrentá un crísis religioso di proporcionnan inimaginabel. Legionnan romano a destruí Jerusalem, i mas cu un miyon hudiu a ser matá. E tempel, e centro di nan bida spiritual, no tabat’ei mas. Tabata imposibel pa biba segun e Ley di Moises, cu a rekerí sacrificio i sirbishi sacerdotal n’e tempel. E piedra di fundeshi di hudaismo a stop di existí. E erudito dje Talmud, Adin Steinsaltz, ta skirbi: “E destruccion . . . na 70 E.C. a haci e reconstruccion di henter e structura di bida religioso un necesidad urgente.” I en berdad nan a reconstruyé.

Asta promé cu e tempel a ser destruí, Yohanan Ben Zakkai, un disipel respetá dje lider fariseo Hillel, a haña permit for di Vespasiano (kende pronto lo a bira emperador) pa muda e centro spiritual di hudaismo i e Sanedrin for di Jerusalem pa Jabne. Manera Steinsaltz ta splica, despues dje destruccion di Jerusalem, Yohanan Ben Zakkai “a enfrentá e desafio di establecé un centro nobo pa e hendenan i yuda nan ahustá n’e circunstancianan nobo mediante cua mester a redirigí celo religioso na un otro punto focal awor cu e Tempel a stop di existí.” E punto focal nobo ei tabata e ley oral.

Cu e tempel na ruina, e saduceonan i otro sectanan hudiu no a ofrecé ningun alternativa convincente. E fariseonan a bira e movementu hudiu principal dor cu nan a integrá e gruponan opositor huntu. Pa enfatisá unidad, e rabinan principal a stop di yama nan mes fariseo, un término yen di implicacionnan sectario i partidista. Nan a bira conocí simplemente como e rabinan, “e sabionan di Israel.” E sabionan aki lo a crea un sistema di creencia pa incorporá nan concepto dje ley oral. Lo e tabata un structura spiritual muchu ménos vulnerabel pa atake humano cu e tempel.

Consolidacion dje Ley Oral

Aunke e academia rabínico na Jabne (40 kilometer west di Jerusalem) tabata awor e centro principal, otro academianan cu a siña e ley oral a cuminsá lanta manera paddestoel den henter Israel i asta te na Babilonia i Roma. Sin embargo, esaki a crea un problema. Steinsaltz ta splica: “Tanten cu e sabionan tabata reuní huntu i cu un solo grupo di homber [den Jerusalem] tabata efectuá e trabou escolástico principal, e uniformidad di tradicion a keda conserbá. Pero e multiplicacion drástico di maestronan i e establecimentu di scolnan separá a crea . . . un exceso di formanan i métodonan di expresion.”

Maestronan dje ley oral a ser yamá tannaim, un término derivá for di un palabra arameo cu ta nificá “studia,” “ripití” of “siña.” Esaki a enfatisá nan método di siña i instruí ley oral dor di ripiticion intenso i memorisacion. Pa facilitá memorisacion di tradicionnan oral, cada regla of tradicion a ser reducí na un frase corticu i conciso. Ménos palabra, mihó. E rabinan a purba logra un forma poético i convencional, i hopi biaha nan tabata canta e frasenan. Sin embargo, e reglanan aki tabata desorganisá, i nan a varia mashá for di un maestro pa otro.

Akiba ben Joseph (rond di 50-135 E.C.) tabata e promé rabi cu a duna forma i structura specífico na hopi diferente tradicion oral. Relacioná cuné, Steinsaltz ta skirbi: “Su contemporáneonan a compará su actividad cu e trabou di un obrero cu ta bai den cunucu i ta yena den su macutu kico cu e haña den su caminda, anto ora e regresá cas e ta pone cada tipo separá. Akiba a studia numeroso tópico desorganisá i a clasificá nan den categorianan distinto.”

Den siglo dos E.C.—mas cu 60 aña despues dje destruccion di Jerusalem—Bar Kokhba a encabesá un di dos rebelion hudiu grandi contra Roma. Un biaha mas, rebelion a trece desaster. Akiba i hopi di su disipelnan tabata entre e casi un miyon víctimanan hudiu. Cualkier speransa pa reconstruí e tempel a ser desbaratá ora emperador romano Adriano a prohibí hudiunan pa drenta Jerusalem, excepto riba e aniversario dje destruccion dje tempel.

E tannaim cu a biba despues di Akiba no a mira e tempel den Jerusalem nunca. Pero e patronchi structurá di studia e tradicionnan dje ley oral a bira nan “tempel,” of centro di adoracion. E último tannaim, Huda ha-Nasi, a sigui cu e trabou di fortificá e structura aki dje ley oral cu Akiba i su disipelnan a cuminsá cuné.

E Composicion di Mishna

Huda ha-Nasi tabata un desendiente di Hillel i Gamaliel.b El a nace durante e periodo dje rebelion di Bar Kokhba i a bira cabes dje comunidad hudiu den Israel na fin di siglo dos i na cuminsamentu di siglo tres E.C. E título ha-Nasi cu ta nificá “e prins,” a indicá e posicion cu e tabatin den bista di su compañeronan hudiu. Hopi biaha nan tabata yam’é simplemente rabi. Huda ha-Nasi a encabesá tantu su mes academia como e Sanedrin, promé na Bet She’arim i despues na Seforis na Galilea.

Ora Huda ha-Nasi a realisá cu futuro conflictonan cu Roma por pone e transmision dje ley oral mes na peliger, el a determiná pa dun’é un structura cu lo a garantisá cu e ta keda conserbá. El a reuní e eruditonan di mas sobresaliente di su tempu na su academia. Nan a debatí riba cada punto i tradicion dje ley oral. E resúmennan dje discusionnan aki a ser consolidá den frasenan increiblemente comprimí, segun un patronchi estricto di prosa poético hebreo.

E resúmennan aki a ser organisá den seis division, of Ordu, principal, segun tópiconan principal. Despues Huda a dividí esakinan den 63 seccion, of ensayo. Awor e structura spiritual tabata completo. Te n’e tempu ei, tradicionnan asina semper a ser transmití oralmente. Pero como un proteccion adicional, e paso revolucionario final a ser tumá—esun di pone tur cos pretu riba blancu. E impresionante structura nobo skirbí aki cu ta incorporá e ley oral a ser yamá Mishna. E nomber Mishna ta bini dje palabra hebreo sha·nahʹ, cu ta nificá “ripití,” “studia,” of “siña.” E ta e ekivalente dje palabra arameo tenaʼʹ, cu ta bini di tan·na·ʼimʹ, e término cu ta ser aplicá na maestronan di Mishna.

E propósito di Mishna no tabata pa establecé un código definitivo. El a trata mas cu e excepcionnan, asumiendo cu e lector tabata conocé e principionan básico. En realidad, el a resumí loke a ser tratá i siñá den e academianan rabínico durante e periodo di Huda ha-Nasi. E intencion tabata pa Mishna sirbi como un boskeho dje ley oral pa mas debate, un ‘frame’ of structura básico riba cua mester a construí.

En bes di revelá cualkier cos cu a ser duná na Moises na Ceru di Sínai, Mishna ta duna perspicacia den e desaroyo dje ley oral, un concepto cu a cuminsá cu e fariseonan. Informacion registrá den Mishna ta tira algun lus riba declaracionnan den e Scritura Griego Cristian i riba cierto combersacionnan entre Jesucristo i e fariseonan. Sin embargo, nos mester ta cauteloso pasobra e ideanan cu bo ta haña den Mishna ta reflehá puntonan di bista hudiu di siglo dos E.C. Mishna ta e coneccion entre e periodo di e di dos tempel i e Talmud.

[Nota]

[Kuadro na página 26]

E Divisionnan di Mishna

Mishna ta dividí den seis Ordu. Esakinan ta consistí di 63 buki mas chikitu of ensayo, dividí den capítulo i mishnayot, of paragraf (no versículo).

1. Zeraim (Leynan di Agricultura)

E ensayonan aki ta contené consideracionnan tocante oracionnan pa e cuminda i asuntunan cu ta trata cu agricultura. Tambe nan ta contené reglanan riba dunamentu di diesmo, porcionnan sacerdotal, recogementu di resto despues di cosecha i añanan sabático.

2. Moed (Ocasionnan Santu, Festivalnan)

E ensayonan den e Ordu aki ta considerá leynan relacioná cu sabat, e Dia di Expiacion i otro festivalnan.

3. Nashim (Hende Muher, Ley Matrimonial)

Esakinan ta ensayonan cu ta considerá matrimonio i divorcio, voto, nazareonan i casonan di sospecho di adulterio.

4. Nezikin (Dañonan i Ley Civil)

E ensayonan den e Ordu aki ta cubri tópiconan relacioná cu ley civil i di propiedad, corte i castigu, e funcion dje Sanedrin, idolatria, huramentu i Etica dje Tatanan (Avot).

5. Kodashim (Sacrificionan)

E ensayonan aki ta trata regulacionnan relacioná cu ofrendanan di animal i di grano i tambe dimensionnan dje tempel.

6. Toharot (Ritualnan di Purificacion)

E Ordu aki ta consistí di ensayonan cu ta trata puresa ritual, bañamentu, labamentu di man, malesa di cueru i impuresa di diferente obheto.

[Kuadro na página 28]

Mishna i e Scritura Griego Cristian

Mateo 12:1, 2: “Na e temporada ei Jesus a pasa den e cunucunan di grano riba e dia di sabat. Su disipelnan a haña hamber i a cuminsá ranca tapushi di grano i come. Ora nan a mira esaki, e fariseonan a bis’é: “Mira! Bo disipelnan ta haciendo loke no ta legal pa haci riba sabat.’” E Scritura Hebreo no ta prohibí loke Jesus su disipelnan a haci. Pero den Mishna nos ta haña un lista di 39 actividad cu e rabinan a prohibí riba sabat.—Sabat 7:2.

Mateo 15:3: “Contestando, [Jesus] a bisa nan: ‘Pakico boso tambe ta violá e mandamentu di Dios pa causa di boso tradicion?’” Mishna ta confirmá e actitud aki. (Sanedrin 11:3) Nos ta lesa: “Tin mas severidad tras di [obedencia na] e palabranan dje Escribanan cu [obedencia na] e palabranan dje Ley [skirbí]. Si un homber a bisa: ‘Nos no tin ningun obligacion pa bisti cahitanan di ley,’ violando asina e palabranan dje Ley, e no ta culpabel; [pero si el a bisa]: ‘Nan mester tin cincu particion,’ agregando asina n’e palabranan dje Escribanan, e ta culpabel.”—The Mishnah, di Herbert Danby, página 400.

Efesionan 2:14: “E [Jesus] ta nos pas, e cu a haci e dos gruponan unu i a destruí e muraya meimei cu a separá nan.” Mishna ta bisa: Den e Ceru di Tempel tabatin un reling di trali (e Soreg), dies man haltu.” (Middot 2:3) Gentilnan a ser prohibí pa pasa despues dje punto aki, pa drenta e pationan interior. Tal bes apostel Pablo a referí na e muraya aki, den un sentido figurativo ora el a skirbi e efesionan na 60 of 61 E.C tempu e muraya tabat’ei ainda. E muraya simbólico tabata e pacto di Ley cu pa hopi tempu a separá e hudiunan for dje gentilnan. Sin embargo, riba e base dje morto di Cristo na 33 E.C., e muraya ei a ser abolí.